ពីសន្តិភាពដល់អភិបាលកិច្ចបច្ចេកវិទ្យា៖ សាររបស់វៀតណាមនៅអង្គការសហប្រជាជាតិ

បណ្ឌិត Dang Vu Canh Linh។

សន្តិភាពត្រូវតែកសាងឡើងផ្អែកលើច្បាប់អន្តរជាតិ

បណ្ឌិត Dang Vu Canh Linh បានឱ្យដឹងថា លោកពេញចិត្តជាខ្លាំងចំពោះបញ្ហាចំនួនបីដែលត្រូវបានអគ្គលេខាបក្ស និងជាប្រធានរដ្ឋ To Lam លើកឡើងនៅក្នុងសុន្ទរកថានៅសម័យពិភាក្សាជាន់ខ្ពស់នៃមហាសន្និបាតអង្គការសហប្រជាជាតិ នីតិកាលទី ៨១៖ ការការពារសន្តិភាពផ្អែកលើមូលដ្ឋាននៃការគោរពឯករាជ្យ អធិបតេយ្យភាព; ការជំរុញការអភិវឌ្ឍដែលយកមនុស្សជាមជ្ឈមណ្ឌល; និងការពង្រឹងភាពម្ចាស់ការលើខ្លួនឯងផ្សារភ្ជាប់ជាមួយនឹងការម្ចាស់ការលើកិច្ចសហប្រតិបត្តិការអន្តរជាតិ។

តាមលោក ខ្លឹមសារទាំងបីនេះមានទំនាក់ទំនងយ៉ាងជិតស្និទ្ធជាមួយគ្នា ដោយបង្ហាញពីការផ្សារភ្ជាប់គ្នារវាងលក្ខខណ្ឌអភិវឌ្ឍន៍ គោលដៅអភិវឌ្ឍន៍ និងសមត្ថភាពក្នុងការអនុវត្តគោលដៅនោះ។

សារនេះក៏បានបង្ហាញឱ្យឃើញនូវភាពស៊ីសង្វាក់គ្នារវាងការប្រកាន់ខ្ជាប់គោលការណ៍យ៉ាងរឹងមាំ ជាមួយនឹងស្មារតីសន្ទនា និងកិច្ចសហប្រតិបត្តិការក្នុងការដោះស្រាយបញ្ហាអន្តរជាតិនានា។

តាមបណ្ឌិត Dang Vu Canh Linh សន្តិភាពប្រកបដោយចីរភាពអាចរក្សាទៅបាន លុះត្រាតែឯករាជ្យ អធិបតេយ្យភាព និងផលប្រយោជន៍ស្របច្បាប់របស់បណ្តាប្រទេសត្រូវបានគោរព។ កិច្ចសន្ទនាត្រូវតែបន្ត បើទោះបីជានៅមានការខ្វែងគំនិតគ្នាក៏ដោយ ខណៈពេលដែលកិច្ចសហប្រតិបត្តិការត្រូវតែផ្អែកលើសមភាព និងការគោរពតាមច្បាប់អន្តរជាតិ។

«ខ្លឹមសារស្តីពីសមុទ្រចិនខាងត្បូង ដែលត្រូវបានអគ្គលេខាបក្ស និងជាប្រធានរដ្ឋលើកឡើង បានបង្ហាញយ៉ាងច្បាស់នូវស្មារតីនោះ។ វៀតណាមប្រកាន់ខ្ជាប់នូវការដោះស្រាយវិវាទដោយសន្តិវិធី ស្របតាមច្បាប់អន្តរជាតិ ជាពិសេសគឺអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២ (UNCLOS 1982) ព្រមទាំងការពារយ៉ាងម៉ឺងម៉ាត់នូវអធិបតេយ្យភាព សិទ្ធិអធិបតេយ្យ និងយុត្តាធិការរបស់ខ្លួន។ សមុទ្រ និងមហាសមុទ្រ ត្រូវតែជាលំហនៃសន្តិភាព កិច្ចសហប្រតិបត្តិការ ការតភ្ជាប់ និងការអភិវឌ្ឍប្រកបដោយចីរភាព» - បណ្ឌិត Dang Vu Canh Linh បានសង្កត់ធ្ងន់យ៉ាងដូច្នេះ។

តាមលោក វិធីសាស្ត្រនៃការចូលជិតនេះបានបង្ហាញពីការឯកភាពគ្នារវាងការការពារផលប្រយោជន៍ជាតិ ជាមួយនឹងការថែរក្សាបរិយាកាសសន្តិភាព ស្ថិរភាព និងកិច្ចសហប្រតិបត្តិការរបស់តំបន់ និងពិភពលោក។

ក្នុងទិដ្ឋភាពនៃការអភិវឌ្ឍ បណ្ឌិត Dang Vu Canh Linh បានយកចិត្តទុកដាក់ជាពិសេសចំពោះតម្រូវការក្នុងការផ្សារភ្ជាប់កំណើនសេដ្ឋកិច្ច ជាមួយនឹងវឌ្ឍនភាព យុត្តិធម៌សង្គម ការការពារបរិស្ថាន និងជីវភាពរស់នៅរបស់ប្រជាជន។

តាមលោក នេះជាខ្នាតរង្វាស់នៃការអភិវឌ្ឍជាក់ស្តែង៖ សមិទ្ធផលសេដ្ឋកិច្ចត្រូវតែរួមចំណែកពង្រីកឱកាសរស់នៅ ការសិក្សារៀនសូត្រ ការងារ និងការទទួលផលរបស់ប្រជាជន ជាពិសេសគឺបណ្តាសហគមន៍ដែលងាយរងគ្រោះ។

ការដាក់មនុស្សឱ្យស្ថិតនៅចំកណ្តាលកណ្តុរមជ្ឈមណ្ឌល ក៏មានន័យស្មើនឹងការដែលការសន្យានានាអំពីហិរញ្ញវត្ថុ ពាណិជ្ជកម្ម អាកាសធាតុ ឬបច្ចេកវិទ្យា ចាំបាច់ត្រូវវាយតម្លៃតាមរយៈផលប៉ះពាល់ចុងក្រោយចំពោះជីវភាពរស់នៅរបស់ប្រជាជន។ គម្លាតរវាងការប្តេជ្ញាចិត្ត និងលទ្ធផលជាក់ស្តែង ត្រូវតែបង្រួមតូចដោយប្រភពធនធានជាក់លាក់ យន្តការដំណើរការច្បាស់លាស់ និងការទទួលខុសត្រូវដែលភ្ជាប់មកជាមួយ។

ការស្តារទំនុកចិត្តឡើងវិញដោយសកម្មភាពជាក់ស្តែង

បណ្ឌិត Dang Vu Canh Linh វាយតម្លៃខ្ពស់ចំពោះវិធីដែលសុន្ទរកថាបានតភ្ជាប់រវាងភាពម្ចាស់ការលើខ្លួនឯងជាយុទ្ធសាស្ត្រ ជាមួយនឹងការម្ចាស់ការធ្វើសមាហរណកម្ម និងកិច្ចសហប្រតិបត្តិការប្រកបដោយសមភាព។

តាមលោក ការដែលវៀតណាមចូលរួមកងកម្លាំងរក្សាសន្តិភាពអង្គការសហប្រជាជាតិ គឺជាសក្ខីភាពជាក់ស្តែងមួយ។ ចាប់ពីប្រទេសមួយដែលធ្លាប់ទទួលជំនួយដើម្បីកសាងឡើងវិញក្រោយសង្គ្រាម វៀតណាមបានរួមចំណែកធនធានមនុស្ស បទពិសោធន៍ និងការទទួលខុសត្រូវជាបណ្តើរៗ ចូលទៅក្នុងការងាររួមរបស់សហគមន៍អន្តរជាតិ។

ការឯកភាពគ្នារវាងទស្សនៈ និងសកម្មភាពជាក់ស្តែង យោងតាមបណ្ឌិត Dang Vu Canh Linh បានបង្កើតកម្លាំងបញ្ចុះបញ្ចូលបន្ថែមទៀតសម្រាប់សាររបស់វៀតណាម។

លោកចាត់ទុកថា សារស្នូលនៅសម័យពិភាក្សាជាន់ខ្ពស់នៃមហាសន្និបាតអង្គការសហប្រជាជាតិ នីតិកាលទី ៨១ គឺបណ្តាប្រទេសចាំបាច់ត្រូវរួមគ្នាកំណត់ទិសដៅនៃការផ្លាស់ប្តូររបស់ពិភពលោក ស្របតាមមាគ៌ាសន្តិភាព កិច្ចសហប្រតិបត្តិការ និងការអភិវឌ្ឍ ដោយផ្អែកលើធម្មនុញ្ញអង្គការសហប្រជាជាតិ និងច្បាប់អន្តរជាតិ ដើម្បីផលប្រយោជន៍របស់ប្រជាជន។

តាមបណ្ឌិត Dang Vu Canh Linh ចលនានៃពិភពលោកគឺកើតឡើងជាបរានុម័ត ប៉ុន្តែទិសដៅដើរគឺអាស្រ័យលើការយល់ដឹង ការជ្រើសរើស និងសកម្មភាពប្រកបដោយការទទួលខុសត្រូវរបស់ប្រទេសនីមួយៗ។ ផលប្រយោជន៍ស្របច្បាប់របស់ប្រទេសនីមួយៗ ចាំបាច់ត្រូវដាក់នៅក្នុងទំនាក់ទំនងជាមួយផលប្រយោជន៍រួម និងសិទ្ធិអភិវឌ្ឍន៍របស់បណ្តាប្រជាជាតិដទៃទៀត។

ការផ្លាស់ប្តូរតុល្យភាពកម្លាំង ការប្រកួតប្រជែងផលប្រយោជន៍ ឬភាពខុសគ្នានៃរបបស្ថាប័ន មិនប្រាកដថានាំទៅរកជម្លោះនោះឡើយ។ បញ្ហាសំខាន់គឺស្ថិតនៅលើឥរិយាបថនៃការប្រព្រឹត្ត ការគោរពគោលការណ៍រួម ការរក្សាកិច្ចសន្ទនា និងការអនុវត្តការប្តេជ្ញាចិត្តនានាឱ្យបានម៉ឺងម៉ាត់។

នៅក្នុងបរិបទនោះ តម្រូវការក្នុងការស្តារទំនុកចិត្តឡើងវិញ ត្រូវបានបណ្ឌិត Dang Vu Canh Linh ចាត់ទុកថាជាទឡ្ហីករណ៍ដ៏សំខាន់មួយ។

តាមលោក ទំនុកចិត្តអន្តរជាតិមិនអាចកសាងឡើងដោយគ្រាន់តែពាក្យសម្តីនោះទេ ប៉ុន្តែត្រូវតែកសាងឡើងដោយសកម្មភាពប្រកបដោយភាពស៊ីសង្វាក់គ្នា ការគោរពឯករាជ្យ អធិបតេយ្យភាព បូរណភាពទឹកដី និងការអនុវត្តការប្តេជ្ញាចិត្តនានាឱ្យបានម៉ឺងម៉ាត់។

នៅពេលដែលគោលការណ៍រួមត្រូវបានអនុវត្តដោយរើសអើង ការសង្ស័យគ្នានឹងកើនឡើង ហើយកិច្ចសហប្រតិបត្តិការនឹងប្រែជាផុយស្រួយ។ ដូច្នេះ ការស្តារទំនុកចិត្តឡើងវិញ ចាំបាច់ត្រូវដើរទន្ទឹមគ្នាជាមួយនឹងការពង្រឹងមូលដ្ឋានគតិយុត្ត ដើម្បីឱ្យបណ្តាប្រទេសរួមគ្នាដោះស្រាយបញ្ហាប្រឈមទាំងឡាយណាដែលហួសពីសមត្ថភាពរបស់ប្រទេសទោលមួយ។

តាមបណ្ឌិត Dang Vu Canh Linh ទិសដៅធំៗទាំងបួននៅក្នុងសុន្ទរកថា បានបង្កើតឡើងនូវអង្គភាពរួមប្រកបដោយភាពឯកភាពមួយ៖ ការគោរពច្បាប់អន្តរជាតិ និងការស្តារទំនុកចិត្តឡើងវិញ គឺជាមូលដ្ឋានគ្រឹះសម្រាប់សន្តិភាព និងកិច្ចសហប្រតិបត្តិការ; ការអភិវឌ្ឍប្រកបដោយយុត្តិធម៌ មនុស្សធម៌ បរិយាបន្ន និងចីរភាព រួមចំណែកកាត់បន្ថយវិសមភាព និងការបែកបាក់; អភិបាលកិច្ចបច្ចេកវិទ្យាប្រកបដោយការទទួលខុសត្រូវ ពង្រីកឱកាសអភិវឌ្ឍន៍ និងទប់ស្កាត់ហានិភ័យនៃការពឹងផ្អែកថ្មី; ការពង្រឹងពហុភាគីនិយម និងតួនាទីមជ្ឈមណ្ឌលរបស់អង្គការសហប្រជាជាតិ បង្កើតលក្ខខណ្ឌសម្រាប់ការសម្របសម្រួលសកម្មភាពរួមគ្នា។

នៅក្នុងពិភពលោកដែលមានការប្រែប្រួលជាច្រើន លោកចាត់ទុកថាសាររបស់អគ្គលេខាបក្ស និងជាប្រធានរដ្ឋ To Lam បន្តបង្ហាញពីមាគ៌ាការបរទេសឯករាជ្យ ម្ចាស់ការ ស្វ័យពឹងពាក់ សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ពហុភាគីភាវូបនីយកម្ម និងពហុបែបភាវូបនីយកម្ម។

ចេញពីបទពិសោធន៍ប្រវត្តិសាស្ត្រ វៀតណាមយល់យ៉ាងច្បាស់ថាសន្តិភាពចាំបាច់ត្រូវថែរក្សាការពារដោយការខិតខំប្រឹងប្រែងឥតឈប់ឈរ ឯករាជ្យត្រូវតែដើរទន្ទឹមគ្នាជាមួយនឹងសមត្ថភាពម្ចាស់ការលើខ្លួនឯង រីឯការអភិវឌ្ឍយូរអង្វែងទាមទារនូវបរិយាកាសសហប្រតិបត្តិការប្រកបដោយស្ថិរភាព។ ដូច្នេះ សំឡេងរបស់វៀតណាមនៅអង្គការសហប្រជាជាតិបានបង្ហាញពីការតភ្ជាប់រវាងផលប្រយោជន៍ជាតិ មាតុភូមិ ជាមួយនឹងការទទួលខុសត្រូវចំពោះបញ្ហារួមនានា។

បច្ចេកវិទ្យាត្រូវតែបម្រើដល់ការអភិវឌ្ឍរបស់មនុស្សជាតិ

ខ្លឹមសារមួយទៀតដែលត្រូវបានបណ្ឌិត Dang Vu Canh Linh សង្កត់ធ្ងន់ គឺវិទ្យាសាស្ត្រ បច្ចេកវិទ្យា បរិវត្តកម្មឌីជីថល និងបញ្ញាសិប្បនិម្មិត (AI)។

នៅក្នុងសុន្ទរកថា អគ្គលេខាបក្ស និងជាប្រធានរដ្ឋ To Lam បានលើកឡើងអំពីតម្រូវការក្នុងការម្ចាស់ការរៀបចំទម្រង់អភិបាលកិច្ចបច្ចេកវិទ្យា សំដៅបម្រើដល់ការអភិវឌ្ឍរួម។

តាមបណ្ឌិត Dang Vu Canh Linh ខ្លឹមសារនេះមានភាពស៊ីសង្វាក់គ្នាជាមួយនឹងទិសដៅស្តីពីវិទ្យាសាស្ត្រ បច្ចេកវិទ្យា នវានុវត្តន៍ និងបរិវត្តកម្មឌីជីថលនៅក្នុងឯកសារមហាសន្និបាតលើកទី ១៤ របស់បក្ស ព្រមទាំងពង្រីកទៅកាន់វិសាលភាពសកលលោក នៅពេលដែលដាក់ការអភិវឌ្ឍបច្ចេកវិទ្យានៅក្នុងទំនាក់ទំនងជាមួយអធិបតេយ្យភាពជាតិ និងយុត្តិធម៌សង្គម។

លោកចាត់ទុកថា វឌ្ឍនភាពបច្ចេកវិទ្យាមិនមែនបង្កើតបាននូវយុត្តិធម៌ដោយស្វ័យប្រវត្តិនោះឡើយ។

បណ្តាប្រទេសដែលមានហេដ្ឋារចនាសម្ព័ន្ធ ទិន្នន័យ ធនធានមនុស្ស និងសមត្ថភាពស្រាវជ្រាវល្អ នឹងមានលទ្ធភាពទាញយកផលប្រយោជន៍ពី AI ប្រកបដោយប្រសិទ្ធភាពជាង។ ផ្ទុយទៅវិញ ប្រទេសទាំងឡាយណាដែលខ្វះខាតលក្ខខណ្ឌទាំងនេះ ប្រឈមនឹងហានិភ័យនៃការបន្តពឹងផ្អែក និងស្ថិតនៅក្រៅដំណើរការនៃការកសាងវិធានច្បាប់ថ្មីៗ។

ដូច្នេះ ស្ថាប័ន បទដ្ឋានសីលធម៌ និងយន្តការត្រួតពិនិត្យជាសកល ចាំបាច់ត្រូវតែកសាងឡើងឱ្យដើរទន្ទឹមគ្នាជាមួយនឹងល្បឿននៃការអភិវឌ្ឍបច្ចេកវិទ្យា។

តាមបណ្ឌិត Dang Vu Canh Linh សុន្ទរកថានេះបានដាក់ចេញនូវតម្រូវការបន្ទាន់ចំនួនបីនៅក្នុងអភិបាលកិច្ចបច្ចេកវិទ្យា។

ជាបឋម គឺការធានាផលប្រយោជន៍របស់ប្រជាជនតាមទិសដៅប្រកបដោយបរិយាបន្ន។ បណ្តាប្រទេសកំពុងអភិវឌ្ឍន៍ ចាំបាច់ត្រូវតែបានចូលរួមយ៉ាងជាក់ស្តែងនៅក្នុងដំណើរការកសាងវិធាន និងក្របខ័ណ្ឌអភិបាលកិច្ចបច្ចេកវិទ្យាសកល។ ទន្ទឹមនឹងនោះ ចាំបាច់ត្រូវតែមានការគាំទ្រផ្នែកហេដ្ឋារចនាសម្ព័ន្ធ ធនធានមនុស្ស និងការផ្ទេរបច្ចេកវិទ្យា ដើម្បីបង្រួមគម្លាតនៃការអភិវឌ្ឍ។

ចុងក្រោយ គោលដៅបច្ចេកវិទ្យាបម្រើដល់មនុស្សជាតិ ត្រូវតែបង្ហាញឡើងតាមរយៈផលប្រយោជន៍ជាក់ស្តែងនៅក្នុងជីវភាពរស់នៅ។

«តម្លៃយ៉ាងស៊ីជម្រៅនៃសារនេះ គឺការដាក់ការទទួលខុសត្រូវខាងនយោបាយ និងការទទួលខុសត្រូវសង្គម ឱ្យដើរទន្ទឹមគ្នាជាមួយនឹងសមត្ថភាពនវានុវត្តន៍បច្ចេកវិទ្យា ដោយយកមនុស្សធ្វើជាមជ្ឈមណ្ឌល និងជាគោលដៅនៃការអភិវឌ្ឍ។ ខ្នាតរង្វាស់នៃវឌ្ឍនភាពបច្ចេកវិទ្យា ត្រូវតែជាវឌ្ឍនភាពនៅក្នុងជីវភាពរស់នៅរបស់មនុស្ស ដែលបង្ហាញឱ្យឃើញតាមរយៈសមត្ថភាពត្រូវបានលើកកម្ពស់ សេចក្តីថ្លៃថ្នូរត្រូវបានការពារ ឱកាសត្រូវបានពង្រីក និងគុណភាពជីវិតត្រូវបានកែលម្អ» - បណ្ឌិត Dang Vu Canh Linh បានសង្កត់ធ្ងន់យ៉ាងដូច្នេះ៕

ហត្ថលេខាឌីជីថលចាំបាច់ត្រូវផ្លាស់ប្តូរពី «ការផ្តល់ជូនបាន» ទៅជា «ការប្រើប្រាស់បាន» យុគសម័យ - ការអភិវឌ្ឍហត្ថលេខាឌីជីថលកំពុងចោទឡើងនូវតម្រូវការផ្លាស់ប្តូរការផ្តោតសំខាន់ពីបរិមាណវិញ្ញាបនបត្រដែលបានផ្តល់ជូន ទៅជាប្រសិទ្ធភាពនៃការប្រើប្រាស់នៅក្នុងប្រតិបត្តិការជាក់ស្តែង ជាពិសេសគឺសេវាសាធារណៈ ផលិតកម្ម អាជីវកម្ម និងតម្រូវការចាំបាច់នានារបស់ប្រជាពលរដ្ឋ និងសហគ្រាស។

នាំកិច្ចសហប្រតិបត្តិការវិទ្យាសាស្ត្រ និងបច្ចេកវិទ្យាអន្តរជាតិឱ្យកាន់តែកៀកជិតនឹងតម្រូវការជាក់ស្តែង យុគសម័យ - កិច្ចសហប្រតិបត្តិការអន្តរជាតិក្នុងការស្រាវជ្រាវវិទ្យាសាស្ត្រ និងការអភិវឌ្ឍបច្ចេកវិទ្យា ចាំបាច់ត្រូវកសាងឡើងចេញពីតម្រូវការជាក់ស្តែងរបស់មូលដ្ឋាន សហគ្រាស និងគ្រឹះស្ថានស្រាវជ្រាវ តាមរយៈនោះតភ្ជាប់ឱ្យចំដៃគូ ធនធាន និងបច្ចេកវិទ្យា ដើម្បីបង្កើតឡើងនូវភារកិច្ចទាំងឡាយណាដែលមានលទ្ធភាពអនុវត្ត និងបង្កើតឥទ្ធិពលជាក់ស្តែង។

ឌឿងង្វៀន