យុគសម័យ - AMAF បានអះអាងថា អាស៊ាននឹងបន្តសហការគ្នា ដើម្បីធានាបាននូវការផ្គត់ផ្គង់ចំណីអាហារឲ្យបានគ្រប់គ្រាន់ មានគុណភាព សុវត្ថិភាព និងជីវជាតិ ដើម្បីឆ្លើយតបទៅនឹងតម្រូវការរបស់ប្រជាជនក្នុងតំបន់ ក្នុងអំឡុងពេលនិងក្រោយពីពេលជំងឺរាតត្បាតផ្ទុះឡើងផងដែរ។
អង្ករត្រូវបានលក់គ្រប់ប្រភេទនៅតាមផ្សារទំនើបនានាក្នុងទីក្រុងបាងកកប្រទេសថៃ (រូបថត៖ VNA)
នាថ្ងៃទី ១៧ ខែមេសា សេចក្តីថ្លែងការណ៍រួមមួយត្រូវបានប្រកាសចេញនៅឯកិច្ចប្រជុំថ្នាក់រដ្ឋមន្រ្តីកសិកម្មនិងរុក្ខកម្មអាស៊ាន (AMAF) ដែលផ្តើមចេញពីការព្រួយបារម្ភយ៉ាងខ្លាំងអំពីផលប៉ះពាល់នៃជំងឺរាតត្បាតកូវីដ១៩ (COVID-19) ចំពោះកិច្ចសហប្រតិបត្តិការរបស់បណ្តាប្រទេសសមាជិក អាស៊ានក្នុងវិស័យចំណីអាហារកសិកម្ម រុក្ខកម្ម ព្រមទាំងការរំខានដល់សង្វាក់ផ្គត់ផ្គង់ចំណីអាហារនៅក្នុងតំបន់ផងដែរ។
រដ្ឋមន្រ្តីក្រសួងធនធានធម្មជាតិ និងទេសចរណ៍ប្រ៊ុយណេ លោក Dato Ali Apong ដែលបច្ចុប្បន្នលោកជាប្រធាន AMAF បានអះអាងថា អាស៊ាននឹងបន្តសហការគ្នា ដើម្បីធានាបាននូវការផ្គត់ផ្គង់ចំណីអាហារឲ្យបានគ្រប់គ្រាន់ មានគុណភាព សុវត្ថិភាព និងជីវជាតិ ដើម្បីឆ្លើយតបទៅនឹងតម្រូវការរបស់ប្រជាជនក្នុងតំបន់ ក្នុងអំឡុងពេលនិងក្រោយពីពេលជំងឺរាតត្បាតផ្ទុះឡើងផងដែរ។
ទន្ទឹមនឹងនេះ AMAF ក៏អំពាវនាវឱ្យបណ្តាប្រទេសជាសមាជិកអាស៊ាន ត្រូវអនុវត្តវិធានការ គម្រោងនិងកម្មវិធីដ៏ចាំបាច់នានានៅថ្នាក់ជាតិ ដើម្បីឆ្លើយតបនឹងតម្រូវការស្បៀងអាហារជាមុនសិនសម្រាប់ប្រជាជន ជាពិសេសគឺក្រុមមនុស្សដែលងាយរងគ្រោះក្នុងសង្គមផងដែរ៕
（បកប្រែដោយ ហេងវុធ្ធី）
មតិពីមិត្តអ្នកអាន