សេចក្តីសម្រេចចិត្តលេខ ៥៧ ជំរុញកិច្ចសហប្រតិបត្តិការបច្ចេកវិទ្យា និងលើកកម្ពស់ប្រសិទ្ធភាពបម្រើប្រជាជន

គម្រោងមន្ទីរពិសោធន៍បច្ចេកវិទ្យាវេចខ្ចប់ឧបករណ៍បន្ទះឈីបពាក់កណ្តាលចម្លង VSAP LAB ដែលមានទុនវិនិយោគសរុប ១.៨០០ ពាន់លានដុង ត្រូវបានដាក់ឱ្យអនុវត្តការសាងសង់នៅតំបន់បច្ចេកវិទ្យាព័ត៌មានប្រមូលផ្តុំ - ឧទ្យានសូហ្វវែរលេខ ២ Da Nang។

ការអនុវត្តសេចក្តីសម្រេចចិត្តលេខ 57-NQ/TW របស់ការិយាល័យនយោបាយ សកម្មភាពវិទ្យាសាស្ត្រ បច្ចេកវិទ្យា និងការផ្លាស់ប្តូរឌីជីថលជាច្រើន កំពុងត្រូវបានជំរុញតាមទិសដៅផ្សារភ្ជាប់ធនធាន សមត្ថភាពបច្ចេកវិទ្យា ជាមួយនឹងតម្រូវការជាក់ស្តែង។

ម៉្យាងវិញទៀត កិច្ចសហប្រតិបត្តិការអន្តរជាតិត្រូវបានពង្រីក ដើម្បីទទួលបានចំណេះដឹង បច្ចេកវិទ្យាជឿនលឿន ជួយគាំទ្រដល់សហគ្រាសក្នុងការអភិវឌ្ឍបច្ចេកវិទ្យាស្នូល និងចូលរួមកាន់តែស៊ីជម្រៅទៅក្នុងខ្សែច្រវាក់តម្លៃសកល។ ម៉្យាងទៀត បណ្តាមូលដ្ឋានបានជំរុញការអនុវត្តបច្ចេកវិទ្យាក្នុងការដោះស្រាយនីតិវិធីរដ្ឋបាល លើកកម្ពស់ជំនាញឌីជីថល និងបង្កើតភាពងាយស្រួលបន្ថែមទៀតសម្រាប់ប្រជាជន និងសហគ្រាស។

ការតភ្ជាប់ធនធានអន្តរជាតិដើម្បីអភិវឌ្ឍបច្ចេកវិទ្យា

កាលពីថ្ងៃទី ១២ ខែតុលា នៅ Ha Noi នាយកដ្ឋានបច្ចេកវិទ្យាឌីជីថល និងបញ្ញាសិប្បនិម្មិត នៃក្រសួងវិទ្យាសាស្ត្រ និងបច្ចេកវិទ្យា បានសហការជាមួយសមាគមបញ្ញវន្ត និងអ្នកជំនាញការវៀតណាម - អូស្ត្រាលី (VASEA) រៀបចំវេទិកាសហប្រតិបត្តិការវិនិយោគ អភិវឌ្ឍន៍បច្ចេកវិទ្យាឌីជីថល និងបញ្ញាសិប្បនិម្មិត វៀតណាម - អូស្ត្រាលី។

ព្រឹត្តិការណ៍នេះគឺជាការបន្តអនុវត្តអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការរវាងភាគីទាំងពីរ ដែលបានចុះហត្ថលេខាកាលពីថ្ងៃទី ១០ ខែសីហា ឆ្នាំ ២០២៦ នៅសាកលវិទ្យាល័យបច្ចេកវិទ្យាស៊ីដនី សំដៅពង្រឹងការតភ្ជាប់រវាងស្ថាប័នគ្រប់គ្រង វិទ្យាស្ថានស្រាវជ្រាវ សាកលវិទ្យាល័យ សហគ្រាស និងវិនិយោគិននៃប្រទេសទាំងពីរ។

នៅក្នុងវេទិកានេះ ថ្នាល V-bridge ដែលត្រូវបានកសាងឡើងដោយនាយកដ្ឋានបច្ចេកវិទ្យាឌីជីថល និងបញ្ញាសិប្បនិម្មិត សហការជាមួយសម្ព័ន្ធក្រុមហ៊ុន FPT និង VASEA ត្រូវបានដាក់បង្ហាញណែនាំ សំដៅជួយគាំទ្រការតភ្ជាប់រវាងសហគ្រាស និងបណ្តាអង្គការនៅក្នុងប្រព័ន្ធអេកូឡូស៊ីបច្ចេកវិទ្យាវៀតណាម - អូស្ត្រាលី។

សម័យពិភាក្សាតុមូលនានាបានផ្តោតលើកិច្ចសហប្រតិបត្តិការលើវិស័យ AI ឧបករណ៍អេឡិចត្រូនិកពាក់កណ្តាលចម្លង នវានុវត្តន៍ ការតភ្ជាប់បច្ចេកវិទ្យាជាមួយទីផ្សារ ការជំរុញការវិនិយោគ និងការធ្វើពាណិជ្ជកម្មកម្មផលិតផល។

យោងតាមអនុរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យា Le Xuan Dinh វៀតណាមមានតម្រូវការអនុវត្តបច្ចេកវិទ្យាយ៉ាងធំធេង ក្រុមវិស្វករ និងសហគ្រាសកំពុងធ្វើសកម្មភាពយ៉ាងសកម្មដើម្បីពង្រីកប្រតិបត្តិការអន្តរជាតិ ខណៈពេលដែលអូស្ត្រាលីមានចំណុចខ្លាំងខាងការអប់រំឧត្តមសិក្សា ការស្រាវជ្រាវ និងប្រព័ន្ធអេកូឡូស៊ីនវានុវត្តន៍។

ការរួមបញ្ចូលគ្នានូវធនធានទាំងនេះ នឹងបង្កើតលក្ខខណ្ឌបន្ថែមដើម្បីឱ្យភាគីទាំងពីររួមគ្នាអភិវឌ្ឍបច្ចេកវិទ្យា និងបណ្តុះបណ្តាលធនធានមនុស្ស។

រួមដំណើរឆ្ពោះទៅកាន់គោលដៅអភិវឌ្ឍបច្ចេកវិទ្យាស្នូល និងពង្រីកទីផ្សារអន្តរជាតិ កាលពីថ្ងៃទី ១៦ ខែតុលា ក្នុងក្របខ័ណ្ឌនៃសន្និសីទអន្តរជាតិប្រចាំឆ្នាំនៃតំបន់បច្ចេកវិទ្យាជាន់ខ្ពស់លើកទី ៨ នៅទីក្រុង Ho Chi Minh មជ្ឈមណ្ឌលបណ្តុះធុរកិច្ចបច្ចេកវិទ្យាជាន់ខ្ពស់ (SHTP-IC) បានសហការជាមួយក្រុមហ៊ុន Silver Lion Enterprise Impact Singapore (SLEI) រៀបចំកម្មវិធី Startup PitchFest 2026 - Open Innovation Day។

សហគ្រាសបង្កើតថ្មី ចំនួន ៨ ដែលចូលរួមក្នុងកម្មវិធីនេះ ធ្វើប្រតិបត្តិការលើវិស័យ AI មនុស្សយន្ត អ៊ីនធឺណិតនៃវត្ថុ និងបច្ចេកវិទ្យាបៃតង។

បណ្តាសហគ្រាសត្រូវបានវាយតម្លៃ មិនត្រឹមតែលើសមត្ថភាពបច្ចេកវិទ្យា គំរូអាជីវកម្ម លទ្ធភាពពង្រីកទីផ្សារប៉ុណ្ណោះទេ ប៉ុន្តែថែមទាំងលើសមត្ថភាពស្រូបយកធនធានបន្ទាប់ពីបញ្ចប់កម្មវិធីផងដែរ។

អាទិភាពត្រូវបានផ្តល់ជូនដល់បណ្តា startup ដែលជាម្ចាស់កម្មសិទ្ធិបញ្ញាស្នូល មានផលិតផលដែលត្រូវបានអភិវឌ្ឍដោយវៀតណាម និងមានសមត្ថភាពធ្វើសមាហរណកម្ម សាកល្បងនៅក្នុងប្រព័ន្ធស្រាវជ្រាវ និងអភិវឌ្ឍន៍ ឬមន្ទីរពិសោធន៍របស់បណ្តាសម្ព័ន្ធក្រុមហ៊ុននៅតំបន់បច្ចេកវិទ្យាជាន់ខ្ពស់ទីក្រុង Ho Chi Minh។

បន្ទាប់ពីកម្មវិធីនេះ SHTP-IC និង SLEI គ្រោងនឹងជ្រើសរើស startup ឆ្នើមៗ ដើម្បីចូលរួមក្នុងកម្មវិធីជំរុញការលូតលាស់ នៅក្នុងឆ្នាំ ២០២៦ ជួយគាំទ្រការតភ្ជាប់ដៃគូ វិនិយោគិន និងការឈានទៅកាន់ទីផ្សារអន្តរជាតិ ដែលចំពោះមុខគឺសិង្ហបុរី រួមទាំងឱកាសចូលរួមក្នុងសប្តាហ៍នវានុវត្តន៍ និងបច្ចេកវិទ្យាសិង្ហបុរី (SWITCH 2026) ផងដែរ។

សកម្មភាពនេះត្រូវបានអនុវត្តឡើងនៅលើមូលដ្ឋាននៃទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយរវាងវៀតណាម និងសិង្ហបុរី ព្រមទាំងទិសដៅតភ្ជាប់បច្ចេកវិទ្យារវាងប្រទេសទាំងពីរ តាមរយៈនោះ ពង្រីកការផ្សារភ្ជាប់គ្នារវាងសហគ្រាស សាកលវិទ្យាល័យ វិទ្យាស្ថានស្រាវជ្រាវ និងវិនិយោគិន។

ការបង្កើនកិច្ចសហប្រតិបត្តិការរវាងស្ថាប័ន អង្គការស្រាវជ្រាវ សហគ្រាស និងវិនិយោគិនទាំងក្នុង និងក្រៅប្រទេស មិនត្រឹមតែជួយពង្រីកលទ្ធភាពទទួលបានប្រភពធនធានប៉ុណ្ណោះទេ ប៉ុន្តែថែមទាំងបង្កើតលក្ខខណ្ឌអំណោយផលដើម្បីឱ្យសហគ្រាសវៀតណាមអភិវឌ្ឍបច្ចេកវិទ្យាស្នូល បំពេញបន្ថែមនូវគុណភាពផលិតផល និងចូលរួមកាន់តែស៊ីជម្រៅទៅក្នុងខ្សែច្រវាក់តម្លៃសកល។

នាំយកការផ្លាស់ប្តូរឌីជីថលឱ្យកាន់តែកៀកជិតនឹងប្រជាជន

ស្របពេលជាមួយនឹងការអភិវឌ្ឍបច្ចេកវិទ្យា បណ្តាមូលដ្ឋានជាច្រើនកំពុងអនុវត្តការផ្លាស់ប្តូរឌីជីថល តាមទិសដៅយកប្រសិទ្ធភាពនៃការបម្រើប្រជាជន និងសហគ្រាសធ្វើជាបន្ទាត់រង្វាស់។

នៅខេត្ត Vinh Long កាលពីថ្ងៃទី ១៧ ខែតុលា កម្មវិធី «ថ្ងៃសៅរ៍ នីតិវិធីរដ្ឋបាលផ្សារភ្ជាប់នឹងការផ្លាស់ប្តូរឌីជីថល រួមដំណើរជាមួយប្រជាជន និងសហគ្រាស» ត្រូវបានរៀបចំឡើងនៅឃុំ Tieu Can។

នេះគឺជាឃុំដំបូងគេបង្អស់ក្នុងចំណោមឃុំ-សង្កាត់ទាំង ១២៤ នៃខេត្ត ដែលបានអនុវត្តគំរូរដ្ឋបាលសាធារណៈចល័ត ដោយនាំយកស្ថាប័នថ្នាក់ខេត្តចុះទៅកាន់មូលដ្ឋានផ្ទាល់ ដើម្បីសហការទទួល ណែនាំ និងដោះស្រាយនីតិវិធីរដ្ឋបាល។

ទន្ទឹមនឹងនោះ កម្មវិធីបានណែនាំប្រជាជនឱ្យចេះប្រើប្រាស់សេវាសាធារណៈតាមប្រព័ន្ធអនឡាញ ការទូទាត់ប្រាក់ដោយមិនប្រើសាច់ប្រាក់សុទ្ធ ការដំណើរការគណនីបញ្ជាក់អត្តសញ្ញាណអេឡិចត្រូនិក VNeID និងការដំឡើងហត្ថលេខាឌីជីថលផ្ទាល់ខ្លួន។

បណ្តាសហគ្រាសទូរគមនាគមន៍ ក៏បានជួយគាំទ្រដល់អាជីវករ និងគ្រួសារអាជីវកម្មក្នុងការផ្សព្វផ្សាយផលិតផល នាំយកផលិតផលពិសេសប្រចាំតំបន់ឡើងទៅកាន់ថ្នាលពាណិជ្ជកម្មអេឡិចត្រូនិក និងពង្រីកលទ្ធភាពឈានទៅកាន់ទីផ្សារ។

ចំពោះមនុស្សចាស់ជរា អ្នកដែលមានកម្រិតជំនាញឌីជីថលនៅមានកម្រិត និងបងប្អូនជនជាតិខ្មែរ មន្ត្រីជំនាញបានចុះណែនាំដោយផ្ទាល់តាមទម្រង់ «កាន់ដៃបង្រៀនការងារ» ដោយប្រើប្រាស់ភាសាខ្មែរនៅពេលចាំបាច់ ដើម្បីជួយប្រជាជនដោះស្រាយរាល់ការលំបាកក្នុងការបំពេញសំណុំឯកសារ និងទទួលបានសេវាសាធារណៈយ៉ាងងាយស្រួល។

នៅកោះ Hon Chuoi ឃុំ Song Doc ខេត្ត Ca Mau ការធ្វើសកលភាវូបនីយកម្មជំនាញឌីជីថល ត្រូវបានអនុវត្តឱ្យស្របទៅតាមលក្ខខណ្ឌជាក់ស្តែងនៃមូលដ្ឋាន។

កាលពីថ្ងៃទី ១៦ ខែតុលា ប៉ុស្តិ៍ការពារព្រំដែន Hon Chuoi បានសហការជាមួយនគរបាលឃុំ Song Doc ជួយគាំទ្រប្រជាពលរដ្ឋចំនួន ២៤ នាក់ ក្នុងការចុះឈ្មោះគណនីបញ្ជាក់អត្តសញ្ញាណអេឡិចត្រូនិក ការប្រើប្រាស់ VNeID ការបង្ការនិងទប់ស្កាត់ការឆបោកតាមប្រព័ន្ធអនឡាញ ព្រមទាំងការចូលរួមប្រើប្រាស់ប្រអប់សំបុត្រអេឡិចត្រូនិកដើម្បីរាយការណ៍អំពីបទល្មើស។

កោះ Hon Chuoi មានប្រជាជនរស់នៅចំនួន ៦៥ គ្រួសារ ដែលមានចម្ងាយប្រមាណ ១៨ ម៉ាយល៍សមុទ្រពីដីគោក ដោយលក្ខខណ្ឌធ្វើដំណើរ និងហេដ្ឋារចនាសម្ព័ន្ធទូរគមនាគមន៍នៅតែជួបការលំបាកនៅឡើយ។ ហេតុដូច្នេះហើយ ការចុះណែនាំដោយផ្ទាល់ដល់ខ្នងផ្ទះនីមួយៗ មិនត្រឹមតែជួយឱ្យប្រជាជនទទួលបាននូវភាពងាយស្រួលនៃសេវាឌីជីថលប៉ុណ្ណោះទេ ប៉ុន្តែថែមទាំងលើកកម្ពស់សមត្ថភាពការពារខ្លួនពីហានិភ័យនានានៅលើលំហអ៊ីនធឺណិតផងដែរ។

នៅទីក្រុង Bac Ninh កម្មវិធី «ជំនួយការប្រជាជន» កំពុងត្រូវបានត្រៀមរៀបចំដើម្បីដាក់ឱ្យដំណើរការសាកល្បងក្រោមការគ្រប់គ្រងលើទ្រង់ទ្រាយធំ បន្ទាប់ពីដំណើរការជួយគាំទ្រការទទួល និងដោះស្រាយសំណុំឯកសាររាប់ពាន់លើកនៅសង្កាត់ចំនួន ៦។

កម្មវិធីនេះអនុញ្ញាតឱ្យស្កេន និងសម្គាល់ឯកសារ បំពេញព័ត៌មានដោយស្វ័យប្រវត្តិទៅក្នុងទម្រង់បែបបទ និងត្រួតពិនិត្យសមាសភាគឯកសារ តាមរយៈនោះ ជួយកាត់បន្ថយដំណាក់កាលបំពេញព័ត៌មានរបស់ប្រជាពលរដ្ឋ កាត់បន្ថយកំហុសឆ្គង និងកាត់បន្ថយសម្ពាធការងារសម្រាប់មន្ត្រីនៅផ្នែក «ច្រកចេញចូលតែមួយ»។

លទ្ធផលជំហានដំបូងបានបង្ហាញថា អត្រាប្រជាពលរដ្ឋដែលជ្រើសរើសមុខងារជំនួយដោយសំឡេង សម្រេចបានរហូតដល់ ៨៣,២% នៅសង្កាត់ Hiep Hoa និងលើសពី ៦០% នៅសង្កាត់ Bac Giang ដោយអត្រានៃការពេញចិត្តមានលើសពី ៩០%។

យោងតាមលទ្ធផលនៃការសាកល្បង ប្រព័ន្ធនេះអាចឆ្លើយតបទៅនឹងអ្នកប្រើប្រាស់ព្រមគ្នាចំនួនប្រមាណ ៣០០ នាក់សម្រាប់ប្រតិបត្តិការកម្រិតស្រាល ហើយអត្រានៃការស្រង់ទិន្នន័យឯកសារជោគជ័យសម្រេចបានដល់ ៩៨,៣២%។

ផ្អែកលើមូលដ្ឋាននោះ ទីក្រុងគ្រោងនឹងដាក់ឱ្យអនុវត្តសាកល្បងក្នុងរយៈពេល ៣ ខែ ដោយបែងចែកជាដំណាក់កាលៗ ក្នុងមួយដំណាក់កាលមានរយៈពេល ៧ ថ្ងៃ នៅតាមឃុំ-សង្កាត់ពី ២០ ដល់ ៣០។

គំរូនានាខាងលើបានបង្ហាញឱ្យឃើញថា ការផ្លាស់ប្តូរឌីជីថលពិតជាបង្កើតបានតម្លៃពិតប្រាកដ លុះត្រាតែបច្ចេកវិទ្យាដើរទន្ទឹមគ្នាជាមួយនឹងការផ្លាស់ប្តូរថ្មីនៃវិធីសាស្ត្របម្រើសេវា ការលើកកម្ពស់ជំនាញឌីជីថល និងការជួយគាំទ្រឱ្យសមស្របទៅតាមក្រុមប្រជាជននីមួយៗ។

នេះក៏ជាវិធីសាស្ត្រធ្វើឱ្យសេចក្តីសម្រេចចិត្តលេខ 57-NQ/TW ក្លាយជាការអនុវត្តជាក់ស្តែង ដោយយកប្រជាជន និងសហគ្រាសធ្វើជាចំណុចកណ្តាល យកប្រសិទ្ធភាពនៃការបម្រើធ្វើជាបន្ទាត់រង្វាស់ បន្តិចម្តងៗបង្រួមគម្លាតឌីជីថល និងពង្រីកលទ្ធភាពទទួលបានផ្លែផ្កាពីវិទ្យាសាស្ត្រ បច្ចេកវិទ្យា នវានុវត្តន៍ និងការផ្លាស់ប្តូរឌីជីថល៕

នាំកិច្ចសហប្រតិបត្តិការវិទ្យាសាស្ត្រ និងបច្ចេកវិទ្យាអន្តរជាតិឱ្យកាន់តែកៀកជិតនឹងតម្រូវការជាក់ស្តែង យុគសម័យ - កិច្ចសហប្រតិបត្តិការអន្តរជាតិក្នុងការស្រាវជ្រាវវិទ្យាសាស្ត្រ និងការអភិវឌ្ឍបច្ចេកវិទ្យា ចាំបាច់ត្រូវកសាងឡើងចេញពីតម្រូវការជាក់ស្តែងរបស់មូលដ្ឋាន សហគ្រាស និងគ្រឹះស្ថានស្រាវជ្រាវ តាមរយៈនោះតភ្ជាប់ឱ្យចំដៃគូ ធនធាន និងបច្ចេកវិទ្យា ដើម្បីបង្កើតឡើងនូវភារកិច្ចទាំងឡាយណាដែលមានលទ្ធភាពអនុវត្ត និងបង្កើតឥទ្ធិពលជាក់ស្តែង។

នាយករដ្ឋមន្ត្រីតម្រូវឱ្យដោះស្រាយឱ្យបានដាច់ស្រេចនូវភារកិច្ចដែលយឺតយ៉ាវស្តីពីវិទ្យាសាស្ត្រ បច្ចេកវិទ្យា និងបរិវត្តកម្មឌីជីថល យុគសម័យ - នាថ្ងៃទី ១ ខែតុលា ការិយាល័យរដ្ឋាភិបាលបានចេញសេចក្តីជូនដំណឹងលេខ ៥១០/TB-VPCP ស្តីពីសេចក្តីសន្និដ្ឋានរបស់នាយករដ្ឋមន្ត្រី ប្រធានគណៈកម្មាធិការដឹកនាំមជ្ឈិមស្តីពីការអភិវឌ្ឍវិទ្យាសាស្ត្រ បច្ចេកវិទ្យា នវានុវត្តន៍ និងបរិវត្តកម្មឌីជីថល ដោយតម្រូវឱ្យដោះស្រាយឱ្យបានដាច់ស្រេចនូវបណ្តាភារកិច្ចដែលយឺតយ៉ាវ និងយឺតពេល មិនទុកឱ្យកើតមានភារកិច្ចហួសកាលកំណត់ថ្មីៗឡើយ។

សុវណ្ណា