ការនាំចេញអង្កររបស់កម្ពុជាបានកើនឡើងយ៉ាងខ្លាំងបន្ទាប់ពីរយៈពេល ៧ ខែដើមឆ្នាំនេះ

ការនាំចេញអង្កររបស់កម្ពុជាបានកើនឡើងយ៉ាងខ្លាំងបន្ទាប់ពីរយៈពេល ៧ ខែដើមឆ្នាំនេះ

បើយោងតាមតួលេខថ្មីដែលចេញផ្សាយដោយសហព័ន្ធស្រូវអង្ករកម្ពុជា នៅរយៈពេល៧ខែ ឆ្នាំ២០២០ កម្ពុជានាំចេញអង្ករសម្រេចបាន ៤២៦,០៧៣តោន កើនឡើងប្រមាណ ១១៨ ០៦០ តោន ស្មើនឹង ៣៨.៣៣% បើធៀបទៅនឹងរយៈពេល៧ខែដើមឆ្នាំ២០១៩ ដែលមានចំនួន ៣០៨,០១៣ តោន។ ក្នុងនោះ ដោយឡែកសម្រាប់ខែកក្កដា ឆ្នាំ២០២០ ការនាំចេញអង្ករបាន ចំនួន ២៨៤១៣ តោន កើនឡើងចំនួន ១៩៣៨ តោន ស្មើនឹង ៧.៣២% ធៀបទៅនឹងខែឧសភា ឆ្នាំ២០១៩ ដែលក្នុងនេះមាន៖ អង្ករក្រអូបគ្រប់ប្រភេទមានចំនួន ១៨៥២៣ តោន, អង្ករចម្រុះគ្រប់ប្រភេទមានចំនួន ៩២០៨តោន, អង្ករចំហ៊ុយមានចំនួន ៦៨២ តោន និងអង្ករក្រហមមានចំនួន ២៨.៤១ តោន។

លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានមានប្រសាសន៍ថា ចាប់តាំងពីដើមឆ្នាំមកដល់ពេលនេះ មានប្រទេសចំនួន ៥៧ បានទិញអង្ករកម្ពុជា។ នៅក្នុងសហភាពអឺរ៉ុបមានប្រទេសចំនួន ២៤ ក្នុងចំណោម២៨ ប្រទេស, ប្រទេសចិន, ប្រទេសសមាជិកអាស៊ានចំនួន៦ និងនៅទ្វិបដទៃទៀតចំនួន ២៦ ប្រទេស ។ ទន្ទឹមនឹងនេះក៏មានក្រុមហ៊ុនចំនួន ៥ ក្នុងចំណោម ៧០ក្រុមហ៊ុន ដែលបាននាំចេញអង្ករច្រើនជាងគេ។

លោករដ្ឋមន្ត្រីបានបន្ថែមថា ការនាំចេញអង្ករកម្ពុជាក្នុងរយៈពេល ៧ខែដើមឆ្នាំដូចគ្នាប្រៀបធៀបទៅនឹងឆ្នាំ២០១៩ មានកំណើននៅគ្រប់គោលដៅនាំចេញទាំងអស់៖ សហភាពអឺរ៉ុបកើនចំនួន ៣៧.៧០%, ប្រទេសចិនកើនចំនួន ២៥.៩១%, បណ្តាប្រទេសសមាជិកអាស៊ានកើនចំនួន ៤៤.០៣%, និងគោលដៅដទៃទៀតបានកើនឡើងចំនួន ៧២.៤០% ។

រដ្ឋាភិបាលកម្ពុជាកំពុងមានគោលការណ៍លើកកម្ពស់ការអភិវឌ្ឍន៍កសិកម្ម លើកទឹកចិត្តកម្មករដែលបាត់បង់ការងារដោយសារតែផលប៉ះពាល់នៃការរីករាលដាលនៃជំងឺរាតត្បាត Covid-19 អាចផ្លាស់ប្តូរការងារនិងចូលរួមក្នុងកសិកម្មក្នុងស្រុក។ ក្នុងរយៈពេលប៉ុន្មានឆ្នាំកន្លងមកនេះ វិស័យកសិកម្ម រួមទាំងស្រូវអង្ករជាមុខទំនិញសំខាន់ តែងតែជាសសរស្តម្ភសេដ្ឋកិច្ចមួយដែលជួយប្រទេសកម្ពុជាឱ្យមានការអភិវឌ្ឍយ៉ាងឆាប់រហ័សនិងប្រកបដោយនិរន្តរភាព៕

（សរុបដោយសាមេត）

（សរុបដោយសាមេត）