បង្កើតកម្លាំងចលករថ្មីសម្រាប់ទំនាក់ទំនងវៀតណាម - សហរដ្ឋអាមេរិក

នៅក្នុងក្របខ័ណ្ឌនៃដំណើរបំពេញការងារចាប់ពីថ្ងៃទី ២០ ដល់ថ្ងៃទី ២៥ ខែកញ្ញា ឆ្នាំ ២០២៦ អគ្គលេខាបក្ស ប្រធានរដ្ឋ To Lam និងគណៈប្រតិភូជាន់ខ្ពស់វៀតណាម ចូលរួមសម័យពិភាក្សាជាន់ខ្ពស់នៃមហាសន្និបាតអង្គការសហប្រជាជាតិ នីតិកាលទី ៨១ អនុវត្តបណ្តាសកម្មភាពទ្វេភាគីនៅសហរដ្ឋអាមេរិក និងបំពេញទស្សនកិច្ចផ្លូវរដ្ឋនៅកាណាដា។

ក្នុងឱកាសនេះ ឯកអគ្គរដ្ឋទូតវៀតណាមប្រចាំនៅសហរដ្ឋអាមេរិក Nguyen Quoc Dung បានចែករំលែកអំពីយថាទស្សន៍នៃកិច្ចសហប្រតិបត្តិការទ្វេភាគី ជាពិសេសលើវិស័យនានាដែលវៀតណាមផ្តល់អាទិភាពសម្រាប់ដំណាក់កាលអភិវឌ្ឍន៍ថ្មី។

យោងតាមលោកឯកអគ្គរដ្ឋទូត ក្របខ័ណ្ឌភាពជាដៃគូយុទ្ធសាស្ត្រគ្រប់ជ្រុងជ្រោយបានកំណត់នូវប្រព័ន្ធសសរស្តម្ភកិច្ចសហប្រតិបត្តិការដ៏ទូលំទូលាយ ចាប់ពីនយោបាយ ការទូត សន្តិសុខ ការពារជាតិ រហូតដល់សេដ្ឋកិច្ច ពាណិជ្ជកម្ម ការវិនិយោគ វិទ្យាសាស្ត្រ-បច្ចេកវិទ្យា ការអប់រំ-បណ្តុះបណ្តាល និងការផ្លាស់ប្តូរប្រជាជននិងប្រជាជន។ វិស័យទាំងនេះបន្តជាគ្រឹះនៃទំនាក់ទំនងរវាងប្រទេសទាំងពីរក្នុងរយៈពេលខាងមុខ។

បច្ចេកវិទ្យា ថាមពល និងខ្សែច្រវាក់ផ្គត់ផ្គង់បង្កើតលំហថ្មី

ទន្ទឹមនឹងវិស័យសហប្រតិបត្តិការប្រពៃណីនានា លោកឯកអគ្គរដ្ឋទូត Nguyen Quoc Dung ចាត់ទុកថា បច្ចេកវិទ្យាជឿនលឿន ថាមពលស្អាត និងខ្សែច្រវាក់ផ្គត់ផ្គង់ដែលមានសមត្ថភាពទប់ទល់ខ្ពស់ នឹងកាន់តែទទួលបានការយកចិត្តទុកដាក់ពីប្រទេសទាំងពីរ។

នេះទាំងជាវិស័យដែលវៀតណាមផ្តល់អាទិភាពក្នុងដំណាក់កាលអភិវឌ្ឍន៍ថ្មី ទាំងជាបណ្តាវិស័យដែលសហរដ្ឋអាមេរិកមានប្រៀបខ្លាំង និងតម្រូវការសហប្រតិបត្តិការ។

នៅក្នុងបច្ចេកវិទ្យាជឿនលឿន ប្រទេសទាំងពីរអាចពង្រីកកិច្ចសហប្រតិបត្តិការលើផ្នែកឧបករណ៍ពាក់កណ្តាលចម្លង បញ្ញាសិប្បនិម្មិត (AI) មជ្ឈមណ្ឌលទិន្នន័យ សេវាឌីជីថលជឿនលឿន និងការបណ្តុះបណ្តាលធនធានមនុស្ស។ វិស័យទាំងនេះផ្សារភ្ជាប់ជាមួយគោលដៅនាំសេដ្ឋកិច្ចឌីជីថលរបស់វៀតណាមឱ្យសម្រេចបាន ៣០% នៃ GDP នៅឆ្នាំ ២០៣០។

អគ្គលេខាបក្ស ប្រធានរដ្ឋ To Lam ទទួលជួបឯកអគ្គរដ្ឋទូតនៃសហរដ្ឋអាមេរិក Jennifer Wicks McNamara នារសៀលថ្ងៃទី ៦ ខែកក្កដា ឆ្នាំ ២០២៦ នៅវិមានប្រធានរដ្ឋ។

វៀតណាមកំណត់ថា វិទ្យាសាស្ត្រ-បច្ចេកវិទ្យា នវានុវត្តន៍ និងការបរិវត្តកម្មឌីជីថល គឺជាបណ្តាកម្លាំងចលករដ៏សំខាន់ដើម្បីលើកកម្ពស់ផលិតភាព គុណភាពនៃកំណើន និងសមត្ថភាពប្រកួតប្រជែង។ ទន្ទឹមនឹងនោះ សហរដ្ឋអាមេរិកមានប្រៀបខ្លាំងលើវិស័យបច្ចេកវិទ្យា ការស្រាវជ្រាវ ការបណ្តុះបណ្តាល និងប្រព័ន្ធអេកូឡូស៊ីនវានុវត្តន៍។

យោងតាមលោកឯកអគ្គរដ្ឋទូត Nguyen Quoc Dung ការបំពេញបន្ថែមឱ្យគ្នាទៅវិញទៅមកនេះ បានបង្កើតលក្ខខណ្ឌអំណោយផលដើម្បីឱ្យភាគីទាំងពីរបង្កើតឡើងនូវបណ្តាកម្មវិធីសហប្រតិបត្តិការដែលមានតម្លៃយូរអង្វែង ព្រមទាំងស្របទៅនឹងអាទិភាពនានានៅក្នុងយុទ្ធសាស្ត្រទាក់ទាញការវិនិយោគបរទេសថ្មីរបស់វៀតណាម។

ថាមពលស្អាតក៏ជាវិស័យដែលមានសក្តានុពលជាច្រើនផងដែរ។ វៀតណាមត្រូវការបង្កើនសមត្ថភាពផលិតថាមពលឱ្យបានច្រើន ដើម្បីឆ្លើយតបនឹងតម្រូវការអភិវឌ្ឍន៍សេដ្ឋកិច្ច ស្របពេលដែលបន្តប្តេជ្ញាសម្រេចឱ្យបាននូវគោលដៅបំភាយឧស្ម័នសុទ្ធត្រឹមកម្រិតសូន្យត្រឹមឆ្នាំ ២០៥០។

តម្រូវការនេះបើកចេញនូវកាលានុវត្តភាពដើម្បីឱ្យសហគ្រាសសហរដ្ឋអាមេរិកចូលរួមផ្តល់ទុន បច្ចេកវិទ្យា និងជំនាញឯកទេសនៅក្នុងវិស័យថាមពលកកើតឡើងវិញ ឧស្ម័នធម្មជាតិរាវ បណ្តាញអគ្គិសនី ការស្តុកទុកថាមពល និងដំណោះស្រាយលើកកម្ពស់ប្រសិទ្ធភាពនៃការប្រើប្រាស់ថាមពល។

ចំពោះខ្សែច្រវាក់ផ្គត់ផ្គង់ វៀតណាម និងសហរដ្ឋអាមេរិក អាចពង្រឹងពាណិជ្ជកម្មលើផលិតផលបច្ចេកវិទ្យាជឿនលឿន ការតភ្ជាប់ផ្នែកឡូជីស្ទីក និងជំរុញទំនាក់ទំនងកាន់តែស៊ីជម្រៅរវាងវិនិយោគិនសហរដ្ឋអាមេរិកជាមួយសហគ្រាសវៀតណាម។

លោកឯកអគ្គរដ្ឋទូត Nguyen Quoc Dung បានវាយតម្លៃថា វិស័យទាំងនេះបង្ហាញឱ្យឃើញពីផលប្រយោជន៍នៃប្រទេសទាំងពីរដែលកាន់តែមានចំណុចស្របគ្នា តាមរយៈនោះមានលទ្ធភាពបង្កើតនូវតម្លៃយូរអង្វែង ជំនួសឱ្យការត្រឹមតែពង្រីកទំហំពាណិជ្ជកម្ម និងការវិនិយោគប៉ុណ្ណោះ។

វៀតណាមបច្ចុប្បន្នចូលរួមចំណែកយ៉ាងសំខាន់នៅក្នុងខ្សែច្រវាក់ផ្គត់ផ្គង់អេឡិចត្រូនិចសកល ព្រមទាំងមានបណ្តាញនៃកិច្ចព្រមព្រៀងពាណិជ្ជកម្មសេរីយ៉ាងទូលំទូលាយ ប្រភពធនធានមនុស្សដ៏សម្បូរបែប និងសមត្ថភាពទទួលយកបច្ចេកវិទ្យា។ យោងតាមលោកឯកអគ្គរដ្ឋទូត លក្ខខណ្ឌទាំងនេះអាចជួយវិនិយោគិនសហរដ្ឋអាមេរិកតភ្ជាប់ជាមួយបណ្តាខ្សែច្រវាក់ផ្គត់ផ្គង់ និងទីផ្សារដែលមានស្រាប់ ព្រមទាំងពង្រីកឱកាសនៅក្នុងវិស័យឧបករណ៍ពាក់កណ្តាលចម្លង AI មជ្ឈមណ្ឌលទិន្នន័យ ផលិតកម្មជឿនលឿន និងសេវាឌីជីថល។

បង្កើតបន្ថែមនូវកម្លាំងចលករសម្រាប់ភាពជាដៃគូយុទ្ធសាស្ត្រគ្រប់ជ្រុងជ្រោយ

យោងតាមលោកឯកអគ្គរដ្ឋទូត Nguyen Quoc Dung បណ្តាសកម្មភាពទ្វេភាគីនៅក្នុងដំណើរបំពេញការងាររបស់អគ្គលេខាបក្ស ប្រធានរដ្ឋ To Lam នៅសហរដ្ឋអាមេរិក មានអត្ថន័យសំខាន់ក្នុងការបន្តធ្វើឱ្យជាក់ស្តែងនូវក្របខ័ណ្ឌភាពជាដៃគូយុទ្ធសាស្ត្រគ្រប់ជ្រុងជ្រោយ។

នៅក្នុងកម្មវិធីបំពេញការងារ អគ្គលេខាបក្ស ប្រធានរដ្ឋ មានបណ្តាសកម្មភាពជាមួយរដ្ឋបាល រដ្ឋសភាសហរដ្ឋអាមេរិក សហគ្រាស វិនិយោគិន បណ្តាសម្ព័ន្ធក្រុមហ៊ុនបច្ចេកវិទ្យា បុគ្គលល្បីៗ បញ្ញវន្តជនជាតិវៀតណាម ដើមកំណើតវៀតណាម និងមិត្តភក្តិសហរដ្ឋអាមេរិក; ទន្ទឹមនឹងនោះ ធ្វើការជាមួយបណ្តាអង្គការដែលចូលរួមក្នុងការជំនះពុះពារលើផលវិបាកនៃសង្គ្រាម ក្នុងនោះមានកិច្ចសហប្រតិបត្តិការស្វែងរក និងបញ្ជាក់អត្តសញ្ញាណយុទ្ធជនពលីវៀតណាមដែលបានបាត់បង់ជីវិតនៅក្នុងសង្គ្រាម។

នៅថ្ងៃទី ២១ ខែកញ្ញា អគ្គលេខាបក្ស ប្រធានរដ្ឋ To Lam បានមានបណ្តាសកម្មភាពនៅ New York ក្នុងនោះបានទទួលជួបក្រុមសមាជិករដ្ឋសភាសហរដ្ឋអាមេរិក និងប្រធានតំណាងពាណិជ្ជកម្មសហរដ្ឋអាមេរិក Jamieson Greer។ នៅក្នុងជំនួបនានា ភាគីវៀតណាមបានបន្តអះអាងនូវបំណងប្រាថ្នានាំឱ្យទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយអភិវឌ្ឍប្រកបដោយស្ថិរភាព ជាក់ស្តែង និងប្រកបដោយប្រសិទ្ធភាព។

យោងតាមលោកឯកអគ្គរដ្ឋទូត Nguyen Quoc Dung ដំណើរបំពេញការងារនេះអាចបង្កើតបន្ថែមនូវកម្លាំងចលករ និងវិធានការជាក់ស្តែងនានា ដើម្បីជំរុញកិច្ចសហប្រតិបត្តិការរវាងប្រទេសទាំងពីរ។

«នៅក្នុងបរិបទបច្ចុប្បន្ន នៅពេលដែលវិទ្យាសាស្ត្រ-បច្ចេកវិទ្យាមានការអភិវឌ្ឍយ៉ាងលឿន និងខ្លាំងក្លា ប៉ះពាល់យ៉ាងស៊ីជម្រៅដល់អនាគតមនុស្សជាតិ ស្ថានភាពនយោបាយ សន្តិសុខ សេដ្ឋកិច្ចពិភពលោកវិវត្តន៍យ៉ាងស្មុគស្មាញ ការពង្រឹងកិច្ចសហប្រតិបត្តិការជាក់ស្តែងរវាងវៀតណាម និងសហរដ្ឋអាមេរិក មានអត្ថន័យសំខាន់ មិនត្រឹមតែសំដៅឆ្លើយតបនឹងផលប្រយោជន៍របស់ប្រទេសទាំងពីរប៉ុណ្ណោះទេ ថែមទាំងរួមចំណែកដល់សន្តិភាព កិច្ចសហប្រតិបត្តិការ និងការអភិវឌ្ឍនៅក្នុងតំបន់ និងលើពិភពលោក» លោកឯកអគ្គរដ្ឋទូត Nguyen Quoc Dung បានសង្កត់ធ្ងន់។

ឯកអគ្គរដ្ឋទូតវៀតណាមប្រចាំនៅសហរដ្ឋអាមេរិក Nguyen Quoc Dung។

ទំនាក់ទំនងវៀតណាម - សហរដ្ឋអាមេរិក ត្រូវបានលើកកម្ពស់កម្រិតទៅជាភាពជាដៃគូយុទ្ធសាស្ត្រគ្រប់ជ្រុងជ្រោយនៅក្នុងខែកញ្ញា ឆ្នាំ ២០២៣។ ក្របខ័ណ្ឌនេះកំណត់នូវកិច្ចសហប្រតិបត្តិការលើវិស័យជាច្រើន ព្រមទាំងផ្អែកលើបណ្តាគោលការណ៍គោរពធម្មនុញ្ញអង្គការសហប្រជាជាតិ ច្បាប់អន្តរជាតិ របបនយោបាយ ឯករាជ្យ អធិបតេយ្យ និងបូរណភាពទឹកដីរបស់គ្នាទៅវិញទៅមក។

ការតភ្ជាប់ប្រភពធនធានជនជាតិវៀតណាមនៅសហរដ្ឋអាមេរិក

ប្រភពធនធានមួយផ្សេងទៀតដែលត្រូវបានលោកឯកអគ្គរដ្ឋទូត Nguyen Quoc Dung សង្កត់ធ្ងន់ គឺសហគមន៍ជនជាតិវៀតណាមនៅសហរដ្ឋអាមេរិក។

យោងតាមលោកឯកអគ្គរដ្ឋទូត នេះជាសហគមន៍មួយប្រកបដោយភាពចម្រុះ សកម្ម មានសមិទ្ធផលជាច្រើននៅក្នុងវិស័យវិទ្យាសាស្ត្រ-បច្ចេកវិទ្យា ការអប់រំ សុខាភិបាល ធុរកិច្ច វប្បធម៌ សិល្បៈ និងសកម្មភាពសង្គម។

ដោយមានការផ្សារភ្ជាប់ជាមួយទាំងវៀតណាម និងសហរដ្ឋអាមេរិក សហគមន៍ជនជាតិវៀតណាមមានលក្ខខណ្ឌអំណោយផលដើម្បីក្លាយជាស្ពានចម្លងរវាងប្រទេសទាំងពីរ។

ដើម្បីពង្រីកប្រភពធនធាននេះ យោងតាមលោកឯកអគ្គរដ្ឋទូត ចាំបាច់ត្រូវបង្កើតលក្ខខណ្ឌដើម្បីឱ្យជនជាតិវៀតណាមនៅសហរដ្ឋអាមេរិក ជាពិសេសគឺក្រុមបញ្ញវន្ត ធុរជន និងយុវជនជំនាន់ក្រោយ ទទួលបានព័ត៌មានពេញលេញអំពីតម្រូវការ និងសក្តានុពលអភិវឌ្ឍន៍របស់វៀតណាម។ ចាប់ពីចំណុចនោះ សហគមន៍អាចចូលរួមដោយផ្ទាល់នៅក្នុងបណ្តាកម្មវិធី គម្រោង និងផែនការជាក់ស្តែងនៅក្នុងស្រុក។

ទម្រង់នៃការរួមចំណែកអាចមានភាពសម្បូរបែបយ៉ាងខ្លាំង៖ ការផ្តល់ប្រឹក្សាដល់មូលដ្ឋាន សហគ្រាស និងសាកលវិទ្យាល័យនានា; ការចូលរួមបង្រៀន ស្រាវជ្រាវរួមគ្នា ផ្ទេរចំណេះដឹង; ការជួយគាំទ្រកសាងស្តង់ដាបច្ចេកទេស; ការបណ្តុះបណ្តាលធនធានមនុស្ស; ការណែនាំអំពីការចាប់ផ្តើមអាជីវកម្ម; ការតភ្ជាប់បណ្តាញបច្ចេកវិទ្យា ការវិនិយោគ និងទីផ្សារនានា។

លោកឯកអគ្គរដ្ឋទូត Nguyen Quoc Dung ចាត់ទុកថា ការរួមចំណែកសម្រាប់ប្រទេសជាតិ មិនមែនមានន័យថាជនជាតិវៀតណាមនៅឯបរទេសចាំបាច់ត្រូវតែវិលត្រឡប់មកវៀតណាមដើម្បីធ្វើការងារយូរអង្វែងនោះឡើយ។

អ្នកជំនាញជាច្រើនអាចចូលរួមតាមរយៈគម្រោងស្រាវជ្រាវ បណ្តាញទីប្រឹក្សា កម្មវិធីបណ្តុះបណ្តាលតាមប្រព័ន្ធអនឡាញ ឬបណ្តាសកម្មភាពតភ្ជាប់ស្របតាមផ្នែក វិស័យ និងមូលដ្ឋាននានា។

ស្ថានទូតវៀតណាមប្រចាំនៅសហរដ្ឋអាមេរិក នឹងបន្តស្តាប់ ជួយគាំទ្រ និងបង្កើតបណ្តាញតភ្ជាប់ជាក់ស្តែងនានា ដើម្បីឱ្យជនជាតិវៀតណាមនៅសហរដ្ឋអាមេរិកអាចជ្រើសរើសទម្រង់សមស្របក្នុងការរួមចំណែកដល់ការអភិវឌ្ឍរបស់ប្រទេសជាតិ ក៏ដូចជាទំនាក់ទំនងមិត្តភាព និងកិច្ចសហប្រតិបត្តិការវៀតណាម - សហរដ្ឋអាមេរិក។

ជាមួយនឹងមូលដ្ឋានគ្រឹះនៃភាពជាដៃគូយុទ្ធសាស្ត្រគ្រប់ជ្រុងជ្រោយ និងការបំពេញបន្ថែមឱ្យគ្នាទៅវិញទៅមកលើតម្រូវការអភិវឌ្ឍន៍ បច្ចេកវិទ្យា ប្រភពធនធាន និងទីផ្សារ បណ្តាវិស័យដូចជាឧបករណ៍ពាក់កណ្តាលចម្លង AI ថាមពលស្អាត ខ្សែច្រវាក់ផ្គត់ផ្គង់ ការបណ្តុះបណ្តាលធនធានមនុស្ស ព្រមទាំងការចូលរួមរបស់សហគមន៍ជនជាតិវៀតណាមនៅសហរដ្ឋអាមេរិក កំពុងបើកចេញនូវលំហកិច្ចសហប្រតិបត្តិការបន្ថែមទៀតរវាងប្រទេសទាំងពីរនៅក្នុងដំណាក់កាលខាងមុខ។

ទិដ្ឋភាពទូទៅនៃពិធីទទួលបដិសណ្ឋារកិច្ចរបស់ប្រធានរដ្ឋចិន លោក Xi Jinping ជូនចំពោះប្រធានាធិបតីអាមេរិក លោក Donald Trump យុគសម័យ - នាព្រឹកថ្ងៃទី ១៤ ខែឧសភា ប្រធានរដ្ឋចិន លោក Xi Jinping បានទទួលបដិសណ្ឋារកិច្ចចំពោះប្រធានាធិបតីអាមេរិក លោក Donald Trump ជាមួយនឹងពិធីសារផ្លូវការយ៉ាងមហោឡារិក នៅមហាវិមានប្រជាជន ក្នុងរដ្ឋធានីប៉េកាំង។

អង្គការក្រៅរដ្ឋាភិបាលសហរដ្ឋអាមេរិក គាំទ្រជនពិការនៅ Hai Phong ក្នុងការកែលម្អលក្ខខណ្ឌជីវភាពរស់នៅ យុគសម័យ - យោងតាមព័ត៌មានពីសហភាពបណ្ដាអង្គការមិត្តភាពទីក្រុង Hai Phong រទេះរុញចំនួន ១០០ គ្រឿង ដែលឧបត្ថម្ភដោយអង្គការក្រៅរដ្ឋាភិបាលសហរដ្ឋអាមេរិកចំនួនពីរ ត្រូវបានប្រគល់ជូនជនពិការដែលមានជីវភាពលំបាក នៅសង្កាត់ An Hai និងសង្កាត់ Phu Lien (ទីក្រុង Hai Phong) ដើម្បីគាំទ្រដល់ការធ្វើដំណើរ និងជីវភាពរស់នៅប្រចាំថ្ងៃ។

ឌឹកអាញ់