ខេត្ត Ca Mau យកចិត្តទុកដាក់លើមុខរបរចិញ្ចឹមជីវិតដើម្បីកាត់បន្ថយភាពក្រីក្រប្រកបដោយចីរភាព

ខេត្ត Ca Mau យកចិត្តទុកដាក់លើមុខរបរចិញ្ចឹមជីវិតដើម្បីកាត់បន្ថយភាពក្រីក្រប្រកបដោយចីរភាព។

រហូតដល់ចុងឆ្នាំ ២០២៥ ទូទាំងខេត្ត Ca Mau នៅសល់គ្រួសារក្រីក្រចំនួន ៣.៤៥៦ គ្រួសារ ស្មើនឹង ០,៦៣% នៃចំនួនគ្រួសារសរុប និងគ្រួសារប្រកៀកក្រចំនួន ៧.៤៨៩ គ្រួសារ ស្មើនឹង ១,៣៧%។ ក្នុងឆ្នាំ មានគ្រួសារចំនួន ១.០១៥ គ្រួសារបានឈានឡើងរួចផុតពីភាពក្រីក្រ និង ៦១២ គ្រួសាររួចផុតពីភាពប្រកៀកក្រ។ លទ្ធផលទាំងនេះត្រូវបានកត់ត្រានៅក្នុងដំណើរការដែលមូលដ្ឋានដាក់ឱ្យអនុវត្តបណ្តាកម្មវិធីគាំទ្រផលិតកម្ម ដោះស្រាយការងារធ្វើ និងកែលម្អលក្ខខណ្ឌលំនៅឋាន។

ដំណោះស្រាយមួយក្នុងចំណោមដំណោះស្រាយដែល Ca Mau យកចិត្តទុកដាក់ គឺការអភិវឌ្ឍគំរូមុខរបរចិញ្ចឹមជីវិតស្របតាមលក្ខខណ្ឌរបស់ក្រុមគ្រួសារនីមួយៗ ដោយជួយឱ្យប្រជាពលរដ្ឋមានប្រភពចំណូលស្ថិរភាព ជាជាងគ្រាន់តែពឹងផ្អែកលើប្រាក់ឧបត្ថម្ភចំពោះមុខ។

នៅភូមិ An Hung ឃុំ Cai Nuoc គ្រួសាររបស់លោក Nguyen Binh Nguyen គឺជាករណីគំរូមួយ។ ពីមុន បើទោះបីជាមានផ្ទៃដីស្រែចម្ការទំហំ ៤ កុង ក៏ដោយ ក៏សកម្មភាពផលិតកម្មរបស់ក្រុមគ្រួសារមិនទទួលបានប្រសិទ្ធភាពនោះឡើយ។ នៅដើមឆ្នាំ ២០២៤ លោកទទួលបានការឧបត្ថម្ភពូជគ្រំឈាមចំនួន ៥៨ គីឡូក្រាម ព្រមទាំងសម្ភារបរិក្ខារដែលមានតម្លៃសរុបជិត ១៥ លានដុង។

ដោយសារទទួលបានការណែនាំបច្ចេកទេស និងយកទៅអនុវត្តក្នុងផលិតកម្ម គំរូចិញ្ចឹមគ្រំឈាមរបស់លោក Nguyen នាំមកនូវប្រាក់ចំណូលជិត ១០០ លានដុងក្នុងមួយឆ្នាំ។ ពីប្រភពចំណូលនេះ ក្រុមគ្រួសាររបស់លោកបានរួចផុតពីភាពក្រីក្រ និងសាងសង់បានលំនៅឋាន។

យោងតាមលោក Huynh Cong Luan អនុប្រធានគណៈកម្មាធិការប្រជាជនឃុំ Cai Nuoc មូលដ្ឋានចាត់ទុកការធ្វើពិពិធកម្មមុខរបរចិញ្ចឹមជីវិតជាដំណោះស្រាយស្នូលមួយ ដើម្បីលើកកម្ពស់ប្រសិទ្ធភាពនៃការកាត់បន្ថយភាពក្រីក្រ។ ការជ្រើសរើសគំរូឧបត្ថម្ភត្រូវតែចេញពីលក្ខខណ្ឌជាក់ស្តែងរបស់គ្រួសារនីមួយៗ ដោយរួមបញ្ចូលគ្នានូវការណែនាំបច្ចេកទេស ការតាមដានដំណើរការអនុវត្ត ដើម្បីកាត់បន្ថយហានិភ័យ។

ជាក់ស្តែងបានបង្ហាញថា ដើម្បីឱ្យបណ្តាគំរូទាំងនេះបញ្ចេញប្រសិទ្ធភាពយូរអង្វែង ការជួយឧបត្ថម្ភពូជសត្វ សម្ភារបរិក្ខារ ឬដើមទុន ត្រូវដើរទន្ទឹមគ្នានឹងការណែនាំផលិតកម្ម ការតភ្ជាប់ទីផ្សារប្រើប្រាស់ និងការវាយតម្លៃលទ្ធផលអនុវត្ត។ តាមរយៈនោះ ប្រជាពលរដ្ឋមានលក្ខខណ្ឌបន្ថែមដើម្បីរក្សា និងអភិវឌ្ឍប្រភពមុខរបរចិញ្ចឹមជីវិត។

ទន្ទឹមនឹងការជួយឧបត្ថម្ភគ្រួសារដែលមានលទ្ធភាពពលកម្ម Ca Mau យកចិត្តទុកដាក់លើការធានាសន្តិសុខសង្គមសម្រាប់បណ្តាគ្រួសារដែលមានជនពិការ មនុស្សចាស់ជរាគ្មានទីពឹង ឬខ្វះប្រភពចំណូលស្ថិរភាព។

គ្រួសាររបស់លោក Huynh Quoc Linh នៅឃុំ Cai Nuoc មានសមាជិកចំនួន ៥ នាក់ ក្នុងនោះប្តីប្រពន្ធទាំងពីរនាក់សុទ្ធសឹងជាជនពិការ ហើយកូនពីរនាក់កំពុងស្ថិតក្នុងវ័យសិក្សា។ ប្រាក់ចំណូលរបស់ក្រុមគ្រួសារជាចម្បងគឺពឹងផ្អែកលើប្រាក់ឧបត្ថម្ភសង្គម។

ក្នុងខែកក្កដា ឆ្នាំ ២០២៦ ក្រុមគ្រួសាររបស់លោកទទួលបានការឧបត្ថម្ភសាងសង់លំនៅឋាន ដោយមានថវិកាសរុបចំនួន ១៥៨ លានដុង ពីបណ្តាប្រភពឧបត្ថម្ភ និងការកៀរគរធនធានសង្គម។ ក្រៅពីការជួយឱ្យក្រុមគ្រួសារមានកន្លែងស្នាក់នៅកាន់តែប្រសើរឡើង បណ្តាស្ថាប័នមានសមត្ថកិច្ចក៏បានតម្រង់ទិសដៅគំរូមុខរបរចិញ្ចឹមជីវិតសមស្រប តភ្ជាប់កម្មវិធីគាំទ្រផលិតកម្ម និងយកចិត្តទុកដាក់ដល់ការសិក្សារៀនសូត្ររបស់កូនៗផងដែរ។

នៅលើទូទាំងខេត្ត កម្មវិធីលុបបំបាត់ផ្ទះបណ្តោះអាសន្ន និងផ្ទះទ្រុឌទ្រោម បានជួយឧបត្ថម្ភសាងសង់ថ្មី និងជួសជុលផ្ទះបានចំនួន ៩.៥៩៤ ខ្នង ដោយមានប្រភពថវិកាសរុបជាង ៤៧១ ពាន់លានដុង។ កម្មវិធីនេះបានរួមចំណែកកែលម្អលក្ខខណ្ឌរស់នៅសម្រាប់ក្រុមគ្រួសារក្រីក្រ គ្រួសារទទួលគោលនយោបាយ និងករណីដែលមានស្ថានភាពជីវភាពលំបាកនានា។

ទន្ទឹមនឹងលទ្ធផលស្តីពីចំនួនគ្រួសារដែលបានរួចផុតពីភាពក្រីក្រ និងលំនៅឋានដែលត្រូវបានជួយឧបត្ថម្ភ គោលដៅកាត់បន្ថយភាពក្រីក្រប្រកបដោយចីរភាពក៏ត្រូវបានផ្សារភ្ជាប់ជាមួយនឹងសមត្ថភាពបង្កើតប្រាក់ចំណូល ការរក្សាការងារធ្វើ ការទទួលបានសេវាសុខាភិបាល អប់រំ និងការឆ្លើយតបទៅនឹងការលំបាកនានាដែលកើតឡើងក្នុងជីវភាពរស់នៅ។

អំពីទិសដៅនាពេលខាងមុខ លោក Ngo Vu Thang អនុប្រធានគណៈកម្មាធិការប្រជាជនខេត្ត Ca Mau បានឱ្យដឹងថា ខេត្តនឹងបន្តពិនិត្យ ស្រាវជ្រាវ កំណត់មូលហេតុនៃការធ្លាក់ខ្លួនក្រីក្ររបស់ក្រុមគ្រួសារនីមួយៗ ដើម្បីមានដំណោះស្រាយឧបត្ថម្ភឱ្យបានសមស្រប។ ទន្ទឹមនឹងនោះ មូលដ្ឋាននឹងពង្រឹងការផ្សារភ្ជាប់គោលនយោបាយកាត់បន្ថយភាពក្រីក្រជាមួយនឹងការបណ្តុះបណ្តាលវិជ្ជាជីវៈ ការបង្កើតការងារធ្វើ និងការអភិវឌ្ឍផលិតកម្ម ព្រមទាំងកៀរគរប្រភពធនធានសង្គមដើរទន្ទឹមគ្នានឹងការត្រួតពិនិត្យ ឃ្លាំមើល ដើម្បីធានាការជួយឧបត្ថម្ភចំមុខសញ្ញា។

«នៅពេលដែលគោលនយោបាយត្រូវបានប្រែក្លាយទៅជាមុខរបរចិញ្ចឹមជីវិតប្រកបដោយប្រសិទ្ធភាព ការងារធ្វើមានស្ថិរភាព និងបណ្តាញសន្តិសុខសង្គមមានសមត្ថភាពគ្រប់គ្រាន់ក្នុងការគាំពារជនងាយរងគ្រោះ នោះសមិទ្ធផលនៃការកាត់បន្ថយភាពក្រីក្រនៅ Ca Mau ទើបអាចរក្សាទុកបានយូរអង្វែង» លោក Thang បានឱ្យដឹងដូច្នេះ៕

បញ្ចេញឱ្យអស់ពីសមត្ថភាពនូវប្រភពធនធានអាណិកជនវៀតណាមនៅអឺរ៉ុបសម្រាប់ការអភិវឌ្ឍប្រទេសជាតិ យុគសម័យ - នារសៀលថ្ងៃទី ២១ ខែតុលា (ម៉ោងក្នុងតំបន់) នៅទីក្រុងព្រុចសែល (ប្រទេសប៊ែលហ្ស៊ិក) អគ្គលេខាបក្ស និងជាប្រធានរដ្ឋ To Lam ព្រមទាំងលោកជំទាវ និងគណៈប្រតិភូជាន់ខ្ពស់វៀតណាម បានជួបសំណេះសំណាលជាមួយកម្មាភិបាល បុគ្គលិកនៃស្ថាប័នតំណាងវៀតណាមប្រចាំប្រទេសប៊ែលហ្ស៊ិក និងតំណាងសហគមន៍អាណិកជនវៀតណាមនៅអឺរ៉ុប ដោយបានសង្កត់ធ្ងន់លើសំណូមពរនៃការបញ្ចេញឱ្យអស់ពីសមត្ថភាពនូវប្រភពធនធានអាណិកជន ក្នុងការតភ្ជាប់ចំណេះដឹង បច្ចេកវិទ្យា ការវិនិយោគ និងការពង្រឹងទំនាក់ទំនងមិត្តភាព កិច្ចសហប្រតិបត្តិការរវាងវៀតណាមជាមួយបណ្តាប្រទេសនៅអឺរ៉ុប។

ខួប ៦៥ ឆ្នាំនៃមហន្តរាយជាតិគីមីពណ៌ទឹកក្រូច៖ បំប្លែងការចែករំលែកឱ្យទៅជាសកម្មភាពជាក់ស្តែង យុគសម័យ - ក្រោយរយៈពេល ៦៥ ឆ្នាំ ផលវិបាកនៃជាតិគីមីពណ៌ទឹកក្រូច/ឌីអុកស៊ីន នៅតែបន្តកើតមាននៅក្នុងក្រុមគ្រួសារ និងសហគមន៍ជាច្រើន ចាប់តាំងពីវិបាកបន្សល់ទុកអូសបន្លាយឆ្លងកាត់ច្រើនជំនាន់ រហូតដល់ការបំពុលបរិស្ថាននៅតាមតំបន់ដែលរងផលប៉ះពាល់។ ការពិតជាក់ស្តែងនេះ បន្តកំណត់នូវតម្រូវការក្នុងការកៀរគរប្រភពធនធានក្នុងប្រទេស និងអន្តរជាតិ សម្រាប់ការថែទាំជនរងគ្រោះ ការស្តារបរិស្ថានឡើងវិញ និងការដោះស្រាយផលវិបាកនៃសង្គ្រាមប្រកបដោយចីរភាព។

វ៉ាន់ណាំ