វិសោធនកម្មច្បាប់ស្តីពីការវាស់វែង៖ ធ្វើឌីជីថលភាវូបនីយកម្ម កាត់បន្ថយនីតិវិធី កាត់បន្ថយការចំណាយសម្រាប់សហគ្រាស

នាព្រឹកថ្ងៃទី ១៩ ខែសីហា នៅ Ha Noi ក្រសួងវិទ្យាសាស្ត្រ និងបច្ចេកវិទ្យា បានរៀបចំសន្និសីទផ្សព្វផ្សាយគោលនយោបាយចំពោះសេចក្តីព្រាងច្បាប់ស្តីពីវិសោធនកម្ម និងបំពេញបន្ថែមមាត្រាមួយចំនួននៃច្បាប់ស្តីពីការវាស់វែង។

លោកស្រី Nguyen Thi Thu Trang អនុប្រធាននាយកដ្ឋាននីតិកម្ម ក្រសួងវិទ្យាសាស្ត្រ និងបច្ចេកវិទ្យា បានឱ្យដឹងថា សំណុំឯកសារនៃសេចក្តីព្រាងច្បាប់រហូតមកដល់ពេលនេះ បានបញ្ចប់នីតិវិធីនានាក្រោមសមត្ថកិច្ចរបស់រដ្ឋាភិបាល ហើយកំពុងត្រូវបានត្រៀមរៀបចំសម្រាប់ដំណាក់កាលត្រួតពិនិត្យ និងពិចារណាស្របតាមបទប្បញ្ញត្តិ។

សន្និសីទនេះស្ថិតនៅក្នុងផែនការផ្សព្វផ្សាយគោលនយោបាយរបស់ក្រសួងវិទ្យាសាស្ត្រ និងបច្ចេកវិទ្យា ព្រមទាំងជាឱកាសដើម្បីឱ្យក្រសួងទទួលយកមតិយោបល់ បន្តកែលម្អសំណុំឯកសារឱ្យកាន់តែពេញលេញ មុនពេលដាក់ជូនរដ្ឋសភាពិចារណា និងអនុម័តនៅក្នុងសម័យប្រជុំលើកទី ២ នៃរដ្ឋសភានីតិកាលទី XVI នាខែតុលា ឆ្នាំ ២០២៦។

ក្រុមបញ្ហាចំនួន ៣ ដែលត្រូវដោះស្រាយ

យោងតាមលោក Tran Quy Giau ប្រធានគណៈកម្មាធិការវាស់វែង នៃគណៈកម្មាធិការស្តង់ដារ វាស់វែង និងគុណភាពជាតិ ក្រសួងវិទ្យាសាស្ត្រ និងបច្ចេកវិទ្យា ការអនុវត្តជាក់ស្តែងនៃច្បាប់ជាធរមានបានបង្ហាញថា មានក្រុមបញ្ហាធំៗចំនួន ៣ ដែលត្រូវដោះស្រាយ។

សន្និសីទផ្សព្វផ្សាយគោលនយោបាយចំពោះសេចក្តីព្រាងច្បាប់ស្តីពីវិសោធនកម្ម និងបំពេញបន្ថែមមាត្រាមួយចំនួននៃច្បាប់ស្តីពីការវាស់វែង។

ជាបឋម គឺតម្រូវការបរិវត្តកម្មឌីជីថល។ សកម្មភាពវាស់វែងនាពេលបច្ចុប្បន្ន មិនទាន់មានថ្នាល និងមូលដ្ឋានទិន្នន័យឯកភាព តភ្ជាប់គ្នាទៅវិញទៅមកនៅឡើយទេ។ បទប្បញ្ញត្តិនានាពាក់ព័ន្ធនឹងតម្លៃគតិយុត្តនៃលទ្ធផលអេឡិចត្រូនិក ការគ្រប់គ្រងដោយផ្អែកលើទិន្នន័យ ភាពត្រឹមត្រូវ ភាពពេញលេញ ការផ្ទៀងផ្ទាត់ភាពត្រឹមត្រូវ ការតាមដានប្រភព សុវត្ថិភាព និងការសម្ងាត់ទិន្នន័យ នៅតែចាំបាច់ត្រូវបន្តកែលម្អឱ្យកាន់តែពេញលេញ។

ក្រុមបញ្ហាទីពីរពាក់ព័ន្ធនឹងការអភិវឌ្ឍប្រព័ន្ធវាស់វែងជាតិ។ ច្បាប់ជាធរមានមិនទាន់មានយន្តការរឹងមាំគ្រប់គ្រាន់ដើម្បីផ្តល់អាទិភាពលើការវិនិយោគសម្រាប់វិស័យបច្ចេកវិទ្យាថ្មីៗ សេដ្ឋកិច្ចឌីជីថល សេដ្ឋកិច្ចបៃតង និងឧស្សាហកម្មយុទ្ធសាស្ត្រនៅឡើយទេ។ ការកៀរគរធនធានសង្គមក៏ដូចជាការអនុវត្តកម្មវិធីធានាការវាស់វែងនៅមានកម្រិតនៅឡើយ។

ក្រុមបញ្ហាទីបី គឺតម្រូវការវិមជ្ឈការអំណាច និងការកែទម្រង់។ បទប្បញ្ញត្តិមួយចំនួនស្តីពីសមត្ថកិច្ចគ្រប់គ្រងវិធីសាស្ត្រវាស់វែងរវាងបណ្តាក្រសួង ស្ថាប័ន មិនទាន់ច្បាស់លាស់ពិតប្រាកដនៅឡើយ។ សកម្មភាពស្ម័គ្រចិត្ត និងកាតព្វកិច្ចមិនទាន់ត្រូវបានបែងចែកដាច់ដោយឡែកឱ្យបានពេញលេញនៅឡើយទេ។ យន្តការសញ្ញាសម្គាល់បរិមាណនៅតែធ្ងន់ធ្ងរលើការត្រួតពិនិត្យជាមុន ខណៈដែលបទប្បញ្ញត្តិមួយចំនួនចាំបាច់ត្រូវធ្វើសមកាលកម្មជាមួយច្បាប់ស្តីពីអធិការកិច្ចឆ្នាំ ២០២៥ និងគំរូរដ្ឋបាលមូលដ្ឋាន ២ ថ្នាក់។

ផ្អែកលើមូលដ្ឋាននោះ សេចក្តីព្រាងច្បាប់បានផ្តោតលើគោលនយោបាយធំៗចំនួន ៣ រួមមាន ការធ្វើបរិវត្តកម្មឌីជីថលសកម្មភាពវាស់វែង ការលើកកម្ពស់សមត្ថភាពប្រព័ន្ធវាស់វែងជាតិ និងការលើកកម្ពស់តួនាទីរបស់សហគ្រាស ការធ្វើវិមជ្ឈការអំណាចគ្រប់គ្រងរដ្ឋផ្សារភ្ជាប់ជាមួយការទទួលខុសត្រូវក្នុងការបកស្រាយ ការកែទម្រង់នីតិវិធីរដ្ឋបាល និងការកាត់បន្ថយលក្ខខណ្ឌអាជីវកម្ម។

ការកសាងថ្នាល និងមូលដ្ឋានទិន្នន័យវាស់វែង

វិភាគអំពីចំណុចថ្មីៗនៃសេចក្តីព្រាងច្បាប់ លោកស្រី Tran Thi Thuy Ha គណៈកម្មាធិការវាស់វែង នៃគណៈកម្មាធិការស្តង់ដារ វាស់វែង និងគុណភាពជាតិ បានឱ្យដឹងថា សេចក្តីព្រាងច្បាប់បានបំពេញបន្ថែមជំពូកថ្មីដាច់ដោយឡែកមួយស្តីពីបរិវត្តកម្មឌីជីថលក្នុងសកម្មភាពវាស់វែង។

ផ្អែកលើចំណុចនោះ រដ្ឋនឹងកសាង ដាក់ឱ្យដំណើរការនូវថ្នាលឌីជីថលនៃសកម្មភាពវាស់វែង និងបង្កើតមូលដ្ឋានទិន្នន័យវាស់វែងនៅក្នុងមូលដ្ឋានទិន្នន័យជាតិស្តីពីស្តង់ដារ ការវាស់វែង និងគុណភាព។

មធ្យោបាយវាស់វែង និងស្តង់ដារវាស់វែង នឹងត្រូវបានភ្ជាប់កូដគ្រប់គ្រងផ្តាច់មុខមួយ ដែលអនុញ្ញាតឱ្យតាមដានប្រភពបានពេញមួយវដ្តជីវិត។

សេចក្តីព្រាងច្បាប់ក៏ទទួលស្គាល់ និងប្រើប្រាស់លទ្ធផលវាស់វែងក្រោមទម្រង់អេឡិចត្រូនិកផងដែរ។ លទ្ធផលវាស់វែង វិញ្ញាបនបត្រ តែម និងត្រា ក្រោមទម្រង់ទិន្នន័យឌីជីថល នឹងមានតម្លៃគតិយុត្តស្របតាមបទប្បញ្ញត្តិ ដែលតាមរយៈនោះរួមចំណែកកាត់បន្ថយការចំណាយលើការបោះពុម្ព ការរក្សាទុកឯកសារក្រដាស និងលើកកម្ពស់សមត្ថភាពទាញយកទិន្នន័យរបស់ស្ថាប័នគ្រប់គ្រង សហគ្រាស និងប្រជាពលរដ្ឋ។

លោក Tran Quy Giau ប្រធានគណៈកម្មាធិការវាស់វែង នៃគណៈកម្មាធិការស្តង់ដារ វាស់វែង និងគុណភាពជាតិ ក្រសួងវិទ្យាសាស្ត្រ និងបច្ចេកវិទ្យា ចែករំលែកអំពីសេចក្តីព្រាងច្បាប់ស្តីពីវិសោធនកម្ម និងបំពេញបន្ថែមមាត្រាមួយចំនួននៃច្បាប់ស្តីពីការវាស់វែង។

ទន្ទឹមនឹងនោះ សេចក្តីព្រាងច្បាប់បានធ្វើស្តង់ដារភាវូបនីយកម្មនូវសញ្ញាណមួយចំនួនស្របតាមការអនុវត្តអន្តរជាតិ បំពេញបន្ថែមសញ្ញាណនានា ដូចជា សារធាតុស្តង់ដារ ភាពមិនប្រាកដប្រជានៃការវាស់វែង ថ្នាលឌីជីថលនៃសកម្មភាពវាស់វែង ព្រមទាំងធ្វើបច្ចុប្បន្នភាពសញ្ញាណនានាស្តីពីប្រព័ន្ធខ្នាតអន្តរជាតិ SI ស្តង់ដារវាស់វែង ការក្រិតខ្នាត និងមធ្យោបាយវាស់វែង។

ចំណុចថ្មីមួយទៀត គឺការបំពេញបន្ថែមអំពើហាមឃាត់ការជ្រៀតជ្រែកចូលទៅក្នុងរចនាសម្ព័ន្ធ កម្មវិធី ឬឧបករណ៍ជំនួយនៃមធ្យោបាយវាស់វែង សំដៅធ្វើឱ្យលទ្ធផលវាស់វែងខុសឆ្គង ស្របតាមតម្រូវការគ្រប់គ្រងឧបករណ៍វាស់វែងអេឡិចត្រូនិក និងវៃឆ្លាត។

កាត់បន្ថយការត្រួតពិនិត្យជាមុន បង្កើនការត្រួតពិនិត្យជាក្រោយតាមហានិភ័យ

ទិសដៅជាប់លាប់មួយនៃសេចក្តីព្រាងច្បាប់ គឺការផ្លាស់ប្តូរយ៉ាងខ្លាំងក្លាពីការត្រួតពិនិត្យជាមុនទៅជាការត្រួតពិនិត្យជាក្រោយ ផ្អែកលើមូលដ្ឋានទិន្នន័យ និងការវាយតម្លៃកម្រិតហានិភ័យ។

ផ្អែកលើចំណុចនោះ សកម្មភាពសេវាកម្មតាមយន្តការទីផ្សារនឹងត្រូវបានបែងចែកដាច់ដោយឡែកពីសកម្មភាពកាតព្វកិច្ច។

លោកស្រី Tran Thi Thuy Ha គណៈកម្មាធិការវាស់វែង នៃគណៈកម្មាធិការស្តង់ដារ វាស់វែង និងគុណភាពជាតិ វិភាគអំពីចំណុចថ្មីៗនៃសេចក្តីព្រាងច្បាប់។

ចំពោះមធ្យោបាយវាស់វែងក្រុមទី ១ និងស្តង់ដារដែលមិនប្រើប្រាស់ដោយផ្ទាល់ដើម្បីផ្ទៀងផ្ទាត់ក្រុមទី ២ អង្គភាពនឹងអនុវត្តការប្រកាសសមត្ថភាព។

ចំពោះសកម្មភាពកាតព្វកិច្ច បន្តអនុវត្តយន្តការវាយតម្លៃ ជ្រើសរើស និងចាត់តាំងអង្គភាពដែលមានសមត្ថភាពគ្រប់គ្រាន់ដើម្បីអនុវត្តការផ្ទៀងផ្ទាត់ជាកាតព្វកិច្ច ការសាកល្បងជាកាតព្វកិច្ចចំពោះមធ្យោបាយវាស់វែងក្រុមទី ២ ការក្រិតខ្នាតជាកាតព្វកិច្ច ការសាកល្បងជាកាតព្វកិច្ចចំពោះស្តង់ដារវាស់វែងដែលប្រើប្រាស់ដោយផ្ទាល់ដើម្បីផ្ទៀងផ្ទាត់មធ្យោបាយវាស់វែងក្រុមទី ២។

សេចក្តីព្រាងច្បាប់ក៏លុបចោលវិញ្ញាបនបត្រស្តង់ដារការងារ សារធាតុស្តង់ដារដែលប្រើប្រាស់ដោយផ្ទាល់ដើម្បីផ្ទៀងផ្ទាត់ក្រុមទី ២ ដោយផ្លាស់ប្តូរទៅជាយន្តការប្រកាសភាពសមស្របតាមតម្រូវការបច្ចេកទេស។

យោងតាមសំណុំឯកសារនៃសេចក្តីព្រាងច្បាប់ ខ្លឹមសារវិសោធនកម្ម និងបំពេញបន្ថែមត្រូវបានគ្រោងថានឹងរួមចំណែកកាត់បន្ថយ និងធ្វើឱ្យសាមញ្ញនូវនីតិវិធីរដ្ឋបាលចំនួន ៨ នៅក្នុងបណ្តាឯកសារកំណត់លម្អិត។

ក្រៅពីនេះ សេចក្តីព្រាងច្បាប់ក៏បានបែងចែកឡើងវិញនូវការទទួលខុសត្រូវគ្រប់គ្រងរដ្ឋ ដើម្បីឱ្យសមស្របនឹងគំរូរដ្ឋបាលមូលដ្ឋាន ២ ថ្នាក់ផងដែរ៕

រដ្ឋសភាអនុម័តលើច្បាប់វិសោធនកម្ម និងបំពេញបន្ថែមច្បាប់ស្តីពីស្ថាប័នតំណាងវៀតណាមនៅបរទេស យុគសម័យ - នារសៀលថ្ងៃទី ២៣ ខែមេសា ក្នុងបន្តកម្មវិធីសម័យប្រជុំលើកទី ១ នៃរដ្ឋសភាវៀតណាម នីតិកាលទី ១៦ រដ្ឋសភាបានបោះឆ្នោតអនុម័តលើច្បាប់វិសោធនកម្ម និងបំពេញបន្ថែមមាត្រាមួយចំនួននៃច្បាប់ស្តីពីស្ថាប័នតំណាងនៃសាធារណរដ្ឋសង្គមនិយមវៀតណាមនៅបរទេស ដោយមានអត្រាសម្លេងគាំទ្រយ៉ាងខ្ពស់។

ស្ថានទូតវៀតណាមប្រចាំនៅឥណ្ឌូនេស៊ី ព្រមានពលរដ្ឋអំពីបណ្ដាញបោកប្រាស់ និងល្បែងស៊ីសងខុសច្បាប់ យុគសម័យ - នាថ្ងៃទី ១៨ ខែឧសភា ស្ថានទូតវៀតណាមប្រចាំនៅឥណ្ឌូនេស៊ី បានចេញសេចក្តីជូនដំណឹងណែនាំដល់ពលរដ្ឋវៀតណាមដែលកំពុងរស់នៅ សិក្សា និងធ្វើការនៅឥណ្ឌូនេស៊ី ឱ្យបង្កើនការប្រុងប្រយ័ត្នខ្ពស់ចំពោះបណ្ដាញបោកប្រាស់តាមប្រព័ន្ធអ៊ីនធឺណិត ល្បែងស៊ីសងខុសច្បាប់ និងបណ្ដាសកម្មភាពជើងសារបន្លំភ្នែកដែលមានសញ្ញាល្មើសនឹងច្បាប់របស់ប្រទេសម្ចាស់ផ្ទះ។

ឌឿងង្វៀន