ធនធានមនុស្សជំនាញទទួលបន្ទុកសន្តិសុខតាមប្រព័ន្ធអ៊ីនធឺណិត អាចទទួលបានការឧបត្ថម្ភបន្ថែមរហូតដល់ ៣០០% នៃកម្រិតប្រាក់បៀវត្ស

ធនធានមនុស្សជំនាញទទួលបន្ទុកសន្តិសុខតាមប្រព័ន្ធអ៊ីនធឺណិត អាចទទួលបានការឧបត្ថម្ភបន្ថែមរហូតដល់ ៣០០% នៃកម្រិតប្រាក់បៀវត្ស។

អនុក្រឹត្យលេខ 329/2026/NĐ-CP មាន ៤ ជំពូក ២១ មាត្រា ដោយកំណត់អំពីការចាត់តាំង សកម្មភាព ការសម្របសម្រួល ការចលនាចូលរួមការពារសន្តិសុខតាមប្រព័ន្ធអ៊ីនធឺណិត គោលនយោបាយអនុគ្រោះ ការទាក់ទាញធនធានមនុស្សដែលមានទេពកោសល្យចំពោះកងកម្លាំងជំនាញទទួលបន្ទុកការពារសន្តិសុខតាមប្រព័ន្ធអ៊ីនធឺណិត និងការទទួលខុសត្រូវក្នុងការចាត់តាំងអនុវត្ត។

យោងតាមជំពូកទី III នៃអនុក្រឹត្យ គោលនយោបាយអនុគ្រោះ និងការទាក់ទាញធនធានមនុស្សដែលមានទេពកោសល្យ ត្រូវបានអនុវត្តចំពោះបុគ្គលដែលកំពុងស្ថិតនៅក្នុងកងកម្លាំងជំនាញទទួលបន្ទុកការពារសន្តិសុខតាមប្រព័ន្ធអ៊ីនធឺណិត និងបុគ្គលដែលមិនទាន់ស្ថិតនៅក្នុងកងកម្លាំងនេះ ប៉ុន្តែត្រូវបានពិចារណាជ្រើសរើស ទទួលយក ចាត់តាំង ប្រើប្រាស់ ឬចុះកិច្ចសន្យាដើម្បីចូលរួមបំពេញភារកិច្ច។

ការអនុវត្តប្រាក់បៀវត្ស ប្រាក់ឈ្នួល ប្រាក់បំណាច់ ការឧបត្ថម្ភបន្ថែម ប្រាក់ចំណូល និងបណ្តាគោលនយោបាយផ្សេងៗទៀត ត្រូវបានអនុវត្តតាមទម្រង់នៃការជ្រើសរើស ការទទួលយក ការចាត់តាំង ការប្រើប្រាស់ ឬការចុះកិច្ចសន្យា ដោយធានាមិនឱ្យមានភាពត្រួតស៊ីគ្នានៃរបប គោលនយោបាយ និងស្របតាមប្រភពថវិកាស្របច្បាប់។

ធានាឱ្យចំមុខសញ្ញា ផ្សារភ្ជាប់ជាមួយកម្រិតនៃការលះបង់

អនុក្រឹត្យបានកំណត់ថា ការអនុវត្តគោលនយោបាយត្រូវតែចំមុខសញ្ញា លក្ខណៈវិនិច្ឆ័យ ស្តង់ដារ លក្ខខណ្ឌ សមត្ថកិច្ច និងបទប្បញ្ញត្តិនៃច្បាប់ ស្របតាមមុខតំណែងការងារ គោរមងារ តួនាទី លក្ខណៈនៃភារកិច្ច កម្រិតនៃការលះបង់ លទ្ធផលនៃការអនុវត្តភារកិច្ច និងតម្រូវការកសាង អភិវឌ្ឍកងកម្លាំងជំនាញទទួលបន្ទុកការពារសន្តិសុខតាមប្រព័ន្ធអ៊ីនធឺណិត។

ដំណើរការអនុវត្តត្រូវតែធានាភាពចំហ តម្លាភាព វត្ថុបំណង យុត្តិធម៌ ប្រសិទ្ធភាព ព្រមទាំងផ្សារភ្ជាប់ជាមួយតម្រូវការការពារការសម្ងាត់រដ្ឋ សន្តិសុខតាមប្រព័ន្ធអ៊ីនធឺណិត សន្តិសុខទិន្នន័យ សន្តិសុខព័ត៌មានបណ្តាញ និងការការពារនយោបាយផ្ទៃក្នុង។

ការបន្តអនុវត្ត ការកែសម្រួល ការពន្យារពេល ការផ្អាកជាបណ្តោះអាសន្ន ឬការបញ្ចប់គោលនយោបាយ គឺផ្អែកលើលទ្ធផលនៃការត្រួតពិនិត្យ វាយតម្លៃតាមកាលកំណត់ ឬនៅពេលមានការផ្លាស់ប្តូរអំពីមុខតំណែងការងារ ភារកិច្ច ការរៀបចំក្បាលម៉ាស៊ីន ក្របខ័ណ្ឌបុគ្គលិក ឬលក្ខខណ្ឌនៃការអនុវត្ត។

គោលនយោបាយនឹងមិនត្រូវបានអនុវត្ត ឬត្រូវបញ្ចប់ចំពោះករណីដែលលែងឆ្លើយតបបានតាមលក្ខណៈវិនិច្ឆ័យ ស្តង់ដារ លក្ខខណ្ឌ ល្មើសច្បាប់ ល្មើសនឹងបទប្បញ្ញត្តិស្តីពីការការពារការសម្ងាត់រដ្ឋ សន្តិសុខតាមប្រព័ន្ធអ៊ីនធឺណិត សន្តិសុខទិន្នន័យ សន្តិសុខព័ត៌មានបណ្តាញ ឬកំពុងស្ថិតក្រោមការពិចារណាដោះស្រាយវិន័យ កំពុងអនុវត្តទណ្ឌកម្មវិន័យ លើកលែងតែករណីដែលច្បាប់មានកំណត់ផ្សេងពីនេះ។

កម្រិតឧបត្ថម្ភបន្ថែមប្រចាំខែចំនួន ៣

មាត្រា ១៦ នៃអនុក្រឹត្យបានកំណត់ថា បុគ្គលដែលត្រូវបានជ្រើសរើស ទទួលយក ចាត់តាំង ប្រើប្រាស់ ប្រគល់ភារកិច្ច ឬចុះកិច្ចសន្យាដើម្បីបំពេញភារកិច្ចក្នុងកងកម្លាំងជំនាញទទួលបន្ទុកការពារសន្តិសុខតាមប្រព័ន្ធអ៊ីនធឺណិត ទទួលបានប្រាក់បៀវត្ស ប្រាក់ឈ្នួល ប្រាក់បំណាច់ ប្រាក់ឧបត្ថម្ភ ការគាំទ្រ និងរបបផ្សេងៗទៀតតាមបទប្បញ្ញត្តិនៃច្បាប់ ស្របតាមទម្រង់នៃការប្រើប្រាស់ មុខតំណែងការងារ គោរមងារ តួនាទី លក្ខណៈនៃភារកិច្ច និងលទ្ធផលនៃការអនុវត្តភារកិច្ច។

ចំពោះបុគ្គលដែលស្ថិតក្នុងក្របខ័ណ្ឌនៃកងកម្លាំងជំនាញទទួលបន្ទុកការពារសន្តិសុខតាមប្រព័ន្ធអ៊ីនធឺណិត ឬស្ថិតក្នុងចំណាត់ថ្នាក់ទទួលបានការអនុគ្រោះ និងទាក់ទាញធនធានមនុស្សដែលមានទេពកោសល្យ ក្រៅពីប្រាក់បៀវត្ស ប្រាក់ឧបត្ថម្ភ និងរបបផ្សេងៗទៀតតាមបទប្បញ្ញត្តិ អាចត្រូវបានពិចារណាឱ្យទទួលបាននូវកម្រិតឧបត្ថម្ភបន្ថែមប្រចាំខែមួយក្នុងចំណោមកម្រិតទាំងបី។

កម្រិតទី ១ អតិបរមាស្មើនឹង ១០០% នៃកម្រិតប្រាក់បៀវត្ស ផ្អែកតាមមេគុណប្រាក់បៀវត្សដែលកំពុងទទួលបានបច្ចុប្បន្ន អនុវត្តចំពោះករណីអនុវត្តភារកិច្ចជំនាញ បច្ចេកទេសក្នុងកងកម្លាំងជំនាញទទួលបន្ទុកការពារសន្តិសុខតាមប្រព័ន្ធអ៊ីនធឺណិត ដែលមានតម្រូវការអំពីកម្រិតវិជ្ជាជីវៈ ជំនាញ និងលទ្ធផលការងារ ប៉ុន្តែមិនស្ថិតនៅក្នុងករណីកម្រិតទី ២ និងកម្រិតទី ៣ ឡើយ។

កម្រិតទី ២ អតិបរមាស្មើនឹង ២០០% នៃកម្រិតប្រាក់បៀវត្ស ផ្អែកតាមមេគុណប្រាក់បៀវត្សដែលកំពុងទទួលបានបច្ចុប្បន្ន សម្រាប់បុគ្គលដែលអនុវត្តដោយផ្ទាល់នូវភារកិច្ចនានាស្ថិតក្នុងវិស័យសេនាធិការយុទ្ធសាស្ត្រស្តីពីការការពារសន្តិសុខតាមប្រព័ន្ធអ៊ីនធឺណិត ឬគម្រោងបច្ចេកវិទ្យាយុទ្ធសាស្ត្រ ភារកិច្ចដែលទាមទារកម្រិតជំនាញ បច្ចេកទេសស៊ីជម្រៅ ការរៀបចំការហ្វឹកហ្វឺន និងបណ្តុះបណ្តាលស្តីពីការការពារសន្តិសុខតាមប្រព័ន្ធអ៊ីនធឺណិត។

កម្រិតនេះក៏ត្រូវបានអនុវត្តផងដែរចំពោះបុគ្គលដែលប្រយុទ្ធប្រឆាំងដោយផ្ទាល់ចំពោះសកម្មភាពប្រើប្រាស់លំហអ៊ីនធឺណិតប៉ះពាល់ដល់សន្តិសុខជាតិ ចារកម្មតាមប្រព័ន្ធអ៊ីនធឺណិត អំពើភេរវកម្មតាមប្រព័ន្ធអ៊ីនធឺណិត សង្គ្រាមតាមប្រព័ន្ធអ៊ីនធឺណិត ឧក្រិដ្ឋកម្មតាមប្រព័ន្ធអ៊ីនធឺណិត ការកសាង និងដាក់ឱ្យអនុវត្តនូវនីតិវិធីជំនាញសំខាន់ៗដែលមានតម្រូវការរក្សាការសម្ងាត់ និងបច្ចេកទេសខ្ពស់។

បុគ្គលដែលស្រាវជ្រាវ អភិវឌ្ឍ ដំណើរការ ការពារប្រព័ន្ធ ថ្នាល ឧបករណ៍ ដំណោះស្រាយបច្ចេកវិទ្យាយុទ្ធសាស្ត្របម្រើឱ្យការការពារសន្តិសុខតាមប្រព័ន្ធអ៊ីនធឺណិត ត្រួតពិនិត្យ វិភាគ វាយតម្លៃ ព្រមានជាមុននូវហានិភ័យគំរាមកំហែងដល់សន្តិសុខតាមប្រព័ន្ធអ៊ីនធឺណិតជាតិ អនុវត្តភារកិច្ចដែលមានអាំងតង់ស៊ីតេខ្ពស់ ប្រចាំការត្រៀមខ្លួនជាស្រេច ដោះស្រាយបន្ទាន់ ការពារប្រព័ន្ធព័ត៌មានសំខាន់ៗអំពីសន្តិសុខជាតិ ធានាសន្តិសុខទិន្នន័យ សន្តិសុខព័ត៌មានបណ្តាញ ឬមានផលិតផលសម្រេចបម្រើដោយផ្ទាល់ដល់ការងារគ្រប់គ្រង ដឹកនាំ បញ្ជា ធ្វើសឹកសង្គ្រាម ការពារសន្តិសុខតាមប្រព័ន្ធអ៊ីនធឺណិត ក៏ស្ថិតក្នុងក្រុមដែលអាចទទួលបាននូវកម្រិតឧបត្ថម្ភនេះផងដែរ។

កម្រិតទី ៣ អតិបរមាស្មើនឹង ៣០០% នៃកម្រិតប្រាក់បៀវត្ស ផ្អែកតាមមេគុណប្រាក់បៀវត្សដែលកំពុងទទួលបានបច្ចុប្បន្ន អនុវត្តចំពោះបុគ្គលដែលស្រាវជ្រាវ អភិវឌ្ឍ ធ្វើជាម្ចាស់លើការអនុវត្តបច្ចេកវិទ្យាយុទ្ធសាស្ត្រ ផលិតផលបច្ចេកវិទ្យាយុទ្ធសាស្ត្រ ឬបច្ចេកវិទ្យាថ្មីដែលមានផលប៉ះពាល់ផ្ទាល់ដល់សន្តិសុខជាតិដោយផ្ទាល់។

ក្រុមនេះក៏រួមមានបុគ្គលដែលស្រាវជ្រាវ អភិវឌ្ឍផលិតផល ដំណោះស្រាយបច្ចេកវិទ្យា គំរូ គម្រោង គម្រោងការយុទ្ធសាស្ត្រដែលមានតម្លៃលេចធ្លោបំបែកឯកទគ្គកម្មចំពោះការការពារសន្តិសុខតាមប្រព័ន្ធអ៊ីនធឺណិត អនុវត្តភារកិច្ចដែលមានតម្រូវការរក្សាការសម្ងាត់ពិសេស អាំងតង់ស៊ីតេខ្ពស់ពិសេស ម្ចាស់ការលើការអនុវត្ត ដោះស្រាយស្ថានភាពបន្ទាន់ ២៤/៧ ឬភារកិច្ចដែលមានឥទ្ធិពលធំធេងដល់សន្តិសុខជាតិ សណ្តាប់ធ្នាប់ និងសុវត្ថិភាពសង្គម។

ក្នុងករណីបុគ្គលដែលទទួលបានការឧបត្ថម្ភបន្ថែមប្រចាំខែមិនអនុវត្តរបបប្រាក់បៀវត្សតាមមេគុណ ឬច្បាប់ស្តីពីប្រាក់បៀវត្សមានការផ្លាស់ប្តូរមូលដ្ឋានគិតប្រាក់បៀវត្ស កម្រិតឧបត្ថម្ភត្រូវបានកំណត់ផ្អែកតាមមូលដ្ឋានសមស្របស្របតាមបទប្បញ្ញត្តិនៃច្បាប់។

ចំពោះបុគ្គលដែលមិនស្ថិតក្នុងក្របខ័ណ្ឌ ប៉ុន្តែត្រូវបានចាត់តាំង ប្រើប្រាស់ ប្រគល់ភារកិច្ច ឬចុះកិច្ចសន្យាដើម្បីចូលរួមកងកម្លាំងជំនាញទទួលបន្ទុកការពារសន្តិសុខតាមប្រព័ន្ធអ៊ីនធឺណិត ប្រាក់ឈ្នួល ប្រាក់បំណាច់ ការឧបត្ថម្ភការចំណាយផ្ទាល់ សមហេតុផល ចាំបាច់ និងរបបផ្សេងៗទៀត ត្រូវបានកំណត់ឱ្យស្របទៅតាមកម្រិតវិជ្ជាជីវៈ លក្ខណៈនៃភារកិច្ច កម្រិតនៃការរួមចំណែក និងលទ្ធផលនៃការអនុវត្តភារកិច្ច ដោយផ្អែកលើការព្រមព្រៀង កិច្ចសន្យា សេចក្តីសម្រេចប្រគល់ភារកិច្ច ឬសេចក្តីសម្រេចរបស់ស្ថាប័នមានសមត្ថកិច្ច។

ការអនុវត្តគោលនយោបាយត្រូវតែស្របតាមលទ្ធភាពតុល្យភាពនៃថវិការដ្ឋ និងប្រភពថវិកាស្របច្បាប់ផ្សេងៗទៀត។

ប្រសិនបើបុគ្គលម្នាក់មានលក្ខខណ្ឌគ្រប់គ្រាន់ក្នុងពេលដំណាលគ្នាដើម្បីទទួលបានកម្រិតឧបត្ថម្ភបន្ថែមប្រចាំខែច្រើន ឬគោលនយោបាយឧបត្ថម្ភ និងអនុគ្រោះច្រើនដែលមានលក្ខណៈ និងគោលបំណងដូចគ្នា នោះត្រូវបានទទួលតែកម្រិតខ្ពស់បំផុតមួយប៉ុណ្ណោះ លើកលែងតែករណីដែលច្បាប់មានកំណត់ផ្សេងពីនេះ។

ប្រាក់ឧបត្ថម្ភបន្ថែមប្រចាំខែត្រូវបានបើកផ្តល់ដំណាលគ្នានឹងកាលបរិច្ឆេទបើកប្រាក់បៀវត្ស មិនត្រូវយកមកធ្វើជាមូលដ្ឋានសម្រាប់គិតការបង់ និងការទទួលបានរបបធានារ៉ាប់រងសង្គមឡើយ ហើយត្រូវបានលើកលែងពន្ធលើប្រាក់ចំណូលបុគ្គល ព្រមទាំងកាតព្វកិច្ចហិរញ្ញវត្ថុផ្សេងៗទៀតចំពោះរដ្ឋ។

ថវិកាអនុវត្តត្រូវបានធានាពីថវិការដ្ឋក្នុងទំហំប៉ាន់ស្មានដែលត្រូវបានថ្នាក់មានសមត្ថកិច្ចប្រគល់ជូន និងប្រភពថវិកាស្របច្បាប់ផ្សេងៗទៀត។ ការរៀបចំគម្រោងចំណាយ ការបែងចែក ការគ្រប់គ្រង ការប្រើប្រាស់ ការទូទាត់ និងការទូទាត់ទូទៅ គឺអនុវត្តតាមបទប្បញ្ញត្តិនៃច្បាប់ស្តីពីថវិការដ្ឋ និងច្បាប់ពាក់ព័ន្ធនានា។

រដ្ឋមន្ត្រីក្រសួងនគរបាល រដ្ឋមន្ត្រីក្រសួងការពារប្រទេស ក្នុងទំហំមុខងារ ភារកិច្ច និងសិទ្ធិអំណាចរបស់ខ្លួន ធ្វើជាអធិបតី និងសហការជាមួយក្រសួងហិរញ្ញវត្ថុ ព្រមទាំងបណ្តាស្ថាប័នពាក់ព័ន្ធ កំណត់ ឬណែនាំលក្ខណៈវិនិច្ឆ័យកំណត់មុខសញ្ញា ក្រុមមុខតំណែងការងារ កម្រិតឧបត្ថម្ភ រយៈពេលទទួលបាន ប្រភពថវិកា លំដាប់លំដោយ នីតិវិធី សមត្ថកិច្ចសម្រេច យន្តការត្រួតពិនិត្យឡើងវិញ ត្រួតពិនិត្យ វាយតម្លៃ ការទូទាត់ និងការទូទាត់ទូទៅនៃការអនុវត្តគោលនយោបាយ។

ផ្តល់អាទិភាពដល់ការបណ្តុះបណ្តាល ប្រគល់ភារកិច្ចសំខាន់ៗដល់ធនធានមនុស្សលេចធ្លោ

ក្រៅពីគោលនយោបាយប្រាក់បៀវត្ស និងការឧបត្ថម្ភបន្ថែម អនុក្រឹត្យបានកំណត់ថា មុខសញ្ញាស្ថិតក្នុងចំណាត់ថ្នាក់ទទួលបានការអនុគ្រោះ និងទាក់ទាញធនធានមនុស្សដែលមានទេពកោសល្យក្នុងកងកម្លាំងជំនាញទទួលបន្ទុកការពារសន្តិសុខតាមប្រព័ន្ធអ៊ីនធឺណិត ត្រូវបានផ្តល់អាទិភាពក្នុងការបណ្តុះបណ្តាល បំប៉ន ធ្វើបច្ចុប្បន្នភាពចំណេះដឹង លើកកម្ពស់កម្រិតជំនាញ ជំនាញបច្ចេកទេស សមត្ថភាពគ្រប់គ្រង បញ្ជា ស្រាវជ្រាវ អភិវឌ្ឍ និងកិច្ចសហប្រតិបត្តិការអន្តរជាតិឱ្យស្របតាមតម្រូវការនៃភារកិច្ច។

ផ្អែកលើគុណធម៌ សមត្ថភាព កម្រិតវិជ្ជាជីវៈ លទ្ធផលនៃការអនុវត្តភារកិច្ច និងតម្រូវការកសាងកងកម្លាំង បណ្តាមុខសញ្ញាទាំងនេះត្រូវបានពិចារណាចាត់តាំង ប្រើប្រាស់ក្នុងមុខតំណែងការងារសមស្រប ធ្វើផែនការ តែងតាំង ប្រគល់ភារកិច្ច ប្រគល់គម្រោង ប្រគល់ភារកិច្ចគន្លឹះ ចាត់បញ្ជូនទៅបម្រើការងារ ផ្លាស់ប្តូរវេន ឬបង្កើតលក្ខខណ្ឌអភិវឌ្ឍអាជីពការងារតាមបទប្បញ្ញត្តិ។

បុគ្គលដែលមានស្នាដៃឆ្នើមពិសេស សមត្ថភាពលេចធ្លោ មានផលិតផល ស្នាដៃសំណង់ ឬលទ្ធផលការងារប្រកបដោយតម្លៃខ្ពស់ ត្រូវបានផ្តល់អាទិភាពពិចារណាបញ្ចូលទៅក្នុងចំណាត់ថ្នាក់ប្រើប្រាស់ជាសំខាន់ ប្រគល់ភារកិច្ចសំខាន់ៗ និងជាយុទ្ធសាស្ត្រ ឬបន្តអនុវត្តយន្តការ និងគោលនយោបាយសមស្របតាមបទប្បញ្ញត្តិនៃច្បាប់។

ការបណ្តុះបណ្តាល បំប៉ន ប្រើប្រាស់ និងអភិវឌ្ឍ ត្រូវតែធានាឱ្យចំគោលដៅ ចំមុខសញ្ញា ប្រកបដោយប្រសិទ្ធភាព ជាក់ស្តែង ផ្សារភ្ជាប់ជាមួយតម្រូវការភារកិច្ច មុខតំណែងការងារ និងទិសដៅកសាងប្រភពធនធានមនុស្សប្រកបដោយគុណភាពខ្ពស់នៅក្នុងកងកម្លាំងជំនាញទទួលបន្ទុកការពារសន្តិសុខតាមប្រព័ន្ធអ៊ីនធឺណិត។

អនុក្រឹត្យលេខ 329/2026/NĐ-CP មានសុពលភាពអនុវត្តចាប់ពីថ្ងៃទី ១៩ ខែសីហា ឆ្នាំ ២០២៦ តទៅ៕

សន្និសីទវីអិនអិនអាយស៊ី អ៊ីនធឺណិត ឆ្នាំ ២០២៦៖ ជម្រុញការដាក់ឱ្យប្រើប្រាស់ IPv6-Only បង្កើតកម្លាំងចលករអភិវឌ្ឍន៍ហេដ្ឋារចនាសម្ព័ន្ធឌីជីថលជាតិ យុគសម័យ - នាថ្ងៃទី ១៩ ខែមិថុនា នៅទីក្រុងហូជីមិញ មជ្ឈមណ្ឌលអ៊ីនធឺណិតវៀតណាម (VNNIC - ស្ថិតក្រោមក្រសួងវិទ្យាសាស្ត្រនិងបច្ចេកវិទ្យា) បានរៀបចំសន្និសីទ VNNIC Internet Conference 2026 ក្រោមប្រធានបទ “ការដាក់ឱ្យប្រើប្រាស់ IPv6-Only – កម្លាំងចលករអភិវឌ្ឍន៍ហេដ្ឋារចនាសម្ព័ន្ធឌីជីថលជាតិ”។

ការដាក់ឱ្យដំណើរការកម្មវិធី IPv6-Only ដំណាក់កាល ២០២៦-២០៣០ តម្រង់ទិសដៅទៅរកអ៊ីនធឺណិតជំនាន់ថ្មី យុគសម័យ - កម្មវិធី IPv6-Only ដំណាក់កាល ២០២៦-២០៣០ ត្រូវបានដាក់ឱ្យដំណើរការជាផ្លូវការ បើកឡើងនូវជំហានបំប្លែងថ្មីនៅក្នុងដំណើរការអភិវឌ្ឍន៍ហេដ្ឋារចនាសម្ព័ន្ធអ៊ីនធឺណិតវៀតណាម ចាប់ពីទម្រង់ប្រើប្រាស់ទន្ទឹមគ្នា IPv4/IPv6 ទៅជាបរិស្ថានតភ្ជាប់ដែលផ្អែកលើ IPv6 ជាចម្បង។

ម៉ាញដាត