បម្រុងទុកប្រមាណ ០,១% នៃ GDP ជារៀងរាល់ឆ្នាំ សម្រាប់ទាក់ទាញ ប្រើប្រាស់ឱ្យចំសមត្ថភាព និងអភិវឌ្ឍន៍ធនធានមនុស្សដែលមានទេពកោសល្យ

ឧបនាយករដ្ឋមន្ត្រីរដ្ឋាភិបាល លោកស្រី Pham Thi Thanh Tra បានជ្រួតជ្រាបនូវសេចក្តីសន្និដ្ឋានស្តីពីយុទ្ធសាស្ត្រជាតិស្តីពីការទាក់ទាញ ប្រើប្រាស់ឱ្យចំសមត្ថភាព និងអភិវឌ្ឍន៍ធនធានមនុស្សដែលមានទេពកោសល្យ ក្នុងបណ្តាផ្នែក និងវិស័យស្នូល បម្រើដល់ការអភិវឌ្ឍប្រទេសជាតិឱ្យបានឆាប់រហ័ស និងប្រកបដោយចីរភាព។

ព្រឹកថ្ងៃទី ១៦ ខែតុលា នៅក្នុងសន្និសីទជាតិស្រាវជ្រាវ សិក្សា ជ្រួតជ្រាប និងអនុវត្តសេចក្តីសម្រេចចិត្តនៃសន្និបាតលើកទីបួន នៃគណៈកម្មាធិការមជ្ឈិមបក្សនីតិកាលទី XIV លេខាធិការមជ្ឈិមបក្ស ឧបនាយករដ្ឋមន្ត្រីរដ្ឋាភិបាល លោកស្រី Pham Thi Thanh Tra បានជ្រួតជ្រាបដោយផ្ទាល់នូវសេចក្តីសន្និដ្ឋានស្តីពីយុទ្ធសាស្ត្រជាតិស្តីពីការទាក់ទាញ ប្រើប្រាស់ឱ្យចំសមត្ថភាព និងអភិវឌ្ឍន៍ធនធានមនុស្សដែលមានទេពកោសល្យ ក្នុងបណ្តាផ្នែក និងវិស័យស្នូល បម្រើដល់ការអភិវឌ្ឍប្រទេសជាតិឱ្យបានឆាប់រហ័ស និងប្រកបដោយចីរភាព។

លោកស្រីឧបនាយករដ្ឋមន្ត្រីបានសង្កត់ធ្ងន់ថា៖ «ធនធានមនុស្សដែលមានទេពកោសល្យ គឺជាធនធានយុទ្ធសាស្ត្រដ៏ពិសេសរបស់ជាតិ ដែលដឹកនាំការអភិវឌ្ឍវិទ្យាសាស្ត្រ បច្ចេកវិទ្យា នវានុវត្តន៍ លើកកម្ពស់សមត្ថភាពប្រកួតប្រជែង និងភាពម្ចាស់ការជាយុទ្ធសាស្ត្ររបស់ប្រទេសជាតិ»។

ការផ្លាស់ប្តូរពីការគ្រប់គ្រងក្របខ័ណ្ឌ បុគ្គលិក ទៅជាអភិបាលកិច្ច និងការអភិវឌ្ឍធនធានមនុស្សដែលមានទេពកោសល្យ

យោងតាមឧបនាយករដ្ឋមន្ត្រី Pham Thi Thanh Tra សេចក្តីសន្និដ្ឋានរបស់មជ្ឈិមបានចង្អុលបង្ហាញនូវចំណុចខ្វះខាតជាច្រើននៅក្នុងការងារធនធានមនុស្សដែលមានទេពកោសល្យនាពេលបច្ចុប្បន្ន។

ក្នុងនោះ ចំណុចរាំងស្ទះធំៗរួមមាន ការយល់ដឹងអំពីធនធានមនុស្សដែលមានទេពកោសល្យមិនទាន់បានពេញលេញ និងឯកភាពគ្នា; វិធីសាស្ត្រអភិបាលកិច្ចមិនទាន់ឆ្លើយតបនឹងតម្រូវការជាក់ស្តែង; យន្តការ និងគោលនយោបាយនៅរាយប៉ាយ ខ្វះសង្គតិភាព និងមិនទាន់មានភាពទាក់ទាញគ្រប់គ្រាន់; ការតភ្ជាប់គ្នារវាងវិស័យសាធារណៈ និងឯកជន រវាងធនធានក្នុងប្រទេស និងក្រៅប្រទេស នៅមានកម្រិត; ការងារស្វែងរក និងបណ្តុះបណ្តាលមិនទាន់មានលក្ខណៈជាប្រព័ន្ធ; ការចាត់ចែង ប្រើប្រាស់ និងការលើកកម្ពស់សក្តានុពលរបស់ធនធានមនុស្សដែលមានទេពកោសល្យមិនទាន់សមាមាត្រនៅឡើយ។

សេចក្តីសន្និដ្ឋានបានកំណត់ថា មូលហេតុអត្តនោម័តគឺជាកត្តាចម្បង ចាប់ពីរនាំងនៃការយល់ដឹង ការខ្វះខាតគោលនយោបាយបំបែកភាពទាល់ច្រក ការគិតគូរខាងការរៀបចំយឺតយ៉ាវក្នុងការផ្លាស់ប្តូរ រហូតដល់ការខ្វះតម្លាភាព និងការមិនទាន់ហ៊ានប្រគល់សិទ្ធិអំណាច និងប្រគល់ការងារធំៗដល់បុគ្គលដែលមានទេពកោសល្យ និងធនធានមនុស្សប្រកបដោយគុណភាពខ្ពស់។

នៅលើមូលដ្ឋាននោះ មជ្ឈិមបានកំណត់នូវទស្សនៈដឹកនាំចំនួន ៥។

ជាបឋម ធនធានមនុស្សដែលមានទេពកោសល្យត្រូវបានកំណត់ថាជាធនធានយុទ្ធសាស្ត្រដ៏ពិសេសរបស់ជាតិ ដែលមានតួនាទីដឹកនាំការអភិវឌ្ឍវិទ្យាសាស្ត្រ បច្ចេកវិទ្យា នវានុវត្តន៍ លើកកម្ពស់សមត្ថភាពប្រកួតប្រជែង និងភាពម្ចាស់ការជាយុទ្ធសាស្ត្រ។

ការងារទាក់ទាញ និងប្រើប្រាស់ឱ្យចំសមត្ថភាពនូវធនធានមនុស្សដែលមានទេពកោសល្យ ត្រូវតែដាក់នៅក្នុងយុទ្ធសាស្ត្រអភិវឌ្ឍន៍ប្រទេសជាតិជារួម ដោយមានការផ្តោតលើចំណុចស្នូល ចំណុចសំខាន់ និងផ្តល់អាទិភាពបម្រើដល់បណ្តាកម្មវិធី និងគម្រោងថ្នាក់ជាតិ។

តម្រូវការដ៏សំខាន់មួយគឺការផ្លាស់ប្តូរជាមូលដ្ឋាននូវផ្នត់គំនិត និងវិធីសាស្ត្រអភិបាលកិច្ច ដោយផ្លាស់ប្តូរពីការគ្រប់គ្រងតាមអង្គភាព និងក្របខ័ណ្ឌបុគ្គលិក ទៅជាអភិបាលកិច្ច និងការអភិវឌ្ឍធនធានមនុស្សដែលមានទេពកោសល្យ ដោយយកផលិតផល លទ្ធផលជាក់ស្តែង និងតម្លៃនៃការលះបង់រួមចំណែកធ្វើជាបន្ទាត់រង្វាស់។

ស្របតាមនោះ ចាំបាច់ត្រូវកំណត់ឱ្យបានច្បាស់លាស់នូវភារកិច្ច ដើម្បី «ស្វែងរកមនុស្សឱ្យត្រូវ - ប្រគល់ការងារឱ្យចំ - ផ្តល់សិទ្ធិអំណាចឱ្យគ្រប់គ្រាន់» ព្រមទាំងផ្គត់ផ្គង់ធនធានឱ្យបានសមាមាត្រ។

ការងារធនធានមនុស្សដែលមានទេពកោសល្យត្រូវបានដាក់នៅក្រោមការដឹកនាំដ៏ឯកភាព និងគ្រប់ជ្រុងជ្រោយរបស់បក្ស រួមជាមួយតួនាទីកសាងស្ថាប័នរបស់រដ្ឋ និងការចូលរួមពីប្រព័ន្ធនយោបាយ គ្រឹះស្ថានអប់រំ វិទ្យាស្ថានស្រាវជ្រាវ សហគ្រាស និងសង្គមទាំងមូល។

សេចក្តីសន្និដ្ឋានក៏បានដាក់ចេញនូវគោលដៅកសាងប្រព័ន្ធអេកូឡូស៊ីទេពកោសល្យថ្នាក់ជាតិដ៏ទំនើប បើកទូលាយ និងធ្វើសមាហរណកម្មអន្តរជាតិ ធានានូវការតភ្ជាប់ និងចរន្តចរាចរនៃធនធានមនុស្សរវាងវិស័យសាធារណៈ និងឯកជន ព្រមទាំងរវាងក្នុងប្រទេស និងក្រៅប្រទេស។

បែងចែកថវិកាប្រមាណ ០,១% នៃ GDP ជារៀងរាល់ឆ្នាំ សម្រាប់ការងារធនធានមនុស្សដែលមានទេពកោសល្យ

ដើម្បីធ្វើឱ្យសម្រេចបាននូវគោលដៅនេះ សេចក្តីសន្និដ្ឋានបានដាក់ចេញនូវក្រុមភារកិច្ច និងដំណោះស្រាយស្នូលចំនួន ៦។

ជាបឋម គឺការពង្រឹងការដឹកនាំរបស់បក្ស ការឯកភាពគ្នាក្នុងការយល់ដឹង និងសកម្មភាពនៅទូទាំងប្រព័ន្ធនយោបាយ; ឯកភាពគ្នាលើរបៀបកំណត់អត្តសញ្ញាណធនធានមនុស្សដែលមានទេពកោសល្យ វិធីសាស្ត្រអនុវត្ត និងលើកកម្ពស់ការទទួលខុសត្រូវរបស់ប្រធានស្ថាប័ន។

ទន្ទឹមនឹងនោះ ប្រព័ន្ធស្ថាប័ន យន្តការ និងគោលនយោបាយ ចាំបាច់ត្រូវបន្តបំពេញបន្ថែម និងកែលម្អឱ្យកាន់តែល្អប្រសើរឡើង សំដៅដោះស្រាយចំណុចរាំងស្ទះនានា កសាងក្របខ័ណ្ឌលក្ខណៈវិនិច្ឆ័យថ្នាក់ជាតិស្តីពីធនធានមនុស្សដែលមានទេពកោសល្យ និងធ្វើបច្ចុប្បន្នភាពបញ្ជីមុខសញ្ញានៃបណ្តាផ្នែក និងវិស័យយុទ្ធសាស្ត្រស្នូល។

គោលនយោបាយរបបឧបត្ថម្ភក៏ត្រូវបានតម្រង់ទិសឱ្យកាន់តែគ្រប់ជ្រុងជ្រោយជាងមុន ដែលរួមមានប្រាក់ចំណូល ពន្ធដារ លំនៅឋាន ការចេញចូលប្រទេស និងសុខុមាលភាពសង្គមសម្រាប់បុគ្គលដែលមានទេពកោសល្យ ព្រមទាំងសាច់ញាតិ។

ខ្លឹមសារដ៏គួរឱ្យកត់សម្គាល់មួយ គឺតម្រូវការបែងចែកធនធានហិរញ្ញវត្ថុឱ្យបានសមាមាត្រ។ ថវិការដ្ឋគ្រោងនឹងធានាប្រមាណ ០,១% នៃ GDP ជារៀងរាល់ឆ្នាំ សម្រាប់ការងារធនធានមនុស្សដែលមានទេពកោសល្យ ដោយកាត់ចេញពីប្រភពថវិកាសរុបដែលបម្រុងទុកសម្រាប់វិទ្យាសាស្ត្រ បច្ចេកវិទ្យា និងនវានុវត្តន៍។

ក្រៅពីធនធានហិរញ្ញវត្ថុ សេចក្តីសន្និដ្ឋានបានដាក់ចេញនូវតម្រូវការកសាងឧបករណ៍អភិបាលកិច្ចទំនើបៗ ដែលក្នុងនោះរួមមាន មូលដ្ឋានទិន្នន័យជាតិ ប្រព័ន្ធសន្ទស្សន៍ជាតិ ច្រកព័ត៌មានជាតិស្តីពីធនធានមនុស្សដែលមានទេពកោសល្យ និងហេដ្ឋារចនាសម្ព័ន្ធប្រព័ន្ធបច្ចេកវិទ្យាឌីជីថល ដើម្បីបម្រើដល់អភិបាលកិច្ចប្រកបដោយឯកភាព តាំងពីថ្នាក់មជ្ឈិមរហូតដល់មូលដ្ឋាន និងសហគមន៍ធុរកិច្ច។

វិធីសាស្ត្រក្នុងការស្វែងរក ប្រើប្រាស់ឱ្យចំសមត្ថភាព និងការវាយតម្លៃធនធានមនុស្សដែលមានទេពកោសល្យ ក៏ត្រូវបានទាមទារឱ្យមានការផ្លាស់ប្តូរថ្មីផងដែរ។ បណ្តាញស្វែងរក និងឧទ្ទេសនាម ចាំបាច់ត្រូវពង្រីកចេញពីប្រភពនានាជាច្រើនទាំងក្នុង និងក្រៅប្រទេស ដោយមិនប្រកាន់រវាងវិស័យសាធារណៈ ឬវិស័យឯកជនឡើយ។

ការប្រើប្រាស់ធនធានមនុស្សដែលមានទេពកោសល្យឱ្យចំសមត្ថភាព ត្រូវបានអនុវត្តតាមគោលការណ៍ «ត្រូវមនុស្ស ត្រូវការងារ ត្រូវជំនាញឯកទេស» ប្រគល់ភារកិច្ចឱ្យសក្តិសមនឹងសមត្ថភាព ផ្តល់សិទ្ធិអំណាចជាក់ស្តែងដែលផ្សារភ្ជាប់ជាមួយនឹងការទទួលខុសត្រូវផ្នែកហិរញ្ញវត្ថុ និងវាយតម្លៃតាមរយៈគុណភាពផលិតផល ព្រមទាំងតម្លៃជាក់ស្តែងដែលត្រូវបានបង្កើតឡើង។

សេចក្តីសន្និដ្ឋានក៏បានសង្កត់ធ្ងន់លើតម្រូវការជំរុញកិច្ចសហប្រតិបត្តិការអន្តរជាតិស្តីពីធនធានមនុស្សដែលមានទេពកោសល្យ ដោយផ្សារភ្ជាប់ការផ្លាស់ប្តូរធនធានមនុស្សជាមួយនឹងការស្រាវជ្រាវវិទ្យាសាស្ត្រ និងការផ្ទេរបច្ចេកវិទ្យា។

វៀតណាមនឹងបង្កើនការទាក់ទាញបញ្ញវន្ត អ្នកជំនាញជនជាតិវៀតណាមនៅក្រៅប្រទេស និងអ្នកជំនាញអន្តរជាតិ ឱ្យចូលរួមក្នុងការបណ្តុះបណ្តាល ផ្តល់ប្រឹក្សា ដឹកនាំភារកិច្ចជាយុទ្ធសាស្ត្រនានា ព្រមទាំងអភិវឌ្ឍបណ្តាញធនធានមនុស្សដែលមានទេពកោសល្យវៀតណាមដែលតភ្ជាប់ឆ្លងប្រទេស។

ឧបនាយករដ្ឋមន្ត្រី Pham Thi Thanh Tra បានសង្កត់ធ្ងន់ថា គណៈកម្មាធិការបក្ស ស្ថាប័ន អង្គការ សហគ្រាសនីមួយៗ ជាពិសេសគឺប្រធានស្ថាប័ន ចាំបាច់ត្រូវម្ចាស់ការស្វែងរក ហ៊ានប្រគល់ភារកិច្ចដ៏សំខាន់ និងបង្កលក្ខខណ្ឌដើម្បីឱ្យបុគ្គលមានទេពកោសល្យបញ្ចេញសមត្ថភាពឱ្យអស់ពីលទ្ធភាព។

ទន្ទឹមនឹងនោះ សេចក្តីសន្និដ្ឋានបានអំពាវនាវឱ្យធនធានមនុស្សដែលមានទេពកោសល្យទាំងក្នុង និងក្រៅប្រទេស លើកកម្ពស់បញ្ញាញាណ សមត្ថភាពច្នៃប្រឌិត និងសេចក្តីប្រាថ្នាក្នុងការលះបង់រួមចំណែក ដើម្បីចូលរួមក្នុងដំណើរការអភិវឌ្ឍន៍ប្រទេសជាតិ៕

ដំណោះស្រាយ ៣ ដើម្បីទាក់ទាញអណិកជនវៀតណាមនៅប្រទេសអូស្ត្រាលី ដើម្បីរួមចំណែកដល់មាតុភូមិរបស់ពួកគេ យុគសម័យ - សហគមន៍បញ្ញវន្ត និងអ្នកជំនាញវៀតណាមនៅអូស្ត្រាលីកំពុងរីកចម្រើនខ្លាំងឡើង បម្រើជាស្ពានផ្ទេរចំណេះដឹងរវាងវៀតណាម និងអូស្ត្រាលី និងជាធនធានដ៏សំខាន់រួមចំណែកដល់ការអភិវឌ្ឍន៍របស់វៀតណាម។ លោក Nguyen Dang Thang អគ្គកុងស៊ុលវៀតណាមប្រចាំនៅទីក្រុងស៊ីដនី ប្រទេសអូស្ត្រាលីបានលើកឡើងដូច្នេះនៅពេលពិភាក្សាអំពីតួនាទីនៃធនធានបញ្ញវន្តវៀតណាមនៅឯបរទេស។

ទីក្រុងហូជីមិញទាក់ទាញការវិនិយោគពីក្រៅប្រទេសតាមរយៈគម្រោងយុទ្ធសាស្ត្រជាង ៨០ យុគសម័យ - ទីក្រុងហូជីមិញមានបំណងទាក់ទាញធនធានវិនិយោគដ៏រឹងមាំពីសហគមន៍ក្រៅប្រទេស តាមរយៈគម្រោងយុទ្ធសាស្ត្រជាង ៨០ ដើម្បីបំពេញតម្រូវការអភិវឌ្ឍន៍ដ៏ទូលំទូលាយរបស់ទីក្រុង។

សុវណ្ណា