វៀតណាមចែករំលែកបទពិសោធន៍អំពីការផ្លាស់ប្តូរថ្មី និងការរៀបចំកែលម្អក្បាលម៉ាស៊ីនការងារជាមួយកម្ពុជា

សមមិត្ត Tran Cam Tu សមាជិកការិយាល័យនយោបាយ សមាជិកអចិន្ត្រៃយ៍នៃលេខាធិការដ្ឋានបក្ស បានទទួលជួបគណៈប្រតិភូថ្នាក់ដឹកនាំវ័យក្មេងនៃគណបក្សប្រជាជនកម្ពុជា។

គណៈប្រតិភូថ្នាក់ដឹកនាំវ័យក្មេងនៃគណបក្សប្រជាជនកម្ពុជា ដឹកនាំដោយលោក កឹម សម្បត្តិ សមាជិកគណៈកម្មាធិការកណ្តាល និងជាអនុប្រធានគណៈចាត់តាំងកិច្ចការបរទេសនៃគណៈកម្មាធិការកណ្តាលគណបក្សប្រជាជនកម្ពុជា បានអញ្ជើញមកសិក្សាស្រាវជ្រាវ និងផ្លាស់ប្តូរបទពិសោធន៍តាមប្រធានបទឯកទេសនៅប្រទេសវៀតណាម ចាប់ពីថ្ងៃទី ១៩ ដល់ថ្ងៃទី ៣០ ខែតុលា ឆ្នាំ ២០២៦។

នៅក្នុងជំនួបនេះ សមាជិកការិយាល័យនយោបាយ សមាជិកអចិន្ត្រៃយ៍នៃលេខាធិការដ្ឋានបក្ស លោក Tran Cam Tu បានសម្តែងនូវក្តីរីករាយដែលបានជួបប្រាស្រ័យទាក់ទងជាមួយក្រុមការងារថ្នាក់ដឹកនាំវ័យក្មេងនៃគណបក្សប្រជាជនកម្ពុជា ព្រមទាំងបានវាយតម្លៃខ្ពស់ចំពោះការដែលភាគីទាំងពីរបានសហការរៀបចំកម្មវិធីសិក្សាស្រាវជ្រាវ និងផ្លាស់ប្តូរតាមប្រធានបទឯកទេសឆ្នាំ ២០២៦។

តាមប្រសាសន៍របស់សមាជិកអចិន្ត្រៃយ៍នៃលេខាធិការដ្ឋានបក្ស កម្មវិធីនេះគឺជាជំហានមួយនៃការធ្វើឱ្យជាក់ស្តែងនូវកិច្ចព្រមព្រៀងរវាងថ្នាក់ដឹកនាំជាន់ខ្ពស់នៃបក្សកុម្មុយនីស្តវៀតណាម និងគណបក្សប្រជាជនកម្ពុជា ដោយរួមចំណែកជំរុញការតភ្ជាប់រវាងជំនាន់ថ្នាក់ដឹកនាំវ័យក្មេងនៃប្រទេសទាំងពីរ។

សមាជិកអចិន្ត្រៃយ៍នៃលេខាធិការដ្ឋានបក្ស លោក Tran Cam Tu បានអះអាងថា បក្ស និងរដ្ឋវៀតណាម តែងតែយកចិត្តទុកដាក់ និងផ្តល់អាទិភាពជាប់លាប់ចំពោះការអភិវឌ្ឍទំនាក់ទំនងភាពជាអ្នកជិតខាងល្អ មិត្តភាពជាប្រពៃណី សហប្រតិបត្តិការគ្រប់ជ្រុងជ្រោយ និងស្ថិតស្ថេរយូរអង្វែងជាមួយកម្ពុជា។

ក្នុងបរិបទដែលស្ថានភាពតំបន់ និងពិភពលោកវិវត្តទៅយ៉ាងស្មុគស្មាញ និងពិបាកប៉ាន់ស្មាន ការពង្រឹងទំនុកចិត្តនយោបាយ ការបង្កើនការសម្របសម្រួល និងការគាំទ្រគ្នាទៅវិញទៅមករវាងបក្សទាំងពីរ និងប្រទេសទាំងពីរ មិនត្រឹមតែជាតម្រូវការសត្យានុម័តប៉ុណ្ណោះទេ ប៉ុន្តែថែមទាំងជាកត្តាដ៏សំខាន់ដែលរួមចំណែកធានាបរិយាកាសសន្តិភាព ស្ថិរភាព និងកិច្ចសហប្រតិបត្តិការសម្រាប់ការកសាង និងការពារមាតុភូមិនៃភាគីនីមួយៗផងដែរ។

បង្កើនការតភ្ជាប់រវាងជំនាន់ថ្នាក់ដឹកនាំវ័យក្មេង

សមាជិកអចិន្ត្រៃយ៍នៃលេខាធិការដ្ឋានបក្ស បានវាយតម្លៃខ្ពស់ចំពោះខ្លឹមសារជាក់ស្តែងនៃកម្មវិធីសិក្សាស្រាវជ្រាវ និងផ្លាស់ប្តូរតាមប្រធានបទឯកទេសឆ្នាំ ២០២៦ ដែលរួមមានប្រធានបទឯកទេសជាច្រើនស្តីពីការងារកសាងបក្ស ការគ្រប់គ្រងរដ្ឋ និងការអភិវឌ្ឍសេដ្ឋកិច្ច-សង្គម។

លោកបានអះអាងថា វៀតណាមត្រៀមខ្លួនជាស្រេចក្នុងការចែករំលែកបទពិសោធន៍ស្តីពីការផ្លាស់ប្តូរថ្មី ការរៀបចំកែលម្អក្បាលម៉ាស៊ីនការងារតាមទិសដៅបង្រួម បង្កើនប្រសិទ្ធភាព ប្រសិទ្ធផល និងភាពស័ក្តិសិទ្ធិ ការធ្វើវិមជ្ឈការ និងការផ្ទេរសិទ្ធិអំណាច កំណែទម្រង់រដ្ឋបាល ព្រមទាំងការលើកកម្ពស់គុណភាពកម្មាភិបាល។

តាងនាមគណៈប្រតិភូថ្នាក់ដឹកនាំវ័យក្មេងនៃគណបក្សប្រជាជនកម្ពុជា អនុប្រធានគណៈចាត់តាំងកិច្ចការបរទេស លោក កឹម សម្បត្តិ បានថ្លែងអំណរគុណចំពោះសមាជិកអចិន្ត្រៃយ៍នៃលេខាធិការដ្ឋានបក្ស លោក Tran Cam Tu ដែលបានចំណាយពេលវេលាដ៏មានតម្លៃទទួលជួបគណៈប្រតិភូ ព្រមទាំងបានពាំនាំនូវការសួរសុខទុក្ខពីសំណាក់សម្តេចវិបុលសេនាភក្តី សាយ ឈុំ អនុប្រធាន និងជាប្រធានគណៈអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា ផ្ញើជូនចំពោះសមាជិកអចិន្ត្រៃយ៍នៃលេខាធិការដ្ឋានបក្ស និងថ្នាក់ដឹកនាំនៃបក្សកុម្មុយនីស្តវៀតណាម។

លោក កឹម សម្បត្តិ បានសម្តែងនូវការដឹងគុណយ៉ាងជ្រាលជ្រៅចំពោះការជួយឧបត្ថម្ភរបស់បក្ស រដ្ឋ កងទ័ព និងប្រជាជនវៀតណាម ជូនចំពោះកម្ពុជាឆ្លងកាត់គ្រប់សម័យកាល ជាពិសេសគឺការជួយសង្គ្រោះប្រជាជនកម្ពុជាឱ្យរួចផុតពីរបបប្រល័យពូជសាសន៍។

អនុប្រធានគណៈចាត់តាំងកិច្ចការបរទេសនៃគណៈកម្មាធិការកណ្តាលគណបក្សប្រជាជនកម្ពុជា បានអះអាងពីការទទួលខុសត្រូវរបស់យុវជនជំនាន់ក្រោយ ដែលក្នុងនោះរួមមានក្រុមការងារថ្នាក់ដឹកនាំវ័យក្មេងនៃប្រទេសទាំងពីរ ក្នុងការបន្តពូនជ្រុំចំណងសាមគ្គីភាពរវាងប្រជាជាតិទាំងពីរ។

លោកស្របពេលជាមួយគ្នានេះ ក៏បានសម្តែងនូវក្តីរីករាយចំពោះការរីកចម្រើនយ៉ាងល្អប្រសើរនៃកិច្ចសហប្រតិបត្តិការទ្វេភាគីគ្រប់ជ្រុងជ្រោយលើគ្រប់វិស័យ។

តាមលោក កឹម សម្បត្តិ សមាជិកនានាក្នុងគណៈប្រតិភូនឹងសិក្សាស្រាវជ្រាវ និងអនុវត្តប្រកបដោយភាពច្នៃប្រឌិតនូវរាល់បទពិសោធន៍ដែលទទួលបានពីកម្មវិធីនេះ ឱ្យស្របតាមការអនុវត្តជាក់ស្តែងនៅកម្ពុជា ដោយរួមចំណែកលើកកម្ពស់ប្រសិទ្ធភាពការងារកសាងបក្ស និងការអភិវឌ្ឍសេដ្ឋកិច្ច-សង្គម។

ប្រធានគណៈប្រតិភូថ្នាក់ដឹកនាំវ័យក្មេងនៃគណបក្សប្រជាជនកម្ពុជា ក៏បានអះអាងផងដែរថានឹងសហការយ៉ាងសកម្មក្នុងការរៀបចំចាត់តាំងឱ្យបានល្អប្រសើរនូវបណ្តាសកម្មភាពអបអរសាទរខួបអនុស្សាវរីយ៍លើកទី ៦០ នៃការបង្កើតទំនាក់ទំនងការទូតវៀតណាម - កម្ពុជា ក្នុងឆ្នាំ ២០២៧ ដោយរួមចំណែកនាំទំនាក់ទំនងរវាងបក្សទាំងពីរ និងប្រទេសទាំងពីរ បន្តអភិវឌ្ឍប្រកបដោយចីរភាព៕

លើកកម្ពស់ប្រសិទ្ធភាពកិច្ចសហប្រតិបត្តិការអភិវឌ្ឍន៍ធនធានមនុស្ស វៀតណាម - កម្ពុជា យុគសម័យ - ជិត ៦០ ឆ្នាំ ចាប់តាំងពីការបង្កើតទំនាក់ទំនងការទូតមក កិច្ចសហប្រតិបត្តិការអភិវឌ្ឍន៍ធនធានមនុស្សបានក្លាយជាខ្លឹមសារដ៏សំខាន់មួយនៅក្នុងទំនាក់ទំនងរវាងវៀតណាម និងកម្ពុជា។ នៅចំពោះមុខតម្រូវការអភិវឌ្ឍន៍ថ្មីៗនៃប្រទេសទាំងពីរ វិស័យនេះចាំបាច់ត្រូវបន្តធ្វើការផ្លាស់ប្តូរថ្មីអំពីយន្តការ ខ្លឹមសារ និងរចនាសម្ព័ន្ធនៃការបណ្តុះបណ្តាល ដោយតម្រង់ទិសយ៉ាងខ្លាំងក្លាឆ្ពោះទៅកាន់វិទ្យាសាស្ត្រ បច្ចេកវិទ្យា វេជ្ជសាស្ត្រ - ឱសថសាស្ត្រ ការអប់រំបណ្តុះបណ្តាលវិជ្ជាជីវៈ និងធនធានមនុស្សប្រកបដោយគុណភាពខ្ពស់។

ក្រុម K92 ប្រមូលបានអដ្ឋិធាតុយុទ្ធជនពលីបន្ថែមចំនួន ៥ ទៀតនៅកម្ពុជា យុគសម័យ - កាលពីថ្ងៃទី ១៦ ខែតុលា ក្រុម K92 នៃបញ្ជាការដ្ឋានយោធាខេត្ត An Giang បានស្វែងរក និងប្រមូលបានអដ្ឋិធាតុយុទ្ធជនពលីបន្ថែមចំនួន ៥ ទៀតនៅខេត្តកែប (កម្ពុជា) ដោយបានបង្កើនចំនួនអដ្ឋិធាតុយុទ្ធជនពលីសរុបដែលត្រូវបានប្រមូលនៅក្នុងដំណាក់កាលទី ១ នៃដំណាក់កាលធំទី XXVI (២០២៦-២០២៧) ឡើងដល់ ៩២ អដ្ឋិធាតុ។

ឌឹកអាញ់