ការទូតសភាបង្កើតកម្លាំងចលករថ្មីសម្រាប់ទំនាក់ទំនង វៀតណាម - កូតឌីវ័រ

អនុប្រធានអចិន្ត្រៃយ៍គណៈកម្មការការពារជាតិ សន្តិសុខ និងកិច្ចការបរទេសនៃរដ្ឋសភា Vu Hai Ha បានទទួលស្វាគមន៍ប្រធានរដ្ឋសភា Côte d'Ivoire លោក Patrick Achi នៅអាកាសយានដ្ឋានអន្តរជាតិ Noi Bai។

នេះគឺជាដំណើរទស្សនកិច្ចនៅវៀតណាមលើកទីពីររបស់ប្រធានរដ្ឋសភាកូតឌីវ័រក្នុងរយៈពេលបីឆ្នាំ ព្រមទាំងជាលើកដំបូងដែលរដ្ឋសភាកូតឌីវ័ររៀបចំគណៈប្រតិភូសិក្សាស្រាវជ្រាវ ផ្លាស់ប្តូរបទពិសោធន៍ជាមួយរដ្ឋសភាវៀតណាម។

សកម្មភាពនេះបានបង្ហាញពីការយកចិត្តទុកដាក់ខ្ពស់របស់កូតឌីវ័រចំពោះឋានៈ តួនាទីរបស់វៀតណាមជារួម និងរដ្ឋសភាវៀតណាមដោយឡែក ព្រមទាំងធ្វើឱ្យលទ្ធផលនៃការផ្លាស់ប្តូរយោបល់រវាងប្រធានរដ្ឋសភានៃប្រទេសទាំងពីរនៅក្រៅមហាសន្និបាតនៃសហភាពអន្តរសភាលើកទី ១៥២ (IPU-152) នាខែមេសា ឆ្នាំ ២០២៦ នៅតួកគី ក្លាយជាសកម្មភាពជាក់ស្តែង និងបន្តអនុវត្តអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការរវាងរដ្ឋសភានៃប្រទេសទាំងពីរ។

ការទទួលស្វាគមន៍ប្រធានរដ្ឋសភាកូតឌីវ័រមកបំពេញទស្សនកិច្ចផ្លូវការនៅវៀតណាម ក៏សំដៅអនុវត្តមាគ៌ាកិច្ចការបរទេសនៃមហាសន្និបាតទូទាំងប្រទេសលើកទី XIV របស់បក្ស សេចក្តីសម្រេចចិត្តលេខ 06-NQ/TW របស់ការិយាល័យនយោបាយស្តីពីការអនុវត្តមាគ៌ាកិច្ចការបរទេសនៃមហាសន្និបាតទូទាំងប្រទេសលើកទី XIV របស់បក្ស សេចក្តីសម្រេចចិត្តលេខ 59-NQ/TW របស់ការិយាល័យនយោបាយស្តីពីសមាហរណកម្មអន្តរជាតិក្នុងស្ថានភាពថ្មី និងគម្រោង «អភិវឌ្ឍទំនាក់ទំនងរវាងវៀតណាមជាមួយបណ្តាប្រទេសនៅអាហ្វ្រិកដំណាក់កាល ២០២៦-២០៣០ ចក្ខុវិស័យដល់ឆ្នាំ ២០៣៥»។

តាមរយៈនោះ វៀតណាមបន្តជំរុញការពង្រឹងចំណងទាក់ទង បង្កើនទំនុកចិត្តខាងនយោបាយ និងពង្រឹងមូលដ្ឋានគ្រឹះនៃកិច្ចសហប្រតិបត្តិការជាមួយដៃគូសំខាន់ៗនៅអាហ្វ្រិក ដែលក្នុងនោះកូតឌីវ័រគឺជាដៃគូអាទិភាពមួយ។

ជាងកន្លះសតវត្សរ៍នៃការលើកកម្ពស់ទំនាក់ទំនងមិត្តភាព

កូតឌីវ័រដើរតួនាទីយ៉ាងសំខាន់នៅអាហ្វ្រិកខាងលិច និងមានខឿនសេដ្ឋកិច្ចមួយក្នុងចំណោមខឿនសេដ្ឋកិច្ចដែលអភិវឌ្ឍយ៉ាងស្វាហាប់ឈានមុខគេនៅក្នុងតំបន់។

ក្នុងរយៈពេលជាងដប់ឆ្នាំកន្លងមក ប្រទេសនេះបានរក្សាកំណើនក្នុងចំណោមក្រុមប្រទេសដែលមានកំណើនលឿនបំផុតនៅអាហ្វ្រិក ហើយត្រូវបានវាយតម្លៃថាមានបរិយាកាសធុរកិច្ចអំណោយផលគួរសមនៅក្នុងតំបន់។ លើវិស័យកិច្ចការបរទេស កូតឌីវ័រផ្តល់អាទិភាពដល់ការទូតសេដ្ឋកិច្ច ទាក់ទាញធនធានពីខាងក្រៅដើម្បីបម្រើការអភិវឌ្ឍ និងពង្រឹងតួនាទីជាក្បាលម៉ាស៊ីនសេដ្ឋកិច្ចនៅអាហ្វ្រិកខាងលិច។

គិតចាប់តាំងពីការបង្កើតទំនាក់ទំនងការទូតនៅឆ្នាំ ១៩៧៥ មក វៀតណាម និងកូតឌីវ័រ បានរួមគ្នាកសាងទំនាក់ទំនងលើមូលដ្ឋាននៃការគោរពគ្នាទៅវិញទៅមក មិត្តភាព និងកិច្ចសហប្រតិបត្តិការប្រកបដោយប្រសិទ្ធភាព។ ប្រទេសទាំងពីរមានចំណុចស្រដៀងគ្នាជាច្រើនអំពីប្រវត្តិសាស្ត្រតស៊ូដណ្តើមឯករាជ្យ និងរួមគ្នាចែករំលែកនូវសេចក្តីប្រាថ្នាសន្តិភាព ការអភិវឌ្ឍ។

ប៉ុន្មានឆ្នាំចុងក្រោយនេះ ទំនាក់ទំនងទ្វេភាគីបន្តរក្សាបាននូវសន្ទុះអភិវឌ្ឍន៍ជាវិជ្ជមាន។ ភាគីទាំងពីរសម្រេចបាននូវជំហានរីកចម្រើនជាច្រើនក្នុងការសន្ទនានយោបាយ កិច្ចសហប្រតិបត្តិការសេដ្ឋកិច្ច និងការសម្របសម្រួល គាំទ្រគ្នាទៅវិញទៅមកនៅលើវេទិកាអន្តរជាតិនានា ជាពិសេសគឺអង្គការសហប្រជាជាតិ សហគមន៍និយាយភាសាបារាំង និងចលនាមិនចូលបក្ខសម្ព័ន្ធ។

ទោះបីជាមានចម្ងាយភូមិសាស្ត្រឆ្ងាយពីគ្នាក៏ដោយ ទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ ត្រូវបានពង្រឹងឥតឈប់ឈរលើបណ្តាញជាច្រើន ដែលក្នុងនោះកិច្ចសហប្រតិបត្តិការសភាកាន់តែដើរតួនាទីលេចធ្លោ។

មុនឆ្នាំ ២០២៣ រដ្ឋសភានៃប្រទេសទាំងពីរជាចម្បងជួបប្រាស្រ័យទាក់ទងគ្នានៅតាមវេទិកាសភាវេទិកាពហុភាគី ដូចជាសហភាពអន្តរសភា (IPU) និងសភាសហព័ន្ធនិយាយភាសាបារាំង (APF)។

គិតចាប់ពីក្រោយពេលអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការត្រូវបានចុះហត្ថលេខានៅខែមិថុនា ឆ្នាំ ២០២៣ ទំនាក់ទំនងរវាងរដ្ឋសភាវៀតណាម និងរដ្ឋសភាកូតឌីវ័រ មានការអភិវឌ្ឍកាន់តែសកម្មជាងមុន ជាមួយនឹងសកម្មភាពផ្លាស់ប្តូរគណៈប្រតិភូ និងការជួបប្រាស្រ័យជាន់ខ្ពស់ប្រព្រឹត្តទៅជាប្រចាំ។

ទំនាក់ទំនងដ៏ល្អប្រសើររវាងស្ថាប័ននីតិប្បញ្ញត្តិទាំងពីរបានរួមចំណែកពង្រឹងទំនុកចិត្តខាងនយោបាយ ជំរុញកិច្ចសហប្រតិបត្តិការសេដ្ឋកិច្ចទ្វេភាគី បង្កើនការតភ្ជាប់រវាងបណ្តាក្រសួង ស្ថាប័ន និងសហគមន៍ធុរកិច្ច តាមរយៈនោះគាំទ្រប្រទេសទាំងពីរក្នុងការធ្វើឱ្យគោលដៅអភិវឌ្ឍន៍នានានៅក្នុងយុគសម័យថ្មីក្លាយជាការពិតជាក់ស្តែង។

លំហធំធេងសម្រាប់ពាណិជ្ជកម្ម និងការវិនិយោគ

មូលដ្ឋានគ្រឹះនៃមិត្តភាព និងទំនុកចិត្តខាងនយោបាយបានបង្កលក្ខណៈអំណោយផលដើម្បីវៀតណាម និងកូតឌីវ័របន្តពង្រីកកិច្ចសហប្រតិបត្តិការសេដ្ឋកិច្ច។

នៅឆ្នាំ ២០២៥ កូតឌីវ័រគឺជាដៃគូពាណិជ្ជកម្មធំបំផុតរបស់វៀតណាមនៅអាហ្វ្រិក។ ទំហំពាណិជ្ជកម្មទ្វេទិសសម្រេចបានជិត ២ ពាន់លានដុល្លារអាមេរិក កើនឡើងជិត ៥០% បើធៀបនឹងឆ្នាំ ២០២៣។

ទន្ទឹមនឹងពាណិជ្ជកម្ម ប្រទេសទាំងពីរនៅមានសក្តានុពលកិច្ចសហប្រតិបត្តិការជាច្រើននៅក្នុងវិស័យផ្សេងៗទៀត ជាពិសេសគឺការធ្វើអាជីវកម្មរ៉ែ និងប្រេងឧស្ម័ន។

បច្ចុប្បន្ន សហគមន៍ជនជាតិវៀតណាមនៅកូតឌីវ័រមានប្រមាណ ៣០០ នាក់។ រដ្ឋាភិបាលកូតឌីវ័របានយល់ព្រមផ្តល់វិញ្ញាបនបត្រដើម្បីឱ្យសមាគមជនជាតិវៀតណាមនៅកូតឌីវ័រធ្វើសកម្មភាពដោយស្របច្បាប់។

បង្កើតជំហានអភិវឌ្ឍន៍ថ្មីសម្រាប់ទំនាក់ទំនងទ្វេភាគី

ដំណើរទស្សនកិច្ចផ្លូវការនៅវៀតណាមរបស់ប្រធានរដ្ឋសភានៃសាធារណរដ្ឋកូតឌីវ័រ Patrick Achi គឺជាព្រឹត្តិការណ៍ដ៏សំខាន់មួយនៅក្នុងទំនាក់ទំនងមិត្តភាពដែលមានប្រវត្តិជាងកន្លះសតវត្សរ៍រវាងប្រទេសទាំងពីរ។

តាមរយៈដំណើរទស្សនកិច្ចនេះ ការទូតសភាបន្តពង្រីកតួនាទីជាសសរស្តម្ភដ៏សំខាន់មួយនៃទំនាក់ទំនងទ្វេភាគី រួមចំណែកធ្វើឱ្យកាន់តែស៊ីជម្រៅថែមទៀតនូវទំនុកចិត្តខាងនយោបាយ និងបង្កើតបន្ថែមនូវកម្លាំងចលករសម្រាប់កិច្ចសហប្រតិបត្តិការសេដ្ឋកិច្ច។

នេះក៏ជាមូលដ្ឋានដើម្បីទំនាក់ទំនង វៀតណាម - កូតឌីវ័រ បន្តអភិវឌ្ឍតាមទិសដៅកាន់តែស៊ីជម្រៅ ជាក់ស្តែង និងប្រកបដោយប្រសិទ្ធភាព បង្កើតជាគ្រឹះស្ថានរឹងមាំដើម្បីប្រទេសទាំងពីររួមគ្នាឈានចូលដំណាក់កាលអភិវឌ្ឍន៍ថ្មី៕

ការទូតដំបូងបង្អស់ដាស់សន្ទុះអំណាចទន់៖ នៅពេលរូបភាពវៀតណាមរីកសាយភាយតាមរយៈបទពិសោធន៍នៃជីវភាពប្រចាំថ្ងៃ យុគសម័យ - ក្នុងកម្មវិធីបំពេញទស្សនកិច្ចផ្លូវរដ្ឋនៅវៀតណាម ក្រៅពីបណ្តាសកម្មភាពពិធីការ និងការពិភាក្សាជាផ្លូវការ ប្រធានាធិបតីកូរ៉េខាងត្បូង លោក Lee Jae Myung និងភរិយា បានជ្រើសរើសយកការចូលរួមដោយផ្ទាល់ទៅក្នុងចង្វាក់នៃជីវភាពរស់នៅប្រចាំថ្ងៃរបស់ប្រជាជនទីក្រុងហាណូយ។

ការទូតប្រជាជនក្នុងយុគសម័យថ្មី៖ ពីគោលការណ៍របស់បក្ស ទៅកាន់ដំណោះស្រាយទម្លុះទម្លាយ និងលើកកម្ពស់ប្រសិទ្ធភាពជាក់ស្តែង យុគសម័យ - នាថ្ងៃទី ១៤ ខែឧសភា នៅទីក្រុង Ha Noi សហភាពបណ្ដាអង្គការមិត្តភាពវៀតណាម បានសហការជាមួយក្រសួងការបរទេស រៀបចំសិក្ខាសាលាវិទ្យាសាស្ត្រក្រោមប្រធានបទ «ការទូតប្រជាជនក្នុងយុគសម័យថ្មី៖ ពីគោលការណ៍របស់បក្ស ទៅកាន់ដំណោះស្រាយទម្លុះទម្លាយ និងលើកកម្ពស់ប្រសិទ្ធភាពជាក់ស្តែង»។

វ៉ាន់ណាំ