ពង្រឹងមូលដ្ឋានគ្រឹះនយោបាយ គតិយុត្ត និងសង្គម សម្រាប់ទំនាក់ទំនង វៀតណាម - ចិន

តំណាងភាគីចិនជូនដំណើរប្រធានរដ្ឋសភា Tran Thanh Man នៅអាកាសយានដ្ឋានអន្តរជាតិ Xianyang ទីក្រុង Xi'an ខេត្ត Shaanxi។

កាលពីថ្ងៃទី ១៥ ខែតុលា ប្រធានរដ្ឋសភា Tran Thanh Man រួមជាមួយគណៈប្រតិភូជាន់ខ្ពស់វៀតណាម បានបញ្ចប់ដំណើរទស្សនកិច្ចផ្លូវការនៅប្រទេសចិន និងធ្វើជាសហប្រធាននៃសម័យប្រជុំលើកទីពីរ នៃគណៈកម្មាធិការសហប្រតិបត្តិការរវាងរដ្ឋសភាវៀតណាម និងសភាតំណាងប្រជាជនទូទាំងប្រទេសចិន តបតាមការអញ្ជើញរបស់លោក Zhao Leji ប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនទូទាំងប្រទេសចិន។

នៅក្នុងក្របខ័ណ្ឌនៃដំណើរទស្សនកិច្ចនៅទីក្រុងប៉េកាំង ប្រធានរដ្ឋសភា Tran Thanh Man បានជួបសម្តែងការគួរសមជាមួយនាយករដ្ឋមន្ត្រីនៃក្រុមប្រឹក្សាកិច្ចការរដ្ឋ លោក Li Qiang ប្រធានសភាប្រឹក្សានយោបាយប្រជាជនទូទាំងប្រទេសចិន លោក Wang Huning; ជួបពិភាក្សាការងារទ្វេភាគីជាមួយលោក Zhao Leji ប្រធានសភាតំណាងប្រជាជនទូទាំងប្រទេស; ធ្វើជាសហប្រធាននៃសម័យប្រជុំលើកទីពីរ នៃគណៈកម្មាធិការសហប្រតិបត្តិការរវាងស្ថាប័ននីតិប្បញ្ញត្តិទាំងពីរ និងជួបសំណេះសំណាលជាមួយឥស្សរជនមិត្តភាពចិន។

នៅក្នុងជំនួបសម្តែងការគួរសម និងកិច្ចពិភាក្សាការងារនានា ភាគីទាំងពីរបានវាយតម្លៃថា ទំនាក់ទំនង វៀតណាម - ចិន នាពេលកន្លងមកបន្តមានជំហានអភិវឌ្ឍន៍យ៉ាងសំខាន់ និងគ្រប់ជ្រុងជ្រោយ។ ទំនុកចិត្តខាងនយោបាយត្រូវបានពង្រឹង; ការផ្លាស់ប្តូរ និងកិច្ចសហប្រតិបត្តិការរវាងស្ថាប័ននីតិប្បញ្ញត្តិ រណសិរ្សមាតុភូមិ និងសភាប្រឹក្សានយោបាយនៃប្រទេសទាំងពីរកាន់តែស៊ីជម្រៅ; កិច្ចសហប្រតិបត្តិការជាក់ស្តែងសម្រេចបាននូវលទ្ធផលថ្មីៗបន្ថែមទៀត; ការផ្លាស់ប្តូររវាងប្រជាជននិងប្រជាជនបន្តត្រូវបានពង្រីក។

ប្រធានរដ្ឋសភា Tran Thanh Man បានបញ្ជាក់ថា ការអភិវឌ្ឍទំនាក់ទំនងជាមួយប្រទេសចិន គឺជាគោលជំហរឥតងាករេ តម្រូវការប្រកបដោយបរានុម័ត ជម្រើសយុទ្ធសាស្ត្រ និងជាអាទិភាពចម្បងនៅក្នុងមាគ៌ានយោបាយការបរទេសឯករាជ្យ ម្ចាស់ការ ភាពខ្លួនទីពឹងខ្លួន ពហុភាគីភាវូបនីយកម្ម និងការធ្វើពិពិធកម្មរបស់វៀតណាម។

ថ្នាក់ដឹកនាំចិនបានបញ្ជាក់ថា តែងតែយកចិត្តទុកដាក់ជាពិសេសចំពោះទំនាក់ទំនងជាមួយវៀតណាម ដោយចាត់ទុកវៀតណាមជាទិសដៅអាទិភាពនៅក្នុងគោលនយោបាយការទូតអ្នកជិតខាងជារួម; ត្រៀមខ្លួនជាស្រេចរួមជាមួយវៀតណាមក្នុងការអនុវត្តការយល់ដឹងរួមជាន់ខ្ពស់ ជំរុញទំនាក់ទំនងរវាងបក្សទាំងពីរ និងប្រទេសទាំងពីរឱ្យបន្តអភិវឌ្ឍកាន់តែស៊ីជម្រៅ និងជាក់ស្តែង។

ការបង្កើតលក្ខខណ្ឌគតិយុត្តសម្រាប់កិច្ចសហប្រតិបត្តិការជាក់ស្តែង

សំដៅបន្តធ្វើឱ្យទំនាក់ទំនងទ្វេភាគីកាន់តែស៊ីជម្រៅ ថ្នាក់ដឹកនាំនៃស្ថាប័ននីតិប្បញ្ញត្តិទាំងពីរបានឯកភាពគ្នារក្សាការផ្លាស់ប្តូរគណៈប្រតិភូជាន់ខ្ពស់ លើកកម្ពស់ទំនុកចិត្តជាយុទ្ធសាស្ត្រ និងពង្រឹងមូលដ្ឋានគ្រឹះនយោបាយសម្រាប់កិច្ចសហប្រតិបត្តិការលើគ្រប់ច្រក និងគ្រប់វិស័យ។

ភាគីទាំងពីរបានឯកភាពជំរុញកិច្ចសហប្រតិបត្តិការពាណិជ្ជកម្មតាមទិសដៅមានតុល្យភាព និងចីរភាព; បង្កើនការវិនិយោគប្រកបដោយគុណភាពខ្ពស់; តភ្ជាប់ប្រព័ន្ធផ្លូវដែកឱ្យមានសង្គតិភាព និងទំនើបកម្ម; ពង្រីកកិច្ចសហប្រតិបត្តិការវិទ្យាសាស្ត្រ និងបច្ចេកវិទ្យា; បង្កើនកិច្ចសហប្រតិបត្តិការរវាងមូលដ្ឋាន ការអប់រំ វប្បធម៌ ទេសចរណ៍ និងការផ្លាស់ប្តូរប្រជាជន។

ប្រទេសទាំងពីរក៏បានឯកភាពសម្របសម្រួលគ្នាកាន់តែជិតស្និទ្ធនៅតាមវេទិកាពហុភាគីនានា រួមគ្នាគ្រប់គ្រងព្រំដែនគោកប្រកបដោយប្រសិទ្ធភាព គ្រប់គ្រង និងដោះស្រាយការខ្វែងគំនិតគ្នាកាន់តែល្អប្រសើរ រក្សាសន្តិភាព និងស្ថិរភាពនៅលើសមុទ្រ។

នៅក្នុងកិច្ចសហប្រតិបត្តិការរវាងសភា ប្រធានរដ្ឋសភា Tran Thanh Man បានស្នើឱ្យភាគីទាំងពីរបង្កើនការផ្លាស់ប្តូរបទពិសោធន៍ស្តីពីសកម្មភាពនីតិប្បញ្ញត្តិ រួមគ្នាកសាងបរិយាកាសគតិយុត្តអំណោយផលសម្រាប់បណ្តាវិស័យសហប្រតិបត្តិការសំខាន់ៗ និងបង្កើនការត្រួតពិនិត្យការអនុវត្តការប្តេជ្ញាចិត្ត និងកិច្ចព្រមព្រៀងទ្វេភាគីនានា។

ស្ថាប័ននីតិប្បញ្ញត្តិទាំងពីរក៏ចាំបាច់ត្រូវលើកកម្ពស់តួនាទីជាស្ថាប័នតំណាងរាស្ត្រ រួមចំណែកបង្កើតមតិសាធារណៈជាវិជ្ជមានសម្រាប់ទំនាក់ទំនងនៃប្រទេសទាំងពីរ និងបង្កើនការសម្របសម្រួលគ្នានៅតាមវេទិកាសភាប្រជាជាតិពហុភាគីនានា។

លោកប្រធាន Zhao Leji បានសង្កត់ធ្ងន់លើតម្រូវការពង្រឹងទំនុកចិត្តទៅវិញទៅមក រក្សាជំហាននៃការផ្លាស់ប្តូរគណៈប្រតិភូជាន់ខ្ពស់ និងបង្កើនការផ្លាស់ប្តូរយុទ្ធសាស្ត្រ។

សភាតំណាងប្រជាជនទូទាំងប្រទេសចិន ត្រៀមខ្លួនជាស្រេចសហការជាមួយរដ្ឋសភាវៀតណាម ដោយផ្អែកលើមុខងារភារកិច្ចរបស់ស្ថាប័ននីមួយៗ ដើម្បីអនុវត្តការឯកភាពគ្នាយ៉ាងសំខាន់ៗរបស់ថ្នាក់ដឹកនាំជាន់ខ្ពស់នៃបក្សទាំងពីរ និងប្រទេសទាំងពីរ ដែលតាមរយៈនោះ បម្រើដល់ការអភិវឌ្ឍជារួមនៃទំនាក់ទំនងទ្វេភាគី។

យោងតាមសាស្ត្រាចារ្យ Cui Shoujun មកពីបណ្ឌិត្យសភាទំនាក់ទំនងអន្តរជាតិនៃសាកលវិទ្យាល័យប្រជាជនចិន លទ្ធផលនៃដំណើរទស្សនកិច្ចនេះបានរួមចំណែកពង្រឹងទំនុកចិត្តខាងនយោបាយ បង្កើតក្របខ័ណ្ឌគតិយុត្តសម្រាប់កិច្ចសហប្រតិបត្តិការជាក់ស្តែង បង្កើនមូលដ្ឋានគ្រឹះនៃការគាំទ្រពីសំណាក់ប្រជាជន និងរក្សាផលប្រយោជន៍រួមនៅកម្រិតតំបន់ និងអន្តរជាតិ។

អ្នកស្រាវជ្រាវ Liu Ying នៃវិទ្យាស្ថានស្រាវជ្រាវហិរញ្ញវត្ថុ Chongyang នៃសាកលវិទ្យាល័យប្រជាជនចិន បានយល់ឃើញថា ការផ្លាស់ប្តូរជាន់ខ្ពស់រវាងស្ថាប័ននីតិប្បញ្ញត្តិទាំងពីរ បានរួមចំណែកពង្រឹងទំនុកចិត្តខាងនយោបាយ និងបង្កើនការផ្លាស់ប្តូរយុទ្ធសាស្ត្រ។

យោងតាមលោកស្រី ការបន្តអភិវឌ្ឍយន្តការសហប្រតិបត្តិការនីតិប្បញ្ញត្តិ ក៏បានជួយប្រែក្លាយទិសដៅកិច្ចសហប្រតិបត្តិការនានាឱ្យទៅជាបទប្បញ្ញត្តិច្បាប់ ផែនការ និងសកម្មភាពជាក់ស្តែងផងដែរ។

សម័យប្រជុំលើកទីពីរ នៃគណៈកម្មាធិការសហប្រតិបត្តិការរវាងរដ្ឋសភាវៀតណាម និងសភាតំណាងប្រជាជនទូទាំងប្រទេសចិន ត្រូវបានវាយតម្លៃថាជាកាលានុវត្តភាពមួយដើម្បីឱ្យភាគីទាំងពីរជំរុញកិច្ចសហប្រតិបត្តិការនីតិប្បញ្ញត្តិឱ្យកាន់តែទៀងទាត់ ជាក់ស្តែង និងប្រកបដោយប្រសិទ្ធភាពខ្ពស់ជាងមុន។

ការផ្លាស់ប្តូររវាងប្រជាជននិងប្រជាជន ពង្រឹងមូលដ្ឋានគ្រឹះសង្គម

នៅក្នុងជំនួបសំណេះសំណាលជាមួយឥស្សរជនមិត្តភាពចិន ប្រធានរដ្ឋសភា Tran Thanh Man បានសង្កត់ធ្ងន់ថា មិត្តភាពរវាងប្រជាជននៃប្រទេសទាំងពីរ គឺជាមូលដ្ឋានគ្រឹះដ៏សំខាន់មួយនៃទំនាក់ទំនង វៀតណាម - ចិន។

លោកប្រធានរដ្ឋសភាមានបំណងចង់ឱ្យសមាគមមិត្តភាពកិច្ចការបរទេសប្រជាជនចិន សមាគមមិត្តភាព ចិន - វៀតណាម និងបណ្តាអង្គការមិត្តភាពវៀតណាម បន្តលើកកម្ពស់តួនាទីជាស្ពានមេ ថែរក្សា និងធ្វើឱ្យចំណងមិត្តភាពប្រពៃណីរវាងប្រទេសទាំងពីរកាន់តែស៊ីជម្រៅថែមទៀត។

លោកបានស្នើឱ្យភាគីទាំងពីរបន្តអនុវត្តប្រកបដោយប្រសិទ្ធភាពនូវកម្មវិធីនានា ដូចជា ដំណើរក្រហមស្រាវជ្រាវ និងសិក្សារបស់យុវជនវៀតណាមនៅប្រទេសចិន វេទិកាប្រជាជន វៀតណាម - ចិន និងមហោស្រពមិត្តភាពប្រជាជនព្រំដែន វៀតណាម - ចិន។

ក្នុងនោះ ការផ្លាស់ប្តូររវាងយុវជនចាំបាច់ត្រូវតែយកចិត្តទុកដាក់ជាពិសេស ដើម្បីជួយឱ្យយុវជនជំនាន់ក្រោយនៃប្រទេសទាំងពីរយល់ដឹងកាន់តែពេញលេញ ស៊ីជម្រៅ និងសត្យានុម័ត អំពីប្រពៃណីទំនាក់ទំនងរវាងបក្សទាំងពីរ ប្រទេសទាំងពីរ ព្រមទាំងមនោសញ្ចេតនារបស់យុវជនជំនាន់មុនៗ ដែលពីចំណុចនោះ នាំឱ្យចេះឱ្យតម្លៃលើគុណតម្លៃនៃសន្តិភាព មិត្តភាព និងកិច្ចសហប្រតិបត្តិការ។

ប្រធានរដ្ឋសភា Tran Thanh Man ក៏មានបំណងឱ្យបណ្តាឥស្សរជនមិត្តភាពបន្តរួមចំណែកថែរក្សាមិត្តភាព តភ្ជាប់ប្រជាជន និងបើកទូលាយនូវទម្រង់កិច្ចសហប្រតិបត្តិការថ្មីៗរវាងប្រទេសទាំងពីរ។

លោក Yang Wanming ប្រធានសមាគមមិត្តភាពកិច្ចការបរទេសប្រជាជនចិន បានបញ្ជាក់ថានឹងបន្តកសាងស្ពានមេតភ្ជាប់ការផ្លាស់ប្តូរប្រជាជនបន្ថែមទៀត ជំរុញកិច្ចសហប្រតិបត្តិការវប្បធម៌ ពង្រឹងការយល់ដឹង និងមិត្តភាពរវាងប្រជាជននៃប្រទេសទាំងពីរ ដែលតាមរយៈនោះ ពង្រឹងមូលដ្ឋានគ្រឹះសង្គមសម្រាប់ទំនាក់ទំនង វៀតណាម - ចិន។

លោកប្រធាន Zhao Leji ក៏បានសង្កត់ធ្ងន់លើសារៈសំខាន់នៃមូលដ្ឋានគ្រឹះមតិសាធារណៈ ដោយស្នើឱ្យបង្កើនកិច្ចសហប្រតិបត្តិការលើវិស័យទេសចរណ៍ វប្បធម៌ ប្រព័ន្ធផ្សព្វផ្សាយ សុខាភិបាល កាយវប្បកម្ម-កីឡា និងអនុវត្តឱ្យបានល្អនូវបណ្តាកម្មវិធីផ្លាស់ប្តូរមនុស្សសាស្ត្រ ជាពិសេសគឺក្នុងចំណោមយុវជនជំនាន់ក្រោយ។

យោងតាមក្រុមអ្នកជំនាញចិន ការរួមបញ្ចូលគ្នារវាងការផ្លាស់ប្តូរនយោបាយ ការសម្របសម្រួលនីតិប្បញ្ញត្តិ កិច្ចសហប្រតិបត្តិការសេដ្ឋកិច្ច និងការផ្លាស់ប្តូររវាងប្រជាជននិងប្រជាជន នឹងរួមចំណែកបង្កើតមូលដ្ឋានគ្រឹះកាន់តែរឹងមាំសម្រាប់ទំនាក់ទំនង វៀតណាម - ចិន ជំរុញកិច្ចសហប្រតិបត្តិការទ្វេភាគីឱ្យបន្តអភិវឌ្ឍប្រកបដោយស្ថិរភាព ជាក់ស្តែង និងផ្តល់ផលប្រយោជន៍ទៅវិញទៅមក៕

វៀតណាម ចិន ឡាវ មីយ៉ាន់ម៉ា បើកយុទ្ធនាការទ្រង់ទ្រាយធំរួមគ្នា ដើម្បីបង្ក្រាបបទល្មើសគ្រឿងញៀន យុគសម័យ - នារសៀលថ្ងៃទី ២ ខែមិថុនា នៅទីក្រុងហាណូយ ក្រសួងនគរបាលវៀតណាម បានចាត់តាំងសន្និសីទដាក់ឱ្យអនុវត្តយុទ្ធនាការទ្រង់ទ្រាយធំក្នុងការឃោសនា និងសម្របសម្រួលវាយប្រហារ បង្ក្រាបបទល្មើសគ្រឿងញៀន រវាងវៀតណាម ចិន ឡាវ និងមីយ៉ាន់ម៉ា។ កម្មវិធីយុទ្ធនាការនេះនឹងមានរយៈពេល ៣ ខែ ចាប់ពីថ្ងៃទី ១៥ ខែមិថុនា ដល់ថ្ងៃទី ១៥ ខែកញ្ញា ឆ្នាំ ២០២៦ ដោយផ្តោតសំខាន់លើបណ្តាភូមិសាស្ត្រព្រំដែន និងតំបន់គន្លឹះស្តីពីគ្រឿងញៀននៃប្រទេសទាំងបួន។

រណសិរ្សមាតុភូមិវៀតណាម និងសភាប្រឹក្សានយោបាយប្រជាជនទូទាំងប្រទេសចិន ជំរុញកិច្ចសហប្រតិបត្តិការ និងពង្រឹងការផ្លាស់ប្តូររវាងប្រជាជននិងប្រជាជន យុគសម័យ - នាថ្ងៃទី ៨ មិថុនា នៅទីក្រុងហាណូយ លោកស្រី Bui Thị Minh Hoai សមាជិកការិយាល័យនយោបាយ លេខាធិការមជ្ឈិមបក្ស និងជាប្រធានគណៈកម្មាធិការកណ្តាលរណសិរ្សមាតុភូមិវៀតណាម បានទទួលជួបសម្តែងការគួរសមជាមួយលោកស្រី Xian Hui អនុប្រធានសភាប្រឹក្សានយោបាយប្រជាជនទូទាំងប្រទេសចិន ក្នុងឱកាសដែលគណៈប្រតិភូមកបំពេញទស្សនកិច្ច និងធ្វើការនៅវៀតណាម។ ភាគីទាំងពីរបានឯកភាពគ្នាពង្រឹងនិងពង្រីកតួនាទីជាស្ពានចម្លងរវាងប្រជាជននៃប្រទេសទាំងពីរ ជំរុញការដាក់ឱ្យអនុវត្តបណ្តាខ្លឹមសារនៃកិច្ចសហប្រតិបត្តិការដែលបានព្រមព្រៀងគ្នា រួមចំណែកធ្វើឱ្យកាន់តែស៊ីជម្រៅថែមទៀតនូវទំនាក់ទំនងវៀតណាម-ចិន និងធ្វើឱ្យជាក់ស្តែងកម្មនូវការយល់ដឹងរួមរបស់ថ្នាក់ដឹកនាំជាន់ខ្ពស់នៃបក្សទាំងពីរ និងប្រទេសទាំងពីរ។

សុវណ្ណា