អ្នកជំនាញឥណ្ឌា៖ វៀតណាមអាចទាញយកផលប្រយោជន៍ពី BRICS ដើម្បីធ្វើពិពិធកម្មទំនាក់ទំនង

វៀតណាមទើបតែបានចូលរួមកិច្ចប្រជុំកំពូលនៃក្រុមបណ្តាខឿនសេដ្ឋកិច្ចដែលកំពុងងើបឡើង (BRICS) លើកទី ១៨ នៅ New Delhi ឥណ្ឌា ក្នុងឋានៈជាប្រទេសដៃគូ។ នាយករដ្ឋមន្ត្រីរដ្ឋាភិបាល Le Minh Hung បានដឹកនាំគណៈប្រតិភូជាន់ខ្ពស់វៀតណាមចូលរួមកិច្ចប្រជុំ ក្នុងក្របខ័ណ្ឌនៃដំណើរបំពេញការងារនៅឥណ្ឌា ចាប់ពីថ្ងៃទី ១២ ដល់ថ្ងៃទី ១៣ ខែកញ្ញា ឆ្នាំ ២០២៦។ នេះគឺជាលើកទីពីរហើយដែលវៀតណាមចូលរួមកិច្ចប្រជុំកំពូល BRICS ក្នុងឋានៈជាប្រទេសដៃគូ។

ផ្លាស់ប្តូរយោបល់ជាមួយអ្នកយកព័ត៌មាននៃទីភ្នាក់ងារសារព័ត៌មានវៀតណាមប្រចាំនៅ New Delhi លោក S.D. Pradhan បានចាត់ទុកថា ការចូលរួមយ៉ាងសកម្ម និងការរួមចំណែកនានារបស់បណ្តាប្រទេសដៃគូ ក្នុងនោះមានវៀតណាមផងដែរ បានរួមចំណែកដល់លទ្ធផលរួមនៃកិច្ចប្រជុំ។ ចំពោះវៀតណាម យន្តការប្រទេសដៃគូបានបង្កើតបន្ថែមនូវច្រកមួយទៀតដើម្បីពង្រីកទំនាក់ទំនង និងតភ្ជាប់ជាមួយកម្លាំងចលករអភិវឌ្ឍន៍ថ្មីៗ។

បន្ថែមច្រកពង្រីកទីផ្សារ បច្ចេកវិទ្យា និងការវិនិយោគ

យោងតាមលោក S.D. Pradhan វៀតណាមអាចចាត់ទុក BRICS ដូចជា «ឧបករណ៍ធ្វើពិពិធកម្មយុទ្ធសាស្ត្រ» មួយ ដោយទាញយកផលប្រយោជន៍ពីបណ្តាញដែលមានប្រទេសជាសមាជិកចំនួន ១១ ដើម្បីស្វែងរកទីផ្សារ បច្ចេកវិទ្យា និងលំហូរទុនវិនិយោគបន្ថែម ព្រមទាំងលើកកម្ពស់សមត្ថភាពភាពធន់នៃខ្សែច្រវាក់ផ្គត់ផ្គង់ និងបង្កើនការចូលរួមក្នុងបណ្តាបញ្ហាអភិបាលកិច្ចសកល។ បច្ចុប្បន្ន BRICS រួមមានសមាជិកចំនួន ១១ ប្រទេស៖ ប្រេស៊ីល ចិន អេហ្ស៊ីប អេធ្យូពី ឥណ្ឌា ឥណ្ឌូណេស៊ី អ៊ីរ៉ង់ រុស្ស៊ី អារ៉ាប៊ីសាអូឌីត អាហ្វ្រិកខាងត្បូង និងអារ៉ាប់រួម។

ទោះជាយ៉ាងណាក៏ដោយ យោងតាមអ្នកជំនាញឥណ្ឌា ការចូលរួមក្នុង BRICS មិនមានន័យថាជាការបង្រួមលំហកិច្ចសហប្រតិបត្តិការដទៃទៀតនោះឡើយ។ លោកបានយល់ឃើញថា វៀតណាមអាចទន្ទឹមនឹងនោះបន្តចាត់ទុកអាស៊ានជាមូលដ្ឋានគ្រឹះ រក្សាទំនាក់ទំនងភាពជាដៃគូជាមួយសហរដ្ឋអាមេរិក ជប៉ុន អឺរ៉ុប និងបណ្តាដៃគូផ្សេងទៀត។

ដោយលើកឡើងពីវិធីសាស្ត្រចូលរួមរបស់ឥណ្ឌានៅក្នុងកិច្ចប្រជុំកំពូលលើកទី ១៨ លោក S.D. Pradhan បានចាត់ទុកថា បទពិសោធន៍គួរជាទីពិចារណា គឺការប្រើប្រាស់ BRICS ដើម្បី «ពង្រីកលំហយុទ្ធសាស្ត្រ មិនមែនបង្រួមលំហនោះឡើយ»។ តាមការវាយតម្លៃរបស់លោក ឥណ្ឌាបានតម្រង់ទិសរបៀបវារៈរបស់ BRICS ឆ្ពោះទៅកាន់ខ្លឹមសារពហុប៉ូល ការអភិវឌ្ឍ និងកិច្ចសហប្រតិបត្តិការជាក់ស្តែង។

ក្នុងទិដ្ឋភាពសេដ្ឋកិច្ច អ្នកជំនាញបានស្នើឱ្យវៀតណាមទាញយកផលប្រយោជន៍ពីយន្តការនេះ ដើម្បីពង្រីកបណ្តាញដៃគូ ជំរុញការទាក់ទាញការវិនិយោគ និងការផ្ទេរបច្ចេកវិទ្យា; យកចិត្តទុកដាក់លើរ៉ែសំខាន់ៗ សមត្ថភាពស្តារឡើងវិញនៃខ្សែច្រវាក់ផ្គត់ផ្គង់ ក៏ដូចជាម្ចាស់ការចូលរួមក្នុងបណ្តាគំនិតផ្តួចផ្តើមស្តីពីការបរិវត្តកម្មឌីជីថល និងបញ្ញាសិប្បនិម្មិត។

នាយករដ្ឋមន្ត្រី Le Minh Hung រួមជាមួយបណ្តាប្រធានគណៈប្រតិភូ ចូលរួមកិច្ចប្រជុំកំពូល BRICS លើកទី ១៨ នៅឥណ្ឌា។

លោកក៏បានចាត់ទុកថា ឋានៈជាប្រទេសដៃគូ BRICS អាចត្រូវបានវៀតណាមទាញយកផលប្រយោជន៍ដូចជា «ដៃតភ្ជាប់បន្ថែមរបស់អាស៊ាន» មួយ តាមរយៈនោះបង្កើតបន្ថែមនូវច្រកតភ្ជាប់នានារវាងតំបន់អាស៊ីអាគ្នេយ៍ជាមួយបណ្តាខឿនសេដ្ឋកិច្ចកំពុងអភិវឌ្ឍន៍ និងទីផ្សារដែលកំពុងងើបឡើង។

វិធីសាស្ត្រនេះមានចំណុចស្របគ្នាជាមួយនឹងសារដែលត្រូវបានវៀតណាមលើកឡើងនៅក្នុងកិច្ចប្រជុំ។ ថ្លែងសុន្ទរកថានៅថ្ងៃទី ១៣ ខែកញ្ញា នាយករដ្ឋមន្ត្រី Le Minh Hung បានអះអាងថា វៀតណាមមានបំណងចង់ឱ្យ BRICS ពង្រឹងការសម្របសម្រួលជាមួយបណ្តាយន្តការរៀបចំពហុភាគីក្នុងតំបន់ អន្តរតំបន់ និងសកល ជំរុញកិច្ចសន្ទនា កិច្ចសហប្រតិបត្តិការ និងបង្កើតឱកាសអភិវឌ្ឍន៍ប្រកបដោយសមធម៌ និងចីរភាពសម្រាប់បណ្តាប្រទេសនានា។

លើកកម្ពស់ការតភ្ជាប់វៀតណាម - ឥណ្ឌា

យោងតាមលោក S.D. Pradhan ទំនាក់ទំនងជាមួយឥណ្ឌាអាចក្លាយជាច្រកមួយជួយឧបត្ថម្ភវៀតណាមទាញយកផលប្រយោជន៍កាន់តែមានប្រសិទ្ធភាពពីយន្តការ BRICS។

យោងតាមលោក ប្រទេសទាំងពីរអាចទាំងប្រើប្រាស់ក្របខ័ណ្ឌនេះដើម្បីធ្វើឱ្យស៊ីជម្រៅបន្ថែមទៀតនូវកិច្ចសហប្រតិបត្តិការទ្វេភាគី ទាំងសម្របសម្រួលចូលរួមចំណែកបញ្ចេញសំឡេងនៅក្នុងបណ្តាបញ្ហារបស់ពិភពលោកខាងត្បូង។

នៅក្នុងដំណើរបំពេញការងារចូលរួមកិច្ចប្រជុំ នៅថ្ងៃទី ១២ ខែកញ្ញា នាយករដ្ឋមន្ត្រី Le Minh Hung បានជួបពិភាក្សាការងារជាមួយនាយករដ្ឋមន្ត្រីឥណ្ឌា Narendra Modi នៅ New Delhi។ ភាគីទាំងពីរបានផ្លាស់ប្តូរយោបល់លើខ្លឹមសារកិច្ចសហប្រតិបត្តិការជាច្រើន ចាប់ពីពាណិជ្ជកម្ម ការតភ្ជាប់គមនាគមន៍ ការពារជាតិ - សន្តិសុខ រហូតដល់វិទ្យាសាស្ត្រ - បច្ចេកវិទ្យា នវានុវត្តន៍ និងការផ្លាស់ប្តូរប្រជាជននិងប្រជាជន។ នាយករដ្ឋមន្ត្រីទាំងពីរក៏បានឯកភាពរៀបចំកិច្ចប្រជុំលើកដំបូងនៃយន្តការកិច្ចសន្ទនាការទូត - ការពារជាតិ ឱ្យបានឆាប់ៗផងដែរ។

ពីទស្សនៈរបស់ខ្លួន លោក S.D. Pradhan បានវាយតម្លៃថា បណ្តាជំហានអភិវឌ្ឍន៍នៅក្នុងកិច្ចសហប្រតិបត្តិការការពារជាតិ - សន្តិសុខ រ៉ែដីកម្រ ថាមពល លំហអវកាស ព្រមទាំងការជំរុញយន្តការកិច្ចសន្ទនា ២+២ បានបង្ហាញឱ្យឃើញថាកិច្ចសហប្រតិបត្តិការវៀតណាម - ឥណ្ឌា កាន់តែតម្រង់ទិសឆ្ពោះទៅកាន់បណ្តាវិស័យដែលមានអត្ថន័យយុទ្ធសាស្ត្រយូរអង្វែង។

លោកបានចាត់ទុកថា នេះជាលក្ខខណ្ឌអំណោយផលដើម្បីឱ្យប្រទេសទាំងពីរបង្កើនការតភ្ជាប់ មិនត្រឹមតែលើទិដ្ឋភាពទ្វេភាគីប៉ុណ្ណោះទេ ប៉ុន្តែថែមទាំងនៅតាមបណ្តាយន្តការពហុភាគីដែលភាគីទាំងពីររួមគ្នាចូលរួមផងដែរ។

នាយករដ្ឋមន្ត្រី Le Minh Hung ថ្លែងសុន្ទរកថានៅសម័យប្រជុំស្តីពី «ភាពធន់ នវានុវត្តន៍ កិច្ចសហប្រតិបត្តិការ និងការអភិវឌ្ឍប្រកបដោយចីរភាព៖ កំណត់ទម្រង់អនាគតនៃកំណើនប្រកបដោយបរិយាបន្នសកល»។

បង្កើនការតភ្ជាប់ ប៉ុន្តែរក្សាស្វ័យភាព

ខ្លឹមសារមួយទៀតដែលត្រូវបានលោក S.D. Pradhan សង្កត់ធ្ងន់ គឺវៀតណាមអាចប្រើប្រាស់ BRICS ដូចជាច្រកបំពេញបន្ថែមមួយដើម្បីធ្វើពិពិធកម្មសកម្មភាពកិច្ចការបរទេស ស្របពេលជាមួយគ្នានឹងការបន្តរក្សាវិធីសាស្ត្រមិនចូលបក្សសម្ព័ន្ធ។

យោងតាមអ្នកជំនាញ ការរក្សាគណៈប្រតិភូជាន់ខ្ពស់ចូលរួមកិច្ចប្រជុំកំពូល BRICS ក៏បង្កើតបន្ថែមនូវលក្ខខណ្ឌអំណោយផលដើម្បីឱ្យវៀតណាមបង្កើនការជួបប្រាស្រ័យទាក់ទងជាមួយប្រទេសប្រធាន និងបណ្តាដៃគូដែលចូលរួម ពង្រីកការផ្លាស់ប្តូរយោបល់អំពីសេដ្ឋកិច្ច បច្ចេកវិទ្យា និងបញ្ហាអភិវឌ្ឍន៍នានា។

ការដែលវៀតណាមចូលរួមក្នុងឋានៈជាប្រទេសដៃគូ ក៏សមស្របជាមួយនឹងយន្តការកិច្ចសហប្រតិបត្តិការពង្រីករបស់ BRICS ផងដែរ។ យោងតាមភាគីឥណ្ឌា វៀតណាមគឺជាប្រទេសមួយក្នុងចំណោមប្រទេសទាំង ១០ ដែលបានចូលរួមក្របខ័ណ្ឌប្រទេសដៃគូចាប់តាំងពីឆ្នាំ ២០២៥ មក។

សរុបជារួម លោក S.D. Pradhan បានចាត់ទុកថា ការចូលរួមរបស់វៀតណាមនៅកិច្ចប្រជុំកំពូល BRICS លើកទី ១៨ បានបង្កើតបន្ថែមនូវច្រកកិច្ចសហប្រតិបត្តិការពហុភាគីមួយទៀត។ ក្នុងនោះ វៀតណាម និងឥណ្ឌា អាចលើកកម្ពស់តួនាទីតភ្ជាប់រវាងតំបន់អាស៊ីខាងត្បូង អាស៊ាន និងបណ្តាប្រទេសចំណុះពិភពលោកខាងត្បូង។

យោងតាមអ្នកជំនាញ តម្លៃនៃច្រកកិច្ចសហប្រតិបត្តិការនេះ ស្ថិតនៅលើសមត្ថភាពពង្រីកជម្រើស និងទំនាក់ទំនងជាមួយដៃគូជាច្រើន ខណៈពេលដែលវៀតណាមនៅតែរក្សាស្វ័យភាពក្នុងការរៀបចំផែនការ និងការអនុវត្តគោលនយោបាយកិច្ចការបរទេស៕

ដើមឈើ Van Nien Tung៖ និមិត្តរូបនៃចំណងមិត្តភាពវៀតណាម-ឥណ្ឌា យុគសម័យ - ដើម Van Nien Tung ដែលមានអាយុកាលច្រើនឆ្នាំត្រូវបានជ្រើសរើសដើម្បីដាំតំណាងឱ្យអាយុយឺនយូរ និងថាមពលរុងរឿង ភ្ជាប់មនុស្សជាមួយនឹងធម្មជាតិ ដែលជានិមិត្តរូបនៃចំណងមិត្តភាពវៀតណាម-ឥណ្ឌាក្នុង “ដំណើរបៃតងវៀតណាម-ឥណ្ឌា”។

នាវា CSB 8005 របស់វៀតណាម បានបញ្ចប់ដំណើរទស្សនកិច្ច និងសកម្មភាពជួបប្រាស្រ័យនៅប្រទេសឥណ្ឌា នាវា CSB 8005 និងគណៈប្រតិភូកងឆ្មាំសមុទ្រវៀតណាមបានចាកចេញពីកំពង់ផែទីក្រុង Kochi (រដ្ឋ Kerala ប្រទេសឥណ្ឌា) បន្ទាប់ពីរយៈពេល ៥ ថ្ងៃធ្វើដំណើរទស្សនកិច្ច ជួបប្រាស្រ័យ ផ្លាស់ប្តូរ និងចែករំលែកបទពិសោធន៍ជាមួយកងកម្លាំងការពារសមុទ្រឥណ្ឌា។

ម៉ាញដាត