សម្តេចតេជោ ហ៊ុន សែន៖ ប្រសិនបើគ្មានការជួយឧបត្ថម្ភ និងការលះបង់សាច់ស្រស់ឈាមស្រស់របស់វៀតណាមទេ គឺមិនមានកម្ពុជានាថ្ងៃនេះឡើយ

ក្នុងក្របខ័ណ្ឌនៃដំណើរទស្សនកិច្ចផ្លូវការនៅព្រះរាជាណាចក្រកម្ពុជា នាព្រឹកថ្ងៃទី១០ ខែមេសា លោក Tran Cam Tu សមាជិកការិយាល័យនយោបាយ និងជាលេខាធិការប្រចាំការនៃគណៈកម្មាធិការមជ្ឈិមបក្ស បានចូលជួបសម្តែងការគួរសមជាមួយសម្តេចតេជោ ហ៊ុន សែន ព្រះរាជស្តីទី ប្រធានគណបក្សប្រជាជនកម្ពុជា (CPP) និងជាប្រធានព្រឹទ្ធសភាកម្ពុជា។

វៀតណាមដែលមានការរីកចម្រើនខ្លាំងក្លា មានអត្ថន័យយ៉ាងសំខាន់សម្រាប់ទាំងកម្ពុជា

យោងតាមព័ត៌មានពីក្រសួងការបរទេស ក្នុងជំនួបនោះ សម្តេចតេជោ ហ៊ុន សែន បានស្វាគមន៍យ៉ាងកក់ក្តៅ និងវាយតម្លៃខ្ពស់ចំពោះដំណើរទស្សនកិច្ចផ្លូវការនៅកម្ពុជារបស់លោកលេខាធិការប្រចាំការ Tran Cam Tu និងគណៈប្រតិភូជាន់ខ្ពស់វៀតណាម ដោយបញ្ជាក់ថា នេះគឺជាសក្ខីភាពដ៏រស់រវើកសម្រាប់ការអភិវឌ្ឍយ៉ាងខ្លាំងក្លា រឹងមាំ និងស្អិតរមួតនៃទំនាក់ទំនងវៀតណាម-កម្ពុជា។

សម្តេចតេជោ ហ៊ុន សែន ក៏បានផ្ញើសារអបអរសាទរចំពោះបណ្តាថ្នាក់ដឹកនាំគន្លឹះរបស់វៀតណាម ដែលទើបត្រូវបានរដ្ឋសភានីតិកាលទី១៦ បោះឆ្នោតជ្រើសតាំង និងបានសម្តែងនូវជំនឿយ៉ាងមុតមាំថា វៀតណាមនឹងសម្រេចបានជោគជ័យនូវគោលដៅ ១០០ ឆ្នាំ ចំនួនពីរ នៅឆ្នាំ២០៣០ និងឆ្នាំ២០៤៥។

សម្តេចបានសង្កត់ធ្ងន់ថា វៀតណាមដែលមានការអភិវឌ្ឍខ្លាំងក្លា មានស្ថិរភាព និងប្រកបដោយចីរភាព មិនត្រឹមតែមានអត្ថន័យយ៉ាងសំខាន់សម្រាប់វៀតណាមប៉ុណ្ណោះទេ ប៉ុន្តែថែមទាំងរួមចំណែកយ៉ាងសកម្មដល់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍរួមក្នុងតំបន់ ដែលក្នុងនោះមានកម្ពុជាផងដែរ។

ក្នុងឱកាសនេះ សម្តេចតេជោ ហ៊ុន សែន ម្តងទៀតបានសម្តែងនូវការដឹងគុណយ៉ាងជ្រាលជ្រៅ ចំពោះការគាំទ្រ និងជួយឧបត្ថម្ភប្រកបដោយមនោសញ្ចេតនាស្មោះស័គ្រ្យបំផុតរបស់បក្ស រដ្ឋ និងប្រជាជនវៀតណាមចំពោះកម្ពុជា។

តាមសម្តេច វៀតណាមមិនត្រឹមតែបានជួយរំដោះកម្ពុជាឱ្យរួចផុតពីរបបប្រល័យពូជសាសន៍ខ្មែរក្រហមប៉ុណ្ណោះទេ ប៉ុន្តែថែមទាំងបានជួយឱ្យកម្ពុជារស់ឡើងវិញ មានការរីកចម្រើន និងកសាងប្រទេសជាតិ ហើយសម្តេចបានបញ្ជាក់ថា ប្រសិនបើគ្មានការជួយឧបត្ថម្ភ និងការលះបង់របស់វៀតណាមទេ គឺមិនមានកម្ពុជានាថ្ងៃនេះឡើយ។

សម្តេចតេជោ ហ៊ុន សែន មានប្រសាសន៍នៅក្នុងជំនួប

ក្នុងជំនួបនោះ ភាគីទាំងពីរបានសម្តែងនូវភាពរីករាយចំពោះការអភិវឌ្ឍយ៉ាងខ្លាំងក្លា និងគ្រប់ជ្រុងជ្រោយនៃទំនាក់ទំនងរវាងបក្សទាំងពីរ និងប្រទេសទាំងពីរលើគ្រប់វិស័យ។

សម្តេចបានវាយតម្លៃខ្ពស់ចំពោះដំណើរទស្សនកិច្ចផ្លូវរដ្ឋនៅកម្ពុជារបស់លោក អគ្គលេខាបក្ស និងជាប្រធានរដ្ឋ To Lam (ក្នុងឋានៈជាអគ្គលេខាបក្ស) និងការធ្វើជាសហប្រធាននៃជំនួបជាន់ខ្ពស់រវាងបក្សទាំងពីរ ក៏ដូចជាជំនួបជាន់ខ្ពស់រវាងថ្នាក់ដឹកនាំនៃបក្សទាំងបី វៀតណាម - កម្ពុជា - ឡាវ នៅទីក្រុងភ្នំពេញ (នាថ្ងៃទី៦ ខែកុម្ភៈ ឆ្នាំ២០២៦) គឺជាសក្ខីភាពប្រវត្តិសាស្ត្រដែលមានអត្ថន័យយ៉ាងសំខាន់ បង្កើតបានជាកម្លាំងចលករនយោបាយដ៏រឹងមាំ ដើម្បីនាំយកទំនាក់ទំនងរវាងបក្សទាំងពីរ និងប្រទេសទាំងពីរឈានដល់កម្រិតកម្ពស់ថ្មី ព្រមទាំងជំរុញការអនុវត្តកិច្ចព្រមព្រៀងសហប្រតិបត្តិការនានាឱ្យមានប្រសិទ្ធភាពជាក់ស្តែង។

សម្តេចតេជោ ហ៊ុន សែន បានបញ្ជាក់ថា កម្ពុជា - វៀតណាម - ឡាវ គឺមិនអាចខ្វះគ្នាបានឡើយ ហើយក្នុងចំណោមប្រទេសទាំងបី ទោះបីជាមានយន្តការសហប្រតិបត្តិការជាច្រើនរួចហើយក៏ដោយ ក៏នៅតែចាំបាច់ត្រូវសិក្សាស្រាវជ្រាវអំពីយន្តការសហប្រតិបត្តិការថ្មីៗបន្ថែមទៀត ដើម្បីរួមចំណែកដល់សន្តិភាព ស្ថិរភាព និងការអភិវឌ្ឍនៅក្នុងតំបន់។

ជំរុញការផ្សារភ្ជាប់ខឿនសេដ្ឋកិច្ចទាំងពីរ

អំពីទិសដៅកិច្ចសហប្រតិបត្តិការរវាងវៀតណាម និងកម្ពុជានានាពេលខាងមុខ លោកលេខាធិការប្រចាំការ Tran Cam Tu បានស្នើឱ្យភាគីទាំងពីរបន្តពង្រឹងជំនឿទុកចិត្តនយោបាយឱ្យបានរឹងមាំ ដោយចាត់ទុកថា នេះគឺជាកត្តាស្នូល និងជាគោលការណ៍នាំមុខឥតដាច់ ដែលដើរតួនាទីតម្រង់ទិសយុទ្ធសាស្ត្រសម្រាប់ទំនាក់ទំនងទ្វេភាគីទាំងមូល។

ទន្ទឹមនឹងនោះ ចាំបាច់ត្រូវរក្សាឱ្យបានជាប្រចាំ ជាក់ស្តែង និងប្រកបដោយប្រសិទ្ធភាពនូវបណ្តាដំណើរទស្សនកិច្ច ការជួបប្រាស្រ័យ និងការផ្លាស់ប្តូរគណៈប្រតិភូគ្រប់កម្រិត ជាពិសេសគឺកម្រិតខ្ពស់ និងតាមបណ្តាញបក្ស និងរដ្ឋ ដើម្បីបង្កើនការផ្លាស់ប្តូរមតិយោបល់ ចែករំលែកចក្ខុវិស័យយុទ្ធសាស្ត្រ និងដោះស្រាយបញ្ហានានាដែលកើតឡើងឱ្យបានទាន់ពេលវេលា។

លោកលេខាធិការប្រចាំការ ក៏បានស្នើឱ្យបង្កើនការផ្សារភ្ជាប់សេដ្ឋកិច្ចរវាងប្រទេសទាំងពីរ ក្នុងនោះផ្តោតលើការដោះស្រាយរាល់ការលំបាក និងចំណុចរាំងស្ទះ ជំរុញកិច្ចសហប្រតិបត្តិការ អភិវឌ្ឍសេដ្ឋកិច្ចនៅតំបន់ជាប់ព្រំដែន និងជំរុញការនាំចេញទំនិញ។ ក្រៅពីនេះ ចាំបាច់ត្រូវជំរុញការតភ្ជាប់ហេដ្ឋារចនាសម្ព័ន្ធ បង្កលក្ខណៈងាយស្រួលបន្ថែមទៀតសម្រាប់កិច្ចសហប្រតិបត្តិការរវាងបណ្តាមូលដ្ឋានជាប់ព្រំដែន និងការផ្លាស់ប្តូររវាងប្រជាជននៃប្រទេសទាំងពីរ។

ជាមួយគ្នានោះដែរ ភាគីទាំងពីរត្រូវបង្កើនលក្ខណៈបំពេញបន្ថែមឱ្យគ្នាទៅវិញទៅមកនៃខឿនសេដ្ឋកិច្ចទាំងពីរ តាមរយៈការជំរុញការតភ្ជាប់ខ្សែសង្វាក់ផលិតកម្ម និងការផ្គត់ផ្គង់ ព្រមទាំងពង្រីកប្រៀបខ្លាំងរៀងៗខ្លួនក្នុងវិស័យនានារបស់ប្រទេសនីមួយៗ។

សម្តេចតេជោ ហ៊ុន សែន បានសង្កត់ធ្ងន់ថា ក្នុងបរិបទដែលពិភពលោក និងតំបន់មានការវិវត្តយ៉ាងស្មុគស្មាញ និងពិបាកប៉ាន់ស្មាន ប្រទេសទាំងពីរត្រូវរួបរួមគ្នាក្នុងស្មារតីមិត្តភាព ប្រពៃណីផ្សារភ្ជាប់ប្រវត្តិសាស្ត្រ និងបង្កើនកិច្ចសហប្រតិបត្តិការឱ្យកាន់តែខ្លាំងក្លាបន្ថែមទៀតលើវិស័យសេដ្ឋកិច្ច ពាណិជ្ជកម្ម និងការវិនិយោគ។

លោកលេខាធិការប្រចាំការ Tran Cam Tu បានបញ្ជាក់ថា បក្ស និងរដ្ឋវៀតណាម តែងតែយកចិត្តទុកដាក់អភិវឌ្ឍទំនាក់ទំនងជាមួយកម្ពុជា គាំទ្រយ៉ាងមុតមាំចំពោះកម្ពុជាដែលមានការរីកចម្រើន និងត្រៀមខ្លួនជាស្រេចក្នុងការជួយឧបត្ថម្ភតាមលទ្ធភាពដែលអាចធ្វើទៅបាន ព្រមទាំងចែករំលែកបទពិសោធន៍ដើម្បីរួមគ្នាអភិវឌ្ឍ កសាងប្រទេសជាតិ នាំមកនូវផលប្រយោជន៍សម្រាប់ប្រជាជនទាំងសងខាង ដើម្បីសន្តិភាព ស្ថិរភាព និងការអភិវឌ្ឍនៅក្នុងតំបន់។

សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា សម្តែងការចាប់អារម្មណ៍ចំពោះការអភិវឌ្ឍរបស់ប្រទេសវៀតណាម នាព្រឹកថ្ងៃទី១២ ខែកុម្ភៈ ឆ្នាំ២០២៥ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឱ្យលោក Nguyen Minh Vu ឯកអគ្គរដ្ឋទូតវៀតណាមប្រចាំកម្ពុជាចូលជួបសម្ដែងការគួរសមនៅវិមានព្រឹទ្ធសភា រាជធានីភ្នំពេញ។

ប្រធានរដ្ឋវៀតណាមលោក​ To Lam ​អញ្ជើញទទួលជួបសម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា និងលោក តូ ឡឹម​ (To Lam) ប្រធានរដ្ឋ នៃសាធារណរដ្ឋសង្គមនិយមវៀតណាម បានសន្យាពង្រឹងពង្រីកនូវកិច្ចសហប្រតិបត្តិការកម្ពុជា វៀតណាម ក៏ដូចជាកម្ពុជា វៀតណាម ឡាវ។

ហេង វុធ្ធី