ជំរុញការនាំចេញ គ្រប់គ្រងឱនភាពពាណិជ្ជកម្ម សំដៅឆ្ពោះទៅរកពាណិជ្ជកម្មប្រកបដោយតុល្យភាព

ឧបនាយករដ្ឋមន្ត្រីប្រចាំការ Pham Gia Tuc អញ្ជើញជាអធិបតីក្នុងសន្និសីទត្រួតពិនិត្យឡើងវិញនូវបណ្តាវិធានការជំរុញការនាំចេញ និងការគ្រប់គ្រងឱនភាពពាណិជ្ជកម្ម។

សេចក្តីជូនដំណឹងបានបញ្ជាក់យ៉ាងច្បាស់ថា នៅក្នុងឆ្នាំ ២០២៦ ស្ថានការណ៍ពិភពលោក និងតំបន់បន្តវិវត្តយ៉ាងឆាប់រហ័ស ស្មុគស្មាញ និងពិបាកប៉ាន់ស្មាន។ ការប្រកួតប្រជែងជាយុទ្ធសាស្ត្រ ជម្លោះភូមិសាស្ត្រនយោបាយ ការកែសម្រួលគោលនយោបាយពាណិជ្ជកម្ម និងពន្ធគយរបស់សហរដ្ឋអាមេរិក ព្រមទាំងខឿនសេដ្ឋកិច្ចធំៗមួយចំនួន រួមជាមួយនឹងការប្រែប្រួលតម្លៃថាមពល និងការចំណាយផ្នែកភស្តុភារកម្ម បន្តជះឥទ្ធិពលផ្ទាល់ដល់កំណើន និងពាណិជ្ជកម្មសកលលោក។

ក្នុងបរិបទនោះ សកម្មភាពនាំចេញរបស់វៀតណាមនៅតែបន្តសម្រេចបានលទ្ធផលជាវិជ្ជមាន។ គិតត្រឹមដំណាច់ខែកក្កដា ឆ្នាំ ២០២៦ ទំហំប្រាក់នាំចេញសម្រេចបាន ៣១៩,៧ ពាន់លានដុល្លារអាមេរិក កើនឡើង ២១,៧% បើធៀបនឹងរយៈពេលដូចគ្នា ខ្ពស់ជាងគោលដៅកំណើនពេញមួយឆ្នាំពី ១៥-១៦% និងស្ថិតក្នុងចំណោមកម្រិតកើនឡើងល្អក្នុងរយៈពេលជាច្រើនឆ្នាំកន្លងមកនេះ។

ទោះជាយ៉ាងណាក៏ដោយ ជញ្ជីងពាណិជ្ជកម្មទំនិញបានកត់ត្រានូវកម្រិតឱនភាពពាណិជ្ជកម្មប្រមាណ ២០,៣ ពាន់លានដុល្លារអាមេរិក។

យោងតាមការវាយតម្លៃរបស់បណ្តាក្រសួង ស្ថាប័ន មូលដ្ឋាន និងសមាគម ឱនភាពពាណិជ្ជកម្មគឺផ្តោតសំខាន់លើក្រុមកុំព្យូទ័រ ផលិតផលអេឡិចត្រូនិក និងគ្រឿងបន្លាស់ មុខទំនិញថាមពលដូចជាប្រេងឥន្ធនៈ ធ្យូងថ្ម សារធាតុគីមី វត្ថុធាតុដើមប្លាស្ទិក និងលោហធាតុសាមញ្ញផ្សេងៗទៀត។

ក្នុងនោះ ភាគច្រើននៃកុំព្យូទ័រ ផលិតផលអេឡិចត្រូនិក និងគ្រឿងបន្លាស់ដែលបាននាំចូល គឺជាវត្ថុធាតុដើម និងគ្រឿងបន្លាស់កម្រិតមធ្យមបម្រើឱ្យការផលិត អាជីវកម្ម និងការពង្រីកការវិនិយោគ។

ចំពោះក្រុមថាមពល ទិន្នផលធ្វើអាជីវកម្មប្រេងឧស្ម័ន និងធ្យូងថ្មក្នុងស្រុកមាននិន្នាការថយចុះ ខណៈពេលដែលតម្រូវការប្រើប្រាស់កើនឡើង ធ្វើឱ្យវៀតណាមត្រូវនាំចូលប្រេងឥន្ធនៈ និងវត្ថុធាតុដើមថាមពលមួយចំនួន ដើម្បីធានាតុល្យភាពរវាងការផ្គត់ផ្គង់និងតម្រូវការ រក្សាការផលិត និងធានាសន្តិសុខថាមពលជាតិ។ ការវិវត្តនៃជម្លោះនៅមជ្ឈិមបូព៌ា និងស្ថានភាពដាច់ខ្សែច្រវាក់ផ្គត់ផ្គង់ ក៏បានបង្កើនសម្ពាធលើការនាំចូលផងដែរ។

ចំពោះសារធាតុគីមី វត្ថុធាតុដើមប្លាស្ទិក លោហធាតុសាមញ្ញ និងវត្ថុធាតុដើមមួយចំនួនទៀត ស្ថានភាពឱនភាពពាណិជ្ជកម្មបានឆ្លុះបញ្ចាំងពីកម្រិតកំណត់នានាដែលមានលក្ខណៈជារចនាសម្ព័ន្ធ ក្នុងនោះអត្រាធ្វើតូបនីយកម្មក្នុងស្រុកនៅមានកម្រិតទាបនៅឡើយ ហើយឧស្សាហកម្មឧបត្ថម្ភមិនទាន់ឆ្លើយតបបានពេញលេញនូវតម្រូវការវត្ថុធាតុដើមសម្រាប់ការផលិត និងការប្រើប្រាស់ក្នុងស្រុក។

បើកទូលាយទីផ្សារបន្ថែម បង្កើនការតភ្ជាប់សហគ្រាសជាមួយខ្សែច្រវាក់ចែកចាយអន្តរជាតិ

ដើម្បីដាក់ឱ្យអនុវត្តព្រមៗគ្នានូវបណ្តាដំណោះស្រាយជំរុញការនាំចេញ គ្រប់គ្រងឱនភាពពាណិជ្ជកម្ម សំដៅឆ្ពោះទៅរកការអភិវឌ្ឍពាណិជ្ជកម្មប្រកបដោយតុល្យភាព ចីរភាព និងរួមចំណែកដល់គោលដៅកំណើន «ពីរខ្ទង់» ឧបនាយករដ្ឋមន្ត្រីប្រចាំការបានតម្រូវឱ្យបណ្តាក្រសួង ស្ថាប័ន មូលដ្ឋាន និងសមាគមផ្នែកទំនិញ ផ្តោតលើការដាក់ឱ្យអនុវត្តភ្លាមៗនូវភារកិច្ចមួយចំនួន បន្ថែមលើបណ្តាដំណោះស្រាយដែលត្រូវបានប្រគល់ជូននៅក្នុងសន្និសីទជំរុញការនាំចេញសម្រេចបានគោលដៅកំណើនពីរខ្ទង់ កាលពីខែមិថុនា ឆ្នាំ ២០២៦។

ក្រសួងឧស្សាហកម្ម និងពាណិជ្ជកម្ម ត្រូវបានប្រគល់ភារកិច្ចអភិវឌ្ឍប្រព័ន្ធអេកូឡូស៊ីគាំទ្រសហគ្រាសឈានទៅកាន់ទីផ្សារអន្តរជាតិ ចូលទៅកាន់ប្រព័ន្ធចែកចាយទំនើប និងខ្សែច្រវាក់លក់រាយអន្តរជាតិដោយផ្ទាល់ ដាក់ឱ្យអនុវត្តប្រកបដោយប្រសិទ្ធភាពនូវកម្មវិធីឈានទៅកាន់ទីផ្សារអន្តរជាតិ ដំណាក់កាល ២០២៦-២០៣០។

ក្រសួងក៏ចាប់ផ្តើម និងពន្លឿនវឌ្ឍនភាពនៃការចរចាបណ្តាកិច្ចព្រមព្រៀងពាណិជ្ជកម្មអនុគ្រោះ កិច្ចព្រមព្រៀងពាណិជ្ជកម្មសេរីជាមួយដៃគូថ្មីៗ សំដៅបើកទូលាយទីផ្សារបន្ថែមសម្រាប់ទំនិញវៀតណាម។ ចំពោះមុខ នៅក្នុងត្រីមាសទី III វៀតណាមនឹងចាប់ផ្តើមការចរចាជាមួយប្លុកទីផ្សាររួមអាមេរិកខាងត្បូង (MERCOSUR)។

សកម្មភាពជំរុញពាណិជ្ជកម្មក៏ត្រូវបានតម្រូវឱ្យបង្កើនល្បឿន ដើម្បីទាញយកផលប្រយោជន៍ភ្លាមៗពីបណ្តាការបញ្ជាទិញនាំចេញ ជាពិសេសគឺជាមួយមុខទំនិញដែលមានតម្រូវការខ្ពស់ដូចជា អេឡិចត្រូនិក គ្រឿងចក្រ កសិផល និងជលផល ព្រមទាំងពង្រីកការជំរុញចូលទៅកាន់ទីផ្សារថ្មីៗ ជាពិសេសគឺទីផ្សារ Halal អាមេរិកឡាទីន និងអាហ្វ្រិក។

ក្រសួងឧស្សាហកម្ម និងពាណិជ្ជកម្ម នឹងធ្វើការជាមួយបណ្តាក្រុមហ៊ុនដែលមានគម្លាតធំរវាងទំហំប្រាក់នាំចូល និងនាំចេញក្នុងវិស័យកុំព្យូទ័រ គ្រឿងបន្លាស់អេឡិចត្រូនិក ដើម្បីបញ្ជាក់ឱ្យបានច្បាស់ពីមូលហេតុនៃការនាំចូល វឌ្ឍនភាពផលិតកម្ម និងជំរុញការនាំចេញផលិតផលឱ្យបានឆាប់រហ័ស។

ក្រសួងក៏ធ្វើជាអធិបតី និងសហការជាមួយបណ្តាក្រសួង ស្ថាប័នពាក់ព័ន្ធ ត្រួតពិនិត្យឡើងវិញនូវមុខទំនិញឧស្សាហកម្មមួយចំនួនដែលមានសមត្ថភាពផលិតក្នុងស្រុករួចហើយ ដើម្បីស្នើឱ្យក្រសួងហិរញ្ញវត្ថុពិចារណាកែសម្រួលដំឡើងកម្រិតពន្ធនាំចូលអនុគ្រោះ។

ទន្ទឹមនឹងនោះ បណ្តាឯកសារគតិយុត្តនឹងត្រូវបានត្រួតពិនិត្យ ធ្វើវិសោធនកម្ម និងបំពេញបន្ថែមឱ្យបានសមស្របទៅនឹងគោលការណ៍ គោលនយោបាយរបស់រដ្ឋស្តីពីការបង្ការ និងទប់ស្កាត់ការក្លែងបន្លំប្រភពដើមទំនិញ ការផ្ទេរទំនិញខុសច្បាប់ ព្រមទាំងគាំទ្រទាន់ពេលវេលាដល់បណ្តាមន្ទីរឧស្សាហកម្ម និងពាណិជ្ជកម្មមូលដ្ឋានក្នុងការផ្តល់វិញ្ញាបនបត្របញ្ជាក់ប្រភពដើមទំនិញ។

ក្រសួងឧស្សាហកម្ម និងពាណិជ្ជកម្ម ក៏សហការជាមួយសមាគមសហគ្រាសអេឡិចត្រូនិកវៀតណាម ដើម្បីរៀបចំឱ្យបានឆាប់នូវជំនួបការងាររបស់ឧបនាយករដ្ឋមន្ត្រីប្រចាំការរាជរដ្ឋាភិបាល ជាមួយសមាគម និងបណ្តាសហគ្រាសនាំចេញនាំចូលធំៗក្នុងវិស័យអេឡិចត្រូនិក និង semiconductor នៅវៀតណាម។

ពន្លឿនការបង្វែរសងពន្ធ លេខកូដតំបន់ដាំដុះ និងឥណទាននាំចេញ

ក្រសួងហិរញ្ញវត្ថុត្រូវបានតម្រូវឱ្យត្រួតពិនិត្យនីតិវិធីនៃការបង្វែរសងពន្ធលើតម្លៃបន្ថែមចំពោះទំនិញនាំចេញ ក្នុងទិសដៅបង្កើនការបែងចែកចំណាត់ថ្នាក់ហានិភ័យ ពន្លឿនការដោះស្រាយសំណុំឯកសារចំពោះសហគ្រាសដែលគោរពច្បាប់បានល្អ ព្រមទាំងណែនាំ និងផ្សព្វផ្សាយនូវក្រុមការជាប់គាំងនានាស្តីពីការបង្វែរសងពន្ធ ដើម្បីឱ្យសហគ្រាសក្តាប់បានច្បាស់លាស់ និងកាត់បន្ថយការចំណាយពេលវេលា។

ក្រសួងហិរញ្ញវត្ថុក៏ធ្វើជាអធិបតីក្នុងការដាក់ឱ្យអនុវត្តបណ្តាវិធានការត្រួតពិនិត្យ គ្រប់គ្រងតម្លៃ និងប្រតិបត្តិការតភ្ជាប់ចំពោះសហគ្រាសអេឡិចត្រូនិកដែលនាំចូលភាគច្រើននៃគ្រឿងបន្លាស់ពីក្រុមហ៊ុនមេ ឬក្រុមហ៊ុននានាក្នុងសម្ព័ន្ធតែមួយ សំដៅចៀសវាងបាតុភូតផ្ទេរថ្លៃ។

ក្រសួងកសិកម្ម និងបរិស្ថាន ត្រូវបានប្រគល់ភារកិច្ចធ្វើជាអធិបតីក្នុងការចរចា ចុះហត្ថលេខាលើបណ្តាពិធីសារដើម្បីបើកទូលាយទីផ្សារបន្ថែមសម្រាប់កសិផល ផ្លែឈើវៀតណាម ដាក់ឱ្យអនុវត្តព្រមៗគ្នានូវភារកិច្ចប្រឆាំងការកេងប្រវ័ញ្ចជលផលខុសច្បាប់ គ្មានរបាយការណ៍ និងគ្មានការគ្រប់គ្រង (IUU) និងចរចាដកចេញនូវកាតលឿង IUU។

ក្រសួងក៏ពន្លឿនការដោះស្រាយសំណុំឯកសារលេខកូដតំបន់ដាំដុះ តំបន់ចិញ្ចឹម គ្រឹះស្ថានវេចខ្ចប់ និងគ្រឹះស្ថានកែច្នៃបម្រើឱ្យការនាំចេញ សហការជាមួយក្រសួងឧស្សាហកម្ម និងពាណិជ្ជកម្ម ត្រួតពិនិត្យឡើងវិញនូវមុខទំនិញទាំងឡាយណាដែលមានសមត្ថភាពផលិតក្នុងស្រុករួចហើយ ដើម្បីស្នើឱ្យក្រសួងហិរញ្ញវត្ថុពិចារណាកែសម្រួលដំឡើងពន្ធនាំចូលអនុគ្រោះ។

ធនាគាររដ្ឋវៀតណាម ត្រូវបានតម្រូវឱ្យមានដំណោះស្រាយធានាឱ្យសហគ្រាសនាំចេញអាចទទួលបានឥណទាន ក្នុងនោះផ្តល់អាទិភាពដល់ការប្រមូលផ្តុំទុនឱ្យបានគ្រប់គ្រាន់ដើម្បីបម្រើការប្រមូលទិញ ការប្រើប្រាស់ និងការនាំចេញកសិផលនៅក្នុងបណ្តាខែចុងឆ្នាំ។

ក្រសួងការបរទេស ណែនាំបណ្តាទីភ្នាក់ងារតំណាងវៀតណាមនៅបរទេសបង្កើនការទូតសេដ្ឋកិច្ច សំដៅជំរុញការនាំចេញ ចលនាបណ្តាញទីភ្នាក់ងារតំណាង សហគមន៍ជនជាតិវៀតណាម និងសហគ្រិនវៀតណាមនៅបរទេស គាំទ្រការតភ្ជាប់សហគ្រាសក្នុងស្រុកជាមួយអ្នកនាំចូល ប្រព័ន្ធចែកចាយ ខ្សែច្រវាក់លក់រាយ វិនិយោគិន និងដៃគូនានានៅប្រទេសសាមី។

កាត់បន្ថយនីតិវិធី ដោះស្រាយការជាប់គាំងជូនសហគ្រាស

ក្រសួងសំណង់ធ្វើជាអធិបតី និងសហការជាមួយមូលដ្ឋាន សហគ្រាសកំពង់ផែ ក្រុមហ៊ុនដឹកជញ្ជូន និងស្ថាប័នគយ សម្របសម្រួលចរាចរណ៍ រៀបចំនូវគន្លងផ្លូវអាទិភាពក្នុងដំណាក់កាលកំពូលនៃការនាំចេញនៅតាមកំពង់ផែ និងច្រកទ្វារភស្តុភារកម្មធំៗ ព្រមទាំងជំរុញការអភិវឌ្ឍឧស្សាហកម្មដឹកជញ្ជូនវៀតណាម។

បណ្តាក្រសួង ស្ថាប័ន ត្រូវបានតម្រូវឱ្យសិក្សាស្រាវជ្រាវដាក់ឱ្យអនុវត្តនូវវិធីសាស្ត្រគ្រប់គ្រងហានិភ័យ បន្តត្រួតពិនិត្យ ធ្វើសាមញ្ញកម្មនីតិវិធី កាត់បន្ថយភាពត្រួតស៊ីគ្នាក្នុងការងារអធិការកិច្ច ត្រួតពិនិត្យសហគ្រាស បង្កើនការតភ្ជាប់ទិន្នន័យរវាងស្ថាប័នគ្រប់គ្រងរដ្ឋនានា ជំរុញការផ្តល់សេវាសាធារណៈតាមប្រព័ន្ធអនឡាញ និងដោះស្រាយទាន់ពេលវេលានូវការលំបាក និងការជាប់គាំងនានាក្នុងដំណើរការអនុវត្តនីតិវិធីរដ្ឋបាល។

ចំពោះបណ្តាខេត្ត និងក្រុងដែលមានគម្រោង ឬរោងចក្របង្កើនទុនវិនិយោគក្នុងវិស័យបច្ចេកវិទ្យាខ្ពស់ និងបង្កើនការនាំចូលកុំព្យូទ័រ ផលិតផលអេឡិចត្រូនិក និងគ្រឿងបន្លាស់ គណៈកម្មាធិការប្រជាជនមូលដ្ឋានត្រូវធ្វើការជាមួយបណ្តារោងចក្រ ដើម្បីជំរុញវឌ្ឍនភាពផលិតកម្ម និងការនាំចេញ បន្ទាប់ពីបានបង្កើនការនាំចូលវត្ថុធាតុដើម និងគ្រឿងបន្លាស់។

បណ្តាមូលដ្ឋានក៏ត្រូវតែតាមដានជាប្រចាំនូវស្ថានភាពផលិតកម្ម ការបញ្ជាទិញ និងការនាំចេញរបស់សហគ្រាសស្នូលនានា ដាស់តឿនការដាក់ឱ្យដំណើរការបណ្តាគម្រោង រោងចក្រ និងវត្ថុធាតុដើមនាំចូលចូលក្នុងផលិតកម្ម និងការនាំចេញ រកឃើញទាន់ពេលវេលានូវរាល់ការលំបាកអំពីទីផ្សារ ពលកម្ម ភស្តុភារកម្ម និងបទប្បញ្ញត្តិនៃទីផ្សារនាំចូល ដើម្បីដោះស្រាយតាមសមត្ថកិច្ច ឬស្នើថ្នាក់មានសមត្ថកិច្ចដោះស្រាយ។

ទន្ទឹមនឹងនោះ មូលដ្ឋានត្រូវត្រួតពិនិត្យឡើងវិញតាមផ្នែកទំនិញនីមួយៗនូវរាល់តម្រូវការដែលសហគ្រាសមិនទាន់ឆ្លើយតបបានពីទីផ្សារនាំចូល ផ្តោតការគាំទ្រលើការធ្វើតេស្តពិសោធន៍ ការបញ្ជាក់គុណភាព ការបញ្ជាក់ប្រភពដើម ការគ្រប់គ្រងគុណភាព និងសំណុំឯកសារបច្ចេកទេស។

ព័ត៌មានស្តីពីការប្រែប្រួលនៃទីផ្សារសកលលោក របាំងបច្ចេកទេសនានា និងកាលានុវត្តភាពទាញយកផលប្រយោជន៍ពីបណ្តា FTA ក៏ត្រូវតែបានធ្វើបច្ចុប្បន្នភាព និងផ្តល់ជូនជាប្រចាំដល់សហគ្រាស។

សហព័ន្ធពាណិជ្ជកម្ម និងឧស្សាហកម្មវៀតណាម បន្តលើកកម្ពស់តួនាទីជាចំណុចកណ្តាលប្រមូលផ្តុំរាល់មតិកែលម្អ សំណូមពរ ការលំបាក និងការជាប់គាំងរបស់បណ្តាសមាគម និងសហគ្រាស ដោយផ្ញើបញ្ហាដែលនៅសេសសល់ជាប្រចាំខែ ឬមិនប្រក្រតី ទៅកាន់ក្រសួង ស្ថាប័ន និងមូលដ្ឋានពាក់ព័ន្ធ ដើម្បីពិចារណា និងដោះស្រាយទាន់ពេលវេលា។

ចំពោះសំណូមពរនានារបស់បណ្តាសមាគមផ្នែកទំនិញ ឧបនាយករដ្ឋមន្ត្រីប្រចាំការបានតម្រូវឱ្យបណ្តាក្រសួង ស្ថាប័ន និងមូលដ្ឋាន អនុវត្តតាមមុខងារ និងភារកិច្ចដែលបានប្រគល់ជូន ប្រញាប់ប្រញាល់ដោះស្រាយឱ្យបានចប់សព្វគ្រប់នូវរាល់បញ្ហាដែលស្ថិតក្រោមសមត្ថកិច្ច ធានាការឆ្លើយតបយ៉ាងច្បាស់លាស់ ជាក់ស្តែង និងមានលិខិតឆ្លើយតបទៅកាន់បណ្តាសមាគមនៅក្នុងខែសីហា ឆ្នាំ ២០២៦។

ក្នុងករណីមានបញ្ហាកើតឡើងហួសពីសមត្ថកិច្ច បណ្តាស្ថាប័នត្រូវរាយការណ៍ជូនថ្នាក់មានសមត្ថកិច្ចតាមបទប្បញ្ញត្តិ៕

ខេត្ត Hung Yen - ជប៉ុន៖ បង្កើនការតភ្ជាប់ ជម្រុញកិច្ចសហប្រតិបត្តិការវិនិយោគ ពាណិជ្ជកម្ម និងពង្រីកទំនាក់ទំនង យុគសម័យ - នាថ្ងៃទី ៣ ខែមិថុនា គណៈកម្មាធិការប្រជាជនខេត្ត Hung Yen បានសម្របសម្រួលជាមួយក្រសួងការបរទេស និងស្ថានទូតជប៉ុនប្រចាំនៅវៀតណាម រៀបចំកម្មវិធីតភ្ជាប់ Hung Yen - ជប៉ុន។ សកម្មភាពនេះគឺសំដៅបង្កើនការតភ្ជាប់ ជម្រុញកិច្ចសហប្រតិបត្តិការវិនិយោគ ពាណិជ្ជកម្ម និងពង្រីកទំនាក់ទំនងរវាងខេត្ត Hung Yen ជាមួយបណ្តាដៃគូ និងសហគ្រាសជប៉ុន នៅក្នុងដំណាក់កាលអភិវឌ្ឍន៍ថ្មី។

នាយករដ្ឋមន្ត្រី Le Minh Hung ធ្វើកិច្ចពិភាក្សាទ្វេភាគីជាមួយនាយករដ្ឋមន្ត្រីថៃ៖ ឆ្ពោះទៅរកទំហំពាណិជ្ជកម្មទ្វេភាគីចំនួន ៥០ ប៊ីលីយូនដុល្លារអាមេរិក យុគសម័យ - នាថ្ងៃទី ៨ មិថុនា បន្ទាប់ពីពិធីបដិសណ្ឋារកិច្ចជាផ្លូវការ នៅទីស្តីការរដ្ឋាភិបាល នាយករដ្ឋមន្ត្រី លោក Le Minh Hung និងនាយករដ្ឋមន្ត្រីថៃ លោក Anutin Charnvirakul បានបន្តធ្វើកិច្ចពិភាក្សាទ្វេភាគី។

ឌឹកអាញ់