ការធ្វើឱ្យសុក្រឹតនូវយន្តការពិសេស បង្កើតកម្លាំងចលករថ្មីសម្រាប់វិស័យទេសចរណ៍ចាប់ពីឆ្នាំ ២០២៧

លេខាមជ្ឈិមបក្ស ឧបនាយករដ្ឋមន្ត្រី Pham Thi Thanh Tra ប្រធានគណៈកម្មាធិការដឹកនាំរដ្ឋស្តីពីទេសចរណ៍ បានអញ្ជើញជាអធិបតីក្នុងសម័យប្រជុំរបស់គណៈកម្មាធិការដឹកនាំ សំដៅវាយតម្លៃលទ្ធផលនៃការអនុវត្តភារកិច្ចក្នុងរយៈពេល ៩ ខែដើមឆ្នាំ អនុវត្តភារកិច្ចក្នុងត្រីមាសទី ៤ ឆ្នាំ ២០២៦ និងពិភាក្សាអំពីដំណោះស្រាយធ្វើឱ្យមានលក្ខណៈស្ថាប័ន រៀបចំអនុវត្តសេចក្តីសម្រេចចិត្តលេខ ២៦-NQ/TW។

ថ្លែងមតិនៅក្នុងសម័យប្រជុំ ឧបនាយករដ្ឋមន្ត្រីបានចាត់ទុកថា សេចក្តីសម្រេចចិត្តលេខ ២៦ បង្កើតកម្លាំងចលករដ៏សំខាន់ បើកចេញនូវការបោះជំហានលោតផ្លោះប្រកបដោយអត្ថន័យជាយុទ្ធសាស្ត្រសម្រាប់ការអភិវឌ្ឍវិស័យទេសចរណ៍។

តាមឧបនាយករដ្ឋមន្ត្រី សេចក្តីសម្រេចចិត្តបានឆ្លុះបញ្ចាំងពីចក្ខុវិស័យ និងការត្រិះរិះពិចារណាជាយុទ្ធសាស្ត្រគ្រប់ជ្រុងជ្រោយ បង្កើតមូលដ្ឋាននយោបាយដើម្បីឱ្យវិស័យទេសចរណ៍អភិវឌ្ឍយ៉ាងឆាប់រហ័ស ប្រកបដោយចីរភាព ដោយផ្សារភ្ជាប់ជាមួយការអភិវឌ្ឍសេដ្ឋកិច្ច-សង្គម ធានាការពារជាតិ សន្តិសុខ និងរួមចំណែកដល់គោលដៅកំណើន ២ ខ្ទង់។

ក្រោយពេលសេចក្តីសម្រេចចិត្តលេខ ២៦ ត្រូវបានប្រកាសឱ្យប្រើ រដ្ឋាភិបាលបានចេញសេចក្តីសម្រេចចិត្តលេខ ២៦៣/NQ-CP ដើម្បីឱ្យបណ្តាក្រសួង ស្ថាប័ន និងមូលដ្ឋានអនុវត្ត។ ទោះជាយ៉ាងណាក៏ដោយ វឌ្ឍនភាពនៃការអនុវត្តចាំបាច់ត្រូវតែពន្លឿនឱ្យកាន់តែឆាប់រហ័សក្នុងបណ្តាខែចុងឆ្នាំ។

«ត្រីមាសទី ៤ ឆ្នាំ ២០២៦ ត្រូវតែកំណត់ដំណើរការយ៉ាងខ្លាំងក្លា ដាច់ខាត និងស៊ីសង្វាក់គ្នានូវស្មារតីនៃសេចក្តីសម្រេចចិត្តលេខ ២៦ ក្នុងនោះ ផ្តោតលើភារកិច្ចសំខាន់ៗ មានចរិតលក្ខណៈដឹកនាំ បង្កើតលក្ខខណ្ឌដោះស្រាយជាមូលដ្ឋាននូវការលំបាក និងចំណុចកកស្ទះសម្រាប់ការអភិវឌ្ឍវិស័យទេសចរណ៍ចាប់ពីឆ្នាំ ២០២៧» ឧបនាយករដ្ឋមន្ត្រីបានសង្កត់ធ្ងន់។

ភារកិច្ចនីមួយៗត្រូវតែកំណត់ឱ្យបានច្បាស់លាស់នូវលទ្ធផលផលិតផលចុងក្រោយ

តាមឧបនាយករដ្ឋមន្ត្រី ការអនុវត្តសេចក្តីសម្រេចចិត្តលេខ ២៦ មិនអាចធ្វើឡើងដោយរាយប៉ាយ ឬគ្រាន់តែឈប់ត្រឹមសំណើទូទៅដូចជា «ពង្រឹង» «ពង្រីក» នោះឡើយ ប៉ុន្តែត្រូវតែផ្សារភ្ជាប់ជាមួយភារកិច្ច វឌ្ឍនភាព និងលទ្ធផលជាក់ស្តែង។

«ភារកិច្ចនីមួយៗត្រូវបំភ្លឺឱ្យបានច្បាស់ថា អ្នកណាជាអ្នកអនុវត្ត កាលកំណត់បញ្ចប់ ផលិតផលជាក់ស្តែងជាអ្វី ហើយផលិតផលនោះជះឥទ្ធិពលយ៉ាងណាដល់ការអភិវឌ្ឍវិស័យទេសចរណ៍» ឧបនាយករដ្ឋមន្ត្រីបានតម្រូវ។

ភារកិច្ចស្នូលមួយក្នុងចំណោមភារកិច្ចស្នូលទាំងឡាយ គឺការបន្ទាន់កសាង និងធ្វើឱ្យសុក្រឹតនូវប្រព័ន្ធស្ថាប័ន គោលនយោបាយ និងយន្តការពិសេសសម្រាប់ការអភិវឌ្ឍវិស័យទេសចរណ៍។

សម័យប្រជុំគណៈកម្មាធិការដឹកនាំរដ្ឋស្តីពីទេសចរណ៍។

ក្រសួងវប្បធម៌ កីឡា និងទេសចរណ៍ បានស្រាវជ្រាវលើជម្រើសកែសម្រួលច្បាប់មួយចំនួន ក្នុងនោះមានច្បាប់ស្តីពីទេសចរណ៍។ ទោះជាយ៉ាងណាក៏ដោយ ឧបនាយករដ្ឋមន្ត្រីបានចាត់ទុកថា គ្រាន់តែកែសម្រួលច្បាប់ស្តីពីទេសចរណ៍គឺមិនទាន់គ្រប់គ្រាន់នៅឡើយទេ ពីព្រោះនេះជាវិស័យសេដ្ឋកិច្ចចម្រុះ ពាក់ព័ន្ធនឹងវិស័យជាច្រើនដូចជា ឧស្សាហកម្ម និងពាណិជ្ជកម្ម កសិកម្ម និងបរិស្ថាន សំណង់ ការបរទេស នគរបាល ការពារជាតិ សុខាភិបាល និងហិរញ្ញវត្ថុ។

ចំពោះខ្លឹមសារទាំងឡាយណាដែលមិនអាចធ្វើសមាហរណកម្មទៅក្នុងច្បាប់ស្តីពីទេសចរណ៍បាន ចាំបាច់ត្រូវស្រាវជ្រាវស្នើឡើងនូវសេចក្តីសម្រេចចិត្តតាមប្រធានបទជាក់លាក់ ឬសេចក្តីសម្រេចចិត្តពិសេស ដើម្បីអនុវត្តសេចក្តីសម្រេចចិត្តលេខ ២៦។

ឧបនាយករដ្ឋមន្ត្រីបានប្រគល់ភារកិច្ចជូនក្រសួងវប្បធម៌ កីឡា និងទេសចរណ៍ ធ្វើជាអធិបតី សម្របសម្រួលជាមួយបណ្តាក្រសួង ស្ថាប័ននានា ដើម្បីត្រួតពិនិត្យឡើងវិញនូវក្រុមភារកិច្ច និងដំណោះស្រាយទាំងអស់នៃសេចក្តីសម្រេចចិត្តលេខ ២៦ កសាងបញ្ជីលម្អិត និងបែងចែកសមត្ថកិច្ចឱ្យបានច្បាស់លាស់។

ការត្រួតពិនិត្យឡើងវិញត្រូវតែកំណត់ឱ្យបានច្បាស់ថា ខ្លឹមសារណាខ្លះស្ថិតនៅក្រោមសមត្ថកិច្ចរបស់រដ្ឋសភា ខ្លឹមសារណាខ្លះត្រូវកែសម្រួល បំពេញបន្ថែមអនុក្រឹត្យដែលស្ថិតនៅក្រោមសមត្ថកិច្ចរបស់រដ្ឋាភិបាល និងខ្លឹមសារណាខ្លះស្ថិតនៅក្រោមសមត្ថកិច្ចរបស់បណ្តាក្រសួងដើម្បីកែសម្រួលតាមរយៈប្រកាស ឬលិខិតបទដ្ឋានពាក់ព័ន្ធ។

«ចាំបាច់ត្រូវកសាងប្រព័ន្ធស្ថាប័នមួយឱ្យបានពេញលេញ ស៊ីសង្វាក់គ្នា បង្កើតមូលដ្ឋានគ្រឹះដឹកនាំការអភិវឌ្ឍវិស័យទេសចរណ៍» ឧបនាយករដ្ឋមន្ត្រីបានគូសបញ្ជាក់យ៉ាងច្បាស់។

ទន្ទឹមនឹងនោះ យុទ្ធសាស្ត្រអភិវឌ្ឍន៍ទេសចរណ៍វៀតណាមដល់ឆ្នាំ ២០៣៥ ចក្ខុវិស័យដល់ឆ្នាំ ២០៤៥ ត្រូវតែធ្វើឱ្យរួចរាល់នៅក្នុងខែធ្នូ ឆ្នាំ ២០២៦ ដើម្បីធ្វើជាមូលដ្ឋានឯកភាពសម្រាប់ការបញ្ជាក់ឱ្យបានច្បាស់លាស់នូវសេចក្តីសម្រេចចិត្តលេខ ២៦។

កំណត់ឱ្យបានច្បាស់នូវប៉ូលកំណើន មជ្ឈមណ្ឌល និងផលិតផលប្រកបដោយលក្ខណៈពិសេស

ឧបនាយករដ្ឋមន្ត្រីបានតម្រូវឱ្យគោលដៅទាំងឡាយក្នុងសេចក្តីសម្រេចចិត្តលេខ ២៦ ត្រូវតែកំណត់ទីតាំង និងគិតជាបរិមាណជាក់ស្តែង ចាប់ពីការរួមចំណែកដោយផ្ទាល់របស់វិស័យទេសចរណ៍ទៅក្នុង GDP ចំនួនភ្ញៀវទេសចរ ប្រាក់ចំណូលសរុប ចំនួនបន្ទប់ស្នាក់នៅ រហូតដល់ការងារធ្វើដោយផ្ទាល់ និងដោយប្រយោល។

បណ្តាសូចនាករត្រូវតែបែងចែកតាមឆ្នាំនីមួយៗ ដើម្បីធ្វើជាមូលដ្ឋានសម្រាប់ក្រសួង ស្ថាប័ន និងមូលដ្ឋានកសាងផែនការ។

នៅក្នុងលំហអភិវឌ្ឍន៍ ប៉ូលកំណើនទេសចរណ៍ចំនួន ៣ ត្រូវបានកំណត់ រួមមាន ទីក្រុងហាណូយ ទីក្រុងហូជីមិញ និងដាណាំង។ ទន្ទឹមនឹងនោះ មជ្ឈមណ្ឌលទេសចរណ៍សំខាន់ៗចំនួន ១០ តំបន់ទេសចរណ៍ជាតិចំនួន ២០ និងសម្ព័ន្ធក្រុមហ៊ុន សហគ្រាសដែលមានសមត្ថភាពប្រកួតប្រជែងថ្នាក់ជាតិ និងអន្តរជាតិចំនួន ១៥ ចាំបាច់ត្រូវតែកំណត់ឱ្យបានច្បាស់លាស់ ដើម្បីមានយន្តការសម្របសម្រួល ជួយឧបត្ថម្ភ និងដោះស្រាយការលំបាកនានា។

ប៉ូលកំណើន មជ្ឈមណ្ឌលទេសចរណ៍ និងតំបន់ទេសចរណ៍ជាតិនីមួយៗ ចាំបាច់ត្រូវកំណត់ទីតាំងឱ្យបានច្បាស់អំពីប្រៀបខ្លាំង ផលិតផលស្នូល ភារកិច្ចតាមឆ្នាំនីមួយៗ និងគោលដៅដល់ឆ្នាំ ២០៣០។

ជាពិសេស មូលដ្ឋាននីមួយៗត្រូវតែកសាងឱ្យបានយ៉ាងហោចណាស់ផលិតផលទេសចរណ៍លក្ខណៈពិសេស គំរូ និងលេចធ្លោមួយ ដោយផ្អែកលើប្រៀបខ្លាំងដាច់ដោយឡែករបស់ខ្លួន ព្រមទាំងកំណត់ផលិតផលដែលមានលទ្ធភាពបង្កើតថ្មី អភិវឌ្ឍទៅជាម៉ាកយីហោ និងរួមចំណែកដល់គោលដៅរួម។

«មិនអាចនិយាយជារួមៗបានឡើយ។ មូលដ្ឋាននីមួយៗចាំបាច់ត្រូវឧទ្ទេសនាមឱ្យបាននូវផលិតផលពិសេស ប្រកបដោយលក្ខណៈដោយឡែករបស់ខ្លួន» ឧបនាយករដ្ឋមន្ត្រីបានតម្រូវ។

បណ្តាមូលដ្ឋានក៏ត្រូវតែត្រូវបានប្រគល់សូចនាករ ភារកិច្ច និងទិសដៅផលិតផលជាក់លាក់សម្រាប់ឆ្នាំ ២០២៧ ដោយផ្សារភ្ជាប់ជាមួយលទ្ធផលផលិតផលចុងក្រោយ ដើម្បីត្រួតពិនិត្យ និងវាយតម្លៃជាក់ស្តែង។

សកម្មភាពរបស់គណៈកម្មាធិការដឹកនាំរដ្ឋស្តីពីទេសចរណ៍ ត្រូវបានតម្រូវឱ្យធ្វើកំណែទម្រង់តាមទិសដៅច្បាស់មនុស្ស ច្បាស់ការងារ ច្បាស់ការទទួលខុសត្រូវ និងច្បាស់លទ្ធផល។

ទន្ទឹមនឹងការអភិវឌ្ឍផលិតផល វិស័យទេសចរណ៍ចាំបាច់ត្រូវផ្លាស់ប្តូរចេញពីរបៀបធ្វើដាច់ដោយឡែក រាយប៉ាយ ឈានទៅរកការតភ្ជាប់បណ្តាប្រភពធនធាននៅក្នុងប្រព័ន្ធឯកភាពមួយ ដោយមានការចូលរួមពីរដ្ឋ សហគ្រាស សហគមន៍ប្រជាជន អង្គការសង្គម និងបុគ្គលម្នាក់ៗ។

ការធ្វើឱ្យសុក្រឹតនូវទិន្នន័យ ថ្នាលឌីជីថល និងការជំរុញផ្សព្វផ្សាយ

ឧបនាយករដ្ឋមន្ត្រីបានប្រគល់ភារកិច្ចជូនក្រសួងវប្បធម៌ កីឡា និងទេសចរណ៍ បន្ទាន់ត្រួតពិនិត្យឡើងវិញ និងធ្វើឱ្យសុក្រឹតនូវមូលដ្ឋានទិន្នន័យជាតិស្តីពីទេសចរណ៍ និងថ្នាលឌីជីថលបម្រើដល់ការគ្រប់គ្រង ការផ្សព្វផ្សាយ និងការអភិវឌ្ឍផលិតផល។

ទិន្នន័យត្រូវតែធានា «ត្រឹមត្រូវ គ្រប់គ្រាន់ ស្អាត ដំណើរការជាប់រហូត ប្រើប្រាស់រួម» មានសមត្ថភាពតភ្ជាប់ និងបម្រើក្នុងពេលតែមួយដល់ស្ថាប័នគ្រប់គ្រងរដ្ឋ សហគ្រាស មូលដ្ឋាន និងភ្ញៀវទេសចរ។

នេះក៏ជាមូលដ្ឋានគ្រឹះដើម្បីអនុវត្តបច្ចេកវិទ្យា តភ្ជាប់ទេសចរណ៍ជាមួយសិល្បៈ ម្ហូបអាហារ បេតិកភណ្ឌវប្បធម៌ និងបណ្តាវិស័យសេដ្ឋកិច្ចផ្សេងទៀត ព្រមទាំងលើកកម្ពស់លទ្ធភាពទទួលបានព័ត៌មាន និងគុណភាពបទពិសោធន៍របស់ភ្ញៀវទេសចរ។

ការងារជំរុញ និងផ្សព្វផ្សាយ ក៏ត្រូវតែផ្លាស់ប្តូរទៅរកទិសដៅជាក់ស្តែង មានការផ្តោតសំខាន់លើចំណុចស្នូល និងកាត់បន្ថយភាពរៀបចំត្រឹមតែជាទម្រង់។

វិស័យទេសចរណ៍ចាំបាច់ត្រូវពង្រឹងការប្រើប្រាស់ថ្នាលឌីជីថលនានា សម្របសម្រួលជាមួយក្រសួងការបរទេស ទីភ្នាក់ងារតំណាងវៀតណាមនៅបរទេស សកម្មភាពជំរុញពាណិជ្ជកម្ម និងព្រឹត្តិការណ៍អន្តរជាតិនានា ដើម្បីផ្សព្វផ្សាយទេសចរណ៍។

យក APEC ២០២៧ ធ្វើជាកម្លាំងចលករសម្រាប់វិស័យទេសចរណ៍

ចំពោះការងារត្រៀមរៀបចំ APEC វៀតណាម ២០២៧ ឧបនាយករដ្ឋមន្ត្រីបានចាត់ទុកថា វិស័យទេសចរណ៍អាចដើរតួនាទីជាកាតាលីករ ដឹកនាំ និងរួមចំណែកដល់ជោគជ័យនៃព្រឹត្តិការណ៍នេះ។

នេះជាឱកាសដើម្បីឧទ្ទេសនាមនូវរូបភាពប្រទេសវៀតណាមប្រកបដោយភាពស្និទ្ធស្នាល រាក់ទាក់ សុវត្ថិភាព ស្រស់បំព្រង ព្រមទាំងផ្សព្វផ្សាយនូវបណ្តាផលិតផលទេសចរណ៍លក្ខណៈពិសេស ដែលមានសមត្ថភាពប្រកួតប្រជែងនៅក្នុងតំបន់ និងលើឆាកអន្តរជាតិ។

ឧបនាយករដ្ឋមន្ត្រីបានតម្រូវឱ្យកសាងផែនការជាក់ស្តែងស្តីពីការឃោសនា ផ្សព្វផ្សាយ ការតភ្ជាប់ផលិតផល និងខ្សែទស្សនកិច្ចនានាបម្រើឱ្យ APEC ក្នុងនោះត្រូវយកចិត្តទុកដាក់ជាពិសេសចំពោះ Phu Quoc។

បណ្តាស្ថាប័នមានសមត្ថកិច្ចចាំបាច់ត្រូវត្រួតពិនិត្យយ៉ាងទូលំទូលាយលើលក្ខខណ្ឌស្នាក់នៅ ហេដ្ឋារចនាសម្ព័ន្ធ ផលិតផលទេសចរណ៍ បរិស្ថាន ស្តង់ដាសេវាកម្ម និងសុវត្ថិភាពសម្រាប់ភ្ញៀវទេសចរ។

លេខាមជ្ឈិមបក្ស ឧបនាយករដ្ឋមន្ត្រី Pham Thi Thanh Tra ថ្លែងមតិនៅក្នុងសម័យប្រជុំគណៈកម្មាធិការដឹកនាំរដ្ឋស្តីពីទេសចរណ៍។

បណ្តាផលិតផលតភ្ជាប់ Phu Quoc ជាមួយទីក្រុងហូជីមិញ ហាណូយ ដាណាង និងបណ្តាមូលដ្ឋានផ្សេងទៀត ក៏ត្រូវតែត្រូវបានស្រាវជ្រាវ រៀបចំរចនា និងត្រួតពិនិត្យយ៉ាងហ្មត់ចត់ផងដែរ។

យ៉ាងយូរបំផុតត្រឹមថ្ងៃទី ១៥ ខែវិច្ឆិកា ក្រសួងវប្បធម៌ កីឡា និងទេសចរណ៍ ត្រូវតែបញ្ចប់ខ្លឹមសារនានាដែលពាក់ព័ន្ធនឹងការត្រៀមរៀបចំវិស័យទេសចរណ៍បម្រើឱ្យ APEC ដោយបំភ្លឺឱ្យបានច្បាស់នូវសំណង់ គម្រោង ផលិតផល សមត្ថភាពបម្រើការ និងផែនការត្រួតពិនិត្យ តាមដាន។

ការបណ្តុះបណ្តាលឱ្យឆ្លើយតបនឹងតម្រូវការជាក់ស្តែង បង្កើនការគ្រប់គ្រងហានិភ័យ

សំណើតម្រូវមួយទៀតដែលត្រូវបានដាក់ចេញ គឺការជំរុញការបណ្តុះបណ្តាល បំប៉ន និងអភិវឌ្ឍធនធានមនុស្សក្នុងវិស័យទេសចរណ៍។

ក្រសួងអប់រំ និងបណ្តុះបណ្តាល ត្រូវបានប្រគល់ភារកិច្ចឱ្យធ្វើការត្រួតពិនិត្យឡើងវិញជារួមលើបណ្តាសាកលវិទ្យាល័យ និងមហាវិទ្យាល័យដែលបណ្តុះបណ្តាលជំនាញពាក់ព័ន្ធនឹងវិស័យទេសចរណ៍ វាយតម្លៃទំហំបណ្តុះបណ្តាល ចំនួននិស្សិតបញ្ចប់ការសិក្សា និងអត្រាទទួលបានការងារធ្វើក្នុងរយៈពេល ៣ ឆ្នាំចុងក្រោយនេះ។

ការបណ្តុះបណ្តាលត្រូវតែបង្កើនការផ្សារភ្ជាប់គ្នារវាងរដ្ឋ សាលារៀន និងសហគ្រាស ដោយធានាថាកម្មវិធីសិក្សាស្របទៅនឹងតម្រូវការទីផ្សារ លើកកម្ពស់ជំនាញ និងសមត្ថភាពឆ្លើយតបនឹងលក្ខខណ្ឌតម្រូវជាក់ស្តែង។

ឧបនាយករដ្ឋមន្ត្រីក៏បានកត់សម្គាល់ផងដែរនូវលក្ខខណ្ឌតម្រូវស្តីពីការគ្រប់គ្រងហានិភ័យនៅក្នុងសកម្មភាពទេសចរណ៍។ ប្រភេទទេសចរណ៍ និងគោលដៅទេសចរណ៍ទាំងឡាយណាដែលមានកត្តាហានិភ័យ ចាំបាច់ត្រូវមានបទប្បញ្ញត្តិគ្រប់គ្រងយ៉ាងតឹងរ៉ឹង បែងចែកការទទួលខុសត្រូវរបស់ស្ថាប័ននីមួយៗឱ្យបានច្បាស់លាស់ ព្រមទាំងពង្រឹងការត្រួតពិនិត្យ និងដាស់តឿន ដើម្បីធានាសន្តិសុខ និងសុវត្ថិភាពសម្រាប់ភ្ញៀវទេសចរជាតិ និងអន្តរជាតិ។

ស្តីពីកិច្ចសហប្រតិបត្តិការទេសចរណ៍ វៀតណាម - ចិន ក្រសួងវប្បធម៌ កីឡា និងទេសចរណ៍ ត្រូវបានប្រគល់ភារកិច្ចឱ្យធ្វើជាអធិបតី សម្របសម្រួលជាមួយបណ្តាស្ថាប័នពាក់ព័ន្ធ ដើម្បីអនុវត្តតាមទិសដៅជាក់ស្តែង មានតុល្យភាព ប្រសិទ្ធភាព និងផ្តោតលើចំណុចស្នូល។

ចំពោះធនធាន ក្រសួងហិរញ្ញវត្ថុសម្របសម្រួលជាមួយក្រសួងវប្បធម៌ កីឡា និងទេសចរណ៍ ត្រួតពិនិត្យភ្លាមៗនូវរាល់តម្រូវការចាំបាច់ ដើម្បីអនុវត្តសេចក្តីសម្រេចចិត្តលេខ ២៦ ជាពិសេសគឺនៅក្នុងការប៉ាន់ប្រមាណថវិកាសម្រាប់ឆ្នាំ ២០២៧។

ភ្ញៀវអន្តរជាតិចំនួន ១៥,៩ លាននាក់ក្នុងរយៈពេល ៨ ខែ

យោងតាមរបាយការណ៍របស់ក្រសួងវប្បធម៌ កីឡា និងទេសចរណ៍ ក្នុងរយៈពេល ៨ ខែដើមឆ្នាំ ២០២៦ វៀតណាមបានទទួលស្វាគមន៍ភ្ញៀវទេសចរអន្តរជាតិចំនួន ១៥,៩ លាននាក់ កើនឡើង ១៤,៥% បើធៀបនឹងរយៈពេលដូចគ្នាក្នុងឆ្នាំ ២០២៥ ដោយសម្រេចបាន ៦៣,៦% នៃផែនការប្រចាំឆ្នាំដែលមានចំនួន ២៥ លាននាក់។

ភ្ញៀវទេសចរក្នុងស្រុកសម្រេចបាន ១១៣ លាននាក់ កើនឡើង ៦,៦% បើធៀបនឹងរយៈពេលដូចគ្នា ត្រូវជា ៧៥,៣% នៃផែនការពេញមួយឆ្នាំដែលមានចំនួន ១៥០ លាននាក់។

ចំណូលសរុបពីភ្ញៀវទេសចរសម្រេចបាន ៧៨១.០០០ ពាន់លានដុង កើនឡើង ១០,៤% បើធៀបនឹងរយៈពេលដូចគ្នា និងសម្រេចបាន ៦៩,៤% នៃផែនការប្រចាំឆ្នាំដែលមានចំនួន ១.១២៥.០០០ ពាន់លានដុង។

ភូមិសាស្ត្រសំខាន់ៗមួយចំនួនបានបន្តរក្សាអត្រាកំណើនខ្ពស់ រួមមានទីក្រុង Ho Chi Minh, Ha Noi, An Giang, Lam Dong និង Khanh Hoa។

អត្រាកំណើននៃភ្ញៀវអន្តរជាតិមកកាន់វៀតណាម គឺខ្ពស់ជាងកម្រិតកើនឡើងនៃទេសចរណ៍សកលលោក និងតំបន់អាស៊ី-ប៉ាស៊ីហ្វិក។ វៀតណាមនៅតែបន្តរក្សាបាននូវកម្រិតកំណើនពីរខ្ទង់ ក្នុងបរិបទដែលចំនួនភ្ញៀវអន្តរជាតិមកកាន់តំបន់អាស៊ីអាគ្នេយ៍មានការធ្លាក់ចុះ។

ទោះជាយ៉ាងណាក៏ដោយ សមត្ថភាពប្រកួតប្រជែង លក្ខណៈពិសេស ភាពខុសប្លែកពីគេ និងលទ្ធភាពឈានទៅកាន់កម្រិតតំបន់ និងអន្តរជាតិនៃផលិតផលទេសចរណ៍វៀតណាម នៅតែមានកម្រិតនៅឡើយ។

ការអនុវត្តវិទ្យាសាស្ត្រ បច្ចេកវិទ្យា បរិវត្តកម្មឌីជីថល និងការកៀងគរធនធានសង្គមសម្រាប់ការអភិវឌ្ឍវិស័យទេសចរណ៍ មិនទាន់ឆ្លើយតបនឹងលក្ខខណ្ឌតម្រូវនៅឡើយទេ។ យន្តការ និងគោលនយោបាយដើម្បីជំរុញឱ្យវិស័យទេសចរណ៍ក្លាយជាវិស័យសេដ្ឋកិច្ចស្នូល រួមចំណែកដល់កំណើនឆាប់រហ័ស និងប្រកបដោយចីរភាពរបស់ប្រទេសជាតិ ក៏បន្តទាមទារឱ្យមានការធ្វើឱ្យកាន់តែសុក្រឹតបន្ថែមទៀត៕

ទីក្រុង Ho Chi Minh ជំរុញសណ្ឋាគារធ្វើបរិវត្តកម្មបៃតង លើកកម្ពស់គុណភាពបម្រើសេវាកម្ម យុគសម័យ - នៅថ្ងៃទី ២០ ខែសីហា មន្ទីរទេសចរណ៍ទីក្រុង Ho Chi Minh បានរៀបចំវគ្គបណ្តុះបណ្តាលដំបូងនៅក្នុងខ្សែសង្វាក់នៃកម្មវិធីបណ្តុះបណ្តាលចំនួន ៣ ស្តីពីការគ្រប់គ្រង ប្រតិបត្តិការ និងការអភិវឌ្ឍសេវាកម្មសណ្ឋាគារតាមស្តង់ដារបៃតង និងនិន្នាការសមាហរណកម្មឆ្នាំ ២០២៦។ សកម្មភាពនេះប្រព្រឹត្តទៅក្នុងបរិបទដែលចំនួនភ្ញៀវទេសចរ និងចំណូលពីវិស័យទេសចរណ៍កើនឡើងយ៉ាងខ្លាំងក្លា ដោយបានដាក់ចេញនូវតម្រូវការឱ្យបណ្តាគ្រឹះស្ថានស្នាក់នៅ ទាំងលើកកម្ពស់ស្តង់ដារបម្រើសេវាកម្ម ទាំងសន្សំសំចៃធនធាន និងអភិវឌ្ឍតាមទិសដៅប្រកបដោយចីរភាព។

ទីក្រុង Can Tho តភ្ជាប់ធនធាន បង្កើតប្រព័ន្ធអេកូឡូស៊ីទេសចរណ៍ឯកភាព យុគសម័យ - ក្រោយពេលលំហទេសចរណ៍ត្រូវបានពង្រីកទីក្រុង Can Tho កំពុងឈរពីចំពោះមុខតម្រូវការរៀបចំឡើងវិញនូវបណ្តាប្រភពធនធាន ស្របតាមទិសដៅនៃការផ្សារភ្ជាប់យ៉ាងជិតស្និទ្ធរវាងរដ្ឋ សហគ្រាស និងសហគមន៍។ គោលដៅមិនត្រឹមតែជាការមានបន្ថែមគោលដៅទេសចរណ៍ប៉ុណ្ណោះទេ ប៉ុន្តែគឺការបង្កើតខ្សែច្រវាក់បទពិសោធន៍ដែលមានសមត្ថភាពគ្រប់គ្រាន់ដើម្បីរក្សាទុកភ្ញៀវទេសចរឱ្យស្នាក់នៅបានយូរជាងមុន ព្រមទាំងលើកកម្ពស់តម្លៃសម្រាប់តំបន់ដីសណ្តទន្លេមេគង្គទាំងមូលផងដែរ។

ឌឿងង្វៀន