ថៃ៖ ចុងចោទដកកាំភ្លើងបាញ់សម្លាប់ដើមចោទនិងមេធាវី ក្នុងបន្ទប់សវនាការនៅខេត្តចន្ទបុរី

ថៃ៖ ចុងចោទដកកាំភ្លើងបាញ់សម្លាប់ដើមចោទនិងមេធាវី ក្នុងបន្ទប់សវនាការនៅខេត្តចន្ទបុរី។

ហេតុការណ៍ខាងលើបានកើតឡើងកាលពីព្រឹកថ្ងៃអង្គារសប្តាហ៍នេះ នៅពេលចុងចោទឈ្មោះ Thanin Chantratip អាយុ៦៧ឆ្នាំ បានឈ្លោះ​ប្រកែកគ្នានៅក្នុងបន្ទប់សវនាការ ពាក់ព័ន្ធនឹងសំណុំរឿងបញ្ហាដីធ្លីដែលអូសបន្លាយយូរឆ្នាំមកហើយ ជាមួយដើមចោទឈ្មោះ Bancha Porameesanaporn អាយុ៦១ឆ្នាំ។ កំឡុងពេលនោះ លោក Thanin បានដកកាំភ្លើងបាញ់លើលោក Bancha និងគ្នីគ្នា។ ភ្លាមៗលោក Thanin ក៏ត្រូវបានមន្រ្តីប៉ូលិសដែលកំពុងប្រចាំការបាញ់សម្លាប់។ ចំណែកឯ លោក Bancha និងមេធាវីលោកឈ្មោះ Wijai Sukharom អាយុ៥១ឆ្នាំ ដែលត្រូវគេអះអាងថាធ្លាប់ជាមេធាវីរបស់អតីតនាយករដ្ឋមន្រ្តីថៃគឺ លោកស្រី យីងឡាក់ ស៊ីណាវ៉ាត់ នោះ បានបាត់បង់ជីវិតនៅឯមន្ទីរពេទ្យ ខណៈមនុស្សពីរនាក់ទៀតក៏បានរងរបួសផងដែរ។

គួរជម្រាបថា ប៉ុន្មានខែចុងក្រោយនេះ ករណីបាញ់ប្រហារជាច្រើនបានកើតមានឡើង ក្នុងបន្ទប់សវនាការនៃតុលាការនៅប្រទេសថៃ។ កាលពីសប្តាហ៍មុន ជនសង្ស័យគ្រឿងញៀន៣នាក់ ក្នុងនោះមានជនជាតិអាមេរិកម្នាក់ បានរត់គេចខ្លួនចេញពីតុលាការនៅក្រុង Pattaya ប្រទេសថៃ ដោយប្រើកាំភ្លើងនិងកាំបិត មុនពេលត្រូវចាប់ខ្លួនបានមកវិញដោយប៉ូលិសថៃ។ រីឯកាលពីខែតុលាកន្លងទៅនេះ ចៅក្រមថៃម្នាក់​បានទាញកាំភ្លើងបាញ់ចំដើមទ្រូងខ្លួនឯងតែមិនស្លាប់ បន្ទាប់ពីបានសម្រេចលើកលែងទោសឲ្យជនសង្ស័យប៉ុន្មាននាក់ ហើយថ្កោលទោសប្រព័ន្ធយុត្តិធម៌នៅ​ប្រទេសថៃ៕

（ប្រភពព័ត៌មាន: FN）