យុគសម័យ - អនុវត្តយុទ្ធនាការ «៥០០ ថ្ងៃយប់ជំរុញខ្លាំងការស្វែងរក ប្រមូលផ្តុំ និងកំណត់អត្តសញ្ញាណអដ្ឋិធាតុយុទ្ធជនពលី» ខេត្តដុងថាប់កំពុងដាក់ពង្រាយការយកសំណាក និងប្រគល់សំណាកអដ្ឋិធាតុយុទ្ធជនពលី ដើម្បីបម្រើដល់ការធ្វើកោសល្យវិច័យ ADN។ តាមផែនការ ផ្នូរយុទ្ធជនពលីជាង ២១.០០០ ផ្នូរដែលមិនទាន់កំណត់អត្តសញ្ញាណបាន ឬខ្វះព័ត៌មាននៅលើភូមិសាស្ត្រខេត្ត នឹងត្រូវយកសំណាក សំដៅឈានទៅរកការកំណត់អត្តសញ្ញាណជាជំហានៗ ឆ្លើយតបទៅនឹងបំណងប្រាថ្នារបស់សាច់ញាតិ និងគ្រួសារយុទ្ធជនពលី។
 |
| អដ្ឋិធាតុយុទ្ធជនពលីជាង ២១.០០០ នាក់នៅខេត្តដុងថាប់ នឹងត្រូវយកសំណាក ADN |
ដាក់ពង្រាយសាកល្បងនៅវាលកប់ខ្មោចយុទ្ធជនពលី ចូវថាញ់
បណ្តាថ្ងៃកន្លងមកនេះ នៅវាលកប់ខ្មោចយុទ្ធជនពលី ចូវថាញ់ (ឃុំភូហ៊ីវ ខេត្តដុងថាប់) បណ្តាកម្លាំងមានសមត្ថកិច្ចនៃខេត្តដុងថាប់ កំពុងប្រញាប់ប្រញាល់អនុវត្តការងារគាស់កកាយ យកសំណាក និងប្រគល់សំណាកអដ្ឋិធាតុយុទ្ធជនពលី ត្រឹមត្រូវតាមដំណើរការជំនាញ។ ចាប់តាំងពីព្រលឹមស្រាងៗ បណ្តាសមាជិកនៃក្រុមយកសំណាកបានមានវត្តមាននៅទីតាំងផ្ទាល់ ដើម្បីដាក់ពង្រាយភារកិច្ច។ ដំណើរការទាំងមូលត្រូវបានអនុវត្តជាលក្ខណៈបិទជិត ចាប់តាំងពីការគាស់កកាយ យកសំណាក ធ្វើឌីជីថលនីយកម្មទិន្នន័យ ការគ្រប់គ្រង ការថែរក្សាសំណាក រហូតដល់ការប្រគល់ត្រឡប់មកវិញនូវស្ថានភាពដើមនៃផ្នូរ បន្ទាប់ពីបានបំពេញរួចរាល់។
វាលកប់ខ្មោចយុទ្ធជនពលី ចូវថាញ់ ត្រូវបានជ្រើសរើសធ្វើជាទីតាំងសាកល្បង សំដៅវាយតម្លៃ បំពេញបង្គ្រប់ដំណើរការ មុនពេលដាក់ពង្រាយជាលក្ខណៈព្រមគ្នានៅលើទូទាំងទំហំខេត្ត។ នៅទីនេះ បច្ចុប្បន្នមានផ្នូររាប់រយដែលគ្រាន់តែសរសេរជួរអក្សរ «មិនទាន់កំណត់បានព័ត៌មាន» ដែលឆ្លុះបញ្ចាំងពីការព្រួយបារម្ភអូសបន្លាយជាច្រើនឆ្នាំ នៅក្នុងការងារកំណត់អត្តសញ្ញាណយុទ្ធជនពលី។
លោកវរសេនីយ៍ទោ Nguyen Tuan Anh អនុប្រធាននយោបាយនៃបញ្ជាការដ្ឋានយោធាខេត្តដុងថាប់ បានឱ្យដឹងថា អង្គភាពបានជម្រុញការគាស់កកាយ និងយកសំណាកចំពោះផ្នូរយុទ្ធជនពលីចំនួន ៤៤២ ផ្នូរដែលមិនទាន់កំណត់បានព័ត៌មាន នៅវាលកប់ខ្មោចយុទ្ធជនពលី ចូវថាញ់។ បន្ទាប់ពីបំពេញរួចរាល់ដំណាក់កាលសាកល្បង បណ្តាអង្គភាពនឹងរៀបចំការវាយតម្លៃ ដកពិសោធន៍ ដើម្បីដាក់ពង្រាយនៅលើទ្រង់ទ្រាយធំ នៅតាមវាលកប់ខ្មោចយុទ្ធជនពលីផ្សេងៗទៀតនៅក្នុងខេត្ត។
ឆ្លងកាត់រយៈពេលជិតមួយសប្តាហ៍នៃការអនុវត្ត កម្លាំងមានសមត្ថកិច្ចយកបានសំណាកអដ្ឋិធាតុយុទ្ធជនពលីដែលមិនទាន់កំណត់ព័ត៌មានបានជាង ៧០ សំណាក ហើយរំពឹងទុកថានឹងបន្តដាក់ពង្រាយរហូតដល់ដាច់ខែមិថុនា ឆ្នាំ ២០២៦។ ព័ត៌មានទាំងអស់អំពីផ្នូរ និងសំណាកអដ្ឋិធាតុ សុទ្ធតែត្រូវបានធ្វើឌីជីថលនីយកម្ម និងធ្វើបច្ចុប្បន្នភាពចូលទៅក្នុងប្រព័ន្ធទិន្នន័យ ដើម្បីបម្រើដល់ការងារគ្រប់គ្រង ការផ្ទៀងផ្ទាត់ និងការកំណត់អត្តសញ្ញាណនាពេលខាងមុខ។
កិច្ចខិតខំប្រឹងប្រែងអនុវត្តភារកិច្ចដឹងគុណ
ដើម្បីធានាបាននូវវឌ្ឍនភាព និងគុណភាពការងារ គណៈកម្មការដឹកនាំ ៥១៥ ខេត្តដុងថាប់ បានបង្កើតក្រុមយកសំណាកអដ្ឋិធាតុយុទ្ធជនពលី រួមជាមួយបណ្តាក្រុមជំនាញទទួលបន្ទុកអនុវត្តភារកិច្ចនានា ចាប់តាំងពីការគាស់កកាយ យកសំណាក ធ្វើឌីជីថលនីយកម្មទិន្នន័យ ការធានាសន្តិសុខ ភស្តុភារ ការដឹកជញ្ជូន រហូតដល់ការឃោសនាផ្សព្វផ្សាយ និងការរៀបចំពិធីការ។
បើតាមលោកអនុសេនីយ៍ឯក Nguyen Nhat Minh ជំនួយការផ្នែកកងវិស្វកម្ម បន្ទប់សេនាធិការ នៃបញ្ជាការដ្ឋានយោធាខេត្តដុងថាប់ ផ្នូរទាំងឡាយនៅតាមវាលកប់ខ្មោចមានរចនាសម្ព័ន្ធខុសៗគ្នា ហេតុនេះកម្លាំងអនុវត្តត្រូវតែស្រាវជ្រាវឱ្យបានហ្មត់ចត់នូវផែនការគាស់កកាយ ដើម្បីធានាបាននូវប្រសិទ្ធភាព និងមិនប៉ះពាល់ដល់បណ្តាផ្នូរដែលនៅជុំវិញ។ បន្ទាប់ពីយកសំណាករួច អដ្ឋិធាតុយុទ្ធជនពលីត្រូវបានប្រគល់ត្រឡប់មកវិញ និងកសាងផ្នូរឡើងវិញដូចស្ថានភាពដើមដំបូង ដើម្បីធានាសោភ័ណភាព និងភាពហ្មត់ចត់នៃវាលកប់ខ្មោច។
លោកអនុសេនីយ៍ឯក Nguyen Nhat Minh បានចែករំលែកថា៖ «នេះជាលើកដំបូងបង្អស់ដែលអង្គភាពចូលរួមក្នុងយុទ្ធនាការ "៥០០ ថ្ងៃយប់ជំរុញខ្លាំងការស្វែងរក ប្រមូលផ្តុំ និងកំណត់អត្តសញ្ញាណអដ្ឋិធាតុយុទ្ធជនពលី"។ ទោះបីជាជួបការលំបាកជាច្រើន ប៉ុន្តែបណ្តាសមាជិកតែងតែខិតខំប្រឹងប្រែងស្រាវជ្រាវ រៀនសូត្រ ដើម្បីបំពេញបានយ៉ាងល្អនូវភារកិច្ចដែលត្រូវបានប្រគល់ជូន»។
នៅក្នុងកម្លាំងចូលរួមយុទ្ធនាការនេះ មានយុទ្ធជនវ័យក្មេងជាច្រើននាក់ដែលកំពុងអនុវត្តកាតព្វកិច្ចយោធា។ លោកព្រឹន្ទបាលឯក Ngo Minh Hien យុទ្ធជននៃវរសេនាធំធំ BB320 បានឱ្យដឹងថា ការចូលរួមគាស់កកាយ និងកសាងផ្នូរឡើងវិញ ជំនួយឱ្យរូបលោកមានអារម្មណ៍កាន់តែជ្រាលជ្រៅចំពោះការលះបង់ដ៏ធំធេងរបស់បណ្តាវីរយុទ្ធជនពលី ពីនោះលើកកម្ពស់ស្មារតីទទួលខុសត្រូវចំពោះភារកិច្ចដែលត្រូវបានប្រគល់ជូន។
ចំណែកឯចំពោះលោកព្រឹន្ទបាលទោ Le Dai Phat នេះគឺជាបទពិសោធន៍មួយក្នុងចំណោមបទពិសោធន៍ដែលគួរឱ្យចងចាំបំផុតនៅក្នុងអំឡុងពេលនៅក្នុងជួរកងទ័ព។ លោកចាត់ទុកថា ការងារស្វែងរក និងកំណត់អត្តសញ្ញាណអដ្ឋិធាតុយុទ្ធជនពលី គឺជាភារកិច្ចដ៏ពិសិដ្ឋ ដែលបង្ហាញពីសីលធម៌ដឹងគុណរបស់ប្រជាជាតិចំពោះអស់អ្នកដែលបានលះបង់ដើម្បីមាតុភូមិ។
ផ្នូរជាង ២១.០០០ ផ្នូរនឹងត្រូវយកសំណាក ADN
តាមផែនការរបស់គណៈកម្មការដឹកនាំ ៥១៥ ខេត្តដុងថាប់ ចាប់ពីពេលនេះរហូតដល់ថ្ងៃទី ២៧ ខែកក្កដា ឆ្នាំ ២០២៧ ខេត្តនឹងបំពេញរួចរាល់ការយកសំណាក និងប្រគល់សំណាកចំពោះផ្នូរយុទ្ធជនពលីចំនួន ១១.៨១០ ផ្នូរដែលមិនទាន់កំណត់បានព័ត៌មាន នៅតាមវាលកប់ខ្មោចយុទ្ធជនពលីនៅលើភូមិសាស្ត្រ ទន្ទឹមនឹងនោះយកសំណាកចំពោះបណ្តាអដ្ឋិធាតុយុទ្ធជនពលីដែលទើបតែត្រូវបានស្វែងរក និងប្រមូលផ្តុំ។
ដំណាក់កាលចាប់ពីខែកក្កដា ឆ្នាំ ២០២៧ រហូតដល់ដាច់ឆ្នាំ ២០៣០ ខេត្តដុងថាប់បន្តយកសំណាកចំពោះផ្នូរយុទ្ធជនពលីចំនួន ៩.៣៤៦ ផ្នូរដែលនៅខ្វះព័ត៌មាន ឬមានព័ត៌មានខ្លះប៉ុន្តែមិនទាន់អាចកំណត់អត្តសញ្ញាណបានដោយវិធីសាស្ត្រផ្ទៀងផ្ទាត់ជាក់ស្តែង។ ដូចនេះ ចំនួនសរុបនៃផ្នូរយុទ្ធជនពលីដែលរំពឹងទុកថានឹងត្រូវយកសំណាក ADN នៅក្នុងភូមិសាស្ត្រខេត្ត គឺលើសពី ២១.០០០ ករណី។
ទន្ទឹមនឹងការងារយកសំណាក ខេត្តនឹងបំពេញរួចរាល់ការធ្វើឌីជីថលនីយកម្ម និងធ្វើបច្ចុប្បន្នភាពទិន្នន័យពាក់ព័ន្ធទាំងអស់ចូលទៅក្នុងកម្មវិធីគ្រប់គ្រងព័ត៌មានសំណាកអដ្ឋិធាតុយុទ្ធជនពលី ក៏ដូចជាមូលដ្ឋានទិន្នន័យជាតិស្តីពីអ្នកមានគុណូបការៈចំពោះបដិវត្តន៍។
លោកវរសេនីយ៍ទោ Nguyen Tuan Anh បានឱ្យដឹងថា ដំណើរការអនុវត្តត្រូវបានជម្រុញទៅមុខត្រឹមត្រូវតាមដំណើរការលេខ ១ របស់នាយកដ្ឋានយោធទោ បកស្រាយឱ្យឃើញពីគោលការណ៍មិនភាន់ច្រឡំរវាងបណ្តាសំណាក និងមិនបណ្តាលឱ្យមានការឆ្លងមេរោគកាត់ ADN ឡើយ។ បណ្តាអង្គភាពចូលរួមត្រូវតែធានាសុវត្ថិភាពដាច់ខាតអំពីមនុស្ស មធ្យោបាយ គ្រឿងបរិក្ខារបច្ចេកទេស ទន្ទឹមនឹងនោះស្តារស្ថានភាពដើមនៃបណ្តាផ្នូរឡើងវិញ បន្ទាប់ពីបំពេញរួចរាល់ការយកសំណាក។
ការដាក់ពង្រាយយកសំណាក ADN នៅក្នុងទ្រង់ទ្រាយធំ មិនត្រឹមតែរួមចំណែកលើកកម្ពស់ប្រសិទ្ធភាពការងារកំណត់អត្តសញ្ញាណយុទ្ធជនពលីប៉ុណ្ណោះទេ ប៉ុន្តែថែមទាំងបង្ហាញពីការដឹងគុណយ៉ាងជ្រាលជ្រៅរបស់បក្ស រដ្ឋ និងប្រជាជនចំពោះអស់អ្នកដែលបានលះបង់ដើម្បីឯករាជ្យ សេរីភាពរបស់មាតុភូមិ។ សំណាក ADN នីមួយៗដែលយកបានដោយជោគជ័យ នឹងបើកបន្ថែមឱកាសដើម្បីឱ្យបណ្តាគ្រួសារយុទ្ធជនពលីស្វែងរកឃើញព័ត៌មានសាច់ញាតិ បន្ទាប់ពីការទន្ទឹងរង់ចាំជាច្រើនឆ្នាំ រួមចំណែកធ្វើឱ្យស្បើយនូវបណ្តាចន្លោះប្រហោងដែលនៅសេសសល់នៅក្នុងប្រវត្តិសាស្ត្រ និងនៅក្នុងគ្រួសារវៀតណាមនីមួយៗ៕
 ខេត្ត Dak Lak (វៀតណាម) ជួបពិភាក្សាជាមួយខេត្តមណ្ឌលគិរីស្ដីពីការធ្វើមាតុភូមិនិវត្តន៍អដ្ឋិធាតុយុទ្ធជនពលីចំនួន ២១ រូប នាថ្ងៃទី ២៨ ខែមេសា នៅខេត្តមណ្ឌលគិរី ប្រទេសកម្ពុជា គណៈកម្មការដឹកនាំលេខ ៥១៥ ខេត្ត Dak Lak (វៀតណាម) និងគណៈកម្មការជំនាញខេត្តមណ្ឌលគិរី (កម្ពុជា) បានជួបពិភាក្សាស្ដីពីការទទួល និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងអ្នកជំនាញវៀតណាមដែលពលីជីវិតកាលពីសម័យសង្គ្រាមនៅកម្ពុជានៅរដូវប្រាំង ២០២២-២០២៣។ |
 ខេត្ត Lang Son អនុវត្តកម្មវិធីឌីជីថលព្រំដែនឌីជីថលចាប់ពីថ្ងៃទី ២១ ខែកុម្ភៈ យុគសម័យ - ចាប់ពីថ្ងៃទី ២១ ខែកុម្ភៈ ខេត្ត Lang Son នឹងមិនទទួលយក និងដោះស្រាយសំរាប់សហគ្រាសនាំចេញដែលមិនប្រកាសតាមអ៊ីនធឺណិតលើច្រកព្រំដែនឌីជីថលឡើយ។ នេះជាសំណើរបស់ប្រធានគណៈកម្មាធិការប្រជាជនខេត្ត Lang Son លោក Ho Tien Thieu ក្នុងសេចក្តីជូនដំណឹងថ្មីលេខ ៩១/TB-UBND។ |
thoidai.com.vn
មតិពីមិត្តអ្នកអាន