Karate-do តភ្ជាប់សហគមន៍ជនជាតិវៀតណាមនៅជប៉ុន

ការប្រកួតត្រូវបានរៀបចំឡើងដោយសមាគម Karate-do ជនជាតិវៀតណាមនៅជប៉ុន (KAVIJA) ចំណុះអង្គការប្រាស្រ័យទាក់ទងអន្តរជាតិវៀតណាម ជប៉ុន (FAVIJA) ក្រោមការឧបត្ថម្ភគាំទ្រពីស្ថានទូតវៀតណាមប្រចាំនៅជប៉ុន។

អត្តពលិកមិនអាជីពជាង ១០០ នាក់ មកពីក្លឹប Karate-do ចំនួន ៦ របស់ជនជាតិវៀតណាមនៅតាមតំបន់នានាដូចជា Tokyo, Saitama, Yokohama, Osaka, Fukuoka... បានចូលរួមប្រកួតប្រជែងលើវិញ្ញាសាចំនួន ១៦ ក្នុងនោះមាន Kata ខ្សែក្រវាត់ខ្មៅ, Kata ជាក្រុម, Kumite ខ្សែក្រវាត់ខ្មៅ, Kumite ជាក្រុម...

បន្ទាប់ពីការប្រកួតប្រជែងយ៉ាងស្វិតស្វាញ និងរស់រវើករយៈពេលមួយថ្ងៃ គណៈកម្មការរៀបចំការប្រកួតបានប្រគល់រង្វាន់ជូនដល់បណ្តាអត្តពលិក និងសមូហភាពដែលមានស្នាដៃឆ្នើម។ ក្លឹប Osaka ទទួលបានជ័យលាភីលេខ ១ ទូទាំងក្រុម ក្លឹប Tokyo ទទួលបានចំណាត់ថ្នាក់លេខ ២ និងក្លឹប Fukuoka ទទួលបានជ័យលាភីលេខ ៣។ លទ្ធផលនៃការប្រកួតបានកត់សម្គាល់នូវរាល់ការខិតខំប្រឹងប្រែងរបស់អត្តពលិក គ្រូបង្វឹក និងបណ្តាក្លឹបដែលបានចូលរួម ព្រមទាំងបង្ហាញឱ្យឃើញថា ចលនាហ្វឹកហាត់កីឡា Karate-do នៅក្នុងសហគមន៍ជនជាតិវៀតណាមនៅជប៉ុនកាន់តែមានការរីកចម្រើនឡើង។

បណ្តាអត្តពលិកមកពីក្លឹប Karate-do ចំនួន ៦ របស់ជនជាតិវៀតណាមបានចូលរួមប្រកួតប្រជែងនៅក្នុងព្រឹត្តិការណ៍នេះ។

អញ្ជើញចូលរួមពិធីបើក និងលើកទឹកចិត្តដោយផ្ទាល់ដល់បណ្តាអត្តពលិក លោក Luu Duc Quang ទីប្រឹក្សាស្ថានទូតវៀតណាមប្រចាំនៅជប៉ុន បានវាយតម្លៃខ្ពស់ចំពោះការខិតខំប្រឹងប្រែងរបស់គណៈកម្មការរៀបចំការប្រកួត បណ្តាក្លឹប សាលាគុន គ្រូបង្វឹក អាជ្ញាកណ្តាល អ្នកស្ម័គ្រចិត្ត និងបណ្តាអង្គភាពដៃគូ ក្នុងការបង្កើតទីលានកីឡាដ៏មានអត្ថន័យមួយសម្រាប់សហគមន៍ជនជាតិវៀតណាមនៅជប៉ុន។

យោងតាមលោក Luu Duc Quang ការប្រកួតនេះមិនត្រឹមតែបង្កើតឱកាសឱ្យបណ្តាសិស្សគុន និងអត្តពលិកបានប្រាស្រ័យទាក់ទង ប្រកួតប្រជែង និងលើកកម្ពស់កម្រិតជំនាញប៉ុណ្ណោះទេ ថែមទាំងជាសកម្មភាពជាក់ស្តែងដើម្បីពង្រឹងភាពស្និទ្ធស្នាលរវាងជនជាតិវៀតណាមដែលកំពុងរស់នៅប្រទេសជប៉ុនផងដែរ។

នៅក្នុងជីវិតឆ្ងាយពីស្រុកកំណើត សកម្មភាពវប្បធម៌ និងកីឡាថែមទាំងបានបង្កើតលំហសម្រាប់ជនជាតិវៀតណាមជួបជុំគ្នា ចែករំលែក លើកទឹកចិត្ត និងជួយគ្នាទៅវិញទៅមក តាមរយៈនោះរួមចំណែកកសាងសហគមន៍ជនជាតិវៀតណាមប្រកបដោយសាមគ្គីភាព ភាពសកម្ម រឹងមាំ និងឆ្ពោះទៅរកគុណតម្លៃវិជ្ជមាននានា។

ក្នុងទស្សនៈជំនាញ លោកគ្រូគុន Kirii Kimihito មកពីសមាគម Karate-do Okinawa សាលាគុន Uechi-ryu និង Ryukyu Kobudo ដែលបានចូលរួមការប្រកួតក្នុងនាមជាទីប្រឹក្សា បានចែករំលែកអំពីប្រវត្តិនៃការកកើត និងការអភិវឌ្ឍរបស់ Karate ក៏ដូចជាការប្រាស្រ័យទាក់ទងគ្នារវាង Karate និងវៀតណាម។

យោងតាមលោកគ្រូគុន Kirii Kimihito កីឡា Karate មានប្រភពមកពី Okinawa បន្ទាប់មកបានអភិវឌ្ឍយ៉ាងទូលំទូលាយនៅប្រទេសជប៉ុន ហើយបានសាយភាយជាបណ្តើរៗទៅកាន់ប្រទេសជាច្រើននៅលើពិភពលោក។ នៅវៀតណាម Karate ត្រូវបានផ្សព្វផ្សាយតាំងពីយូរណាស់មកហើយ ហើយបច្ចុប្បន្នបានក្លាយជាក្បាច់គុនដែលត្រូវបានហ្វឹកហាត់យ៉ាងទូលំទូលាយនៅតាមមូលដ្ឋានជាច្រើន ជាមួយនឹងគ្រប់វ័យ និងបណ្តាសាលាគុនផ្សេងៗគ្នា។

លោកបានឱ្យដឹងថា ខ្លួនលោកផ្ទាល់រួមជាមួយប្រជាជនជប៉ុនជាច្រើន មានក្តីសោមនស្សរីករាយនៅពេលដែលកីឡា Karate ត្រូវបានជនជាតិវៀតណាមនៅជប៉ុនយ៉ាងច្រើនកុះករចូលចិត្ត និងហាត់រៀនកាន់តែខ្លាំងឡើង។ អ្នកចូលរួមមិនត្រឹមតែជាអ្នកដែលមានបទពិសោធន៍ក្បាច់គុនប៉ុណ្ណោះទេ ប៉ុន្តែថែមទាំងមានអ្នកទើបតែចាប់ផ្តើមជាច្រើន ដែលស្ថិតក្នុងវ័យ ភេទ និងមុខរបរផ្សេងៗគ្នា។

យោងតាមលោកគ្រូគុន Kirii Kimihito បណ្តាវគ្គហ្វឹកហាត់ សកម្មភាពប្រាស្រ័យទាក់ទងក្បាច់គុន និងការប្រកួតកីឡា Karate-do នានា កំពុងក្លាយជាលំហមួយនៃការប្រាស្រ័យទាក់ទងវប្បធម៌ រួមចំណែកពង្រឹងការយល់ដឹង និងមនោសញ្ចេតនារវាងប្រជាជនវៀតណាម និងជប៉ុន។

បណ្តាសិស្សគុនប្រកួតប្រជែងលើវិញ្ញាសាប្រកួតនានា។

លោក Nguyen Trung Duc ស្ថាបនិក ប្រធានសមាគម Karate-do ជនជាតិវៀតណាមនៅជប៉ុន ព្រមទាំងជាប្រធានគណៈកម្មការរៀបចំការប្រកួត បានយល់ឃើញថា ការរៀនក្បាច់គុនមិនត្រឹមតែដើម្បីលើកកម្ពស់សុខភាពប៉ុណ្ណោះទេ ប៉ុន្តែថែមទាំងឆ្ពោះទៅរកការបណ្តុះបណ្តាលបុគ្គលិកលក្ខណៈ ស្មារតីវិន័យ និងគុណធម៌សីលធម៌ផងដែរ។ «ការរៀនក្បាច់គុន ក៏ជាការរៀនធ្វើជាមនុស្ស» គឺជាគុណតម្លៃមួយក្នុងចំណោមគុណតម្លៃនានាដែល KAVIJA មានបំណងចង់បញ្ជូនទៅកាន់បណ្តាសិស្សគុន។

យោងតាមលោក Nguyen Trung Duc ការប្រកួតទូទាំងប្រទេសត្រូវបានរៀបចំឡើងជារៀងរាល់ឆ្នាំដោយ KAVIJA ក្នុងគោលបំណងបង្កើតលក្ខខណ្ឌឱ្យបណ្តាអត្តពលិកបានប្រាស្រ័យទាក់ទង ផ្លាស់ប្តូរបទពិសោធន៍ និងលើកកម្ពស់កម្រិតជំនាញវិជ្ជាជីវៈ។ តាមរយៈការប្រកួតនានា KAVIJA ក៏ឆ្ពោះទៅរកការស្វែងរកបុគ្គលដែលមានសមត្ថភាព ដើម្បីបន្តចូលរួមការប្រកួតដែលមានទ្រង់ទ្រាយធំជាងនេះនៅជប៉ុន និងលើឆាកអន្តរជាតិ។

ចលនា Karate-do របស់ជនជាតិវៀតណាមនៅជប៉ុន បច្ចុប្បន្នមិនត្រឹមតែកម្រិតនៅក្នុងការប្រកួតប៉ុណ្ណោះទេ។ លោក Do Quang Ba ប្រធាន FAVIJA បានឱ្យដឹងថា នៅទូទាំងប្រទេសជប៉ុន បច្ចុប្បន្នមានក្លឹប Karate-do ចំនួន ២០ របស់ជនជាតិវៀតណាម ជាមួយនឹងសិក្ខាកាមជាង ២ ពាន់នាក់ ដែលស្ថិតក្នុងវ័យផ្សេងៗគ្នា។

សមាជិកនៃបណ្តាក្លឹបមិនត្រឹមតែជាជនជាតិវៀតណាមដែលកំពុងសិក្សា ធ្វើការនៅប្រទេសជប៉ុនប៉ុណ្ណោះទេ ប៉ុន្តែថែមទាំងមានយុវជនជំនាន់ទីពីរ និងទីបី ដែលកើត និងធំធាត់នៅទីនេះផងដែរ។ វគ្គហ្វឹកហាត់នានាជាធម្មតាប្រព្រឹត្តទៅនៅពេលល្ងាច ថ្ងៃឈប់សម្រាកចុងសប្តាហ៍ ឬក្នុងអំឡុងពេលវិស្សមកាល បង្កលក្ខណៈងាយស្រួលឱ្យសិក្ខាកាមចូលរួមបានជាប្រចាំ។

បណ្តាអត្តពលិកផ្តិតយករូបភាពអនុស្សាវរីយ៍នៅក្នុងការប្រកួត។

ទន្ទឹមនឹងការហ្វឹកហាត់កាយសម្បទា និងក្បាច់គុន បណ្តាសាលាគុន Karate-do របស់ជនជាតិវៀតណាមនៅជប៉ុន កំពុងបោះជំហានក្លាយជាលំហជីវភាពសហគមន៍ ជាទីកន្លែងដែលបណ្តាជំនាន់ជនជាតិវៀតណាមបានជួបជុំ ប្រាស្រ័យទាក់ទង ចែករំលែកបទពិសោធន៍ និងរក្សាភាពស្និទ្ធស្នាលរវាងគ្នា។

ចំពោះយុវជនជំនាន់ក្រោយដែលកើតនៅប្រទេសជប៉ុន សកម្មភាពទាំងនេះថែមទាំងបានបង្កើតឱកាសបន្ថែមទៀតក្នុងការស្វែងយល់ ប្រើប្រាស់ និងថែរក្សាភាសាវៀតណាម ព្រមទាំងខិតជិតនូវគុណតម្លៃវប្បធម៌ប្រពៃណីរបស់ជនជាតិ តាមរយៈការចែករំលែក និងការណែនាំពីបណ្តាជំនាន់រៀមច្បង។

ចេញពីសកម្មភាពកីឡាមួយ Karate-do កំពុងក្លាយជាស្ពានចម្លងមួយក្នុងការផ្សារភ្ជាប់សហគមន៍ជនជាតិវៀតណាមនៅជប៉ុន ព្រមទាំងពង្រីកបន្ថែមទៀតនូវលំហនៃការប្រាស្រ័យទាក់ទងវប្បធម៌រវាងប្រជាជនវៀតណាម និងប្រជាជនជប៉ុន៕

យុវជនអាណិកជនវៀតណាមចំនួន ១០៥ នាក់ចូលរួមជំរុំរដូវក្តៅវៀតណាមឆ្នាំ ២០២៦ យុគសម័យ - ចាប់ពីថ្ងៃទី ១២ ដល់ថ្ងៃទី ២៥ ខែកក្កដា ឆ្នាំ ២០២៦ គណៈកម្មាធិការរដ្ឋទទួលបន្ទុកប្រជាជនវៀតណាមនៅបរទេសនៃក្រសួងការបរទេស បានចាត់តាំងកម្មវិធីជំរុំរដូវក្តៅវៀតណាមឆ្នាំ ២០២៦ ក្រោមប្រធានបទ “ដំណើរបេតិកភណ្ឌ ផ្សារភ្ជាប់ឫសគល់” កម្មវិធីនេះប្រមូលផ្តុំយុវជននិងនិស្សិតវៀតណាមនៅបរទេសចំនួន ១០៥ នាក់ ដែលអញ្ជើញមកពី ៣៥ ប្រទេសនិងតំបន់ដែនដី។

ការបើកជំរុំរដូវក្តៅវៀតណាម ២០២៦៖ ការបណ្តុះនូវក្តីស្រឡាញ់និងមោទនភាពចំពោះស្រុកកំណើត យុគសម័យ - នាថ្នាក់យប់ថ្ងៃទី ១៣ ខែកក្កដា នៅទីក្រុងហាណូយ បានប្រព្រឹត្តទៅពិធីបើកជំរុំរដូវក្តៅវៀតណាម ២០២៦ សម្រាប់យុវជននិងយុវនារីវៀតណាមនៅឯបរទេស។ នេះគឺជាសកម្មភាពប្រចាំឆ្នាំដែលដឹកនាំដោយគណៈកម្មាធិការរដ្ឋទទួលបន្ទុកជនជាតិវៀតណាមនៅឯបរទេសនៃក្រសួងការបរទេស សហការជាមួយនិងបណ្តាក្រសួង ស្ថាប័នព្រមទាំងមូលដ្ឋាននានាចាត់តាំងឡើងក្នុងគោលបំណងផ្សារភ្ជាប់យុវជននិងនិស្សិតវៀតណាមនៅឯបរទេសជាមួយនិងស្រុកកំណើតនិងប្រទេសជាតិ។

វ៉ាន់ណាំ

thoidai.com.vn