នៅយប់ថ្ងៃទី ១១ ខែមីនា នៅរាជធានីភ្នំពេញ បានប្រព្រឹត្តទៅកម្មវិធីជួបសំណេះសំណាលរវាងស្ថានទូត ស្ថាប័នអមស្ថានទូត និងធុរកិច្ចវៀតណាម ដែលកំពុងបណ្តាក់ទុន និងធ្វើអាជីវកម្មក្នុងប្រទេសកម្ពុជា ជាមួយអតីតនិស្សិតកម្ពុជាជាង ៤០០ នាក់ដែលធ្លាប់សិក្សានៅប្រទេសវៀតណាម។
អតីតនិស្សិតកម្ពុជានៅវៀតណាមចូលរួមកិច្ចប្រជុំដោយសប្បាយរិករាយ |
អញ្ជើញថ្លែងមតិក្នុងជំនួបនេះ លោក Nguyen Huy Tang ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសង្គមនិយមវៀតណាមប្រចាំព្រះរាជាណាចក្រកម្ពុជា បានសង្កត់ធ្ងន់លើសារៈសំខាន់នៃជំនួបថា “នេះគឺជាជំនួបដ៏មានអត្ថន័យ និងជាឱកាសសម្រាប់អតីតនិស្សិតកម្ពុជា រំលឹកឡើងវិញនូវរយៈពេលភ្ជាប់យ៉ាងជិតស្និទ្ធជាមួយទឹកដី និងប្រជាជនវៀតណាម។ នេះក៏ជាឱកាសមួយសម្រាប់យើង បន្តពង្រឹង និងពង្រីកទំនាក់ទំនងល្អរវាងវៀតណាម និងកម្ពុជា ដែលត្រូវបានពូនជ្រំដោយថ្នាក់ដឹកនាំ និងប្រជាជននៃប្រទេសទាំងពីរ”។
ក្នុងឱកាសនេះ លោក Nguyen Huy Tang ឯកអគ្គរដ្ឋទូត បានស្នើថា ទោះបីក្នុងឋានៈណាក៏ដោយ ក៏អតីតនិស្សិតកម្ពុជាដែលធ្លាប់សិក្សានៅប្រទេសវៀតណាមនឹងក្លាយជាស្ពានតភ្ជាប់ដ៏រឹងមាំក្នុងទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការលើគ្រប់ជ្រុងជ្រោយរវាងកម្ពុជា និងវៀតណាម។ ស្ថានទូតវៀតណាមប្រចាំនៅកម្ពុជា ស្ថាប័នអមស្ថានទូត និងធុរកិច្ចវៀតណាមនៅកម្ពុជា តែងតែរួមដំណើរ ហើយនឹងប្រឹងប្រែងឲ្យអស់ពីសមត្ថភាពដើម្បីជួយគាំទ្រ និងពូនជ្រំទំនាក់ទំនងដ៏ល្អនោះ។
ក្នុងនាមជាអតីតនិស្សិតកម្ពុជានៅវៀតណាម លោក វ៉ាន់ ផល ទីប្រឹក្សាសម្ដេចតេជោ ហ៊ុន សែន នាយករដ្ឋមន្រ្តីកម្ពុជា អនុប្រធានសមាគមមិត្តភាពកម្ពុជា-វៀតណាម អតីតឯកអគ្គរាជទូតកម្ពុជាប្រចាំវៀតណាម បានថ្លែងអំណរគុណយ៉ាងជ្រាលជ្រៅចំពោះបក្ស រដ្ឋ និងប្រជាជនវៀតណាម ដែលតែងតែជួយគាំទ្រកម្ពុជានិយាយរួម និងនិស្សិតកម្ពុជានៅប្រទេសវៀតណាមនិយាយដោយឡែក។ លោក វ៉ាន់ ផល បានបញ្ជាក់ថា អតីតនិស្សិតកម្ពុជានឹងបន្តពង្រីក និងក្លាយជាស្ពានតភ្ជាប់ ផ្សព្វផ្សាយ និងអប់រំឲ្យយុវជនជំនាន់ក្រោយអំពីចំណងសាមគ្គីភាព និងភាពជិតស្និទ្ធរវាងប្រជាជាតិទាំងពីរ៕
មតិពីមិត្តអ្នកអាន