មហោស្រពបេះដូងវៀតណាមឆ្នាំ ២០២៦ ផ្សព្វផ្សាយវប្បធម៌វៀតណាមនៅ Osaka

ការរួមសំឡេងច្រៀងបទចម្រៀងជាតិវៀតណាម របស់តារាចម្រៀង Anh Tu ជាមួយអាណិកជនវៀតណាមចំនួន ៣៤ នាក់ ដែលជាតំណាងឱ្យខេត្ត-ក្រុងទាំង ៣៤ នៃប្រទេសវៀតណាម។

ក្រោមប្រធានបទ «យុគសម័យឈានឡើង» មហោស្រពបេះដូងវៀតណាមឆ្នាំ ២០២៦ ត្រូវបានរៀបចំឡើងដោយអង្គការផ្សព្វផ្សាយវប្បធម៌វៀតណាម-ជប៉ុនសកល (VJCP) ក្រោមការឧបត្ថម្ភគាំទ្រពីអគ្គស្ថានកុងស៊ុលវៀតណាមប្រចាំនៅ Osaka អាជ្ញាធរខេត្ត Osaka និងអាជ្ញាធរទីក្រុង Sakai។

ព្រឹត្តិការណ៍នេះមានគោលបំណងកសាងកម្មវិធីវប្បធម៌ និងសិល្បៈមួយដែលបង្កប់នូវស្លាកសញ្ញាពាណិជ្ជកម្មជាតិរបស់វៀតណាមនៅក្រៅប្រទេស។

ទោះបីជាអាកាសធាតុពេលខ្លះមានភ្លៀងធ្លាក់ដោយសារឥទ្ធិពលនៃព្យុះ Champi ក៏ដោយ ក៏សកម្មភាពនានានៅតែប្រព្រឹត្តទៅយ៉ាងរលូន ដោយមានការចូលរួមយ៉ាងច្រើនកុះករពីសំណាក់ប្រជាជនវៀតណាមដែលកំពុងរស់នៅប្រទេសជប៉ុន ប្រជាជនជប៉ុន និងភ្ញៀវទេសចរអន្តរជាតិ។

ផ្សព្វផ្សាយអត្តសញ្ញាណវៀតណាមក្នុងសហគមន៍

ពិធីបើកមានការអញ្ជើញចូលរួមពីសំណាក់លោក Nguyen Truong Son អគ្គកុងស៊ុលវៀតណាមប្រចាំនៅ Osaka លោក Wada Kenji តំណាងសម្ព័ន្ធសមាជិកសភាមិត្តភាពជប៉ុន-វៀតណាម ចំណុះក្រុមប្រឹក្សាខេត្ត Osaka លោក Morita Koichi អនុប្រធានក្រុមប្រឹក្សាទីក្រុង Sakai លោក Yoshikawa Toshifumi តំណាងសម្ព័ន្ធសមាជិកសភាផ្លាស់ប្តូរមិត្តភាពជប៉ុន-វៀតណាម ចំណុះក្រុមប្រឹក្សាទីក្រុង Sakai ព្រមទាំងតំណាងអាជ្ញាធរខេត្ត Osaka បណ្តាអង្គភាពសហការ និងម្ចាស់ឧបត្ថម្ភនានា។

បន្ទាប់ពីការណែនាំគណៈប្រតិភូ និងរបាយការណ៍អំពីដំណើរតភ្ជាប់ ពិធីគោរពទង់ជាតិនៃប្រទេសទាំងពីរត្រូវបានរៀបចំឡើងយ៉ាងមហោឡារិក។

ចំណុចលេចធ្លោមួយនៅក្នុងពិធីបើក គឺការរួមសំឡេងច្រៀងបទចម្រៀងជាតិវៀតណាម របស់តារាចម្រៀង Anh Tu ជាមួយអាណិកជនវៀតណាមចំនួន ៣៤ នាក់ ដែលជាតំណាងឱ្យខេត្ត-ក្រុងទាំង ៣៤ នៃប្រទេសវៀតណាមក្រោយការច្របាច់បញ្ចូលគ្នា។

នៅក្នុងពិធីបុណ្យនេះ គណៈកម្មការរៀបចំបានបំផុសចលនាឆ្លើយតបនឹងទិវាវប្បធម៌វៀតណាម ថ្ងៃទី ២៤ ខែវិច្ឆិកា ក្នុងចំណោមសហគមន៍ជនជាតិវៀតណាមនៅទូទាំងពិភពលោក ដោយផ្សារភ្ជាប់នឹងទស្សនទាន «វប្បធម៌បំភ្លឺផ្លូវឱ្យប្រជាជាតិដើរ» របស់ប្រធានហូជីមិញ និងសេចក្តីសម្រេចចិត្តលេខ 28/2026/QH16 របស់រដ្ឋសភា។

ក្រោមអធិបតីភាពរបស់លោក Huy Lio អគ្គដឹកនាំរឿង និងជាទីប្រឹក្សាយុទ្ធសាស្ត្រនៃអង្គការ VJCP រួមជាមួយគណៈប្រតិភូ និងសិល្បករ សិល្បការិនី ពិធីដាក់ដៃលើនិមិត្តសញ្ញាស្គរលង្ហិនត្រូវបានរៀបចំឡើង ដោយផ្ញើសារលើកទឹកចិត្តដល់សហគមន៍ជនជាតិវៀតណាមនៅក្រៅប្រទេស ឱ្យចូលរួមថែរក្សា និងផ្សព្វផ្សាយអត្តសញ្ញាណវប្បធម៌ជាតិ។

ជាមួយនឹងសារ «ជនជាតិវៀតណាមម្នាក់ៗនៅក្រៅប្រទេស គឺជាឯកអគ្គរដ្ឋទូតវប្បធម៌ម្នាក់» គណៈកម្មការរៀបចំបានអំពាវនាវឱ្យសហគមន៍ចូលរួមឆ្លើយតបនឹងទិវាវប្បធម៌វៀតណាម តាមរយៈសកម្មភាពជាក់ស្តែង ដូចជាការស្លៀកសម្លៀកបំពាក់ប្រពៃណីវៀតណាម ពិសាម្ហូបវៀតណាម និយាយភាសាវៀតណាម ដំណាលរឿងរ៉ាវអំពីប្រទេសវៀតណាម និងណែនាំវប្បធម៌វៀតណាមទៅកាន់មិត្តភក្តិអន្តរជាតិ។

នៅក្នុងក្របខ័ណ្ឌនៃកម្មវិធី គណៈកម្មការរៀបចំបានបង្ហាញវីដេអូផ្សព្វផ្សាយអំពី Phu Tho ដែលជាទឹកដីកំណើតបុព្វបុរស និងបានសម្ពោធការតាំងពិព័រណ៍ផែនទីប្រទេសវៀតណាមក្រោមប្រធានបទ «យុគសម័យឈានឡើង»។

ផ្ទាំងផែនទីធ្វើពីឈើដែលមានកម្ពស់ ២,៥ ម៉ែត្រ ផ្សារភ្ជាប់នឹងព្រឹត្តិការណ៍រៀបចំរចនាសម្ព័ន្ធអង្គភាពរដ្ឋបាលថ្នាក់ខេត្តឡើងវិញក្នុងឆ្នាំ ២០២៥ រួមជាមួយព័ត៌មានណែនាំអំពីបណ្តាខេត្ត-ក្រុងទាំង ៣៤ នៃប្រទេសវៀតណាម បានទាក់ទាញចំណាប់អារម្មណ៍យ៉ាងខ្លាំងពីសំណាក់អាណិកជន និងភ្ញៀវទេសចរអន្តរជាតិ។

ពង្រឹងការផ្លាស់ប្តូរវប្បធម៌វៀតណាម - ជប៉ុន

ក្នុងរយៈពេលពីរថ្ងៃនៃការប្រព្រឹត្តទៅនៃមហោស្រពនេះ វេទិកាសិល្បៈបានបង្ហាញនូវការសម្តែងជាច្រើនដែលរួមបញ្ចូលគ្នារវាងតន្ត្រីបុរាណ និងសម័យទំនើបរបស់វៀតណាម និងជប៉ុន។

ទស្សនិកជនបានទស្សនាកម្សាន្តនូវផ្ទាំងទស្សនីយភាពសម្តែងរបស់ក្រុមស្គរជប៉ុន TRAinnovation, Mayumi, Vietnam Kun ក្រុមរបាំ Sao Mai និងមជ្ឈមណ្ឌលសិល្បៈ VJCP Art Center។

ចរន្តតន្ត្រី hip-hop, rap និង pop ក៏មានវត្តមានតាមរយៈការសម្តែងរបស់តារាចម្រៀង Anh Tu, Trinh Thang Binh, LyLy, Cao Phu Quy, Swhite, Shinobi Swag, HawkX និងក្រុមតន្ត្រី NINE-X Band ផងដែរ។

តាមរយៈសកម្មភាពសិល្បៈទាំងនេះ សិល្បករ សិល្បការិនីវៀតណាមទទួលបានឱកាសណែនាំតន្ត្រីមាតុភូមិទៅកាន់សហគមន៍ជនជាតិវៀតណាមនៅប្រទេសជប៉ុន ព្រមទាំងពង្រឹងការផ្លាស់ប្តូរទំនាក់ទំនងជាមួយទស្សនិកជនម្ចាស់ផ្ទះ និងអន្តរជាតិ។

នៅក្នុងក្របខ័ណ្ឌនៃព្រឹត្តិការណ៍នេះ អង្គការ VJCP ក៏បានប្រកាសសេចក្តីសម្រេចទទួលស្គាល់សមាជិកថ្មីចូលរួមក្នុងសកម្មភាពផ្លាស់ប្តូរ និងផ្សព្វផ្សាយវប្បធម៌វៀតណាម - ជប៉ុន នាពេលខាងមុខ។

ក្រៅពីសកម្មភាពវប្បធម៌ មហោស្រពនេះក៏មានកម្មវិធីតភ្ជាប់ ជំរុញពាណិជ្ជកម្ម និងការវិនិយោគរវាងវៀតណាម និងជប៉ុនផងដែរ។

ក្នុងឆ្នាំនេះ គណៈកម្មការរៀបចំបានប្រកាស និងប្រគល់ពានរង្វាន់ «ផ្កាយបេះដូងវៀតណាម» ជាលើកដំបូង ជូនចំពោះបុគ្គលអាណិកជនចំនួន ៤ នាក់ ដែលកំពុងរស់នៅ សិក្សា និងធ្វើការនៅប្រទេសជប៉ុន ដែលមានសកម្មភាពបំផុសគំនិតជាវិជ្ជមានក្នុងការផ្សព្វផ្សាយវប្បធម៌ និងរូបភាពប្រជាជនវៀតណាម។

ពានរង្វាន់នេះមានគោលបំណងផ្សព្វផ្សាយរូបភាពសហគមន៍ជនជាតិវៀតណាមប្រកបដោយចិត្តសប្បុរស មានការទទួលខុសត្រូវ ធ្វើសមាហរណកម្ម គោរពច្បាប់ និងមានការរួមចំណែកដល់សង្គមជាតិម្ចាស់ផ្ទះ។

នារសៀលថ្ងៃទី ២៥ ខែតុលា កម្មវិធីបិទបញ្ចប់ក្រោមប្រធានបទ «តភ្ជាប់បេះដូងវៀតណាម» បានប្រព្រឹត្តទៅដោយមានការចូលរួមពីតារាចម្រៀង Trinh Thang Binh, LyLy និង Anh Tu។

សិល្បករ សិល្បការិនីបានសម្តែងនូវបទចម្រៀងជាច្រើនដែលទទួលបានការគាំទ្រយ៉ាងខ្លាំងពីទស្សនិកជន ក្នុងនោះមានការច្រៀងចម្រៀងឆ្លើយឆ្លងបទ «Giua hoa binh» របស់តារាចម្រៀង Anh Tu។

ជាពិសេស តារាចម្រៀង Anh Tu បានសម្តែងជាលើកដំបូងនូវបទចម្រៀងថ្មីដែលជាស្នាដៃនិពន្ធផ្ទាល់របស់លោកមានចំណងជើងថា «Dong Bao» នៅចំពោះមុខទស្សនិកជន និងអាណិកជនរាប់ពាន់នាក់នៅប្រទេសជប៉ុន នៅក្នុងផ្នែកបញ្ចប់នៃកម្មវិធី។

តាមលោក Do Hai Khoi ប្រធានគណៈកម្មការរៀបចំ ក្រៅពីការរួមដំណើររបស់បណ្តាស្ថាប័ន អង្គភាព និងម្ចាស់ឧបត្ថម្ភ ក្រុមយុវជនស្ម័គ្រចិត្តដែលជាយុវវ័យវៀតណាមកំពុងរស់នៅ សិក្សា និងធ្វើការនៅប្រទេសជប៉ុន បានរួមចំណែកយ៉ាងសំខាន់ដល់ជោគជ័យនៃមហោស្រពនេះ។

បណ្តាយុវជនស្ម័គ្រចិត្តបានចូលរួមជួយឧបត្ថម្ភពេញមួយកំឡុងពេលនៃការប្រព្រឹត្តទៅនៃព្រឹត្តិការណ៍ ដោយរួមចំណែកធានានូវដំណើរការសកម្មភាពនៃកម្មវិធី និងបង្កើតបរិយាកាសផ្សារភ្ជាប់គ្នានៅក្នុងសហគមន៍។

មហោស្រពបេះដូងវៀតណាមឆ្នាំ ២០២៦ មិនត្រឹមតែជាឱកាសទស្សនាកម្សាន្តនូវកម្មវិធីសិល្បៈប៉ុណ្ណោះទេ ប៉ុន្តែថែមទាំងបង្កើតជាលំហដើម្បីឱ្យសហគមន៍ជនជាតិវៀតណាមនៅប្រទេសជប៉ុនតភ្ជាប់ទំនាក់ទំនង ថែរក្សាអត្តសញ្ញាណ និងផ្សព្វផ្សាយវប្បធម៌វៀតណាម។

តាមរយៈតន្ត្រី និងសកម្មភាពផ្លាស់ប្តូរនានា ព្រឹត្តិការណ៍នេះបានរួមចំណែកពង្រឹងភាពស្និទ្ធស្នាលក្នុងសហគមន៍ ផ្សព្វផ្សាយរូបភាពប្រទេសវៀតណាម និងជំរុញការផ្លាស់ប្តូរវប្បធម៌រវាងវៀតណាម និងជប៉ុន៕

ផ្ញើជូននូវក្តីស្រលាញ់ មោទនភាពនៃភាសាវៀតណាម និងវប្បធម៌វៀតណាមដល់ជំនាន់ជនវៀតណាមនៅក្រៅប្រទេស នាយប់ថ្ងៃទី ៨ ខែកញ្ញា ក្នុងឱកាសនៃទិវាគោរពវិញ្ញាណក្ខន្ធជនវៀតណាក្នុងសហគមន៍ជនវៀតណាមនៅបរទេស ក្រសួងការបរទេស និងគណៈកម្មាធិការរដ្ឋទទួលបន្ទុកជនវៀតណាមនៅឯបរទេសបានសម្របសម្រួលជាមួយទូរទស្សន៍វៀតណាម និងស្ថាប័នពាក់ព័ន្ធនានា បានរៀបចំកម្មវិធីសិល្បៈ “ភាសាវៀតណាមជាទីគោរព” ឆ្នាំ២០២៤ ក្រោមប្រធានបទ “ពាក្យស្រុកកំណើត ពាក្យដែក” នៅរោងមហោស្រព រដ្ឋធានីហាណូយ។

ការកសាងមជ្ឈមណ្ឌលវប្បធម៌វៀតណាមនៅប្រទេសផ្សេងៗគឺចាំបាច់ និងមានអត្ថន័យ យុគសម័យ - កម្មវិធីគោលដៅជាតិ ស្តីពីការអភិវឌ្ឍន៍វប្បធម៌ ដំណាក់កាល ២០២៥-២០៣៥ ត្រូវបានរដ្ឋសភា រំពឹងថា នឹងត្រូវបានផ្តល់មតិយោបល់ នៅសម័យប្រជុំលើកទី៧ នាពេលខាងមុខ។ បច្ចុប្បន្ននេះ កម្មវិធីនេះកំពុងត្រូវបានរដ្ឋាភិបាលបញ្ចប់រួចរាល់ហើយ បន្ទាប់ពីបានដាក់ជូនមតិយោបល់ក្នុងសម័យប្រជុំលើកទី៣៣ នៃគណៈកម្មាធិការអចិន្ត្រៃយ៍រដ្ឋសភា។

វ៉ាន់ណាំ