ខេត្តឡាវកាយឧបត្ថម្ភថវិកា ៥ បីលានដុងកសាងសាលារៀននៅខេត្តបកែវ

ថ្នាក់ដឹកនាំនៃខេត្តទាំងពីរ ឡាវកាយ និងបកែវ បានចុះហត្ថលេខាលើកិច្ចព្រមព្រៀងសហប្រតិបត្តិការឆ្នាំ ២០២៦។

ប្រតិភូខេត្តឡាវកាយ ដឹកនាំដោយលោក Hoang Giang អនុលេខាគណៈកម្មាធិការបក្សខេត្ត ប្រធានក្រុមប្រឹក្សាប្រជាជនខេត្ត ជាប្រធានប្រតិភូ។ ប្រតិភូខេត្តបកែវ ដឹកនាំដោយឧត្តមសេនីយ៍ត្រី Penkham Boutchanpheng សមាជិកគណៈកម្មាធិការមជ្ឈិមបក្ស លេខាគណៈកម្មាធិការបក្សខេត្ត ប្រធានក្រុមប្រឹក្សាប្រជាជនខេត្ត ជាប្រធានប្រតិភូ។ អញ្ជើញចូលរួមក្នុងកិច្ចសន្ទនាក៏មានថ្នាក់ដឹកនាំបណ្តាមន្ទីរ និងស្ថាប័នពាក់ព័ន្ធនៃមូលដ្ឋានទាំងពីរ។

នៅក្នុងកិច្ចសន្ទនា ថ្នាក់ដឹកនាំនៃខេត្តទាំងពីរបានជម្រាបជូនគ្នាទៅវិញទៅមកអំពីលទ្ធផលលេចធ្លោក្នុងការអភិវឌ្ឍសេដ្ឋកិច្ច - សង្គម ការពារជាតិ - សន្តិសុខ; វាយតម្លៃលទ្ធផលនៃកិច្ចសហប្រតិបត្តិការនាពេលកន្លងមក និងផ្លាស់ប្តូរទិសដៅនៃការសម្របសម្រួលនាពេលខាងមុខ។

ថ្លែងមតិនៅក្នុងកិច្ចសន្ទនា លោក Hoang Giang បានអះអាងថា ទំនាក់ទំនងមិត្តភាពដ៏អស្ចារ្យ សាមគ្គីភាពពិសេស កិច្ចសហប្រតិបត្តិការគ្រប់ជ្រុងជ្រោយ និងការភ្ជាប់ទំនាក់ទំនងយុទ្ធសាស្ត្រ វៀតណាម - ឡាវ ត្រូវបានថ្នាក់ដឹកនាំ និងប្រជាជននៃប្រទេសទាំងពីរច្រើនជំនាន់ខិតខំប្រឹងប្រែងពូនជ្រុំ។ លើមូលដ្ឋាននៃទំនាក់ទំនងពិសេសរវាងប្រទេសទាំងពីរ ការពង្រឹងកិច្ចសហប្រតិបត្តិការរវាងបណ្តាមូលដ្ឋានមានអត្ថន័យយ៉ាងសំខាន់ ដែលរួមចំណែករឹតបន្តឹងទំនាក់ទំនងរវាងបក្សទាំងពីរ រដ្ឋទាំងពីរ ព្រមទាំងបើកចេញនូវកាលានុវត្តភាពបន្ថែមទៀតនៃកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ អប់រំ វប្បធម៌ និងការផ្លាស់ប្តូរប្រជាជន។

ផ្តល់ព័ត៌មានអំពីស្ថានភាពអភិវឌ្ឍន៍របស់មូលដ្ឋាន លោក Hoang Giang បានឱ្យដឹងថា ខេត្តឡាវកាយទើបតែត្រូវបានបង្កើតឡើងបន្ទាប់ពីការបូកបញ្ចូលគ្នាជាមួយខេត្តយេនបាយ ចាប់ពីថ្ងៃទី ១ ខែកក្កដា ឆ្នាំ ២០២៥។ ខេត្តមានផ្ទៃដីធម្មជាតិជាង ១៣.២០០ គីឡូម៉ែត្រការ៉េ ប្រជាជនជិត ១,៨ លាននាក់ មកពី ៣៤ ជនជាតិ ដោយរក្សាតួនាទីជាស្ពានភ្ជាប់ទំនាក់ទំនងយ៉ាងសំខាន់រវាងវៀតណាម និងតំបន់និរតីនៃប្រទេសចិន តាមរយៈច្រករបៀងសេដ្ឋកិច្ច គុនមិញ - ឡាវកាយ - ហានូយ - ហៃហ្វុង - ក្វាងនិញ។

ក្នុងរយៈពេល ៦ ខែដើមឆ្នាំ ២០២៦ ផលិតផលសរុបក្នុងស្រុកនៃខេត្តឡាវកាយបានកើនឡើង ៩,០១%; ចំណូលថវិការដ្ឋរំពឹងថានឹងលើសពី ១១.០០០ ប៊ីលានដុង។ ខេត្តកំពុងផ្តោតប្រភពធនធានដើម្បីអនុវត្តបណ្តាគម្រោងហេដ្ឋារចនាសម្ព័ន្ធយុទ្ធសាស្ត្រ ដូចជាខ្សែផ្លូវដែក ឡាវកាយ - ហានូយ - ហៃហ្វុង ការពង្រីកផ្លូវល្បឿនលឿន ណូយបាយ - ឡាវកាយ អាកាសយានដ្ឋានសាប៉ា និងបណ្តាស្ថានីយដឹកជញ្ជូន ក្នុងគោលបំណងបង្កើតកម្លាំងចលករសម្រាប់ការអភិវឌ្ឍ ព្រមទាំងពង្រឹងការភ្ជាប់ទំនាក់ទំនងក្នុងស្រុក និងអន្តរជាតិ។

ចំពោះភាគីខេត្តបកែវ ឧត្តមសេនីយ៍ត្រី Penkham Boutchanpheng បានសង្កត់ធ្ងន់ថា ទំនាក់ទំនងមិត្តភាព ឡាវ - វៀតណាម គឺជាទ្រព្យសម្បត្តិមិនអាចកាត់ថ្លៃបាននៃប្រជាជាតិទាំងពីរ ដែលគ្មានអ្វីអាចប្រៀបផ្ទឹម និងចែកផ្តាច់បានឡើយ។ លេខាគណៈកម្មាធិការបក្សខេត្តបកែវក៏បានផ្តល់ព័ត៌មានអំពីស្ថានភាពអភិវឌ្ឍន៍សេដ្ឋកិច្ច - សង្គម កិច្ចការការពារជាតិ - សន្តិសុខនៃមូលដ្ឋាន ព្រមទាំងវាយតម្លៃខ្ពស់ចំពោះប្រសិទ្ធភាពនៃការសម្របសម្រួលរវាងបណ្តាស្ថាប័នជំនាញនៃខេត្តទាំងពីរនាពេលកន្លងមក ជាពិសេសនៅក្នុងវិស័យសន្តិសុខ អប់រំ និងការបណ្តុះបណ្តាល។

ដោយវាយតម្លៃខ្ពស់ចំពោះលទ្ធផលអភិវឌ្ឍន៍របស់ខេត្តបកែវ លោក Hoang Giang បានចាត់ទុកថា ខេត្តមានអត្ថប្រយោជន៍ជាច្រើនអំពីភូមិសាស្ត្រសេដ្ឋកិច្ច ដោយរក្សាតួនាទីជាទ្វារចេញចូលភាគខាងជើងនៃប្រទេសឡាវ ភ្ជាប់ទំនាក់ទំនងជាមួយប្រទេសថៃ ប្រទេសមីយ៉ាន់ម៉ា និងប្រទេសចិន។ ជាមួយនឹងសក្តានុពលអភិវឌ្ឍន៍ពាណិជ្ជកម្ម ការដឹកជញ្ជូន កសិកម្ម ទេសចរណ៍ និងសេដ្ឋកិច្ចព្រំដែន ខេត្តបកែវមានចំណុចដូចគ្នាយ៉ាងច្រើនជាមួយខេត្តឡាវកាយ។ នេះគឺជាលក្ខខណ្ឌអំណោយផលដើម្បីឱ្យភាគីទាំងពីររៀបចំកសាងបណ្តាកម្មវិធីសហប្រតិបត្តិការជាក់ស្តែង សស្របតាមតម្រូវការ និងទិសដៅអភិវឌ្ឍន៍នៅក្នុងដំណាក់កាលថ្មី។

នៅក្នុងក្របខ័ណ្ឌនៃកិច្ចសន្ទនា គណៈកម្មាធិការប្រជាជនខេត្តឡាវកាយ និងគណៈកម្មាធិការរដ្ឋបាលខេត្តបកែវ បានចុះហត្ថលេខាលើកិច្ចព្រមព្រៀងសហប្រតិបត្តិការឆ្នាំ ២០២៦។ ផ្អែកតាមកិច្ចព្រមព្រៀង ភាគីទាំងពីរបានឯកភាពគ្នាបន្តរក្សាសកម្មភាពផ្លាស់ប្តូរប្រតិភូថ្នាក់ខេត្ត ក្នុងគោលបំណងពង្រឹងការយល់ដឹង ចែករំលែកបទពិសោធន៍គ្រប់គ្រង និងជម្រុញការអនុវត្តបណ្តាកម្មវិធី និងគម្រោងសហប្រតិបត្តិការ។

ខេត្តឡាវកាយនឹងឧបត្ថម្ភថវិកាចំនួន ៥ បីលានដុងដល់ខេត្តបកែវ ដើម្បីកសាងសាលាមធ្យមសិក្សាទុតិយភូមិមួយខ្នងនៅស្រុកហួយសាយ។ គម្រោងនេះមានទុនវិនិយោគសរុបប្រមាណ ១ លានដុល្លារអាមេរិក។ បន្ទាប់ពីកសាងរួចរាល់ សំណង់នេះនឹងមានឈ្មោះថា “សំណង់សហប្រតិបត្តិការមិត្តភាព ឡាវកាយ - បកែវ” ដោយក្លាយជាសញ្ញារូបរូបនៃស្មារតីសាមគ្គីភាព និងកិច្ចសហប្រតិបត្តិការរវាងមូលដ្ឋានទាំងពីរ។

នៅក្នុងវិស័យអប់រំ និងការបណ្តុះបណ្តាល ឆ្នាំសិក្សា ២០២៦-២០២៧ ខេត្តឡាវកាយនឹងទទួលយកសិស្សចំនួន ១៥ នាក់នៃខេត្តបកែវ មកសិក្សាភាសាវៀតណាម មុនពេលចូលសិក្សានៅបណ្តាគ្រឹះស្ថានអប់រំក្នុងខេត្ត។ ខេត្តឡាវកាយក៏នឹងបន្តរៀបចំបណ្តាសកម្មភាពជួបជុំ សួរសុខទុក្ខសិស្សឡាវដែលកំពុងសិក្សានៅមូលដ្ឋាន ក្នុងឱកាសបុណ្យចូលឆ្នាំថ្មីប្រពៃណីរបស់វៀតណាម និងបុណ្យចូលឆ្នាំថ្មីប្រពៃណីប៊ុនពិម៉ៃរបស់ឡាវ ដែលរួមចំណែកពង្រឹងការភ្ជាប់ទំនាក់ទំនង និងការយល់ដឹងរវាងជំនាន់វ័យក្មេងនៃប្រទេសទាំងពីរ។

ភាគីទាំងពីរបានឯកភាពគ្នាពង្រឹងកិច្ចសហប្រតិបត្តិការលើវិស័យការពារជាតិ តាមរយៈបណ្តាសកម្មភាពជួបជុំ ផ្លាស់ប្តូរបទពិសោធន៍រវាងបញ្ជាការដ្ឋានយោធានៃខេត្តទាំងពីរ ដែលរួមចំណែករក្សាយ៉ាងរឹងមាំនូវសន្តិសុខ សណ្តាប់ធ្នាប់ ព្រមទាំងបង្កើតបរិយាកាសស្ថិរភាពបម្រើឱ្យការអភិវឌ្ឍសេដ្ឋកិច្ច - សង្គម។

ក្រៅពីបណ្តាខ្លឹមសារដែលត្រូវបានចុះហត្ថលេខា ថ្នាក់ដឹកនាំនៃមូលដ្ឋានទាំងពីរបានឯកភាពគ្នាបន្តពង្រីកកិច្ចសហប្រតិបត្តិការលើវិស័យកែទម្រង់រដ្ឋបាល បរិវត្តកម្មឌីជីថល ការជម្រុញការវិនិយោគ ពាណិជ្ជកម្ម ការដឹកជញ្ជូន កសិកម្ម ទេសចរណ៍ សុខាភិបាល វប្បធម៌ និងការបណ្តុះបណ្តាលប្រភពធនធានមនុស្ស។

ខេត្តទាំងពីរ ក៏នឹងជម្រុញការផ្លាស់ប្តូររវាងយុវជន និងប្រជាជន; រក្សាយន្តការផ្លាស់ប្តូរជាប្រចាំរវាងបណ្តាមន្ទីរ និងស្ថាប័ន; ពង្រឹងការភ្ជាប់ទំនាក់ទំនង និងកិច្ចសហប្រតិបត្តិការរវាងសហគមន៍អាជីវកម្ម ក្នុងគោលបំណងទាញយកផលប្រយោជន៍យ៉ាងមានប្រសិទ្ធភាពនូវសក្តានុពល និងចំណុចខ្លាំងនៃមូលដ្ឋាននីមួយៗ។

ការចុះហត្ថលេខាលើកិច្ចព្រមព្រៀងសហប្រតិបត្តិការឆ្នាំ ២០២៦ បន្តអះអាងពីប្រពៃណីមិត្តភាពរវាងខេត្តឡាវកាយ និងខេត្តបកែវ ព្រមទាំងបង្ហាញពីការតាំងចិត្តរបស់ថ្នាក់ដឹកនាំនៃមូលដ្ឋានទាំងពីរ ក្នុងការធ្វើឱ្យជាក់ស្តែងនូវបណ្តាទិសដៅនៃកិច្ចសហប្រតិបត្តិការរវាងវៀតណាម និងឡាវ។

កិច្ចព្រមព្រៀងគឺជាបុរេលក្ខខណ្ឌដើម្បីឱ្យខេត្តទាំងពីរពង្រឹងការភ្ជាប់ទំនាក់ទំនង ជួយឧបត្ថម្ភគ្នាទៅវិញទៅមកនៅក្នុងដំណើរការអភិវឌ្ឍ ដែលរួមចំណែកយ៉ាងជាក់ស្តែងទៅក្នុងកិច្ចការពង្រឹងទំនាក់ទំនងមិត្តភាពដ៏អស្ចារ្យ សាមគ្គីភាពពិសេស កិច្ចសហប្រតិបត្តិការគ្រប់ជ្រុងជ្រោយ និងការភ្ជាប់ទំនាក់ទំនងយុទ្ធសាស្ត្រ វៀតណាម - ឡាវ ឱ្យកាន់តែមានប្រសិទ្ធភាព និងចីរភាព៕

ខេត្ត Quang Ninh បង្កើនការតភ្ជាប់ការវិនិយោគនិងទេសចរណ៍ជាមួយតំបន់ Ural នៃប្រទេសរុស្ស៊ី យុគសម័យ - នាថ្ងៃទី ៧ ខែកក្កដា នៅទីក្រុង Yekaterinburg (សហព័ន្ធរុស្ស៊ី) ខេត្ត Quang Ninh បានចាត់តាំងសន្និសីទជំរុញការវិនិយោគ ពាណិជ្ជកម្ម និងទេសចរណ៍ ដោយទាក់ទាញសហគ្រាស សមាគម និងអាជ្ញាធរមូលដ្ឋានយ៉ាងច្រើនកុះករនៃតំបន់ Ural ចូលរួម ព្រឹត្តិការណ៍នេះបានបើកឡើងនូវឱកាសសហប្រតិបត្តិការជាក់ស្តែងជាច្រើន ជាពិសេសគឺនៅក្នុងបណ្តាវិស័យវិនិយោគ ពាណិជ្ជកម្ម និងទេសចរណ៍រវាងមូលដ្ឋានទាំងពីរ។

យុទ្ធនាការ ៥០០ ថ្ងៃយប់នៅខេត្ត Nghe An៖ ប្រមូលបានសំណាកជីវសាស្ត្រចំនួន ១៧.៨៣១ សំណាក យុគសម័យ - ដើម្បីឆ្លើយតបនឹងយុទ្ធនាការ “៥០០ ថ្ងៃយប់បញ្ចប់ការប្រមូលសំណាក ADN សម្រាប់សាច់ញាតិយុទ្ធជនពលីដែលមិនទាន់កំណត់បានអត្តសញ្ញាណ” ក្រោយរយៈពេល ៧ ថ្ងៃនៃការអនុវត្តយុទ្ធនាការខ្ពស់បំផុតក្នុងការប្រមូលសំណាកជីវសាស្ត្រ ADN របស់សាច់ញាតិយុទ្ធជនពលី នគរបាលខេត្ត Nghe An ប្រមូលបានសំណាកជីវសាស្ត្រចំនួន ១៧.៨៣១ សំណាក រួមចំណែកយ៉ាងសំខាន់ទៅក្នុងដំណើរស្វែងរក ប្រមូលផ្តុំ និងកំណត់អត្តសញ្ញាណបណ្តាយុទ្ធជនពលីដែលមិនទាន់បានទទួលស្គាល់អត្តសញ្ញាណនៅឡើយ។

ឌឹកអាញ់

thoidai.com.vn