ពណ៌សម្បុរនៃបុណ្យចូលឆ្នាំថ្មីប្រពៃណីជាតិ កម្ពុជា-ឡាវ-ថៃ បញ្ចេញពន្លឺយ៉ាងត្រចះត្រចង់នៅទីក្រុងហូជីមិញ

អញ្ជើញចូលរួមក្នុងពិធីបុណ្យនេះមានលោក Phonesy Bounmixay អគ្គកុងសុលឡាវប្រចាំទីក្រុងហូជីមិញ លោក Chan Sorykan អគ្គកុងសុលកម្ពុជាប្រចាំទីក្រុងហូជីមិញ តំណាងអគ្គកុងសុលដ្ឋានថៃប្រចាំទីក្រុងហូជីមិញ ព្រមទាំងនិស្សិត និងសហគមន៍ជនជាតិកម្ពុជា ឡាវ ថៃ យ៉ាងច្រើនកុះករ ដែលកំពុងរស់នៅ សិក្សា និងធ្វើការនៅក្នុងភូមិសាស្ត្រទីក្រុង។

ថ្លែងមតិក្នុងពិធីនេះ លោក Ho Xuan Lam អនុប្រធានសហព័ន្ធបណ្តាអង្គការមិត្តភាពទីក្រុងហូជីមិញ បានសង្កត់ធ្ងន់ថា វៀតណាម កម្ពុជា ឡាវ និងថៃ គឺជាបណ្តាប្រទេសជិតខាងជិតស្និទ្ធ ដែលស្ថិតក្នុងសហគមន៍អាស៊ានតែមួយ មានប្រពៃណីសាមគ្គីភាព និងជួយឧបត្ថម្ភគ្នាទៅវិញទៅមកក្នុងរយៈពេលជាច្រើនឆ្នាំកន្លងមក។ បណ្តាប្រទេសតែងតែរួមដំណើរ ចែករំលែក និងរួមគ្នាឆ្ពោះទៅរកគោលដៅកសាងសហគមន៍អាស៊ានប្រកបដោយសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍរុងរឿង។

ពិធីបុណ្យចូលឆ្នាំថ្មីប្រពៃណីជាតិ កម្ពុជា-ឡាវ-ថៃ ត្រូវបានរៀបចំឡើងជារៀងរាល់ឆ្នាំនៅទីក្រុងហូជីមិញ ដែលជាសកម្មភាពការបរទេសប្រជាជនមានអត្ថន័យជាក់ស្តែង រួមចំណែកពង្រឹង និងអភិវឌ្ឍន៍ទំនាក់ទំនងមិត្តភាពរវាងវៀតណាម និងបណ្តាប្រទេសក្នុងតំបន់។ តាមរយៈការរៀបចំឡើងវិញនូវទំនៀមទម្លាប់ និងទម្លាប់ពិសេសៗ ព្រឹត្តិការណ៍នេះបានបង្កើតលំហផ្លាស់ប្តូរវប្បធម៌ បង្កើនការយល់ដឹង និងការផ្សារភ្ជាប់គ្នារវាងប្រជាជាតិទាំងឡាយ។

សិស្ស-និស្សិតឡាវ និងកម្ពុជាយ៉ាងច្រើនកុះករ ដែលកំពុងសិក្សានៅទីក្រុងហូជីមិញ បានចូលរួមពិធីបុណ្យអបអរសាទរចូលឆ្នាំថ្មីប្រពៃណីជាតិ។

ក្នុងក្របខ័ណ្ឌនៃពិធីបុណ្យនេះ ពិធីបុណ្យតាមបែបប្រពៃណីពិសេសៗជាច្រើនត្រូវបានរៀបចំឡើងដូចជា៖ ការអុជធូបសុំសេចក្តីសុខ ពិធីស្រង់ព្រះ ពិធីចងខ្សែដៃសុំសេចក្តីសុខ និងការស្រោចទឹកប្រសិទ្ធពរជ័យ ដែលជាបណ្តាពិធីដ៏មានអត្ថន័យបំផុតក្នុងឱកាសបុណ្យចូលឆ្នាំថ្មី ចុលឆ្នាំថ្មី (Chol Chhnam Thmey) របស់កម្ពុជា បុណ្យចូលឆ្នាំថ្មីឡាវ (Bunpimay) និងបុណ្យចូលឆ្នាំថ្មីថៃ (Songkran)។ ពិធីបុណ្យទាំងនេះមានអត្ថន័យជ្រាលជ្រៅផ្នែកជំនឿសាសនា ដែលបង្ហាញពីបំណងប្រាថ្នាសុំសេចក្តីសុខ សំណាងល្អក្នុងឆ្នាំថ្មី ព្រមទាំងឆ្លុះបញ្ចាំងពីភាពស្រដៀងគ្នាក្នុងជីវភាពវប្បធម៌ និងជំនឿសាសនារបស់បណ្តាប្រទេសក្នុងតំបន់អាស៊ីអាគ្នេយ៍។

ប្រសិទ្ធពរជ័យដល់ប្រតិភូដែលចូលរួមក្នុងពិធីបុណ្យ ព្រះតេជគុណ Thich Thien Tam អនុប្រធានក្រុមប្រឹក្សាភិបាល និងជាអនុប្រធានគណៈកម្មាធិការពុទ្ធសាសនាអន្តរជាតិមជ្ឈិម នៃសមាគមពុទ្ធសាសនាវៀតណាម និងជាប្រធានគណៈកម្មាធិការពុទ្ធសាសនាអន្តរជាតិ នៃសមាគមពុទ្ធសាសនាវៀតណាម ទីក្រុងហូជីមិញ បានសង្កត់ធ្ងន់លើតម្លៃនៃស្មារតីមហាសាមគ្គីភាព និងការចុះសម្រុងគ្នារវាងប្រជាជាតិ និងប្រទេសនានា ដែលជាកត្តាមូលដ្ឋានរួមចំណែកកសាងសន្តិភាព ស្ថិរភាព និងការអភិវឌ្ឍប្រកបដោយចីរភាព។

ព្រះសង្ឃបានធ្វើពិធីស្រោចទឹកសុំសេចក្តីសុខ និងប្រសិទ្ធពរជ័យជូនដល់គ្រប់ៗគ្នានៅក្នុងពិធីបុណ្យ។

ក្នុងនាមជាតំណាងអគ្គកុងសុលនៃបណ្តាប្រទេស លោក Phonesy Bounmixay បានសម្តែងនូវក្តីរីករាយយ៉ាងខ្លាំងដែលបានចូលរួមក្នុងពិធីបុណ្យនេះ ព្រមទាំងថ្លែងអំណរគុណដល់អាជ្ញាធរ និងប្រជាជនទីក្រុងហូជីមិញ ដែលបានយកចិត្តទុកដាក់ និងបង្កលក្ខណៈងាយស្រួលដល់សហគមន៍ជនជាតិឡាវ កម្ពុជា និងថៃ ក្នុងការថែរក្សា និងលើកកម្ពស់អត្តសញ្ញាណវប្បធម៌ប្រពៃណី។ តាមលោកអគ្គកុងសុល ការរៀបចំពិធីបុណ្យនេះបានរួមចំណែកធ្វើឱ្យប្រជាជននៃបណ្តាប្រទេសកាន់តែមានភាពជិតស្និទ្ធនឹងគ្នា បង្កើនសាមគ្គីភាព និងឆ្ពោះទៅរកគោលដៅអភិវឌ្ឍន៍រួម។

ក្នុងឱកាសនេះដែរ គណៈកម្មការរៀបចំបានប្រគល់អាហារូបករណ៍ជូនដល់សិស្ស-និស្សិតឡាវ និងកម្ពុជា ដែលកំពុងសិក្សានៅទីក្រុងហូជីមិញ ដែលបង្ហាញពីការយកចិត្តទុកដាក់ និងការជួយឧបត្ថម្ភជាក់ស្តែងចំពោះជំនាន់វ័យក្មេង ដែលជាស្ពានចម្លងដ៏សំខាន់ក្នុងការរឹតបន្តឹងទំនាក់ទំនងមិត្តភាពរវាងបណ្តាប្រទេស។

ប្រគល់អាហារូបករណ៍ជូនដល់សិស្ស-និស្សិតឡាវ និងកម្ពុជា ដែលកំពុងសិក្សានៅក្នុងទីក្រុង។

ពិធីបុណ្យបានប្រព្រឹត្តទៅក្នុងបរិយាកាសសប្បាយរីករាយ និងស្និទ្ធស្នាលបំផុត ដោយមានការចូលរួមយ៉ាងច្រើនកុះករពីសហគមន៍អន្តរជាតិ និងប្រជាជនក្នុងទីក្រុង តាមរយៈនោះបន្តបញ្ជាក់ពីតួនាទីរបស់ទីក្រុងហូជីមិញ ជាចំណុចប្រសព្វនៃវប្បធម៌ និងជាស្ពានចម្លងដ៏សំខាន់ក្នុងសកម្មភាពការបរទេសប្រជាជនរបស់វៀតណាម។

បន្តសកម្មភាពទាំងនេះ នាថ្ងៃទី ១២ ខែមេសា សហព័ន្ធបណ្តាអង្គការមិត្តភាពទីក្រុងហូជីមិញ បានរៀបចំមហោស្រពកីឡាចូលឆ្នាំថ្មីប្រពៃណីជាតិ កម្ពុជា - ឡាវ ឆ្នាំ ២០២៦ សម្រាប់និស្សិត និងសហគមន៍នៃប្រទេសទាំងពីរដែលកំពុងរស់នៅ សិក្សា និងធ្វើការក្នុងទីក្រុង។ មហោស្រពកីឡារួមមានវិញ្ញាសា៖ បាល់ទាត់ សីរោម អុកចត្រង្គ ព្រមទាំងសកម្មភាពផ្លាស់ប្តូរសិល្បៈ និងម្ហូបអាហារប្រពៃណី ដែលរួមចំណែកផ្សព្វផ្សាយស្មារតីសាមគ្គីភាព និងមិត្តភាពរវាងប្រជាជននៃបណ្តាប្រទេសក្នុងតំបន់៕

ឡាវ កម្ពុជា និងចិន បញ្ជូនកងកម្លាំងទៅចូលរួមការដង្ហែក្បួនព្យុហយាត្រា ក្នុងពិធីរំលឹកខួបលើកទី ៥០ នៃទិវារំដោះភាគខាងត្បូងវៀតណាម និងបង្រួបបង្រួមជាតិនៅវៀតណាម ក្នុងសន្និសីទកាសែតជាប្រចាំ នារសៀលថ្ងៃទី២៤ ខែមេសា លោកស្រី Pham Thu Hang អ្នកនាំពាក្យក្រសួងការបរទេសវៀតណាម បានជម្រាបជូនអំពីការចូលរួមរបស់គណៈប្រតិភូអន្តរជាតិក្នុងពិធីរំលឹកខួបលើកទី ៥០ នៃទិវារំដោះភាគខាងត្បូងវៀតណាម និងបង្រួបបង្រួមជាតិ។ ជាពិសេស វៀតណាមមានសេចក្តីសោមនស្សរីករាយដោយទទួលកងកម្លាំងនៃកងទ័ពមកពីប្រទេសឡាវ កម្ពុជា និងចិនដែលមកចូលរួមការដង្ហែក្បួនព្យុហយាត្រា។

យុវជនម្នាក់ៗគឺជាឯកអគ្គរដ្ឋទូតសន្តិភាព និងជាស្ពានតភ្ជាប់សម្រាប់កសាងមិត្តភាព នៅក្នុងពិធីជួបជុំនេះ យុវជន និងនិស្សិតមកពីអាមេរិក ឡាវ កម្ពុជា ថៃ និងវៀតណាម បានធ្វើការណែនាំអំពីប្រទេសជាតិ ប្រជាជន និងតម្លៃវប្បធម៌ប្រពៃណីដ៏លេចធ្លោរបស់ប្រទេសរៀងៗខ្លួន។ តាមរយៈនេះ ប្រតិភូទាំងឡាយមានឱកាសស្គាល់កាន់តែស៊ីជម្រៅអំពីវប្បធម៌ចម្រុះនៅក្នុងតំបន់ ដែលជួយពង្រឹងការយល់ដឹង និងទំនាក់ទំនងរវាងយុវជនជំនាន់ថ្មី។

ហេង វុធ្ធី

thoidai.com.vn