ពីផ្លូវល្បឿនលឿន ទៅកាន់សេដ្ឋកិច្ចឌីជីថល៖ ពង្រីកការតភ្ជាប់វៀតណាម - កម្ពុជា

ឯកអគ្គរដ្ឋទូត Nguyen Minh Vu ឆ្លើយបទសម្ភាសន៍របស់អ្នកយកព័ត៌មាននៃទីភ្នាក់ងារសារព័ត៌មានវៀតណាមប្រចាំនៅភ្នំពេញ ប្រទេសកម្ពុជា។

ក្នុងឱកាសនៃដំណើរទស្សនកិច្ចផ្លូវការរបស់នាយករដ្ឋមន្ត្រី Le Minh Hung នៅប្រទេសកម្ពុជា អ្នកយកព័ត៌មាននៃទីភ្នាក់ងារសារព័ត៌មានវៀតណាម ប្រចាំនៅ Phnom Penh បានធ្វើបទសម្ភាសន៍ជាមួយឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសង្គមនិយមវៀតណាមប្រចាំនៅព្រះរាជាណាចក្រកម្ពុជា Nguyen Minh Vu អំពីអត្ថន័យនៃព្រឹត្តិការណ៍នេះ និងទស្សនវិស័យនៃទំនាក់ទំនងកិច្ចសហប្រតិបត្តិការរវាងប្រទេសទាំងពីរ។

ធ្វើឱ្យជាក់ស្តែងនូវការព្រមព្រៀង សំដៅឆ្ពោះទៅរកពាណិជ្ជកម្ម ២០ ពាន់លានដុល្លារអាមេរិក

សូមគោរពជម្រាបសួរឯកអគ្គរដ្ឋទូត សូមលោកមេត្តាចែករំលែកអំពីគោលដៅ អត្ថន័យ ព្រមទាំងការរំពឹងទុកចំពោះដំណើរទស្សនកិច្ចរបស់នាយករដ្ឋមន្ត្រី Le Minh Hung លើកនេះ?

ឯកអគ្គរដ្ឋទូត Nguyen Minh Vu៖ ដំណើរទស្សនកិច្ចផ្លូវការនៅព្រះរាជាណាចក្រកម្ពុជា ចាប់ពីថ្ងៃទី ៩ ដល់ថ្ងៃទី ១០ ខែតុលា ឆ្នាំ ២០២៦ គឺស្ថិតក្នុងដំណើរទស្សនកិច្ចទ្វេភាគីនៅក្រៅប្រទេសលើកដំបូងរបស់សមមិត្ត Le Minh Hung ក្នុងឋានៈជានាយករដ្ឋមន្ត្រី ដោយបានបង្ហាញយ៉ាងច្បាស់នូវការយកចិត្តទុកដាក់ និងអាទិភាពខ្ពស់បំផុតរបស់វៀតណាមចំពោះការពង្រឹង និងធ្វើឱ្យកាន់តែស៊ីជម្រៅឥតឈប់ឈរនូវទំនាក់ទំនងជាមួយកម្ពុជា។

ក្នុងបរិបទនៃស្ថានភាពអន្តរជាតិ និងតំបន់បន្តមានការវិវត្តយ៉ាងស្មុគស្មាញ និងពិបាកប៉ាន់ស្មាន ដំណើរទស្សនកិច្ចនេះអះអាងនូវការប្តេជ្ញាចិត្តរបស់វៀតណាម រួមជាមួយកម្ពុជា ពូនជ្រុំបរិយាកាសសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍរួមនៅក្នុងតំបន់ ព្រមទាំងជំរុញគ្រប់ជ្រុងជ្រោយនូវកិច្ចសហប្រតិបត្តិការរវាងប្រទេសទាំងពីរ។ ដំណើរទស្សនកិច្ចនេះក៏ជាឱកាសមួយដើម្បីពង្រឹងជំនឿទុកចិត្ត ភាពស្និទ្ធស្នាល និងការយោគយល់គ្នាទៅវិញទៅមករវាងនាយករដ្ឋមន្ត្រី Le Minh Hung ជាមួយនឹងបណ្តាថ្នាក់ដឹកនាំជាន់ខ្ពស់បំផុតរបស់កម្ពុជា។

គិតចាប់តាំងពីដើមឆ្នាំ ២០២៦ មកទល់ពេលនេះ ភាគីទាំងពីរបានផ្លាស់ប្តូរគណៈប្រតិភូរវាងថ្នាក់ដឹកនាំជាន់ខ្ពស់ ឯកភាពលើទិសដៅសំខាន់ៗជាច្រើន និងសម្រេចបាននូវការព្រមព្រៀងប្រកបដោយអត្ថន័យយុទ្ធសាស្ត្រ ជាពិសេសគឺដំណើរទស្សនកិច្ចផ្លូវរដ្ឋរបស់អគ្គលេខាបក្ស To Lam (ខែកុម្ភៈ ឆ្នាំ ២០២៦) នៅប្រទេសកម្ពុជា និងចូលរួមការប្រជុំជាន់ខ្ពស់រវាងបក្សទាំងពីរ បក្សទាំងបី និងដំណើរទស្សនកិច្ចផ្លូវការរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី (ខែមិថុនា ឆ្នាំ ២០២៦) នៅប្រទេសវៀតណាម ចូលរួម និងថ្លែងសុន្ទរកថានៅវេទិកាអនាគតអាស៊ានលើកទី ៣ ព្រមទាំងដំណើរទស្សនកិច្ចផ្លូវការរបស់សម្តេច ឃួន សុដារី ប្រធានរដ្ឋសភា (ខែកក្កដា ឆ្នាំ ២០២៦) នៅប្រទេសវៀតណាម។

នៅក្នុងបណ្តាជំនួបពិភាក្សាការងារ និងផ្លាស់ប្តូរយោបល់ក្នុងដំណើរទស្សនកិច្ចនាពេលខាងមុខ ខ្ញុំជឿជាក់ថានាយករដ្ឋមន្ត្រី Le Minh Hung និងបណ្តាថ្នាក់ដឹកនាំកម្ពុជានឹងត្រួតពិនិត្យ ដោះស្រាយ និងដកចេញនូវបញ្ហាសេសសល់ និងឧបសគ្គនានាក្នុងគ្រប់ជ្រុងជ្រោយនៃកិច្ចសហប្រតិបត្តិការរវាងប្រទេសទាំងពីរ ធ្វើឱ្យជាក់ស្តែង និងប្រែក្លាយបណ្តាការប្តេជ្ញាចិត្ត កិច្ចព្រមព្រៀងដែលសម្រេចបានឱ្យក្លាយជាការពិត ស្របពេលជាមួយគ្នានេះ ផ្លាស់ប្តូរយោបល់ និងកំណត់ទិសដៅ ព្រមទាំងអាទិភាពនៃកិច្ចសហប្រតិបត្តិការថ្មីៗ ប្រកបដោយចរិតលក្ខណៈយុទ្ធសាស្ត្រសម្រាប់ទំនាក់ទំនងនៃប្រទេសទាំងពីរនាពេលខាងមុខ។

ថ្នាក់ដឹកនាំជាច្រើននៃបណ្តាក្រសួង ស្ថាប័ន មូលដ្ឋាន និងសហគ្រាសនានារបស់វៀតណាម នឹងអមដំណើរនាយករដ្ឋមន្ត្រី Le Minh Hung។ ភាគីទាំងពីរគ្រោងនឹងចុះហត្ថលេខាលើឯកសារកិច្ចសហប្រតិបត្តិការមួយចំនួន។ ខ្ញុំរំពឹងថាដំណើរទស្សនកិច្ចលើកដំបូងរបស់នាយករដ្ឋមន្ត្រី Le Minh Hung នៅប្រទេសកម្ពុជា មិនត្រឹមតែរួមចំណែកបន្តពង្រឹងទំនុកចិត្តខាងនយោបាយ ពង្រីកកិច្ចសហប្រតិបត្តិការសេដ្ឋកិច្ច វប្បធម៌ អប់រំ ជំរុញការជួបប្រាស្រ័យទាក់ទងប្រជាជនប៉ុណ្ណោះទេ ប៉ុន្តែថែមទាំងបង្កើតកម្លាំងចលករ និងសន្ទុះថ្មី ដើម្បីឱ្យទំនាក់ទំនងកិច្ចសហប្រតិបត្តិការរវាងប្រទេសទាំងពីរបន្តឈានចូលកាន់តែស៊ីជម្រៅ ជាក់ស្តែង និងប្រកបដោយប្រសិទ្ធភាព ជាពិសេសក្នុងការជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងការវិនិយោគ បញ្ចេញឱ្យអស់ពីសមត្ថភាពនូវលក្ខណៈបំពេញបន្ថែមឱ្យគ្នាទៅវិញទៅមករវាងខឿនសេដ្ឋកិច្ចទាំងពីរ សំដៅឆ្ពោះទៅរកគោលដៅដំឡើងទំហំពាណិជ្ជកម្មទ្វេភាគីឱ្យដល់ ២០ ពាន់លានដុល្លារអាមេរិក នាពេលឆាប់ៗខាងមុខ។

ការតភ្ជាប់ពីផ្លូវល្បឿនលឿន ថាមពល រហូតដល់សេដ្ឋកិច្ចឌីជីថល

តើឯកអគ្គរដ្ឋទូតវាយតម្លៃយ៉ាងដូចម្តេច អំពីលទ្ធភាពនៃការបង្កើត «ប្រព័ន្ធអេកូឡូស៊ីតភ្ជាប់» វៀតណាម - កម្ពុជា ក្នុងដំណាក់កាលខាងមុខ ដែលក្នុងនោះមិនត្រឹមតែមានពាណិជ្ជកម្ម ការវិនិយោគ និងហេដ្ឋារចនាសម្ព័ន្ធគមនាគមន៍ប៉ុណ្ណោះទេ ប៉ុន្តែថែមទាំងរួមបញ្ចូលទាំងភស្តុភារកម្ម ពាណិជ្ជកម្មអេឡិចត្រូនិកឆ្លងកាត់ព្រំដែន បរិវត្តកម្មឌីជីថល វិទ្យាសាស្ត្រ-បច្ចេកវិទ្យា និងការផ្សារភ្ជាប់រវាងមូលដ្ឋាន និងសហគ្រាសនានា ហើយដំណើរទស្សនកិច្ចរបស់នាយករដ្ឋមន្ត្រីអាចបង្កើតជាកម្លាំងរុញច្រានជាក់ស្តែងអ្វីខ្លះសម្រាប់ដំណើរការនេះ?

ឯកអគ្គរដ្ឋទូត Nguyen Minh Vu៖ កិច្ចសហប្រតិបត្តិការសេដ្ឋកិច្ច ពាណិជ្ជកម្ម ការវិនិយោគ និងទេសចរណ៍ ពិតជាកំពុងក្លាយជាចំណុចលេចធ្លោ និងជាវិស័យសហប្រតិបត្តិការសំខាន់ៗនៅក្នុងទិដ្ឋភាពរួមនៃទំនាក់ទំនងវៀតណាម - កម្ពុជា។ ចំពោះពាណិជ្ជកម្ម ក្នុងឆ្នាំ ២០២៥ ទំហំពាណិជ្ជកម្មទ្វេភាគីសម្រេចបានកម្រិតកំណត់ត្រា ១១,៣ ពាន់លានដុល្លារអាមេរិក។ ក្នុងរយៈពេល ៨ ខែដើមឆ្នាំ ២០២៦ សម្រេចបានប្រមាណ ៨,៧ ពាន់លានដុល្លារអាមេរិក កើនឡើង ៨,៣% បើធៀបនឹងរយៈពេលដូចគ្នាក្នុងឆ្នាំ ២០២៥។ បច្ចុប្បន្ន វៀតណាមគឺជាដៃគូពាណិជ្ជកម្មធំជាងគេទី ៣ របស់កម្ពុជា ឈរនៅលំដាប់ទី ២ ក្នុងចំណោមបណ្តាប្រទេសនាំចេញទំនិញចូលមកកម្ពុជា និងជាប្រទេសនាំចូលទំនិញពីកម្ពុជាធំជាងគេទី ២ ផងដែរ។

បច្ចុប្បន្ន វៀតណាមមានគម្រោងវិនិយោគចំនួន ២២៣ នៅកម្ពុជា ជាមួយនឹងទុនចុះបញ្ជីសរុបជិត ៣,៤ ពាន់លានដុល្លារអាមេរិក ដែលមិនត្រឹមតែដំណើរការអាជីវកម្មប្រកបដោយប្រសិទ្ធភាព និងបង្កើតការងារធ្វើជូនពលកររាប់ម៉ឺននាក់ប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ដល់ថវិការដ្ឋ និងសន្តិសុខសង្គមនៅកម្ពុជាទៀតផង។

ចំពោះវិស័យទេសចរណ៍ ក្នុងរយៈពេល ៨ ខែដើមឆ្នាំ ២០២៦ វៀតណាមជាប្រភពភ្ញៀវទេសចរអន្តរជាតិឈានមុខគេរបស់កម្ពុជា ដែលមានចំនួនជាង ៥៨៥.០០០ លើកនាក់ រីឯភ្ញៀវទេសចរកម្ពុជាទៅកាន់ប្រទេសវៀតណាមក្នុងរយៈពេល ៩ ខែដើមឆ្នាំ សម្រេចបានប្រមាណ ៦៣០.០០០ លើកនាក់ កើនឡើង ៤០,៥% និងជាទីផ្សារបញ្ជូនភ្ញៀវធំជាងគេទី ៦ របស់វៀតណាម។ តួលេខទាំងនេះឆ្លុះបញ្ចាំងពីភាពស្និទ្ធស្នាល និងការផ្លាស់ប្តូរប្រាស្រ័យទាក់ទងគ្នាកាន់តែជិតស្និទ្ធរវាងប្រជាជនវៀតណាម និងកម្ពុជា។

ខ្ញុំយល់ឃើញថា ដំណើរទស្សនកិច្ចរបស់នាយករដ្ឋមន្ត្រី Le Minh Hung មកកាន់ប្រទេសកម្ពុជា មិនត្រឹមតែពង្រឹងបន្ថែមទៀតនូវការតភ្ជាប់កាន់តែជិតស្និទ្ធ និងមានលក្ខណៈបំពេញបន្ថែមឱ្យគ្នាទៅវិញទៅមករវាងខឿនសេដ្ឋកិច្ចទាំងពីរប៉ុណ្ណោះទេ ប៉ុន្តែថែមទាំងបើកឱកាសបង្កើតប្រព័ន្ធអេកូឡូស៊ីផ្សារភ្ជាប់សេដ្ឋកិច្ចកាន់តែគ្រប់ជ្រុងជ្រោយរវាងវៀតណាម - កម្ពុជា។

ជាបឋម គឺការផ្សារភ្ជាប់ផ្នែកហេដ្ឋារចនាសម្ព័ន្ធគមនាគមន៍ ដោយភាគីទាំងពីរបានឯកភាពលើចំណុចតភ្ជាប់ខ្សែផ្លូវល្បឿនលឿន ទីក្រុងហូជីមិញ - Moc Bai - Bavet - Phnom Penh ដែលជួយឱ្យខ្សែផ្លូវគន្លឹះនេះអាចដាក់ឱ្យដំណើរការតាមផែនការនៅចុងឆ្នាំ ២០២៧ និងការសម្ពោធជាផ្លូវការនូវច្រកទ្វារព្រំដែនអន្តរជាតិមួយគូ Khanh Binh - Chrey Thom នាថ្ងៃទី ៣ ខែតុលា ឆ្នាំ ២០២៦ បង្កើតលក្ខខណ្ឌកាន់តែងាយស្រួលសម្រាប់ការធ្វើដំណើរ ការដឹកជញ្ជូនទំនិញ ទេសចរណ៍ និងការជំរុញការជួបប្រាស្រ័យទាក់ទងប្រជាជន។

ក្រៅពីការតភ្ជាប់ផ្លូវគោក ភាគីទាំងពីរក៏បានបង្កើតការតភ្ជាប់ផ្លូវអាកាស ជាមួយនឹងជើងហោះហើរត្រង់ជាច្រើនរវាងទីក្រុងធំៗ និងតំបន់ទេសចរណ៍រវាងប្រទេសទាំងពីរ ជំរុញការតភ្ជាប់គមនាគមន៍ផ្លូវទឹក រួមទាំងគមនាគមន៍ផ្លូវទន្លេ និងបណ្តាខ្សែផ្លូវសមុទ្រ។ ទន្ទឹមនឹងនោះ ភាគីទាំងពីរក៏បានផ្តល់អាទិភាពដល់ការអភិវឌ្ឍការតភ្ជាប់ហេដ្ឋារចនាសម្ព័ន្ធថាមពល តាមរយៈការតភ្ជាប់ប្រព័ន្ធបញ្ជូនអគ្គិសនី បង្កើតយន្តការទិញ-លក់ប្រេងសាំង ប្រេងឥន្ធនៈ ឧស្ម័នរាវ (LNG)... ដើម្បីធានាតម្រូវការអភិវឌ្ឍន៍ និងសន្តិសុខថាមពលរបស់ប្រទេសទាំងពីរ។

មិនត្រឹមតែការតភ្ជាប់ផ្នែកហេដ្ឋារចនាសម្ព័ន្ធរឹងប៉ុណ្ណោះទេ ប្រទេសទាំងពីរក៏មានការផ្សារភ្ជាប់គ្នាកាន់តែជិតស្និទ្ធថែមទៀតលើគោលនយោបាយ និងយុទ្ធសាស្ត្រអភិវឌ្ឍន៍។ បញ្ហាស្ទះផ្នែកគោលនយោបាយ និងស្ថាប័នកំពុងត្រូវបានសម្របសម្រួលដោះស្រាយ ដោយបង្កើតបាននូវច្រករបៀងគតិយុត្ត និងគោលនយោបាយកាន់តែបើកចំហសម្រាប់ការសហប្រតិបត្តិការកាន់តែរឹងមាំរវាងប្រទេសទាំងពីរ។

ភាគីទាំងពីរក៏កំពុងផ្លាស់ប្តូរយោបល់ដើម្បីបង្កើតយន្តការសហប្រតិបត្តិការសេដ្ឋកិច្ចថ្មី សំដៅជំរុញបន្ថែមទៀតនូវទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគរវាងភាគីទាំងពីរ។ សហគ្រាសធំៗជាច្រើនរបស់វៀតណាមដែលអមដំណើរនាយករដ្ឋមន្ត្រី Le Minh Hung ក្នុងដំណើរទស្សនកិច្ចលើកនេះ មិនត្រឹមតែជាឱកាសដើម្បីឱ្យសហគ្រាសនៃភាគីទាំងពីរជួបប្រាស្រ័យទាក់ទង និងស្វែងរកកាលានុវត្តភាពកិច្ចសហប្រតិបត្តិការប៉ុណ្ណោះទេ ប៉ុន្តែថែមទាំងលើកឡើងនូវអនុសាសន៍ និងសំណើនានាជូនចំពោះថ្នាក់ដឹកនាំនៃប្រទេសទាំងពីរ ដើម្បីដោះស្រាយការលំបាក ឧបសគ្គ បង្កើតលក្ខខណ្ឌអំណោយផលផ្នែកយន្តការ និងគោលនយោបាយសម្រាប់សហគ្រាសក្នុងការជំរុញការវិនិយោគ និងធុរកិច្ចរវាងប្រទេសទាំងពីរ។

ទន្ទឹមនឹងនោះ ការអភិវឌ្ឍយ៉ាងខ្លាំងក្លានៃវិទ្យាសាស្ត្រ-បច្ចេកវិទ្យាសកលលោក កំពុងជំរុញឱ្យវៀតណាម និងកម្ពុជាបង្កើនការវិនិយោគលើការស្រាវជ្រាវ ដើម្បីឆ្លើយតបទាន់ពេលវេលាទៅនឹងនិន្នាការអភិវឌ្ឍន៍នៃយុគសម័យ ស្របពេលជាមួយគ្នានេះ បើកចេញនូវកាលានុវត្តភាពថ្មីសម្រាប់ការផ្សារភ្ជាប់កាន់តែជិតស្និទ្ធរវាងប្រទេសទាំងពីរ។ សេចក្តីសម្រេចចិត្ត និងបណ្តាឯកសារនៃមហាសន្និបាតលើកទី ១៤ នៃបក្សកុម្មុយនីស្តវៀតណាម បានដាក់វិទ្យាសាស្ត្រ បច្ចេកវិទ្យា នវានុវត្តន៍ និងបរិវត្តកម្មឌីជីថល ទៅក្នុងទីតាំងកណ្តាលនៃគំរូកំណើនសេដ្ឋកិច្ច។ រាជរដ្ឋាភិបាលកម្ពុជាក៏ចាត់ទុកវិទ្យាសាស្ត្រ បច្ចេកវិទ្យា និងនវានុវត្តន៍ ជាកម្លាំងចលករដ៏សំខាន់សម្រាប់ការអភិវឌ្ឍប្រទេសជាតិ ហើយបានកំណត់វិស័យនេះជាចំណុចស្នូលមួយក្នុងចំណោមចំណុចស្នូលនានានៃយុទ្ធសាស្ត្របញ្ចកោណ ដំណាក់កាលទី ១។ ចំណុចនេះបាន កំពុង និងនឹងបង្កើតនូវកាលានុវត្តភាពតាមបែបធម្មជាតិសម្រាប់ការតភ្ជាប់រវាងប្រទេសទាំងពីរក្នុងវិស័យខាងលើ ដោយរួមចំណែកបំពេញបន្ថែមនូវការកសាងប្រព័ន្ធអេកូឡូស៊ីផ្សារភ្ជាប់គ្រប់ជ្រុងជ្រោយរវាងប្រទេសទាំងពីរ។

ក្នុងនាមជាប្រទេសដែលមានផលប្រយោជន៍ និងបទពិសោធឈានមុខ ខ្ញុំយល់ឃើញថាសហគ្រាសវៀតណាម ក្នុងនោះរួមមានក្រុមហ៊ុន Metfone (ការវិនិយោគរបស់សម្ព័ន្ធក្រុមហ៊ុន Viettel នៅកម្ពុជា) មានឱកាសពេញលេញក្នុងការគាំទ្រ ជំរុញការអភិវឌ្ឍ និងធ្វើជាស្ពានចម្លងផ្សារភ្ជាប់កិច្ចសហប្រតិបត្តិការលើវិស័យពាណិជ្ជកម្មអេឡិចត្រូនិកឆ្លងកាត់ព្រំដែន បរិវត្តកម្មឌីជីថល និងកិច្ចសហប្រតិបត្តិការវិទ្យាសាស្ត្រ-បច្ចេកវិទ្យារវាងវៀតណាម និងកម្ពុជា។

ខ្ញុំជឿជាក់យ៉ាងមុតមាំថា ដំណើរទស្សនកិច្ចផ្លូវការរបស់នាយករដ្ឋមន្ត្រី Le Minh Hung មកកាន់ប្រទេសកម្ពុជាលើកនេះ នឹងក្លាយជាចំណុចរបត់ដ៏សំខាន់មួយ ដើម្បីបំប្លែងជំនឿទុកចិត្តខាងនយោបាយរវាងប្រទេសទាំងពីរឱ្យទៅជាយុទ្ធសាស្ត្រ ការប្តេជ្ញាចិត្ត និងសកម្មភាពជាក់ស្តែង បង្កើតបាននូវមូលដ្ឋានគ្រឹះជំរុញប្រព័ន្ធអេកូឡូស៊ីផ្សារភ្ជាប់សេដ្ឋកិច្ចកាន់តែរឹងមាំ និងគ្រប់ជ្រុងជ្រោយរវាងប្រទេសទាំងពីរ វៀតណាម និងកម្ពុជា។

យុវជនជំនាន់ក្រោយបន្តវេននូវចំណងមិត្តភាព

សូមគោរពជម្រាបសួរឯកអគ្គរដ្ឋទូត នាពេលកន្លងមក ការងារការទូតប្រជាជនតែងតែត្រូវបានថ្នាក់ដឹកនាំ និងប្រជាជននៃប្រទេសទាំងពីរយកចិត្តទុកដាក់ជាពិសេស។ ក្នុងឱកាសនេះ សូមឯកអគ្គរដ្ឋទូតមេត្តាចែករំលែកការវាយតម្លៃអំពីតួនាទីរបស់យុវជនជំនាន់ក្រោយ ជាពិសេសគឺកម្លាំងយុវជន ជួរកម្មាភិបាលបន្តវេន និងការងារបណ្តុះបណ្តាលធនធានមនុស្សប្រកបដោយគុណភាពខ្ពស់... ក្នុងការបន្តវេន ថែរក្សា និងពូនជ្រុំទំនាក់ទំនងមិត្តភាពជាប្រពៃណីវៀតណាម - កម្ពុជា ឱ្យកាន់តែរីកចម្រើនលូតលាស់? នាពេលខាងមុខ តើស្ថានទូតមានផែនការអ្វីខ្លះដើម្បីជួយពង្រឹងការជួបប្រាស្រ័យទាក់ទងប្រជាជន ជាពិសេសគឺការលើកកម្ពស់ការយល់ដឹងរបស់យុវជនជំនាន់ក្រោយអំពីចំណងមិត្តភាពទ្វេភាគី?

ឯកអគ្គរដ្ឋទូត Nguyen Minh Vu៖ ការទូតប្រជាជនតែងតែត្រូវបានកំណត់ថាជាមូលដ្ឋានគ្រឹះសង្គមដ៏រឹងមាំ ជាចំណងតភ្ជាប់តាមបែបធម្មជាតិ និងយូរអង្វែងនៅក្នុងទំនាក់ទំនងភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិតស្ថេរគង់វង្សយូរអង្វែងរវាងវៀតណាម និងកម្ពុជា។

នាពេលកន្លងមក ភាគីទាំងពីរបានអនុវត្តសកម្មភាពជាច្រើនសំដៅជំរុញការជួបប្រាស្រ័យទាក់ទងប្រជាជន ដូចជាការសម្របសម្រួលធ្វើបានល្អនូវការងារឃោសនា លើកកម្ពស់ការយល់ដឹងជូនប្រជាជននៃប្រទេសទាំងពីរអំពីទំនាក់ទំនងមិត្តភាពជាប្រពៃណី ភាពស្និទ្ធស្នាល និងកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរ ការសម្របសម្រួលរៀបចំ និងចូលរួមព្រឹត្តិការណ៍វប្បធម៌នានា ដូចជា សប្តាហ៍វប្បធម៌វៀតណាមនៅកម្ពុជា (ខែឧសភា ឆ្នាំ ២០២៦) និងពិធីបុណ្យវប្បធម៌ពិភពលោកលើកទី ២ នៅទីក្រុងហាណូយ (ថ្ងៃទី ១ ដល់ថ្ងៃទី ៤ ខែតុលា ឆ្នាំ ២០២៦) ជំរុញសកម្មភាពផ្លាស់ប្តូរគណៈប្រតិភូរវាងសមាជិកសភាវ័យក្មេង សមាគមមិត្តភាព សមាគមយុវជននៃប្រទេសទាំងពីរ និងរវាងវិទ្យាស្ថានស្រាវជ្រាវនានា...

ក្រៅពីនោះ បណ្តាក្រសួង ស្ថាប័ន មន្ទីរ និងមូលដ្ឋាន ជាពិសេសបណ្តាមូលដ្ឋានជាប់ព្រំដែន និងអង្គភាពចងសម្ព័ន្ធមេត្រីភាព តែងតែរៀបចំសកម្មភាពជាប្រចាំ ដើម្បីពង្រឹងការជួបប្រាស្រ័យទាក់ទង និងការផ្សារភ្ជាប់រវាងអាជ្ញាធរ ប្រជាជន និងសហគ្រាសនៃភាគីទាំងពីរ។

ក្នុងបរិបទដែលប្រទេសទាំងពីរកំពុងឈានចូលដំណាក់កាលអភិវឌ្ឍន៍ប្រកបដោយលក្ខណៈរបត់ ខ្ញុំវាយតម្លៃខ្ពស់ជាពិសេសចំពោះតួនាទីដ៏សំខាន់របស់យុវជនជំនាន់ក្រោយ រួមមានយុវជន បញ្ញវន្តវ័យក្មេង និងជួរកម្មាភិបាលបន្តវេន ដែលជាអ្នកកាន់តំណែងស្នូលក្នុងការបន្តវេនចរន្តមិត្តភាពវៀតណាម - កម្ពុជា។

ពួកគេគឺជាអ្នកដែលនឹងបន្តបេសកកម្មបន្តវេនប្រពៃណី និងផ្ទេរបន្តការចងចាំប្រវត្តិសាស្ត្រ តាមរយៈការដឹងគុណ ថែរក្សា និងសរសេរបន្តនូវទំព័រប្រវត្តិសាស្ត្រដ៏ស្រស់បំព្រងនៃទំនាក់ទំនងរវាងប្រទេសទាំងពីរ ដោយស្មារតីសាមគ្គីភាព ការចែករំលែក ការយោគយល់ និងការគោរពគ្នាទៅវិញទៅមក។ ក្នុងនោះ ជួរកម្មាភិបាលវ័យក្មេង ដែលជាកម្លាំងបន្តវេន គឺជាកម្លាំងស្នូលផ្ទាល់ក្នុងការសម្របសម្រួល អនុវត្ត និងធ្វើឱ្យជាក់ស្តែងនូវបណ្តាកិច្ចព្រមព្រៀង និងការប្តេជ្ញាចិត្តរវាងថ្នាក់ដឹកនាំជាន់ខ្ពស់នៃប្រទេសទាំងពីរ ដែលជាកត្តាធានាឱ្យការសម្របសម្រួលរវាងភាគីទាំងពីរប្រព្រឹត្តទៅដោយរលូន ប្រកបដោយប្រសិទ្ធភាព និងទាន់ពេលវេលាចំពោះមុខបញ្ហាប្រឈមថ្មីៗ។

ទន្ទឹមនឹងនោះ និស្សិតកម្មសិក្សា និងនិស្សិតកម្ពុជារាប់ពាន់នាក់ដែលបានទទួលការបណ្តុះបណ្តាលនៅប្រទេសវៀតណាម និងច្រាសមកវិញ មិនត្រឹមតែក្រេបជញ្ជក់ចំណេះដឹងវិជ្ជាជីវៈដើម្បីបម្រើដល់បុព្វហេតុកសាងប្រទេសជាតិរបស់ខ្លួនប៉ុណ្ណោះទេ ប៉ុន្តែថែមទាំងជា «រដ្ឋទូតមិត្តភាព» តាមបែបធម្មជាតិ ដែលផ្សារភ្ជាប់យ៉ាងជិតស្និទ្ធលើវិស័យភាសា វប្បធម៌ និងមនុស្សរវាងប្រទេសទាំងពីរ។ ក្រៅពីនេះ យុវជននៃប្រទេសទាំងពីរក៏ជាកម្លាំងដែលរហ័សរហួនបំផុត ឈានមុខគេក្នុងការបង្កើតអាជីវកម្មថ្មី នវានុវត្តន៍ បរិវត្តកម្មឌីជីថល និងការអភិវឌ្ឍសេដ្ឋកិច្ចបៃតង ដោយបើកចេញនូវលំហកិច្ចសហប្រតិបត្តិការថ្មីៗ ក្រៅពីក្របខ័ណ្ឌប្រពៃណី ព្រមទាំងនាំឱ្យទំនាក់ទំនងទ្វេភាគីដើរទាន់ចង្វាក់អភិវឌ្ឍន៍នៃតំបន់ និងពិភពលោក។

នាពេលខាងមុខ ការជួបប្រាស្រ័យទាក់ទងប្រជាជននឹងបន្តជាវិស័យសំខាន់មួយដែលរួមចំណែកពង្រឹងមូលដ្ឋានគ្រឹះសង្គម និងពង្រីកភាពស្និទ្ធស្នាលយូរអង្វែងរវាងប្រទេសទាំងពីរ។ ដើម្បីបន្តបណ្តុះបណ្តាលការយល់ដឹង និងជំរុញឱ្យកាន់តែខ្លាំងក្លាថែមទៀតនូវការជួបប្រាស្រ័យទាក់ទងប្រជាជន ជាពិសេសគឺនៅក្នុងស្រទាប់យុវវ័យ ស្ថានទូតវៀតណាមប្រចាំនៅកម្ពុជានឹងផ្តោតលើការអនុវត្តទិសដៅ និងសកម្មភាពសំខាន់ៗមួយចំនួនដូចខាងក្រោម៖

ទីមួយ សម្របសម្រួលយ៉ាងជិតស្និទ្ធជាមួយស្ថាប័នមានសមត្ថកិច្ចនៃប្រទេសទាំងពីរ ដើម្បីធ្វើបរិវត្តកម្មវិធីសាស្រ្តអប់រំ និងការឃោសនាអំពីប្រពៃណីប្រវត្តិសាស្ត្រសំដៅឆ្ពោះទៅកាន់ស្រទាប់យុវវ័យ ក្នុងនោះបង្កើនការអនុវត្តបណ្តាញផ្សព្វផ្សាយឌីជីថល និងបណ្តាញទំនាក់ទំនងសង្គម ដើម្បីផ្សព្វផ្សាយរឿងរ៉ាវប្រវត្តិសាស្ត្រ គំរូនៃសាមគ្គីភាពផ្សារភ្ជាប់ និងសមិទ្ធផលនៃកិច្ចសហប្រតិបត្តិការរវាងប្រទេសទាំងពីរឱ្យកាន់តែជិតស្និទ្ធ និងរស់រវើក ព្រមទាំងរៀបចំការប្រកួតប្រជែងស្វែងយល់អំពីប្រវត្តិសាស្ត្រ និងវប្បធម៌សម្រាប់យុវជននៃប្រទេសទាំងពីរ។

ទីពីរ សម្របសម្រួលជាមួយស្ថាប័នយុវជននៃប្រទេសទាំងពីរ ដើម្បីជំរុញបណ្តាកម្មវិធីជួបប្រាស្រ័យទាក់ទងយុវជន រៀបចំវេទិកាយុវជនទាំងតាមប្រព័ន្ធអនឡាញ និងដោយផ្ទាល់ បង្កើតជាវេទិកាដើម្បីឱ្យមិត្តយុវជននៃប្រទេសទាំងពីរផ្លាស់ប្តូរយោបល់ដោយបើកចំហ និងចែករំលែកគំនិតផ្តួចផ្តើមកិច្ចសហប្រតិបត្តិការ។

ទីបី ផ្តោតលើការផ្សារភ្ជាប់បណ្តាញនិស្សិតកម្មសិក្សា និងអតីតនិស្សិតនៃប្រទេសទាំងពីរ។ ក្នុងនោះ រួមដំណើរ និងជួយឧបត្ថម្ភជាក់ស្តែងដល់និស្សិតកម្មសិក្សាវៀតណាមដែលកំពុងសិក្សានៅកម្ពុជា ក៏ដូចជាកសាង និងពង្រីកតួនាទីរបស់សមាគមអតីតនិស្សិតកម្ពុជាដែលធ្លាប់បានសិក្សានៅប្រទេសវៀតណាម ដែលជាបុគ្គលកំពុង និងនឹងកាន់តំណែងសំខាន់ៗនៅក្នុងសង្គមកម្ពុជា ដើម្បីឱ្យពួកគេបន្តផ្សព្វផ្សាយនូវមនោសញ្ចេតនាដ៏ល្អប្រសើរអំពីប្រទេសជាតិ និងប្រជាជនវៀតណាម។

ទីបួន ពង្រឹងការតភ្ជាប់រវាងយុវជនជំនាន់ក្រោយ ជាមួយនឹងសហគមន៍សហគ្រាស តាមរយៈការលើកទឹកចិត្តដល់សហគ្រាសវៀតណាមនៅកម្ពុជា ផ្តល់អាហារូបករណ៍ ឱកាសចុះកម្មសិក្សា និងការងារធ្វើដល់យុវជន និងនិស្សិតកម្ពុជា ព្រមទាំងបង្កើតលក្ខខណ្ឌដើម្បីឱ្យយុវជននៃភាគីទាំងពីររួមគ្នាចូលរួមក្នុងគម្រោងបង្កើតអាជីវកម្មថ្មីផ្នែកបច្ចេកវិទ្យា ពាណិជ្ជកម្មអេឡិចត្រូនិក និងសកម្មភាពស្ម័គ្រចិត្តដើម្បីសហគមន៍នៅតាមមូលដ្ឋានតំបន់ព្រំដែន។

ចំណងមិត្តភាពជាប្រពៃណីវៀតណាម - កម្ពុជា គឺជាទ្រព្យសម្បត្តិដែលមិនអាចកាត់ថ្លៃបានរបស់ប្រជាជាតិនៃប្រទេសទាំងពីរ។ ជាមួយនឹងជំនឿទុកចិត្ត ចំណេះដឹង និងសេចក្តីក្លៀវក្លារបស់យុវជន ខ្ញុំជឿជាក់យ៉ាងមុតមាំថា មនុស្សជំនាន់បន្តវេននៃប្រទេសទាំងពីរនឹងបន្តធ្វើឱ្យទំនាក់ទំនងពិសេសនេះកាន់តែស្ថិតស្ថេររឹងមាំ និងរីកចម្រើនលូតលាស់ ដើម្បីសន្តិភាព ស្ថិរភាព និងការអភិវឌ្ឍប្រកបដោយវិបុលភាពរបស់ប្រជាជាតិទាំងពីរ។

សូមអរគុណយ៉ាងជ្រាលជ្រៅចំពោះឯកអគ្គរដ្ឋទូត!

កម្ពុជាឈានឆ្លងផុតបង្គោលចរ ១ លានតោនអង្ករនាំចេញជាលើកដំបូង យុគសម័យ - គិតត្រឹមថ្ងៃទី ១៩ ខែតុលា ប្រទេសកម្ពុជាបាននាំចេញអង្ករចំនួន ១.០១៤.៤៤២ តោន ដោយឈានឆ្លងផុតគោលដៅ ១ លានតោនជាលើកដំបូង ដែលរាជរដ្ឋាភិបាលនៃប្រទេសនេះបានដាក់ចេញចាប់តាំងពីជាងមួយទសវត្សរ៍មុន។ លទ្ធផលនេះបង្ហាញឱ្យឃើញពីទំហំកំណើននៃវិស័យស្រូវអង្ករកម្ពុជា ព្រមទាំងការប្រែប្រួលនានាក្នុងការពង្រីកការផលិត ទីផ្សារ និងសមត្ថភាពប្រកួតប្រជែង។

ខេត្ត Lam Dong - ខេត្ត Mondulkiri ពង្រឹងការសម្របសម្រួលការពារព្រំដែន យុគសម័យ - នាថ្ងៃទី ២០ ខែតុលា ប៉ុស្តិ៍នគរបាលការពារព្រំដែន Dak Lao ចំណុះបញ្ជាការដ្ឋានកងទ័ពការពារព្រំដែនខេត្ត Lam Dong និងវរៈសេនាតូចលេខ ១១៥ ចំណុះតំបន់ប្រតិបត្តិការសឹកខេត្តមណ្ឌលគិរី (ប្រទេសកម្ពុជា) បានរៀបចំពិធីចងសម្ព័ន្ធមេត្រីភាព ដោយបានឯកភាពគ្នំពង្រឹងការសម្របសម្រួលគ្រប់គ្រង ការពារព្រំដែន បង្ការនិងទប់ស្កាត់បទល្មើស ព្រមទាំងកសាងខ្សែព្រំដែនសន្តិភាព មិត្តភាព ស្ថិរភាព កិច្ចសហប្រតិបត្តិការ និងការអភិវឌ្ឍ។

ឌឹកអាញ់