គិតមកទល់ថ្ងៃទី១២ ខែសីហានេះ មានភ្ញៀវក្នុងស្រុកបានចាប់ផ្តើមកក់បន្ទប់ស្នាក់នៅក្នុងខេត្តសៀមរាបជាបន្តបន្ទាប់ហើយ ស្របពេលដែលនៅសល់តែប្រាំថ្ងៃទៀតប៉ុណ្ណោះកម្មវិធីឈប់សម្រាកសៀមរាបនឹងចាប់ផ្តើម។នេះបើតាមការបញ្ជាក់របស់មន្ត្រីនៃមន្ទីរទេសចរណ៍ខេត្តសៀមរាបនៅព្រឹកថ្ងៃទី១៤ ខែសីហា នេះ។
ខេត្តសៀមរាបនៅពេលយប់
មន្ត្រីនៃមន្ទីរទេសចរណ៍បានឲ្យដឹងថា រដ្ឋាភិបាលបានឱ្យឈប់សម្រាកសងថ្ងៃបុណ្យចូលឆ្នាំប្រពៃណីជាតិ ពីថ្ងៃទី១៧ ដល់ថ្ងៃទី២១ ខែសីហា ដែលក្នុងឱកាសថ្ងៃឈប់សម្រាកនេះ រដ្ឋបាលខេត្តសៀមរាប សហការជាមួយសហភាពសហព័ន្ធយុវជនកម្ពុជាខេត្តសៀមរាប បានរៀបចំកម្មវិធីមួយឈ្មោះថា” សម្រាកសៀមរាប” ។
កម្មវិធី សម្រាកសៀមរាប គឺមានតាមបែបប្រពៃណី សាសនា កីឡា និងកម្មវិធីកម្សាន្តជាច្រើនទៀត ដោយអនុវត្តតាមវិធានសុវត្ថិភាពទេសចរណ៍។ ក្នុងនោះមានកម្មវិធីសាសនា ដែលជាការបួងសួងសុំសេចក្តីសុខ , កម្មវិធីតាំងពិព័រណ៍ បន្លែផ្លែឈើ កសិផល នៃផលិតផលរបស់ក្រុង-ស្រុកទាំង១២ , កម្មវិធីប្រកួតម្ហូបអាហារ ពានរង្វាន់មាន់អាំងឆ្ងាញ់ជាងគេនៅខេត្តសៀមរាប , កម្មវិធីផ្សារទឹក , កម្មវិធីជិះទូកកម្សាន្ត , កម្មវិធីកម្សាន្តក្នុងតំបន់ផាប់ស្ទ្រីត , កម្មវិធីជិះកង់កម្សាន្ត , កម្មវិធីកីឡាវាយកូនហ្គោល , កម្មវិធីដើរព្រៃនៅតំបន់រមណីយដ្ឋានធម្មជាតិចង្ក្រានរយ , តំបន់រមណីយដ្ឋានធម្មជាតិភ្នំគូលែន និងផ្ទាំងទស្សនីយភាពសិល្បៈ ព្រមទាំងមានកម្មវិធីកម្សាន្តផ្សេងៗជាច្រើនទៀត ។
ប្រាសាទអង្គវត្តខេត្តសៀមរាប
មន្ត្រីរូបនេះបានឱ្យដឹងទៀតថា គិតរហូតមកដល់រសៀលថ្ងៃទី១២ ខែសីហានេះ ចំនួនភ្ញៀវទេសចរជាតិបានចាប់ផ្តើមធ្វើការកក់បន្ទប់ស្នាក់នៅក្នុងខេត្តសៀមរាបមានជាបន្តបន្ទាប់ហើយ តែមិនទាន់ច្រើននៅឡើយទេ ដោយសារតែតាមទម្លាប់ភ្ញៀវទេសចរជាតិភាគច្រើនមិនសូវកក់បន្ទប់ស្នាក់មុនទេ ច្រើនតែមកដល់ភ្លាមចូលស្នាក់នៅភ្លាម។ជាមួយនេះសង្កេតឃើញថា មានសណ្ឋាគារនិងផ្ទះសំណាក់មួយចំនួននៅខេត្តសៀមរាបក៏បានបញ្ចុះតម្លៃស្នាក់នៅ។ ដូច្នេះរំពឹងថា នៅក្នុងឱកាសនេះ នឹងធ្វើឱ្យចរន្តសេដ្ឋកិច្ចក្នុងខេត្តសៀមរាបល្អប្រសើរជាងបច្ចុប្បន្ន ដោយប្រតិបត្តិករទេសចរណ៍ នឹងទទួលបានចំណូលខ្លះសម្រាប់ធ្វើឱ្យអាជីវកម្មរបស់ពួកគេអាចបន្តដំណើរការទៅមុខទៀតបាន ហើយសម្រាប់ប្រជាពលរដ្ឋនៅក្នុងខេត្តសៀមរាប ក៏អាចទទួលបានប្រយោជន៍ទាំងដោយផ្ទាល់និងប្រយោល៕
（ប្រភពព័ត៌មាន: rasmeinews.com）
មតិពីមិត្តអ្នកអាន