សម្រេចក្របខ័ណ្ឌស្ថាបត្យកម្មឌីជីថលយ៉ាងយូរបំផុតត្រឹមថ្ងៃទី ២៩ ខែមករា ឆ្នាំ ២០២៧

ព្រឹកថ្ងៃទី ១៥ ខែកញ្ញា នៅទីស្នាក់ការរដ្ឋាភិបាល ឧបនាយករដ្ឋមន្ត្រី Ho Quoc Dung បានធ្វើជាអធិបតីសន្និសីទផ្សព្វផ្សាយ ជ្រួតជ្រាប និងដាក់ពង្រាយសេចក្តីសម្រេចលេខ 1425/QD-TTg នាថ្ងៃទី ២៩ ខែកក្កដា ឆ្នាំ ២០២៦ របស់នាយករដ្ឋមន្ត្រី ស្តីពីការប្រកាសឱ្យប្រើប្រាស់ក្របខ័ណ្ឌស្ថាបត្យកម្មរួមជាតិឌីជីថល កំណែ ១.០។

សន្និសីទនេះ មានការអញ្ជើញចូលរួមពីថ្នាក់ដឹកនាំបណ្តាក្រសួង ស្ថាប័នពាក់ព័ន្ធ; តំណាងខុទ្ទកាល័យមជ្ឈិមបក្ស ខុទ្ទកាល័យរដ្ឋសភា ខុទ្ទកាល័យរដ្ឋាភិបាល ព្រមទាំងបណ្តាស្ថាប័ន អង្គភាពពាក់ព័ន្ធ និងត្រូវបានតភ្ជាប់តាមប្រព័ន្ធអនឡាញជាមួយបណ្តាមូលដ្ឋាន។

ថ្លែងមតិនៅក្នុងសន្និសីទ ឧបនាយករដ្ឋមន្ត្រី Ho Quoc Dung បានសង្កត់ធ្ងន់ថា ក្របខ័ណ្ឌស្ថាបត្យកម្មរួមជាតិឌីជីថល គឺជាមូលដ្ឋានដើម្បីឱ្យបណ្តាក្រសួង ស្ថាប័ន មូលដ្ឋាន កសាង ធ្វើបច្ចុប្បន្នភាពក្របខ័ណ្ឌស្ថាបត្យកម្មឌីជីថលរបស់ខ្លួន ព្រមទាំងតម្រង់ទិសការវិនិយោគ ការតភ្ជាប់ ការចែករំលែក និងការប្រើប្រាស់រួមគ្នានូវបណ្តាថ្នាលឌីជីថល។

ឧបនាយករដ្ឋមន្ត្រី Ho Quoc Dung ធ្វើជាអធិបតីសន្និសីទ។

គោលដៅដែលបានដាក់ចេញ គឺការបង្កើតឡើងនូវលំហឌីជីថលឯកភាពមួយ បន្តវេនជាអតិបរមានូវលទ្ធផលដែលមានស្រាប់ លើកកម្ពស់ប្រសិទ្ធភាពនៃការបម្រើប្រជាពលរដ្ឋ និងសហគ្រាស។

ក្នុងរយៈពេលកន្លងមក បណ្តាក្រសួង ស្ថាប័ន មូលដ្ឋាន បានវិនិយោគអភិវឌ្ឍហេដ្ឋារចនាសម្ព័ន្ធ ថ្នាល មូលដ្ឋានទិន្នន័យ និងប្រព័ន្ធព័ត៌មាន ដោយបានឆ្លើយតបជាជំហានដំបូងចំពោះតម្រូវការផ្លាស់ប្តូរថ្មីនូវរបៀបធ្វើការ និងលើកកម្ពស់គុណភាពបម្រើ។ មូលដ្ឋានទិន្នន័យសំខាន់ៗមួយចំនួនដូចជា ប្រជាជន សហគ្រាស ដីធ្លី ពន្ធដារ គយ ត្រូវបានបង្កើតឡើង និងលើកកម្ពស់ប្រសិទ្ធភាព។

ចេញពីមូលដ្ឋានគ្រឹះនោះ សន្និសីទបានផ្តោតលើការឯកភាពការយល់ដឹង បំភ្លឺច្បាស់ពីរបៀបរៀបចំចាត់តាំងការដាក់ពង្រាយក្របខ័ណ្ឌស្ថាបត្យកម្មរួមជាតិឌីជីថល ស្របតាមទិសដៅជាក់ស្តែង ព្រមៗគ្នា និងមានប្រសិទ្ធភាព។

បង្កើតស្ថាបត្យកម្មរួម កាត់បន្ថយការវិនិយោគរាយប៉ាយ

រាយការណ៍នៅក្នុងសន្និសីទ អនុរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យា Bui Hoang Phuong បានឱ្យដឹងថា ការដាក់ពង្រាយក្របខ័ណ្ឌស្ថាបត្យកម្មរួមជាតិឌីជីថល ផ្តោតសំខាន់លើក្រុមខ្លឹមសារស្នូលចំនួន ៤។

នោះគឺការបង្កើតឡើងនូវស្ថាបត្យកម្មរួមថ្នាក់ជាតិ; តម្រង់ទិសអាទិភាពប្រើប្រាស់រួមគ្នា កាត់បន្ថយជាអតិបរមានូវការវិនិយោគតូចតាចរាយប៉ាយ; ផ្លាស់ប្តូរថ្មីរបៀបរៀបចំប្រព័ន្ធឌីជីថលនានា; និងកសាងប្រព័ន្ធគ្រប់គ្រងស្ថាបត្យកម្មឌីជីថលជាតិ។

យោងតាមអនុរដ្ឋមន្ត្រី Bui Hoang Phuong ក្រសួងវិទ្យាសាស្ត្រ និងបច្ចេកវិទ្យានឹងប្រកាសឱ្យប្រើប្រាស់សំណុំសូចនាករវាស់វែង ដែលអនុញ្ញាតឱ្យមានការវាយតម្លៃតាមពេលវេលាជាក់ស្តែង ដើម្បីកែសម្រួលឱ្យសមស្របតាមដំណាក់កាលនីមួយៗបានទាន់ពេលវេលា។

ទិន្នន័យបម្រើឱ្យការវាយតម្លៃ នឹងត្រូវបានប្រមូលដោយស្វ័យប្រវត្តិចេញពីប្រព័ន្ធនានាដែលមានស្រាប់របស់ក្រសួង ស្ថាប័ន មូលដ្ឋាន អាស្រ័យហេតុនោះ កាត់បន្ថយស្ថានភាពដែលត្រូវបញ្ចូលទិន្នន័យឡើងវិញ និងការធ្វើរបាយការណ៍ដោយដៃ។

ក្នុងពេលខាងមុខនេះ ក្រសួងវិទ្យាសាស្ត្រ និងបច្ចេកវិទ្យា ផ្តោតលើការណែនាំបណ្តាក្រសួង ស្ថាប័ន មូលដ្ឋាន ក្នុងការកសាង ធ្វើបច្ចុប្បន្នភាព និងរក្សាទុកក្របខ័ណ្ឌស្ថាបត្យកម្មឌីជីថល; ព្រមទាំងរៀបចំការផ្សព្វផ្សាយ តាមដាន ជំរុញ និងត្រួតពិនិត្យការអនុវត្ត។

ក្រសួងក៏ណែនាំអំពីជម្រើសនៃការកសាងថ្មី ការបន្តវេនពីបណ្តាក្របខ័ណ្ឌស្ថាបត្យកម្មដែលបានប្រកាសឱ្យប្រើប្រាស់រួចហើយ និងកំណត់ផែនទីបង្ហាញផ្លូវសម្រាប់ដោះស្រាយឱ្យបានសមស្របផងដែរ។

ស្របពេលជាមួយគ្នានោះ ក្រសួងវិទ្យាសាស្ត្រ និងបច្ចេកវិទ្យា សហការជាមួយក្រសួងនគរបាល និងបណ្តាក្រសួង ស្ថាប័នពាក់ព័ន្ធ កសាងក្របខ័ណ្ឌស្តង់ដារ បទដ្ឋានបច្ចេកទេស ការណែនាំបច្ចេកទេសរួម; ប្រកាសឱ្យប្រើប្រាស់វិធីសាស្ត្រវាយតម្លៃ ត្រួតពិនិត្យកម្រិតអនុលោមភាព និងសំណុំសូចនាករវាស់វែង; កសាង គ្រប់គ្រង ដំណើរការប្រព័ន្ធគ្រប់គ្រងស្ថាបត្យកម្មឌីជីថលជាតិ។

ឧបនាយករដ្ឋមន្ត្រី Ho Quoc Dung ថ្លែងមតិនៅក្នុងសន្និសីទ។

ក្រសួងវិទ្យាសាស្ត្រ និងបច្ចេកវិទ្យា ទន្ទឹមនឹងនោះ មានការទទួលខុសត្រូវក្នុងការបូកសរុប រាយការណ៍ជូនរដ្ឋាភិបាលអំពីស្ថានភាពនៃការដាក់ពង្រាយ ផ្តល់យោបល់ទាន់ពេលវេលានូវដំណោះស្រាយដោះបន្ទុកការលំបាក ឧបសគ្គនានាជូនបណ្តាមូលដ្ឋាន។

ធ្វើសមកាលកម្មទិន្នន័យ ហេដ្ឋារចនាសម្ព័ន្ធ និងសន្តិសុខតាមប្រព័ន្ធអ៊ីនធឺណិត

ពាក់ព័ន្ធនឹងបណ្តាភារកិច្ចដែលក្រសួងនគរបាលដាក់ពង្រាយ អនុប្រធានការិយាល័យក្រសួងនគរបាល Nguyen The Tuan បានឱ្យដឹងថា ក្រសួងអនុវត្តភារកិច្ចចំនួន ១៦ ស្ថិតក្នុង ៥ ក្រុម ដោយផ្តោតសំខាន់លើការបំពេញបន្ថែមឱ្យកាន់តែល្អឥតខ្ចោះនូវរបបយន្តការ គោលនយោបាយស្តីពីទិន្នន័យ និងសន្តិសុខតាមប្រព័ន្ធអ៊ីនធឺណិត; អភិវឌ្ឍហេដ្ឋារចនាសម្ព័ន្ធឌីជីថលប្រើប្រាស់រួមគ្នា និងធានាសន្តិសុខតាមប្រព័ន្ធអ៊ីនធឺណិត។

ក្នុងនោះ ក្រសួងនគរបាល កសាង ធ្វើបច្ចុប្បន្នភាព និងត្រួតពិនិត្យការដាក់ពង្រាយក្របខ័ណ្ឌស្ថាបត្យកម្មទិន្នន័យជាតិ ក្របខ័ណ្ឌអភិបាលកិច្ច ការគ្រប់គ្រងទិន្នន័យ និងវចនានុក្រមទិន្នន័យប្រើប្រាស់រួមគ្នា; ព្រមទាំងកសាងក្របខ័ណ្ឌស្ថាបត្យកម្មសន្តិសុខតាមប្រព័ន្ធអ៊ីនធឺណិតជាតិ។

បណ្តាភារកិច្ចផ្សេងទៀត រួមមានការដាក់ពង្រាយថ្នាលបច្ចេកវិទ្យាកុំព្យូទ័រលើពពក (Cloud Computing) មជ្ឈមណ្ឌលគណនាសមត្ថភាពខ្ពស់ នៅក្នុងមជ្ឈមណ្ឌលទិន្នន័យជាតិ ការកសាងថ្នាលប្រតិបត្តិការសន្តិសុខតាមប្រព័ន្ធអ៊ីនធឺណិតជាតិជំនាន់ថ្មី និងប្រព័ន្ធការពារបណ្តាញជាតិ។

អនុរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យា Bui Hoang Phuong រាយការណ៍អំពីចំណុចផ្លាស់ប្តូរថ្មីមួយចំនួននៅក្នុងក្របខ័ណ្ឌស្ថាបត្យកម្មរួមជាតិឌីជីថល។

យោងតាមលោក Nguyen The Tuan បណ្តាថ្នាលទាំងឡាយកំពុងត្រូវបានដាក់ពង្រាយស្របតាមវឌ្ឍនភាពត្រឹមត្រូវរហូតដល់ឆ្នាំ ២០៣០។ ថ្នាលមួយចំនួនត្រូវបានដំឡើងជាជំហានដំបូង និងផ្តល់សេវាកម្មជាក់ស្តែងរួចហើយ ក្នុងនោះមានថ្នាលបច្ចេកវិទ្យាកុំព្យូទ័រលើពពក និងថ្នាលប្រតិបត្តិការសន្តិសុខតាមប្រព័ន្ធអ៊ីនធឺណិតជាតិ។

ក្នុងពេលខាងមុខនេះ ក្រសួងនគរបាលបន្តលើកកម្ពស់ច្រកចេញចូលសេវាសាធារណៈជាតិ តាមគំរូ និងស្ថាបត្យកម្មទំនើប សំដៅក្លាយជាច្រកចេញចូលតែមួយឌីជីថលតែមួយគត់ នៅក្នុងទិដ្ឋភាពរួមនៃគម្រោងថ្នាលប្រតិបត្តិការឌីជីថលជាតិ។

VNeID ក៏ត្រូវបានតម្រង់ទិសអភិវឌ្ឍឱ្យក្លាយជាកំពូលកម្មវិធី (Super App) ដោយដើរតួនាទីជាមជ្ឈមណ្ឌលនៅក្នុងប្រព័ន្ធអេកូឡូស៊ីឌីជីថលជាតិ មានសមត្ថភាពដោះស្រាយបរិមាណទិន្នន័យដ៏ធំធេង និងពង្រីកវិសាលភាពបានយ៉ាងបត់បែន។

បណ្តាក្រសួង មូលដ្ឋាន កសាងស្ថាបត្យកម្មឱ្យសមស្របនឹងមុខងារ

នៅក្នុងសន្និសីទ តំណាងបណ្តាក្រសួង ស្ថាប័ន និងមូលដ្ឋាន បានឡើងថ្លែងបទអន្តរាគមន៍ស្តីពីវិធីសាស្ត្រដាក់ពង្រាយក្របខ័ណ្ឌស្ថាបត្យកម្មរួមជាតិឌីជីថល ឱ្យសមស្របនឹងមុខងារ ភារកិច្ច និងសមត្ថកិច្ច; ព្រមទាំងលើកឡើងនូវការលំបាក ឧបសគ្គ និងផ្តល់អនុសាសន៍ដំណោះស្រាយនានា នៅក្នុងដំណើរការអនុវត្ត។

អនុប្រធានការិយាល័យក្រសួងនគរបាល Nguyen The Tuan ថ្លែងមតិនៅក្នុងសន្និសីទ។

អនុរដ្ឋមន្ត្រីក្រសួងវប្បធម៌ កីឡា និងទេសចរណ៍ Nguyen Huy Dung បានឱ្យដឹងថា ក្រសួងកសាងក្របខ័ណ្ឌស្ថាបត្យកម្មតាម ៥ ស្រទាប់ រួមមាន របបបទបញ្ញត្តិ និងធនធានមនុស្ស; ឧបករណ៍ស្រាវជ្រាវស្វែងរក; បណ្តាញតភ្ជាប់; ការបណ្តុះបណ្តាល បំប៉នសមត្ថភាព និងសមាសភាគពាក់ព័ន្ធនានា។

ក្រសួងបានប្រកាសឱ្យប្រើប្រាស់បទបញ្ញត្តិ អនុវត្តការជ្រើសរើស និងប្រើប្រាស់ស្ថាបត្យករប្រធានទទួលបន្ទុកវិទ្យាសាស្ត្របច្ចេកវិទ្យា នវានុវត្តន៍ និងបរិវត្តកម្មឌីជីថល; បង្កើតទំព័រជំនាញស្តីពីស្ថាបត្យកម្ម ដោយពិពណ៌នាអំពីសមាសភាគនានាក្រោមទម្រង់ជាឯកសារឌីជីថល និងអន្តរកម្ម ដើម្បីឱ្យបណ្តាស្ថាប័ន អង្គភាពធ្វើជាឯកសារយោង និងវាយតម្លៃកម្រិតអនុលោមភាព។

ទន្ទឹមនឹងនោះ គឺការរៀបចំបណ្តាញស្ថាបត្យកម្មជំនាញ និងការបណ្តុះបណ្តាល បំប៉នសមត្ថភាពជាប្រចាំ។

តំណាងទីក្រុង Ha Noi បានឱ្យដឹងថា ទីក្រុងកំពុងបន្ទាន់ដាក់ពង្រាយសមាសភាគសំខាន់ៗនៃក្របខ័ណ្ឌស្ថាបត្យកម្ម រួមមាន មជ្ឈមណ្ឌលទិន្នន័យ ថ្នាលសមាហរណកម្ម និងចែករំលែកទិន្នន័យ ប្រព័ន្ធឧបករណ៍ IoT មជ្ឈមណ្ឌលសន្តិសុខតាមប្រព័ន្ធអ៊ីនធឺណិត ឃ្លាំងទិន្នន័យប្រើប្រាស់រួមគ្នា លំហការងារឌីជីថល គំរូចម្លងឌីជីថលរបស់ទីក្រុង (Digital Twin) មជ្ឈមណ្ឌលប្រតិបត្តិការឆ្លាតវៃ (IOC) និងបណ្តាមូលដ្ឋានទិន្នន័យជំនាញ។

អនុរដ្ឋមន្ត្រីក្រសួងវប្បធម៌ កីឡា និងទេសចរណ៍ Nguyen Huy Dung ថ្លែងមតិនៅក្នុងសន្និសីទ។

ទីក្រុង Ha Noi ក៏កំពុងបោះជំហានធ្វើសមាហរណកម្មទិន្នន័យទៅក្នុងឃ្លាំងទិន្នន័យប្រើប្រាស់រួមគ្នារបស់ទីក្រុង ដើម្បីបម្រើដល់ការចែករំលែក និងការទាញយកផលរវាងបណ្តាស្ថាប័នរដ្ឋ។

ជ្រួតជ្រាបគោលការណ៍ «៣ មិន» មិនទុកឱ្យមានការវិនិយោគត្រួតស៊ីគ្នា

បន្ទាប់ពីបានស្តាប់មតិយោបល់របស់បណ្តាក្រសួង ស្ថាប័ន មូលដ្ឋាន ឧបនាយករដ្ឋមន្ត្រី Ho Quoc Dung បានវាយតម្លៃថា បណ្តារបាយការណ៍ និងបទអន្តរាគមន៍នៅក្នុងសន្និសីទ បានបង្ហាញពីការឯកភាពគ្នាយ៉ាងខ្ពស់ចំពោះតម្រូវការគ្រប់គ្រងបរិវត្តកម្មឌីជីថល ស្របតាមស្ថាបត្យកម្មឯកភាពមួយ។

ទន្ទឹមនឹងនោះ ការអនុវត្តជាក់ស្តែងក៏បានចោទជាបញ្ហាជាច្រើន ដែលទាមទារឱ្យបន្តមានការណែនាំ និងការសម្របសម្រួលដោះស្រាយ។

ដើម្បីឱ្យសេចក្តីសម្រេចលេខ 1425/QD-TTg ត្រូវបានដាក់ពង្រាយស្របតាមវឌ្ឍនភាពត្រឹមត្រូវ ឧបនាយករដ្ឋមន្ត្រីបានតម្រូវឱ្យបណ្តាក្រសួង ស្ថាប័ន មូលដ្ឋាន បន្តជ្រួតជ្រាបឱ្យបានពេញលេញនូវអត្ថន័យ និងវិធីសាស្ត្រអភិក្រមនៃក្របខ័ណ្ឌស្ថាបត្យកម្មរួមជាតិឌីជីថល; ដោយចាត់ទុកនេះជាភារកិច្ចសំខាន់ ដែលត្រូវតែអនុវត្តឱ្យបានព្រមៗគ្នា មានប្រសិទ្ធភាព មិនធ្វើតាមតែទម្រង់ ឬធ្វើឱ្យតែរួចពីដៃឡើយ។

អនុប្រធានខុទ្ទកាល័យរដ្ឋាភិបាល Tran Anh Tien ថ្លែងមតិនៅក្នុងសន្និសីទ។

បណ្តាស្ថាប័ននៅក្នុងប្រព័ន្ធនយោបាយ ត្រូវតែកំណត់ច្បាស់នូវការទទួលខុសត្រូវ ធានាការតភ្ជាប់ ភាពប្រទាក់ក្រឡា ការចែករំលែកទិន្នន័យ និងការប្រើប្រាស់រួមគ្នានូវបណ្តាសមាសភាគ ស្របតាមក្របខ័ណ្ឌស្ថាបត្យកម្មរួមជាតិឌីជីថល; ព្រមទាំងឆ្លើយតបចំពោះតម្រូវការស្តីពីសន្តិសុខតាមប្រព័ន្ធអ៊ីនធឺណិត សុវត្ថិភាព និងការការពារទិន្នន័យ។

ក្របខ័ណ្ឌស្ថាបត្យកម្មត្រូវតែត្រូវបានប្រើប្រាស់ជាឧបករណ៍អភិបាលកិច្ចបរិវត្តកម្មឌីជីថល។ ប្រសិទ្ធភាពមិនត្រឹមតែត្រូវបានវាយតម្លៃតាមរយៈការប្រកាសឱ្យប្រើប្រាស់ឯកសារប៉ុណ្ណោះទេ ប៉ុន្តែត្រូវតែបង្ហាញឱ្យឃើញនូវសមត្ថភាពតភ្ជាប់ ចែករំលែក និងប្រើប្រាស់រួមគ្នា; កាត់បន្ថយការវិនិយោគត្រួតស៊ីគ្នា សន្សំសំចៃធនធាន ធានាសុវត្ថិភាព និងលើកកម្ពស់គុណភាពនៃការបម្រើប្រជាពលរដ្ឋ សហគ្រាស។

ឧបនាយករដ្ឋមន្ត្រីបានតម្រូវឱ្យប្រធានបណ្តាក្រសួង ស្ថាប័ន អង្គភាពមជ្ឈិម និងប្រធានគណៈកម្មាធិការប្រជាជនបណ្តាខេត្ត ក្រុង ដឹកនាំផ្ទាល់ ទទួលខុសត្រូវចំពោះវឌ្ឍនភាព និងគុណភាពនៃការដាក់ពង្រាយបណ្តាភារកិច្ចដែលត្រូវបានប្រគល់ជូន។

ទន្ទឹមនឹងនោះ បណ្តាក្រសួង ស្ថាប័ន មូលដ្ឋាន ត្រូវតែអនុវត្តយ៉ាងម៉ឺងម៉ាត់នូវតម្រូវការ «៣ មិន»៖ «មិនប្រគល់ភារកិច្ចឱ្យអង្គភាពបច្ចេកវិទ្យាព័ត៌មានទាំងស្រុងដោយគ្មានការត្រួតពិនិត្យ មិនធ្វើតាមតែទម្រង់ មិនពន្យារការងារទុកធ្វើនៅកៀកថ្ងៃកំណត់»។

ដំណើរការអនុវត្ត ត្រូវតែប្រកាន់ខ្ជាប់នូវការអនុវត្តជាក់ស្តែង បន្តវេនជាអតិបរមានូវលទ្ធផលទាំងឡាយដែលកំពុងតែលើកកម្ពស់ប្រសិទ្ធភាព។ រាល់ការវិនិយោគថ្មីទាំងអស់ ត្រូវតែពិតជាចាំបាច់ សមស្របនឹងស្ថាបត្យកម្ម និងមិនមានភាពត្រួតស៊ីគ្នាឡើយ។

បណ្តាប្រតិភូចូលរួមសន្និសីទ។

សន្តិសុខតាមប្រព័ន្ធអ៊ីនធឺណិត ការការពារទិន្នន័យ ទិន្នន័យបុគ្គល សិទ្ធិឯកជនភាព និងការសម្ងាត់របស់រដ្ឋ ត្រូវតែគិតគូរតាំងតែពីដំណាក់កាលរៀបចំរចនា និងធានាឱ្យបានពេញមួយដំណើរការនៃការដាក់ពង្រាយ។

យោងតាមសេចក្តីសម្រេចលេខ 1425/QD-TTg បណ្តាស្ថាប័ន អង្គការចាត់តាំង ត្រូវតែសម្រេចការកសាងថ្មី ឬត្រួតពិនិត្យឡើងវិញ ធ្វើបច្ចុប្បន្នភាព និងប្រកាសឱ្យប្រើប្រាស់ក្របខ័ណ្ឌស្ថាបត្យកម្មឌីជីថល យ៉ាងយូរបំផុតត្រឹមថ្ងៃទី ២៩ ខែមករា ឆ្នាំ ២០២៧។

ប្រធានស្ថាប័នដឹកនាំផ្ទាល់ ចាត់តាំងអង្គភាពបង្គោលទទួលបន្ទុកអភិបាលកិច្ច

ចេញពីតម្រូវការខាងលើ ឧបនាយករដ្ឋមន្ត្រីបានប្រគល់ភារកិច្ចឱ្យក្រសួងវិទ្យាសាស្ត្រ និងបច្ចេកវិទ្យា ទទួលយកមតិយោបល់នៅក្នុងសន្និសីទ បំពេញបន្ថែមឱ្យកាន់តែល្អឥតខ្ចោះ និងប្រកាសឱ្យប្រើប្រាស់ស្របតាមសមត្ថកិច្ចនូវឯកសារណែនាំការកសាង ធ្វើបច្ចុប្បន្នភាព និងរក្សាទុកក្របខ័ណ្ឌស្ថាបត្យកម្មឌីជីថលរបស់បណ្តាស្ថាប័ន អង្គការចាត់តាំង។

ក្រសួងវិទ្យាសាស្ត្រ និងបច្ចេកវិទ្យា ធ្វើជាអធិបតី សហការជាមួយក្រសួងនគរបាល និងស្ថាប័នពាក់ព័ន្ធនានា បំពេញបន្ថែមឱ្យកាន់តែល្អឥតខ្ចោះ និងប្រកាសឱ្យប្រើប្រាស់ស្របតាមសមត្ថកិច្ចនូវវិធីសាស្ត្រវាយតម្លៃ ត្រួតពិនិត្យកម្រិតអនុលោមភាព; សំណុំសូចនាករវាស់វែងលទ្ធផលការងារ (KPI) លក្ខណៈវិនិច្ឆ័យវាយតម្លៃ យន្តការរាយការណ៍ បញ្ជីត្រួតពិនិត្យ និងទម្រង់គំរូនានាដែលចាំបាច់។

ក្រសួងក៏ត្រូវបានប្រគល់ភារកិច្ចកសាង និងប្រកាសឱ្យប្រើប្រាស់ស្របតាមសមត្ថកិច្ចនូវក្របខ័ណ្ឌស្តង់ដារ បទដ្ឋានបច្ចេកទេស ការណែនាំបច្ចេកទេសរួម ធានាសមត្ថភាពតភ្ជាប់ប្រទាក់ក្រឡា សមាហរណកម្ម និងសន្តិសុខតាមប្រព័ន្ធអ៊ីនធឺណិតនៅលើទូទាំងប្រទេស។

ចំពោះក្រសួងនគរបាលវិញ ឧបនាយករដ្ឋមន្ត្រីបានប្រគល់ភារកិច្ចឱ្យធ្វើជាអធិបតីក្នុងការកសាង ធ្វើបច្ចុប្បន្នភាពក្របខ័ណ្ឌស្ថាបត្យកម្មទិន្នន័យជាតិ ក្របខ័ណ្ឌអភិបាលកិច្ច ការគ្រប់គ្រងទិន្នន័យជាតិ វចនានុក្រមទិន្នន័យប្រើប្រាស់រួមគ្នា និងក្របខ័ណ្ឌស្ថាបត្យកម្មសន្តិសុខតាមប្រព័ន្ធអ៊ីនធឺណិតជាតិ ធានាឱ្យមានសមកាលកម្មជាមួយក្របខ័ណ្ឌស្ថាបត្យកម្មរួមជាតិឌីជីថល និងសមស្របតាមបទប្បញ្ញត្តិនៃច្បាប់។

សន្និសីទត្រូវបានតភ្ជាប់តាមប្រព័ន្ធអនឡាញជាមួយបណ្តាមូលដ្ឋាន។

ក្រសួងនគរបាល ទន្ទឹមនឹងនោះ ធ្វើការត្រួតពិនិត្យឡើងវិញ ផ្តល់នូវរាល់ខ្លឹមសារណែនាំ និងឯកសារយោងទាំងឡាយណាដែលមានមូលដ្ឋានគ្រប់គ្រាន់ ដើម្បីឱ្យបណ្តាស្ថាប័នដាក់ពង្រាយអនុវត្ត; កំណត់ផែនទីបង្ហាញផ្លូវនៃការបំពេញបន្ថែមឱ្យបានពេញលេញចំពោះខ្លឹមសារណាដែលនៅខ្វះខាត។

ចំពោះមូលដ្ឋានទិន្នន័យជាតិ ថ្នាលឌីជីថលប្រើប្រាស់រួមគ្នា និងបណ្តាសមាសភាគដែលក្រសួងនគរបាលត្រូវបានប្រគល់ភារកិច្ចឱ្យគ្រប់គ្រង ឬធ្វើជាអធិបតី ឧបនាយករដ្ឋមន្ត្រីបានតម្រូវឱ្យប្រកាស ឬផ្តល់ជូននៅក្នុងវិសាលភាពដែលត្រូវបានអនុញ្ញាត នូវសំណុំព័ត៌មានយោងជាផ្លូវការ។

ព័ត៌មានទាំងនោះរួមមាន ឈ្មោះ លេខកូដសម្គាល់ ស្ថាប័នគ្រប់គ្រង វិសាលភាពទិន្នន័យ សេវាកម្ម ស្ថានភាព តម្រូវការតភ្ជាប់ បញ្ជី API និងឯកសារសមាហរណកម្មចាំបាច់នានា; ព្រមទាំងត្រូវតែរក្សាទុក និងធ្វើបច្ចុប្បន្នភាពឱ្យបានទាន់ពេលវេលានៅពេលមានការផ្លាស់ប្តូរ។

ចំពោះបណ្តាក្រសួង ស្ថាប័នប្រហាក់ប្រហែលក្រសួង ប្រធានស្ថាប័នត្រូវតែដឹកនាំផ្ទាល់ ចាត់តាំងអង្គភាពបង្គោលមួយទទួលបន្ទុកអភិបាលកិច្ចស្ថាបត្យកម្ម និងកៀរគរឱ្យបានពេញលេញនូវបណ្តាអង្គភាពជំនាញ ទិន្នន័យ សន្តិសុខតាមប្រព័ន្ធអ៊ីនធឺណិត ប្រតិបត្តិការ ផែនការ-ហិរញ្ញវត្ថុ វិនិយោគ និងនីតិកម្ម ឱ្យចូលរួមទាំងអស់គ្នា។

ឧបនាយករដ្ឋមន្ត្រី Ho Quoc Dung៖ ដាក់ពង្រាយក្របខ័ណ្ឌស្ថាបត្យកម្មជាតិឌីជីថលប្រកបដោយលក្ខណៈជាក់ស្តែង ព្រមៗគ្នា និងមានប្រសិទ្ធភាព។

បណ្តាក្រសួង ស្ថាប័នប្រហាក់ប្រហែលក្រសួង មានការទទួលខុសត្រូវក្នុងការកសាង ដាក់ឱ្យដំណើរការទាញយកផលនូវបណ្តាថ្នាលឌីជីថលប្រើប្រាស់រួមគ្នាថ្នាក់ជាតិ ដែលត្រូវបានប្រគល់ជូនស្របតាមផែនការ ផែនទីបង្ហាញផ្លូវ; ព្រមទាំងប្រកាស ឬផ្តល់ជូននៅក្នុងវិសាលភាពដែលត្រូវបានអនុញ្ញាត នូវព័ត៌មានអំពីវិសាលភាពនៃការផ្តល់សេវា មុខងារ ស្តង់ដារបច្ចេកទេស សមត្ថភាពតភ្ជាប់ និងការទទួលខុសត្រូវលើអភិបាលកិច្ចនៃថ្នាលនីមួយៗ។

នេះនឹងក្លាយជាមូលដ្ឋានដើម្បីឱ្យបណ្តាមូលដ្ឋានរៀបចំផែនការវិនិយោគ និងដាក់ពង្រាយអនុវត្ត។ ក្របខ័ណ្ឌស្ថាបត្យកម្មរដ្ឋាភិបាលឌីជីថលថ្នាក់ក្រសួង ត្រូវតែកសាងថ្មី ឬត្រួតពិនិត្យឡើងវិញ ធ្វើបច្ចុប្បន្នភាព និងប្រកាសឱ្យប្រើប្រាស់យ៉ាងយូរបំផុតត្រឹមថ្ងៃទី ២៩ ខែមករា ឆ្នាំ ២០២៧។

ចំពោះគណៈកម្មាធិការប្រជាជនបណ្តាខេត្ត ក្រុងចំណុះមជ្ឈិម ឧបនាយករដ្ឋមន្ត្រីបានតម្រូវឱ្យសម្រេចការកសាងថ្មី ឬត្រួតពិនិត្យឡើងវិញ ធ្វើបច្ចុប្បន្នភាព និងប្រកាសឱ្យប្រើប្រាស់ក្របខ័ណ្ឌស្ថាបត្យកម្មរដ្ឋអំណាចឌីជីថលថ្នាក់ខេត្ត យ៉ាងយូរបំផុតត្រឹមថ្ងៃទី ២៩ ខែមករា ឆ្នាំ ២០២៧ ដូចគ្នាផងដែរ។

បណ្តាមូលដ្ឋានដែលត្រូវបានបង្កើតឡើងក្រោយការរៀបចំ បង្រួបបង្រួមអង្គភាពរដ្ឋបាល ចាំបាច់ត្រូវផ្តល់អាទិភាពដល់ការបង្រួបបង្រួម សមាហរណកម្ម និងបន្តវេននូវបណ្តាប្រព័ន្ធដែលមានស្រាប់; ត្រួតពិនិត្យឡើងវិញនូវការធ្វើសមកាលកម្មទិន្នន័យ គណនី ការតភ្ជាប់ កិច្ចសន្យា ទ្រព្យសម្បត្តិ ហេដ្ឋារចនាសម្ព័ន្ធ និងជម្រើសអន្តរកាល ធានាថាសកម្មភាព និងសេវាកម្មនានាមិនត្រូវរអាក់រអួលឡើយ។

ឧបនាយករដ្ឋមន្ត្រីបានតម្រូវឱ្យស្ថាប័នទាំងឡាយ ដាក់ពង្រាយអនុវត្តជាបន្ទាន់នូវបណ្តាភារកិច្ចដែលត្រូវបានប្រគល់ជូន ម្ចាស់ការដោះស្រាយការងារទាំងឡាយដែលស្ថិតក្នុងសមត្ថកិច្ច និងរាយការណ៍ទាន់ពេលវេលានូវបញ្ហាដែលហួសពីសមត្ថកិច្ច។

ឧបនាយករដ្ឋមន្ត្រី Ho Quoc Dung បានសម្តែងនូវជំនឿជាក់ថា បណ្តាស្ថាប័ននឹងអនុវត្តសេចក្តីសម្រេចលេខ 1425/QD-TTg ស្របតាមវឌ្ឍនភាពត្រឹមត្រូវ ព្រមៗគ្នា និងមានប្រសិទ្ធភាព រួមចំណែកកសាងប្រទេសជាតិឌីជីថលវៀតណាមប្រកបដោយសុវត្ថិភាព និងចីរភាព៕

វិទ្យាសាស្ត្រនិងបច្ចេកវិទ្យា ការច្នៃប្រឌិតបង្កើតថ្មីព្រមទាំងការបំប្លែងជាឌីជីថល៖ ស្ថាប័នបានគ្រប់ដណ្តប់ហើយ ការផ្តោតអារម្មណ៍គឺការអនុវត្តគោលនយោបាយ យុគសម័យ - ក្រោយពេលបង្កើនភាពល្អឥតខ្ចោះជាមូលដ្ឋាននូវប្រព័ន្ធស្ថាប័នសម្រាប់វិទ្យាសាស្ត្រ បច្ចេកវិទ្យា ការច្នៃប្រឌិតបង្កើតថ្មីព្រមទាំងការបំប្លែងជាឌីជីថលរួចមក នោះការផ្តោតអារម្មណ៍នាពេលបច្ចុប្បន្នគឺការដោះស្រាយបណ្តាចំណុចស្ទះនៅក្នុងដំណើរការដាក់ឱ្យដំណើរការអនុវត្ត នាំយកបណ្តាយន្តការនិងគោលនយោបាយឱ្យឈានចូលទៅក្នុងជីវភាពរស់នៅយ៉ាងឆាប់រហ័ស ព្រមទាំងបង្កើតកម្លាំងចលករសម្រាប់ការអភិវឌ្ឍន៍។

VPBank ធ្វើឌីជីថលរូបនីយកម្មដំណើរការកម្ចី៖ ទទួលបានលទ្ធផលអនុម័តបឋមត្រឹមតែក្នុងរយៈពេល ១ នាទី យុគសម័យ - ជាមួយដំណើរការធ្វើឌីជីថលរូបនីយកម្ម ១០០% នៅលើកម្មវិធី VPBank Race ធនាគារកំពុងតែកាត់បន្ថយពេលវេលាដោះស្រាយសំណុំលិខិតកម្ចីហ៊ីប៉ូតែចរបស់អតិថិជនយ៉ាងខ្លាំង។ ជាមួយលទ្ធផលអនុម័តបឋមត្រឹមតែក្នុងរយៈពេលប្រហែល ១ នាទី ជំនួសឱ្យការរង់ចាំច្រើនថ្ងៃដូចពីមុន VPBank បានក្លាយជាធនាគារត្រួសត្រាយផ្លូវនៅលើទីផ្សារដែលផ្តល់ជូននូវខ្សែចរន្តអនុម័តកម្ចីហ៊ីប៉ូតែចលឿនបំផុត បើកនូវបទដ្ឋានថ្មីអំពីបទពិសោធន៍ហិរញ្ញវត្ថុទំនើប។

ឌឿងង្វៀន