ការចាប់ដៃរបស់មនុស្សយន្ត

៣ ខែសម្រាប់ការប៉ះដៃគ្នាមួយលើក

ខ្ញុំគឺ Trinh Nghi ជនជាតិចិន។ ជិត ២០ ឆ្នាំកន្លងមកនេះ ខ្ញុំតែងតែធ្វើដំណើរទៅមករវាងចិន និងវៀតណាមជាញឹកញាប់ ដោយបានចូលរួមសកម្មភាពផ្លាស់ប្តូរ និងសហប្រតិបត្តិការជាច្រើនក្នុងវិស័យភាពយន្ត វប្បធម៌ និងវិទ្យាសាស្ត្រ - បច្ចេកវិទ្យានៃប្រទេសទាំងពីរ។ ក្នុងចំណោមការងារទាំងឡាយដែលបានអនុវត្តនៅវៀតណាម ដំណើរការចូលរួមកសាង និងរៀបចំវេទិកាកំពូលស្តីពីការអភិវឌ្ឍវិស័យបញ្ញាសិប្បនិម្មិតចិន - អាស៊ានលើកទី ២ គឺជាព្រឹត្តិការណ៍ដ៏សំខាន់មួយដែលធ្វើឱ្យខ្ញុំចងចាំបំផុត។

លោក Trinh Nghi ទីប្រាំបីរាប់ពីឆ្វេងមក ថតរូបមនុស្សយន្ត និងបណ្តាប្រតិភូក្នុងវេទិកាកំពូលស្តីពីការអភិវឌ្ឍវិស័យបញ្ញាសិប្បនិម្មិតចិន - អាស៊ានលើកទី ២។

មានមនុស្សតិចតួចណាស់ដែលដឹងថា ដើម្បីទទួលបានការធ្វើអន្តរកម្មរយៈពេលតែប៉ុន្មានវិនាទីដែលពោរពេញដោយអារម្មណ៍រំភើបរវាងក្រុមអ្នកវិទ្យាសាស្ត្រជើងចាស់វៀតណាម និងមនុស្សយន្តនៅ Ha Noi ខ្ញុំបានឆ្លងកាត់រយៈពេលបីខែពេញដោយក្តីអន្ទះសារង់ចាំ។ ការនាំយកបច្ចេកវិទ្យាថ្មីមួយឆ្លងកាត់ព្រំដែនមិនមែនសាមញ្ញដូចជាការដឹកជញ្ជូនទំនិញមួយមុខនោះឡើយ។ នោះគឺជានីតិវិធីជាច្រើនដំណាក់កាល គឺជាភាពខុសគ្នានៃបទប្បញ្ញត្តិបច្ចេកទេស និងថែមទាំងជារបាំងនានាស្តីពីវិធីសាស្ត្រឈានទៅរកបច្ចេកវិទ្យានៃប្រទេសទាំងពីរផងដែរ។

ពេញរយៈពេលបីខែនោះ ខណៈពេលដែលផលិតផលនៅតែស្ថិតនៅឯច្រកទ្វារព្រំដែនដើម្បីបំពេញបែបបទឯកសារនីមួយៗ ខ្ញុំមានអារម្មណ៍ក្តៅក្រហាយដូចជាអង្គុយលើគំនរភ្លើង។ ផែនការត្រូវបានរៀបចំឡើង អ្នកជំនាញអន្តរជាតិត្រូវបានអញ្ជើញ ថ្ងៃបើកកម្មវិធីត្រូវបានកំណត់។ ប្រសិនបើមនុស្សយន្តមិនអាចបង្ហាញវត្តមានទាន់ពេលវេលាទេនោះ ញើសឈាមពេញមួយឆ្នាំរបស់ខ្ញុំនឹងបន្តនៅមិនទាន់បានសម្រេចឡើយ។ ប៉ុន្តែ ក្រោមការសម្របសម្រួលរបស់ក្រុមសហការីវៀតណាម ចុងក្រោយមនុស្សយន្តក៏ត្រូវបាននាំយកទៅកាន់តំបន់តាំងពិព័រណ៍នៅ Ha Noi។ ខ្ញុំពិតជាបានធូរទ្រូងយ៉ាងខ្លាំង។

មនុស្សយន្តធ្វើអន្តរកម្មជាមួយប្រតិភូក្នុងវេទិកា។

ខណៈពេលដែលលោក Nguyen Quan ញញឹមចាប់ដៃជាមួយមនុស្សយន្ត ខ្ញុំស្រាប់តែមានអារម្មណ៍រំជួលចិត្តក្តុកក្តួលក្នុងទ្រូង។ នោះលែងជាគ្រឿងចក្រដែលគ្មានវិញ្ញាណទៀតហើយ ប៉ុន្តែជា «សាក្សី» សម្រាប់ភាពអត់ធ្មត់តស៊ូរបស់ខ្ញុំ និងការសម្របសម្រួលសហការរបស់មិត្តភក្តិវៀតណាម។ ការចាប់ដៃគ្នានោះប្រៀបដូចជាស្ពានមួយដែលតភ្ជាប់រវាងបទពិសោធន៍របស់ជំនាន់មុន និងសេចក្តីប្រាថ្នានៃបច្ចេកវិទ្យានាពេលអនាគត។

«គ្រាន់តែផ្ញើសារ Zalo មកខ្ញុំ គ្រប់ពេលវេលាទាំងអស់»

ម្ភៃឆ្នាំនៃការធ្វើដំណើរទៅមករវាងប្រទេសទាំងពីរ ខ្ញុំបានដឹងថាប្រជាជនវៀតណាមមានការទទួលខុសត្រូវខ្ពស់ និងខិតខំប្រឹងប្រែងយ៉ាងខ្លាំងក្នុងការងារ។ ជារៀងរាល់ថ្ងៃ ក្រោយម៉ោងធ្វើការ ពួកគេជាកម្មសិទ្ធិរបស់ក្រុមគ្រួសារ និងការកម្សាន្តផ្ទាល់ខ្លួន។ ប៉ុន្តែប្រសិនបើចាំបាច់ ពួកគេត្រៀមខ្លួនជាស្រេចដើម្បីបំពេញការងារ «ដោយភ្លេចគិតពីពេលវេលា»។

ខ្ញុំចងចាំមិនភ្លេចនូវសម្តីមួយឃ្លារបស់លោកអគ្គលេខាធិការរងនៃសមាគមស្វ័យប្រវត្តិកម្មវៀតណាម (អង្គភាពសម្របសម្រួលរៀបចំវេទិកា) ថា៖ «គ្រប់ពេលវេលាឱ្យតែមានបញ្ហា លោកគ្រាន់តែផ្ញើសារក្នុងក្រុម Zalo មក។ ការងារណាធ្វើបានខ្ញុំនឹងឆ្លើយតបភ្លាមៗ ការងារណាមិនទាន់រួចរាល់ ខ្ញុំនឹងសម្របសម្រួលដើម្បីឱ្យព្រឹកស្អែកមានចម្លើយជូន»។

លោក Nguyen Quan ទីបួនរាប់ពីឆ្វេងមក អតីតរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យា ប្រធានសមាគមស្វ័យប្រវត្តិកម្មវៀតណាម ជួបប្រាស្រ័យទាក់ទងជាមួយមនុស្សយន្ត AI។

នោះមិនមែនជាពាក្យគួរសមតាមទម្លាប់ឡើយ។ មានយប់ខ្លះនៅម៉ោង ១ ឬ ២ ទៀបភ្លឺ ខណៈពេលដែលខ្ញុំកំពុងជាប់រវល់ជាមួយគំនរឯកសារ ទូរស័ព្ទនៅតែរំញ័រដោយសារសំឡេងសារជូនដំណឹងពី Zalo។ គាត់ និងក្រុមសហការីវៀតណាមបាននៅដេកយឺតជាមួយខ្ញុំ រួមគ្នាត្រួតពិនិត្យឡើងវិញនូវរាល់ពាក្យពេចន៍ដែលងាយរងប្រតិកម្ម និងរាល់នីតិវិធីនៃការតភ្ជាប់។

ការលះបង់អស់ពីចិត្ត «២៤/៧» នោះ បានបំបែករាល់ក្បួនច្បាប់ស្តីពីភាពខុសគ្នានៃវប្បធម៌ដែលខ្ញុំធ្លាប់បានដឹង។ ខ្ញុំយល់ច្បាស់ថា ខ្លួនខ្ញុំទទួលបានជោគជ័យមិនមែនទាំងស្រុងដោយសារខ្ញុំមានគំនិតល្អនោះទេ ប៉ុន្តែគឺដោយសារខ្ញុំមានមិត្តភក្តិវៀតណាមទាំងឡាយដែលត្រៀមខ្លួនជាស្រេចដើម្បីរួមដំណើរជាមួយខ្ញុំ។

បន្តសរសេរនូវមនោសញ្ចេតនាជិតស្និទ្ធតាមរយៈបច្ចេកវិទ្យា

ក្រោយរយៈពេលជាច្រើនឆ្នាំនៃការបំពេញការងារនៅវៀតណាម មកទល់ពេលនេះ ខ្ញុំនៅមាន «ក្តីសុបិនមួយ» ទៀត៖ ខ្ញុំចង់រួមដំណើរជាមួយវៀតណាមដើម្បីកសាង «យុវជនជំនាន់ឌីជីថល» ដ៏ពិតប្រាកដមួយ។

ខ្ញុំកំពុងពូនជ្រំនូវ «ក្តីសុបិន» ដ៏ធំធេងជាងនេះ៖ ការកសាងវិទ្យាស្ថានបណ្តុះបណ្តាល AI ស៊ីជម្រៅមួយនៅវៀតណាម។ ខ្ញុំមិនចង់ឱ្យ AI គ្រាន់តែជាមនុស្សយន្តទាំងឡាយដែលត្រូវបាននាំយកមកដាក់តាំងបង្ហាញពីរបីថ្ងៃ រួចហើយវេចខ្ចប់ដាក់ប្រអប់បញ្ជូនត្រឡប់ទៅប្រទេសវិញនោះទេ។ ខ្ញុំចង់ផ្ទេរប្រគល់ចំណេះដឹង ចាប់តាំងពីកម្មវិធីសិក្សាស្តង់ដារអន្តរជាតិ រហូតដល់ជួរគ្រូបង្រៀនដែលមានបទពិសោធន៍ក្រាស់ក្រៃរបស់ចិន ជូនដល់និស្សិតវៀតណាម។

លោក Trinh Nghi ក្នុងជំនួបធ្វើការជាមួយសាកលវិទ្យាល័យអគ្គិសនី។

ទាំងនោះនឹងជាបន្ទប់ពិសោធន៍ទំនើបៗនៅ Ha Noi ឬទីក្រុង Ho Chi Minh ជាទីកន្លែងដែលក្រុមវិស្វករវ័យក្មេងវៀតណាមមិនត្រឹមតែរៀនសូត្រពីរបៀបប្រតិបត្តិការប៉ុណ្ណោះទេ ប៉ុន្តែថែមទាំងអាចដោះដំឡើង កូដកម្មវិធី និងបញ្ចូលដួងវិញ្ញាណដោយផ្ទាល់ដៃទៅក្នុងមនុស្សយន្តទាំងឡាយ ដើម្បីឱ្យពួកវាចេះនិយាយភាសាវៀតណាម យល់ដឹងពីវប្បធម៌វៀតណាម និងដោះស្រាយបញ្ហាជាក់ស្តែងរបស់ប្រទេសជាតិខ្លួនឯងផ្ទាល់ទៀតផង។ AI ត្រូវតែត្រូវបានចិញ្ចឹមបីបាច់ដោយដួងព្រលឹង និងបញ្ញាញាណក្នុងស្រុក ទើបពិតជាមានកម្លាំងរស់រវើកយ៉ាងពិតប្រាកដ។

សម្លឹងមើលត្រឡប់ទៅកាន់ដំណើរពេញពីរទសវត្សរ៍កន្លងមកនេះ ខ្ញុំមើលឃើញថាខ្លួនឯងបាន «ទទួល» ច្រើនលើសលប់ណាស់។ ខ្ញុំទទួលបានទំនុកចិត្តពីថ្នាក់រៀមច្បងជំនាន់មុន ទទួលបានការឯកភាពចិត្តតែមួយពីក្រុមសហការីដ៏ស្មោះស្ម័គ្រ និងលើសពីអ្វីៗទាំងអស់ គឺការរាប់អានដ៏ស្មោះត្រង់ដូចជាសមាជិកគ្រួសារតែមួយ។ «មនោសញ្ចេតនា» នោះឯងគឺជាទ្រព្យសម្បត្តិដ៏ធំបំផុតដែលបានទាក់ទាញចិត្តឱ្យខ្ញុំបន្តស្នាក់នៅទីនេះ។ នាពេលអនាគត ខ្ញុំមានបំណងប្រាថ្នាចង់ក្លាយជាអ្នកតភ្ជាប់ដ៏រឹងមាំម្នាក់ ដោយនាំយកអ្វីៗដែលល្អប្រណីតបំផុតនៃបច្ចេកវិទ្យាដើម្បីពូនជ្រំដល់ទឹកដីនេះ - ជាទីកន្លែងដែលខ្ញុំបានចាត់ទុកជាស្រុកកំណើតទីពីររបស់ខ្ញុំជាយូរមកហើយ។

ជាង ២០ ឆ្នាំនៃការផ្សារភ្ជាប់ជាមួយវៀតណាម ផលិតករ Trinh Nghi (ចិន) បានចូលរួមយ៉ាងស៊ីជម្រៅក្នុងសកម្មភាពផ្លាស់ប្តូរវប្បធម៌ និងសេដ្ឋកិច្ចរវាងប្រទេសទាំងពីរ។ លោកក៏កាន់កាប់តួនាទីទទួលខុសត្រូវសំខាន់ៗជាច្រើននៅក្នុងសមាគមភាពយន្ត និងវិចិត្រសិល្បៈប្រកបដោយកិត្យានុភាពនៅចិន ដូចជា៖ សមាជិកសមាគមភាពយន្តកុមារចិន អនុប្រធានគណៈកម្មាធិការខ្សែភាពយន្តកុមារ (សមាគមជំរុញភាពយន្តជនជាតិ) អនុប្រធានគណៈកម្មាធិការវិចិត្រសិល្បៈ (សមាគមជំរុញវប្បធម៌ចិន Guangxi) និងជាស្ថាបនិកនៃ Studio ផលិតករ Nguyen Soai។ លោក Trinh Nghi។ មិនត្រឹមតែឈប់ត្រឹមវិស័យសិល្បៈប៉ុណ្ណោះទេ លោកថែមទាំងជាអ្នកតភ្ជាប់ពាណិជ្ជកម្ម និងបច្ចេកវិទ្យាដ៏រឹងមាំផងដែរ។ ក្នុងតួនាទីជាអនុប្រធានស្ថាបនិកនៃអគ្គសមាគមពាណិជ្ជកម្មចិនប្រចាំនៅវៀតណាម និងជានាយកការិយាល័យទំនាក់ទំនងនៃមជ្ឈមណ្ឌលប្រព័ន្ធផ្សព្វផ្សាយអន្តរជាតិ Nam Ninh ប្រចាំនៅវៀតណាម លោកបានជំរុញសកម្មភាពពាណិជ្ជកម្ម និងសារព័ត៌មានដ៏សំខាន់ៗជាច្រើន។ ជាពិសេស ក្នុងនាមជាសាស្ត្រាចារ្យកិត្តិយសនៅវិទ្យាស្ថានបញ្ញាសិប្បនិម្មិត (សាកលវិទ្យាល័យជនជាតិ Guangxi) លោកកំពុងលះបង់កម្លាំងកាយចិត្តចំពោះបេសកកម្មតភ្ជាប់ការអប់រំឌីជីថល ដោយខិតខំនាំយកបណ្តាការអនុវត្ត AI កម្រិតខ្ពស់ចូលទៅក្នុងជីវភាពរស់នៅ និងសាលាឧទ្ទេសនាមនៅវៀតណាម រួមចំណែកធ្វើឱ្យលេចចេញជារូបរាងនូវសេចក្តីប្រាថ្នានៃការផ្លាស់ប្តូរឌីជីថលឆ្លងកាត់ព្រំដែន។

រួមប្រយោជន៍រួមចិត្ត រួមសុខទុក្ខជាមួយគ្នា រក្សាជំហានទៅមុខ ឆ្ពោះទៅរកអនាគតដ៏ភ្លឺស្វាងនៃសហគមន៍ចែករំលែកអនាគតវៀតណាម - ចិន យុគសម័យ - ឆ្នាំ ២០២៦ គឺជាឆ្នាំចាប់ផ្តើមនៃយុគសម័យអភិវឌ្ឍន៍ថ្មីនៃប្រជាជាតិវៀតណាម ព្រមទាំងជាឆ្នាំដែលមានអត្ថន័យដ៏សំខាន់នៅពេលដែលការបរទេសវៀតណាមត្រូវបានរៀបចំដាក់ឱ្យអនុវត្តយ៉ាងគ្រប់ជ្រុងជ្រោយនៅកម្រិតកម្ពស់ថ្មីនិងរុញច្រានការធ្វើសមាហរណកម្មអន្តរជាតិ។

ចិនអនុម័តបន្ថែមតំបន់ដាំដុះចំនួន ៤០១ កន្លែង និងគ្រឹះស្ថានវេចខ្ចប់ផ្លែទុរេនវៀតណាមចំនួន ១៦៦ កន្លែង យុគសម័យ - អគ្គនាយកដ្ឋានគយចិន (GACC) ទើបតែបានអនុម័តបន្ថែមនូវតំបន់ដាំដុះចំនួន ៤០១ កន្លែង និងគ្រឹះស្ថានវេចខ្ចប់ផ្លែទុរេនចំនួន ១៦៦ កន្លែងរបស់វៀតណាម។ ការបំពេញបន្ថែមនូវលេខកូដសម្គាល់ក្នុងបរិមាណដ៏ច្រើន នៅក្នុងអំឡុងពេលដែលតំបន់ Tay Nguyen ឈានចូលដល់រដូវប្រមូលផលខ្ពស់បំផុត បានរួមចំណែកពង្រីកសមត្ថភាពផ្គត់ផ្គង់ផ្លែទុរេនតាមផ្លូវការទៅកាន់ទីផ្សារចិន។

ឌឿងង្វៀន