ភូមិ Bom Bo អភិវឌ្ឍទេសចរណ៍ចេញពីអត្តសញ្ញាណវប្បធម៌ Xtieng

សិល្បករជនជាតិ Xtieng ភ្លឺចិញ្ចាចនៅលើឆាកសម្តែង។

ការរួមបញ្ចូលគ្នារវាងកសិកម្ម ជាមួយការអភិវឌ្ឍទេសចរណ៍បែបបទពិសោធន៍ជាក់ស្តែង

Soc Bom Bo ត្រូវបានគេស្គាល់ជាយូរយារណាស់មកហើយ តាមរយៈរូបភាពបងប្អូនជនជាតិ Xtieng បុកស្រូវទាំងយប់ទាំងថ្ងៃបម្រើកងទ័ព ក្នុងសង្គ្រាមតស៊ូប្រឆាំងអាមេរិកសង្គ្រោះជាតិ។ សូរសំឡេងនៃត្បាល់ និងអង្រែដ៏សាមញ្ញ បានក្លាយជានិមិត្តរូបនៃស្មារតីស្នេហាជាតិ សាមគ្គីភាព និងការរួមចំណែករបស់បងប្អូនជនជាតិចំពោះបុព្វហេតុនៃការតស៊ូរំដោះជាតិ។

សព្វថ្ងៃនេះ ទន្ទឹមនឹងការអភិរក្សប្រពៃណីប្រវត្តិសាស្ត្រ Bom Bo កំពុងស្វែងរកទិសដៅអភិវឌ្ឍសេដ្ឋកិច្ចសមស្របនានា ទាញយកផលពីសក្តានុពលដីធ្លី កសិកម្ម និងវប្បធម៌ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ។

នៅក្នុងលំហអភិវឌ្ឍន៍ថ្មីនៃទីក្រុង Dong Nai ឃុំ Bom Bo មានប្រៀបខ្លាំងជាច្រើនអំពីលក្ខខណ្ឌធម្មជាតិ ផលិតកម្មកសិកម្ម និងធនធានវប្បធម៌។ មូលដ្ឋានបច្ចុប្បន្នមាន ២២ ជនជាតិរួមរស់ជាមួយគ្នា ក្នុងនោះបងប្អូនជនជាតិតិចតួចមានចំនួនជាង ៥៤ ភាគរយនៃចំនួនប្រជាជន។

ភាពសម្បូរបែបខាងវប្បធម៌ រួមជាមួយប្រៀបខ្លាំងខាងផលិតកម្ម បានបង្កើតលក្ខខណ្ឌឱ្យ Bom Bo អភិវឌ្ឍគំរូសេដ្ឋកិច្ចរួមបញ្ចូលគ្នារវាងកសិកម្ម ទេសចរណ៍បែបបទពិសោធន៍ជាក់ស្តែង និងការអភិរក្សតម្លៃប្រពៃណីនានា។

យោងតាមសមមិត្ត Vu Long Son លេខាគណៈកម្មាធិការបក្សឃុំ Bom Bo ដំណើរការសមាហរណកម្មសេដ្ឋកិច្ចអន្តរជាតិ និងបដិវត្តន៍ឧស្សាហកម្មលើកទីបួន កំពុងបើកចេញនូវកាលានុវត្តភាពដើម្បីឱ្យមូលដ្ឋានផ្លាស់ប្តូរពីគំរូសេដ្ឋកិច្ចកសិកម្មសុទ្ធសាធ ទៅជាការអភិវឌ្ឍលើពហុវិស័យ។

សមមិត្ត Vu Long Son បានឱ្យដឹងថា «នៅក្នុងបរិបទនៃសមាហរណកម្មសេដ្ឋកិច្ចអន្តរជាតិ និងបដិវត្តន៍ឧស្សាហកម្មលើកទីបួន Bom Bo ឈរនៅចំពោះមុខកាលានុវត្តភាពផ្លាស់ប្តូរមុខមាត់ពីឃុំកសិកម្មសុទ្ធសាធ ទៅជាគំរូអភិវឌ្ឍន៍ពហុសសរស្តម្ភ រួមមាន កសិកម្មតម្លៃខ្ពស់ ទេសចរណ៍បែបបទពិសោធន៍ជាក់ស្តែង និងសេវាកម្មវប្បធម៌សហគមន៍។ អាស្រ័យហេតុនេះ គណៈកម្មាធិការបក្ស និងប្រជាជនមូលដ្ឋានបានកំណត់យកការអភិវឌ្ឍទេសចរណ៍ផ្សារភ្ជាប់នឹងការទាញយកសក្តានុពលកសិកម្ម ការអភិរក្សវប្បធម៌ជនជាតិ ឆ្ពោះទៅរកគោលដៅអភិវឌ្ឍន៍គ្រប់ជ្រុងជ្រោយ»។

ដោយមានផ្ទៃដីបាសាល់ដ៏មានជីជាតិ និងលក្ខខណ្ឌអាកាសធាតុអំណោយផល Bom Bo មានប្រៀបខ្លាំងខាងប្រភេទដំណាំឧស្សាហកម្ម ដូចជា កៅស៊ូ កាហ្វេ ស្វាយចន្ទី ម្រេច រួមជាមួយដំណាំហូបផ្លែជាច្រើនមុខ ក្នុងនោះមាន ទុរេន ប៊័រ និងសាវម៉ាវ។

ចេញពីមូលដ្ឋានគ្រឹះនៃផលិតកម្មកសិកម្ម មូលដ្ឋានមានលទ្ធភាពអភិវឌ្ឍគំរូ farmstay, homestay និងទេសចរណ៍បែបបទពិសោធន៍ជាក់ស្តែង ដែលផ្សារភ្ជាប់នឹងសកម្មភាពដាំដុះ និងការប្រមូលផលកសិផលតាមរដូវកាល។

តាមរយៈគំរូទាំងនេះ ភ្ញៀវទេសចរអាចស្វែងយល់ដោយផ្ទាល់នូវដំណើរការដាំដុះ ប្រមូលផល កែច្នៃកសិផល និងទទួលបទពិសោធន៍ជាក់ស្តែងពីជីវភាពរស់នៅរបស់ប្រជាជនមូលដ្ឋាន។ នេះក៏ជាទិសដៅពង្រីកសកម្មភាពសេដ្ឋកិច្ចកសិកម្ម បង្កើតប្រភពចំណូលបន្ថែម និងឱកាសមុខរបរចិញ្ចឹមជីវិតសម្រាប់សហគមន៍។

លោក Dieu Mon ប្រជាពលរដ្ឋនៅភូមិ Bom Bo បានឱ្យដឹងថា ក្រុមគ្រួសារកំពុងដាំស្លឹកញីប (ស្លឹកបន្លែព្រៃ) ជាងមួយសៅ។ ក្រៅពីការប្រើប្រាស់ក្នុងជីវភាពរស់នៅ ប្រភពកសិផលនេះនៅត្រូវបានផ្គត់ផ្គង់ដល់បណ្តាហាងម្ហូបអាហារ ដើម្បីបម្រើភ្ញៀវទេសចរ និងប្រជាពលរដ្ឋក្នុងតំបន់។

លោក Dieu Mon បានចែករំលែកថា «ខ្ញុំដាំស្លឹកញីបជាង ១ សៅ។ ក្រៅពីបម្រើតម្រូវការគ្រួសារ ផលិតផលនេះក៏បានផ្គត់ផ្គង់ដល់បណ្តាហាងម្ហូបអាហារដើម្បីបម្រើភ្ញៀវទេសចរ និងប្រជាពលរដ្ឋក្នុងតំបន់ផងដែរ»។

ការអភិរក្សវប្បធម៌ប្រពៃណី បង្កើតមុខរបរចិញ្ចឹមជីវិតសម្រាប់សហគមន៍

ទន្ទឹមនឹងសក្តានុពលអភិវឌ្ឍន៍ទេសចរណ៍កសិកម្ម តម្លៃវប្បធម៌ពិសេសដោយឡែករបស់បងប្អូនជនជាតិ Xtieng កំពុងត្រូវបាន Bom Bo យកចិត្តទុកដាក់ទាញយកផល ផ្សារភ្ជាប់នឹងការអភិរក្ស និងការអភិវឌ្ឍទេសចរណ៍សហគមន៍។

តំបន់អភិរក្សវប្បធម៌ជនជាតិ Xtieng នៅ Soc Bom Bo គឺជាគោលដៅទេសចរណ៍ដ៏លេចធ្លោមួយ ដែលនៅទីនោះ ភ្ញៀវទេសចរអាចស្វែងយល់ពីជីវភាពរស់នៅ ទស្សនាការសម្តែងគងឃ្មោះ និងស្វែងយល់ពីពិធីបុណ្យប្រពៃណីនានារបស់សហគមន៍។

នៅទីនេះ រូបភាពនៃស្នូរត្បាល់បុកស្រូវដែលផ្សារភ្ជាប់នឹងបណ្តាឆ្នាំនៃការតស៊ូសង្គ្រាម នៅតែបន្តត្រូវបានថែរក្សាទុកជាផ្នែកមួយនៃការចងចាំប្រវត្តិសាស្ត្រនៃតំបន់ដីនេះ។ ក្រៅពីនោះ សកម្មភាពសម្តែងគងឃ្មោះ ការទទួលទានបាយឡាំ សម្លធ្លុក ស្រាពាង និងការទទួលបទពិសោធន៍ជាក់ស្តែងពីទំនៀមទម្លាប់ប្រពៃណី បានបង្កើតនូវភាពទាក់ទាញដោយឡែកសម្រាប់ភ្ញៀវទេសចរ។

ការដាក់បញ្ចូលតម្លៃវប្បធម៌ទាំងឡាយទៅក្នុងសកម្មភាពទេសចរណ៍ មិនត្រឹមតែរួមចំណែកផ្សព្វផ្សាយអត្តសញ្ញាណជាតិប៉ុណ្ណោះទេ ថែមទាំងនាំមកនូវប្រភពចំណូលដល់អ្នកដែលចូលរួមដោយផ្ទាល់ក្នុងការអភិរក្ស និងការប្រតិបត្តិបេតិកភណ្ឌផងដែរ។

លោកស្រី Ba Reo ប្រធានក្រុមគងឃ្មោះនារីភូមិ Bom Bo គឺជាបុគ្គលម្នាក់ក្នុងចំណោមអ្នកដែលតែងតែសម្តែងបម្រើភ្ញៀវទេសចរនៅតំបន់អភិរក្ស។

លោកស្រី Ba Reo បានចែករំលែកថា «បច្ចុប្បន្ន រដ្ឋបានបង្កើតលក្ខខណ្ឌឱ្យយើងខ្ញុំចូលរួមក្នុងសកម្មភាពវប្បធម៌នានា ដូចជាការទូងគងឃ្មោះ។ ទោះបីជាមានវ័យចំណាស់ក្តី ប៉ុន្តែអាស្រ័យដោយការសម្តែងគងឃ្មោះ ខ្ញុំមានចំណូលបន្ថែម។ អ្វីដែលសំខាន់ជាងនេះទៅទៀតនោះ គឺខ្ញុំបានរួមចំណែកថែរក្សាវប្បធម៌ប្រពៃណីរបស់ជីដូនជីតា បុព្វការីជនបានបន្សល់ទុក។ ខ្ញុំរីករាយណាស់»។

យោងតាមលោក Dieu La ឥស្សរជនដែលមានកិត្យានុភាពនៅភូមិ Bom Bo សកម្មភាពទទួលបទពិសោធន៍វប្បធម៌ជាក់ស្តែង គឺជាកត្តាសំខាន់ដែលបង្កើតកម្លាំងទាក់ទាញសម្រាប់តំបន់អភិរក្សវប្បធម៌ជនជាតិ Xtieng នៅ Soc Bom Bo។

លោកយល់ឃើញថា ការរក្សាបាននូវមុខរបរត្បាញសារុង ចាក់ត្បាញ ការសម្តែងគងឃ្មោះ និងមុខរបរប្រពៃណីផ្សេងៗទៀត មានអត្ថន័យជាក់ស្តែងចំពោះការអភិរក្សអត្តសញ្ញាណជាតិ។ ជាពិសេស ចាំបាច់ត្រូវយកចិត្តទុកដាក់រៀបចំបណ្តាថ្នាក់បង្រៀនផ្ទេរចំណេះដឹង ដើម្បីឱ្យយុវជនជំនាន់ក្រោយមានលក្ខខណ្ឌសិក្សាស្រាវជ្រាវ បន្តវេនមុខរបរ និងលើកកម្ពស់តម្លៃវប្បធម៌ដែលបុព្វការីជនបានបន្សល់ទុក។

មិនត្រឹមតែពឹងផ្អែកលើជួររាមច្បងសិល្បករប៉ុណ្ណោះទេ ឃុំ Bom Bo កំពុងលើកទឹកចិត្តយុវជន យុវតី និងកុមារ ឱ្យចូលរួមក្នុងសកម្មភាពវប្បធម៌ សិល្បៈ ពិធីបុណ្យប្រពៃណី និងស្វែងយល់ពីប្រវត្តិសាស្ត្រមូលដ្ឋាន។

តាមរយៈកម្មវិធីទាំងនេះ យុវជនជំនាន់ក្រោយមានឱកាសឈានចូលស្វែងយល់នូវទំនៀមទម្លាប់ ប្រពៃណីបដិវត្តន៍ និងតម្លៃវប្បធម៌ដែលផ្សារភ្ជាប់នឹងសហគមន៍របស់ខ្លួន។

សិល្បករ និងឥស្សរជនដែលមានកិត្យានុភាពបានចូលរួមដោយផ្ទាល់ក្នុងការបង្រៀនទូងគងឃ្មោះ ចម្រៀងប្រជាប្រិយ មុខរបរត្បាញសារុង ព្រមទាំងនិទានឡើងវិញនូវរឿងរ៉ាវប្រវត្តិសាស្ត្រនៃ Soc Bom Bo ជូនដល់យុវជនជំនាន់ក្រោយ។

ក្នុងចំណោមអ្នកដែលសកម្មក្នុងការអភិរក្សវប្បធម៌ប្រពៃណី មានយុវជន Dieu Coc។ ដោយមានបំណងចង់ថែរក្សាក្បាច់រាំនានារបស់ជនជាតិ Xtieng លោក Dieu Coc បានបង្កើតក្រុមរបាំ ដោយប្រមូលផ្តុំអ្នកដែលមានចំណូលចិត្តដូចគ្នាដើម្បីហាត់សម សម្តែង និងឧទ្ទេសនាមសិល្បៈប្រពៃណី។

លោក Dieu Coc បានចែករំលែកថា «តាមរយៈជំហាននីមួយៗ កាយវិការ និងសូរសំឡេងគងឃ្មោះ តម្លៃវប្បធម៌នានាត្រូវបានរស់រវើកឡើងវិញ ដោយរួមចំណែកនាំបេតិកភណ្ឌឱ្យកាន់តែខិតជិតដល់យុវជនជំនាន់ក្រោយ និងភ្ញៀវទេសចរ។ ក្រុមរបាំមិនត្រឹមតែជាកន្លែងកម្សាន្តខាងវប្បធម៌ប៉ុណ្ណោះទេ ប៉ុន្តែថែមទាំងបង្កើតឱកាសឱ្យសមាជិកទាំងឡាយបានផ្លាស់ប្តូរ សិក្សាស្រាវជ្រាវ រួមគ្នាបន្តវេន និងអភិរក្សសម្បត្តិដ៏មានតម្លៃរបស់ជនជាតិ»។

ចាប់ពីគំរូផលិតកម្មកសិកម្ម រហូតដល់សកម្មភាពសម្តែងសិល្បៈ ការអភិរក្សមុខរបរសិប្បកម្ម និងការអភិវឌ្ឍទេសចរណ៍បែបបទពិសោធន៍ជាក់ស្តែង Bom Bo កំពុងបោះជំហានរួមបញ្ចូលគ្នានូវការទាញយកសក្តានុពលសេដ្ឋកិច្ច ជាមួយការអភិរក្សអត្តសញ្ញាណវប្បធម៌ Xtieng ជាបណ្តើរៗ។

ការបង្កើតលក្ខខណ្ឌឱ្យប្រជាពលរដ្ឋចូលរួមដោយផ្ទាល់ក្នុងសកម្មភាពទេសចរណ៍ និងទទួលបានចំណូលបន្ថែមពីតម្លៃវប្បធម៌ប្រពៃណី បានរួមចំណែកនាំបេតិកភណ្ឌឱ្យផ្សារភ្ជាប់នឹងជីវភាពរស់នៅបច្ចុប្បន្ន។

ទន្ទឹមនឹងការបន្តវេនគ្នានៃជំនាន់ទាំងឡាយ ស្នូរគងឃ្មោះ ក្បាច់រាំ មុខរបរត្បាញសារុង និងរឿងរ៉ាវប្រវត្តិសាស្ត្រនៃ Soc Bom Bo នៅតែបន្តត្រូវបានថែរក្សា ហើយក្លាយជាប្រភពធនធានសម្រាប់ការអភិវឌ្ឍសេដ្ឋកិច្ច ទេសចរណ៍វប្បធម៌ និងការលើកកម្ពស់ជីវភាពរស់នៅរបស់សហគមន៍ប្រកបដោយចីរភាព៕

ការធ្វើឱ្យសុក្រឹតនូវយន្តការពិសេស បង្កើតកម្លាំងចលករថ្មីសម្រាប់វិស័យទេសចរណ៍ចាប់ពីឆ្នាំ ២០២៧ យុគសម័យ - នាព្រឹកថ្ងៃទី ២៨ ខែកញ្ញា នៅទីស្តីការរដ្ឋាភិបាល ឧបនាយករដ្ឋមន្ត្រី Pham Thi Thanh Tra បានតម្រូវឱ្យនៅក្នុងត្រីមាសទី ៤ ឆ្នាំ ២០២៦ ត្រូវតែអនុវត្តឱ្យបានខ្លាំងក្លា និងស៊ីសង្វាក់គ្នានូវស្មារតីនៃសេចក្តីសម្រេចចិត្តលេខ ២៦-NQ/TW របស់ការិយាល័យនយោបាយ ស្តីពីការអភិវឌ្ឍវិស័យទេសចរណ៍វៀតណាមឱ្យក្លាយជាវិស័យសេដ្ឋកិច្ចស្នូលក្នុងយុគសម័យថ្មី ដោយផ្តោតលើការធ្វើឱ្យសុក្រឹតនូវស្ថាប័ន គោលនយោបាយ និងការស្រាវជ្រាវយន្តការពិសេស សំដៅដោះស្រាយរាល់ការកកស្ទះសម្រាប់ការអភិវឌ្ឍវិស័យទេសចរណ៍ចាប់ពីឆ្នាំ ២០២៧។

កម្ពុជាត្រូវបានលើកតម្កើងជាគោលដៅទេសចរណ៍ឈានមុខគេនៅអាស៊ីសម្រាប់យុវវ័យជាលើកទីប្រាំជាប់ៗគ្នា យុគសម័យ - កម្ពុជាបន្តត្រូវបានប្រកាសឈ្មោះក្នុងប្រភេទទាន «គោលដៅទេសចរណ៍ឈានមុខគេនៅអាស៊ីសម្រាប់យុវវ័យប្រចាំឆ្នាំ ២០២៦» នៅក្នុងពិធីប្រគល់ពានរង្វាន់ទេសចរណ៍ពិភពលោក លើកទី ៣៣ ដែលត្រូវបានរៀបចំឡើងនាពេលថ្មីៗនេះនៅ Maldives។

ម៉ាញដាត