វៀតណាម – អេស្ប៉ាញ៖ ពង្រីកពីការផ្លាស់ប្តូរមិត្តភាព ទៅជាការតភ្ជាប់មនុស្សជាតិ ចំណេះដឹង និងមូលដ្ឋាន

ចូលរួមក្នុងមហាសន្និបាតនេះ មានលោក Nguyen Ngoc Hung អនុប្រធានសហភាពបណ្តាអង្គការមិត្តភាពវៀតណាម; លោកស្រី Carmen Cano de Lasala ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រអេស្ប៉ាញប្រចាំនៅវៀតណាម; លោក Nguyen Duc Loi ប្រធានសមាគមមិត្តភាពវៀតណាម – អេស្ប៉ាញ អាណត្តិទី ៣; ព្រមទាំងបណ្តាសមាជិកគណៈអចិន្ត្រៃយ៍ គណៈប្រតិបត្តិនៃសមាគម តំណាងបណ្តាសាខាសមាគមជាសមាជិក សមាជិកសមាជិកាយ៉ាងច្រើនកុះករ និងអស់លោកលោកស្រីដែលផ្សារភ្ជាប់យ៉ាងជិតស្និទ្ធជាមួយសកម្មភាពមិត្តភាពវៀតណាម – អេស្ប៉ាញ។

សមាគមមិត្តភាពវៀតណាម – អេស្ប៉ាញ ចាត់តាំងមហាសន្និបាតតំណាងទូទាំងប្រទេសលើកទី ៤ អាណត្តិ ២០២៦ – ២០៣១។

មហាសន្និបាតបានប្រព្រឹត្តទៅក្នុងខណៈពេលដែលប្រទេសទាំងពីរឆ្ពោះទៅកាន់ការរំលឹកខួប ៥០ ឆ្នាំនៃការបង្កើតទំនាក់ទំនងការទូតនៅឆ្នាំ ២០២៧។ នៅក្នុងបរិបទនោះ កិច្ចការបរទេសប្រជាជនត្រូវបានរំពឹងថានឹងលើកកម្ពស់តួនាទីតភ្ជាប់មនុស្សជាតិ បង្កើនការយល់ដឹង និងពង្រឹងមូលដ្ឋានគ្រឹះសង្គមសម្រាប់ទំនាក់ទំនងទ្វេភាគី។

ថ្លែងមតិបើកអង្គប្រជុំ លោក Nguyen Duc Loi ប្រធានសមាគមអាណត្តិទី ៣ បានជម្រាបជូនថាមហាសន្និបាតមានភារកិច្ចវាយតម្លៃលទ្ធផលការងារក្នុងអាណត្តិកន្លងមក និងកំណត់ទិសដៅសម្រាប់អាណត្តិ ២០២៦ – ២០៣១។ តាមលោក ទំនាក់ទំនងរវាងប្រទេសទាំងពីរកំពុងពង្រីកលើច្រើនវិស័យ បង្កើតលក្ខខណ្ឌអំណោយផលដើម្បីឱ្យសមាគមបន្តផ្លាស់ប្តូរថ្មី និងលើកកម្ពស់តួនាទីជាស្ពានតភ្ជាប់រវាងប្រជាជននៃប្រទេសទាំងពីរ។

មហាសន្និបាតបានផ្តល់សេចក្តីទុកចិត្តបោះឆ្នោតជ្រើសតាំងលោក Nguyen Duc Loi អតីតសមាជិកគណៈកម្មាធិការមជ្ឈិមបក្ស អតីតអគ្គនាយកនៃទីភ្នាក់ងារសារព័ត៌មានវៀតណាម (VNA) អនុប្រធានអចិន្ត្រៃយ៍នៃសមាគមអ្នកសារព័ត៌មានវៀតណាម បន្តកាន់តំណែងជាប្រធានសមាគមមិត្តភាពវៀតណាម – អេស្ប៉ាញ។

តាងនាមគណៈប្រតិបត្តិអាណត្តិទី ៤ លោក Nguyen Duc Loi បានអះអាងថាសមាគមនឹងបន្តវេននូវសមិទ្ធផលដែលមានស្រាប់ ព្រមទាំងផ្លាស់ប្តូរថ្មីនូវខ្លឹមសារ របៀបរបបសកម្មភាព ដើម្បីបង្កើនភាពស្អិតរមួតរវាងប្រជាជននៃប្រទេសទាំងពីរ។

លោក Nguyen Duc Loi អតីតសមាជិកគណៈកម្មាធិការមជ្ឈិមបក្ស អតីតអគ្គនាយកនៃទីភ្នាក់ងារសារព័ត៌មានវៀតណាម (VNA) អនុប្រធានអចិន្ត្រៃយ៍នៃសមាគមអ្នកសារព័ត៌មានវៀតណាម បន្តកាន់តំណែងជាប្រធានសមាគមមិត្តភាពវៀតណាម – អេស្ប៉ាញ។

ពីការផ្លាស់ប្តូរមិត្តភាព ទៅជាការតភ្ជាប់កិច្ចសហប្រតិបត្តិការ

ថ្លែងមតិនៅក្នុងមហាសន្និបាត អនុប្រធានសហភាពបណ្តាអង្គការមិត្តភាពវៀតណាម Nguyen Ngoc Hung បានកត់សម្គាល់នូវការរួមចំណែករបស់សមាគម និងបានលើកឡើងនូវអនុសាសន៍ចំនួន ៥ សម្រាប់អាណត្តិថ្មី។

ជាបឋម សមាគមត្រូវកំណត់សកម្មភាពរបស់ខ្លួនឱ្យស្ថិតនៅក្នុងជារួមនៃខ្សែបន្ទាត់កិច្ចការបរទេសរបស់បក្ស និងរដ្ឋ ព្រមទាំងលើកកម្ពស់ឧត្តមភាពដោយឡែកនៃកិច្ចការបរទេសប្រជាជន៖ នាំទំនាក់ទំនងរវាងប្រទេសទាំងពីរឱ្យកាន់តែកៀកជិតជាមួយប្រជាជន ផ្លាស់ប្តូរបណ្តាក្របខ័ណ្ឌសហប្រតិបត្តិការនៅថ្នាក់ជាតិ ទៅជាការតភ្ជាប់ជាក់ស្តែងរវាងមូលដ្ឋាន សាលារៀន សហគ្រាស អង្គការសង្គម និងប្រជាជននៃប្រទេសទាំងពីរ។

ទីពីរ សមាគមត្រូវផ្លាស់ប្តូរថ្មីនូវខ្លឹមសារ និងរបៀបរបបសកម្មភាព តាមទិសដៅប្រកបដោយវិជ្ជាជីវៈ ជាក់ស្តែង និងមានប្រសិទ្ធភាព; បង្កើនការអនុវត្តបច្ចេកវិទ្យាឌីជីថល ប្រព័ន្ធផ្សព្វផ្សាយទំនើប និងបណ្តាញសង្គម ជាពិសេសគឺដើម្បីឈានទៅរកជំនាន់យុវជន។

ទីបី ព្រឹត្តិការណ៍ជាប្រវត្តិសាស្ត្រសំខាន់ៗនៅក្នុងទំនាក់ទំនងរវាងប្រទេសទាំងពីរ ត្រូវតែត្រូវបានទាញយកផលប្រយោជន៍ ដើម្បីបង្កើតនូវគុណតម្លៃយូរអង្វែង។ ជាមួយនឹងការរំលឹកខួប ៥០ ឆ្នាំនៃការបង្កើតទំនាក់ទំនងការទូតនៅឆ្នាំ ២០២៧ បណ្តាសកម្មភាពគួរតែសំដៅដល់លទ្ធផលជាក់ស្តែង ដូចជា កម្មវិធីសហប្រតិបត្តិការថ្មី បណ្តាញដៃគូ គំនិតផ្តួចផ្តើមយុវជន ការផ្លាស់ប្តូរវប្បធម៌ – អប់រំ ឬការតភ្ជាប់មូលដ្ឋាន។

លោក Nguyen Ngoc Hung អនុប្រធានសហភាពបណ្តាអង្គការមិត្តភាពវៀតណាម។

ទីបួន សមាគមត្រូវពង្រីកពី “ការផ្លាស់ប្តូរមិត្តភាព” ទៅជា “ការតភ្ជាប់កិច្ចសហប្រតិបត្តិការ និងកៀរគរប្រភពធនធានសង្គម”។ បណ្តាញដៃគូត្រូវតែបានពង្រីកទៅកាន់សាកលវិទ្យាល័យ វិទ្យាស្ថានស្រាវជ្រាវ សមាគមអាជីវកម្ម អាជ្ញាធរមូលដ្ឋាន អង្គការសង្គម និងសហគមន៍ជនជាតិវៀតណាមនៅប្រទេសអេស្ប៉ាញ; តាមរយៈនោះ ជំរុញកិច្ចសហប្រតិបត្តិការលើការផ្លាស់ប្តូរបៃតង ការផ្លាស់ប្តូរឌីជីថល ការអប់រំ ការអភិរក្សបេតិកភណ្ឌ ការផ្លាស់ប្តូរយុវជន និងកិច្ចសហប្រតិបត្តិការដែនសមុទ្រ។

ទីប្រាំ សមាគមត្រូវយកចិត្តទុកដាក់ជាពិសេសចំពោះជំនាន់យុវជន និងបណ្តារបៀបរបបតភ្ជាប់ថ្មីៗ។ តាមលោក Nguyen Ngoc Hung ទំនាក់ទំនងវៀតណាម – អេស្ប៉ាញ ក្នុងរយៈពេល ១០ ឆ្នាំ ២០ ឆ្នាំ ឬ ៣០ ឆ្នាំខាងមុខ នឹងអាស្រ័យយ៉ាងច្រើនលើប្រជាជនវ័យក្មេងនៃប្រទេសទាំងពីរ។ ហេតុដូច្នេះហើយ ត្រូវបង្កើតបន្ថែមនូវលំហដើម្បីឱ្យយុវជន និស្សិត អ្នកស្រាវជ្រាវវ័យក្មេង សហគ្រិនវ័យក្មេង និងសិល្បករវ័យក្មេង ជួបជុំ រៀនសូត្រ និងរួមគ្នាអនុវត្តគំនិតផ្តួចផ្តើមនានា។

លោក Nguyen Ngoc Hung រំពឹងទុកថាសមាគមនឹងក្លាយជាគ្រឹះតភ្ជាប់ចំណេះដឹង វប្បធម៌ មនុស្សជាតិ និងកិច្ចសហប្រតិបត្តិការអភិវឌ្ឍន៍រវាងប្រទេសទាំងពីរជាបណ្តើរៗ; ព្រមទាំងជាកន្លែងផ្តួចផ្តើមនូវគំនិតច្នៃប្រឌិត និងទំនាក់ទំនងដៃគូថ្មីៗ។

ពង្រីកមូលដ្ឋានគ្រឹះសង្គមសម្រាប់ទំនាក់ទំនងរវាងប្រទេសទាំងពីរ

លោកស្រី Carmen Cano de Lasala ឯកអគ្គរាជទូតអេស្ប៉ាញប្រចាំនៅវៀតណាម បានវាយតម្លៃថាមហាសន្និបាតតំណាងទូទាំងប្រទេសលើកទី ៤ អាណត្តិ ២០២៦ – ២០៣១ គឺជាព្រឹត្តិការណ៍ដ៏សំខាន់ដែលបើកចេញនូវដំណាក់កាលថ្មីមួយក្នុងការជំរុញកិច្ចសហប្រតិបត្តិការទ្វេភាគី។

លោកស្រី Carmen Cano ឯកអគ្គរដ្ឋទូតអេស្ប៉ាញប្រចាំនៅវៀតណាម។

តាមលោកស្រីឯកអគ្គរាជទូត ទំនាក់ទំនងរវាងប្រទេសទាំងពីរក្នុងរយៈពេលកន្លងមក មានការបោះជំហានអភិវឌ្ឍជាច្រើន។ នាយករដ្ឋមន្ត្រីអេស្ប៉ាញ លោក Pedro Sánchez បានបំពេញទស្សនកិច្ចនៅវៀតណាមកាលពីខែមេសា ឆ្នាំ ២០២៥។ នៅចុងខែកក្កដា ឆ្នាំ ២០២៦ ប្រធានរដ្ឋាភិបាលតំបន់ Catalonia បានបំពេញដំណើរទស្សនកិច្ចនៅប្រទេសវៀតណាម។ ទីក្រុង Barcelona និងទីក្រុងហូជីមិញ បានបង្កើតទំនាក់ទំនងមិត្តភាព និងកិច្ចសហប្រតិបត្តិការ; ប្រទេសទាំងពីរក៏កំពុងសិក្សាអំពីលទ្ធភាពនៃការបង្កើតបន្ថែមនូវទំនាក់ទំនងមិត្តភាពរវាងបណ្តាទីក្រុងនានាផងដែរ។

លោកស្រី Carmen Cano de Lasala បានជម្រាបជូនថា ប្រទេសអេស្ប៉ាញចាត់ទុកវៀតណាមជាប្រទេសប្រកបដោយថាមពល និងពោរពេញដោយសក្តានុពល នៅក្នុងបណ្តាយុទ្ធសាស្ត្រ និងគោលនយោបាយកិច្ចការបរទេសនាពេលខាងមុខ។ កិច្ចសហប្រតិបត្តិការទ្វេភាគីកាន់តែមានភាពសម្បូរបែប ចាប់ពីនយោបាយ ការពារជាតិ សេដ្ឋកិច្ច កសិកម្ម រហូតដល់ការអប់រំ វប្បធម៌ និងទេសចរណ៍។

នៅក្នុងឆ្នាំ ២០២៥ មានភ្ញៀវទេសចរអេស្ប៉ាញចំនួន ១០០.០០០ នាក់បានមកទស្សនាកម្សាន្តនៅប្រទេសវៀតណាម។ បច្ចេកវិទ្យា ការស្រាវជ្រាវ និងការអភិវឌ្ឍ ក៏ជាបណ្តាវិស័យអាទិភាពផងដែរ។ បណ្តាសកម្មភាពផ្លាស់ប្តូរវប្បធម៌ និងសង្គមកាន់តែមានច្រើនឡើង រួមចំណែកបង្កើនការយល់ដឹង និងការតភ្ជាប់រវាងប្រជាជននៃប្រទេសទាំងពីរ។

លោកស្រីឯកអគ្គរាជទូតក៏បានសង្កត់ធ្ងន់អំពីសក្តានុពលនៃការតភ្ជាប់តាមរយៈភាសាអេស្ប៉ាញផងដែរ។ លោកស្រីរំពឹងទុកថា ជនជាតិវៀតណាមដែលស្ទាត់ជំនាញភាសានេះ អាចក្លាយជា “ឯកអគ្គរាជទូត” រួមចំណែកផ្សព្វផ្សាយភាសាអេស្ប៉ាញនៅប្រទេសវៀតណាម។ តាមលោកស្រី ភាសានេះបើកចេញនូវទ្វារឆ្ពោះទៅកាន់បណ្តាញអ្នកប្រើប្រាស់ជាង ៦០០ លាននាក់នៅលើពិភពលោក ព្រមទាំងបង្កើតបន្ថែមនូវឱកាសសហប្រតិបត្តិការ និងការងារធ្វើសម្រាប់ជំនាន់យុវជនវៀតណាម។

ឆ្ពោះទៅកាន់ឆ្នាំ ២០២៧ លោកស្រីឯកអគ្គរាជទូត Carmen Cano de Lasala បានចាត់ទុកថា ការរំលឹកខួប ៥០ ឆ្នាំនៃការបង្កើតទំនាក់ទំនងការទូត គឺជាឱកាសដើម្បីឱ្យភាគីទាំងពីរជំរុញទំនាក់ទំនងរវាងបណ្តាស្ថាប័ន និងអង្គការនានា។ ស្ថានទូតអេស្ប៉ាញប្រចាំនៅវៀតណាម និងសមាគមមិត្តភាពវៀតណាម – អេស្ប៉ាញ អាចបង្កើនការសម្របសម្រួលរៀបចំបណ្តាសកម្មភាពរួមគ្នា។

លោក Nguyen Ngoc Hung អនុប្រធានសហភាពបណ្តាអង្គការមិត្តភាពវៀតណាម ប្រគល់ទង់អនុស្សាវរីយ៍ជូនសមាគមមិត្តភាពវៀតណាម – អេស្ប៉ាញ។

ថ្លែងមតិបិទអង្គប្រជុំ ប្រធានសមាគម លោក Nguyen Duc Loi បានសង្កត់ធ្ងន់ថា សេចក្តីសម្រេចចិត្តនៃមហាសន្និបាតមានអត្ថន័យពិតប្រាកដ លុះត្រាតែត្រូវបានប្រែក្លាយទៅជាសកម្មភាពជាក់ស្តែង។ គណៈប្រតិបត្តិអាណត្តិទី ៤ នឹងធ្វើឱ្យជាក់ស្តែងនូវសេចក្តីសម្រេចចិត្តទៅជាកម្មវិធី និងផែនការការងារ; កំណត់ភារកិច្ចអាទិភាព និងបណ្តាគំនិតផ្តួចផ្តើមដែលមានសមត្ថភាពទាក់ទាញសមាជិក ដៃគូ និងមិត្តភក្តិនៃប្រទេសទាំងពីរ។

ស្មារតីនៃអាណត្តិថ្មីត្រូវបានកំណត់ថា “សាមគ្គីភាពជាងមុនក្នុងការចាត់តាំង ម្ចាស់ការជាងមុនក្នុងការតភ្ជាប់ នវានុវត្តន៍ជាងមុនក្នុងរបៀបធ្វើ និងជាក់ស្តែងជាងមុននៅក្នុងលទ្ធផល”។

បណ្តាទិសដៅនានានៅក្នុងមហាសន្និបាត បានបង្ហាញឱ្យឃើញថា លំហកិច្ចការបរទេសប្រជាជនវៀតណាម – អេស្ប៉ាញ កំពុងតែពង្រីកពីការផ្លាស់ប្តូរមិត្តភាព ទៅជាការតភ្ជាប់មនុស្សជាតិ ចំណេះដឹង មូលដ្ឋាន និងបណ្តាប្រភពធនធានសង្គម។ នេះគឺជាមូលដ្ឋានដើម្បីឱ្យសមាគមបន្តលើកកម្ពស់តួនាទីជាស្ពានតភ្ជាប់ បង្កើនការយល់ដឹង ទំនុកចិត្ត និងបង្កើតមូលដ្ឋានគ្រឹះសង្គមសម្រាប់ទំនាក់ទំនងរវាងប្រទេសទាំងពីរ៕

ស្ថានទូតវៀតណាមប្រចាំនៅអេស្ប៉ាញ រុស្ស៊ី បារាំងនិងហ្វាំងឡង់បានត្រៀមគាំពារប្រជាពលរដ្ឋចំពោះមុខការរីករាលដាលនៃជម្ងឺ Covid-19 យុគសម័យ - ក្នុងបរិបទនៃការផ្ទុះឡើងនូវជំងឺកូវីដ១៩ដ៏ស្មុគស្មាញនោះ ស្ថានទូតវៀតណាមប្រចាំនៅអេស្ប៉ាញ បារាំង រុស្ស៊ី និងហ្វាំងឡង់បានបង្កើតនូវទម្រង់នៃការជូនដំណឹងនិងផ្សព្វផ្សាយជាប្រចាំដល់សហគមន៍បងប្អូនប្រជាពលរដ្ឋវៀតណាមដែលកំពុងរស់នៅ ធ្វើការនិងសិក្សានៅប្រទេសម្ចាស់ផ្ទះអំពីគោលនយោបាយរបស់រដ្ឋាភិបាលវៀតណាម ព្រមទាំងតាមដានតាមសេចក្តីណែនាំរបស់ស្ថានទូតនិងប្រទេសម្ចាស់ផ្ទះនិងលើកទឹកចិត្តប្រជាពលរដ្ឋឱ្យគោរពតាមការណែនាំរបស់រដ្ឋាភិបាលម្ចាស់ផ្ទះផងដែរ ។

ព្រះមហាក្សត្រអេស្ប៉ាញសំដែងការចាប់អារម្មណ៍ចំពោះភាពជោគជ័យរបស់វៀតណាមក្នុងការបង្ការនិងទប់ស្កាត់ជំងឺរាតត្បាតកូវីឌ១៩ យុគសម័យ - នាថ្ងៃទី ១៧ ខែមិថុនាឆ្នាំ ២០២០ នៅព្រះបរមរាជវាំង Zarzuele នៅទីក្រុងម៉ាឌ្រីត ប្រទេសអេស្ប៉ាញ ឯកអគ្គរដ្ឋទូតវៀតណាមប្រចាំនៅប្រទេសអេស្ប៉ាញលោក Hoang Xuan Hai បានអញ្ជើញជូនសារតាំងទៅព្រះមហាក្សត្រអេស្ប៉ាញ Felipe VI ។

វ៉ាន់ណាំ

thoidai.com.vn