ទីក្រុង Ho Chi Minh ប្រារព្ធពិធីគោរពវិញ្ញាណក្ខន្ធ និងបញ្ចុះអដ្ឋិធាតុយុទ្ធជនពលីចំនួន ៧៣១ នាក់

ប្រជាពលរដ្ឋយ៉ាងច្រើនកុះករបានឈរតាមចិញ្ចើមផ្លូវទាំងសងខាងនៅមុខខ្លោងទ្វារសួន Le Thi Rieng ដោយកាន់ផ្កា និងសម្តែងនូវការគោរពលាគ្នាចុងក្រោយយ៉ាងជ្រាលជ្រៅចំពោះវីរយុទ្ធជនពលី ដែលបានពលីជីវិតនៅក្នុងការវាយលុកទូទៅ និងការងើបបះបោរនិទាឃរដូវឆ្នាំវក ឆ្នាំ ១៩៦៨។

ពិធីគោរពវិញ្ញាណក្ខន្ធ រំលឹកវិញ្ញាណក្ខន្ធ និងបញ្ចុះអដ្ឋិធាតុ ត្រូវបានគណៈកម្មាធិការបក្សទីក្រុង ក្រុមប្រឹក្សាប្រជាជន គណៈកម្មាធិការប្រជាជន គណៈកម្មាធិការរណសិរ្សមាតុភូមិវៀតណាមប្រចាំទីក្រុង Ho Chi Minh និងគណៈកម្មាធិការបក្ស - បញ្ជាការដ្ឋានយោធភូមិភាគទី ៧ រៀបចំឡើង។

នាយករដ្ឋមន្ត្រី Le Minh Hung ព្រមទាំងថ្នាក់ដឹកនាំ និងអតីតថ្នាក់ដឹកនាំបក្ស និងរដ្ឋជាច្រើនរូប បានអញ្ជើញចូលរួមក្នុងពិធីនេះ។

នៅក្នុងពិធីគោរពវិញ្ញាណក្ខន្ធ គណៈប្រតិភូថ្នាក់ដឹកនាំបក្ស រដ្ឋ និងគណៈកម្មាធិការដឹកនាំជាតិ ៥១៥ ដឹកនាំដោយនាយករដ្ឋមន្ត្រី Le Minh Hung ជាប្រធានប្រតិភូ បានអញ្ជើញដាក់កម្រងផ្កា និងអុជធូបរំលឹកវិញ្ញាណក្ខន្ធដល់វីរយុទ្ធជនពលី។

បន្ទាប់មក បណ្តាគណៈប្រតិភូនៃគណៈកម្មាធិការយោធាមជ្ឈិម; គណៈកម្មាធិការបក្សនគរបាលមជ្ឈិម; គណៈកម្មាធិការមជ្ឈិមរណសិរ្សមាតុភូមិវៀតណាម; គណៈកម្មាធិការបក្ស និងបញ្ជាការដ្ឋានយោធភូមិភាគទី ៧; ថ្នាក់ដឹកនាំទីក្រុង Ho Chi Minh ទីក្រុង Dong Nai ខេត្ត Lam Dong និងខេត្ត Tay Ninh បានអញ្ជើញដាក់កម្រងផ្កា និងអុជធូប។

ពិធីគោរពវិញ្ញាណក្ខន្ធ រំលឹកវិញ្ញាណក្ខន្ធ និងបញ្ចុះអដ្ឋិធាតុយុទ្ធជនពលីចំនួន ៧៣១ នាក់ បានបង្ហាញនូវការដឹងគុណយ៉ាងជ្រាលជ្រៅចំពោះបណ្តាឥស្សរជនដែលបានពលីជីវិតដើម្បីបុព្វហេតុរំដោះជាតិ និងការបង្រួបបង្រួមប្រទេសជាតិ។

ថ្លែងវិយោគកថានៅក្នុងពិធី លោក Nguyen Manh Cuong អនុប្រធានគណៈកម្មាធិការប្រជាជនទីក្រុង Ho Chi Minh និងជាប្រធានគណៈកម្មាធិការដឹកនាំការស្វែងរក ប្រមូលផ្តុំ និងកំណត់អត្តសញ្ញាណអដ្ឋិធាតុយុទ្ធជនពលីទីក្រុង Ho Chi Minh បានសម្តែងនូវការចងចាំ និងការដឹងគុណចំពោះវីរយុទ្ធជនពលី។

«ឆ្លើយតបនឹងការអំពាវនាវរបស់បក្ស និងមាតុភូមិ បងប្អូនប្រុសស្រីបានរួមដំណើរជាមួយយុវជនរាប់លាននាក់ ចូលទៅកាន់សមរភូមិគ្រាប់កាំភ្លើងភ្លើងសង្គ្រាម 'ប្តេជ្ញាពលីដើម្បីមាតុភូមិរស់ឡើងវិញ' រួមជាមួយទូទាំងបក្ស ទូទាំងកងទ័ព និងទូទាំងប្រជាជន ធ្វើសង្គ្រាមតស៊ូដ៏យូរអង្វែងរហូតឈានដល់ជ័យជម្នះចុងក្រោយ។ ការលះបង់របស់បងប្អូនប្រុសស្រីគឺមិនអាចកាត់ថ្លៃបានឡើយ; គុណបំណាច់របស់បងប្អូនប្រុសស្រីគឺធំធេងក្រៃលែង» លោក Nguyen Manh Cuong បានសង្កត់ធ្ងន់។

បណ្តាប្រតិភូបានឈរស្មឹងស្មាធិ៍មួយនាទី ដើម្បីគោរពវិញ្ញាណក្ខន្ធដល់វិញ្ញាណក្ខន្ធនៃវីរយុទ្ធជនពលី។

បន្ទាប់ពីពិធីរំលឹកវិញ្ញាណក្ខន្ធ អដ្ឋិធាតុយុទ្ធជនពលីចំនួន ៧៣១ នាក់ ត្រូវបានដង្ហែចេញពីសួនវប្បធម៌ Le Thi Rieng ឆ្ពោះទៅកាន់ឈាបនដ្ឋានយុទ្ធជនពលីទីក្រុង Ho Chi Minh ដើម្បីបញ្ចុះ។

នៅលើដងផ្លូវនានាដែលក្បួនរថយន្តឆ្លងកាត់ ប្រជាពលរដ្ឋរាប់ពាន់នាក់បានកាន់ផ្កាពណ៌ស ដើម្បីជូនដំណើរយុទ្ធជនពលីទាំងឡាយទៅកាន់កន្លែងសម្រាកចុងក្រោយ។

យុវជនម្នាក់ដែលមានវត្តមាននៅក្នុងចំណោមក្បួនមនុស្សជូនដំណើរ បានឱ្យដឹងថា ការមកដល់តាំងពីព្រលឹមដើម្បីទទួលស្វាគមន៍យុទ្ធជនពលីវិលត្រឡប់មកវិញ គឺជាវិធីដែលយុវជនជំនាន់ក្រោយបង្ហាញនូវការគោរព និងការដឹងគុណចំពោះយុវជនជំនាន់មុនៗ ដែលបានពលីជីវិតដើម្បីប្រទេសជាតិ។

មុនពេលប្រព្រឹត្តទៅនូវពិធីគោរពវិញ្ញាណក្ខន្ធ ចាប់ពីម៉ោង ៥ ព្រឹក ថ្ងៃទី ១៤ ខែតុលា គណៈសង្ឃពុទ្ធសាសនាវៀតណាមប្រចាំទីក្រុង Ho Chi Minh បានរៀបចំពិធីសូត្រមន្តបួងសួង នៅសួន Le Thi Rieng។

កាលពីរាត្រីថ្ងៃទី ១៣ ខែតុលា នៅទីនេះក៏មានការប្រារព្ធកម្មវិធីសិល្បៈពិសេស «បទភ្លេងដឹងគុណ» ដោយបានបញ្ជូននូវសារអំពីការទទួលខុសត្រូវរបស់យុវជនជំនាន់បច្ចុប្បន្ន ក្នុងការបន្តកសាង និងការពារមាតុភូមិ៕

ឯកអគ្គរដ្ឋទូត Nguyen Minh Vu៖ ទាញយកផលប្រយោជន៍ពីគ្រប់កាលានុវត្តភាពដើម្បីនាំយុទ្ធជនពលីវិលត្រឡប់មកកាន់មាតុភូមិ យុគសម័យ - នៅក្នុង «ដំណាក់កាលសម្រុកចុងក្រោយ» នៃការងារស្វែងរក និងប្រមូលផ្តុំអដ្ឋិធាតុយុទ្ធជនពលីនៅកម្ពុជា ឯកអគ្គរដ្ឋទូតវៀតណាមប្រចាំនៅកម្ពុជា Nguyen Minh Vu បានអះអាងថា ស្ថានទូតនឹងបន្តរួមដំណើរយ៉ាងជិតស្និទ្ធជាមួយកងកម្លាំងសមត្ថកិច្ច ពង្រីកឱ្យបានជាអតិបរមានូវការគាំទ្រពីភាគីមិត្ត ពង្រីកប្រភពព័ត៌មាន និងធានាសុវត្ថិភាពសម្រាប់បណ្តាក្រុមការងារប្រមូលផ្តុំអដ្ឋិធាតុ ដោយការប្តេជ្ញាចិត្តនាំយកយុទ្ធជនពលីកាន់តែច្រើនបន្ថែមទៀតវិលត្រឡប់មកកាន់ទឹកដីមាតុភូមិ។

ក្រុម K52 ស្វែងរក និងប្រមូលផ្តុំបានអដ្ឋិធាតុយុទ្ធជនពលីវៀតណាមចំនួន ៣ រូប នៅកម្ពុជា យុគសម័យ - ក្នុងរយៈពេលពីរថ្ងៃ គឺថ្ងៃទី ២២-២៣ ខែសីហា ក្រុម K52 នៃបញ្ជាការដ្ឋានយោធាខេត្ត Gia Lai បានស្វែងរក និងប្រមូលផ្តុំបានអដ្ឋិធាតុយុទ្ធជនពលីកងទ័ពស្ម័គ្រចិត្ត និងអ្នកជំនាញការវៀតណាមចំនួន ៣ រូប ដែលបានពលីជីវិតនៅឯខេត្តស្ទឹងត្រែង និងខេត្តរតនគិរី នៃព្រះរាជាណាចក្រកម្ពុជា។

សុវណ្ណា