វៀតណាមឈានមុខគេលើទីផ្សារភ្ញៀវអន្តរជាតិមកកាន់កម្ពុជា

វៀតណាមឈានមុខគេលើទីផ្សារភ្ញៀវអន្តរជាតិមកកាន់កម្ពុជា។

យោងតាមរបាយការណ៍ដែលត្រូវបានក្រសួងទេសចរណ៍កម្ពុជាប្រកាសកាលពីថ្ងៃទី ២៧ ខែតុលា ប្រទេសនេះបានទទួលស្វាគមន៍ភ្ញៀវអន្តរជាតិចំនួន ២,៤៦ លាននាក់-លើក ក្នុងរយៈពេល ៩ ខែដើមឆ្នាំ ២០២៦ ធ្លាក់ចុះ ៤៣,៧% បើធៀបនឹងកម្រិត ៤,៣៧ លាននាក់-លើក ដែលត្រូវបានកត់ត្រាក្នុងរយៈពេលដូចគ្នានៃឆ្នាំ ២០២៥។

វៀតណាម ចិន និងសហរដ្ឋអាមេរិក បន្តជាទីផ្សារភ្ញៀវអន្តរជាតិសំខាន់ទាំងបីរបស់កម្ពុជា ក្នុងដំណាក់កាលពីខែមករា ដល់ខែកញ្ញា ឆ្នាំ ២០២៦។ ក្នុងនោះ ចំនួនភ្ញៀវវៀតណាមសម្រេចបាន ៦៥១.៤៨៦ នាក់-លើក ធ្លាក់ចុះ ២៨% បើធៀបនឹងរយៈពេលដូចគ្នា ប៉ុន្តែនៅតែឈរលំដាប់ថ្នាក់លេខមួយក្នុងចំណោមទីផ្សារបញ្ជូនភ្ញៀវមកកាន់ប្រទេសនេះ។

ឈរនៅលំដាប់បន្ទាប់ពីវៀតណាម គឺប្រទេសចិន ជាមួយនឹងចំនួនភ្ញៀវ ៦៤៣.៣១៤ នាក់-លើក ធ្លាក់ចុះ ២៧,៦%។ ទន្ទឹមនឹងនោះ ចំនួនភ្ញៀវទេសចរមកពីសហរដ្ឋអាមេរិកសម្រេចបាន ១៤០.២៧៦ នាក់-លើក ធ្លាក់ចុះ ៥,៦%។

លទ្ធផលនេះបានកត់សម្គាល់នូវការផ្លាស់ប្តូរចំណាត់ថ្នាក់រវាងទីផ្សារភ្ញៀវធំជាងគេទាំងពីររបស់កម្ពុជា។ មុននេះ ក្នុងរយៈពេល ៦ ខែដើមឆ្នាំ ២០២៦ ក៏ដូចជាប៉ុន្មានឆ្នាំមុនៗ ប្រទេសចិនតែងតែរក្សាតំណែងនាំមុខគេលើចំនួនភ្ញៀវទេសចរដែលមកកាន់ប្រទេសនៅតំបន់អាស៊ីអាគ្នេយ៍មួយនេះ។

ដោយពន្យល់អំពីមូលហេតុនៃការធ្លាក់ចុះនៃភ្ញៀវអន្តរជាតិ រដ្ឋមន្ត្រីក្រសួងទេសចរណ៍កម្ពុជា ឯកឧត្តម ហួត ហាក់ បានឱ្យដឹងថា វិស័យទេសចរណ៍នៃប្រទេសនេះកំពុងទទួលរងផលប៉ះពាល់ពីការលំបាកជាច្រើនទាំងនៅក្នុងតំបន់ និងនៅលើពិភពលោក។

យោងតាមឯកឧត្តម ព័ត៌មានអវិជ្ជមាននានាពាក់ព័ន្ធនឹងបណ្តាញឆបោកតាមប្រព័ន្ធអនឡាញ ស្ថានភាពតានតឹងនៅតំបន់ព្រំដែនកម្ពុជា - ថៃ ព្រមទាំងជម្លោះនានានៅតំបន់មជ្ឈិមបូព៌ាដែលបណ្តាលឱ្យតម្លៃប្រេងឥន្ធនៈកើនឡើងខ្ពស់ គឺជាកត្តាចម្បងដែលកាត់បន្ថយតម្រូវការទេសចរណ៍។

បច្ចុប្បន្ន ទេសចរណ៍គឺជាវិស័យសេដ្ឋកិច្ចស្នូលមួយរបស់កម្ពុជា រួមជាមួយកសិកម្ម សំណង់ អចលនទ្រព្យ និងការនាំចេញផលិតផលឧស្សាហកម្ម ដូចជា សម្លៀកបំពាក់ ស្បែកជើង និងសម្ភារធ្វើដំណើរ។

សន្ទុះធ្លាក់ចុះក្នុងរយៈពេល ៩ ខែដើមឆ្នាំនេះ ផ្ទុយស្រឡះពីលទ្ធផលនៃពេញមួយឆ្នាំ ២០២៥ ដែលកាលនោះ កម្ពុជាបានទាក់ទាញភ្ញៀវអន្តរជាតិចំនួន ៥,៥៧ លាននាក់-លើក ដោយនាំមកនូវចំណូលទេសចរណ៍សរុបប្រមាណ ៣,៨៧ ពាន់លានដុល្លារអាមេរិក។

ទោះជាយ៉ាងណាក៏ដោយ លោក ថោង ម៉េងដាវីដ អនុប្រធានមជ្ឈមណ្ឌលស្រាវជ្រាវចិន - អាស៊ាន នៃសាកលវិទ្យាល័យវិទ្យាសាស្ត្រ និងបច្ចេកវិទ្យាកម្ពុជា នៅតែសម្តែងនូវក្តីរំពឹងថា វិស័យទេសចរណ៍នៃប្រទេសនេះនឹងងើបឡើងវិញក្នុងប៉ុន្មានឆ្នាំខាងមុខ។

ថ្លែងប្រាប់ទីភ្នាក់ងារសារព័ត៌មានស៊ីនហួរ លោកបានចាត់ទុកថា កិច្ចខិតខំប្រឹងប្រែងយ៉ាងម៉ឺងម៉ាត់របស់កម្ពុជាក្នុងការប្រយុទ្ធប្រឆាំងនឹងការឆបោកតាមប្រព័ន្ធអនឡាញ នឹងរួមចំណែកស្តារឡើងវិញនូវរូបភាពរបស់ប្រទេសជាតិ និងពង្រឹងទំនុកចិត្តរបស់ភ្ញៀវទេសចរអន្តរជាតិ។

យោងតាមលោក ថោង ម៉េងដាវីដ ការកាត់បន្ថយរបាំងនានាចំពោះសកម្មភាពទេសចរណ៍ ព្រមទាំងការម្ចាស់ការដោះស្រាយនូវក្តីបារម្ភនានាអំពីសុវត្ថិភាព នឹងជួយឱ្យកម្ពុជាទាក់ទាញបានទាំងភ្ញៀវទេសចរដែលមកទស្សនាកម្សាន្តជាលើកដំបូង និងភ្ញៀវដែលវិលត្រឡប់មកកាន់ប្រទេសនេះឡើងវិញ៕

ពង្រឹងកិច្ចសហប្រតិបត្តិការវៀតណាម - កម្ពុជានៅតំបន់ភាគនិរតី យុគសម័យ - ក្នុងរយៈពេលពីរថ្ងៃ គឺថ្ងៃទី ១៩ និង ២០ ខែតុលា អគ្គកុងស៊ុលវៀតណាមប្រចាំខេត្តព្រះសីហនុ លោក Nguyen Trung Hieu បានអញ្ជើញទៅបំពេញទស្សនកិច្ច និងជួបសម្តែងការគួរសមជាមួយថ្នាក់ដឹកនាំនៃមូលដ្ឋានកងទ័ពជើងទឹករាម និងកំពង់ផែស្វយ័តក្រុងព្រះសីហនុ ដោយបានផ្លាស់ប្តូរយោបល់អំពីការសម្របសម្រួលគ្រប់គ្រងព្រំដែនសមុទ្រ ការបង្ការនិងទប់ស្កាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត (IUU) ពាណិជ្ជកម្ម និងការដឹកជញ្ជូនតាមផ្លូវសមុទ្ររវាងវៀតណាម និងកម្ពុជា។

ពីផ្លូវល្បឿនលឿន ទៅកាន់សេដ្ឋកិច្ចឌីជីថល៖ ពង្រីកការតភ្ជាប់វៀតណាម - កម្ពុជា យុគសម័យ - តាមឯកអគ្គរដ្ឋទូត Nguyen Minh Vu ដំណើរទស្សនកិច្ចផ្លូវការនៅប្រទេសកម្ពុជារបស់នាយករដ្ឋមន្ត្រី Le Minh Hung ត្រូវបានរំពឹងថានឹងធ្វើឱ្យជាក់ស្តែងនូវការព្រមព្រៀងកម្រិតខ្ពស់នានា ឱ្យក្លាយជាកិច្ចសហប្រតិបត្តិការលើវិស័យគមនាគមន៍ ថាមពល និងសេដ្ឋកិច្ចឌីជីថល រួមចំណែកបង្កើតប្រព័ន្ធអេកូឡូស៊ីតភ្ជាប់រវាងខឿនសេដ្ឋកិច្ចទាំងពីរ សំដៅឆ្ពោះទៅរកគោលដៅពាណិជ្ជកម្មទ្វេភាគីចំនួន ២០ ពាន់លានដុល្លារអាមេរិក។

ឌឿងង្វៀន