ការកសាងម៉ាកយីហោពិធីបុណ្យចេញពីអត្តសញ្ញាណមូលដ្ឋាន

ភ្ញៀវទេសចរអន្តរជាតិស្វែងយល់ និងទទួលយកបទពិសោធន៍អំពីវប្បធម៌ទន្លេទឹកនៅទីក្រុង Can Tho។

ផ្លាស់ប្តូរថ្មីនូវវិធីសាស្ត្ររៀបចំ បង្កើតស្នាដៃពិសេសដោយឡែក

នៅក្នុងនិន្នាការសមាហរណកម្មអន្តរជាតិ រួមជាមួយនឹងទំហំប្រជាជនច្រើន រចនាសម្ព័ន្ធប្រជាជនវ័យក្មេង និងតម្រូវការជីវភាពវប្បធម៌សហគមន៍កាន់តែសម្បូរបែប មូលដ្ឋានជាច្រើនបានម្ចាស់ការកសាងបណ្តាព្រឹត្តិការណ៍ដែលមានលក្ខណៈជានិមិត្តរូប ដោយរួមបញ្ចូលគ្នានូវកត្តាវប្បធម៌ជាមួយនឹងទម្រង់កម្សាន្តទំនើបៗ ដើម្បីទាក់ទាញប្រជាពលរដ្ឋ និងភ្ញៀវទេសចរ។

ក្នុងចំណោមគំរូលេចធ្លោនានា មានពិធីបុណ្យ Carnaval Ha Long នៃខេត្ត Quang Ninh ដែលបានចាប់បដិសន្ធិឡើងក្នុងឆ្នាំ ២០០៧ និងពិធីបុណ្យកាំជ្រួចអន្តរជាតិ Da Nang ដែលត្រូវបានរៀបចំឡើងតាំងពីឆ្នាំ ២០០៨។ ក្រោយរយៈពេលជាច្រើនឆ្នាំនៃការអភិវឌ្ឍ ព្រឹត្តិការណ៍ទាំងពីរបានបង្កើតឡើងនូវស្នាដៃពិសេសដោយឡែក ក្លាយជាផលិតផលវប្បធម៌ ទេសចរណ៍ពិសេសរបស់មូលដ្ឋាន។

នៅ Quang Ninh ពិធីបុណ្យ Carnaval Ha Long ត្រូវបានបង្កើតឡើងចេញពីគោលការណ៍ផ្លាស់ប្តូរថ្មីនៃពិធីបុណ្យទេសចរណ៍ Ha Long - Quang Ninh ដែលពីដើមឡើយត្រូវបានរៀបចំឡើងជារៀងរាល់ឆ្នាំតាំងពីឆ្នាំ ១៩៩៦។ គោលដៅដំបូងគឺដើម្បីលើកកម្ពស់ភាពទាក់ទាញនៃព្រឹត្តិការណ៍ ព្រមទាំងផ្សព្វផ្សាយជំហរនៃបេតិកភណ្ឌធម្មជាតិពិភពលោកឈូងសមុទ្រ Ha Long ដែលត្រូវបានអង្គការ UNESCO ចុះក្នុងបញ្ជីពីរឆ្នាំមុនពេលពិធីបុណ្យប្រពៃណីនេះចាប់បដិសន្ធិឡើង។

បើទោះបីជា Carnaval គឺជាទម្រង់ពិធីបុណ្យដ៏ពេញនិយមមួយនៅលើពិភពលោកក៏ដោយ ក៏ Quang Ninh គឺជាមូលដ្ឋានដំបូងបង្អស់នៅវៀតណាមដែលបាននាំយកគំរូនេះមកដាក់ឱ្យរៀបចំ ព្រមទាំងកែសម្រួលឱ្យសមស្របតាមលក្ខខណ្ឌ និងលក្ខណៈពិសេសនៃវប្បធម៌ ទេសភាពរបស់ខេត្ត។

ទន្ទឹមនឹងក្រុមដង្ហែក្បួនស្លៀកសម្លៀកបំពាក់កែច្នៃ និងក្បួនព្យុហយាត្រានៅតាមដងផ្លូវ Carnaval Ha Long ក៏មានសកម្មភាពដង្ហែក្បួននៅលើសមុទ្រជាមួយនឹងកប៉ាល់ទេសចរណ៍ចំនួន ១៥០ គ្រឿង ដែលត្រូវបានតុបតែងយ៉ាងស្រស់ស្អាតភ្លឺចិញ្ចាច។ ការរួមបញ្ចូលគ្នារវាងលំហទីក្រុង និងទេសភាពសមុទ្រ បានបង្កើតឡើងនូវភាពទាក់ទាញថ្មីប្លែក និងទាក់ទាញការចាប់អារម្មណ៍យ៉ាងខ្លាំងពីសាធារណជនតាំងពីលើកដំបូងៗនៃការរៀបចំ។

ឆ្លងកាត់ពេលវេលា Carnaval Ha Long បានក្លាយជាម៉ាកយីហោវប្បធម៌របស់ Quang Ninh ដោយរួមចំណែកជំរុញកំណើនទេសចរណ៍ និងការផ្លាស់ប្តូររចនាសម្ព័ន្ធសេដ្ឋកិច្ច-សង្គមរបស់មូលដ្ឋាន។

កត្តាមួយក្នុងចំណោមកត្តាដែលជួយឱ្យព្រឹត្តិការណ៍នេះរក្សាបាននូវភាពទាក់ទាញ គឺកាលវិភាគនៃការរៀបចំប្រកបដោយស្ថិរភាពក្នុងឱកាសថ្ងៃឈប់សម្រាកបុណ្យ ៣០ មេសា និង ១ ឧសភា ជារៀងរាល់ឆ្នាំ។ អាស្រ័យហេតុនេះ ភ្ញៀវទេសចរអាចម្ចាស់ការលើផែនការទស្សនាកម្សាន្ត ខណៈពេលដែលបណ្តាសហគ្រាសទេសចរណ៍មានភាពងាយស្រួលក្នុងការកសាង និងណែនាំកម្មវិធីទេសចរណ៍ទៅកាន់ភ្ញៀវអន្តរជាតិ។

ទន្ទឹមនឹងការរក្សាពេលវេលារៀបចំ Carnaval Ha Long ត្រូវបានធ្វើឱ្យថ្មីជាបន្តបន្ទាប់អំពីខ្លឹមសារ ទម្រង់នៃការបង្ហាញ និងការអនុវត្តបច្ចេកវិទ្យាបញ្ចាំងរូបភាព ដើម្បីលើកកម្ពស់ប្រសិទ្ធភាពចក្ខុវិស័យ។

គួរកត់សម្គាល់ថា ការចូលរួមរបស់សហគមន៍កាន់តែត្រូវបានពង្រីក។ ក្នុងឆ្នាំ ២០២៦ ជាលើកដំបូងដែល ៥៣ ក្នុងចំណោម ៥៤ ឃុំ សង្កាត់សរុបរបស់ខេត្ត បានចូលរួមក្នុងការប្រកួតរចនារថយន្តដង្ហែក្បួន។ សកម្មភាពនេះទើបតែបានរួមចំណែកបង្កើនភាពសម្បូរបែបសម្រាប់កម្មវិធី ព្រមទាំងជំរុញការផ្សារភ្ជាប់គ្នារវាងបណ្តាសហគមន៍ប្រជាជននៅលើភូមិសាស្ត្រផងដែរ។

នៅ Da Nang ពិធីបុណ្យកាំជ្រួចអន្តរជាតិក៏បានបង្ហាញឱ្យឃើញពីប្រសិទ្ធភាពនៃការអភិវឌ្ឍសកម្មភាពកម្សាន្តមួយឱ្យក្លាយជាផលិតផលទេសចរណ៍ខ្នាតធំ។

ចាប់ផ្តើមឡើងក្នុងឆ្នាំ ២០០៨ ចេញពីការប្រកួតសម្តែងកាំជ្រួចអន្តរជាតិដែលប្រព្រឹត្តទៅក្នុងរយៈពេលពីរបីថ្ងៃ ព្រឹត្តិការណ៍នេះបានបោះជំហានពង្រីកខ្លួនជាបណ្តើរៗទៅជាពិធីបុណ្យដែលអូសបន្លាយពេញមួយផ្នែកនៃរដូវកាលទេសចរណ៍រដូវក្តៅ ដោយជារឿយៗចាប់ផ្តើមនៅចុងខែឧសភា ឬដើមខែមិថុនា ហើយបញ្ចប់ក្នុងពាក់កណ្តាលដំបូងនៃខែកក្កដា។

មិនត្រឹមតែមានការសម្តែងកាំជ្រួចប៉ុណ្ណោះទេ ពិធីបុណ្យក៏ត្រូវបានបំពេញបន្ថែមនូវកម្មវិធី និងសកម្មភាពវប្បធម៌ កម្សាន្តសម្បូរបែបជាច្រើន បង្កើតលក្ខខណ្ឌឱ្យមហាជនប្រជាពលរដ្ឋយ៉ាងច្រើនកុះករបានចូលរួម និងទាក់ទាញភ្ញៀវទេសចរ។ រហូតមកដល់បច្ចុប្បន្ន ព្រឹត្តិការណ៍នេះបានក្លាយជាសកម្មភាពមួយក្នុងចំណោមសកម្មភាពដែលត្រូវបានទន្ទឹងរង់ចាំបំផុតប្រចាំឆ្នាំនៅទីក្រុង Da Nang។

ការទាញយកផលពីប្រៀបខ្លាំងវប្បធម៌ដើម្បីអភិវឌ្ឍទេសចរណ៍

ទន្ទឹមនឹងបណ្តាព្រឹត្តិការណ៍ដែលទទួលយកគំរូរៀបចំពីអន្តរជាតិ ខេត្ត ក្រុងជាច្រើនបានជ្រើសរើសការអភិវឌ្ឍម៉ាកយីហោពិធីបុណ្យដោយផ្អែកលើធនធាន និងលក្ខណៈពិសេសនៃវប្បធម៌ផ្ទាល់ខ្លួន។

នៅ Hai Phong ពិធីបុណ្យផ្កាក្ងោកក្រហម ត្រូវបានកសាងឡើងចេញពីរូបភាពនៃប្រភេទផ្កាដែលបានក្លាយជានិមិត្តរូបនៃទីក្រុងកំពង់ផែ។ ក្នុងពេលជាមួយគ្នានេះ Hue បានអភិវឌ្ឍ Festival Hue តាមវដ្តរយៈពេលពីរឆ្នាំម្តង ព្រមទាំងពង្រីកកម្មវិធីសកម្មភាពពេញមួយឆ្នាំ និងរៀបចំឆ្លាស់គ្នាជាមួយ Festival មុខរបរប្រពៃណី Hue។

នៅ Lam Dong ពិធីបុណ្យ Festival ផ្កា Da Lat ត្រូវបានរៀបចំឡើងជាប្រចាំពីរឆ្នាំម្តង ចាប់តាំងពីឆ្នាំ ២០០៥ ផ្សារភ្ជាប់ជាមួយនឹងប្រៀបខ្លាំងខាងផ្កា និងទេសភាពពិសេសដោយឡែករបស់មូលដ្ឋាន។

ឆ្លងកាត់ការរៀបចំជាច្រើនលើក Festival ផ្កា Da Lat មានការផ្លាស់ប្តូរជាច្រើនអំពីទម្រង់ ពង្រឹងការចូលរួមរបស់ប្រជាពលរដ្ឋ ពង្រីកការតភ្ជាប់ជាមួយបណ្តាមូលដ្ឋានក្នុងតំបន់។ លំហបទពិសោធន៍វប្បធម៌ និងសិល្បៈ ក៏ត្រូវបានអភិវឌ្ឍតាមរយៈសកម្មភាពឆ្លើយតបរាប់សិប ដែលប្រព្រឹត្តទៅក្នុងរយៈពេលជាច្រើនខែមុនពេលពិធីបុណ្យជាផ្លូវការចាប់ផ្តើម។

នៅតំបន់ Tay Nguyen ពិធីបុណ្យកាហ្វេ Buon Ma Thuot ត្រូវបានរក្សាពីរឆ្នាំម្តង ដោយក្លាយជាទីកន្លែងជួបជុំអំពីវប្បធម៌ ទេសចរណ៍ និងពាណិជ្ជកម្មអន្តរជាតិ។ តាមរយៈព្រឹត្តិការណ៍នេះ តម្លៃទាំងឡាយដែលផ្សារភ្ជាប់នឹងផលិតផលកាហ្វេត្រូវបានផ្សព្វផ្សាយ រួមចំណែកជំរុញការអភិវឌ្ឍវិស័យកាហ្វេរបស់តំបន់។

គំរូថ្មីមួយដែលទាញយកផលពីលក្ខណៈពិសេសនៃវប្បធម៌មូលដ្ឋាន គឺពិធីបុណ្យវប្បធម៌ទន្លេទឹក Can Tho ដែលត្រូវបានរៀបចំឡើងជាលើកដំបូងនៅក្នុងសប្តាហ៍ចុងក្រោយនៃឆ្នាំ ២០២៥ ក្នុងឱកាសអបអរសាទរបុណ្យចូលឆ្នាំសកល ២០២៦។

យោងតាមផែនការ ពិធីបុណ្យនឹងត្រូវបានរក្សាជារៀងរាល់ឆ្នាំ ជាមួយនឹងប្រធានបទដោយឡែកសម្រាប់ការរៀបចំនីមួយៗ សំដៅកសាងផលិតផលវប្បធម៌ ទេសចរណ៍ផ្សារភ្ជាប់នឹងជីវភាពទន្លេទឹកនៃតំបន់ដីសណ្តទន្លេ Cuu Long។

តំណាងអាជ្ញាធរមូលដ្ឋានបានឱ្យដឹងថា ព្រឹត្តិការណ៍នេះមិនត្រឹមតែសំដៅឧទ្ទេសនាមនូវចំណុចពិសេសនៃវប្បធម៌ទន្លេទឹក ទាក់ទាញភ្ញៀវទេសចរមកកាន់ Can Tho «អង្ករសទឹកថ្លា» ប៉ុណ្ណោះទេ ប៉ុន្តែថែមទាំងបង្កើតឱកាសលើកកម្ពស់ការយល់ដឹងរបស់សហគមន៍អំពីតម្លៃវប្បធម៌ជនជាតិដើម និងការទទួលខុសត្រូវក្នុងការការពារប្រព័ន្ធអេកូឡូស៊ីទន្លេទឹកផងដែរ។

តាមរយៈពិធីបុណ្យ មូលដ្ឋានក៏តម្រង់ទិសដៅទៅរកការអភិវឌ្ឍទេសចរណ៍ប្រកបដោយចីរភាព នៅលើមូលដ្ឋាននៃការតភ្ជាប់រវាងបណ្តាផ្នែកមុខរបរ ពង្រឹងកិច្ចសហប្រតិបត្តិការក្នុងតំបន់ រវាងបណ្តាតំបន់ក្នុងប្រទេស និងបោះជំហានពង្រីកការតភ្ជាប់ជាបណ្តើរៗជាមួយបណ្តាប្រទេសដែលស្ថិតនៅតាមបណ្តោយទន្លេ Mekong។

ការអនុវត្តជាក់ស្តែងនៃការរៀបចំពិធីបុណ្យនៅតាមមូលដ្ឋានជាច្រើនបានបង្ហាញថា ទោះបីជាត្រូវបានអភិវឌ្ឍចេញពីគំរូអន្តរជាតិ ឬផ្តើមចេញពីអត្តសញ្ញាណវប្បធម៌ជនជាតិដើមក៏ដោយ ក៏បណ្តាព្រឹត្តិការណ៍ខ្នាតធំសុទ្ធតែមានសមត្ថភាពបង្កើតផលប៉ះពាល់ជាវិជ្ជមានដល់ជីវភាពវប្បធម៌ និងសកម្មភាពទេសចរណ៍។

ក្នុងនោះ ការរក្សាកាលវិភាគរៀបចំជាប្រចាំ បានជួយបង្កើតទម្លាប់ចូលរួមរបស់សាធារណជន និងបង្កលក្ខណៈអំណោយផលដល់សកម្មភាពអាជីវកម្មទេសចរណ៍។ ការផ្សារភ្ជាប់ជាមួយសហគមន៍បានរួមចំណែកពង្រឹងអត្តសញ្ញាណមូលដ្ឋាន ចំណែកឯការផ្លាស់ប្តូរថ្មីកម្មវិធីជាប្រចាំ និងការលើកកម្ពស់គុណភាពនៃការរៀបចំ បានជួយរក្សាភាពទាក់ទាញនៃព្រឹត្តិការណ៍។

ទាំងនេះគឺជាកត្តាសំខាន់ៗ ដើម្បីឱ្យបណ្តាមូលដ្ឋានបន្តអភិវឌ្ឍម៉ាកយីហោពិធីបុណ្យ ទាញយកផលប្រកបដោយប្រសិទ្ធភាពពីប្រៀបខ្លាំងវប្បធម៌ដោយឡែកដែលមានស្រាប់ និងបោះជំហានប្រែក្លាយធនធានវប្បធម៌ឱ្យទៅជាកម្លាំងចលករនៃកំណើនសេដ្ឋកិច្ច និងទេសចរណ៍ជាបណ្តើរៗ៕

ទទួលស្វាគមន៍ភ្ញៀវទេសចរ ១២ លាននាក់ក្នុងឱកាសបុណ្យ វិស័យទេសចរណ៍មានភាពរីកចម្រើនមុនឈានចូលរដូវក្តៅឆ្នាំ ២០២៦ យុគសម័យ - ឱកាសឈប់សម្រាកពីរជាប់ៗគ្នាគឺ បុណ្យខួបកំណើតស្តេចហុង និងថ្ងៃទី ៣០ មេសា - ០១ ឧសភា បានកត់ត្រាភ្ញៀវទេសចរប្រមាណ ១២ លាននាក់ ដែលកើនឡើង ១៤,២% បើធៀបនឹងរយៈពេលដូចគ្នាកាលពីឆ្នាំមុន។ អត្រាប្រើប្រាស់សេវាកម្មស្នាក់នៅខ្ពស់ គោលដៅទេសចរណ៍មានភាពរស់រវើក សកម្មភាពទេសចរណ៍ប្រកបដោយសុវត្ថិភាព បានបង្កើតជាកម្លាំងរុញច្រានសម្រាប់រដូវកាលទេសចរណ៍រដូវក្តៅដ៏មមាញឹកខាងមុខ។

ពណ៌សម្បុរវៀតណាមលេចធ្លោក្នុងពិធីបុណ្យវប្បធម៌សកល Seongnam (កូរ៉េខាងត្បូង) យុគសម័យ - ស្តង់ទំនិញវៀតណាមដែលរៀបចំឡើងដោយសមាគមភរិយាវៀតណាម និងនិស្សិតវៀតណាមនៅក្នុងទីក្រុង Seongnam បានទាក់ទាញភ្ញៀវចូលទស្សនាយ៉ាងកុះករ។

វ៉ាន់ណាំ