ទេសចរណ៍វៀតណាមស្វែងរកឱកាសពង្រីកទីផ្សារអឺរ៉ុបពីការអភិវឌ្ឍប្រកបដោយចីរភាព

លោក Tran Doan The Duy អគ្គនាយកក្រុមហ៊ុន Vietravel។

ទេសចរណ៍ប្រកបដោយការទទួលខុសត្រូវក្លាយជាប្រៀបខ្លាំងប្រកួតប្រជែង

ចាប់ពីថ្ងៃទី ៣ ដល់ថ្ងៃទី ៥ ខែវិច្ឆិកា ពិព័រណ៍ទេសចរណ៍ពិភពលោកឆ្នាំ ២០២៦ (World Travel Market - WTM London 2026) បានប្រព្រឹត្តទៅនៅមជ្ឈមណ្ឌលពិព័រណ៍ និងសន្និសីទអន្តរជាតិ ExCeL London ចក្រភពអង់គ្លេស ដោយទាក់ទាញការចូលរួមពីប្រទេសជាង ១៨០ អ្នកតាំងពិព័រណ៍ជាង ៤.០០០ នាក់ អ្នកទិញអាជីពជាង ៥.៥០០ នាក់ និងអ្នកចូលរួមជាង ៤៦.០០០ នាក់។

WTM London ត្រូវបានវាយតម្លៃថាជាពិព័រណ៍ទេសចរណ៍ដ៏ធំមួយក្នុងចំណោមពិព័រណ៍ទេសចរណ៍ធំៗទាំងបីនៅលើពិភពលោក រួមជាមួយ Fitur នៅ Madrid (អេស្ប៉ាញ) និង ITB នៅ Berlin (អាល្លឺម៉ង់)។ នេះគឺជាទីកន្លែងដែលបណ្តាសហគ្រាស ស្ថាប័នគ្រប់គ្រង និងអង្គការជំរុញទេសចរណ៍ស្វែងរកដៃគូ ឧទ្ទេសនាមផលិតផល និងពង្រីកទីផ្សារ។

ទំហំនៃកិច្ចសហប្រតិបត្តិការពាណិជ្ជកម្មដែលផ្តល់ជូនដោយព្រឹត្តិការណ៍នេះ ត្រូវបានបង្ហាញដោយលទ្ធផលឆ្នាំ ២០២៥ នៅពេលដែលកិច្ចប្រជុំ និងប្រតិបត្តិការក្នុងក្របខ័ណ្ឌនៃពិព័រណ៍ត្រូវបានប៉ាន់ប្រមាណថានឹងបង្កើតប្រាក់ចំណូលបានជាង ២,២ ពាន់លានផោន ស្មើនឹងប្រមាណ ២,៩ ពាន់លានដុល្លារអាមេរិក។

ក្រោមប្រធានបទ «Travel powers the world. How will you use your Travelpower?» (ទេសចរណ៍គឺជាកម្លាំងចលករនៃពិភពលោក - តើអ្នកនឹងប្រើប្រាស់អានុភាពនោះយ៉ាងដូចម្តេច?) WTM London 2026 បានផ្តោតការយកចិត្តទុកដាក់លើតួនាទីនៃវិស័យទេសចរណ៍ក្នុងការជំរុញការអភិវឌ្ឍសេដ្ឋកិច្ច និងការកសាងអនាគតមួយប្រកបដោយចីរភាព។

យោងតាមការព្យាករណ៍របស់ក្រុមប្រឹក្សាទេសចរណ៍ និងការធ្វើដំណើរពិភពលោក (WTTC) វិស័យទេសចរណ៍អាចរួមចំណែកជាង ១៦.០០០ ពាន់លានដុល្លារអាមេរិកទៅក្នុង GDP សកលលោកនៅឆ្នាំ ២០៣៥។ ទំហំនៃការអភិវឌ្ឍនោះ ក៏បានដាក់ចេញនូវតម្រូវការស្តីពីទំនួលខុសត្រូវរបស់បណ្តាសហគ្រាស និងគោលដៅទេសចរណ៍ចំពោះបរិស្ថាន សហគមន៍ និងតម្លៃវប្បធម៌ក្នុងតំបន់។

នៅក្នុងពិព័រណ៍ឆ្នាំនេះ ការអភិវឌ្ឍទេសចរណ៍ប្រកបដោយការទទួលខុសត្រូវ ទទួលបានការចាប់អារម្មណ៍ពីសំណាក់បណ្តាសហគ្រាសអន្តរជាតិ ទុកដូចជាកត្តាសំខាន់មួយក្នុងចំណោមកត្តាសំខាន់ៗក្នុងការសម្រេចចិត្តធ្វើអាជីវកម្ម។ ប្រសិនបើកាលពីមុន ការអភិវឌ្ឍប្រកបដោយចីរភាពត្រូវបានចាត់ទុកជាចម្បងថាជាទិសដៅដើម្បីលើកកម្ពស់រូបភាពម៉ាកសញ្ញា នោះនាបច្ចុប្បន្ន កត្តានេះកាន់តែក្លាយទៅជាតម្រូវការជាក់ស្តែងនៃទីផ្សារ។

ចំពោះប្រទេសវៀតណាម ការផ្លាស់ប្តូរនៅក្នុងនិន្នាការនៃការប្រើប្រាស់ទេសចរណ៍អន្តរជាតិ បានបង្កើតឱកាសអភិវឌ្ឍផលិតផលនានាដែលសមស្របជាងមុនទៅនឹងតម្រូវការរបស់ភ្ញៀវទេសចរ ជាពិសេសនៅទីផ្សារអឺរ៉ុប។

ផ្លាស់ប្តូរយោបល់ជាមួយអ្នកសារព័ត៌មាននៅខាងក្រៅសន្និសីទ WTM London 2026 លោក Tran Doan The Duy អគ្គនាយកក្រុមហ៊ុន Vietravel បានវាយតម្លៃថា ស្ថានភាពទីផ្សារភ្ញៀវអន្តរជាតិមកកាន់ប្រទេសវៀតណាមកំពុងមានសញ្ញាវិជ្ជមានជាច្រើន។

ក្នុងរយៈពេល ១០ ខែដំបូងនៃឆ្នាំ ២០២៦ ចំនួនភ្ញៀវទេសចរអន្តរជាតិមកកាន់ប្រទេសវៀតណាមបានកើនឡើងយ៉ាងខ្លាំង ក្នុងនោះទ្វីបអឺរ៉ុបគឺជាតំបន់មួយដែលកត់ត្រានូវល្បឿនកំណើនខ្ពស់។ ដោយឡែកទីផ្សារចក្រភពអង់គ្លេស ត្រូវបានសហគ្រាសវាយតម្លៃថាមានទស្សនវិស័យវិជ្ជមាន។

យោងតាមលោក Tran Doan The Duy ទេសភាពធម្មជាតិ និងម្ហូបអាហារ គឺជាកត្តានានាដែលបង្កើតនូវភាពទាក់ទាញរបស់ វៀតណាម ចំពោះភ្ញៀវទេសចរអឺរ៉ុប។ ទន្ទឹមនឹងនោះ គោលនយោបាយលើកលែងទិដ្ឋាការសម្រាប់ពលរដ្ឋនៃប្រទេសជាច្រើន ក្នុងនោះមានចក្រភពអង់គ្លេស បានរួមចំណែកបង្កភាពងាយស្រួលដល់ការធ្វើដំណើរ និងជំរុញកំណើនចំនួនភ្ញៀវទេសចរ។

ទោះជាយ៉ាងណាក៏ដោយ ដើម្បីរក្សាភាពទាក់ទាញបានយូរអង្វែង ផលិតផលទេសចរណ៍ចាំបាច់ត្រូវតែកសាងឡើងតាមទិសដៅឆ្លើយតបទៅនឹងកង្វល់ថ្មីៗនៃទីផ្សារ។

តំណាងក្រុមហ៊ុន Vietravel បានឱ្យដឹងថា សហគ្រាសកំពុងផ្តល់អាទិភាពដល់ការអភិវឌ្ឍផលិតផលទេសចរណ៍ប្រកបដោយការទទួលខុសត្រូវ សម្រាប់ភ្ញៀវទេសចរអឺរ៉ុបជារួម និងភ្ញៀវទេសចរអង់គ្លេសដោយឡែក។ នេះគឺជាក្រុមផលិតផលដែលសមស្របទៅនឹងតម្រូវការកាន់តែខ្ពស់របស់ភ្ញៀវទេសចរនៅតាមបណ្តាទីផ្សារទាំងនេះ ស្តីពីការអភិវឌ្ឍប្រកបដោយចីរភាព។

ចំណុចថ្មីមួយនៅក្នុងសកម្មភាពជំរុញទេសចរណ៍នៅឯ WTM London 2026 គឺគំរូនៃការសម្របសម្រួលផ្សព្វផ្សាយរវាងសហគ្រាស និងមូលដ្ឋាន។

យោងតាមលោក Tran Doan The Duy ក្រុមហ៊ុន Vietravel បានសហការជាលើកដំបូងជាមួយខេត្ត Tuyen Quang និងតំបន់ទេសភាព Trang An ដើម្បីឧទ្ទេសនាមផលិតផលនៅក្នុងស្តង់រួមគ្នាមួយ។

ការរួមបញ្ចូលគ្នានូវប្រភពធនធានរបស់សហគ្រាស ជាមួយស្ថាប័នគ្រប់គ្រងមូលដ្ឋាន ត្រូវបានរំពឹងថានឹងលើកកម្ពស់ប្រសិទ្ធភាពនៃការផ្សព្វផ្សាយ បង្កើតការផ្សារភ្ជាប់គ្នារវាងគោលដៅទេសចរណ៍ និងអង្គភាពផ្តល់សេវាកម្ម។ ក្រុមហ៊ុន Vietravel ក៏តម្រង់ទិសបន្តអនុវត្តគំរូនេះនៅក្នុងកម្មវិធីជំរុញទីផ្សារនានានាពេលខាងមុខផងដែរ។

ជំនួសឱ្យអង្គភាពនីមួយៗឧទ្ទេសនាមផលិតផលរបស់ខ្លួនដោយឡែកពីគ្នា វិធីសាស្ត្ររៀបចំរួមគ្នានេះបានជួយឱ្យដៃគូអន្តរជាតិមានទស្សនវិស័យពេញលេញជាងមុនអំពីជម្រើសទេសចរណ៍នានានៅ វៀតណាម ចាប់ពីធនធានគោលដៅទេសចរណ៍ រហូតដល់សមត្ថភាពផ្គត់ផ្គង់ និងការរៀបចំសេវាកម្ម។

ការផ្សារភ្ជាប់សហគ្រាស និងសហគមន៍ជនជាតិវៀតណាម ដើម្បីចូលទៅកាន់ទីផ្សារអន្តរជាតិ

ទន្ទឹមនឹងក្រុមហ៊ុន Vietravel អគ្គក្រុមហ៊ុនទេសចរណ៍ Sai Gon (Saigontourist Group) និងអគ្គក្រុមហ៊ុនអាកាសចរណ៍ជាតិវៀតណាម (Vietnam Airlines) ក៏បានរួមគ្នាបង្កើតស្តង់រួមគ្នាមួយនៅឯ WTM London 2026 ផងដែរ។

ការចូលរួមរបស់សហគ្រាសទេសចរណ៍ និងក្រុមហ៊ុនអាកាសចរណ៍នៅក្នុងលំហជំរុញទេសចរណ៍តែមួយ បានបង្កលក្ខខណ្ឌអំណោយផលក្នុងការឧទ្ទេសនាមព្រមៗគ្នានូវបណ្តាផលិតផល សេវាកម្ម និងសមត្ថភាពតភ្ជាប់ដឹកជញ្ជូនភ្ញៀវទេសចរអន្តរជាតិមកកាន់ វៀតណាម។

លោក Cao Van Chong អគ្គនាយក Saigontourist Group បានយល់ឃើញថា ការធ្វើអន្តរជាតូបនីយកម្មម៉ាកសញ្ញាទេសចរណ៍មិនមែនគ្រាន់តែជាការបង្កើនវត្តមានរបស់សហគ្រាសនៅលើទីផ្សារក្រៅប្រទេសនោះទេ។ អ្វីដែលសំខាន់ជាងនេះទៅទៀត សកម្មភាពនេះចាំបាច់ត្រូវតែនាំយកតម្លៃពិសេសដោយឡែកនៃវិស័យទេសចរណ៍ វៀតណាម ឱ្យខិតកាន់តែកៀកជិតនឹងភ្ញៀវទេសចរនៅលើពិភពលោក។

យោងតាមលោក Saigontourist Group សំដៅពង្រីកប្រភពភ្ញៀវទេសចរមកពីចក្រភពអង់គ្លេស និងបណ្តាប្រទេសនៅអឺរ៉ុប ព្រមទាំងជំរុញកិច្ចសហប្រតិបត្តិការទេសចរណ៍ទ្វេទិស។

គំរូនៃការសម្របសម្រួលជាមួយ Vietnam Airlines បានរួមចំណែកផ្សារភ្ជាប់សកម្មភាពជំរុញគោលដៅទេសចរណ៍ ជាមួយនឹងសេវាកម្មដឹកជញ្ជូន និងបណ្តាញផ្គត់ផ្គង់ទេសចរណ៍ ដែលបង្កភាពងាយស្រួលដល់ការកសាងកម្មវិធីនានាដើម្បីបម្រើភ្ញៀវទេសចរអន្តរជាតិ។

ភាពទាក់ទាញនៃវិស័យទេសចរណ៍ វៀតណាម ក៏ទទួលបានការវាយតម្លៃជាវិជ្ជមានពីសំណាក់ដៃគូបរទេសផងដែរ។

លោក Leon Ellas នាយកប្រតិបត្តិ Australia & Worldwide Travel ក្នុងពេលអញ្ជើញទស្សនាស្តង់របស់ វៀតណាម បានកត់សម្គាល់ឃើញថា វៀតណាម គឺជាគោលដៅទេសចរណ៍ដ៏សមស្របសម្រាប់ភ្ញៀវទេសចរអូស្ត្រាលីដែលចូលចិត្តការរុករក និងស្វែងយល់។

យោងតាមលោក វៀតណាម មានទេសភាព និងវប្បធម៌ចម្រុះ មានប្រវត្តិសាស្ត្រដ៏យូរលង់ វប្បធម៌ម្ហូបអាហារ ប្រកបដោយភាពទាក់ទាញ និងបរិស្ថានទេសចរណ៍ប្រកបដោយសុវត្ថិភាព។ ទាំងនេះគឺជាកត្តានានាដែលបង្កើតនូវប្រៀបខ្លាំងដោយឡែកនៃគោលដៅទេសចរណ៍ចំពោះភ្ញៀវទេសចរអន្តរជាតិ។

ទន្ទឹមនឹងការចូលរួមរបស់បណ្តាសហគ្រាសក្នុងស្រុក សហគមន៍ជនជាតិវៀតណាមនៅអឺរ៉ុបក៏ដើរតួនាទីជាស្ពានតភ្ជាប់ និងគាំទ្រដល់ការផ្សព្វផ្សាយវិស័យទេសចរណ៍ វៀតណាម ផងដែរ។

នៅក្នុងក្របខ័ណ្ឌនៃពិធីសម្ពោធលំហទេសចរណ៍ Ha Noi នៅស្តង់ទេសចរណ៍ វៀតណាម សមាគមវប្បធម៌ និងទេសចរណ៍វៀតណាមនៅអឺរ៉ុប (VNCT) បានចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការជាមួយសមាគមទេសចរណ៍ Hoan Kiem។

សកម្មភាពនេះសំដៅលើកកម្ពស់ការយល់ដឹងអំពីទីផ្សារ និងបណ្តាញទំនាក់ទំនងរបស់សហគមន៍ជនជាតិវៀតណាមនៅក្រៅប្រទេស ដោយរួមចំណែកនាំយកបណ្តាផលិតផលទេសចរណ៍វៀតណាមឱ្យចូលទៅកាន់ប្រព័ន្ធដៃគូអឺរ៉ុបកាន់តែមានប្រសិទ្ធភាព។

លោកស្រី Le Y Linh ប្រធាន VNCT បានឱ្យដឹងថា ទោះបីជារស់នៅឆ្ងាយពីមាតុភូមិក៏ដោយ ក៏ជនជាតិវៀតណាមដែលបំពេញការងារក្នុងវិស័យវប្បធម៌ និងទេសចរណ៍នៅអឺរ៉ុប មានបំណងចង់រួមចំណែកដល់ការអភិវឌ្ឍវិស័យទេសចរណ៍ក្នុងប្រទេស តាមរយៈបទពិសោធ ចំណេះដឹងទីផ្សារ និងទំនាក់ទំនងសហប្រតិបត្តិការដែលបានកសាងឡើង។

យោងតាមលោកស្រី ដើម្បីឆ្លើយតបទៅនឹងតម្រូវការរបស់ភ្ញៀវទេសចរអឺរ៉ុប ការផ្សព្វផ្សាយបណ្តាគោលដៅទេសចរណ៍ដែលធ្លាប់ស្គាល់ ចាំបាច់ត្រូវតែរួមផ្សំជាមួយនឹងការកសាងផលិតផលប្រកបដោយជម្រៅ ដោយបង្កើតលក្ខខណ្ឌឱ្យភ្ញៀវទេសចរបានស្វែងយល់ និងពិសោធជាក់ស្តែងដោយផ្ទាល់នូវជីវភាពវប្បធម៌ក្នុងតំបន់។

ដោយលើកយកតំបន់វិថីបុរាណ Ha Noi ធ្វើជាឧទាហរណ៍ លោកស្រី Le Y Linh បានស្នើឱ្យអភិវឌ្ឍផលិតផលទេសចរណ៍តាមទិសដៅតភ្ជាប់លំហ «វិថីរបរទាំង ៣៦» ជាមួយបណ្តាភូមិរបរប្រពៃណី សិប្បករ និងមូលដ្ឋានផលិតកម្ម។

ជំនួសឱ្យការគ្រាន់តែទស្សនា ថតរូប និងស្វែងយល់ព័ត៌មាន ភ្ញៀវទេសចរអាចជួបប្រាស្រ័យទាក់ទងដោយផ្ទាល់ជាមួយអ្នកប្រកបរបរ សង្កេតមើលដំណើរការផលិត ចូលរួមក្នុងដំណាក់កាលមួយចំនួន និងស្វែងយល់អំពីរឿងរ៉ាវនានាដែលផ្សារភ្ជាប់នឹងផលិតផលសិប្បកម្ម។

វិធីសាស្ត្រទាក់ទងនេះបានរួមចំណែកបង្កើតនូវបទពិសោធប្លែកពីគេ ព្រមទាំងជួយឱ្យភ្ញៀវទេសចរយល់កាន់តែស៊ីជម្រៅអំពីវប្បធម៌ មនុស្ស និងតម្លៃនានាដែលត្រូវបានថែរក្សានៅក្នុងសហគមន៍មូលដ្ឋាន។

យោងតាមប្រធាន VNCT ការតភ្ជាប់គោលដៅទស្សនាជាមួយសកម្មភាពពិសោធជាក់ស្តែង នៅអាចជួយពន្យារពេលស្នាក់នៅ និងនាំមកនូវផលប្រយោជន៍សេដ្ឋកិច្ចបន្ថែមទៀតសម្រាប់សហគមន៍។ នេះក៏ជាខ្លឹមសារមួយក្នុងចំណោមខ្លឹមសារសមស្របទៅនឹងទិសដៅអភិវឌ្ឍន៍ទេសចរណ៍ប្រកបដោយការទទួលខុសត្រូវ ដែលទីផ្សារអន្តរជាតិកំពុងយកចិត្តទុកដាក់។

ទន្ទឹមនឹងការអភិវឌ្ឍផលិតផល VNCT មានបំណងជួយគាំទ្រដល់បណ្តាសហគ្រាសទេសចរណ៍វៀតណាមឱ្យចូលរួមជាបណ្តើរៗក្នុងប្រព័ន្ធចែកចាយនៅអឺរ៉ុប។

តាមរយៈសកម្មភាពតភ្ជាប់ដៃគូ ចែករំលែកបទពិសោធ និងស្វែងយល់ពីតម្រូវការទីផ្សារ បណ្តាសហគ្រាសមានឱកាសបន្ថែមទៀតក្នុងការឧទ្ទេសនាមផលិតផលជាប្រចាំ ជំនួសឱ្យការគ្រាន់តែទាក់ទងអតិថិជន និងអ្នកចែកចាយក្នុងអំឡុងពេលប្រព្រឹត្តទៅនៃពិព័រណ៍ប៉ុណ្ណោះ។

ការចូលរួមរបស់សហគមន៍ជនជាតិវៀតណាមនៅក្រៅប្រទេស អាស្រ័យហេតុនេះ មិនត្រឹមតែមានអត្ថន័យផ្សព្វផ្សាយវប្បធម៌ប៉ុណ្ណោះទេ ថែមទាំងរួមចំណែកបង្កើតច្រកតភ្ជាប់រវាងសហគ្រាសក្នុងស្រុកជាមួយទីផ្សារអន្តរជាតិផងដែរ។

ក្នុងបរិបទដែលចំនួនភ្ញៀវទេសចរអឺរ៉ុបមកកាន់ វៀតណាម បន្តកើនឡើង បណ្តាសហគ្រាសទេសចរណ៍កំពុងមានលក្ខខណ្ឌបន្ថែមទៀតដើម្បីពង្រីកសកម្មភាពជំរុញទេសចរណ៍ ឧទ្ទេសនាមផលិតផលពិសេសដោយឡែក និងស្វែងរកឱកាសសហប្រតិបត្តិការពាណិជ្ជកម្ម។

ទោះជាយ៉ាងណាក៏ដោយ ក្នុងចំណោមអ្នកតាំងពិព័រណ៍ជាង ៤.០០០ នាក់នៅឯ WTM London 2026 លទ្ធភាពទាក់ទាញការចាប់អារម្មណ៍របស់ដៃគូ គឺគ្រាន់តែជាផ្នែកមួយនៅក្នុងដំណើរការអភិវឌ្ឍទីផ្សារប៉ុណ្ណោះ។

ដើម្បីប្រែក្លាយការចាប់អារម្មណ៍ឱ្យទៅជាលទ្ធផលយូរអង្វែង វិស័យទេសចរណ៍ វៀតណាម ចាំបាច់ត្រូវតែរក្សាការតភ្ជាប់ជាមួយបណ្តាដៃគូចែកចាយ អភិវឌ្ឍផលិតផលឱ្យស្របតាមចំណង់ចំណូលចិត្តរបស់ភ្ញៀវទេសចរអឺរ៉ុប និងលើកកម្ពស់គុណភាពនៃការពិសោធជាក់ស្តែងនៅតាមគោលដៅទេសចរណ៍។

ការសម្របសម្រួលផ្សព្វផ្សាយរវាងសហគ្រាស មូលដ្ឋាន ក្រុមហ៊ុនអាកាសចរណ៍ និងបណ្តាអង្គការរបស់ជនជាតិវៀតណាមនៅក្រៅប្រទេស បានបង្ហាញពីទិសដៅអនុវត្តដែលកំពុងត្រូវបានដាក់ពង្រាយ សំដៅពង្រីកប្រសិទ្ធភាពនៃការជំរុញទេសចរណ៍។

ទន្ទឹមគ្នានោះ ការអភិវឌ្ឍទេសចរណ៍ប្រកបដោយការទទួលខុសត្រូវ ផ្សារភ្ជាប់នឹងការអភិរក្សវប្បធម៌ និងការបង្កើតផលប្រយោជន៍សម្រាប់សហគមន៍ ត្រូវបានចាត់ទុកថាជាកត្តាមួយក្នុងចំណោមកត្តាដែលជួយឱ្យផលិតផលទេសចរណ៍ វៀតណាម កាន់តែសមស្របទៅនឹងតម្រូវការទីផ្សារ។

តាមរយៈ WTM London 2026 បណ្តាសហគ្រាសវៀតណាមមិនត្រឹមតែឧទ្ទេសនាមពីសក្តានុពលនៃគោលដៅទេសចរណ៍ប៉ុណ្ណោះទេ ប៉ុន្តែថែមទាំងស្វែងរកទម្រង់នៃកិច្ចសហប្រតិបត្តិការដែលអាចរក្សាបានជាប្រចាំនៅលើទីផ្សារអឺរ៉ុប សំដៅទាក់ទាញភ្ញៀវទេសចរឱ្យត្រឡប់មកកម្សាន្តវិញច្រើនដង និងលើកកម្ពស់តម្លៃអភិវឌ្ឍន៍នៃវិស័យទេសចរណ៍៕

វិស័យទេសចរណ៍វៀតណាម-កូរ៉េ រក្សាបាននូវសន្ទុះកំណើនគួរឱ្យចាប់អារម្មណ៍ យុគសម័យ - កូរ៉េខាងត្បូងនៅតែជាទីផ្សារទេសចរណ៍អន្តរជាតិដ៏ធំបំផុតមួយរបស់វៀតណាម ដែលរួមចំណែកដល់ការលើកកម្ពស់ការផ្លាស់ប្តូរវប្បធម៌ សេដ្ឋកិច្ច និងទេសចរណ៍កាន់តែស៊ីជម្រៅ និងទូលំទូលាយរវាងប្រទេសទាំងពីរ។

ការតភ្ជាប់ពាណិជ្ជកម្មរវាងសហគ្រាសទេសចរណ៍វៀតណាម និងអន្តរជាតិ យុគសម័យ - នាថ្ងៃទី៩ ខែមេសា នៅទីក្រុងហាណូយ សមាគមទេសចរណ៍វៀតណាម បានរៀបចំពិធីបើកកម្មវិធីតភ្ជាប់ពាណិជ្ជកម្មរវាងសហគ្រាសទេសចរណ៍វៀតណាម និងអន្តរជាតិ (B2B)។ នេះគឺជាព្រឹត្តិការណ៍ដ៏សំខាន់មួយ ស្ថិតក្នុងខ្សែសង្វាក់នៃសកម្មភាពនៃពិព័រណ៍ទេសចរណ៍អន្តរជាតិ VITM 2026 ដែលជាពិព័រណ៍ទេសចរណ៍អន្តរជាតិលើកទី១៥ រៀបចំឡើងដោយសមាគមទេសចរណ៍វៀតណាម។

ម៉ាញដាត