យុគសម័យ - គិតត្រឹមថ្ងៃទី ៩ ខែវិច្ឆិកា ឆ្នាំ ២០២៦ ខេត្ត Ninh Binh បានទទួលភ្ញៀវទេសចរជាង ២២,៣ លាននាក់ ដោយទទួលបានប្រាក់ចំណូលសរុបពីវិស័យទេសចរណ៍ជាង ២៣.៣៤៤ ពាន់លានដុង។ ទន្ទឹមនឹងសន្ទុះនៃកំណើននេះ ខេត្តបានផ្តោតសំខាន់លើការបង្កើតថ្មីនូវផលិតផលទេសចរណ៍ពីបេតិកភណ្ឌ និងវប្បធម៌ក្នុងតំបន់ ការលើកកម្ពស់គុណភាពសេវាកម្ម ការពន្យារពេលស្នាក់នៅ និងការបង្កើតមុខរបរបន្ថែមទៀតជូនប្រជាពលរដ្ឋ។
| គេហទំព័រទេសចរណ៍វៀតណាមឈរនៅលំដាប់ទីពីរនៅអាស៊ីអាគ្នេយ៍ខាងចំនួនអ្នកចូលទស្សនា រដ្ឋធានីហាណូយ អភិវឌ្ឍវិស័យទេសចរណ៍ចេញពីតម្លៃនៃអាវផាយប្រពៃណី |
![]() |
| តំបន់ទេសចរណ៍ជាតិ Tam Chuc (សង្កាត់ Tam Chuc ខេត្ត Ninh Binh)។ |
ដោយមានទេសភាពធម្មជាតិ បេតិកភណ្ឌវប្បធម៌ និងគោលដៅទេសចរណ៍ល្បីៗជាច្រើន ខេត្ត Ninh Binh មានឧត្តមភាពក្នុងការអភិវឌ្ឍវិស័យទេសចរណ៍បេតិកភណ្ឌ អេកូឡូស៊ី វប្បធម៌ និងសាសនា។ ទោះជាយ៉ាងណាក៏ដោយ មូលដ្ឋាននេះមិនត្រឹមតែកំណត់គោលដៅបង្កើនចំនួនភ្ញៀវទេសចរប៉ុណ្ណោះទេ ប៉ុន្តែថែមទាំងឆ្ពោះទៅរកការលើកកម្ពស់គុណភាពបទពិសោធន៍ កម្រិតនៃការចំណាយ និងលទ្ធភាពទាក់ទាញភ្ញៀវទេសចរឱ្យត្រឡប់មកកម្សាន្តម្តងទៀតផងដែរ។
ដើម្បីសម្រេចបាននូវគោលដៅនេះ តំបន់ និងគោលដៅទេសចរណ៍នានាកំពុងធ្វើការកែប្រែថ្មីនូវផលិតផលជាជំហានៗ ទាញយកតម្លៃបេតិកភណ្ឌឱ្យកាន់តែស៊ីជម្រៅ ផ្សារភ្ជាប់ជាមួយជីវភាពសហគមន៍ និងលើកកម្ពស់គុណភាពសេវាកម្ម។
ការបង្កើតថ្មីនូវផលិតផលពីវប្បធម៌ក្នុងតំបន់ និងបេតិកភណ្ឌ
នៅតំបន់ទេសចរណ៍វប្បធម៌ Thung Ui សង្កាត់ Tay Hoa Lu លំហវប្បធម៌ជនជាតិ Muong កំពុងក្លាយជាចំណុចលេចធ្លោមួយដែលទាក់ទាញភ្ញៀវទេសចរ។
ក្រៅពីទេសភាពធម្មជាតិ តំបន់ទេសចរណ៍នេះបានឧទ្ទេសនាមអំពីលក្ខណៈពិសេសនៃទំនៀមទម្លាប់ ប្រពៃណី និងការរស់នៅជាសហគមន៍របស់បងប្អូនជនជាតិ Muong។ សកម្មភាពនានាដូចជា ផ្សារ Muong ផ្ទះបាយ Muong គ្រែឬស្សី Muong របាំ Muong និងល្បែងប្រជាប្រិយ ត្រូវបានស្រាវជ្រាវ និងរៀបចំឡើង ក្នុងគោលបំណងនាំយកវប្បធម៌ក្នុងតំបន់ឱ្យក្លាយជាផ្នែកមួយនៃផលិតផលទេសចរណ៍។
តំបន់ Thung Ui ក៏បានអភិវឌ្ឍកម្មវិធីអប់រំបែបបទពិសោធន៍សម្រាប់សិស្សានុសិស្ស ដោយរួមបញ្ចូលគ្នារវាងការស្វែងយល់អំពីប្រវត្តិសាស្ត្រ វប្បធម៌ ជាមួយនឹងសកម្មភាពជាក់ស្តែង។
នាថ្ងៃទី ១៥ ខែវិច្ឆិកា សិស្សានុសិស្សប្រមាណ ៣.៥០០ នាក់ មកពីវិទ្យាល័យឯកទេស Bien Hoa និងវិទ្យាល័យ Le Hoan បានចូលរួមក្នុងកម្មវិធីស្វែងយល់អំពីសំណង់ និងទីតាំងនានាដូចជា វិមាន Kinh Dia វិមាន Kinh Nhan វិមាន Kinh Thien ទីសក្ការៈ Dan Kinh Thien និងល្អាង Hang Boi។
តាមរយៈដំណើរទស្សនកិច្ចនេះ សិស្សានុសិស្សបានស្វែងយល់ដោយផ្ទាល់អំពីប្រវត្តិសាស្ត្រ វប្បធម៌ និងឫសគល់នៃប្រជាជាតិនៅក្នុងលំហបេតិកភណ្ឌ ព្រមទាំងបានចូលរួមការផ្លាស់ប្តូរសិល្បៈ ទទួលយកបទពិសោធន៍វប្បធម៌ជនជាតិ Muong និងការដុតភ្លើងជំរំផងដែរ។
យោងតាមអ្នកគ្រូ Nguyen Thi Bich Hang នាយិកាវិទ្យាល័យឯកទេស Bien Hoa នេះគឺជាទម្រង់នៃការអប់រំដោយផ្ទាល់ភ្នែក ដែលរួមចំណែកពង្រីកការយល់ដឹង និងបណ្តុះទឹកចិត្តស្រឡាញ់ស្រុកកំណើត និងប្រទេសជាតិដល់សិស្សានុសិស្ស។
យោងតាមអង្គភាពប្រតិបត្តិការ ក្នុងរយៈពេលប្រមាណ ១១ ខែ ឆ្នាំ ២០២៦ តំបន់ Thung Ui បានទទួលភ្ញៀវទេសចរជាង ៥០០.០០០ នាក់ ដែលលើសពីផែនការប្រចាំឆ្នាំ និងបានបង្កើតការងារសម្រាប់ពលករអចិន្ត្រៃយ៍ និងពលករតាមរដូវកាលប្រមាណ ៦០០ នាក់។
លោក Phung The Quynh នាយកប្រតិបត្តិនៃតំបន់ទេសចរណ៍វប្បធម៌ Thung Ui បានឱ្យដឹងថា អង្គភាពកំពុងផ្តោតសំខាន់លើការកែប្រែថ្មីនូវសកម្មភាពបទពិសោធន៍នានា ក្នុងគោលបំណងបង្កើតភាពខុសប្លែកគ្នា និងរក្សាភាពទាក់ទាញឱ្យបានយូរអង្វែង។
យោងតាមលោក ជំនួសឱ្យការគ្រាន់តែទស្សនា និងថតរូបនៅតាមរមណីយដ្ឋានល្បីៗ ភ្ញៀវទេសចរជាច្រើននាពេលបច្ចុប្បន្នចង់ផ្សារភ្ជាប់ខ្លួនទៅនឹងធម្មជាតិ ស្វែងយល់អំពីប្រវត្តិសាស្ត្រ ភ្លក្សរសជាតិម្ហូបអាហារ និងទទួលយកបទពិសោធន៍វប្បធម៌ក្នុងតំបន់ដោយផ្ទាល់។
មិនត្រឹមតែនៅតំបន់ Thung Ui ប៉ុណ្ណោះទេ ការរួមបញ្ចូលគ្នារវាងការអភិរក្សបេតិកភណ្ឌ និងការអភិវឌ្ឍផលិតផលបទពិសោធន៍ ក៏ត្រូវបានយកចិត្តទុកដាក់នៅតំបន់ទេសភាព Trang An និងតំបន់ទេសចរណ៍ជាតិ Tam Chuc ផងដែរ។
អ្នកស្រី Venkata Shindhu ភ្ញៀវទេសចរមកពីប្រទេសឥណ្ឌា បានឱ្យដឹងថា នេះគឺជាលើកទីមួយហើយដែលអ្នកស្រីបានមកដល់ប្រទេសវៀតណាម ទោះបីជាធ្លាប់បានធ្វើដំណើរកម្សាន្តនៅប្រទេសជាច្រើនក៏ដោយ។ អ្នកស្រីមានការភ្ញាក់ផ្អើលចំពោះសម្រស់នៃតំបន់ Tam Chuc និងកត់សម្គាល់ឃើញថាទេសភាព និងវត្តអារាមនៅទីនេះមានលក្ខណៈស្រដៀងគ្នាជាច្រើនទៅនឹងប្រទេសឥណ្ឌា ដូច្នេះអ្នកស្រីបានចំណាយពេលវេលាដើម្បីស្វែងយល់ពីគោលដៅទស្សនានានាដែលត្រូវបានណែនាំ។
យោងតាមលោក Nguyen Quoc Khanh អ្នកទទួលបន្ទុកផ្នែកផ្សព្វផ្សាយនៃតំបន់ទេសចរណ៍ជាតិ Tam Chuc ភ្ញៀវទេសចរអន្តរជាតិកាន់តែមានចំណាប់អារម្មណ៍ក្នុងការស្វែងយល់អំពីវប្បធម៌ក្នុងតំបន់ ក្នុងនោះរួមមានទាំងបទពិសោធន៍នៃការចម្អិនម្ហូបប្រពៃណីជាមួយប្រជាពលរដ្ឋផងដែរ។ ដូច្នេះហើយ តំបន់ទេសចរណ៍កំពុងកែលម្អសេវាកម្ម និងបង្កើនការតភ្ជាប់ជាមួយសហគមន៍ ដើម្បីរៀបចំសកម្មភាពឱ្យបានសមស្រប។
នៅតាមគោលដៅទេសចរណ៍ផ្សេងទៀត សកម្មភាពបង្កើតថ្មីនូវផលិតផលក៏ត្រូវបានដាក់ឱ្យអនុវត្តផងដែរ។ នៅតំបន់ Tam Coc - Bich Dong ដងទន្លេផ្កាព្រលិតបានបង្កើតចំណុចលេចធ្លោបន្ថែមទៀតសម្រាប់ដំណើរទស្សនកិច្ច។ ទន្ទឹមនឹងនេះ តំបន់ Hang Mua និងតំបន់ Thung Nham បានយកចិត្តទុកដាក់លើការកែលម្អទេសភាព ការលើកកម្ពស់គុណភាពសេវាកម្ម និងការស្រាវជ្រាវរៀបចំកម្មវិធីវប្បធម៌ ម្ហូបអាហារ និងព្រឹត្តិការណ៍នានាឱ្យស្របតាមចំណង់ចំណូលចិត្តរបស់ភ្ញៀវទេសចរ។
សកម្មភាពទាំងនេះបង្ហាញថា វិស័យទេសចរណ៍ខេត្ត Ninh Binh កំពុងផ្លាស់ប្តូរជាជំហានៗពីការទស្សនា និងគយគន់ទេសភាព ទៅជាការទាញយកបទពិសោធន៍ដែលមានភាពស៊ីជម្រៅ។ ការពង្រីកលក្ខណៈពិសេសរបស់គោលដៅទេសចរណ៍នីមួយៗ ទន្ទឹមនឹងការបង្កើនការតភ្ជាប់រវាងតំបន់ទេសចរណ៍នានា ត្រូវបានរំពឹងថានឹងលើកកម្ពស់កម្រិតនៃការចំណាយ ពន្យារពេលស្នាក់នៅ និងបង្កើតមុខរបរបន្ថែមទៀតសម្រាប់សហគមន៍។
ការលើកកម្ពស់គុណភាពសេវាកម្ម និងការពង្រីកទីផ្សារអន្តរជាតិ
យោងតាមមន្ទីរទេសចរណ៍ខេត្ត Ninh Binh គិតត្រឹមថ្ងៃទី ៩ ខែវិច្ឆិកា ឆ្នាំ ២០២៦ ខេត្តទាំងមូលបានទទួលភ្ញៀវទេសចរជាង ២២,៣ លាននាក់ ក្នុងនោះមានភ្ញៀវទេសចរក្នុងស្រុកជាង ១៩,៥ លាននាក់ និងភ្ញៀវទេសចរអន្តរជាតិជាង ២,៨ លាននាក់។
ប្រាក់ចំណូលសរុបពីសកម្មភាពទេសចរណ៍សម្រេចបានជាង ២៣.៣៤៤ ពាន់លានដុង កើនឡើង ២៣,១៧% បើធៀបនឹងរយៈពេលដូចគ្នាកាលពីឆ្នាំមុន និងលើសផែនការប្រចាំឆ្នាំចំនួន ១៦,៧២%។
នៅត្រឹមឆ្នាំ ២០៣០ ខេត្ត Ninh Binh ខិតខំទទួលភ្ញៀវទេសចរឱ្យបានជាង ៣០ លាននាក់ ក្នុងនោះភ្ញៀវទេសចរអន្តរជាតិសម្រេចបានចាប់ពី ៤ ដល់ ៤,៥ លាននាក់ ហើយប្រាក់ចំណូលសរុបពីវិស័យទេសចរណ៍សម្រេចបានជាង ៤៥.០០០ ពាន់លានដុង។ ខេត្តនេះឆ្ពោះទៅរកការក្លាយជាមជ្ឈមណ្ឌលទេសចរណ៍បេតិកភណ្ឌ អេកូឡូស៊ី វប្បធម៌ និងសាសនារបស់ប្រទេសវៀតណាម ព្រមទាំងជាមជ្ឈមណ្ឌលរៀបចំព្រឹត្តិការណ៍លំដាប់ថ្នាក់ជាតិ និងអន្តរជាតិ។
ដើម្បីសម្រេចបាននូវគោលដៅនេះ មូលដ្ឋានបានយកចិត្តទុកដាក់លើការអភិវឌ្ឍផលិតផលប្រកបដោយគុណភាពខ្ពស់ ការលើកកម្ពស់ភាពស៊ីសង្វាក់គ្នានៃសេវាកម្ម និងការកែលម្អហេដ្ឋារចនាសម្ព័ន្ធបម្រើឱ្យវិស័យទេសចរណ៍ឱ្យកាន់តែពេញលេញ។
បច្ចុប្បន្ន ខេត្តទាំងមូលមានតំបន់ និងគោលដៅទេសចរណ៍ចំនួន ១៧ ដែលត្រូវបានទទួលស្គាល់ តំបន់ គោលដៅ និងទីតាំងដែលមានសក្តានុពលអភិវឌ្ឍន៍ទេសចរណ៍ជិត ៦០ កន្លែង និងសហគ្រាសប្រកបអាជីវកម្មសេវាកម្មទេសចរណ៍ចំនួន ៨៦។ ប្រព័ន្ធស្នាក់នៅរួមមានគ្រឹះស្ថានចំនួន ១.៥៥៨ ដែលមានបន្ទប់ជិត ២៣.០០០ បន្ទប់។ វិស័យទាំងមូលបានរក្សាពលករដោយផ្ទាល់ជាង ៤៦.៥០០ នាក់។
ទំហំប្រតិបត្តិការដែលកាន់តែរីកធំឡើង ទាមទារឱ្យមានការលើកកម្ពស់គុណភាពបម្រើសេវាកម្ម។ ក្រុមមគ្គុទ្ទេសក៍ទេសចរណ៍ បុគ្គលិកផ្នែកស្នាក់នៅ ភោជនីយដ្ឋាន និងប្រជាពលរដ្ឋដែលចូលរួមក្នុងវិស័យទេសចរណ៍ ចាំបាច់ត្រូវបំពាក់នូវចំណេះដឹង ជំនាញវិជ្ជាជីវៈ និងភាសាបរទេស។ ចំពោះភ្ញៀវទេសចរអន្តរជាតិ ការផ្តល់ព័ត៌មានពហុភាសា ការបង្កលក្ខណៈងាយស្រួលក្នុងការធ្វើដំណើរ ការទូទាត់ប្រាក់ និងការទទួលបានសេវាកម្ម គឺជាកត្តាដ៏សំខាន់។
លោកស្រី Duong Thi Thanh ប្រធានសមាគមទេសចរណ៍ខេត្ត Ninh Binh បានវាយតម្លៃថា ទីផ្សារភ្ញៀវទេសចរអន្តរជាតិបានបើកឱកាសជាច្រើន ប៉ុន្តែក៏បានដាក់ចេញនូវតម្រូវការខ្ពស់ចំពោះគុណភាពសេវាកម្ម វិជ្ជាជីវៈ និងសមត្ថភាពឆ្លើយតបទៅនឹងតម្រូវការដ៏សម្បូរបែបផងដែរ។
យោងតាមលោកស្រី សហគ្រាសចាំបាច់ត្រូវផ្លាស់ប្តូរផ្នត់គំនិតធ្វើអាជីវកម្មដាច់ដោយឡែកពីគ្នា ហើយបង្កើនការតភ្ជាប់ដើម្បីលើកកម្ពស់គុណភាពនៃគោលដៅទេសចរណ៍។ សមាគមបន្តជំរុញឱ្យអង្គភាពនានាកែប្រែថ្មីនូវផលិតផល យកចិត្តទុកដាក់លើអរិយធម៌ទេសចរណ៍ និងកែលម្អគុណភាពនៃការបម្រើសេវាកម្ម។
ទន្ទឹមនឹងការលើកកម្ពស់គុណភាពសេវាកម្ម ខេត្ត Ninh Binh កំពុងជំរុញការផ្សព្វផ្សាយ និងការធ្វើទីផ្សារនៅលើប្រព័ន្ធឌីជីថល ព្រមទាំងគាំទ្រក្រុមអ្នកសារព័ត៌មាន ទូរទស្សន៍ និងអ្នកជំនាញការឱ្យចុះមកអង្កេត ថតរូបភាព និងឧទ្ទេសនាមផលិតផល។
មូលដ្ឋាននេះក៏បានរៀបចំកម្មវិធីតភ្ជាប់ជាមួយដៃគូអន្តរជាតិផងដែរ ក្នុងនោះមានផែនការទទួលក្រុមធុរកិច្ចទេសចរណ៍ជប៉ុន ដើម្បីចុះមកអង្កេតផលិតផល វាយតម្លៃសេវាកម្ម និងស្វែងរកឱកាសក្នុងការបញ្ចូលខេត្ត Ninh Binh ទៅក្នុងកម្មវិធីទេសចរណ៍សម្រាប់ភ្ញៀវបរទេស។
ភារកិច្ចទាំងនេះត្រូវបានធ្វើឱ្យជាក់ស្តែងនៅក្នុងកម្មវិធីសកម្មភាពអនុវត្តសេចក្តីសម្រេចចិត្តលេខ 26-NQ/TU ដោយផ្តោតសំខាន់លើការអភិវឌ្ឍផលិតផលទេសចរណ៍ប្រកបដោយគុណភាពខ្ពស់ ការអភិរក្ស និងការលើកកម្ពស់តម្លៃបេតិកភណ្ឌ ការកែលម្អហេដ្ឋារចនាសម្ព័ន្ធឱ្យកាន់តែពេញលេញ ការបង្កើនការតភ្ជាប់តំបន់ និងគោលដៅទេសចរណ៍ ការលើកកម្ពស់ប្រសិទ្ធភាពនៃការផ្សព្វផ្សាយ ការអភិវឌ្ឍធនធានមនុស្ស ការផ្លាស់ប្តូរឌីជីថល និងការកសាងគោលដៅទេសចរណ៍បៃតង ឆ្លាតវៃ សុវត្ថិភាព និងចីរភាព។
យោងតាមលោក Bui Van Manh ប្រធានមន្ទីរទេសចរណ៍ខេត្ត Ninh Binh ចំពោះមុខនេះ វិស័យទេសចរណ៍ផ្តោតសំខាន់លើការជំរុញតម្រូវការនៅចុងឆ្នាំ និងបង្កើនការផ្សព្វផ្សាយនៅក្នុងទីផ្សារប្រទេសជប៉ុន កូរ៉េខាងត្បូង និងឥណ្ឌា ព្រមទាំងតភ្ជាប់ជាមួយដៃគូទេសចរណ៍ រៀបចំការចុះអង្កេត និងឧទ្ទេសនាមផលិតផលថ្មីៗ។
ក្រៅពីនេះ វិស័យទេសចរណ៍បានយកចិត្តទុកដាក់លើការលើកកម្ពស់គុណភាពធនធានមនុស្ស ការអនុវត្តបច្ចេកវិទ្យាឌីជីថល ការកែលម្អបរិស្ថានទេសចរណ៍ ការធានាសន្តិសុខ សុវត្ថិភាព និងការបង្កលក្ខណៈងាយស្រួលជូនភ្ញៀវទេសចរ។
យោងតាមលោក Bui Van Manh គោលដៅមិនត្រឹមតែទាក់ទាញភ្ញៀវទេសចរបន្ថែមទៀតប៉ុណ្ណោះទេ ប៉ុន្តែអ្វីដែលសំខាន់ជាងនេះទៅទៀត គឺការលើកកម្ពស់គុណភាពបទពិសោធន៍ ការបង្កើនតម្លៃសេដ្ឋកិច្ច និងការថែរក្សាធនធាន ព្រមទាំងអត្តសញ្ញាណវប្បធម៌។ ក្នុងនោះ ការទាញយកផលប្រយោជន៍ពីបេតិកភណ្ឌផ្សារភ្ជាប់ជាមួយនឹងបទពិសោធន៍វប្បធម៌សហគមន៍ គឺជាទិសដៅដ៏សំខាន់ ដែលទាំងបង្កើតភាពទាក់ទាញសម្រាប់គោលដៅទេសចរណ៍ និងទាំងពង្រីកឱកាសការងារ និងមុខរបរជូនប្រជាពលរដ្ឋ។
ការផ្លាស់ប្តូរពីកំណើនផ្នែកបរិមាណ មកជាការយកចិត្តទុកដាក់លើគុណភាពបទពិសោធន៍ ត្រូវបានចាត់ទុកថាជាទិសដៅយូរអង្វែងនៃវិស័យទេសចរណ៍ខេត្ត Ninh Binh។ នៅពេលដែលផលិតផលត្រូវបានបង្កើតថ្មី សេវាកម្មត្រូវបានលើកកម្ពស់ ហើយបេតិកភណ្ឌត្រូវបានទាញយកប្រើប្រាស់ប្រកបដោយទំនួលខុសត្រូវ វិស័យទេសចរណ៍នឹងនាំមកនូវផលប្រយោជន៍ជាក់ស្តែងបន្ថែមទៀតជូនសហគមន៍ ដែលរួមចំណែកបញ្ជាក់ពីជំហររបស់ខេត្ត Ninh Binh នៅលើទីផ្សារអន្តរជាតិ និងជំរុញកំណើនបៃតងប្រកបដោយចីរភាព៕
ទីក្រុង Ho Chi Minh កសាងម៉ាកយីហោទេសចរណ៍ប្រកបដោយចីរភាព យុគសម័យ - ជាមួយនឹងទិសដៅអភិវឌ្ឍន៍ម៉ាកយីហោ «Vibrant Ho Chi Minh City – រស់រវើករាល់បទពិសោធជាក់ស្តែង» ទីក្រុង Ho Chi Minh ឆ្ពោះទៅរកការកសាងរូបភាពគោលដៅទេសចរណ៍ប្រកបដោយភាពស៊ីសង្វាក់គ្នា លើកកម្ពស់គុណភាពនៃការពិសោធជាក់ស្តែង និងបង្កើនតម្លៃសេដ្ឋកិច្ចពីវិស័យទេសចរណ៍។ ក្នុងរយៈពេល ១០ ខែឆ្នាំ ២០២៦ ចំណូលសរុបពីវិស័យទេសចរណ៍របស់ទីក្រុងសម្រេចបាន ៣០៧.២១៦ ពាន់លានដុង ស្មើនឹង ៩៣,១% នៃផែនការប្រចាំឆ្នាំ។ |
គេហទំព័រទេសចរណ៍វៀតណាមឈរនៅលំដាប់ទីពីរនៅអាស៊ីអាគ្នេយ៍ខាងចំនួនអ្នកចូលទស្សនា យុគសម័យ - នៅក្នុងខែតុលា ឆ្នាំ ២០២៦ គេហទំព័រផ្សព្វផ្សាយទេសចរណ៍ជាតិ vietnam.travel បានកត់ត្រាចំនួនអ្នកចូលទស្សនា ៣៦៧.០៥០ ដង កើនឡើង ១៩,៤% បើធៀបនឹងខែមុន ដោយបានវ៉ាដាច់គេហទំព័រទេសចរណ៍របស់ប្រទេសថៃ និងឈរនៅលំដាប់ទីពីរនៅអាស៊ីអាគ្នេយ៍ បន្ទាប់ពីប្រទេសសិង្ហបុរី។ ទន្ទឹមនឹងលទ្ធផលនេះ ថ្នាលឌីជីថលនេះកំពុងត្រូវបានធ្វើឱ្យប្រសើរឡើងតាមទិសដៅពហុភាសា ការរួមបញ្ចូលបញ្ញាសិប្បនិម្មិត និងការតភ្ជាប់សេវាកម្មទេសចរណ៍នានា សំដៅពង្រីកលទ្ធភាពក្នុងការចូលទៅកាន់ភ្ញៀវទេសចរអន្តរជាតិ។ |

មតិពីមិត្តអ្នកអាន