ឧបនាយករដ្ឋមន្ត្រី Pham Thi Thanh Tra បានបំផុសចលនាដំណាក់កាលគំហុកប្រមូលយក ADN បើកបន្ថែមឱកាសកំណត់អត្តសញ្ញាណយុទ្ធជនពលី

ពិធីបំផុសចលនាអនុវត្តដំណាក់កាលគំហុកប្រមូលយកគំរូជីវសាស្ត្រ ADN របស់សាច់ញាតិយុទ្ធជនពលីដែលមិនទាន់កំណត់បានព័ត៌មាននៅលើទូទាំងប្រទេស គឺត្រូវបានរៀបចំឡើងដោយក្រសួងនគរបាល។ លេខាមជ្ឈិមបក្ស ឧបនាយករដ្ឋមន្ត្រី លោកស្រី Pham Thi Thanh Tra ជាប្រធានគណៈកម្មការដឹកនាំជាតិស្តីពីការស្វែងរក ប្រមូលផ្តុំ និងកំណត់អត្តសញ្ញាណអដ្ឋិធាតុយុទ្ធជនពលី បានអញ្ជើញចូលរួម និងថ្លែងមតិដឹកនាំ។

ពិធីនេះត្រូវបានរៀបចំឡើងដោយផ្ទាល់នៅចំណុចផ្សាយបន្តផ្ទាល់ក្រសួងនគរបាល (ហាណូយ) និងតភ្ជាប់តាមប្រព័ន្ធអនឡាញទៅកាន់ចំណុចផ្សាយបន្តផ្ទាល់នគរបាលនៃ ៣៤ ខេត្ត ក្រុង ព្រមទាំងចំណុចផ្សាយបន្តផ្ទាល់នគរបាលថ្នាក់ឃុំ សង្កាត់ចំនួន ៣.៣២១ កន្លែងនៅលើទូទាំងប្រទេស។

នេះគឺជាសកម្មភាពគន្លឹះមួយនៅក្នុងក្របខ័ណ្ឌយុទ្ធនាការ "៥០០ ថ្ងៃយប់ ជំរុញខ្លាំងក្លាការអនុវត្តការស្វែងរក ប្រមូលផ្តុំ និងកំណត់អត្តសញ្ញាណអដ្ឋិធាតុយុទ្ធជនពលី" សំដៅឆ្ពោះទៅរកការរំលឹកខួបលើកទី ៨០ នៃទិវាយុទ្ធជនពិការ និងយុទ្ធជនពលី (ថ្ងៃទី ២៧ ខែកក្កដា ឆ្នាំ ១៩៤៧ - ថ្ងៃទី ២៧ ខែកក្កដា ឆ្នាំ ២០២៧) ទន្ទឹមនឹងនោះ អនុវត្តផែនការលេខ ៥១-KH/ĐUCA នាថ្ងៃទី ២៤ ខែមេសា ឆ្នាំ ២០២៦ របស់គណៈកម្មាធិការបក្សនគរបាលមជ្ឈិម និងផែនការលេខ ៤៥៣/KH-BCA-C06 នាថ្ងៃទី ៨ ខែមិថុនា ឆ្នាំ ២០២៦ របស់ក្រសួងនគរបាល។

ឧបនាយករដ្ឋមន្ត្រី លោកស្រី Pham Thi Thanh Tra ថ្លែងមតិនៅក្នុងពិធីបំផុសចលនា។

ការត្រឡប់មកវិញក្រោយពេលជាងកន្លះសតវត្សរ៍

ភ្លាមៗនៅក្នុងពិធីបំផុសចលនា បណ្តាសេចក្តីជូនដំណឹងអំពីលទ្ធផលកោសល្យវិច័យ ADN ដែលត្រូវបានប្រគល់ផ្ទាល់ដល់ដៃសាច់ញាតិយុទ្ធជនពលី បានបង្កើតឡើងនូវខណៈពេលដ៏រំភើបញាប់ញ័រជាពិសេស។

ក្នុងរយៈពេលកន្លងទៅ ក្រសួងនគរបាលបានអធិបតី និងសហការជាមួយបណ្តាអង្គភាពពាក់ព័ន្ធ រៀបចំការប្រមូលយក និងប្រៀបធៀបគំរូ ADN តាមរយៈនោះ ស្វែងរកឃើញ និងទទួលស្គាល់អត្តសញ្ញាណចំពោះករណីយុទ្ធជនពលីចំនួន ២៥ រូប។

ពីលទ្ធផលប្រៀបធៀប ADN នាយកដ្ឋានជនមានគុណូបការៈ (ក្រសួងមហាផ្ទៃ) បានជូនដំណឹងអំពីលទ្ធផលកោសល្យវិច័យ ADN អដ្ឋិធាតុយុទ្ធជនពលី ចំពោះយុទ្ធជនពលី Nguyen Thien Quyet - ដែលជាអ្នកកំពុងត្រូវបានបញ្ចុះនៅក្នុងវាលកប់ខ្មោចយុទ្ធជនពលី Duc Co ខេត្ត Gia Lai។

យុទ្ធជនពលី Nguyen Thien Quyet កើតឆ្នាំ ១៩៥៣ ស្រុកកំណើត Hai Duong (ចាស់) ចូលបម្រើកងទ័ពខែកុម្ភៈ ឆ្នាំ ១៩៧១ ឋានន្តរសក្តិពលឯក ជានាយទាហាននៃអង្គភាព V104/F7, B2; បានពលីជីវិតនាថ្ងៃទី ៣ ខែកញ្ញា ឆ្នាំ ១៩៧១។

ឧបនាយករដ្ឋមន្ត្រី លោកស្រី Pham Thi Thanh Tra ប្រគល់សេចក្តីជូនដំណឹងអំពីលទ្ធផលកោសល្យវិច័យ ADN អដ្ឋិធាតុយុទ្ធជនពលី ជូនដល់សាច់ញាតិយុទ្ធជនពលី។

ទន្ទឹមនឹងនោះ មន្ទីរមហាផ្ទៃក្រុង Can Tho បានចេញសេចក្តីសម្រេចកំណត់អត្តសញ្ញាណចំពោះយុទ្ធជនពលីចំនួនពីររូប ដែលត្រូវបានបញ្ចុះនៅក្នុងវាលកប់ខ្មោចយុទ្ធជនពលី Nga Bay – Phung Hiep រួមមាន៖ យុទ្ធជនពលី Doan Van Khai កើតឆ្នាំ ១៩៥០ ស្រុកកំណើត Ninh Binh ឋានន្តរសក្តិព្រឹន្ទបាលឯក មេក្រុម អង្គភាពវរសេនាតូចតូច ៨០០ KB បានពលីជីវិតនាថ្ងៃទី ៣ ខែតុលា ឆ្នាំ ១៩៧២; និងយុទ្ធជនពលី Nguyen Trong Cat កើតឆ្នាំ ១៩៥២ ស្រុកកំណើត Thanh Hoa ឋានន្តរសក្តិអនុប្រធានកងអនុសេនាធំ អង្គភាពណាមបូ (Nam Bo) បានពលីជីវិតនាថ្ងៃទី ២០ ខែតុលា ឆ្នាំ ១៩៧២។

“នោះមិនត្រឹមតែជាសេចក្តីរីករាយដ៏ធំធេងរបស់គ្រួសារទាំង ៣ ប៉ុណ្ណោះទេ ប៉ុន្តែថែមទាំងជាសេចក្តីរីករាយរួមរបស់ប្រជាពលរដ្ឋទាំងមូល ពិសេសគឺបណ្តាអ្នកដែលបាននិងកំពុងបំពេញភារកិច្ចស្វែងរក ប្រមូលផ្តុំ និងកំណត់អត្តសញ្ញាណអដ្ឋិធាតុយុទ្ធជនពលីទាំងយប់ទាំងថ្ងៃ” ឧបនាយករដ្ឋមន្ត្រី លោកស្រី Pham Thi Thanh Tra បានចែករំលែកទាំងក្តីរំភើបញាប់ញ័រ។

យោងតាមលោកស្រីឧបនាយករដ្ឋមន្ត្រី បណ្តាលទ្ធផលដែលសម្រេចបានគឺជាភស្តុតាងដ៏រស់រវើកដែលបង្ហាញថា ទោះបីជាសង្គ្រាមបានកន្លងផុតទៅឆ្ងាយក៏ដោយ ក៏បក្ស រដ្ឋ និងប្រជាជននៅតែខិតខំប្រឹងប្រែងជានិច្ច ដើម្បីនាំបណ្តាលោកបងត្រឡប់មកវិញជាមួយក្រុមគ្រួសារ ស្រុកកំណើត និងប្រទេសជាតិ។

នាយឧត្តមសេនីយ៍ឯក Nguyen Van Long អនុរដ្ឋមន្ត្រីក្រសួងនគរបាល ប្រគល់ជូនកាដូដល់សាច់ញាតិយុទ្ធជនពលី។

ការអនុវត្តបច្ចេកវិទ្យាដើម្បីប្រណាំងប្រជែងនឹងពេលវេលា

លោកស្រីឧបនាយករដ្ឋមន្ត្រីបានកត់សម្គាល់ និងវាយតម្លៃខ្ពស់ចំពោះស្មារតីទទួលខុសត្រូវ ភាពច្នៃប្រឌិត និងការប្តេជ្ញាចិត្តរបស់ក្រសួងនគរបាល នៅក្នុងការម្ចាស់ការស្រាវជ្រាវ កសាង និងអនុវត្តបណ្តាដំណោះស្រាយអនុវត្តបច្ចេកវិទ្យាទំនើប ក្នុងនោះមានការប្រមូលយក វិភាគ និងកសាងមូលដ្ឋានទិន្នន័យ ADN។

ក្នុងរយៈពេលកន្លងទៅ ក្រសួងនគរបាលបានអធិបតី និងសហការជាមួយបណ្តាអង្គភាពអនុវត្តការងារប្រមូលយក ប្រៀបធៀប វិភាគ និងធ្វើសមកាលកម្មទិន្នន័យ ADN របស់សាច់ញាតិយុទ្ធជនពលីដែលមិនទាន់កំណត់បានព័ត៌មានជាង ៥៣.០០០ ទិន្នន័យ ចូលក្នុងមូលដ្ឋានទិន្នន័យ តាមរយៈនោះ កំណត់ និងទទួលស្គាល់អត្តសញ្ញាណសម្រាប់យុទ្ធជនពលីចំនួន ២៥ រូប ដែលមិនទាន់កំណត់បានព័ត៌មាន រួមចំណែកលើកកម្ពស់ប្រសិទ្ធភាពនៃការកំណត់អត្តសញ្ញាណយុទ្ធជនពលី។

លោកស្រីឧបនាយករដ្ឋមន្ត្រីក៏បានសរសើរមិនចំពោះការសម្របសម្រួលគ្នាយ៉ាងជិតស្និទ្ធ និងបណ្តាការខិតខំប្រឹងប្រែងរបស់ក្រសួងការពារជាតិ ក្រសួងមហាផ្ទៃ វិទ្យាស្ថានបណ្ឌិតសភាវិទ្យាសាស្ត្រ និងបច្ចេកវិទ្យាវៀតណាម រួមជាមួយគណៈកម្មាធិការបក្ស និងអាជ្ញាធរមូលដ្ឋាននានា នៅក្នុងការរៀបចំអនុវត្តភារកិច្ចដែលមានអត្ថន័យដ៏ពិសិដ្ឋជាពិសេសនេះ។

ដោយបានបញ្ជាក់យ៉ាងមុតមាំថា យុទ្ធនាការ “៥០០ ថ្ងៃយប់” កំពុងឈានចូលដំណាក់កាលមានលក្ខណៈសម្រេច លោកស្រីឧបនាយករដ្ឋមន្ត្រីមានប្រសាសន៍យល់ឃើញថា ភារកិច្ចនៅចំពោះមុខគឺនៅតែមានទំហំធំធេងណាស់។

នាពេលបច្ចុប្បន្ន នៅទូទាំងប្រទេសនៅមានយុទ្ធជនពលីជាង ១៧៥.០០០ រូប មិនទាន់ស្វែងរកឃើញអដ្ឋិធាតុ និងមានផ្នូរយុទ្ធជនពលីជាង ៣០០.០០០ ផ្នូរ នៅខ្វះព័ត៌មាន។ នេះគឺជាក្តីកង្វល់ដ៏ធំធេងរបស់ប្រព័ន្ធនយោបាយទាំងមូល និងប្រជាពលរដ្ឋទាំងមូល។

“ការងារដ៏ពិសិដ្ឋនេះកំពុងជម្រុញចិត្តយើង៖ ទាំងជាការទទួលខុសត្រូវចំពោះមុខប្រវត្តិសាស្ត្រ ទាំងជាភាពបន្ទាន់ប្រណាំងប្រជែងនឹងពេលវេលា” លោកស្រីឧបនាយករដ្ឋមន្ត្រីបានបញ្ជាក់យ៉ាងមុតមាំ។

ពីព្រោះសាច់ញាតិផ្ទាល់ជាច្រើនរូបរបស់យុទ្ធជនពលី នាពេលបច្ចុប្បន្ននេះមានអាយុកាលកាន់តែខ្ពស់ និងកម្លាំងខ្សោយទៅហើយ; មនុស្សជាច្រើនបាននាំយកនូវបំណងប្រាថ្នាចង់ស្វែងរកសាច់ញាតិឡើងវិញទៅតាមខ្លួនពេញមួយជីវិតរបស់ពួកគេ។ រាល់ថ្ងៃដែលកន្លងផុតទៅ គឺបន្ថែមឱកាសមួយដែលអាចនឹងបាត់បង់ទៅ និងបន្ថែមចន្លោះប្រហោងប្រវត្តិសាស្ត្រមួយដែលត្រូវការបំពេញបង្គ្រប់។

ក្នុងពេលជាមួយគ្នានោះ ការកំណត់អត្តសញ្ញាណអដ្ឋិធាតុយុទ្ធជនពលី ពិសេសគឺបណ្តាករណីដែលនៅខ្វះព័ត៌មាន គឺទាមទារឱ្យមានរបៀបធ្វើការងារប្រកបដោយលក្ខណៈបែបបទ វិទ្យាសាស្ត្រ សមកាលកម្ម យូរអង្វែង និងមានការប្តេជ្ញាចិត្តប្រកបដោយភាពអត់ធ្មត់ និងប្តូរផ្តាច់។ ហេតុដូច្នេះ ការប្រមូលយកគំរូជីវសាស្ត្រ ADN របស់សាច់ញាតិយុទ្ធជនពលី ដើរតួនាទីយ៉ាងមានសារៈសំខាន់ណាស់។

ឧបនាយករដ្ឋមន្ត្រី លោកស្រី Pham Thi Thanh Tra លើកទឹកចិត្ត និងសួរសុខទុក្ខសាច់ញាតិយុទ្ធជនពលី។

ឧបនាយករដ្ឋមន្ត្រី លោកស្រី Pham Thi Thanh Tra លើកទឹកចិត្ត និងសួរសុខទុក្ខសាច់ញាតិយុទ្ធជនពលី។

កៀរគរកម្លាំងខ្លាំងក្លារបស់ទូទាំងសង្គមសម្រាប់ដំណើរការដឹងគុណ

លោកស្រីឧបនាយករដ្ឋមន្ត្រីបានស្នើឱ្យបណ្តាក្រសួង ស្ថាប័ន និងមូលដ្ឋាននានា ចាត់ទុកនេះជាភារកិច្ចនយោបាយមានលក្ខណៈសំខាន់ជាពិសេស; ផ្ដោតអារម្មណ៍លើគ្រប់ប្រភពធនធាន ជំរុញល្បឿននៃការប្រមូលយក និងកំណត់អត្តសញ្ញាណអដ្ឋិធាតុយុទ្ធជនពលី មិនទុកឱ្យមានការយឺតយ៉ាវធ្វើឱ្យបាត់បង់ទៅនូវបណ្តាឱកាសដ៏មានតម្លៃដែលនៅសេសសល់នោះឡើយ។

គណៈឃោសនាអប់រំ និងគណៈចលនាមហាជនមជ្ឈិម ដឹកនាំបន្តជំរុញខ្លាំងក្លានូវការងារផ្សព្វផ្សាយព័ត៌មាន ធ្វើឱ្យលេចធ្លោឡើងនូវអត្ថន័យនយោបាយ ប្រវត្តិសាស្ត្រ និងមនុស្សសាស្ត្រដ៏ស៊ីជម្រៅ អំពីការស្វែងរក ប្រមូលផ្តុំ កំណត់អត្តសញ្ញាណអដ្ឋិធាតុយុទ្ធជនពលី សំដៅលើកកម្ពស់កម្លាំងសរុបរបស់ប្រព័ន្ធនយោបាយ និងទូទាំងសង្គម ប្រជាពលរដ្ឋទាំងមូល អប់រំប្រពៃណីស្នេហាជាតិបដិវត្តន៍ ពិសេសគឺចំពោះជំនាន់វ័យក្មេង លើកកម្ពស់ស្មារតី "ផឹកទឹកនឹកដល់ប្រភព" "តបស្នងសងគុណ" ឱ្យក្លាយជាតម្លៃវប្បធម៌ប្រកបដោយចីរភាព និងជាការទទួលខុសត្រូវនៅក្នុងជីវភាពរស់នៅសង្គម តាមរយៈនោះ ដាស់តឿននូវបំណងប្រាថ្នាចង់លះបង់ដើម្បីអភិវឌ្ឍន៍ប្រទេសជាតិនៅក្នុងយុគសម័យថ្មី។

បណ្តាប្រតិភូអញ្ជើញចូលរួមក្នុងពិធីបំផុសចលនា។

ក្រសួងនគរបាលបន្តលើកកម្ពស់តួនាទីស្នូល អធិបតីរៀបចំការអនុវត្តការប្រមូលយក វិភាគ កសាង និងគ្រប់គ្រងមូលដ្ឋានទិន្នន័យ ADN របស់សាច់ញាតិយុទ្ធជនពលី; ធានាលក្ខណៈវិទ្យាសាស្ត្រ ភាពត្រឹមត្រូវ សុវត្ថិភាព និងការសម្ងាត់ព័ត៌មាន; ស្រាវជ្រាវ និងស្នើបំពេញបន្ថែមនូវលក្ខខណ្ឌបរិក្ខារសម្ភារៈទំនើបៗ ដើម្បីអនុវត្តប្រកបដោយសមកាលកម្ម និងបន្ទាន់ទាន់ពេលវេលានូវបរិមាណការងារដ៏ធំធេងណាស់ ដោយទទួលបានលទ្ធផលខ្ពស់បំផុត។

ក្រសួងការពារជាតិ ក្រសួងមហាផ្ទៃ វិទ្យាស្ថានបណ្ឌិតសភាវិទ្យាសាស្ត្រ និងបច្ចេកវិទ្យាវៀតណាម ព្រមទាំងគណៈកម្មាធិការបក្ស និងអាជ្ញាធរមូលដ្ឋានគ្រប់លំដាប់ថ្នាក់ បន្ទាន់ជំរុញខ្លាំងក្លានូវការងារកោសល្យវិច័យគំរូជីវសាស្ត្រអដ្ឋិធាតុយុទ្ធជនពលីដែលមិនទាន់កំណត់បានព័ត៌មាន; ទន្ទឹមនឹងនោះ សម្របសម្រួលគ្នាយ៉ាងជិតស្និទ្ធជាមួយក្រសួងនគរបាលនៅក្នុងការតភ្ជាប់ និងចែករំលែកទិន្នន័យ ដើម្បីអនុវត្តការប្រៀបធៀប និងផ្ទៀងផ្ទាត់បម្រើដល់ការកំណត់អត្តសញ្ញាណអដ្ឋិធាតុយុទ្ធជនពលី។

វិទ្យាស្ថានបណ្ឌិតសភាវិទ្យាសាស្ត្រ និងបច្ចេកវិទ្យាវៀតណាម បន្តជំរុញល្បឿននៃការស្រាវជ្រាវ និងអនុវត្តបណ្តាបច្ចេកវិទ្យាថ្មីៗនៅក្នុងការកោសល្យវិច័យ ADN; បង្កើនការផ្ទេរប្រគល់បច្ចេកវិទ្យា រួមចំណែកលើកកម្ពស់សមត្ថភាពកំណត់អត្តសញ្ញាណអដ្ឋិធាតុយុទ្ធជនពលី។

លោកស្រីឧបនាយករដ្ឋមន្ត្រីបានតម្រូវឱ្យគណៈកម្មាធិការបក្ស និងអាជ្ញាធរមូលដ្ឋានគ្រប់លំដាប់ថ្នាក់ ត្រូវជំរុញខ្លាំងក្លានូវការងារឃោសនា និងចលនាសាច់ញាតិយុទ្ធជនពលីចូលរួមផ្តល់ព័ត៌មាន និងយកគំរូជីវសាស្ត្រ; កៀរគរឱ្យបានជាអតិបរមានូវគ្រប់ប្រភពធនធានពីថវិកាមូលដ្ឋាន និងការធ្វើសង្គមភាវូបនីយកម្ម ដើម្បីផ្ដោតអារម្មណ៍រៀបចំការអនុវត្តប្រកបដោយប្រសិទ្ធភាពនូវគោលដៅ និងសូចនាករជាក់លាក់នៃយុទ្ធនាការ "៥០០ ថ្ងៃយប់" ដែលនោះគឺជាលទ្ធផលបង្ហាញយ៉ាងស៊ីជម្រៅបំផុតនូវទឹកចិត្តដឹងគុណចំពោះបណ្តាអ្នកដែលបានលះបង់បូជាពេញមួយវ័យយុវវ័យ សាច់ស្រស់ឈាមស្រស់ ដើម្បីឯករាជ្យ និងសេរីភាពនៃប្រទេសជាតិ។

សកម្មភាពប្រមូលយកគំរូជីវសាស្ត្រ ADN សម្រាប់សាច់ញាតិយុទ្ធជនពលីដែលមិនទាន់កំណត់បានព័ត៌មាន។

ដោយបានបំផុសចលនាដំណាក់កាលគំហុក លោកស្រីឧបនាយករដ្ឋមន្ត្រី Pham Thi Thanh Tra បានអំពាវនាវដល់បណ្តាក្រសួង ស្ថាប័ន មូលដ្ឋាន អង្គការ សហគ្រាស និងប្រជាពលរដ្ឋនៅលើទូទាំងប្រទេស ចូលរួមឆ្លើយតបយ៉ាងសកម្ម និងរួមដៃគ្នាអនុវត្តឱ្យបានជោគជ័យនូវភារកិច្ចដ៏ពិសិដ្ឋនេះ។

“យើងទាំងអស់គ្នា ចូរធ្វើសកម្មភាពដោយស្មារតីទទួលខុសត្រូវ ទឹកចិត្តដឹងគុណ និងការប្តេជ្ញាចិត្តខ្ពស់បំផុតចំពោះបណ្តាអ្នកដែលបានពលីជីវិតដើម្បីមាតុភូមិ” លោកស្រីឧបនាយករដ្ឋមន្ត្រីបានបញ្ជាក់យ៉ាងមុតមាំ។

សកម្មភាពប្រមូលយកគំរូជីវសាស្ត្រ ADN សម្រាប់សាច់ញាតិយុទ្ធជនពលីដែលមិនទាន់កំណត់បានព័ត៌មាន។

ភ្លាមៗបន្ទាប់ពីពិធីបំផុសចលនា លោកស្រីឧបនាយករដ្ឋមន្ត្រី Pham Thi Thanh Tra រួមជាមួយបណ្តាប្រតិភូ បានអញ្ជើញផ្ទាល់ទៅពិនិត្យមើលសកម្មភាពប្រមូលយកគំរូជីវសាស្ត្រ ADN សម្រាប់សាច់ញាតិយុទ្ធជនពលីដែលមិនទាន់កំណត់បានព័ត៌មាននៅលើភូមិសាស្ត្រទីក្រុងហាណូយ។

ទន្ទឹមនឹងសកម្មភាពយកគំរូ ADN កម្មវិធីក៏បានអនុវត្តការពិនិត្យជំងឺ ថែទាំសុខភាព និងផ្តល់ចែកថ្នាំពេទ្យជូនដល់សាច់ញាតិយុទ្ធជនពលី ដែលបន្តផ្សព្វផ្សាយឲ្យបានទូលំទូលាយនូវអត្ថន័យមនុស្សសាស្ត្រនៃដំណើរស្វែងរកអត្តសញ្ញាណឡើងវិញសម្រាប់បណ្តាអ្នកដែលបានលះបង់បូជាពេញមួយវ័យយុវវ័យ ដើម្បីឯករាជ្យ និងសេរីភាពនៃមាតុភូមិ៕

នីតិវិធីសម្របសម្រួលកំណត់អត្តសញ្ញាណអដ្ឋិធាតុយុទ្ធជនពលីដែលខ្វះខាតព័ត៌មាន តាមរយៈវិធីសាស្ត្រធ្វើកោសល្យវិច័យ ADN យុគសម័យ - ឧបនាយករដ្ឋមន្ត្រី លោកស្រី Pham Thi Thanh Tra - ប្រធានគណៈកម្មាធិការដឹកនាំជាតិស្តីពីការស្វែងរក ប្រមូលផ្តុំ និងកំណត់អត្តសញ្ញាណអដ្ឋិធាតុយុទ្ធជនពលី ទើបតែបានចុះហត្ថលេខាលើសេចក្តីសម្រេចលេខ 51/QD-BCCDQG ដាក់ឱ្យអនុវត្តនូវ នីតិវិធីសម្របសម្រួលកំណត់អត្តសញ្ញាណអដ្ឋិធាតុយុទ្ធជនពលីដែលខ្វះខាតព័ត៌មាន តាមរយៈវិធីសាស្ត្រធ្វើកោសល្យវិច័យ ADN និងបែងចែកភូមិសាស្ត្រទទួល ធ្វើកោសល្យវិច័យ ADN លើគំរូអដ្ឋិធាតុយុទ្ធជនពលី។

ខេត្ត Hung Yen ជម្រុញខ្លាំងក្លាការយកសំណាក ADN អដ្ឋិធាតុយុទ្ធជនពលីមុនពិធីបុណ្យចូលឆ្នាំថ្មីប្រពៃណីជាតិ ឆ្នាំ ២០២៧ យុគសម័យ - ខេត្ត Hung Yen កំពុងជម្រុញខ្លាំងក្លាការដាក់ពង្រឹងអនុវត្ត «យុទ្ធនាការ ៥០០ ថ្ងៃយប់» អំពីការស្វែងរក ការប្រមូលផ្តុំ ព្រមទាំងការកំណត់អត្តសញ្ញាណអដ្ឋិធាតុយុទ្ធជនពលីដែលមិនទាន់ច្បាស់លាស់ព័ត៌មាន ក្នុងនោះតម្រូវឱ្យបំពេញរួចរាល់ការយកសំណាក ADN ចំពោះសាកសពផ្នូរយុទ្ធជនពលីដែលមិនទាន់កំណត់បានអត្តសញ្ញាណមុនពិធីបុណ្យចូលឆ្នាំថ្មីប្រពៃណីជាតិ ឆ្នាំ ២០២៧ សំដៅបម្រើឱ្យការងារធ្វើកោសល្យវិច័យ ព្រមទាំងប្រគល់ឈ្មោះត្រឡប់ជូនបណ្ដាវីរយុទ្ធជនពលីវិញ។

ឌឹកអាញ់

thoidai.com.vn