វិស័យគ្រាប់ស្វាយចន្ទីវៀតណាមចំពោះមុខតម្រូវការលើកកម្ពស់តម្លៃនាំចេញ

សមាគមគ្រាប់ស្វាយចន្ទីវៀតណាម ចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការជាមួយដៃគូក្នុងឧស្សាហកម្មគ្រាប់ស្វាយចន្ទី។

ពីទំហំនាំចេញគ្រាប់ស្វាយចន្ទីមិនទាន់កែច្នៃនៅមានកម្រិតនៅឡើយ វៀតណាមបានអភិវឌ្ឍខ្លួនក្លាយជាមជ្ឈមណ្ឌលកែច្នៃ និងនាំចេញគ្រាប់ស្វាយចន្ទីកែច្នៃឈានមុខគេលើពិភពលោក។ ទោះជាយ៉ាងណាក៏ដោយ ប្រៀបខ្លាំងដែលធ្លាប់បានជួយឱ្យវិស័យគ្រាប់ស្វាយចន្ទីរក្សាជំហររបស់ខ្លួនអស់រយៈពេលជិត ២០ ឆ្នាំមកនេះ កំពុងលេចចេញនូវកម្រិតកំណត់ជាបណ្តើរៗ ជាពិសេសនៅពេលដែលប្រភពវត្ថុធាតុដើមពឹងផ្អែកខ្លាំងលើការនាំចូល ហើយបណ្តាប្រទេសផលិតគ្រាប់ស្វាយចន្ទីឆៅកាន់តែយកចិត្តទុកដាក់លើការកែច្នៃនៅនឹងកន្លែង។

ក្នុងបរិបទនោះ ការផ្លាស់ប្តូរគំរូកំណើន ការកាត់បន្ថយការពឹងផ្អែកលើបរិមាណគ្រាប់ស្វាយចន្ទីកែច្នៃនាំចេញ និងការលើកកម្ពស់តម្លៃផលិតផល បានក្លាយជាតម្រូវការដ៏សំខាន់សម្រាប់យុទ្ធសាស្ត្រអភិវឌ្ឍន៍វិស័យគ្រាប់ស្វាយចន្ទីក្នុងរយៈពេលពី ១៥ ដល់ ២០ ឆ្នាំខាងមុខ។

សម្ពាធពីប្រភពវត្ថុធាតុដើម និងការប្រកួតប្រជែងអន្តរជាតិ

យោងតាមសមាគមគ្រាប់ស្វាយចន្ទីវៀតណាម ក្រោយរយៈពេលជាច្រើនទសវត្សរ៍នៃការអភិវឌ្ឍ ការផ្តោតសំខាន់លើផលិតផលកែច្នៃបឋម កំពុងធ្វើឱ្យតម្លៃបន្ថែមនៃវិស័យនេះមិនទាន់សមាមាត្រទៅនឹងទំហំនាំចេញនៅឡើយ។ គំរូនេះក៏ធ្វើឱ្យសហគ្រាសងាយរងផលប៉ះពាល់ចំពោះការប្រែប្រួលនៃតម្លៃ និងតម្រូវការទីផ្សារផងដែរ។

សមាគមចាត់ទុកថា វិស័យគ្រាប់ស្វាយចន្ទីត្រូវបោះជំហានជាបណ្តើរៗពីការប្រកួតប្រជែងលើតម្លៃលក់ និងបរិមាណ ទៅជាគុណភាព និងតម្លៃនៃផលិតផល។ ក្នុងនោះ ការវិនិយោគលើបច្ចេកវិទ្យាកែច្នៃស៊ីជម្រៅ ការអភិវឌ្ឍគ្រាប់ស្វាយចន្ទីលីង គ្រាប់ស្វាយចន្ទីប្រឡាក់គ្រឿងទេស គ្រាប់ធញ្ញជាតិចម្រុះ និងវត្ថុធាតុដើមចំណីអាហារធ្វើពីគ្រាប់ស្វាយចន្ទី គឺជាទិសដៅស្របទៅនឹងនិន្នាការនៃការទទួលទានប្រកបដោយសុខភាព ភាពងាយស្រួល និងមេត្រីភាពបរិស្ថាន។

លោក Phung Van Sam ប្រធានក្រុមប្រឹក្សាភិបាលនៃក្រុមហ៊ុនភាគហ៊ុនសាជីវកម្ម Hanfimex វៀតណាម បានវាយតម្លៃថា ទោះបីជាសម្រេចបានទំហំទឹកប្រាក់នាំចេញយ៉ាងធំធេងក៏ដោយ ចំណែកតម្លៃបន្ថែមដែលសហគ្រាសគ្រាប់ស្វាយចន្ទីវៀតណាមរក្សាទុកបាននៅមានកម្រិតនៅឡើយ។

យោងតាមលោក សហគ្រាសក្នុងស្រុកបច្ចុប្បន្នផ្តោតច្រើនលើដំណាក់កាលកែច្នៃគ្រាប់ស្វាយចន្ទី (បកសំបកយកសាច់) ខណៈដែលដំណាក់កាលបង្កើតតម្លៃខ្ពស់ ដូចជា ការកែច្នៃផលិតផលប្រើប្រាស់ ការអភិវឌ្ឍម៉ាកយីហោ និងការចែកចាយដោយផ្ទាល់ទៅកាន់អ្នកទិញចុងក្រោយ មិនទាន់ត្រូវបានទាញយកផលប្រយោជន៍ឱ្យបានសមស្របនៅឡើយ។

ជាក់ស្តែង តម្លៃលក់រាយនៃផលិតផលគ្រាប់ស្វាយចន្ទីនៅតាមផ្សារទំនើបអន្តរជាតិ គឺខ្ពស់ជាងគួរឱ្យកត់សម្គាល់បើធៀបនឹងតម្លៃដែលសហគ្រាសនាំចេញទទួលបានមកវិញ។ គម្លាតនេះបង្ហាញឱ្យឃើញថា វិស័យគ្រាប់ស្វាយចន្ទីនៅតែមានឱកាសជាច្រើនក្នុងការបង្កើនតម្លៃ ប្រសិនបើចូលរួមកាន់តែស៊ីជម្រៅទៅក្នុងដំណាក់កាលក្រោយៗនៃខ្សែច្រវាក់ផ្គត់ផ្គង់។

ក្រៅពីកម្រិតកំណត់នៃតម្លៃបន្ថែម វិស័យគ្រាប់ស្វាយចន្ទីក៏រងផលប៉ះពាល់ពីការប្រែប្រួលនៃទីផ្សារវត្ថុធាតុដើមពិភពលោកផងដែរ។ បណ្តាប្រទេសនៅអាហ្វ្រិក និងកម្ពុជា កាន់តែចូលរួមយ៉ាងខ្លាំងក្លាទៅក្នុងសកម្មភាពកែច្នៃ ជាជាងគ្រាន់តែផ្គត់ផ្គង់គ្រាប់ស្វាយចន្ទីឆៅដូចពីមុន។

ទន្ទឹមនឹងនោះ ទិន្នផលវត្ថុធាតុដើមពឹងផ្អែកលើរដូវកាល តម្លៃប្រែប្រួលជាញឹកញាប់ បង្កការលំបាកដល់សហគ្រាសក្នុងការកសាងផែនការផលិតកម្ម និងការគ្រប់គ្រងចំណាយ។ ស្តង់ដារកាន់តែតឹងរ៉ឹងពីអតិថិជនអន្តរជាតិ ក៏ធ្វើឱ្យកើនឡើងនូវចំណាយធានាគុណភាព និងការអនុលោមតាមបទប្បញ្ញត្តិផងដែរ។

ដោយវិភាគលើបញ្ហានេះ លោក Ta Quang Huyen ប្រធានក្រុមប្រឹក្សាភិបាលនៃក្រុមហ៊ុនភាគហ៊ុន Hoang Son I បានចាត់ទុកថា ប្រៀបខ្លាំងប្រកួតប្រជែងក្នុងការកែច្នៃ និងនាំចេញគ្រាប់ស្វាយចន្ទីកែច្នៃរបស់វៀតណាម កំពុងឈានដល់កម្រិតកំណត់ជាបណ្តើរៗ ដោយសារតែចំណាយផលិតកម្មខ្ពស់ និងសមត្ថភាពម្ចាស់ការលើវត្ថុធាតុដើមនៅមានកម្រិត។

បច្ចុប្បន្ន ភាគច្រើននៃប្រភពគ្រាប់ស្វាយចន្ទីឆៅបម្រើដល់ការកែច្នៃនៅវៀតណាម គឺត្រូវបាននាំចូលពីអាហ្វ្រិក និងកម្ពុជា។ ទោះជាយ៉ាងណាក៏ដោយ ប្រទេសផ្គត់ផ្គង់ជាច្រើនកំពុងអនុវត្តវិធានការរឹតបន្តឹងការនាំចេញគ្រាប់ស្វាយចន្ទីឆៅ ព្រមទាំងលើកទឹកចិត្តដល់ការវិនិយោគកែច្នៃក្នុងស្រុក ដើម្បីបង្កើនតម្លៃ។

ការផ្លាស់ប្តូរនេះបានធ្វើឱ្យបណ្តាសហគ្រាសវៀតណាម ដែលធ្លាប់មានប្រៀបខ្លាំងយូរអង្វែងលើបច្ចេកវិទ្យាកែច្នៃគ្រាប់ស្វាយចន្ទី ត្រូវប្រឈមមុខនឹងសម្ពាធប្រកួតប្រជែងកាន់តែធំ។

យោងតាមលោក Ta Quang Huyen ដើម្បីផលិតបានមួយឯកតាគ្រាប់ស្វាយចន្ទីកែច្នៃ បរិមាណគ្រាប់ស្វាយចន្ទីឆៅដែលត្រូវដឹកជញ្ជូនគឺធំជាងច្រើនដង។ កត្តានេះធ្វើឱ្យចំណាយភស្តុភារកម្មក្លាយជាគុណវិបត្តិដ៏គួរឱ្យកត់សម្គាល់។ ចំណាយផលិតកម្មគ្រាប់ស្វាយចន្ទីកែច្នៃនៅវៀតណាមបច្ចុប្បន្ន គឺខ្ពស់ជាងប្រមាណ ២៥-៣០% បើធៀបនឹងផលិតផលដែលត្រូវបានកែច្នៃនៅអាហ្វ្រិក។

នៅពេលដែលបណ្តាប្រទេសផលិតវត្ថុធាតុដើមបោះជំហានពង្រីកឧស្សាហកម្មកែច្នៃក្នុងស្រុកជាបណ្តើរៗ សមត្ថភាពបន្តកំណើនដោយផ្អែកលើគ្រាប់ស្វាយចន្ទីកែច្នៃបែបប្រពៃណីរបស់វៀតណាមនឹងត្រូវរួមតូច។ ប្រសិនបើគ្មានទិសដៅអភិវឌ្ឍន៍ថ្មីទេ វិស័យគ្រាប់ស្វាយចន្ទីអាចនឹងឈានចូលដំណាក់កាលកំណើនយឺត ឬថែមទាំងធ្លាក់ចុះ បើទោះបីជានៅតែរក្សាតួនាទីជាមជ្ឈមណ្ឌលកែច្នៃដ៏ធំនៃពិភពលោកក៏ដោយ។

សម្លឹងមើលពីដំណើរការនវានុវត្តន៍បច្ចេកវិទ្យា លោក On Dan Khuong ប្រធានសម្ព័ន្ធក្រុមហ៊ុន Dan On បានឱ្យដឹងថា វិស័យគ្រាប់ស្វាយចន្ទីវៀតណាមមានការផ្លាស់ប្តូរយ៉ាងធំធេងពីផលិតកម្មដោយដៃខ្នាតតូច ទៅជាការអនុវត្តបច្ចេកវិទ្យាទំនើប។

ចាប់តាំងពីទសវត្សរ៍ឆ្នាំ ២០០០ មក ដំណាក់កាលបកសំបកដោយដៃបានជួយឱ្យសហគ្រាសលើកកម្ពស់តម្លៃគ្រាប់ស្វាយចន្ទីឡើងជាច្រើនដង បើធៀបនឹងវត្ថុធាតុដើមឆៅ។ នេះជាសក្ខីភាពបញ្ជាក់ពីតួនាទីនៃការកែច្នៃក្នុងការបង្កើនតម្លៃពាណិជ្ជកម្ម។

ឆ្លងកាត់ដំណើរការសន្សំសំចុកបច្ចេកវិទ្យា និងបទពិសោធន៍ផលិតកម្ម វៀតណាមបានបង្កើតឡើងនូវប្រៀបខ្លាំងពីការរួមបញ្ចូលគ្នារវាងប្រភពគ្រាប់ស្វាយចន្ទីឆៅពីអាហ្វ្រិក សមត្ថភាពកែច្នៃ កម្លាំងពលកម្មជំនាញ និងភាពស្វាហាប់របស់សហគ្រាស។

ទោះជាយ៉ាងនេះក្តី លោក Khuong វាយតម្លៃថាតម្លៃពាណិជ្ជកម្មនៃគ្រាប់ស្វាយចន្ទីនៅមិនទាន់ឆ្លុះបញ្ចាំងបានពេញលេញពីគុណភាព និងសក្តានុពលអាហារូបត្ថម្ភនៅឡើយទេ ហើយថែមទាំងទាបជាងប្រភេទគ្រាប់ធញ្ញជាតិមួយចំនួនផ្សេងទៀតផង។ ដូច្នេះ ជាជាងបន្តផ្តោតលើការពង្រីកបរិមាណ សហគ្រាសចាំបាច់ត្រូវអភិវឌ្ឍផលិតផលដែលមានតម្លៃខ្ពស់ជាងមុន ក្នុងនោះមានការលាយបញ្ចូលគ្រាប់ស្វាយចន្ទីជាមួយគ្រាប់ធញ្ញជាតិ និងវត្ថុធាតុដើមផ្សេងទៀត ដើម្បីឆ្លើយតបទៅនឹងផ្នែកទីផ្សារប្រើប្រាស់ជាច្រើន។

ការវិនិយោគកែច្នៃស៊ីជម្រៅផ្សារភ្ជាប់នឹងការអភិវឌ្ឍទីផ្សារ

ចំពោះមុខការផ្លាស់ប្តូរនៃវិស័យនេះ លោក Phung Van Sam ចាត់ទុកថាសហគ្រាសគ្រាប់ស្វាយចន្ទីវៀតណាមត្រូវបន្តលើកកម្ពស់ចំណុចខ្លាំងលើគុណភាពផលិតផល និងការគ្រប់គ្រងចំណាយ ព្រមទាំងម្ចាស់ការប្តូរទៅកាន់ផ្នែកទីផ្សារដែលមានតម្លៃបន្ថែមខ្ពស់។

យោងតាមនោះ ក្រៅពីផលិតផលគ្រាប់ស្វាយចន្ទីកែច្នៃនាំចេញបែបប្រពៃណី សហគ្រាសចាំបាច់ត្រូវពង្រីកបណ្តាផលិតផលគ្រាប់ស្វាយចន្ទីលីង គ្រាប់ស្វាយចន្ទីប្រឡាក់គ្រឿងទេស និងវត្ថុធាតុដើមចម្រុះ ដើម្បីបម្រើតម្រូវការប្រើប្រាស់ផ្ទាល់ និងឧស្សាហកម្មចំណីអាហារ។

ការអភិវឌ្ឍផលិតផលក៏ត្រូវដើរទន្ទឹមគ្នានឹងការវិនិយោគលើបច្ចេកវិទ្យា ការកសាងម៉ាកយីហោ ការពង្រីកពាណិជ្ជកម្មអេឡិចត្រូនិក និងការតភ្ជាប់ដោយផ្ទាល់ជាមួយអតិថិជនអន្តរជាតិ។ តាមរយៈបណ្តាញទាំងនេះ សហគ្រាសអាចក្តាប់បានកាន់តែប្រសើរនូវចំណង់ចំណូលចិត្ត ម្ចាស់ការអភិវឌ្ឍផលិតផលស្របតាមក្រុមអតិថិជននីមួយៗ និងកាត់បន្ថយការពឹងផ្អែកលើតួនាទីជាអ្នកផ្គត់ផ្គង់នៅក្នុងខ្សែច្រវាក់ចែកចាយសកល។

លោក Sam បានសង្កត់ធ្ងន់ថា ប្រសិទ្ធភាពនៃវិស័យគ្រាប់ស្វាយចន្ទីមិនគួរត្រូវបានវាយតម្លៃត្រឹមតែតាមរយៈបរិមាណ ឬទំហំទឹកប្រាក់នាំចេញនោះទេ ប៉ុន្តែចាំបាច់ត្រូវពិនិត្យមើលតម្លៃជាក់ស្តែងដែលត្រូវបានបង្កើតឡើង និងរក្សាទុកបាន។ ការរួមបញ្ចូលគ្នារវាងការកែច្នៃស៊ីជម្រៅ ជាមួយនឹងការអភិវឌ្ឍម៉ាកយីហោ ការពង្រីកទីផ្សារ និងការលើកកម្ពស់សមត្ថភាពប្រកួតប្រជែង នឹងរួមចំណែកកែលម្អទីតាំងរបស់សហគ្រាសវៀតណាមនៅក្នុងខ្សែច្រវាក់តម្លៃអន្តរជាតិ។

នៅក្នុងទិដ្ឋភាពនៃការរៀបចំចាត់តាំងផលិតកម្ម លោក On Dan Khuong បានស្នើឱ្យពង្រឹងយន្តូបនីយកម្មចាប់ពីដំណាក់កាលប្រមូលផល ដើម្បីកែលម្អផលិតភាពពលកម្ម កាត់បន្ថយចំណាយ ព្រមទាំងលើកកម្ពស់គុណភាព និងទិន្នផលវត្ថុធាតុដើម។

នៅក្នុងបណ្តារោងចក្រកែច្នៃ ក្រៅពីគ្រឿងចក្រ បច្ចេកវិទ្យា និងវិធីសាស្ត្រគ្រប់គ្រង គុណភាពនៃធនធានមនុស្សនៅតែជាកត្តាសំខាន់ដែលកំណត់ប្រសិទ្ធភាពនៃប្រតិបត្តិការ។

លោក Khuong ក៏បានចង្អុលបង្ហាញនូវកម្រិតកំណត់ក្នុងការងារស្រាវជ្រាវ និងអភិវឌ្ឍន៍ (R&D) របស់បណ្តារោងចក្រកែច្នៃគ្រាប់ស្វាយចន្ទីក្នុងស្រុកផងដែរ។ យោងតាមលោក សហគ្រាសមិនគួរគ្រាន់តែផ្តល់អាទិភាពដល់ការពង្រីកសមត្ថភាពផលិត ឬការទិញសម្ភារបរិក្ខារនោះទេ ប៉ុន្តែចាំបាច់ត្រូវវិនិយោគលើការស្រាវជ្រាវផលិតផល ការកែលម្អនីតិវិធីផលិតកម្ម និងការអភិវឌ្ឍផលិតផលប្រភេទថ្មីៗ ដើម្បីទាញយកតម្លៃនៃវត្ថុធាតុដើមឱ្យកាន់តែប្រសើរឡើង។

ដោយមានទស្សនៈដូចគ្នាអំពីភាពចាំបាច់នៃការកែច្នៃស៊ីជម្រៅ លោក Ta Quang Huyen បានវាយតម្លៃថានេះគឺជាទិសដៅផ្លាស់ប្តូរដ៏សំខាន់ ដែលជួយឱ្យវិស័យគ្រាប់ស្វាយចន្ទីកាត់បន្ថយការពឹងផ្អែកលើប្រៀបខ្លាំងនៃការកែច្នៃគ្រាប់ស្វាយចន្ទីបឋមជាបណ្តើរៗ និងបង្កើនតម្លៃផលិតផល។

ទោះជាយ៉ាងណាក៏ដោយ លោកបានកត់សម្គាល់ថា ដំណើរការផ្លាស់ប្តូរទាមទារនូវប្រភពទុនយ៉ាងធំធេងដើម្បីវិនិយោគលើសម្ភារបរិក្ខារ បច្ចេកវិទ្យាទំនើប ព្រមទាំងត្រូវមានយុទ្ធសាស្ត្រទីផ្សារសមស្របផងដែរ។

ដោយសារទំហំនៃការប្រើប្រាស់ក្នុងស្រុកនៅមានកម្រិត ការពង្រីកផលិតកម្មលើបណ្តាផលិតផលកែច្នៃស៊ីជម្រៅ មិនអាចរំពឹងតែលើទីផ្សារក្នុងស្រុកនោះឡើយ។ សហគ្រាសចាំបាច់ត្រូវម្ចាស់ការស្វែងរកទីផ្សារនាំចេញ កំណត់អតិថិជនអន្តរជាតិ និងកសាងផែនការប្រើប្រាស់ភ្លាមៗនៅក្នុងដំណើរការវិនិយោគ។

«ដើម្បីនាំយកផលិតផលចូលទៅក្នុងប្រព័ន្ធផ្សារទំនើប និងបណ្តាញចែកចាយធំៗនៅលើពិភពលោក សហគ្រាសត្រូវបំពេញតាមស្តង់ដារយ៉ាងតឹងរ៉ឹងស្តីពីសុវត្ថិភាពចំណីអាហារ។ ទន្ទឹមនឹងនោះ ការស្រាវជ្រាវទីផ្សារ ការក្តាប់បាននូវចំណង់ចំណូលចិត្ត និងការកំណត់ឱ្យបានត្រឹមត្រូវនូវផ្នែកទីផ្សារ ក្រុមអតិថិជនគោលដៅ មានអត្ថន័យសម្រេចចំពោះសមត្ថភាពប្រើប្រាស់ និងប្រសិទ្ធភាពនៃការវិនិយោគ» លោក Ta Quang Huyen បានផ្តល់អនុសាសន៍បែបនេះ។

យោងតាមក្រុមអ្នកជំនាញ ការលើកកម្ពស់ឋានៈនៃវិស័យគ្រាប់ស្វាយចន្ទីនៅក្នុងខ្សែច្រវាក់តម្លៃសកល តម្រូវឱ្យមានដំណើរការផ្លាស់ប្តូរព្រមៗគ្នា ជាជាងគ្រាន់តែបង្កើនសមត្ថភាពផលិតរបស់រោងចក្រ ឬវិនិយោគដាច់ដោយឡែកលើបច្ចេកវិទ្យា។ បណ្តាកត្តាចាប់ពីវត្ថុធាតុដើម ការរៀបចំចាត់តាំងផលិតកម្ម ការស្រាវជ្រាវផលិតផល រហូតដល់ការត្រួតពិនិត្យគុណភាព និងការឈានទៅរកទីផ្សារ ត្រូវតែផ្សារភ្ជាប់គ្នាយ៉ាងជិតស្និទ្ធ។

សមាគមគ្រាប់ស្វាយចន្ទីវៀតណាមបានតម្រង់ទិសដៅវិស័យនេះឱ្យប្តូរជាបណ្តើរៗពីការប្រកួតប្រជែងដោយតម្លៃ និងបរិមាណ ទៅជាការប្រកួតប្រជែងដោយគុណភាព បច្ចេកវិទ្យា ម៉ាកយីហោ និងតម្លៃបន្ថែម។

ទន្ទឹមនឹងនោះ ការជំរុញការពង្រឹងទំនាក់ទំនងរវាងអ្នកដាំស្វាយចន្ទី អង្គភាពពាណិជ្ជកម្ម រោងចក្រកែច្នៃ និងសហគ្រាសនាំចេញ នឹងរួមចំណែកធ្វើឱ្យប្រភពផ្គត់ផ្គង់មានស្ថិរភាព លើកកម្ពស់ប្រសិទ្ធភាពនៃប្រតិបត្តិការ និងធានាការបែងចែកផលប្រយោជន៍ប្រកបដោយសុខដុមរមនារវាងសមាសភាពនានានៅក្នុងខ្សែច្រវាក់។

ក្នុងរយៈពេលវែង វិស័យគ្រាប់ស្វាយចន្ទីត្រូវយកចិត្តទុកដាក់លើការតាមដានប្រភពដើម ការកាត់បន្ថយការបំភាយឧស្ម័ន ការសន្សំសំចៃវត្ថុធាតុដើម និងថាមពល ឆ្លើយតបទៅនឹងតម្រូវការបរិស្ថានកាន់តែខ្ពស់នៅតាមទីផ្សារអន្តរជាតិ។

ទន្ទឹមនឹងនោះ ការបង្កើនការវិនិយោគសម្រាប់ការស្រាវជ្រាវ និងអភិវឌ្ឍន៍ ការបង្កើតផលិតផលស្របតាមនិន្នាការប្រើប្រាស់ថ្មីៗ និងការកសាងបណ្តាញអតិថិជនដោយផ្ទាល់នៅលើទីផ្សារសកល គឺជាភារកិច្ចសំខាន់ៗ។

ការអនុវត្តដំណោះស្រាយខាងលើឱ្យបានព្រមៗគ្នា នឹងបង្កើតលក្ខខណ្ឌឱ្យវិស័យគ្រាប់ស្វាយចន្ទីវៀតណាមឆ្លងផុតកម្រិតកំណត់នៃគំរូកំណើនបែបប្រពៃណី លើកកម្ពស់តម្លៃនាំចេញ រឹតបន្តឹងសមត្ថភាពប្រកួតប្រជែង និងអភិវឌ្ឍប្រកបដោយចីរភាពក្នុងប៉ុន្មានឆ្នាំខាងមុខ៕

VPBank ធ្វើឌីជីថលរូបនីយកម្មដំណើរការកម្ចី៖ ទទួលបានលទ្ធផលអនុម័តបឋមត្រឹមតែក្នុងរយៈពេល ១ នាទី យុគសម័យ - ជាមួយដំណើរការធ្វើឌីជីថលរូបនីយកម្ម ១០០% នៅលើកម្មវិធី VPBank Race ធនាគារកំពុងតែកាត់បន្ថយពេលវេលាដោះស្រាយសំណុំលិខិតកម្ចីហ៊ីប៉ូតែចរបស់អតិថិជនយ៉ាងខ្លាំង។ ជាមួយលទ្ធផលអនុម័តបឋមត្រឹមតែក្នុងរយៈពេលប្រហែល ១ នាទី ជំនួសឱ្យការរង់ចាំច្រើនថ្ងៃដូចពីមុន VPBank បានក្លាយជាធនាគារត្រួសត្រាយផ្លូវនៅលើទីផ្សារដែលផ្តល់ជូននូវខ្សែចរន្តអនុម័តកម្ចីហ៊ីប៉ូតែចលឿនបំផុត បើកនូវបទដ្ឋានថ្មីអំពីបទពិសោធន៍ហិរញ្ញវត្ថុទំនើប។

កសាងមូលដ្ឋានទិន្នន័យសម្រាប់ប្រព័ន្ធអេកូឡូស៊ីបង្កើតអាជីវកម្មថ្មីផ្លាស់ប្តូរថ្មីច្នៃប្រឌិត៖ ថ្នាលសេដ្ឋកិច្ចទិន្នន័យ យុគសម័យ - ចេញពីតម្រូវការកសាងប្រព័ន្ធទិន្នន័យ «ត្រឹមត្រូវ គ្រប់គ្រាន់ ស្អាតស្អំ រស់រវើក» សម្រាប់ប្រព័ន្ធអេកូឡូស៊ីបង្កើតអាជីវកម្មថ្មីផ្លាស់ប្តូរថ្មីច្នៃប្រឌិត បណ្តាអ្នកជំនាញបានស្នើឱ្យអភិវឌ្ឍន៍គំរូសេដ្ឋកិច្ចទិន្នន័យ ដោយបង្កើតយន្តការដើម្បីឱ្យទិន្នន័យត្រូវបានតភ្ជាប់ ទាញយកប្រយោជន៍ និងប្រែក្លាយទៅជាតម្លៃសេដ្ឋកិច្ច បម្រើឱ្យការផ្លាស់ប្តូរថ្មីច្នៃប្រឌិត និងកំណើនចីរភាព។

វ៉ាន់ណាំ