នាំយកចំណេះដឹងវិទ្យាសាស្ត្រសង្គម និងមនុស្សសាស្ត្រ មកបម្រើដល់ការអភិវឌ្ឍមនុស្សជាតិ

សាស្ត្រាចារ្យ បណ្ឌិត Le Van Loi ប្រធានបណ្ឌិត្យសភាវិទ្យាសាស្ត្រសង្គមវៀតណាម ថ្លែងមតិបើកសម្ពោធលំហតាំងពិព័រណ៍។

កម្មវិធីនេះត្រូវបានដឹកនាំរៀបចំឡើងដោយ វិទ្យាស្ថានជនជាតិវិទ្យា និងសាសនាវិទ្យា វិទ្យាស្ថានស្រាវជ្រាវមនុស្សជាតិ ក្រុមគ្រួសារ និងយេនឌ័រ ដោយមានការសហការអនុវត្តពីការិយាល័យបណ្ឌិត្យសភា។

លំហតាំងពិព័រណ៍បានណែនាំអំពីដំណើរការកកើត និងការរីកចម្រើនរបស់វិទ្យាស្ថានទាំងពីរ ព្រមទាំងបំភ្លឺឱ្យឃើញនូវការរួមចំណែកនានាក្នុងការស្រាវជ្រាវ កិច្ចសហប្រតិបត្តិការវិទ្យាសាស្ត្រ និងការអនុវត្តជាក់ស្តែងនូវលទ្ធផលស្រាវជ្រាវ។

តាមរយៈនោះ កម្មវិធីបានបង្ហាញពីដំណើរការនាំយកចំណេះដឹងវិទ្យាសាស្ត្រឱ្យកាន់តែកៀកជិតនឹងជីវភាពរស់នៅ បម្រើដល់មនុស្សជាតិ និងរួមចំណែកដល់គោលដៅអភិវឌ្ឍន៍ប្រកបដោយបរិយាបន្ន និងចីរភាព។

ថ្លែងមតិនៅក្នុងព្រឹត្តិការណ៍នេះ សាស្ត្រាចារ្យ បណ្ឌិត Le Van Loi សមាជិកគណៈកម្មាធិការមជ្ឈិមបក្ស និងជាប្រធានបណ្ឌិត្យសភាវិទ្យាសាស្ត្រសង្គមវៀតណាម បានយល់ឃើញថា ទោះបីជាមានអត្តសញ្ញាណ និងវិធីសាស្ត្រចូលទៅរកការស្រាវជ្រាវដោយឡែកពីគ្នាក៏ដោយ ក៏អង្គភាពទាំងពីរមានចំណុចជួបគ្នាលើផ្នត់គំនិតស្នូលមួយ គឺការចាត់ទុកមនុស្ស និងសហគមន៍ ទាំងជាកម្មវត្ថុនៃការស្រាវជ្រាវ ទាំងជាប្រធាននៃដំណើរការអភិវឌ្ឍន៍។

យោងតាមលោក ប្រធានបទនៃការតាំងពិព័រណ៍បានដាក់ចេញនូវតម្រូវការក្នុងការបម្លែងចំណេះដឹង តម្លៃវប្បធម៌ និងថាមពលច្នៃប្រឌិតរបស់មនុស្ស ឱ្យក្លាយជាកម្លាំងចលករសម្រាប់ការអភិវឌ្ឍប្រទេសជាតិ ព្រមទាំងពង្រីកកាលានុវត្តភាពនៃការទទួលបានផ្លែផ្កាពីការអភិវឌ្ឍសម្រាប់គ្រប់សមាសភាពសង្គម។

នេះក៏ជាការរួមបញ្ចូលគ្នារវាងផ្នត់គំនិត «ប្រជាជនជាឫសគល់» និងទស្សនៈ «មនុស្សជាចំណុចកណ្តាល» ផងដែរ។

ពីការស្រាវជ្រាវសហគមន៍ រហូតដល់ការស្រាវជ្រាវមនុស្សជាតិ

នៅក្នុងលំហតាំងពិព័រណ៍ វិទ្យាស្ថានជនជាតិវិទ្យា និងសាសនាវិទ្យា បានណែនាំនូវលទ្ធផលស្រាវជ្រាវនានាស្តីពីប្រវត្តិសាស្ត្រ ភាពចម្រុះនៅក្នុងការឯកភាពគ្នានៃសហគមន៍បណ្តាជនជាតិ ជំនឿ និងសាសនានៅវៀតណាម។

លទ្ធផលទាំងនេះបានរួមចំណែកបំភ្លឺឱ្យឃើញនូវអត្តសញ្ញាណវប្បធម៌ជាតិ ព្រមទាំងផ្តល់នូវទឡ្ហីករណ៍វិទ្យាសាស្ត្របម្រើដល់ការរៀបចំគោលនយោបាយ និងការពង្រឹងប្លុកមហាសាមគ្គីទូទាំងជនជាតិ។

ខណៈពេលនោះ វិទ្យាស្ថានស្រាវជ្រាវមនុស្សជាតិ ក្រុមគ្រួសារ និងយេនឌ័រ បានផ្តោតលើមនុស្សជាតិក្នុងកម្រិតបុគ្គល ក្រុមគ្រួសារ និងទំនាក់ទំនងសង្គមនានា ដែលក្នុងនោះបានសង្កត់ធ្ងន់ថាមនុស្សគឺជាស្នូល ក្រុមគ្រួសារគឺជាគ្រឹះនៃសង្គម។

ទិសដៅស្រាវជ្រាវនានាសំដៅឆ្ពោះទៅកាន់ការកសាងសង្គមប្រកបដោយសមភាព វឌ្ឍនភាព ដែលក្នុងនោះគ្មាននរណាម្នាក់ត្រូវបានទុកចោលនៅខាងក្រោយឡើយ ហើយសុភមង្គលរបស់មនុស្សជាតិក្លាយជាបន្ទាត់រង្វាស់នៃការអភិវឌ្ឍ។

យោងតាមសាស្ត្រាចារ្យ បណ្ឌិត Le Van Loi ការរួមបញ្ចូលគ្នារវាងទស្សនវិស័យម៉ាក្រូស្តីពីសហគមន៍ ជាមួយនឹងទស្សនវិស័យមីក្រូស្តីពីបុគ្គលម្នាក់ៗ បានបង្កើតឡើងនូវវិធីសាស្ត្រចូលទៅរកការស្រាវជ្រាវយ៉ាងគ្រប់ជ្រុងជ្រោយ ដោយបើកចេញនូវទិសដៅស្រាវជ្រាវថ្មីៗសម្រាប់វិទ្យាសាស្ត្រសង្គម និងមនុស្សសាស្ត្រ។

បម្លែងលទ្ធផលស្រាវជ្រាវឱ្យទៅជាតម្លៃជាក់ស្តែង

ប្រធានបណ្ឌិត្យសភាវិទ្យាសាស្ត្រសង្គមវៀតណាមបានសង្កត់ធ្ងន់ថា ចំណេះដឹងវិទ្យាសាស្ត្រមិនគួរត្រឹមតែឈប់នៅត្រឹមកម្រិតស្នាដៃស្រាវជ្រាវប៉ុណ្ណោះទេ ប៉ុន្តែចាំបាច់ត្រូវបម្លែងឱ្យទៅជាតម្លៃជាក់ស្តែងនៅក្នុងជីវភាពរស់នៅ ដោយរួមចំណែកដោះស្រាយបញ្ហាសង្គមនានា និងលើកកម្ពស់គុណភាពជីវិតរបស់ប្រជាជន។

ពីព្រឹត្តិការណ៍ដ៏មានអត្ថន័យនេះ លោកបានរំពឹងទុកថា វិទ្យាស្ថានទាំងពីរនឹងបន្តលើកកម្ពស់ចំណុចខ្លាំងរបស់ខ្លួន ជំរុញការស្រាវជ្រាវអន្តរវិស័យ ចងភ្ជាប់ទ្រឹស្តីជាមួយការអនុវត្តជាក់ស្តែង ព្រមទាំងលើកកម្ពស់សមត្ថភាពឆ្លុះបញ្ចាំងយោបល់ ការផ្តល់ប្រឹក្សាយុទ្ធសាស្ត្រ និងការប៉ាន់ប្រមាណទុកជាមុននូវបញ្ហាសង្គមថ្មីៗដែលកំពុងកើតឡើង។

តាមរយៈនោះ លទ្ធផលនៃការស្រាវជ្រាវវិទ្យាសាស្ត្រសង្គម និងមនុស្សសាស្ត្រ អាចបន្តផ្សព្វផ្សាយឱ្យកាន់តែទូលំទូលាយ រួមចំណែកជាក់ស្តែងជាងមុនដល់សហគមន៍ បម្រើដល់ដំណើរការរៀបចំគោលនយោបាយ និងជំរុញការអភិវឌ្ឍប្រកបដោយបរិយាបន្ន និងចីរភាពរបស់ប្រទេសជាតិ៕

ម៉ាញដាត