ថ្ងៃទី១៣ ខែកុម្ភៈ ឆ្នាំ២០២១ --ក្នុងឱកាសបុណ្យចូលឆ្នាំចិន នាថ្ងៃទី១២ ខែកុម្ភៈ ឆ្នាំ២០២១នេះ ភ្ញៀវទេសចរយ៉ាងច្រើន ពិសេសភ្ញៀវទេសចរជាតិ បានសម្រុកទៅលេងខេត្តកំពត ដោយទទួលបាន ភ្ញៀវទេសចរសរុប ចំនួន២៣ ២៧៨ នាក់។ នេះបើយោងតាម ក្រសួងទេសចរណ៍។
ក្រសួងទេសចរណ៍៖ ក្នុងឱកាសបុណ្យចូលឆ្នាំចិននេះ ភ្ញៀវទេសចរសម្រុកទៅលេងខេត្តកំពតមានចំនួន ២៣ ២៧៨ នាក់
លោក សយ ស៊ីណុល ប្រធានមន្ទីរទេសចរណ៍ខេត្តកំពតបានគូសបញ្ជាក់ថា មន្ទីរទេសចរណ៍ខេត្តបានចាត់ ក្រុមការងារចំនួន ៤ ក្រុម ចុះតាមគោលដៅ និងសេវាកម្មទេសចរណ៍នានាក្នុងខេត្ត ដើម្បីជំរុញការពង្រឹង គុណភាព ផលិតផល សេវាកម្ម អនាម័យ បរិស្ថាន សណ្តាប់ធ្នាប់ និងការអនុវត្តវិធានសុវត្ថិភាពទេសចរណ៍ ដើម្បីទប់ស្កាត់ ការឆ្លងរីករាលដាលជំងឺកូវីដ១៩។ លោកបានបន្ដថា ថ្ងៃដំបូងឱកាសបុណ្យចូលឆ្នាំចិន ឆ្នាំ២០២១ នេះភ្ញៀវទេសចរមកលេងខេត្តកំពតមានចំនួនសរុប ២៣ ២៧៨ នាក់ ក្នុងនោះភ្ញៀវទេសចរ ជាតិចំនួន ២៣ ១០០ នាក់ និងភ្ញៀវ ទេសចរអន្តរជាតិផ្ទៃក្នុងចំនួន ១៧៨ នាក់។ លោកប្រធានមន្ទីរបានលើកឡើងថា ស្ថានភាពអនាម័យ បរិស្ថាន សណ្តាប់ធ្នាប់ ចរារចរណ៍ បានប្រព្រឹត្តទៅដោយរលូនពុំមានបញ្ហាអ្វីកើត ឡើងគួរឱ្យយកត់សម្គាល់ឡើយ។ រីឯសេវាកម្មម្ហូបអាហារ ការស្នាក់នៅ និងសេវាកម្មផ្សេងៗទៀតពុំមាន ការដំឡើងថ្លៃហួសហេតុនាំឱ្យមាន បាតុភាពនោះទេ។
សូមបញ្ជាក់ថា ក្រុមការងារមន្ទីរទរសចរណ៍ខេត្តកំពត បានសហការជាមួយនគរបាលទេសចរណ៍ ចរាចរណ៍ ជើងទឹក ក្នុងការពង្រឹងសុវត្ថិភាពតាមទូកជំរុញអាក់អាវពោងសុវត្ថិភាព ការបង្ការការឆ្លងជំងឺកូវីដ១៩៕
（ប្រភពព័ត៌មាន: AKP）
មតិពីមិត្តអ្នកអាន