ទឹកដីសៀមរាមមានកេរ្តិ៍ឈ្មោះល្បីរន្ទឺខាងសម្បូរប្រាង្គប្រាសាទបុរាណ ប៉ុន្តែមិនដែលមានអ្នកណាចាប់អារម្មណ៍វិស័យលម្ហែកាយតាមផ្លូវទឹកនៅទីនោះឡើយ។ ទើបតែពេលនេះ ក្រុមហ៊ុនក្រុងស្រុកមួយបានបង្កើតសកម្មភាពទេសចរណ៍ដោយការជិះទូកកៃយ៉ាក់លេងក្នុងតំបន់ដ៏ស្ងប់ស្ងាត់លន្លង់លន្លោចនៅបឹងទន្លេសាប។
ដំណើរកម្សាន្តជិះទូកកៃយ៉ាក់លេងនៅព្រៃកោងកាងបឹងទន្លេសាបឯសៀមរាប
ក្រុមហ៊ុន Unique Kayak Cambodia ដែលសម្ពោធបើកទ្វារកាលពីខែមករាដើមឆ្នាំនេះ បានផ្ដល់ការងារដល់សហគមន៍ខ្មែរតាមរយៈអាជីវកម្មសេវាទេសចរណ៍ដ៏វិជ្ជមានមួយ។
មុនដំណើរការសេវាកម្សាន្តជិះទូកលេងនេះ ម្ចាស់ក្រុមហ៊ុន ជិន មានគង់ បានរុករកតំបន់ទន្លេសាបណាដែលមិនសូវមានទេសចរទៅដល់ នឹងនៅឆ្ងាយពីភូមិបណ្ដែតទឹកកំពង់ភ្លុក និងចុងឃ្នាស។
ខណៈដែលភូមិលិចទឹកដទៃទៀតតែងមានវត្តមានភ្ញៀវទេសចរទៅទស្សនាជាប់រដឹក ម្ចាស់ក្រុមហ៊ុនរូបនេះបែរជាព្យាយាមជ្រើសរើសយកភូមិណាដែលដាច់ស្រយាលស្ងាត់ជ្រងំ មិនធ្លាប់មានទេសចរទៅដល់ ដោយលោកបាននិយាយថា៖ «ខ្ញុំបានស្រាវជ្រាវរកភូមិណាដែលនៅឆ្ងាយ ដូចជាភូមិមេជ្រៃ ដែលយើងកំពុងតាំងទីបច្ចុប្បន្ន។ យើងបានជួបសហគមន៍តូចមួយដែលមិនធ្លាប់ប្រាស្រ័យទាក់ទងជាមួយភ្ញៀវទេសចរទាល់តែសោះ បើទោះបីជាអ្នកភូមិនៅទីនោះជាមនុស្សរវាសរវៃ»។
ដំណើរកម្សាន្តជិះទូកកៃយ៉ាក់លេងនៅព្រៃកោងកាងបឹងទន្លេសាបឯសៀមរាប
សព្វថ្ងៃកញ្ចប់សេវាជិះទូកមាន២បែប គឺការជិះពេញ១ថ្ងៃ និងកន្លះថ្ងៃ។ សម្រាប់ដំណើរកម្សាន្តកន្លះថ្ងៃ ភ្ញៀវនឹងរីករាយស្វែងយល់ពីសហគមន៍ភូមិបណ្ដែតទឹកមេជ្រៃ។ រីឯកញ្ចប់សេវាពេញ១ថ្ងៃ រួមមានការទៅទស្សនាវត្តបណ្ដែតទឹក កន្លែងផលិតសូត្រ ផ្សារពួកដែលល្បីថាមានមាន់អាំងឆ្ងាញ់ មុននឹងបន្តទៅស្រស់ស្រូបអាហារថ្ងៃត្រង់នៅផ្ទះអ្នកភូមិ។
លោក ជិន មានគង់ បានឲ្យដឹងថា៖ «ការទស្សនាភូមិធ្វើសូត្រ ដែលមានវាលស្រែស្រស់ស្អាត និងមានប្រជាជនរួសរាយរាក់ទាក់រង់ចាំស្វាគមន៍នោះពិតជាអស្ចារ្យណាស់។ ការជិះទូកកៃយ៉ាក់ធ្វើដំណើរឆ្លងកាត់ព្រៃលិចទឹក ជាសកម្មភាពដ៏លន្លោងលន្លោចបែបធម្មជាតិ»។
ដំណើរកម្សាន្តជិះទូកកៃយ៉ាក់លេងនៅព្រៃកោងកាងបឹងទន្លេសាបឯសៀមរាប
ដំណើរកម្សាន្តនេះក៏អាចឲ្យភ្ញៀវទេសចរអាចឆ្លៀតឱកាសគយគន់បក្សាបក្សីដូចជា ក្រសា កុក និងត្រយ៉ង នាពេលចែវទូកកៃយ៉ាក់ឆ្លងព្រៃកោងកាង។ ម្ចាស់ក្រុមហ៊ុន Unique Kayak Cambodia ដែលធ្លាប់បានធ្វើការក្នុងវិស័យទេសចរណ៍នៅខេត្តសៀមរាបអស់ជាង១០ឆ្នាំ បានផ្ដោតសំខាន់លើកត្តាសុខភាព សុវត្ថិភាព និងវិជ្ជាជីវនិយមក្នុងការរៀបចំដំណើរកម្សាន្តនេះផងដែរ។
លោកបានពន្យល់ថា៖ «អ្វីៗគឺសំខាន់ទៅលើសុវត្ថិភាពជាចម្បង»។ លោកអះអាងថា ក្រុមទេសចររបស់លោកមានអាវពោងសុវត្ថិភាព ឧបករណ៍សង្គ្រោះបឋម ក្រុមសង្គ្រោះបន្ទាន់ និងឧទ្ធម្ភាគចក្រក្នុងករណីមានហេតុការណ៍ចៃដន្យណាមួយកើតឡើងផងដែរ។ ម៉្យាងវិញទៀត ក្រុមហ៊ុនរបស់លោកក៏ បានជ្រើសរើសបុគ្គលិកពីសហគមន៍មកបម្រើការដែលពួកគេភាគច្រើនជាអ្នកមកពីភូមិមេជ្រៃផ្ទាល់តែម្ដង។
ដំណើរកម្សាន្តជិះទូកកៃយ៉ាក់លេងនៅព្រៃកោងកាងបឹងទន្លេសាបឯសៀមរាប
លោកបានពន្យល់ទៀតថា៖ «យើងបានជួលទូកអ្នកភូមិ ដើម្បីរួមចំណែកលើកកម្ពស់ជីវភាពពួកគេ។ ជាទូទៅ ដំណើរកម្សាន្តជិះទូកកៃយ៉ាក់នេះតែងមានក្រុមសង្គ្រោះយ៉ាងហោច២នាក់រង់ចាំជួយភ្ញៀវជាប់ជានិច្ច»។ ក្រៅពីស្វែងរកប្រាក់ចំណូល ម្ចាស់ក្រុមហ៊ុនទេសចរណ៍រូបនេះក៏បានគិតគូរជួយសហគមន៍តាមរយៈការឧបត្ថម្ភថវិកា និងស្វែងរកគ្រូបង្រៀនភាសាអង់គ្លេសឲ្យប្រជាជនរស់នៅសហគមន៍។ នេះហើយគឺជា «វិស័យទេសចរណ៍ប្រកបដោយទំនួសខុសត្រូវ» របស់លោក។
កញ្ចប់សេវាជិះទូក កៃយ៉ាក់នៅតំបន់ព្រៃលិចទឹកបឹងទន្លេសាបនេះ ដំណើរការគ្រប់រដូវកាលពេញមួយឆ្នាំតែម្ដង ដោយមួយលើកៗតម្រូវឲ្យមានភ្ញៀវច្រើនបំផុត១៥នាក់។ កុមារក៏ត្រូវបានស្វាគមន៍ឲ្យរួមដំណើរផងដែរ។ តម្លៃកញ្ចប់សេវាគឺពី៤០ ទៅ១១០ដុល្លារអាស្រ័យលើចំនួនភ្ញៀវ និងប្រភេទកញ្ចប់សេវា៕
（ប្រភពព័ត៌មាន: postkhmer.com）
មតិពីមិត្តអ្នកអាន