អដ្ឋិធាតុកងទ័ពពលីជាង ១.៣០០ រូប ត្រូវបានប្រមូលផ្តុំក្រោយរយៈពេល ១១១ ថ្ងៃយប់

យុទ្ធនាការ «៥០០ ថ្ងៃយប់ ជំរុញការអនុវត្តការស្វែងរក ប្រមូលផ្តុំ និងកំណត់អត្តសញ្ញាណអដ្ឋិធាតុកងទ័ពពលី» កំពុងកត់ត្រានូវលទ្ធផលវិជ្ជមានជាច្រើន ក្រោយរយៈពេលជាងបីខែនៃការដាក់ពង្រាយ។ ព័ត៌មាននេះត្រូវបានវរសេនីយ៍ឯក Le Van Son អនុប្រធាននាយកដ្ឋានគោលនយោបាយសង្គម នៃអគ្គនាយកដ្ឋាននយោបាយនៃកងទ័ពប្រជាជនវៀតណាម ប្រកាសនៅក្នុងសន្និសីទសារព័ត៌មានជាទៀងទាត់របស់រដ្ឋាភិបាលប្រចាំខែមិថុនា ដែលប្រព្រឹត្តទៅនាថ្ងៃទី ៤ ខែកក្កដា។

យោងតាមវរសេនីយ៍ឯក Le Van Son យុទ្ធនាការនេះត្រូវបានបំផុសឡើងនាថ្ងៃទី ២ ខែមេសា ប៉ុន្តែគិតពេលវេលាអនុវត្តគឺចាប់ពីថ្ងៃទី ១៥ ខែមីនា ឆ្នាំ ២០២៦ ដល់ថ្ងៃទី ២៧ ខែកក្កដា ឆ្នាំ ២០២៧។ គិតត្រឹមថ្ងៃទី ៤ ខែកក្កដា យុទ្ធនាការនេះបានឈានចូលដល់ថ្ងៃទី ១១១ ហើយ ដោយបង្កើតបាននូវការផ្លាស់ប្តូរយ៉ាងច្បាស់ក្រឡែតក្នុងការងារស្វែងរក ប្រមូលផ្តុំ និងកំណត់អត្តសញ្ញាណអដ្ឋិធាតុកងទ័ពពលីនៅទូទាំងប្រទេស។

យុទ្ធនាការនេះបានដាក់ចេញនូវគោលដៅសំខាន់ៗចំនួនប្រាំ រួមមានការប្រមូលផ្តុំអដ្ឋិធាតុកងទ័ពពលីឱ្យបានប្រមាណ ៧.០០០ រូប; បង្ហើយការប្រមូលគំរូផ្នែកផ្នូរដែលមិនទាន់កំណត់បានព័ត៌មានឱ្យបានប្រមាណ ២៣០.០០០ ផ្នូរ នៅតាមបណ្តាវាលកប់ខ្មោចកងទ័ពពលី; ធ្វើកោសល្យវិច័យ ADN គំរូអដ្ឋិធាតុឱ្យបានប្រមាណ ១៨.០០០ គំរូ; កសាងនិងដំណើរការមូលដ្ឋានទិន្នន័យហ្សែនរបស់សាច់ញាតិកងទ័ពពលីដែលមិនទាន់កំណត់បានអត្តសញ្ញាណ; ទន្ទឹមនឹងនោះ បង្ហើយការរុករកបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះ នៅតាមបណ្តាតំបន់ភូមិសាស្ត្រសំខាន់ៗ ដូចជា Vi Xuyen (Tuyen Quang), Lao Cai និង Lang Son។

វរសេនីយ៍ឯក Le Van Son អនុប្រធាននាយកដ្ឋានគោលនយោបាយសង្គម នៃអគ្គនាយកដ្ឋាននយោបាយនៃកងទ័ពប្រជាជនវៀតណាម។

ដើម្បីធ្វើឱ្យបណ្តាគោលដៅខាងលើលេចចេញជារូបរាងជាក់ស្តែង គណៈកម្មាធិការដឹកនាំជាតិត្រូវបានពង្រឹងបន្ថែម ទន្ទឹមនឹងនោះ បានប្រកាសបណ្តាកម្មវិធី ផែនការដាក់ពង្រាយសម្រាប់ដំណាក់កាល ២០២៦-២០៣០។ ក្នុងវិស័យស្វែងរក ប្រមូលផ្តុំ ក្រសួងការពារជាតិបានប្រគល់សូចនាករជាក់លាក់ជូនដល់យោធភូមិភាគ និងអង្គភាពនីមួយៗ; ពង្រឹងកម្លាំង និងរក្សាក្រុមប្រមូលផ្តុំចំនួន ៣២ ក្រុម ជាមួយនឹងកម្មាភិបាល យុទ្ធជនប្រមាណ ១.៥០០ នាក់ដែលកំពុងធ្វើសកម្មភាពនៅទូទាំងប្រទេស។

ចំណុចថ្មីមួយក្នុងចំណោមចំណុចថ្មីៗដែលត្រូវបានវាយតម្លៃថានាំមកនូវប្រសិទ្ធភាពខ្ពស់ គឺការសំយោគ ត្រួតពិនិត្យប្រភពឯកសារដែលផ្តល់ដោយបណ្តាអង្គការ និងបុគ្គលទាំងក្នុងនិងក្រៅប្រទេស ដើម្បីផ្ទៀងផ្ទាត់ទីតាំងបណ្តាផ្នូរកងទ័ពពលីសមូហភាព។ ឆ្លងកាត់សិក្ខាសាលាជំនាញចំនួនពីរដែលត្រូវបានចាត់តាំងឡើងនៅ Quang Ngai និងទីក្រុងហូជីមិញ កម្លាំងមានសមត្ថកិច្ចបានរកឃើញអដ្ឋិធាតុកងទ័ពពលីមួយរូបនៅ Quang Ngai; ទន្ទឹមនឹងនោះ កំណត់បានបន្ថែមទីតាំងមួយកន្លែងទៀតដែលសង្ស័យថាមានផ្នូរសមូហភាពនៅតំបន់សួនច្បារ Le Thi Rieng (ទីក្រុងហូជីមិញ) ដោយរំពឹងទុកថានឹងធ្វើការគាស់កកាយចាប់ពីថ្ងៃទី ៦ ខែកក្កដា។

ក្រៅពីការទាញយកផលព័ត៌មានប្រវត្តិសាស្ត្រ កម្លាំងស្វែងរកក៏បានអនុវត្តនូវដំណោះស្រាយបច្ចេកវិទ្យាទំនើបៗជាច្រើនផងដែរ។ ការរួមបញ្ចូលគ្នារវាងការផ្ទៀងផ្ទាត់កូអរដោនេផែនទីជាមួយទីវាលជាក់ស្តែង, ការទាញយកផលពីសម្តីរៀបរាប់របស់អ្នកដឹងឮផ្ទាល់ភ្នែក និងការប្រើប្រាស់ឧបករណ៍រ៉ាដាស្កែនធ្លុះដី ជួយលើកកម្ពស់ភាពត្រឹមត្រូវ ចំណេញពេលវេលាអង្កេតស្រាវជ្រាវ ក៏ដូចជាកាត់បន្ថយបរិមាណដីត្រូវជីកកកាយក្នុងដំណើរការស្វែងរក។

ការប្រមូលគំរូអដ្ឋិធាតុកងទ័ពពលី និងការកសាងមូលដ្ឋានទិន្នន័យ ADN ក៏ត្រូវបានដាក់ពង្រាយប្រកបដោយសមកាលកម្មផងដែរ។ ក្រសួងការពារជាតិបានប្រកាសដំណើរការប្រមូលគំរូ, ការថែរក្សា, ការដឹកជញ្ជូន និងការធ្វើឌីជីថលនីយកម្មព័ត៌មានគំរូអដ្ឋិធាតុ; ទន្ទឹមនឹងនោះ សហការជាមួយសម្ព័ន្ធក្រុមហ៊ុន Viettel កសាងកម្មវិធីទន់ គ្រប់គ្រងដំណើរការទាំងមូល សំដៅកាត់បន្ថយការភាន់ច្រឡំ ធានាបាននូវភាពត្រឹមត្រូវក្នុងការផ្ទៀងផ្ទាត់ទិន្នន័យ។

រហូតមកដល់ពេលនេះ បណ្តាយោធភូមិភាគ និងមូលដ្ឋានបានបង្កើតក្រុមប្រមូលគំរូជាង ៣០០ ក្រុម ដោយមានមនុស្សប្រមាណ ៣.៥០០ នាក់ចូលរួម។ ក្រសួងមហាផ្ទៃក៏បានធ្វើជាសេនាធិការជូនរដ្ឋាភិបាលក្នុងការប្រកាសយន្តការ គោលនយោបាយដោយឡែកស្តីពីការធ្វើកោសល្យវិច័យ ADN បង្កើតមូលដ្ឋានគតិយុត្តដើម្បីឱ្យបណ្តាមូលដ្ឋានចាត់ចែងកញ្ចប់ថវិកា និងសហការជាមួយបណ្តាអង្គភាពជំនាញក្នុងការកំណត់អត្តសញ្ញាណកងទ័ពពលីដែលនៅខ្វះព័ត៌មាន។

ទន្ទឹមនឹងនោះ ការងាររុករកបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះ បន្តត្រូវបានជំរុញយ៉ាងខ្លាំងក្លានៅតាមបណ្តាតំបន់ភូមិសាស្ត្រសំខាន់ៗ។ ក្រសួងការពារជាតិបានកៀរគរក្រុម និងកងឯកភាពចំនួន ៣៣០ ក្រុម ដោយមានកម្មាភិបាល យុទ្ធជនជាង ៥.០០០ នាក់ រួមនឹងមធ្យោបាយឯកទេសជាង ១.៣០០ គ្រឿង ចូលរួមរុករកបោសសម្អាត និងដោះស្រាយយុទ្ធភណ្ឌផ្ទុះ បង្កើតលក្ខខណ្ឌសុវត្ថិភាពសម្រាប់សកម្មភាពស្វែងរក។

ថ្នាក់ដឹកនាំ និងបញ្ជាការដ្ឋានយោធាខេត្ត Lao Cai ធ្វើពិធីដង្ហែអដ្ឋិធាតុកងទ័ពពលីវីរជន នាខែមិថុនា ឆ្នាំ ២០២៦។

យោងតាមការស្ថិតិគិតត្រឹមពេលនេះ បណ្តាកម្លាំងប្រមូលផ្តុំបានអដ្ឋិធាតុកងទ័ពពលីជាង ១.៣០០ រូប រួមមានទាំងផ្នូរសមូហភាពចំនួនបី; ចាត់តាំងការប្រមូលគំរូផ្នែកផ្នូរកងទ័ពពលីបានជាង ២៧.០០០ ផ្នូរ ហើយគំរូជាង ២០.០០០ ដែលមានលក្ខខណ្ឌគ្រប់គ្រាន់ត្រូវបានបញ្ជូនទៅកាន់បណ្តាមជ្ឈមណ្ឌលធ្វើកោសល្យវិច័យ ADN។ ការងាររុករកបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះ ត្រូវបានបង្ហើយនៅលើផ្ទៃដីជាង ៧.០០០ ហិកតា ដោយឡែកតំបន់ Vi Xuyen សម្រេចបានជាង ៣.០០០ ហិកតា ស្មើនឹងជាង ៧០% នៃបរិមាណតាមផែនការ។

ចំពោះមូលដ្ឋានទិន្នន័យសាច់ញាតិកងទ័ពពលី ក្រសួងនគរបាលប្រមូលបានគំរូជីវសាស្ត្រជិត ៩៥.០០០ គំរូ វិភាគនិងធ្វើសមកាលកម្មជាង ៥០.០០០ គំរូចូលទៅក្នុងប្រព័ន្ធទិន្នន័យ បម្រើដល់ការផ្ទៀងផ្ទាត់ ADN នាពេលខាងមុខ។

វរសេនីយ៍ឯក Le Van Son បានឱ្យដឹងថា ក្រសួងការពារជាតិនឹងបន្តធ្វើជាសេនាធិការជូនគណៈកម្មាធិការដឹកនាំជាតិ ដាក់ពង្រាយប្រកបដោយសមកាលកម្មនូវបណ្តាដំណោះស្រាយ កៀរគរប្រភពធនធានឱ្យបានជាអតិបរមា និងអនុវត្តវិទ្យាសាស្ត្របច្ចេកវិទ្យាយ៉ាងខ្លាំងក្លា សំដៅជំរុញឱ្យបានឆាប់រហ័សនូវវឌ្ឍនភាពនៃការអនុវត្តបណ្តាគោលដៅនៃយុទ្ធនាការ រួមចំណែកក្នុងការកំណត់អត្តសញ្ញាណបានឆាប់ រួចនាំយកបណ្តាវីរយុទ្ធជនពលីវិលត្រឡប់មកជួបជុំក្រុមគ្រួសារ និងមាកុភូមិវិញ៕

មហាសន្និបាតលើកទី ១៤ នៃសហជីពការងារវៀតណាម នឹងបោះឆ្នោតជ្រើសរើសសមាជិកគណៈកម្មាធិការប្រតិបត្តិអាណត្តិថ្មីចំនួន ១៣៥ រូប យុគសម័យ - មហាសន្និបាតលើកទី ១៤ នៃសហជីពការងារវៀតណាម អាណត្តិ ២០២៦-២០៣១ នឹងដំណើរការបោះឆ្នោតជ្រើសរើសសមាជិកគណៈកម្មាធិការប្រតិបត្តិនៃសហព័ន្ធសហជីពការងារទូទាំងវៀតណាម អាណត្តិទី ១៤ ចំនួន ១៣៥ រូប។

សន្និបាតលើកទី ៧ នៃគណៈកម្មាធិការមជ្ឈិមរណសិរ្សមាតុភូមិវៀតណាម នីតិកាលទី ១០៖ ឯកភាពលើខ្លឹមសារមហាសន្និបាតលើកទី ១១ និងការពិគ្រោះពិភាក្សាជ្រើសតាំងអនុប្រធានចំន យុគសម័យ - នាថ្ងៃទី ១២ ខែមេសា នៅរដ្ឋធានី Ha Noi គណៈកម្មាធិការមជ្ឈិមរណសិរ្សមាតុភូមិវៀតណាម នីតិកាលទី ១០ បានរៀបចំសន្និបាតលើកទី ៧ ដើម្បីពិភាក្សា និងផ្ដល់មតិលើខ្លឹមសារការងារមួយចំនួនតាមសមត្ថកិច្ច ដោយផ្ដោតសំខាន់លើការងារត្រៀមរៀបចំមហាសន្និបាតតំណាងទូទាំងប្រទេសនៃរណសិរ្សមាតុភូមិវៀតណាម លើកទី ១១ អាណត្តិ ២០២៦-២០៣១។

ឌឹកអាញ់

thoidai.com.vn