ការតភ្ជាប់បញ្ញវន្តវៀតណាមនៅ Kansai ជាមួយបណ្តាគ្រឹះស្ថានស្រាវជ្រាវក្នុងប្រទេស

បណ្តាគណៈប្រតិភូដែលបានចូលរួមក្នុងជំនួបសំណេះសំណាល។

អញ្ជើញចូលរួមក្នុងជំនួបសំណេះសំណាលនេះ រួមមានអនុរដ្ឋមន្ត្រីក្រសួងអប់រំ និងបណ្តុះបណ្តាល លោក Le Quan តំណាងស្ថានទូតវៀតណាមប្រចាំនៅប្រទេសជប៉ុន ថ្នាក់ដឹកនាំ និងតំណាងបណ្តាសាកលវិទ្យាល័យវៀតណាម ព្រមទាំងអ្នកវិទ្យាសាស្ត្រ អ្នកជំនាញការ សាស្ត្រាចារ្យ អ្នកស្រាវជ្រាវ និងនិស្សិតវៀតណាមជាង ៥០ នាក់ ដែលកំពុងសិក្សា ស្រាវជ្រាវ និងបំពេញការងារនៅប្រទេសជប៉ុន។

នៅក្នុងឱកាសនេះ អ្នកវិទ្យាសាស្ត្រ អ្នកជំនាញការ សាស្ត្រាចារ្យ និងនិស្សិតវៀតណាមនៅ Kansai បានផ្លាស់ប្តូរបទពិសោធន៍នៃការសិក្សា ការស្រាវជ្រាវ ការបង្រៀន និងការងារនៅប្រទេសជប៉ុន; ព្រមទាំងបានណែនាំអំពីវិស័យនានាដែលមានសក្តានុពលសហប្រតិបត្តិការជាមួយវៀតណាម ដូចជា វេជ្ជសាស្ត្រ បញ្ញាសិប្បនិម្មិត (AI) បច្ចេកវិទ្យាព័ត៌មាន វិទ្យាសាស្ត្រកុំព្យូទ័រ និងវិទ្យាសាស្ត្រទិន្នន័យ។

ទន្ទឹមនឹងបំណងប្រាថ្នារួមចំណែកដល់មាតុភូមិ គណៈប្រតិភូជាច្រើនរូបក៏បានលើកឡើងនូវបញ្ហាពាក់ព័ន្ធនឹងឱកាស និងបរិយាកាសការងារនៅពេលវិលត្រឡប់ទៅប្រទេសវិញ ជាពិសេសសម្រាប់អ្នកជំនាញការដែលបន្តការសិក្សាស្រាវជ្រាវលើវិស័យស៊ីជម្រៅ និងបច្ចេកវិទ្យាថ្មីៗ ដូចជា បច្ចេកវិទ្យាកង់ទិច និងបញ្ញាសិប្បនិម្មិត។

មតិយោបល់នានាបានយល់ឃើញថា គោលនយោបាយទាក់ទាញ និងពង្រីកធនធានបញ្ញវន្តវៀតណាមនៅក្រៅប្រទេស ចាំបាច់ត្រូវផ្សារភ្ជាប់កាន់តែជិតស្និទ្ធជាមួយតម្រូវការជាក់ស្តែងរបស់បណ្តាសាកលវិទ្យាល័យ វិទ្យាស្ថានស្រាវជ្រាវ និងសហគ្រាសក្នុងស្រុក។ តាមរយៈនោះ អ្នកជំនាញការមានលក្ខខណ្ឌអំណោយផលក្នុងការបញ្ចេញសមត្ថភាពជំនាញបានត្រឹមត្រូវ រក្សាសកម្មភាពស្រាវជ្រាវ និងនាំយកចំណេះដឹងទៅអនុវត្តជាក់ស្តែង។

នៅក្នុងជំនួបសំណេះសំណាល តំណាងបណ្តាសាកលវិទ្យាល័យវៀតណាមបានផ្លាស់ប្តូរយោបល់ដោយផ្ទាល់ជាមួយអ្នកវិទ្យាសាស្ត្រ និងអ្នកជំនាញការនៅ Kansai ដើម្បីស្វែងយល់ពីជំនាញឯកទេស ចំណុចខ្លាំងនៃការស្រាវជ្រាវ និងឈានទៅកំណត់លទ្ធភាពនៃកិច្ចសហប្រតិបត្តិការជំហានដំបូងក្នុងការបណ្តុះបណ្តាល ការស្រាវជ្រាវវិទ្យាសាស្ត្រ និងការអភិវឌ្ឍបច្ចេកវិទ្យា។

ថ្លែងនៅក្នុងកម្មវិធីនេះ អគ្គកុងស៊ុលវៀតណាមប្រចាំនៅទីក្រុងអូសាកា លោក Nguyen Truong Son បានឱ្យដឹងថា Kansai គឺជាមជ្ឈមណ្ឌលដ៏ធំមួយរបស់ប្រទេសជប៉ុនលើផ្នែកឧត្តមសិក្សា ការស្រាវជ្រាវវិទ្យាសាស្ត្រ បច្ចេកវិទ្យា និងនវានុវត្តន៍។

យោងតាមលោក សហគមន៍ជនជាតិវៀតណាមនៅក្នុងតំបន់នេះ ដែលក្នុងនោះរួមមានអ្នកវិទ្យាសាស្ត្រ អ្នកជំនាញការ សាស្ត្រាចារ្យ និងនិស្សិតជាច្រើនរូប គឺជាធនធានមួយដែលចាំបាច់ត្រូវបង្កើនការតភ្ជាប់ និងលើកកម្ពស់ឱ្យមានប្រសិទ្ធភាព។

អនុរដ្ឋមន្ត្រីក្រសួងអប់រំ និងបណ្តុះបណ្តាល លោក Le Quan បានគូសបញ្ជាក់ពីគោលការណ៍ណែនាំរបស់បក្ស និងរដ្ឋ ក្នុងការទាក់ទាញ ជ្រើសរើសប្រើប្រាស់ និងលើកកម្ពស់ធនធានបញ្ញវន្តវៀតណាមនៅក្រៅប្រទេស ព្រមទាំងបានកត់សម្គាល់នូវមតិយោបល់ និងសំណើនានារបស់សហគមន៍អ្នកជំនាញការ អ្នកវិទ្យាសាស្ត្រ និងនិស្សិតនៅ Kansai ផងដែរ។

អគ្គកុងស៊ុល លោក Nguyen Truong Son បានអះអាងថា អគ្គកុងស៊ុលវៀតណាមប្រចាំនៅទីក្រុងអូសាកា នឹងបន្តសហការជាមួយក្រសួងអប់រំ និងបណ្តុះបណ្តាល បណ្តាសាកលវិទ្យាល័យ វិទ្យាស្ថានស្រាវជ្រាវ និងសហគមន៍បញ្ញវន្តវៀតណាមនៅប្រទេសជប៉ុន។

អគ្គកុងស៊ុលនឹងលើកកម្ពស់តួនាទីជាស្ពានចម្លង គាំទ្រការស្វែងរកដៃគូ ជំរុញកិច្ចសហប្រតិបត្តិការក្នុងការបណ្តុះបណ្តាល ការស្រាវជ្រាវវិទ្យាសាស្ត្រ ការផ្លាស់ប្តូរអ្នកជំនាញការ និងការអភិវឌ្ឍបច្ចេកវិទ្យា សំដៅបង្កើតឱ្យចេញជាកម្មវិធី និងគម្រោងសហប្រតិបត្តិការជាក់ស្តែង និងយូរអង្វែង៕

ការប្រកួតកីឡាវាយសីសហគមន៍ជនជាតិវៀតណាមនៅប្រទេសជប៉ុន លើកទី ៣ ឆ្នាំ ២០២៦ យុគសម័យ - ការប្រកួតកីឡាវាយសីសហគមន៍ជនជាតិវៀតណាមនៅប្រទេសជប៉ុន លើកទី ៣ ឆ្នាំ ២០២៦ (រៀបចំឡើងនៅសាលប្រកួតកីឡា Izumi Tachikawa រដ្ឋធានីតូក្យូ) បានទាក់ទាញកីឡាករ កីឡាការិនីជិត ៣០០ នាក់ចូលរួម។

អ្នកជំនាញ បញ្ញវន្តអាណិកជនដោះស្រាយបញ្ហាធំៗអំពីវិទ្យាសាស្ត្រ និងបច្ចេកវិទ្យារបស់ប្រទេសជាតិ យុគសម័យ - នាថ្ងៃទី ១០ ខែសីហា ឆ្នាំ ២០២៦ នៅទីក្រុងហាណូយ គណៈកម្មាធិការរដ្ឋទទួលបន្ទុកជនជាតិវៀតណាមនៅក្រៅប្រទេស – ក្រសួងការបរទេស បានចាត់តាំងសិក្ខាសាលា “កសាង និងអភិវឌ្ឍបណ្តាញអ្នកជំនាញ បញ្ញវន្ត នៅក្នុងបណ្តាវិស័យបច្ចេកវិទ្យាយុទ្ធសាស្ត្រ”។ នៅទីនេះ បណ្តាប្រតិភូបានស្នើបន្តសុក្រឹតភាពបណ្តាយន្តការ គោលនយោបាយ សំដៅបង្កើតលក្ខខណ្ឌងាយស្រួលកាន់តែខ្លាំងក្លាថែមទៀត សម្រាប់ការចូលរួមរបស់អ្នកជំនាញ បញ្ញវន្តអាណិកជន ក្នុងការដោះស្រាយបណ្តាបញ្ហាធំៗ និងភារកិច្ចវិទ្យាសាស្ត្រ បច្ចេកវិទ្យានៅក្នុងប្រទេស។

វ៉ាន់ណាំ