ប្រៃសណីយ៍ផ្លាស់ប្តូរទៅជាការគ្រប់គ្រងដោយទិន្នន័យ និងកម្រិតហានិភ័យ

នាព្រឹកថ្ងៃទី ១៨ ខែសីហា នៅ Ha Noi ក្រសួងវិទ្យាសាស្ត្រ និងបច្ចេកវិទ្យា បានរៀបចំសន្និសីទផ្សព្វផ្សាយគោលនយោបាយចំពោះសេចក្តីព្រាងច្បាប់ស្តីពីប្រៃសណីយ៍ (វិសោធនកម្ម)។

ថ្លែងនៅក្នុងសន្និសីទ លោកស្រី Nguyen Thi Thu Trang អនុប្រធាននាយកដ្ឋាននីតិកម្ម ក្រសួងវិទ្យាសាស្ត្រ និងបច្ចេកវិទ្យា បានឱ្យដឹងថា ព្រឹត្តិការណ៍នេះគឺសំដៅឧទ្ទេសនាមអំពីខ្លឹមសារជាមូលដ្ឋាន ចំណុចថ្មីៗ និងទិសដៅគោលនយោបាយនៃសេចក្តីព្រាងច្បាប់ ព្រមទាំងទទួលយកមតិយោបល់ពីអ្នកជំនាញ សមាគម សហគ្រាស និងស្ថាប័នពាក់ព័ន្ធ ដើម្បីបន្តកែលម្អសំណុំឯកសារឱ្យកាន់តែពេញលេញ មុនពេលដាក់ជូនរដ្ឋសភាពិចារណានៅក្នុងសម័យប្រជុំលើកទី ២ នៃរដ្ឋសភានីតិកាលទី XVI នាខែតុលា ឆ្នាំ ២០២៦។

យោងតាមលោកស្រី Nguyen Thi Thu Trang ការផ្សព្វផ្សាយគោលនយោបាយចាំបាច់ត្រូវអនុវត្តយ៉ាងសកម្ម ទាន់ពេលវេលា ចាប់តាំងពីដំណាក់កាលស្នើ និងកសាងគោលនយោបាយ។ នេះមិនត្រឹមតែជាតម្រូវការនៅក្នុងដំណើរការកសាងច្បាប់ប៉ុណ្ណោះទេ ប៉ុន្តែថែមទាំងជាដំណោះស្រាយបង្កើតការឯកភាពក្នុងសង្គម ទទួលយកបានពេញលេញនូវមតិយោបល់របស់ស្ថាប័ន អង្គភាព សហគ្រាស និងប្រជាពលរដ្ឋ ដែលតាមរយៈនោះលើកកម្ពស់គុណភាព លទ្ធភាពអាចអនុវត្តបាន និងប្រសិទ្ធភាពនៃលិខិតបទដ្ឋានគតិយុត្តក្រោយពេលប្រកាសឱ្យប្រើប្រាស់។

ជាង ៩០% នៃទិន្នផលប្រៃសណីយ៍ គឺជាកញ្ចប់ និងកញ្ចប់ទំនិញ

ធ្វើបទបង្ហាញអំពីសេចក្តីព្រាងច្បាប់ លោក La Hoang Trung ប្រធាននាយកដ្ឋានប្រៃសណីយ៍ ក្រសួងវិទ្យាសាស្ត្រ និងបច្ចេកវិទ្យា បានឱ្យដឹងថា វិស័យប្រៃសណីយ៍កំពុងឆ្លងកាត់ការផ្លាស់ប្តូរជាមូលដ្ឋាន ដែលចោទឡើងនូវតម្រូវការកសាងច្រករបៀងគតិយុត្តឱ្យស្របតាមល្បឿននៃការអភិវឌ្ឍទីផ្សារ និងវិធីសាស្ត្រគ្រប់គ្រងថ្មី។

យោងតាមលោក ការផ្លាស់ប្តូរនៃទីផ្សារប្រៃសណីយ៍ត្រូវបានបង្ហាញនៅលើ ៤ ទិដ្ឋភាព។

ជាបឋម ប្រៃសណីយ៍បានផ្លាស់ប្តូរយ៉ាងខ្លាំងក្លាពីទីផ្សារដែលបម្រើឱ្យសំបុត្រជាចម្បង ទៅជាការដឹកជញ្ជូនកញ្ចប់ និងកញ្ចប់ទំនិញ ជាពិសេសគឺទំនិញបម្រើឱ្យពាណិជ្ជកម្មអេឡិចត្រូនិក។

ទន្ទឹមនឹងនោះ ពីសេវាបញ្ជូនតាមបែបប្រពៃណី ប្រៃសណីយ៍កំពុងក្លាយជាហេដ្ឋារចនាសម្ព័ន្ធតភ្ជាប់ឌីជីថល-រូបវន្តនៃសេដ្ឋកិច្ចជាបណ្តើរៗ។

វិធីសាស្ត្រគ្រប់គ្រងក៏កំពុងផ្លាស់ប្តូរពីការផ្តល់អាជ្ញាប័ណ្ណ និងការត្រួតពិនិត្យជាមុន ទៅជាការចុះបញ្ជី ការផ្សព្វផ្សាយជាសាធារណៈ និងការត្រួតពិនិត្យជាក្រោយ។ ជាមួយគ្នានេះដែរ ចំពោះមុខទំហំនៃបញ្ញើប្រៃសណីយ៍កាន់តែធំឡើងៗ ការគ្រប់គ្រងមិនអាចបន្តផ្អែកលើការត្រួតពិនិត្យស្របគ្នានោះឡើយ ប៉ុន្តែត្រូវផ្លាស់ប្តូរទៅជាការប្រើប្រាស់ទិន្នន័យ និងការវាយតម្លៃកម្រិតហានិភ័យ។

ទិដ្ឋភាពទូទៅនៃសន្និសីទផ្សព្វផ្សាយគោលនយោបាយចំពោះសេចក្តីព្រាងច្បាប់ស្តីពីប្រៃសណីយ៍ (វិសោធនកម្ម)។

ក្នុងឆ្នាំ ២០២៥ ទិន្នផលបញ្ញើប្រៃសណីយ៍សម្រេចបានប្រមាណ ៤,១ ពាន់លាន ដែលខ្ពស់ជាង ១២ ដង បើធៀបនឹងឆ្នាំ ២០១០។ ចំណូលពីសេវាប្រៃសណីយ៍សម្រេចបានប្រមាណ ៨៧.០០០ ពាន់លានដុង។ ក្នុងនោះ ជាង ៩០% នៃទិន្នផល គឺជាកញ្ចប់ និងកញ្ចប់ទំនិញ។

យោងតាមលោក La Hoang Trung ទំហំទីផ្សារនាពេលបច្ចុប្បន្នបានកន្លងផុតឆ្ងាយពីក្របខ័ណ្ឌគតិយុត្តដែលត្រូវបានរៀបចំឡើងតាំងពីឆ្នាំ ២០១០។ ការអនុវត្តជាក់ស្តែងនេះបានចោទឡើងនូវតម្រូវការធ្វើវិសោធនកម្មបទប្បញ្ញត្តិនានាស្តីពីវិសាលភាពនៃការកែសម្រួលរបស់ច្បាប់ សេវាប្រៃសណីយ៍សាធារណៈ ការគ្រប់គ្រងសហគ្រាស ការផ្តល់អាជ្ញាប័ណ្ណប្រតិបត្តិការ បរិវត្តកម្មឌីជីថល ទិន្នន័យប្រៃសណីយ៍ ការធានាសុវត្ថិភាព សន្តិសុខ និងការអនុវត្តបច្ចេកវិទ្យាថ្មីៗ។

គោលនយោបាយសំខាន់ៗចំនួន ៤ នៅក្នុងសេចក្តីព្រាងច្បាប់

សេចក្តីព្រាងច្បាប់ស្តីពីប្រៃសណីយ៍ (វិសោធនកម្ម) ត្រូវបានកសាងឡើងផ្អែកលើមូលដ្ឋាននៃគោលនយោបាយសំខាន់ៗចំនួន ៤ ស្របតាមសេចក្តីសម្រេចចិត្តលេខ ១២៩/NQ-CP ចុះថ្ងៃទី ១៧ ខែឧសភា ឆ្នាំ ២០២៦ របស់រដ្ឋាភិបាល។

ទីមួយ សេវាប្រៃសណីយ៍ត្រូវបានកំណត់តាមលក្ខណៈពិតប្រាកដនៃសកម្មភាព។ ផ្អែកលើចំណុចនោះ សេវានេះរួមមាន ការទទួល ការបែងចែក ការដឹកជញ្ជូន ការចែក និងដំណាក់កាលនានាដែលផ្សារភ្ជាប់ដោយផ្ទាល់ជាមួយបញ្ញើប្រៃសណីយ៍នីមួយៗ ដូចជា ការរក្សាទុកក្នុងឃ្លាំង ការរៀបចំដំណើរការបញ្ជាទិញ ការវេចខ្ចប់ ការប្រគល់ត្រឡប់មកវិញ ព្រមទាំងមិនរាប់បញ្ចូលការដឹកជញ្ជូន ឃ្លាំងស្តុក និងភស្តុភារកម្ម (Logistics) ឯករាជ្យនោះឡើយ។

ទីពីរ សេវាប្រៃសណីយ៍សកលត្រូវបានពង្រីកពីសំបុត្រ ទៅជាទាំងសំបុត្រ ព្រមទាំងកញ្ចប់ និងកញ្ចប់ទំនិញ។ សេចក្តីព្រាងច្បាប់ក៏កែលម្អយន្តការចំពោះបណ្តាញប្រៃសណីយ៍សាធារណៈ KT1 ទីតាំងបម្រើសេវាពហុមុខងារ និងការបញ្ជាទិញសេវាពីសហគ្រាសដែលត្រូវបានចាត់តាំងឱ្យកាន់តែពេញលេញផងដែរ។

ទីបី ប្រៃសណីយ៍ត្រូវបានតម្រង់ទិសអភិវឌ្ឍន៍ឱ្យក្លាយជាហេដ្ឋារចនាសម្ព័ន្ធសារវន្តរបស់ជាតិ និងសេដ្ឋកិច្ចឌីជីថល អមដោយយន្តការគាំទ្រ ការវិនិយោគ ការរក្សាបណ្តាញសាធារណៈ និងការកៀរគរបណ្តាញនៅពេលចាំបាច់។

ទីបួន អភិវឌ្ឍប្រៃសណីយ៍ឌីជីថលផ្អែកលើមូលដ្ឋានទិន្នន័យ ការកំណត់អត្តសញ្ញាណ និងការតាមដានប្រភពនៃបញ្ញើប្រៃសណីយ៍ ព្រមទាំងគ្រប់គ្រងបញ្ញើប្រៃសណីយ៍ និងព័ត៌មានអ្នកផ្ញើស្របតាមកម្រិតហានិភ័យ។

លោក La Hoang Trung ប្រធាននាយកដ្ឋានប្រៃសណីយ៍ ក្រសួងវិទ្យាសាស្ត្រ និងបច្ចេកវិទ្យា ឧទ្ទេសនាមអំពីខ្លឹមសារសំខាន់ៗនៃសេចក្តីព្រាងច្បាប់ស្តីពីប្រៃសណីយ៍ (វិសោធនកម្ម)។

បញ្ញើប្រៃសណីយ៍នីមួយៗមានលេខកូដសម្គាល់តែមួយគត់

លោក Le Van Chung នាយកដ្ឋានប្រៃសណីយ៍ ក្រសួងវិទ្យាសាស្ត្រ និងបច្ចេកវិទ្យា បានឱ្យដឹងថា ខ្លឹមសារថ្មីគួរឱ្យកត់សម្គាល់មួយនៃសេចក្តីព្រាងច្បាប់ គឺពាក់ព័ន្ធនឹងវិធីសាស្ត្រធានាសុវត្ថិភាព និងសន្តិសុខប្រៃសណីយ៍។

យោងតាមសេចក្តីព្រាងច្បាប់ បញ្ញើប្រៃសណីយ៍នីមួយៗនឹងត្រូវបានភ្ជាប់លេខកូដសម្គាល់តែមួយគត់នៅក្នុងប្រព័ន្ធនៃសហគ្រាសប្រៃសណីយ៍ ចាប់តាំងពីពេលទទួលយក និងរក្សាទុកក្នុងដំណើរការផ្តល់សេវាទាំងស្រុង។

លេខកូដសម្គាល់នេះ ត្រូវបានប្រើប្រាស់ដើម្បីតាមដាន គ្រប់គ្រង និងតាមដានប្រភពនៃបញ្ញើប្រៃសណីយ៍ឆ្លងកាត់បណ្តាដំណាក់កាលទទួល ការបែងចែក ការដឹកជញ្ជូន និងការចែក។ នេះគឺជាថ្នាលទិន្នន័យសម្រាប់ផ្សារភ្ជាប់បញ្ញើប្រៃសណីយ៍ជាមួយដំណើរការវិជ្ជាជីវៈទាំងមូល បម្រើឱ្យការតាមដានប្រភពនៅពេលមានឧប្បត្តិហេតុកើតឡើង ឬលេចចេញនូវសញ្ញាណបំពាន។

សេចក្តីព្រាងច្បាប់ក៏តម្រូវឱ្យសហគ្រាសធានាសុវត្ថិភាពសម្រាប់បញ្ញើប្រៃសណីយ៍ ចាប់តាំងពីពេលទទួលរហូតដល់ពេលចែក ដោយមិនឱ្យកើតមានការបាត់បង់ វង្វេងបាត់ ខូចខាត ឬត្រូវបានរំលោភបំពានដោយខុសច្បាប់នោះឡើយ។

ចំពោះសន្តិសុខប្រៃសណីយ៍ សហគ្រាសត្រូវអនុវត្តបណ្តាវិធានការឱ្យស្របតាមកម្រិតហានិភ័យ និងទំហំប្រតិបត្តិការ ដើម្បីបង្ការ រកឃើញ និងដោះស្រាយការបំពាន។

លោក Le Van Chung នាយកដ្ឋានប្រៃសណីយ៍ ក្រសួងវិទ្យាសាស្ត្រ និងបច្ចេកវិទ្យា ផ្លាស់ប្តូរយោបល់អំពីការងារធានាសុវត្ថិភាព និងសន្តិសុខក្នុងសកម្មភាពប្រៃសណីយ៍។

ការសម្របសម្រួលជាមួយស្ថាប័នរដ្ឋត្រូវតែត្រឹមត្រូវតាមសមត្ថកិច្ច គោលបំណង និងវិសាលភាពចាំបាច់ ព្រមទាំងកាត់បន្ថយផលប៉ះពាល់ដែលមិនចាំបាច់ដល់ដំណើរការធម្មតានៃសេវាកម្ម។

យោងតាមទិសដៅនេះ វិធីសាស្ត្រគ្រប់គ្រងនឹងផ្លាស់ប្តូរពីការផ្តោតលើការត្រួតពិនិត្យ និងការរកឃើញការបំពាននៅលើទ្រង់ទ្រាយធំ ទៅជាការបង្ការទុកជាមុនផ្អែកលើទិន្នន័យ ការកំណត់អត្តសញ្ញាណ ការតាមដានប្រភព និងកម្រិតហានិភ័យ។

ការផ្លាស់ប្តូរនេះគឺសមស្របទៅនឹងការអនុវត្តជាក់ស្តែង នៅពេលដែលប្រៃសណីយ៍បានក្លាយជាហេដ្ឋារចនាសម្ព័ន្ធដ៏សំខាន់មួយនៃពាណិជ្ជកម្មអេឡិចត្រូនិក និងសេដ្ឋកិច្ចឌីជីថល ជាមួយនឹងទំហំរាប់ពាន់លានបញ្ញើប្រៃសណីយ៍ក្នុងមួយឆ្នាំៗ៕

កសាងមូលដ្ឋានទិន្នន័យសម្រាប់ប្រព័ន្ធអេកូឡូស៊ីបង្កើតអាជីវកម្មថ្មីផ្លាស់ប្តូរថ្មីច្នៃប្រឌិត៖ ថ្នាលសេដ្ឋកិច្ចទិន្នន័យ យុគសម័យ - ចេញពីតម្រូវការកសាងប្រព័ន្ធទិន្នន័យ «ត្រឹមត្រូវ គ្រប់គ្រាន់ ស្អាតស្អំ រស់រវើក» សម្រាប់ប្រព័ន្ធអេកូឡូស៊ីបង្កើតអាជីវកម្មថ្មីផ្លាស់ប្តូរថ្មីច្នៃប្រឌិត បណ្តាអ្នកជំនាញបានស្នើឱ្យអភិវឌ្ឍន៍គំរូសេដ្ឋកិច្ចទិន្នន័យ ដោយបង្កើតយន្តការដើម្បីឱ្យទិន្នន័យត្រូវបានតភ្ជាប់ ទាញយកប្រយោជន៍ និងប្រែក្លាយទៅជាតម្លៃសេដ្ឋកិច្ច បម្រើឱ្យការផ្លាស់ប្តូរថ្មីច្នៃប្រឌិត និងកំណើនចីរភាព។

ការផ្លាស់ប្តូរថ្មីយ៉ាងខ្លាំងក្លានូវកិច្ចការបរទេសប្រជាជន ទៅតាមទិសដៅម្ចាស់ការ បង្កើតអភិវឌ្ឍន៍ ភ្ជាប់ទំនាក់ទំនង និងបម្រើដោយផ្ទាល់នូវភារកិច្ចអភិវឌ្ឍន៍ យុគសម័យ - នាព្រឹកថ្ងៃទី ៥ ខែសីហា នៅរាជធានីហានូយ នៅក្នុងក្របខ័ណ្ឌនៃសន្និសីទការទូតលើកទី ៣៣ ក្រសួងការបរទេសបានរៀបចំកិច្ចប្រជុំពេញអង្គអំពីកិច្ចការបរទេសបក្ស និងកិច្ចការបរទេសប្រជាជន តាមទម្រង់ផ្ទាល់រួមផ្សំជាមួយអនឡាញ ជាមួយបណ្តាខេត្ត និងក្រុងចំនួន ៣៤ នៅទូទាំងប្រទេស ព្រមទាំងបណ្តាស្ថាប័នតំណាងវៀតណាមនៅបរទេស។

ឌឹកអាញ់