វ៉ាក់ស៊ីនស៊ីណូហ្វាមរបស់ចិនបានសម្រេចអនុម័តឲ្យប្រើប្រាស់ ក្នុងក្របខណ្ឌប្រើប្រាស់បន្ទាន់។ នេះគឺជាវ៉ាក់សាំងទី៥ហើយ ដែលត្រូវបានអង្គការសុខភាពពិភពលោកអនុម័តឲ្យប្រើប្រាស់ បន្ទាប់ពីបានសិក្សាយ៉ាងលម្អិតរួចមក អំពីសុវត្ថិភាព ប្រសិទ្ធភាព និងគុណភាព។
 |
វ៉ាក់សាំងបង្ការជំងឺកូវីដ ១៩ ស៊ីណូហ្វាមចំនួន ១ លានដូសបន្ថែមទៀត បានមកដល់ប្រទេសកម្ពុជាហើយ |
វ៉ាក់សាំងបង្ការជំងឺកូវីដ ១៩ ស៊ីណូហ្វាមចំនួន ១ លានដូសបន្ថែមទៀតត្រូវបានដឹកមកដល់ប្រទេសកម្ពុជាហើយនៅរសៀលថ្ងៃទី ១២ ខែ មិថុនានេះ ដែលនេះជាវ៉ាក់សាំងលើកទី ៧ ហើយពីសាធារណរដ្ឋប្រជាមានិតចិន ទាំងវ៉ាក់សាំងដែលរាជរដ្ឋាភិបាលកម្ពុជាបានបញ្ជាទិញ និងការផ្តល់ជាជំនួយសប្បុរសពីមិត្តចិន។ លើកនេះជាវ៉ាក់សាំងប្រភេទស៊ីណូហ្វាម ដែលរដ្ឋាភិបាលកម្ពុជាបញ្ជាទិញពីចិន ចំនួន១លានដូសទៀត។ ការទទួលបានវ៉ាក់សាំងបន្ថែមនេះ ធ្វើឱ្យកម្ពុជា មានវ៉ាក់សាំងបង្ការកូវីដ-១៩ សរុបជាង៨លានដូសសម្រាប់ចាក់ជូនពលរដ្ឋ។
នៅក្នុងខែមិថុនានេះ វ៉ាក់សាំងប្រមាណ ៤,៥ លានដូសនឹងដឹកមកដល់ប្រទេសកម្ពុជា ដែលជាការជួយឱ្យកម្ពុជាមានវ៉ាក់សាំងគ្រប់គ្រាន់សម្រាប់ចាក់ជូនប្រជាពលរដ្ឋ។ លោកនាយករដ្ឋមន្ត្រី ហ៊ុន សែន មានគោលដៅចាក់វ៉ាក់សាំងការពារវីរុសកូវីដ ១៩ ទៅដល់ប្រជាពលរដ្ឋកម្ពុជាឱ្យបានយ៉ាងហោចណាស់ ៥ ទៅ ៦ លាននាក់មុនបំណាច់ឆ្នាំ ២០២១ នេះ។
បច្ចុប្បន្ន កម្ពុជាមានវ៉ាក់សាំងបង្ការកូវីដ-១៩ចំនួន៣ប្រភេទ ស្មើនឹង៧លានដូស ដោយក្នុងនោះ វ៉ាក់សាំងរបស់ក្រុមហ៊ុនSinopharm ចំនួន ២,២លានដូស ដែលកម្ពុជាទទួលបានពីរដ្ឋាភិបាលចិន។ បន្ទាប់មកកម្ពុជា ក៏ទទួលបានវ៉ាក់សាំងCOVISHIELD ចំនួន៣២៤,០០០ដូស ជាជំនួយរបស់កម្មវិធីCOVAX និង ៤,៥លានដូសទៀត ជាវ៉ាក់សាំងរបស់ក្រុមហ៊ុនSinovac ដែលកម្ពុជាបញ្ជាទិញពីចិន។
សម្តេចតេជោ ហ៊ុន សែន បានលើកឡើងថា រាជរដ្ឋាភិបាលកម្ពុជាបានដាក់ចេញយុទ្ធសាស្ត្រចាក់វ៉ាក់សាំងនេះឱ្យបានលឿន តាមដែលអាចធ្វើទៅបានជូនដល់ប្រជាពលរដ្ឋរបស់ខ្លួន។ ទន្ទឹមនឹងនេះរាជរដ្ឋាភិបាលស្វះស្វែងរកវ៉ាក់សាំង ហើយបាននាំមកដល់នូវវ៉ាក់សាំងជាបន្តបន្ទាប់ សម្រាប់ចាក់ជូនប្រជាពលរដ្ឋរបស់ខ្លួន។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី ១១ ខែមិថុនា កម្ពុជាបានចាក់វ៉ាក់សាំងជូនប្រជាពលរដ្ឋទូទាំងប្រទេសបានចំនួនជាង ២,៨ លាននាក់ហើយ ឬស្មើនឹង ២៨,៣៦%៕
មតិពីមិត្តអ្នកអាន