លើកកម្ពស់ប្រភពធនធានជនជាតិវៀតណាមនៅសិង្ហបុរីក្នុងការអភិវឌ្ឍវិទ្យាសាស្ត្រ បច្ចេកវិទ្យា និងប្រទេសជាតិ

ក្នុងក្របខ័ណ្ឌនៃដំណើរទស្សនកិច្ចផ្លូវការនៅសិង្ហបុរី និងការធ្វើជាសហប្រធាននៃកិច្ចសន្ទនាយុទ្ធសាស្ត្រ វៀតណាម - សិង្ហបុរី លើកទីមួយ រវាងបក្សកុម្មុយនីស្តវៀតណាម និងគណបក្សសកម្មភាពប្រជាជនសិង្ហបុរី នារសៀលថ្ងៃទី ២៤ សីហា សមមិត្តសមាជិកប្រចាំការនៃគណៈលេខា Tran Cam Tu និងគណៈប្រតិភូជាន់ខ្ពស់វៀតណាម បានជួបសំណេះសំណាលជាមួយកម្មាភិបាល បុគ្គលិកស្ថានទូត ព្រមទាំងតំណាងសហគមន៍ជនជាតិវៀតណាមនៅសិង្ហបុរី។

បងប្អូនអាណិកជន និងកម្មាភិបាលស្ថានទូតយ៉ាងច្រើនកុះករបានចូលរួមពិធីជួបសំណេះសំណាល។

បង្កើតមូលដ្ឋានគ្រឹះនយោបាយសម្រាប់ដំណាក់កាលអភិវឌ្ឍន៍ថ្មី

ថ្លែងមតិនៅក្នុងជំនួបសំណេះសំណាល សមមិត្តសមាជិកប្រចាំការនៃគណៈលេខា Tran Cam Tu បានផ្ញើជូនកម្មាភិបាល បុគ្គលិកស្ថានទូត និងបងប្អូនសហគមន៍ នូវការសាកសួរសុខទុក្ខយ៉ាងកក់ក្តៅ និងមនោសញ្ចេតនាយ៉ាងស្និទ្ធស្នាលពីមាតុភូមិ។

សមមិត្តបានសង្កត់ធ្ងន់ថា ដំណើរទស្សនកិច្ចផ្លូវការនៅសិង្ហបុរី និងការធ្វើជាសហប្រធាននៃកិច្ចសន្ទនាយុទ្ធសាស្ត្រ វៀតណាម - សិង្ហបុរី លើកទីមួយ បានបង្ហាញពីគោលនយោបាយឥតងាករេរបស់វៀតណាម គឺផ្តល់អាទិភាពខ្ពស់ដល់បណ្តាប្រទេសជិតខាងក្នុងតំបន់ ក្នុងនោះមានសិង្ហបុរី។

ដំណើរទស្សនកិច្ចបានរួមចំណែកធ្វើឱ្យកាន់តែស៊ីជម្រៅនូវទំនាក់ទំនងរវាងបក្សកុម្មុយនីស្តវៀតណាម និងគណបក្សសកម្មភាពប្រជាជនកាន់អំណាច បង្កើតមូលដ្ឋានគ្រឹះនយោបាយដ៏រឹងមាំ ដើម្បីជំរុញកិច្ចសហប្រតិបត្តិការគ្រប់ជ្រុងជ្រោយតាមបណ្តាញបក្ស រដ្ឋ និងប្រជាជន នាំទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ វៀតណាម - សិង្ហបុរី ឱ្យចូលកាន់តែស៊ីជម្រៅ និងលើកកម្ពស់ប្រសិទ្ធភាពសហប្រតិបត្តិការរវាងបក្សកាន់អំណាចទាំងពីរ។

ដោយចែករំលែកនូវចំណុចសំខាន់ៗមួយចំនួនអំពីសភាពការណ៍របស់ប្រទេសជាតិ សមមិត្តសមាជិកប្រចាំការនៃគណៈលេខាបានឱ្យដឹងថា ការដំណើរការគំរូរដ្ឋបាលមូលដ្ឋាន ២ ថ្នាក់ សម្រេចបានលទ្ធផលសំខាន់ៗជាច្រើន។ ក្បាលម៉ាស៊ីននៃប្រព័ន្ធនយោបាយចាប់ពីថ្នាក់មជ្ឈិមដល់ថ្នាក់មូលដ្ឋាន ត្រូវបានរៀបចំ កែលម្អឡើងវិញតាមទិសដៅបង្រួមឱ្យកាន់តែរលូន និងព្រមៗគ្នា ដោយកាត់បន្ថយស្ថាប័នស្នូល និងថ្នាក់កណ្តាលជាច្រើន។

ទន្ទឹមនឹងនោះ ការសុក្រឹតស្ថាប័នច្បាប់ ការបែងចែកថ្នាក់ ការផ្ទេរសិទ្ធិអំណាច ការកំណត់ដែនសមត្ថកិច្ច ការកែទម្រង់បែបបទរដ្ឋបាល និងបរិយាកាសធុរកិច្ច ការបំប្លែងឌីជីថល ការកសាងមូលដ្ឋានទិន្នន័យ ត្រូវបានជំរុញយ៉ាងខ្លាំងក្លា។

គំរូរដ្ឋបាលមូលដ្ឋាន ២ ថ្នាក់ បានដំណើរការប្រកបដោយស្ថិរភាពជាជំហានដំបូង រាល់សកម្មភាពគ្រប់គ្រងរដ្ឋ សេវាសាធារណៈ និងការដោះស្រាយបែបបទរដ្ឋបាលជូនប្រជាពលរដ្ឋជាមូលដ្ឋានត្រូវបានរក្សាជាបន្តបន្ទាប់។ ការងារដឹកនាំ ចង្អុលបង្ហាញ និងចាត់តាំងអនុវត្តមានការផ្លាស់ប្តូរថ្មីជាច្រើន មានការបែងចែកភារកិច្ច និងទំនួលខុសត្រូវច្បាស់លាស់ មានបទបញ្ជា នីតិវិធីជាក់លាក់ ដោយយកចិត្តទុកដាក់លើវឌ្ឍនភាព និងលទ្ធផលការងារ។

យោងតាមសមមិត្តសមាជិកប្រចាំការនៃគណៈលេខា នេះគ្រាន់តែជាជំហានដំបូងប៉ុណ្ណោះ ហើយនៅតែមានភារកិច្ចជាច្រើនដែលត្រូវបន្តអនុវត្តប្រកបដោយការប្តេជ្ញាចិត្តកាន់តែខ្ពស់ វិធីសាស្ត្រធ្វើការកាន់តែមានលក្ខណៈវិទ្យាសាស្ត្រ និងស្មារតីផ្លាស់ប្តូរថ្មីកាន់តែខ្លាំងក្លា។

សមមិត្តសមាជិកប្រចាំការនៃគណៈលេខា Tran Cam Tu បានសម្តែងនូវក្តីរីករាយដែលបានឃើញថាសហគមន៍ជនជាតិវៀតណាមនៅសិង្ហបុរីមិនឈប់ឈររីកចម្រើនទាំងបរិមាណនិងគុណភាព តែងតែមានទឹកចិត្តមុតមាំ និងត្រៀមខ្លួនជាស្រេចដើម្បីរួមចំណែកដល់ដំណើរការអភិវឌ្ឍប្រទេសជាតិ។

បក្ស និងរដ្ឋបានកំណត់ភារកិច្ចស្នូលបន្ទាប់ គឺការលើកកម្ពស់គុណភាពដំណើរការ សមត្ថភាពបម្រើ និងសមត្ថភាពកសាងអភិវឌ្ឍន៍នៃក្បាលម៉ាស៊ីនថ្មី។

ក្នុងនោះ ត្រូវបន្តសុក្រឹតស្ថាប័នស្តីពីច្បាប់ និងការរៀបចំក្បាលម៉ាស៊ីនឱ្យបានព្រមៗគ្នា ផ្លាស់ប្តូរថ្មីវិធីសាស្ត្រដឹកនាំរបស់បក្ស ជំរុញការបែងចែកថ្នាក់ ការផ្ទេរសិទ្ធិអំណាច ផ្សារភ្ជាប់ជាមួយនឹងការធានាប្រភពធនធាន និងការត្រួតពិនិត្យអំណាច លើកកម្ពស់គុណភាពហេដ្ឋារចនាសម្ព័ន្ធទូរគមនាគមន៍ ហេដ្ឋារចនាសម្ព័ន្ធឌីជីថល និងជំរុញការបំប្លែងឌីជីថលនៅក្នុងប្រព័ន្ធនយោបាយទាំងមូល។

គំរូចាត់តាំង យន្តការដំណើរការនៃរដ្ឋបាលមូលដ្ឋាន ២ ថ្នាក់ ក៏ត្រូវបន្តសុក្រឹតបន្ថែមទៀត ដែលក្នុងនោះ ថ្នាក់ខេត្តផ្តោតលើតួនាទីយុទ្ធសាស្ត្រ ផែនការមេ ការសម្របសម្រួល ការបែងចែកប្រភពធនធាន ការត្រួតពិនិត្យ ការឃ្លាំមើល និងការតភ្ជាប់តំបន់ រីឯថ្នាក់ឃុំត្រូវបានរៀបចំឡើងជាជួរមុខនៃអភិបាលកិច្ចសាធារណៈ។

ដោយលើកឡើងពីតម្រូវការកសាងជួរកម្មាភិបាលសម្រាប់គំរូថ្មី សមមិត្ត Tran Cam Tu បានឱ្យដឹងថា នាពេលខាងមុខ នឹងត្រូវប្រញាប់ប្រញាល់សុក្រឹតទីតាំងការងារ រៀបចំមនុស្សឱ្យចំការងារ កសាងគោលនយោបាយប្រាក់បៀវត្សរ៍ យន្តការសមស្របដើម្បីលើកទឹកចិត្តកម្មាភិបាលឱ្យមានភាពកក់ក្តៅក្នុងការបំពេញការងារ ជាពិសេសនៅតាមតំបន់លំបាក តំបន់ព្រៃភ្នំ ព្រមទាំងកសាងកម្មវិធីបណ្តុះបណ្តាល បំប៉នសមត្ថភាពកម្មាភិបាលថ្នាក់ឃុំ។

នេះក៏ជាខ្លឹមសារមួយក្នុងចំណោមខ្លឹមសារទាំងឡាយដែលត្រូវបានពិភាក្សាជាមួយសិង្ហបុរីក្នុងដំណើរទស្សនកិច្ច តាមរយៈនោះបង្កើតបន្ថែមបណ្តាញចែករំលែកបទពិសោធន៍ ការបណ្តុះបណ្តាល បំប៉នសមត្ថភាពកម្មាភិបាល និងបញ្ញវន្តសម្រាប់ប្រទេសជាតិ។

ផ្តោតលើការធ្វើជាម្ចាស់បច្ចេកវិទ្យាយុទ្ធសាស្ត្រ បង្កើតផលិតផលជាក់ស្តែង

ដោយចែករំលែកនូវលទ្ធផលមួយចំនួននៃការអនុវត្តសេចក្តីសម្រេចចិត្តលេខ ៥៧ ស្តីពីការបង្កើតរបកគំហើញក្នុងការអភិវឌ្ឍវិទ្យាសាស្ត្រ បច្ចេកវិទ្យា នវានុវត្តន៍ និងការបំប្លែងឌីជីថលជាតិ សមមិត្តសមាជិកប្រចាំការនៃគណៈលេខាបានឱ្យដឹងថា វៀតណាមបានកំណត់បច្ចេកវិទ្យាយុទ្ធសាស្ត្រចំនួន ១០ ផ្សារភ្ជាប់ជាមួយផលិតផលបច្ចេកវិទ្យាយុទ្ធសាស្ត្រចំនួន ៣០ និងបញ្ហាធំៗរបស់ជាតិចំនួន ២០។

សមមិត្តសមាជិកប្រចាំការនៃគណៈលេខា Tran Cam Tu ថ្លែងមតិនៅក្នុងជំនួបសំណេះសំណាល។

សហគ្រាសវៀតណាមមួយចំនួនកំពុងឈានទៅរកការធ្វើជាម្ចាស់បច្ចេកវិទ្យាជាបណ្តើរៗ អភិវឌ្ឍផលិតផលបម្រើទីផ្សារក្នុងស្រុក និងការនាំចេញ។ ទោះជាយ៉ាងណាក៏ដោយ នៅតែមានកម្រិត និងចំណុចកកស្ទះមួយចំនួនអំពីស្ថាប័ន ហេដ្ឋារចនាសម្ព័ន្ធ ធនធានមនុស្ស សន្តិសុខតាមប្រព័ន្ធអ៊ីនធឺណិត... ដែលត្រូវដោះស្រាយឱ្យបានដាច់ស្រេច។

នាពេលខាងមុខ បក្ស និងរដ្ឋបានកំណត់ការប្តូរទិសដៅយ៉ាងខ្លាំងក្លាឆ្ពោះទៅរកការបង្កើតផលិតផល លទ្ធផល និងតម្លៃជាក់ស្តែង រួមចំណែកដល់គោលដៅកំណើនពីរខ្ទង់ ផ្សារភ្ជាប់វិទ្យាសាស្ត្រ បច្ចេកវិទ្យា ជាមួយនឹងការបង្កើតចំណេះដឹងថ្មី ការធ្វើជាម្ចាស់បច្ចេកវិទ្យា និងការប្រែក្លាយឱ្យទៅជាតម្លៃថ្មីសម្រាប់សង្គម ផ្តោតប្រភពធនធានដើម្បីធ្វើជាម្ចាស់ និងអភិវឌ្ឍបច្ចេកវិទ្យាយុទ្ធសាស្ត្រឱ្យក្លាយជាផលិតផលជាក់ស្តែង។

សមមិត្តសមាជិកប្រចាំការនៃគណៈលេខាបានឱ្យដឹងថា នេះជាវិស័យដែលសិង្ហបុរីមានចំណុចខ្លាំង ហើយក៏ជាខ្លឹមសារមួយក្នុងចំណោមខ្លឹមសារទាំងឡាយដែលត្រូវបានផ្តោតលើការផ្លាស់ប្តូរមតិយោបល់នៅក្នុងដំណើរទស្សនកិច្ចការងារលើកនេះ។

ដោយផ្តល់ព័ត៌មានអំពីសន្និបាតលើកទីបីនៃគណៈកម្មាធិការមជ្ឈិមបក្ស ដែលបានរៀបចំឡើងកាលពីខែកក្កដាកន្លងទៅ សមមិត្ត Tran Cam Tu បានឱ្យដឹងថា សន្និបាតបានពិនិត្យមើលបញ្ហាសំខាន់ៗនានាស្តីពីការកសាងបក្ស ប្រព័ន្ធនយោបាយ និងការអភិវឌ្ឍប្រទេសជាតិក្នុងដំណាក់កាលថ្មី ក្នុងនោះមានជំហានផ្លាស់ប្តូរយុទ្ធសាស្ត្រចំនួន ៤។

បងប្អូនអាណិកជន និងកម្មាភិបាលស្ថានទូតយ៉ាងច្រើនកុះករបានចូលរួមពិធីជួបសំណេះសំណាល។

ស្តីពីការកសាងបក្ស និងប្រព័ន្ធនយោបាយ តម្រូវការដែលបានដាក់ចេញគឺការលើកកម្ពស់សមត្ថភាពដឹកនាំ ការកាន់អំណាចរបស់បក្ស និងសមត្ថភាពអនុវត្តរបស់ក្បាលម៉ាស៊ីនរដ្ឋ។ ស្តីពីអភិបាលកិច្ចលំហអភិវឌ្ឍន៍ ត្រូវលើកកម្ពស់ប្រសិទ្ធភាពប្រភពធនធានជាតិ។ ស្តីពីសេដ្ឋកិច្ច - សង្គម កំណត់គំរូអភិវឌ្ឍន៍ផ្អែកលើផលិតភាព ចំណេះដឹង បច្ចេកវិទ្យា និងមនុស្ស។ ស្តីពីការការពារប្រទេសជាតិ និងការអភិវឌ្ឍប្រកបដោយចីរភាព លើកកម្ពស់ភាពធន់ សមត្ថភាពសម្របខ្លួន និងការពារប្រទេសជាតិឱ្យបានរឹងមាំ។

«ទាំងនេះជាខ្លឹមសារស្នូល សំដៅបង្កើតមូលដ្ឋាននយោបាយដ៏សំខាន់ ដើម្បីនាំប្រទេសជាតិបោះជំហានយ៉ាងរឹងមាំចូលទៅក្នុងយុគសម័យអភិវឌ្ឍន៍ថ្មី កាន់តែឆាប់រហ័ស និងកាន់តែប្រកបដោយចីរភាព» សមមិត្តសមាជិកប្រចាំការនៃគណៈលេខាបានសង្កត់ធ្ងន់។

លើកកម្ពស់ប្រភពធនធានអ្នកជំនាញ បញ្ញវន្តអាណិកជន

សមមិត្តសមាជិកប្រចាំការនៃគណៈលេខា បានសម្តែងនូវក្តីរីករាយនៅពេលដែលសហគមន៍ជនជាតិវៀតណាមនៅសិង្ហបុរីកាន់តែរីកចម្រើនទាំងបរិមាណនិងគុណភាព តែងតែមានទឹកចិត្តមុតមាំ ត្រៀមខ្លួនជាស្រេចដើម្បីរួមចំណែកដល់ការអភិវឌ្ឍប្រទេសជាតិ។

ដោយអះអាងថា បក្ស និងរដ្ឋ តែងតែផ្តល់ការយកចិត្តទុកដាក់យ៉ាងជ្រាលជ្រៅចំពោះសហគមន៍ជនជាតិវៀតណាមនៅឯបរទេស ដោយចាត់ទុកនេះជាផ្នែកមួយមិនអាចកាត់ផ្តាច់បាន និងជាប្រភពធនធានដ៏សំខាន់របស់ប្រជាជាតិ សមមិត្តមានបំណងឱ្យបងប្អូនបន្តរក្សា និងលើកកម្ពស់ប្រពៃណីដ៏ល្អផូរផង់ បង្កើនសាមគ្គីភាព ការជួយយកអាសាគ្នាទៅវិញទៅមក យកចិត្តទុកដាក់អប់រំយុវជនជំនាន់ក្រោយឱ្យចេះរក្សាភាសាវៀតណាម ងាកមករកមាតុភូមិ កសាងសហគមន៍ឱ្យកាន់តែរឹងមាំ មានកិត្យានុភាពនៅក្នុងសង្គមនៃប្រទេសសាមី និងរួមចំណែកពូនជ្រំទំនាក់ទំនងរវាងប្រទេសទាំងពីរ។

បងប្អូនអាណិកជន និងកម្មាភិបាលស្ថានទូតយ៉ាងច្រើនកុះករបានចូលរួមពិធីជួបសំណេះសំណាល។

សមមិត្តក៏មានបំណងឱ្យបណ្តាអ្នកស្រាវជ្រាវ អ្នកវិទ្យាសាស្ត្រ និងធុរជនវៀតណាមនៅសិង្ហបុរី បង្កើនការតភ្ជាប់ជាមួយបណ្តាមូលដ្ឋាន សហគ្រាស សាកលវិទ្យាល័យ និងវិទ្យាស្ថានស្រាវជ្រាវនៅក្នុងប្រទេស ចែករំលែកបទពិសោធន៍គ្រប់គ្រង ផ្ទេរចំណេះដឹង បច្ចេកវិទ្យា ពង្រីកឱកាសសហប្រតិបត្តិការក្នុងការវិនិយោគ នវានុវត្តន៍ និងការអភិវឌ្ឍប្រភពធនធានមនុស្សប្រកបដោយគុណភាពខ្ពស់។

សមមិត្តសមាជិកប្រចាំការនៃគណៈលេខា បានស្វាគមន៍ចំពោះតួនាទីស្នូលរបស់គណៈទំនាក់ទំនងសហគមន៍ជនជាតិវៀតណាមនៅសិង្ហបុរី ក្នុងការផ្សារភ្ជាប់សហគមន៍ ការរក្សា និងលើកកម្ពស់អត្តសញ្ញាណវប្បធម៌ប្រពៃណីរបស់មាតុភូមិនៅឯប្រទេសសាមី ព្រមទាំងមានការតម្រង់ទិសទាន់ពេលវេលាដើម្បីទាញយក និងលើកកម្ពស់ចំណុចខ្លាំងនៃកម្លាំងអ្នកជំនាញ និងបញ្ញវន្តអាណិកជន ដែលត្រៀមខ្លួនជាស្រេចនាំយកចំណេះដឹង និងបច្ចេកវិទ្យាត្រឡប់មកកសាង និងអភិវឌ្ឍប្រទេសជាតិ។

សមមិត្តបានស្នើឱ្យស្ថានទូតវៀតណាមប្រចាំនៅសិង្ហបុរី បន្តលើកកម្ពស់ស្មារតីសាមគ្គីភាព ការទទួលខុសត្រូវ ភាពច្នៃប្រឌិត និងនវានុវត្តន៍ បំពេញឱ្យបានល្អនូវរាល់ភារកិច្ចនយោបាយដែលត្រូវបានប្រគល់ជូន អនុវត្តប្រកបដោយប្រសិទ្ធភាពនូវមាគ៌ាកិច្ចការបរទេសរបស់បក្ស រួមចំណែកបន្តពង្រឹង និងជំរុញទំនាក់ទំនងរវាងបក្សទាំងពីរ ប្រទេសទាំងពីរ ព្រមទាំងធ្វើឱ្យកាន់តែល្អប្រសើរឡើងថែមទៀតនូវការងារថែទាំសហគមន៍ និងបង្កើនភាពផ្សារភ្ជាប់រវាងអាណិកជនជាមួយក្នុងប្រទេស។

ឯកអគ្គរដ្ឋទូត Tran Phuoc Anh ថ្លែងមតិនៅក្នុងជំនួបសំណេះសំណាល។

តាងនាមឱ្យស្ថានទូត និងសហគមន៍ជនជាតិវៀតណាមនៅសិង្ហបុរី ឯកអគ្គរដ្ឋទូត Tran Phuoc Anh បានសម្តែងនូវក្តីរីករាយ និងកិត្តិយសដែលបានទទួលស្វាគមន៍សមមិត្តសមាជិកប្រចាំការនៃគណៈលេខា Tran Cam Tu ព្រមទាំងគណៈប្រតិភូជាន់ខ្ពស់បក្សកុម្មុយនីស្តវៀតណាម។

ឯកអគ្គរដ្ឋទូតបានសង្កត់ធ្ងន់ថា ទំនាក់ទំនង វៀតណាម - សិង្ហបុរី នាពេលកន្លងមក កាន់តែលើកកម្ពស់ប្រសិទ្ធភាពលើគ្រប់វិស័យ ដំណើរទស្សនកិច្ចលើកនេះមានអត្ថន័យសំខាន់ រួមចំណែកជំរុញ និងធ្វើឱ្យកាន់តែស៊ីជម្រៅនូវទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។

ឯកអគ្គរដ្ឋទូតបានអះអាងថា កម្មាភិបាល បុគ្គលិកស្ថានទូតវៀតណាមប្រចាំនៅសិង្ហបុរី បាន កំពុង និងបន្តអនុវត្តឱ្យបានល្អនូវភារកិច្ចសំខាន់ៗទាំង ៣ រួមមាន ការងារនយោបាយ ការងារសហគមន៍ ការងារបក្ស និងសាមគ្គីភាពផ្ទៃក្នុង រួមចំណែកយ៉ាងសកម្មដល់បុព្វហេតុកសាង និងការពារប្រទេសជាតិ។

រាយការណ៍អំពីសភាពការណ៍សហគមន៍ ឯកអគ្គរដ្ឋទូត Tran Phuoc Anh បានឱ្យដឹងថា បងប្អូនមានការយកចិត្តទុកដាក់ជាពិសេស គាំទ្រ និងងាកមករកមាតុភូមិ ប្រទេសជាតិ សម្របសម្រួលជាមួយស្ថានទូតរៀបចំសកម្មភាពផ្សារភ្ជាប់ជាច្រើន ចាប់ពីការទូតប្រជាជន រហូតដល់ការតភ្ជាប់ជាមួយក្នុងប្រទេស ក្នុងបណ្តាវិស័យវិទ្យាសាស្ត្រ - បច្ចេកវិទ្យា នវានុវត្តន៍ អប់រំ - បណ្តុះបណ្តាល ការបំប្លែងឌីជីថល និងការបង្កើតអាជីវកម្មថ្មី រួមចំណែកជំរុញទំនាក់ទំនង វៀតណាម - សិង្ហបុរី ឱ្យកាន់តែស្អិតរមួត។

បងប្អូនអាណិកជន និងកម្មាភិបាលស្ថានទូតយ៉ាងច្រើនកុះករបានចូលរួមពិធីជួបសំណេះសំណាល។

ថ្លែងមតិនៅក្នុងជំនួបសំណេះសំណាល សាស្ត្រាចារ្យ បណ្ឌិត Vu Minh Khuong សាស្ត្រាចារ្យនៃសាលាគោលនយោបាយសាធារណៈ Lee Kuan Yew បានចាត់ទុកថា ដំណើរទស្សនកិច្ចរបស់សមមិត្តសមាជិកប្រចាំការនៃគណៈលេខា Tran Cam Tu និងគណៈប្រតិភូជាន់ខ្ពស់បក្សកុម្មុយនីស្តវៀតណាម មានអត្ថន័យជាប្រវត្តិសាស្ត្រ បើកចេញនូវកាលានុវត្តភាពដ៏ធំធេង អាចក្លាយជាគំរូមួយក្នុងទំនាក់ទំនងរវាងប្រទេសទាំងពីរ ក៏ដូចជាតំបន់ សំដៅឆ្ពោះទៅរកការកសាង សន្តិភាព វិបុលភាព និងកិច្ចសហប្រតិបត្តិការ។

លោកស្រី Ta Thuy Lien ប្រធានគណៈទំនាក់ទំនងជនជាតិវៀតណាមនៅសិង្ហបុរី បានចែករំលែកអំពីគំរូបំប្លែងឌីជីថល និងបានអះអាងថា ដំណើរទស្សនកិច្ចរបស់គណៈប្រតិភូគឺជាប្រភពលើកទឹកចិត្តដ៏ធំធេងចំពោះសហគមន៍ ជំរុញបំណងប្រាថ្នា និងទឹកចិត្តមុតមាំក្នុងការរួមចំណែកកម្លាំងបញ្ញាដល់មាតុភូមិ ប្រទេសជាតិ។

លោកស្រីក៏បានប្តេជ្ញាថាសហគមន៍ជនជាតិវៀតណាមនៅសិង្ហបុរីនឹងក្លាយជាកែវភ្នែកយុទ្ធសាស្ត្រមួយ រួមដំណើរជាមួយក្នុងប្រទេស ដើម្បីធ្វើឱ្យបំណងប្រាថ្នាវៀតណាមខ្លាំងក្លា និងរុងរឿង លេចចេញជារូបរាងឡើង៕

ប្រជាជនវៀតណាមនៅប្រទេសជប៉ុនជួយសង្គ្រោះមនុស្ស និងជួយឧបត្ថម្ភស្បៀងអាហារបន្ទាប់ពីរញ្ជួយដីនៅខេត្ត Kumamoto យុគសម័យ - ពលករវៀតណាមចំនួន ៥ នាក់ បានរួមជាមួយប្រជាជនក្នុងស្រុក ជួយសង្គ្រោះលោកយាយម្នាក់ អាយុជិត ៩០ ឆ្នាំ ចេញពីផ្ទះដែលបានបាក់រលំ នៅទីក្រុង Yatsushiro (ខេត្ត Kumamoto ប្រទេសជប៉ុន)។ បណ្តាស្ថាប័នតំណាង សមាគម និងអ្នកស្ម័គ្រចិត្តវៀតណាម ក៏បានប្រញាប់ប្រញាល់ដឹកជញ្ជូនស្បៀងអាហារ និងទឹកបរិភោគ ទៅកាន់បណ្តាតំបន់ដែលរងផលប៉ះពាល់ ដោយសារការរញ្ជួយដី នៅខេត្ត Kumamoto។

ពង្រីកប្រភពធនធានប្រជាជនវៀតណាមនៅបរទេស៖ ចាប់ពីតួនាទីត្រលាតផ្លូវនៃកិច្ចការបរទេស រហូតដល់កម្លាំងរុញច្រានអភិវឌ្ឍន៍ជាតិ និងមូលដ្ឋាននីមួយៗ យុគសម័យ - នៅមុនពេលប្រព្រឹត្តទៅ សន្និសីទការទូតលើកទី ៣៣ និងសន្និសីទកិច្ចការបរទេសទូទាំងប្រទេសលើកទី ២២ គេហទំព័រព័ត៌មានអេឡិចត្រូនិកនៃក្រសួងការបរទេស សូមណែនាំអត្ថបទ «ពង្រីកប្រភពធនធានប្រជាជនវៀតណាមនៅបរទេស៖ ចាប់ពីតួនាទីត្រលាតផ្លូវនៃកិច្ចការបរទេស រហូតដល់កម្លាំងរុញច្រានអភិវឌ្ឍន៍ជាតិ និងមូលដ្ឋាននីមួយៗ» របស់អនុរដ្ឋមន្ត្រីក្រសួងការបរទេស Le Thi Thu Hang។

ឌឹកអាញ់