សេចក្តីសម្រេចចិត្តលេខ ០៦-NQ/TW៖ ជំរុញកិច្ចការបរទេសប្រជាជនឱ្យឈានចូលជម្រៅស៊ីជម្រៅ ប្រកបដោយប្រសិទ្ធភាព និងជាក់ស្តែង

ដើម្បីធ្វើឱ្យកាន់តែច្បាស់នូវ សារៈសំខាន់ នៃសេចក្តីសម្រេចចិត្តលេខ ០៦-NQ/TW ក្នុងនោះមានការងារកិច្ចការបរទេសប្រជាជន អ្នកយកព័ត៌មាននៃទីភ្នាក់ងារសារព័ត៌មានវៀតណាម (TTXVN) បានមានការផ្លាស់ប្តូរពិភាក្សាជាមួយលោកវរសេនីយ៍ឯក Tran Van Thong អនុប្រធានគណៈកម្មាធិការទំនាក់ទំនង សមាជិកគណៈកម្មាធិការអចិន្ត្រៃយ៍មជ្ឈិមសមាគមមិត្តភាពវៀតណាម - កម្ពុជា។

- តើលោកវាយតម្លៃយ៉ាងណាចំពោះទីតាំងនៃកិច្ចការបរទេសប្រជាជននៅក្នុងខឿនការទូតវៀតណាមនាពេលបច្ចុប្បន្ន ពិសេសគឺបន្ទាប់ពីការិយាល័យនយោបាយបានប្រកាសផ្សាយសេចក្តីសម្រេចចិត្តលេខ ០៦-NQ/TW អំពីការអនុវត្តមាគ៌ាកិច្ចការបរទេសនៃមហាសន្និបាតលើកទី ១៤ របស់បក្ស?

ដោយបន្តវេននូវមនោគមវិជ្ជាការទូតហូជីមិញ “យកអ្វីដែលមិនផ្លាស់ប្តូរ ដើម្បីទប់ទល់នឹងអ្វីដែលផ្លាស់ប្តូររាប់ម៉ឺនជំពូក”ខឿនការទូតវៀតណាមតែងតែត្រូវបានរក្សាយ៉ាងរឹងមាំដោយផ្អែកលើសសរស្តម្ភទាំងបី៖ កិច្ចការបរទេសរបស់បក្ស ការទូតរបស់រដ្ឋ និងកិច្ចការបរទេសប្រជាជន។ ស្មារតីពីមហាសន្និបាតលើកទី ១៤ របស់បក្ស បានបន្តលើកកម្ពស់ការយល់ដឹង ដោយកំណត់ច្បាស់ថាកិច្ចការបរទេសគឺជា “ភារកិច្ចគន្លឹះ សំខាន់ និងជាប្រចាំ”។

អាចបញ្ជាក់បានថា ការដែលការិយាល័យនយោបាយប្រកាសផ្សាយសេចក្តីសម្រេចចិត្តលេខ ០៦-NQ/TW គឺជាចំណុចរបត់ដ៏មានអត្ថន័យ ជាត្រីវិស័យតម្រង់ទិសដៅសម្រាប់បណ្តាសកម្មភាពកិច្ចការបរទេសប្រជាជននិយាយជារួម ឱ្យឈានចូលជម្រៅស៊ីជម្រៅ ប្រកបដោយប្រសិទ្ធភាព និងជាក់ស្តែងនាពេលខាងមុខ។

ក្នុងរយៈពេលកន្លងទៅ នៅក្នុងវិស័យកិច្ចការបរទេសប្រជាជន ក្នុងកិច្ចសហប្រតិបត្តិការទ្វេភាគី ទំនាក់ទំនងវៀតណាម - កម្ពុជា កាន់តែត្រូវបានពូនជ្រំ និងពង្រឹងការអភិវឌ្ឍជាបន្តបន្ទាប់ ដើម្បីផលប្រយោជន៍របស់ប្រជាជននៃប្រទេសទាំងពីរ។ ប្រសិនបើកិច្ចការបរទេសរបស់បក្ស និងការទូតរបស់រដ្ឋ បង្កើតនូវគ្រឹះស្ថាននយោបាយ - គតិយុត្ត នោះកិច្ចការបរទេសប្រជាជន គឺជាស្ពានចម្លងប្រកបដោយចីរភាពដែលតភ្ជាប់ដោយផ្ទាល់នូវមនោសញ្ចេតនា និងសេចក្តីទុកចិត្តរវាងប្រជាជននៃប្រទេសទាំងពីរ។

សកម្មភាពអញ្ជើញចូលរួមសន្និសីទជាន់ខ្ពស់រំលឹកខួបលើកទី ៣៥ នៃទំនាក់ទំនងអាស៊ាន - រុស្ស៊ី របស់នាយករដ្ឋមន្ត្រី លោក Le Minh Hung នៅទីក្រុង Kazan សហព័ន្ធរុស្ស៊ី ចាប់ពីថ្ងៃទី ១៧ ដល់ថ្ងៃទី ១៨ ខែមិថុនា ឆ្នាំ ២០២៦ បានទទួលជោគជ័យយ៉ាងត្រចះត្រចង់ រួមចំណែកពង្រឹងទំនាក់ទំនងរវាងអាស៊ាន និងរុស្ស៊ី ដែលជាដៃគូយុទ្ធសាស្ត្រគ្រប់ជ្រុងជ្រោយរបស់វៀតណាម តាមរយៈនោះ បង្ហាញពីការគាំទ្រយ៉ាងសកម្មរបស់វៀតណាមចំពោះរុស្ស៊ី និងចំពោះទំនាក់ទំនងអាស៊ាន - រុស្ស៊ី។ នៅក្នុងរូបភាព៖ សម័យប្រជុំពេញអង្គនៃសន្និសីទជាន់ខ្ពស់រំលឹកខួបលើកទី ៣៥ នៃទំនាក់ទំនងអាស៊ាន - រុស្ស៊ី។

- នាខែឧសភា ឆ្នាំ ២០២៦ កន្លងទៅ នៅទីក្រុងហូជីមិញ បានប្រព្រឹត្តទៅសន្និសីទសមាគមមិត្តភាពវៀតណាម - កម្ពុជា និងសមាគមមិត្តភាពកម្ពុជា - វៀតណាម លើកទី ៤ (២០២២-២០២៧) ថ្នាក់ដឹកនាំនៃសមាគមមិត្តភាពទាំងពីរ សុទ្ធតែបានសង្កត់ធ្ងន់លើការ "តភ្ជាប់បេះដូង"។ តើលោកអាចចែករំលែកបន្ថែមអំពីសារពីព្រឹត្តិការណ៍នេះបានទេ?

នេះគឺជាសន្និសីទរួមលើកទី ៤ ក្នុងក្របខ័ណ្ឌកម្មវិធីកិច្ចសហប្រតិបត្តិការដំណាក់កាល ២០២២ - ២០២៧ សំដៅបន្តពង្រឹងទំនាក់ទំនងសាមគ្គីភាព មិត្តភាពប្រពៃណី និងកិច្ចសហប្រតិបត្តិការគ្រប់ជ្រុងជ្រោយរវាងប្រជាជននៃប្រទេសទាំងពីរ។

នៅក្នុងសន្និសីទ អនុប្រធានរដ្ឋសភា លោកស្រី Nguyen Thi Thanh ប្រធានសមាគមមិត្តភាពវៀតណាម - កម្ពុជា បានសង្កត់ធ្ងន់លើគោលដៅតភ្ជាប់បេះដូង ពូនជ្រំជំនឿទុកចិត្ត និងបញ្ជូនបន្តនូវអណ្តាតភ្លើងមិត្តភាពជូនដល់ជំនាន់ក្រោយ។ កម្មវិធីជាក់ស្តែងជាច្រើនដូចជា “បណ្តុះពន្លកមិត្តភាព” ជួយឧបត្ថម្ភគាំទ្រនិស្សិតកម្ពុជា ឬវេទិកាកិច្ចសហប្រតិបត្តិការសេដ្ឋកិច្ច បានបង្ហាញឱ្យឃើញនូវប្រសិទ្ធភាពជាក់ស្តែងនេះ។

ចំពោះភាគីកម្ពុជា សម្តេច ម៉ែន សំអន អនុប្រធានគណបក្សប្រជាជនកម្ពុជា ប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា ប្រធានសមាគមមិត្តភាពកម្ពុជា - វៀតណាម បានថ្លែងមតិបញ្ជាក់យ៉ាងមុតមាំថា ប្រជាជនកម្ពុជាតែងតែគោរព និងចងចាំនូវការជួយឧបត្ថម្ភ និងការលះបង់បូជារបស់កងទ័ពស្ម័គ្រចិត្ត និងជំនាញការវៀតណាម ដែលបានជួយឱ្យរួចផុតពីរបបប្រល័យពូជសាសន៍; ទន្ទឹមនឹងនោះ មានបំណងប្រាថ្នាចង់បន្តរួមជាមួយវៀតណាមកសាងខ្សែបន្ទាត់ព្រំដែនសន្តិភាព មិត្តភាព ស្ថិរភាព និងបង្កើនការផ្លាស់ប្តូររវាងជំនាន់វ័យក្មេង។

ក្រឡេកមើលឡើងវិញនាពេលកន្លងទៅ ការផ្សារភ្ជាប់ពីកិច្ចការបរទេសប្រជាជនរវាងវៀតណាម និងកម្ពុជា បានរួមចំណែកជំរុញការកសាងខ្សែបន្ទាត់ព្រំដែនសន្តិភាព ស្ថិរភាព រួមគ្នាអភិវឌ្ឍន៍ និងនាំមកនូវលទ្ធផលជាក់ស្តែងជាច្រើននៅតាមបណ្តាមូលដ្ឋានជាប់ព្រំដែននៃប្រទេសទាំងពីរ។ អំពីសន្តិសុខ សណ្តាប់ធ្នាប់ យន្តការសម្របសម្រួលអន្តរវិស័យត្រូវបានពង្រឹង ជួយធានាសន្តិសុខសណ្តាប់ធ្នាប់ បង្ការនិងប្រឆាំងបទល្មើសឆ្លងដែន ជួយឱ្យប្រជាពលរដ្ឋមានភាពកក់ក្តៅក្នុងចិត្តក្នុងការតាំងទីលំនៅ និងផលិតកម្ម។ អំពីសេដ្ឋកិច្ច ទំហំពាណិជ្ជកម្មទ្វេភាគីរក្សាបាននូវសន្ទុះកំណើនវិជ្ជមាន អាស្រ័យដោយការកែលម្អបណ្តានីតិវិធីចេញ-ចូលប្រទេស និងនីតិវិធីនាំចេញ-នាំចូល បង្កលក្ខខណ្ឌអំណោយផលសម្រាប់ការវិនិយោគ និងទេសចរណ៍។

លោកវរសេនីយ៍ឯក Tran Van Thong

បណ្តាវិស័យកិច្ចសហប្រតិបត្តិការសុខាភិបាល អប់រំ ពលកម្ម កសិកម្ម និងថាមពល… រវាងប្រទេសទាំងពីរក៏ត្រូវបានជំរុញខ្លាំងក្លាផងដែរ។ ពិសេសគឺ យន្តការជួបប្រជុំប្រចាំឆ្នាំយ៉ាងហោចណាស់មួយឆ្នាំម្តង រវាងបណ្តាមូលដ្ឋានជាប់ព្រំដែន គឺបានជួយឱ្យភាគីទាំងពីរដោះស្រាយបានទាន់ពេលវេលានូវបណ្តាការលំបាក និងបញ្ហាចោទឡើងដែលកើតមានឡើង។

- ដើម្បីអនុវត្តសេចក្តីសម្រេចចិត្តលេខ ០៦-NQ/TW នាពេលខាងមុខ យោងតាមលោក តើត្រូវផ្តោតសំខាន់លើបណ្តាដំណោះស្រាយគន្លឹះណាខ្លះ?

សេចក្តីសម្រេចចិត្តលេខ ០៦-NQ/TW បានដាក់ចេញនូវបណ្តាទិសដៅធំៗ។ សំដៅរួមចំណែកនាំយកសេចក្តីសម្រេចចិត្តឱ្យឈានចូលក្នុងជីវភាពរស់នៅយ៉ាងឆាប់រហ័ស រួមចំណែកលើកកម្ពស់ប្រសិទ្ធភាពការងារកិច្ចការបរទេស យើងត្រូវតែតាមដានឱ្យបានជាប់លាប់នូវទស្សនៈដឹកនាំរបស់សមមិត្តអគ្គលេខាធិការ និងជាប្រធានរដ្ឋ នៅក្នុងសន្និសីទទូទាំងប្រទេសស្រាវជ្រាវ រៀនសូត្រ ជ្រួតជ្រាប និងអនុវត្តសេចក្តីសម្រេចចិត្តលេខ ០៦-NQ/TW ចុះថ្ងៃទី ១៩ ខែឧសភា ឆ្នាំ ២០២៦ របស់ការិយាល័យនយោបាយ និងខ្លឹមសារនៃសេចក្តីសម្រេចចិត្តដើម្បីផ្តោតលើការអនុវត្ត។

ផ្អែកលើមូលដ្ឋាននោះ មានបណ្តាក្រុមដំណោះស្រាយស្នូលដូចជា៖ កសាងជួរកម្មាភិបាលកិច្ចការបរទេសឱ្យមានភាពរឹងមាំ ភាពវៃឆ្លាតរហ័សរហួន និងមានសមត្ថភាពគ្រប់គ្រាន់; ជ្រួតជ្រាបយ៉ាងស៊ីជម្រៅថាកិច្ចការបរទេសគឺជាបុព្វហេតុរបស់បក្សទាំងមូល កងទ័ពទាំងមូល និងប្រជាជនទាំងមូល; រាល់គណៈកម្មាធិការបក្ស មូលដ្ឋាន និងសហគ្រាសទាំងអស់ សុទ្ធតែជាសហទិដ្ឋិជនចូលរួមដោយផ្ទាល់។

ចំពោះការអនុវត្តកម្មវិធីសកម្មភាពជាក់ស្តែង បណ្តាក្រសួង វិស័យ និងមូលដ្ឋាន ត្រូវតែតាក់តែងឡើងនូវផែនទីបង្ហាញផ្លូវយ៉ាងច្បាស់លាស់ ម៉ឺងម៉ាត់ជម្នះឱ្យបាននូវជំងឺរូបភាព សកម្មភាពបែបអសកម្ម ម៉ាស៊ីន ឬក៏ប្រហែសធ្វេសបាត់បង់ការប្រុងប្រយ័ត្ន។

យើងត្រូវតែផ្សារភ្ជាប់ប្រកបដោយភាពស៊ីសង្វាក់គ្នានូវបណ្តាបណ្តាញការទូត; រឹតបន្តឹងទំនាក់ទំនងរវាងកិច្ចការបរទេសរបស់បក្ស ការទូតរបស់រដ្ឋ កិច្ចការបរទេសប្រជាជន ជាមួយវិស័យការពារជាតិ និងសន្តិសុខ សំដៅកសាងខឿនការទូតគ្រប់ជ្រុងជ្រោយ បង្កើតជាកម្លាំងសរុប។ នៅក្នុងកិច្ចការបរទេសប្រជាជន ត្រូវតែលើកកម្ពស់ឱ្យបានអតិបរមានូវតួនាទីរបស់បណ្តាសមាគមមិត្តភាព។

- សូមថ្លែងអំណរគុណយ៉ាងជ្រាលជ្រៅចំពោះលោកវរសេនីយ៍ឯក Tran Van Thong!

សេចក្តីសម្រេចលេខ 79-NQ/TW៖ បញ្ជាក់តួនាទី និងពង្រីកវិសាលភាពនៃសេដ្ឋកិច្ចរដ្ឋ យុគសម័យ - លោក Nguyen Thanh Nghi ប្រធាននាយកដ្ឋានគោលនយោបាយ និងយុទ្ធសាស្ត្រនៃគណៈកម្មាធិការកណ្តាល បានសង្កត់ធ្ងន់ថា សេចក្តីសម្រេចលេខ ៧៩ របស់ការិយាល័យនយោបាយ គឺជាជំហានដ៏សំខាន់មួយក្នុងការគិតគូរ និងការយល់ដឹងខាងទ្រឹស្តីរបស់បក្សអំពីសេដ្ឋកិច្ចដែលគ្រប់គ្រងដោយរដ្ឋ។

ជំរុញកិច្ចសហប្រតិបត្តិការរវាងកងទ័ពជើងទឹកវៀតណាម និងបារាំងឲ្យកាន់តែស៊ីជម្រៅ មានប្រសិទ្ធភាព និងជាក់ស្តែង អញ្ជើញចូលរួមពិធីស្វាគមន៍មានតំណាងបញ្ជាការដ្ឋានតំបន់លេខ២ កងទ័ពជើងទឹក បញ្ជាការដ្ឋានតំបន់លេខ៣ កងឆ្មាំសមុទ្រ មន្ទីរកិច្ចការបរទេសទីក្រុងហូជីមិញ នាយកដ្ឋានកិច្ចការបរទេសនៃក្រសួងការពារប្រទេស និងបញ្ជាការដ្ឋានកងទ័ពព្រំដែនទីក្រុងហូជីមិញ។

ឌឹកអាញ់

thoidai.com.vn