នាំកិច្ចសហប្រតិបត្តិការ វៀតណាម - សិង្ហបុរី ទៅកាន់បណ្តាវិស័យបច្ចេកវិទ្យា និងចំណេះដឹងកម្រិតខ្ពស់

សមាជិកការិយាល័យនយោបាយ រដ្ឋមន្ត្រីក្រសួងការបរទេស Le Hoai Trung។

អ្នកយកព័ត៌មាន៖ សូមរដ្ឋមន្ត្រីជម្រាបជូននូវលទ្ធផលលេចធ្លោនានានៃដំណើរទស្សនកិច្ចផ្លូវការនៅសិង្ហបុរីរបស់សមមិត្ត Tran Cam Tu និងកិច្ចប្រជុំលើកទីមួយនៃកិច្ចសន្ទនាយុទ្ធសាស្ត្រ វៀតណាម - សិង្ហបុរី?

រដ្ឋមន្ត្រី Le Hoai Trung៖ ដំណើរទស្សនកិច្ចផ្លូវការនៅសិង្ហបុរី និងការធ្វើជាសហប្រធាននៃកិច្ចសន្ទនាយុទ្ធសាស្ត្រ វៀតណាម - សិង្ហបុរី លើកទីមួយ របស់សមមិត្តសមាជិកប្រចាំការនៃគណៈលេខា ទទួលបានជោគជ័យយ៉ាងត្រចះត្រចង់ សម្រេចបានក្នុងកម្រិតខ្ពស់នូវរាល់គោលដៅដែលបានកំណត់ និងនាំមកនូវលទ្ធផលជាក់ស្តែងជាច្រើន។

ជាបឋម រដ្ឋាភិបាលសិង្ហបុរី និងគណបក្សសកម្មភាពប្រជាជន សុទ្ធសឹងតែផ្តល់តម្លៃយ៉ាងពិសេសចំពោះដំណើរទស្សនកិច្ច ក៏ដូចជាយន្តការកិច្ចសន្ទនាយុទ្ធសាស្ត្ររវាងបក្សទាំងពីរ។ ថ្នាក់ដឹកនាំសិង្ហបុរីបានទទួលបដិសណ្ឋារកិច្ចចំពោះសមមិត្តសមាជិកប្រចាំការនៃគណៈលេខា និងគណៈប្រតិភូបក្សយើងយ៉ាងមហោឡារិក និងស្និទ្ធស្នាលជាទីបំផុត។

កម្មវិធីការងាររបស់សមមិត្តសមាជិកប្រចាំការនៃគណៈលេខាមានភាពសម្បូរបែប និងជាក់ស្តែង ដោយមានជំនួបពិភាក្សា ជំនួបសម្តែងការគួរសម និងការផ្លាស់ប្តូរមតិយោបល់យ៉ាងស៊ីជម្រៅ ជាមួយថ្នាក់ដឹកនាំជាន់ខ្ពស់បំផុតនៃរដ្ឋាភិបាលសិង្ហបុរី និងគណបក្សសកម្មភាពប្រជាជន ដូចជា ប្រធានាធិបតី Tharman Shanmugaratnam នាយករដ្ឋមន្ត្រី និងជាអគ្គលេខាធិការគណបក្សសកម្មភាពប្រជាជន Lawrence Wong ប្រធានរដ្ឋសភា Seah Kian Peng ប្រធានគណបក្សសកម្មភាពប្រជាជន Desmond Lee រដ្ឋមន្ត្រីជាន់ខ្ពស់ និងជារដ្ឋមន្ត្រីសម្របសម្រួលសន្តិសុខជាតិ ព្រមទាំងជារដ្ឋមន្ត្រីក្រសួងមហាផ្ទៃ K. Shanmugam។ សមមិត្តសមាជិកប្រចាំការនៃគណៈលេខាក៏បានទៅទស្សនា និងទស្សនាសកម្មភាពនៅថ្នាក់មូលដ្ឋានរបស់គណបក្សសកម្មភាពប្រជាជនផងដែរ។

ទីពីរ សមមិត្តសមាជិកប្រចាំការនៃគណៈលេខា និងថ្នាក់ដឹកនាំសិង្ហបុរីបានផ្លាស់ប្តូរមតិយោបល់ក្នុងស្មារតីបើកចំហ ទុកចិត្តគ្នា អំពីខ្លឹមសារសហប្រតិបត្តិការជាច្រើនរវាងប្រទេសទាំងពីរ ក៏ដូចជារវាងបក្សយើង និងគណបក្សសកម្មភាពប្រជាជនសិង្ហបុរី ដោយបានឯកភាពលើទិសដៅសំខាន់ៗជាច្រើន សំដៅបន្តពង្រឹងកិច្ចសហប្រតិបត្តិការ វៀតណាម - សិង្ហបុរី។

ភាគីទាំងពីរបានសង្កត់ធ្ងន់លើតម្រូវការអនុវត្តការប្តេជ្ញាចិត្ត និងកិច្ចព្រមព្រៀងនានារវាងថ្នាក់ដឹកនាំជាន់ខ្ពស់នៃប្រទេសទាំងពីរ ធ្វើឱ្យស៊ីជម្រៅនូវទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ ដើម្បីផលប្រយោជន៍របស់ប្រជាជននៃប្រទេសទាំងពីរ សន្តិភាព ស្ថិរភាព និងការអភិវឌ្ឍនៅក្នុងតំបន់ និងលើពិភពលោក។

ទីបី កិច្ចសន្ទនាយុទ្ធសាស្ត្រ វៀតណាម - សិង្ហបុរី លើកទីមួយ ដែលជាយន្តការសន្ទនាយុទ្ធសាស្ត្រដំបូងគេបង្អស់ដែលបក្សយើងបានបង្កើតឡើងជាមួយគណបក្សនយោបាយបរទេសមួយ ក្រោមអធិបតីភាពរួមរបស់សមមិត្តសមាជិកប្រចាំការនៃគណៈលេខា និងអគ្គលេខាធិការរងគណបក្សសកម្មភាពប្រជាជន បានប្រព្រឹត្តទៅប្រកបដោយប្រសិទ្ធភាព និងជាក់ស្តែងជាទីបំផុត។

នេះជាជំហានអនុវត្តជាក់ស្តែង និងយ៉ាងឆាប់រហ័សនូវរាល់កិច្ចព្រមព្រៀងជាន់ខ្ពស់ដែលសម្រេចបានក្នុងដំណើរទស្សនកិច្ចនៅសិង្ហបុរីកាលពីខែឧសភាកន្លងទៅ របស់អគ្គលេខាបក្ស ប្រធានរដ្ឋ To Lam ស្របតាមផ្នត់គំនិត «សកម្មភាព» ពោលគឺបំប្លែងឆន្ទៈឱ្យទៅជាសកម្មភាព បំប្លែងការសម្រេចចិត្តឱ្យទៅជាលទ្ធផល ដូចដែលអគ្គលេខាបក្ស ប្រធានរដ្ឋ បានគូសបញ្ជាក់យ៉ាងច្បាស់។

តាមរយៈនោះ ទំនាក់ទំនងតាមរយៈបណ្តាញបក្សបន្តត្រូវបានជំរុញឱ្យចូលកាន់តែស៊ីជម្រៅ រួមចំណែកតម្រង់ទិសរួមសម្រាប់ទំនាក់ទំនង វៀតណាម - សិង្ហបុរី ជាពិសេសគឺនៅក្នុងបណ្តាវិស័យស្នូល យុទ្ធសាស្ត្រ បង្កលក្ខណៈងាយស្រួលធ្វើឱ្យកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរកាន់តែស៊ីជម្រៅថែមទៀត។

ភាគីទាំងពីរបានផ្លាស់ប្តូរ និងចែករំលែកបញ្ហាយុទ្ធសាស្ត្រជាច្រើនដែលជាកង្វល់រួម ស្តីពីការបណ្តុះបណ្តាលប្រភពធនធានមនុស្ស និងការតភ្ជាប់បច្ចេកវិទ្យា ដោយបានសង្កត់ធ្ងន់លើសារៈសំខាន់នៃការពង្រឹងកិច្ចសហប្រតិបត្តិការដើម្បីផលប្រយោជន៍ទៅវិញទៅមក និងទំនុកចិត្តខាងនយោបាយ។

ភាគីទាំងពីរបានឯកភាពអនុម័តសេចក្តីសន្និដ្ឋាននៃកិច្ចសន្ទនាយុទ្ធសាស្ត្រលើកទីមួយ ជាមួយនឹងទិសដៅសហប្រតិបត្តិការជារួម សំដៅពង្រឹងទំនាក់ទំនងរវាងបក្សទាំងពីរ ប្រទេសទាំងពីរ និងផែនការ គម្រោងសហប្រតិបត្តិការជាក់ស្តែងមួយចំនួន រួមមាន កិច្ចព្រមព្រៀងស្តីពីកិច្ចសហប្រតិបត្តិការបណ្តុះបណ្តាលកម្មាភិបាល ដំណាក់កាល ២០២៧-២០២៩ និងសេចក្តីថ្លែងការណ៍រួមស្តីពីការតភ្ជាប់យុទ្ធសាស្ត្របច្ចេកវិទ្យា។

ភាគីទាំងពីរក៏បានឯកភាពបន្តរៀបចំកិច្ចប្រជុំលើកទីពីរនៃកិច្ចសន្ទនាយុទ្ធសាស្ត្រនៅវៀតណាម ក្នុងឆ្នាំ ២០២៧។

កិច្ចប្រជុំលើកទីមួយបានរួមចំណែកបើកចេញនូវបណ្តាញផ្លាស់ប្តូរមតិយោបល់ជាប្រចាំ និងដោយផ្ទាល់ ដើម្បីឱ្យថ្នាក់ដឹកនាំភាគីទាំងពីរចែករំលែកទស្សនៈ ផ្លាស់ប្តូរបទពិសោធន៍អំពីបញ្ហានានាដែលមានលក្ខណៈយុទ្ធសាស្ត្រ និងទាន់ហេតុការណ៍។

ជាមួយនឹងលទ្ធផលសំខាន់ៗដែលសម្រេចបាន ដំណើរទស្សនកិច្ចបានរួមចំណែកយ៉ាងមានប្រសិទ្ធភាពក្នុងការពង្រឹងភាពផ្សារភ្ជាប់គ្នាយ៉ាងជិតស្និទ្ធរវាងបក្សទាំងពីរ ប្រទេសទាំងពីរ បង្កើតមូលដ្ឋានគ្រឹះនយោបាយដ៏រឹងមាំ ដើម្បីបន្តនាំទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ វៀតណាម - សិង្ហបុរី ឱ្យអភិវឌ្ឍកាន់តែជាក់ស្តែង និងគ្រប់ជ្រុងជ្រោយ។

អ្នកយកព័ត៌មាន៖ សូមរដ្ឋមន្ត្រីជម្រាបបន្ថែមអំពីអត្ថន័យនៃឯកសារនានាស្តីពីកិច្ចសហប្រតិបត្តិការបណ្តុះបណ្តាល និងការតភ្ជាប់បច្ចេកវិទ្យា ដែលភាគីទាំងពីរបានចុះហត្ថលេខា និងអនុម័ត ក្នុងឱកាសនៃកិច្ចសន្ទនាយុទ្ធសាស្ត្រលើកនេះ?

រដ្ឋមន្ត្រីក្រសួងការបរទេស Le Hoai Trung៖ ដូចដែលខ្ញុំទើបតែបានលើកឡើង ភាគីទាំងពីរបានអនុម័តផែនការកិច្ចសហប្រតិបត្តិការបណ្តុះបណ្តាលកម្មាភិបាល ដំណាក់កាល ២០២៧-២០២៩ និងសេចក្តីថ្លែងការណ៍រួមស្តីពីការតភ្ជាប់យុទ្ធសាស្ត្របច្ចេកវិទ្យា។ ទាំងនេះសុទ្ធសឹងជាវិស័យដែលដើរតួនាទីស្នូល និងគន្លឹះចំពោះការអភិវឌ្ឍរយៈពេលវែងនៅក្នុងដំណាក់កាលថ្មីរបស់ទាំងវៀតណាម និងសិង្ហបុរី។

ដោយចែករំលែកការយល់ដឹងទូទៅអំពីសារៈសំខាន់នៃប្រភពធនធានមនុស្សប្រកបដោយគុណភាពខ្ពស់ ឆ្លើយតបទៅនឹងតម្រូវការអភិវឌ្ឍយ៉ាងឆាប់រហ័ស និងប្រកបដោយចីរភាពរបស់ប្រទេសនីមួយៗ ផ្អែកលើមូលដ្ឋានទំនុកចិត្តខាងនយោបាយកាន់តែខ្ពស់ ថ្នាក់ដឹកនាំភាគីទាំងពីរបានឯកភាពរក្សា ពង្រីក និងលើកកម្ពស់កម្មវិធីសហប្រតិបត្តិការបណ្តុះបណ្តាលកម្មាភិបាល ដោយមានផែនការអនុវត្តជាក់ស្តែងបំផុតនៅក្នុងដំណាក់កាល ២០២៧-២០២៩ ដោយនាំវិស័យនេះក្លាយជាសសរស្តម្ភមួយក្នុងទំនាក់ទំនងទ្វេភាគី។

ជាពិសេស ភាគីទាំងពីរជាលើកដំបូងមានសេចក្តីថ្លែងការណ៍រួមស្តីពីយុទ្ធសាស្ត្រតភ្ជាប់បច្ចេកវិទ្យា ដោយសង្កត់ធ្ងន់លើកិច្ចសហប្រតិបត្តិការរួមគ្នាក្នុងការបង្កើត រួមគ្នាក្នុងការស្រាវជ្រាវ និងរួមគ្នាក្នុងការអភិវឌ្ឍ សំដៅកសាងប្រព័ន្ធអេកូឡូស៊ីនវានុវត្តន៍មួយ។

ប្រទេសទាំងពីរនឹងបង្កើនការតភ្ជាប់នៅក្នុងបណ្តាវិស័យបច្ចេកវិទ្យាយុទ្ធសាស្ត្រ ការបំប្លែងឌីជីថល សេដ្ឋកិច្ចឌីជីថល ការតភ្ជាប់បណ្តាមជ្ឈមណ្ឌលស្រាវជ្រាវ សហគ្រាស សាកលវិទ្យាល័យ និងអង្គការនវានុវត្តន៍ ព្រមទាំងលើកកម្ពស់លក្ខណៈបំពេញបន្ថែមឱ្យគ្នាទៅវិញទៅមករវាងខឿនសេដ្ឋកិច្ចទាំងពីរ។

នេះជាការអះអាងពីការប្តេជ្ញាចិត្តនាំកិច្ចសហប្រតិបត្តិការវិទ្យាសាស្ត្រ បច្ចេកវិទ្យា និងនវានុវត្តន៍ ឱ្យក្លាយជាសសរស្តម្ភដ៏សំខាន់មួយនៅក្នុងទំនាក់ទំនង វៀតណាម - សិង្ហបុរី។

ខ្លឹមសារទាំងនេះបង្ហាញពីការប្តេជ្ញាចិត្តរបស់ថ្នាក់ដឹកនាំប្រទេសទាំងពីរ ក្នុងការខិតខំប្រឹងប្រែងធ្វើឱ្យលេចចេញជារូបរាងនូវចក្ខុវិស័យរួម សំដៅនាំវៀតណាម និងសិង្ហបុរី ក្លាយជាដៃគូបច្ចេកវិទ្យាយុទ្ធសាស្ត្រឈានមុខគេនៅអាស៊ីអាគ្នេយ៍។

អ្នកយកព័ត៌មាន៖ សូមរដ្ឋមន្ត្រីជម្រាបជូននូវទិសដៅអនុវត្តលទ្ធផលនានាដែលសម្រេចបាននៅក្នុងដំណើរទស្សនកិច្ចផ្លូវការកន្លងទៅ?

រដ្ឋមន្ត្រីក្រសួងការបរទេស Le Hoai Trung៖ ផ្អែកលើមូលដ្ឋាននៃលទ្ធផលសំខាន់ៗដែលសម្រេចបាននៅក្នុងដំណើរទស្សនកិច្ច ភាគីទាំងពីរត្រូវសម្របសម្រួលគ្នាយ៉ាងជិតស្និទ្ធ ក្នុងនោះ ស្ថាប័នពាក់ព័ន្ធនានារបស់វៀតណាមត្រូវលើកកម្ពស់ភាពម្ចាស់ការ ផ្នត់គំនិត «សកម្មភាព» ដើម្បីផ្តោតលើការចាត់តាំងអនុវត្ត នាំបណ្តាផែនការចូលទៅក្នុងការអនុវត្តជាក់ស្តែងឱ្យបានឆាប់រហ័ស។

ជាបឋម ត្រូវកសាងផែនការអនុវត្តឱ្យបានឆាប់រហ័ស ប្រកបដោយប្រសិទ្ធភាពតាំងពីជំហានដំបូង នូវរាល់ខ្លឹមសារដែលបានឯកភាពគ្នាស្តីពីកិច្ចសហប្រតិបត្តិការបណ្តុះបណ្តាលកម្មាភិបាលនៅក្នុងដំណាក់កាល ២០២៧-២០២៩។

ទន្ទឹមនឹងនោះ ភាគីទាំងពីរត្រូវជំរុញការផ្លាស់ប្តូរ ចែករំលែក ដើម្បីឱ្យវៀតណាមអាចពិគ្រោះយោបល់ សិក្សារៀនសូត្របទពិសោធន៍របស់សិង្ហបុរីប្រកបដោយភាពជាក់ស្តែង និងមានប្រសិទ្ធភាពបំផុត ក្នុងការកសាងសាលាបណ្តុះបណ្តាលគោលនយោបាយសាធារណៈកម្រិតអន្តរជាតិមួយនៅវៀតណាម។ ទាំងនេះគឺជាការរួមចំណែកដ៏សំខាន់ និងជាក់ស្តែងសម្រាប់ការកសាងប្រភពធនធានមនុស្សប្រកបដោយគុណភាព បម្រើការអភិវឌ្ឍរបស់ប្រទេសជាតិក្នុងដំណាក់កាលថ្មី។

ទីពីរ ត្រូវជំរុញការអនុវត្តគំរូតភ្ជាប់រដ្ឋ - សហគ្រាស - វិទ្យាស្ថានស្រាវជ្រាវ នៅក្នុងបណ្តាវិស័យសហប្រតិបត្តិការសំខាន់ៗរវាងប្រទេសទាំងពីរ ដូចជា ទម្រង់សេដ្ឋកិច្ចទិន្នន័យ ឧបករណ៍ពាក់កណ្តាលចម្លង បច្ចេកវិទ្យាជីវសាស្ត្រ រដ្ឋាភិបាលឌីជីថល សុខាភិបាលឌីជីថល បញ្ញាសិប្បនិម្មិត VSIP។

តាមរយៈនោះ ឈានទៅរកការផ្លាស់ប្តូរកិច្ចសហប្រតិបត្តិការជាបណ្តើរៗទៅកាន់បណ្តាវិស័យដែលមានកម្រិតបច្ចេកវិទ្យា ចំណេះដឹង និងតម្លៃបន្ថែមខ្ពស់ជាង សមស្របតាមតម្រូវការអភិវឌ្ឍថ្មីរបស់វៀតណាម និងលើកកម្ពស់នូវចំណុចខ្លាំងនានារបស់សិង្ហបុរី។

បណ្តាកម្មវិធី គម្រោង ត្រូវតែកំណត់ឱ្យបានជាក់លាក់ មានផែនទីបង្ហាញផ្លូវ និងលទ្ធផលចេញច្បាស់លាស់ ដើម្បីទាញយកសក្តានុពលជាអតិបរមា និងលក្ខណៈបំពេញបន្ថែមឱ្យគ្នាទៅវិញទៅមករវាងខឿនសេដ្ឋកិច្ចទាំងពីរ។

គោលដៅខ្ពស់ជាងនេះ គឺប្រទេសទាំងពីររួមគ្នាឆ្ពោះទៅរកការបង្កើតប្រព័ន្ធអេកូឡូស៊ីនវានុវត្តន៍ដែលមានលក្ខណៈស៊ីសង្វាក់គ្នា ក្នុងនោះ តួអង្គនានានៃប្រទេសទាំងពីរអាចរួមគ្នាក្នុងការស្រាវជ្រាវ រួមគ្នាក្នុងការអភិវឌ្ឍ និងរួមគ្នាក្នុងការផលិត រួមគ្នាបង្កើតបច្ចេកវិទ្យា ផលិតផល សេវាកម្ម និងគំរូអាជីវកម្មថ្មីៗ។

វៀតណាម និងសិង្ហបុរី មិនត្រឹមតែទទួលយក ឬផ្លាស់ប្តូរបច្ចេកវិទ្យាប៉ុណ្ណោះទេ ប៉ុន្តែថែមទាំងអាចរួមគ្នាបង្កើតតម្លៃ បម្រើតម្រូវការអភិវឌ្ឍរបស់ប្រទេសទាំងពីរផងដែរ។

ទីបី ដើម្បីឱ្យលទ្ធផលទាំងឡាយនៃដំណើរទស្សនកិច្ចពិតជាជ្រួតជ្រាបចូលទៅក្នុងជីវភាពរស់នៅជាក់ស្តែង អ្វីដែលសំខាន់នោះគឺការធានានូវការចូលរួមយ៉ាងព្រមៗគ្នាពីសំណាក់បណ្តាក្រសួង ស្ថាប័ន មូលដ្ឋាន និងសហគមន៍ធុរកិច្ច។

ជាមួយនឹងផ្នត់គំនិត និងតម្រូវការអភិវឌ្ឍថ្មីរបស់ប្រទេសជាតិ បណ្តាក្រសួង ស្ថាប័ន និងមូលដ្ឋាន ត្រូវក្តាប់ឱ្យបានពេញលេញនូវការយល់ដឹងទូទៅរបស់ថ្នាក់ដឹកនាំជាន់ខ្ពស់នៃប្រទេសទាំងពីរ លើកកម្ពស់ជាអតិបរមានូវបណ្តាចំណុចស្នូលនៃកិច្ចសហប្រតិបត្តិការដែលបានឯកភាពគ្នា បំប្លែងកិច្ចព្រមព្រៀងឱ្យទៅជាកម្មវិធី ផែនការ និងគម្រោងជាក់ស្តែងនៃវិស័យ និងមូលដ្ឋានរបស់ខ្លួន ដោយមានគោលដៅ ផែនទីបង្ហាញផ្លូវ និងការទទួលខុសត្រូវក្នុងការអនុវត្តយ៉ាងច្បាស់លាស់ ដោយយកប្រសិទ្ធភាពជាក់ស្តែង និងផលប្រយោជន៍របស់ប្រជាពលរដ្ឋ សហគ្រាស ធ្វើជាបន្ទាត់រង្វាស់។

ផ្អែកលើមូលដ្ឋានទំនុកចិត្តខាងនយោបាយកម្រិតខ្ពស់ និងលក្ខណៈបំពេញបន្ថែមឱ្យគ្នាទៅវិញទៅមករវាងខឿនសេដ្ឋកិច្ចទាំងពីរ យើងខ្ញុំរំពឹងទុកថា បណ្តាស្ថាប័ន មូលដ្ឋាន និងសហគ្រាសនៃប្រទេសទាំងពីរ នឹងកសាងបាននូវគំរូសហប្រតិបត្តិការ ផលិតផល និងតម្លៃថ្មីៗ នាំមកនូវផលប្រយោជន៍ជាក់ស្តែងសម្រាប់ការអភិវឌ្ឍរបស់ប្រទេសទាំងពីរ។

អ្នកយកព័ត៌មាន៖ សូមថ្លែងអំណរគុណយ៉ាងជ្រាលជ្រៅចំពោះលោករដ្ឋមន្ត្រី!

សំណើចំនួនបួន ដើម្បីជំរុញទំនាក់ទំនងវៀតណាម-សិង្ហបុរី ក្នុងវិស័យសំខាន់ៗ យុគសម័យ - នៅថ្ងៃទី ២ ខែមេសា នៅទីក្រុងហាណូយ លោក Phan Anh Son ប្រធានសហភាពអង្គការមិត្តភាពវៀតណាម បានទទួលជួបជាមួយលោក Rajpal Singh ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសិង្ហបុរីប្រចាំនៅវៀតណាម។ ក្នុងជំនួបនេះ លោក Phan Anh Son បានបង្ហាញសំណើចំនួនបួនដែលមានគោលបំណងពង្រឹងទំនាក់ទំនងទ្វេភាគីតាមរយៈបណ្តាញប្រជាជនទៅប្រជាជន ដោយផ្តោតលើវិទ្យាសាស្ត្រ និងបច្ចេកវិទ្យា ហិរញ្ញវត្ថុ និងអភិបាលកិច្ចទំនើប។

អគ្គលេខាបក្ស ប្រធានរដ្ឋ លោកតូ ឡឹមនិងភរិយា នឹងទៅបំពេញទស្សនកិច្ចផ្លូវរដ្ឋនៅសិង្ហបុរី អញ្ជើញចូលរួមនិងថ្លែងសុន្ទរកថានៅក្នុងកិច្ចសន្ទនាសាំងហ្គ្រីឡា យុគសម័យ - ដំណើរទស្សនកិច្ចនេះធ្វើឡើងចាប់ពីថ្ងៃទី ២៩ ដល់ថ្ងៃទី ៣១ ខែឧសភា ឆ្នាំ ២០២៦។

វ៉ាន់ណាំ