ការកែប្រែ បំពេញបន្ថែមលក្ខន្តិកៈនៃសហភាពបណ្តាអង្គការមិត្តភាពវៀតណាម

ធ្វើសេចក្តីរាយការណ៍ស្តីពីការកែប្រែ បំពេញបន្ថែមលក្ខន្តិកៈ អនុប្រធានសហភាពបណ្តាអង្គការមិត្តភាពវៀតណាម លោក Dong Huy Cuong បានឱ្យដឹងថា លក្ខន្តិកៈបច្ចុប្បន្នដែលត្រូវបានមហាសន្និបាតតំណាងទូទាំងប្រទេសលើកទី VI អនុម័តនាឆ្នាំ ២០១៩ និងត្រូវបាននាយករដ្ឋមន្ត្រីនៃរដ្ឋាភិបាលផ្តល់ការយល់ព្រមនាឆ្នាំ ២០២១ គឺជាមូលដ្ឋានដ៏សំខាន់ដើម្បីឱ្យសហភាពបំពេញបានយ៉ាងល្អនូវភារកិច្ចនៅក្នុងអាណត្តិកន្លងមក។ ចំពោះមុខបរិបទពិភពលោកដែលមានការប្រែប្រួលជាច្រើន រាល់គោលការណ៍សម្រេចចិត្តដ៏សំខាន់នៃមហាសន្និបាតលើកទី XIV របស់បក្សបានពង្រីកលំហ ប៉ុន្តែក៏បានដាក់ចេញនូវតម្រូវការកាន់តែខ្ពស់ផងដែរចំពោះសហភាពបណ្តាអង្គការមិត្តភាពវៀតណាម និងបណ្តាអង្គការសមាជិកនៅថ្នាក់មជ្ឈិម និងមូលដ្ឋាន។

យោងតាមលោក Dong Huy Cuong ឈ្មោះហៅ និងនីតិវិធីបោះឆ្នោតជ្រើសតាំងស្ថាប័នដឹកនាំមួយចំនួននៃសហភាពបណ្តាអង្គការមិត្តភាពវៀតណាម លែងស្របគ្នាជាមួយបទប្បញ្ញត្តិថ្មីនានារបស់បក្ស និងរដ្ឋទៀតហើយ។ ហេតុដូច្នេះហើយ ការកែប្រែ បំពេញបន្ថែមលក្ខន្តិកៈនៃសហភាពបណ្តាអង្គការមិត្តភាពវៀតណាមគឺជារឿងចាំបាច់។

លក្ខន្តិកៈដែលបានកែប្រែ បំពេញបន្ថែម នៅរក្សាដដែលចំនួន ៩ ជំពូក បំពេញបន្ថែម ២ មាត្រា បើធៀបនឹងលក្ខន្តិកៈបច្ចុប្បន្ន ដោយធ្វើឱ្យចំនួនសរុបកើនពី ៣២ ឡើងដល់ ៣៤ មាត្រា។

អនុប្រធានសហភាពបណ្តាអង្គការមិត្តភាពវៀតណាម Dong Huy Cuong ធ្វើសេចក្តីរាយការណ៍ស្តីពីការកែប្រែ បំពេញបន្ថែមលក្ខន្តិកៈ។

ធ្វើឱ្យព្រមៗគ្នានូវគំរូរចនាសម្ព័ន្ធចាត់តាំង និងនីតិវិធីបុគ្គលិក

ការផ្លាស់ប្តូរគួរឱ្យកត់សម្គាល់ជាដំបូងគឺឈ្មោះស្ថាប័នដឹកនាំនៃសហភាពបណ្តាអង្គការមិត្តភាពវៀតណាមរវាងមហាសន្និបាតទាំងពីរត្រូវបានកែសម្រួលពី «គណៈប្រធាន» មកជា «គណៈប្រតិបត្តិការ» ភារកិច្ច និងសិទ្ធិអំណាចរបស់គណៈប្រតិបត្តិការក៏ត្រូវបានកែសម្រួលឱ្យស្របគ្នាជាមួយបទប្បញ្ញត្តិថ្មីនានានៅក្នុងអនុក្រឹត្យលេខ ១២៦/២០២៤/ND-CP។

សេចក្តីព្រាងក៏បានលុបចោលតំណែង «អនុប្រធាន - អគ្គលេខាធិការ» ផងដែរ។

នីតិវិធីបោះឆ្នោតជ្រើសតាំងគណៈកម្មាធិការត្រួតពិនិត្យ និងប្រធានគណៈកម្មាធិការត្រួតពិនិត្យក៏ត្រូវបានកែប្រែផងដែរ។ ជំនួសឱ្យគណៈកម្មាធិការត្រួតពិនិត្យត្រូវបានបោះឆ្នោតជ្រើសតាំងដោយមហាសន្និបាតតំណាងទូទាំងប្រទេស ហើយប្រធានគណៈកម្មាធិការត្រួតពិនិត្យត្រូវបានបោះឆ្នោតជ្រើសតាំងដោយគណៈកម្មាធិការត្រួតពិនិត្យដូចបច្ចុប្បន្ន សេចក្តីព្រាងបានកំណត់ថា គណៈកម្មាធិការត្រួតពិនិត្យ និងប្រធានគណៈកម្មាធិការត្រួតពិនិត្យ សុទ្ធសឹងតែត្រូវបានបោះឆ្នោតជ្រើសតាំងដោយគណៈប្រតិបត្តិការ។

រាល់ការផ្លាស់ប្តូរទាំងនេះគឺសំដៅធ្វើឱ្យព្រមៗគ្នានូវឈ្មោះហៅ គំរូរចនាសម្ព័ន្ធចាត់តាំង និងនីតិវិធីបុគ្គលិកជាមួយបទប្បញ្ញត្តិជាធរមាននានា។

សេចក្តីព្រាងក៏បានដំឡើងដែនកំណត់នៃចំនួនសមាជិកគណៈប្រតិបត្តិការ និងសមាជិកគណៈកម្មាធិការត្រួតពិនិត្យដែលត្រូវបានបោះឆ្នោតជ្រើសតាំងបំពេញបន្ថែមក្នុងអាណត្តិពីមិនលើសពី ១/៣ ឡើងដល់មិនលើសពី ១/២ នៃចំនួនសរុបសមាជិកដែលត្រូវបានមហាសន្និបាតសម្រេច តាមរយៈនោះបង្កើនលទ្ធភាពនៃការធ្វើឱ្យពេញលេញនូវបុគ្គលិកនៅពេលមានតម្រូវការជាក់ស្តែង។

ខ្លឹមសារថ្មីមួយទៀតគឺការបំពេញបន្ថែមបទប្បញ្ញត្តិស្តីពីផ្នែកប្រចាំការនៃបណ្តាអង្គការសមាជិកនៅថ្នាក់មជ្ឈិម។ យោងតាមនោះ បណ្តាគណៈតំបន់ចំណុះទីស្នាក់ការសហភាពបណ្តាអង្គការមិត្តភាពវៀតណាម អនុវត្តមុខងារប្រចាំការ ជួយដល់គណៈប្រចាំការនៃសហភាពបណ្តាអង្គការមិត្តភាពវៀតណាមក្នុងការណែនាំ តាមដាន និងជួយគាំទ្រសកម្មភាពរបស់បណ្តាអង្គការសមាជិកនៅថ្នាក់មជ្ឈិម។

សេចក្តីព្រាងក៏បានបំពេញបន្ថែមបទប្បញ្ញត្តិស្តីពីទីស្នាក់ការសហភាពបណ្តាអង្គការមិត្តភាពខេត្ត ក្រុង គឺជាស្ថាប័នទទួលបន្ទុកជំនាញដែលដឹកនាំដោយប្រធានសហភាពបណ្តាអង្គការមិត្តភាពខេត្ត ក្រុង។ រចនាសម្ព័ន្ធចាត់តាំងត្រូវបានកំណត់ដោយថ្នាក់មានសមត្ថកិច្ចនៅមូលដ្ឋាន ស្របតាមច្បាប់ និងស្ថានភាពជាក់ស្តែង។

បទប្បញ្ញត្តិទាំងពីរនេះបានបញ្ជាក់ឱ្យកាន់តែច្បាស់អំពីច្រកចេញចូលជួយគាំទ្រដល់បណ្តាអង្គការសមាជិកនៅថ្នាក់មជ្ឈិម និងមូលដ្ឋានរចនាសម្ព័ន្ធចាត់តាំងទទួលបន្ទុកជំនាញនៅមូលដ្ឋាន។

ការគ្រប់គ្រងដឹកនាំជាប្រចាំ និងមានភាពបត់បែនជាងមុន

សេចក្តីព្រាងបានបង្កើនភាពញឹកញាប់នៃការប្រជុំរបស់ស្ថាប័នដឹកនាំនានា។ យោងតាមនោះ គណៈប្រតិបត្តិការប្រជុំសាមញ្ញមួយឆ្នាំពីរដង ជំនួសឱ្យមួយដងដូចលក្ខន្តិកៈបច្ចុប្បន្ន។ គណៈអចិន្ត្រៃយ៍ប្រជុំសាមញ្ញបីខែម្តង ជំនួសឱ្យប្រាំមួយខែម្តង។

ការបង្កើនភាពញឹកញាប់នៃការប្រជុំបានបង្កើតលក្ខខណ្ឌឱ្យគណៈប្រតិបត្តិការ និងគណៈអចិន្ត្រៃយ៍ពិនិត្យ ដោះស្រាយការងារបានជាប្រចាំ និងទាន់ពេលវេលាជាងមុន។

សេចក្តីព្រាងក៏បានបំពេញបន្ថែមទម្រង់នៃការប្រជុំដោយផ្ទាល់ តាមប្រព័ន្ធអនឡាញ ឬរួមបញ្ចូលទាំងពីរ។ ការងារនេះជួយឱ្យរបៀបរបបធ្វើការងារកាន់តែមានភាពបត់បែន ស្របតាមតម្រូវការនៃបរិវត្តកម្មឌីជីថល និងលក្ខខណ្ឌធ្វើសកម្មភាពជាក់ស្តែង។

អារម្ភកថានៃលក្ខន្តិកៈត្រូវបានកែសម្រួល បំពេញបន្ថែមតាមស្មារតីនៃសេចក្តីសម្រេចចិត្តនៃមហាសន្និបាតលើកទី XIV របស់បក្ស និងតម្រូវការដែលបានដាក់ចេញក្នុងបរិបទថ្មី ព្រមទាំងលុបចោលចំណងជើង «អារម្ភកថា» ដោយយោងតាមរបៀបបង្ហាញនៅក្នុងលក្ខន្តិកៈបក្ស លក្ខន្តិកៈរណសិរ្សមាតុភូមិវៀតណាម និងអង្គការនយោបាយ - សង្គមមួយចំនួន។

ក្រៅពីនោះ សេចក្តីព្រាងនៅមានការកែសម្រួលលម្អិតមួយចំនួនទៀតដើម្បីឱ្យស្របគ្នាជាមួយអនុក្រឹត្យលេខ ១២៦/២០២៤/ND-CP៕

ការជំរុញទំនាក់ទំនងសេដ្ឋកិច្ច ពាណិជ្ជកម្ម វៀតណាម - សហភាពអឺរ៉ុប យុគសម័យ - នារសៀលថ្ងៃទី ២២ ខែឧសភា នៅ Hà Nội អនុប្រធានរដ្ឋសភា លោក Nguyen Hong Dien បានទទួលជួបសមាគមសហគ្រាសអឺរ៉ុបប្រចាំនៅវៀតណាម (EuroCham) ដឹកនាំដោយប្រធាន EuroCham លោក Bruno Jaspaer ក្នុងឱកាសអញ្ជើញមកបំពេញទស្សនកិច្ច និងបំពេញការងារនៅវៀតណាម។

បើកមហាសន្និបាតតំណាងទូទាំងប្រទេសនៃសហភាពយុវជនលើកទី ១៣ យុគសម័យ - មហាសន្និបាតរួមមាន ៤ សម័យប្រជុំ ដោយផ្តោតលើខ្លឹមសារសំខាន់ៗចំនួន ៣ រួមមាន៖ បូកសរុប និងវាយតម្លៃការងារសហភាពយុវជនអាណត្តិ ២០២២-២០២៦; កំណត់គោលដៅសម្រាប់អាណត្តិ ២០២៦-២០៣១ និងធ្វើវិសោធនកម្ម បំពេញបន្ថែមលក្ខន្តិកៈសហភាពយុវជន។

សុវណ្ណា