ក្នុងបរិបទនៃការឆ្លងរាលដាលនៃជំងឺរាតត្បាត COVID-19 កំពុងមានភាពស្មុគស្មាញ ប្រទេសជាច្រើននៅលើពិភពលោកនិយាយរួមនិងកម្ពុជានិយាយដោយឡែកកំពុងជួបការលំបាកក្នុងការនាំចេញកសិផល។ ទោះយ៉ាងណាកម្ពុជាក៏ទទួលបានសមិទ្ធិផលសំខាន់ៗជាច្រើនក្នុងរយៈពេល ៤ ខែដើមឆ្នាំនេះ។
នាំចេញអង្កររបស់កម្ពុជា
បើតាមសហព័ន្ធស្រូវអង្ករកម្ពុជា កាលពីថ្ងៃទី២ ខែឧសភា កម្ពុជាសម្រេចការនាំចេញអង្ករទៅក្រៅប្រទេសក្នុងរយៈពេល៤ខែដំបូង នៃឆ្នាំ២០២០ បានជាង៣០ម៉ឺនតោន កើនឡើងប្រមាណ៤១% ធៀបនឹងរយៈពេលដូចគ្នា កាលពីឆ្នាំ ២០១៩។ នេះគឺជាកំណើនមួយ ដែលគួរឲ្យកត់សម្គាល់បំផុតរបស់កម្ពុជា ដែលបានសម្រេចការនាំចេញ ក្នុងរយៈពេល៤ខែដើមឆ្នាំ ក្នុងតួលេខខ្ពស់បំផុតនារយៈពេល ១០ឆ្នាំចុងក្រោយនេះ។លោក ហ៊ុន ឡាក់ ប្រធានកុ្រមប្រឹក្សាភិបាលនៃសហព័ន្ធស្រូវអង្ករកម្ពុជា បានអះអាងប្រាប់វិទ្យុបារាំងអន្តរជាតិនៅថ្ងៃទី៥ ខែឧសភានេះថា ដោយសារតែវិបត្តិកូវីដ១៩ ប្រទេសមួយចំនួនបានផ្អាកការនាំចេញ ហើយសកម្មភាពមួយចំនួននៅក្នុងពិភពលោកត្រូវផ្អាក ធ្វើឲ្យមានតម្រូវការផ្នែកស្បៀង។ ដោយឡែកកម្ពុជាមិនបានបិទការនាំចេញដែរ ដូច្នេះធ្វើឲ្យមានកំណើននៃការនាំចេញអង្ករកម្ពុជាទៅកាន់ទីផ្សារក្រៅប្រទេស។ លោកបន្ថែមថា មូលហេតុផ្សេងទៀត ដែលនាំឲ្យការនាំចេញអង្ករមានការកើនឡើង គឺតម្លៃស្រូវ និងអង្ករមានតម្លៃល្អ។
ក្នុងរយៈពេល៤ខែដើមឆ្នាំ ២០២០នេះ គឺកម្ពុជាបាននាំចេញអង្ករទៅកាន់ប្រទេសចិនចំនួន ៤១ភាគរយ ឬប្រមាណ១២ម៉ឺនតោន សហគមន៍អឺរ៉ុប និងប្រទេសអង់គ្លេស មានចំនួន៣២ភាគរយ ឬប្រមាណជិត១០ម៉ឺនតោន ប្រទេសសមាជិកអាស៊ានប្រមាណ១៣ភាគរយ ឬប្រមាណ៣៧ពាន់តោន និងបណ្តាប្រទេសផ្សេងៗទៀតមានចំនួនប្រមាណ១៤ភាគរយ ឬប្រហែល៤៣ពាន់តោន។
នាំចេញម្រេចនៅកម្ពុជា
ក្រៅពីអង្ករ ផលិតផលម្រេចរបស់កម្ពុជាក៏បានសម្រេចសមិទ្ធិផលសំខាន់ៗមួយចំនួន។ យោងតាមលទ្ធផលនៃការនាំចេញផលិតផលកសិកម្មទៅកាន់ទីផ្សារពិភពលោកក្នុងរយៈពេល៤ខែ ដើមឆ្នាំនេះ ដែលបានកត់ត្រាដោយក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ផលិតផលម្រេចកម្ពុជាបាននាំចេញទៅកាន់ទីផ្សារ១៣ ប្រទេស។ប្រភពដដែលបានឱ្យដឹងថា ពីខែមករា ដល់ខែមេសា ឆ្នាំ២០២០ កម្ពុជាបាននាំចេញផលិតផលម្រេចចំនួន ២.២៥២ តោន ទៅកាន់ទីផ្សារនៅប្រទេសជប៉ុន ប៊ែលហ្សិក ហុល្លង់ បារាំង អាល្លឺម៉ង់ ស្វីស វៀតណាម អាមេរិក រុស្សុី អង់គ្លេស ឥណ្ឌា បេឡារុស និងកូរ៉េ៕
（សរុបដោយសាមេត）
មតិពីមិត្តអ្នកអាន