UNCLOS បង្កើតមូលដ្ឋានគ្រឹះសម្រាប់សណ្តាប់ធ្នាប់ដែនសមុទ្រផ្អែកលើច្បាប់

ឆ្លើយតបនឹងបទសម្ភាសន៍របស់សារព័ត៌មាន TG&VN បណ្ឌិត Martin Ratcovich Leopardi បានយល់ឃើញថា ការអនុម័ត UNCLOS ត្រូវបានប្រៀបធៀបជាញឹកញាប់ទៅនឹងការកសាង «រដ្ឋធម្មនុញ្ញនៃមហាសមុទ្រទាំងឡាយ» ដែលជាការគូសបញ្ជាក់នូវជំហានវិវឌ្ឍដ៏សំខាន់មួយនៅក្នុងរចនាសម្ព័ន្ធសន្តិសុខសកលលោក។

យោងតាមលោក UNCLOS បង្កើតនូវក្របខ័ណ្ឌគតិយុត្តសម្រាប់សកម្មភាពទាំងឡាយនៅលើមហាសមុទ្រ និងដែនសមុទ្រ តាមរយៈនោះ រួមចំណែកបង្កើនលទ្ធភាពប៉ាន់ស្មានទុកជាមុន និងស្ថិរភាពនៅក្នុងទំនាក់ទំនងអន្តរជាតិ។

បណ្ឌិត Martin Ratcovich Leopardi ទីប្រឹក្សាគតិយុត្តជាន់ខ្ពស់ស្តីពីច្បាប់អន្តរជាតិ នៃក្រសួងការបរទេសស៊ុយអែត នៅក្នុងសម័យពិភាក្សាលើកទី ៥ ក្រោមប្រធានបទ «UNCLOS ភាពស្របច្បាប់នៅលើដែនសមុទ្រ និងទិសដៅនៃកិច្ចសហប្រតិបត្តិការ» នាព្រឹកថ្ងៃទី ៨ ខែតុលា។

នៅពេលដែលបណ្តាប្រទេសនានាប្រព្រឹត្តស្របតាម UNCLOS និងច្បាប់អន្តរជាតិជារួម ប្រទេសនីមួយៗសុទ្ធតែអាចរួមចំណែកក្នុងការជំរុញកិច្ចសហប្រតិបត្តិការអន្តរជាតិ និងកសាងទំនុកចិត្ត។

គោលការណ៍ទាំងនេះ យោងតាមបណ្ឌិត Martin Ratcovich Leopardi គឺមានអត្ថន័យមិនត្រឹមតែចំពោះសមុទ្រខាងកើតប៉ុណ្ណោះទេ ប៉ុន្តែថែមទាំងចំពោះសមុទ្រ Baltic ព្រមទាំងតំបន់សមុទ្រ និងមហាសមុទ្រដទៃទៀតនៅលើពិភពលោកផងដែរ។

ចំណុចចាប់ផ្តើមរួមសម្រាប់កិច្ចសហប្រតិបត្តិការលើដែនសមុទ្រ

នៅក្នុងបរិបទដែលបរិស្ថានដែនសមុទ្រកាន់តែមានភាពស្មុគស្មាញ និងលេចឡើងនូវបញ្ហាប្រឈមថ្មីៗជាច្រើន បណ្ឌិត Martin Ratcovich Leopardi យល់ឃើញថា UNCLOS ចាំបាច់ត្រូវបន្តត្រូវបានមើលឃើញថាជាក្របខ័ណ្ឌគតិយុត្តដ៏សំខាន់មួយ។

ដូចគ្នានឹងឧបករណ៍គតិយុត្តអន្តរជាតិសំខាន់ៗជាច្រើនទៀតដែរ UNCLOS ត្រូវបានកសាងឡើង និងឯកភាពគ្នាលើការយល់ដឹងថា លក្ខខណ្ឌនៃការអនុវត្តអនុសញ្ញានេះអាចមានភាពខុសប្លែកគ្នារវាងតំបន់នីមួយៗ។

ការដែលបណ្តាប្រទេសនានាបង្ហាញឱ្យឃើញច្បាស់នូវការប្តេជ្ញាចិត្តចំពោះ UNCLOS នឹងរួមចំណែកបង្កើតនូវសណ្តាប់ធ្នាប់ដែនសមុទ្រប្រកបដោយសុវត្ថិភាព ដោយផ្អែកលើច្បាប់។

យោងតាមអ្នកជំនាញរូបនេះ ចំណុចនេះមានសារៈសំខាន់ជាពិសេសចំពោះបណ្តាប្រទេសតូច និងមធ្យម ពីព្រោះ UNCLOS បង្កើតជាមូលដ្ឋានគ្រឹះដើម្បីឱ្យប្រទេសនានាកសាងជំហរផ្ទាល់ខ្លួន ឬបង្កើតជាបណ្តាជំហររួម។

បណ្ឌិត Martin Ratcovich Leopardi បានវាយតម្លៃថា UNCLOS បានបង្កើតនូវក្របខ័ណ្ឌមួយដែលមានលក្ខណៈគ្រប់ជ្រុងជ្រោយ និងច្បាស់លាស់គួរសម សម្រាប់សកម្មភាពដែនសមុទ្រទាំងឡាយ។

ការដែលបណ្តាប្រទេសរួមគ្នាទទួលស្គាល់ និងផ្អែកលើ UNCLOS ជាក្របខ័ណ្ឌគតិយុត្តរួម នឹងបង្កើតបន្ថែមលក្ខខណ្ឌអំណោយផលដល់កិច្ចសហប្រតិបត្តិការអន្តរជាតិ រួមទាំងទម្រង់នៃការសម្របសម្រួលជាក់ស្តែងនៅលើដែនសមុទ្រផងដែរ។

ទោះបីជានៅមានបញ្ហាជាច្រើនដែលត្រូវការបន្តពិចារណាក៏ដោយ លោកយល់ឃើញថា ការចាត់ទុក UNCLOS ជាចំណុចចាប់ផ្តើមរួម គឺមានអត្ថន័យសំខាន់ជាពិសេស។

វៀតណាមរួមចំណែករក្សាលំហនៃការសន្ទនា

វាយតម្លៃអំពីតួនាទីរបស់វៀតណាមក្នុងការជំរុញកិច្ចសន្ទនា និងកិច្ចសហប្រតិបត្តិការស្តីពីច្បាប់អន្តរជាតិ ក៏ដូចជាបញ្ហាដែនសមុទ្រ បណ្ឌិត Martin Ratcovich Leopardi បានឱ្យដឹងថា លោកយល់ច្បាស់អំពីតួនាទីរបស់វៀតណាម ក្នុងការរៀបចំ និងរក្សានូវបណ្តាវេទិកាផ្លាស់ប្តូរយោបល់លើវិស័យជាច្រើន។

បណ្ឌិត Martin Ratcovich Leopardi ថតរូបអនុស្សាវរីយ៍រួមជាមួយបណ្តាមេដឹកនាំវ័យក្មេង នៅក្នុងសិក្ខាសាលាវិទ្យាសាស្ត្រអន្តរជាតិស្តីពីសមុទ្រខាងកើតលើកទី ១៨។

យោងតាមលោក តួនាទីនេះត្រូវបានប្រទេសស៊ុយអែត ក៏ដូចជាសហគមន៍អន្តរជាតិកត់សម្គាល់ និងវាយតម្លៃខ្ពស់។

សិក្ខាសាលាអន្តរជាតិស្តីពីសមុទ្រខាងកើត ដែលត្រូវបានរៀបចំឡើងជារៀងរាល់ឆ្នាំ គឺជាឧទាហរណ៍មួយជាក់ស្តែង។ បណ្ឌិត Martin Ratcovich Leopardi វាយតម្លៃថា នេះជាវេទិកាដ៏មានតម្លៃ បង្កើតលក្ខខណ្ឌអំណោយផលដើម្បីឱ្យគ្រប់ភាគីផ្លាស់ប្តូរទស្សនៈ និងជំរុញកិច្ចសន្ទនា។

ចែករំលែកបទពិសោធន៍របស់ស៊ុយអែតក្នុងការជំរុញច្បាប់អន្តរជាតិ អភិបាលកិច្ចដែនសមុទ្រ និងកិច្ចសហប្រតិបត្តិការពហុភាគី លោកបានឱ្យដឹងថា រដ្ឋាភិបាលស៊ុយអែតគ្រប់ជំនាន់ សុទ្ធតែកំណត់ច្បាប់អន្តរជាតិជាមូលដ្ឋានគ្រឹះនៅក្នុងគោលនយោបាយការបរទេស។

ផ្អែកលើមូលដ្ឋាននោះ ស៊ុយអែតតែងតែបង្ហាញការគាំទ្រចំពោះ UNCLOS ក៏ដូចជាបណ្តាស្ថាប័នដែលត្រូវបានបង្កើតឡើងចេញពីអនុសញ្ញានេះ។

យោងតាមបណ្ឌិត Martin Ratcovich Leopardi វិធីសាស្ត្រអភិក្រមនេះនាំមកនូវផលប្រយោជន៍ជាច្រើនដល់កិច្ចសហប្រតិបត្តិការអន្តរជាតិនៅសមុទ្រ Baltic ក៏ដូចជាសកម្មភាពដែនសមុទ្រដែលមានការចូលរួមពីស៊ុយអែត។

ចេញពីបទពិសោធន៍នោះ ស៊ុយអែតក៏គាំទ្រផងដែរនូវវិធីសាស្ត្រអភិក្រមផ្អែកលើច្បាប់អន្តរជាតិ នៅតាមបណ្តាតំបន់ផ្សេងៗទៀតលើពិភពលោក ដែលក្នុងនោះមានសមុទ្រខាងកើត៕

វ៉ាន់ណាំ