ចំណុចថ្មីៗនៃអនុក្រឹត្យលេខ ២០០/២០២៦/NĐ-CP ដែលសហគ្រាសបោះផ្សាយសញ្ញាបណ្ណត្រូវយកចិត្តទុកដាក់

ចំណុចថ្មីៗនៃអនុក្រឹត្យលេខ ២០០/២០២៦/NĐ-CP ដែលសហគ្រាសបោះផ្សាយសញ្ញាបណ្ណត្រូវយកចិត្តទុកដាក់

នាថ្ងៃទី ៥ ខែមិថុនា ឆ្នាំ ២០២៦ រដ្ឋាភិបាលបានប្រកាសដាក់ឱ្យប្រើប្រាស់នូវអនុក្រឹត្យលេខ ២០០/២០២៦/NĐ-CP ដែលចែងអំពីការផ្តល់ជូនលក់សញ្ញាបណ្ណសាជីវកម្មជាលក្ខណៈបុគ្គលនៅក្នុងទីផ្សារក្នុងស្រុក និងការផ្តល់ជូនលក់សញ្ញាបណ្ណសាជីវកម្មទៅកាន់ទីផ្សារអន្តរជាតិ (ជំនួសឱ្យអនុក្រឹត្យលេខ ១៥៣/២០២០/NĐ-CP, អនុក្រឹត្យលេខ ៦៥/២០២២/NĐ-CP និងអនុក្រឹត្យលេខ ០៨/២០២៣/NĐ-CP)។

អនុក្រឹត្យនេះត្រូវបានប្រកាសដាក់ឱ្យប្រើប្រាស់ ក្នុងគោលបំណងបង្កើនភាពសុក្រឹតនៃក្របខ័ណ្ឌគតិយុត្ត សម្រាប់ការសកម្មភាពបោះផ្សាយសញ្ញាបណ្ណសាជីវកម្មជាលក្ខណៈបុគ្គល; ដោះស្រាយរាល់ការលំបាក និងចំណុចខ្វះខាតដែលកើតមានឡើងក្នុងជាក់ស្តែង; បង្កើនភាពចំហ និងតម្លាភាពនៃទីផ្សារ; លើកកម្ពស់សក្តានុពល និងប្រសិទ្ធភាពនៃកិច្ចការគ្រប់គ្រង និងត្រួតពិនិត្យ; ការពារសិទ្ធិ និងផលប្រយោជន៍ស្របច្បាប់របស់វិនិយោគិន; ព្រមទាំងបង្កលក្ខណៈងាយស្រួលដល់សហគ្រាសក្នុងការកៀរគរប្រភពទុនរយៈពេលមធ្យម និងវែង ដើម្បីបម្រើឱ្យសកម្មភាពផលិតកម្ម អាជីវកម្ម និងការវិនិយោគអភិវឌ្ឍន៍។ អនុក្រឹត្យលេខ ២០០/២០២៦/NĐ-CP មានចំណុចថ្មីៗមួយចំនួនដែលគួរឱ្យយកចិត្តទុកដាក់ដូចខាងក្រោម៖

ចែងច្បាស់លាស់អំពីគោលបំណងបោះផ្សាយ និងការគ្រប់គ្រងការប្រើប្រាស់ប្រភពទុនសញ្ញាបណ្ណ

អនុក្រឹត្យបានចែងច្បាស់លាស់ថា គោលបំណងនៃការបោះផ្សាយគឺដើម្បីអនុវត្តគម្រោងវិនិយោគ ទៅតាមទម្រង់វិនិយោគនានាដែលបានកំណត់នៅក្នុងច្បាប់ស្តីពីការវិនិយោគ; ទន្ទឹមនឹងនោះ បានបំពេញបន្ថែមនូវបទប្បញ្ញត្តិដែលថា ប្រភពទុនបានមកពីការបោះផ្សាយសញ្ញាបណ្ណ ត្រូវតែសហគ្រាសតាមដានដោយឡែក ដើម្បីធានាបាននូវការប្រើប្រាស់ទុន និងគ្រប់គ្រងការប្រើប្រាស់ទុនឱ្យចំគោលបំណង ទៅតាមផែនការបោះផ្សាយ និងខ្លឹមសារនៃការប្រកាសព័ត៌មានជូនវិនិយោគិន។ ក្នុងករណីដែលសហគ្រាសបោះផ្សាយតាមរយៈភាគីទីពីរ ដើម្បីប្រើប្រាស់ប្រភពទុនប្រមូលបានពីការផ្តល់ជូនលក់សញ្ញាបណ្ណទៅក្នុងគម្រោងវិនិយោគ គឺត្រូវតែមានវិធានការតាមដាន គ្រប់គ្រង និងត្រួតពិនិត្យភាគីទីពីរក្នុងការប្រើប្រាស់ប្រភពទុនដែលប្រមូលបានពីការផ្តល់ជូនលក់នោះឱ្យចូលទៅក្នុងគម្រោងវិនិយោគ ទៅតាមផែនការបោះផ្សាយយ៉ាងត្រឹមត្រូវ។

ម្យ៉ាងវិញទៀត ដើម្បីបង្កើនប្រសិទ្ធភាពអតិបរមានៃលំហូរទុនសម្រាប់សហគ្រាស និងការពារផលប្រយោជន៍របស់វិនិយោគិនដែលទិញសញ្ញាបណ្ណ អនុក្រឹត្យបានបំពេញបន្ថែមនូវបទប្បញ្ញត្តិអនុញ្ញាតឱ្យសហគ្រាសប្រើប្រាស់ប្រភពទុនប្រមូលបានពីការផ្តល់ជូនលក់សញ្ញាបណ្ណ ដើម្បីយកទៅផ្ញើនៅធនាគារពាណិជ្ជ ឬសាខាធនាគារបរទេស ឬទិញវិញ្ញាបនបត្រប្រាក់បញ្ញើដែលបោះផ្សាយដោយធនាគារពាណិជ្ជ ឬសាខាធនាគារបរទេស ក្នុងករណីដែលមិនទាន់ដល់ពេលត្រូវបើកប្រាក់កម្ចីតាមវឌ្ឍនភាព។

បទប្បញ្ញត្តិក៏បានអនុញ្ញាតឱ្យសហគ្រាសផ្លាស់ប្តូរលក្ខខណ្ឌ និងខសន្យានៃសញ្ញាបណ្ណ ឬផ្លាស់ប្តូរគោលបំណងបោះផ្សាយនៅក្នុងផែនការបោះផ្សាយ ក្នុងករណីឆ្លើយតបបានតាមបទប្បញ្ញត្តិដូចជា៖ ត្រូវបានអនុម័តដោយស្ថាប័នមានសមត្ថកិច្ច, ទទួលបានការយល់ព្រមពីម្ចាស់កម្មសិទ្ធិសញ្ញាបណ្ណដែលតំណាងឱ្យចាប់ពី ៦៥% នៃចំនួនសញ្ញាបណ្ណសរុបប្រភេទដដែលដែលកំពុងចរាចរលើទីផ្សារឡើងទៅ, និងបានបង្វិលសងទិញសញ្ញាបណ្ណមុនកាលកំណត់ជាស្ថាពរ ចំពោះបណ្តាម្ចាស់កម្មសិទ្ធិសញ្ញាបណ្ណដែលមិនយល់ព្រមលើការផ្លាស់ប្តូរលក្ខខណ្ឌ ខសន្យានៃសញ្ញាបណ្ណ ឬការផ្លាស់ប្តូរគោលបំណងបោះផ្សាយនៅក្នុងផែនការបោះផ្សាយ។

ការបែងចែកយ៉ាងច្បាស់លាស់នូវការទទួលខុសត្រូវរបស់ស្ថាប័ន និងអង្គភាពនីមួយៗ ក្នុងការងារគ្រប់គ្រង ត្រួតពិនិត្យ អធិការកិច្ច ពិនិត្យឡើងវិញ និងការចាត់វិធានការលើការបំពាន

អនុក្រឹត្យបានបែងចែកយ៉ាងច្បាស់លាស់នូវការទទួលខុសត្រូវរបស់ស្ថាប័ន និងអង្គភាពនីមួយៗ ក្នុងការងារគ្រប់គ្រង ត្រួតពិនិត្យ អធិការកិច្ច ពិនិត្យឡើងវិញ និងការចាត់វិធានការលើការបំពាន ចំពោះសកម្មភាពផ្តល់ជូនលក់សញ្ញាបណ្ណសាជីវកម្មជាលក្ខណៈបុគ្គល ទៅតាមមុខសញ្ញាគ្រប់គ្រង; ទន្ទឹមនឹងនោះ បានបង្កើនការវិមជ្ឈការ និងការផ្ទេរសិទ្ធិអំណាចជូនរដ្ឋបាលមូលដ្ឋាន (គណៈកម្មាធិការប្រជាជនថ្នាក់ខេត្ត) ក្នុងការងារគ្រប់គ្រង អធិការកិច្ច ពិនិត្យឡើងវិញ និងការចាត់វិធានការលើការបំពាននៅក្នុងភូមិសាស្ត្ររបស់ខ្លួន។

ទន្ទឹមនឹងនោះ អនុក្រឹត្យបានបំពេញបន្ថែមនូវបណ្តាបទប្បញ្ញត្តិស្តីពីការចាត់វិធានការលើការបំពាន ការដោះស្រាយវិវាទ និងការសងការខូចខាត ដើម្បីបង្កើតជាមូលដ្ឋានគតិយុត្តកាន់តែច្បាស់លាស់ ក្នុងការការពារសិទ្ធិ និងផលប្រយោជន៍ស្របច្បាប់របស់បណ្តាអង្គភាពដែលចូលរួមក្នុងទីផ្សារ។

ការប្រកាសដាក់ឱ្យប្រើប្រាស់នូវអនុក្រឹត្យលេខ ២០០/២០២៦/NĐ-CP គឺជាជំហានបង្កើនភាពសុក្រឹតដ៏សំខាន់មួយ នៃក្របខ័ណ្ឌគតិយុត្តស្តីពីសញ្ញាបណ្ណសាជីវកម្មជាលក្ខណៈបុគ្គល ដែលរួមចំណែកលើកកម្ពស់តម្លាភាព សុវត្ថិភាព និងនិរន្តរភាពនៃទីផ្សារ; ព្រមទាំងបង្កលក្ខណៈងាយស្រួលដល់សហគ្រាសក្នុងការកៀរគរទុនប្រកបដោយប្រសិទ្ធភាព និងពង្រីកតួនាទីនៃទីផ្សារទុន ក្នុងនាមជាច្រកនាំទុនរយៈពេលមធ្យម និងវែងសម្រាប់ខឿនសេដ្ឋកិច្ច។

ការបំបែកដាច់ដោយឡែកពីគ្នានូវលក្ខខណ្ឌ សំណុំឯកសារ លំដាប់លំដោយ និងនីតិវិធីនៃការផ្តល់ជូនលក់ ទៅតាមប្រភេទសហគ្រាស

អនុក្រឹត្យបានចែងអំពីការបំបែកដាច់ដោយឡែកពីគ្នានូវលក្ខខណ្ឌ សំណុំឯកសារ លំដាប់លំដោយ និងនីតិវិធីនៃការផ្តល់ជូនលក់ ទៅតាមក្រុមមុខសញ្ញាចំនួន ២ រួមមាន៖ (i) ជាក្រុមហ៊ុនមហាជន ក្រុមហ៊ុនមូលបត្រ ក្រុមហ៊ុនគ្រប់គ្រងការវិនិយោគមូលបត្រ និង (ii) មិនមែនជាក្រុមហ៊ុនមហាជន ក្រុមហ៊ុនមូលបត្រ ក្រុមហ៊ុនគ្រប់គ្រងការវិនិយោគមូលបត្រ។ ការបែងចែកនេះ គឺដើម្បីបង្កលក្ខណៈងាយស្រួលដល់ការអនុវត្ត និងការដាក់ឱ្យដំណើរការ ព្រមទាំងបង្កើតភាពងាយស្រួលក្នុងការបែងចែកភារកិច្ចគ្រប់គ្រង អធិការកិច្ច ពិនិត្យឡើងវិញ និងការចាត់វិធានការលើការបំពាន ទៅតាមក្រុមមុខសញ្ញានីមួយៗដែលពាក់ព័ន្ធ។

ចំពោះលក្ខខណ្ឌនៃការផ្តល់ជូនលក់សញ្ញាបណ្ណសាជីវកម្មជាលក្ខណៈបុគ្គល អនុក្រឹត្យបានបំពេញបន្ថែមនូវលក្ខខណ្ឌដែលថា សហគ្រាសត្រូវតែមានសូចនាករបំណុលដែលត្រូវសង (រួមទាំងតម្លៃនៃសញ្ញាបណ្ណដែលគ្រោងនឹងបោះផ្សាយ) មិនលើសពី ៥ ដង នៃទុនម្ចាស់កម្មសិទ្ធិ យោងតាមច្បាប់ស្តីពីសហគ្រាសដែលបានធ្វើវិសោធនកម្មក្នុងឆ្នាំ ២០២៥។ ករណីមួយចំនួនត្រូវបានលើកលែងមិនអនុវត្តរួមមាន៖ អង្គភាពបោះផ្សាយជាសហគ្រាសរដ្ឋ, សហគ្រាសបោះផ្សាយសញ្ញាបណ្ណដើម្បីអនុវត្តគម្រោងអចលនទ្រព្យ, គ្រឹះស្ថានឥណទាន, សហគ្រាសអាជីវកម្មធានារ៉ាប់រង...

អនុក្រឹត្យបានបែងចែកខ្សែចរន្តនៃក្រុមវិនិយោគិនដែលចូលរួមទិញ ជួញដូរ និងផ្ទេរប្រកបដោយភាពបត់បែននូវសញ្ញាបណ្ណសាជីវកម្មជាលក្ខណៈបុគ្គល ទៅតាមប្រភេទសញ្ញាបណ្ណនីមួយៗឱ្យស្របទៅតាមបទប្បញ្ញត្តិនៃច្បាប់ស្តីពីមូលបត្រ និងច្បាប់ស្តីពីសហគ្រាស។ ផ្អែកលើមូលដ្ឋាននេះ បានចែងច្បាស់លាស់ថា វិនិយោគិនជំនាញដែលជាបុគ្គលរូបវន្ត ត្រូវបានអនុញ្ញាតឱ្យចូលរួមទិញ ជួញដូរ និងផ្ទេរចំពោះសញ្ញាបណ្ណបំលែងរបស់ក្រុមហ៊ុនមហាជន ក្រុមហ៊ុនមូលបត្រ និងក្រុមហ៊ុនគ្រប់គ្រងមូលនិធិ; ចំពោះករណីផ្តល់ជូនលក់សញ្ញាបណ្ណផ្សេងៗទៀត វិនិយោគិនជំនាញដែលជាបុគ្គលរូបវន្ត ត្រូវបានអនុញ្ញាតឱ្យចូលរួមទិញ ជួញដូរ និងផ្ទេរ លុះត្រាតែសញ្ញាបណ្ណនោះមានចំណាត់ថ្នាក់ឥណទាន និងមានទ្រព្យសម្បត្តិធានា ឬសញ្ញាបណ្ណដែលមានចំណាត់ថ្នាក់ឥណទាន និងមានការធានាការទូទាត់ពីគ្រឹះស្ថានឥណទាន។

ទន្ទឹមនឹងនោះ ចែងច្បាស់លាស់ថា ទ្រព្យសម្បត្តិធានា ឬការធានាការទូទាត់ ត្រូវតែធានាការទូទាត់បានទាំងស្រុងនូវប្រាក់ដើមនៃសញ្ញាបណ្ណ។ ទ្រព្យសម្បត្តិធានាមិនរាប់បញ្ចូលនូវចំណែកភាគហ៊ុន, ភាគហ៊ុន, សញ្ញាបណ្ណ, ឬចំណែកទុនវិភាគទានរបស់សហគ្រាសបោះផ្សាយនោះឡើយ។

ចំពោះសំណុំឯកសារផ្តល់ជូនលក់សញ្ញាបណ្ណសាជីវកម្មជាលក្ខណៈបុគ្គល អនុក្រឹត្យបានលុបចោលនូវបទប្បញ្ញត្តិដែលអនុញ្ញាតឱ្យសហគ្រាសប្រើប្រាស់របាយការណ៍ហិរញ្ញវត្ថុពាក់កណ្តាលឆ្នាំ, របាយការណ៍ហិរញ្ញវត្ថុត្រីមាសទី ៤ ឬរបាយការណ៍ហិរញ្ញវត្ថុប្រចាំខែជិតបំផុតដែលបានឆ្លងកាត់ការពិនិត្យឡើងវិញ ឬសវនកម្ម ដើម្បីធានាឱ្យស្របទៅនឹងបទប្បញ្ញត្តិថ្មីនៃច្បាប់ស្តីពីសហគ្រាសឆ្នាំ ២០២៥ អំពីលក្ខខណ្ឌសូចនាករបំណុលដែលត្រូវសងធៀបនឹងទុនម្ចាស់កម្មសិទ្ធិ ផ្អែកលើរបាយការណ៍ហិរញ្ញវត្ថុប្រចាំឆ្នាំដែលបានធ្វើសវនកម្ម។ ទន្ទឹមនឹងនោះ ចែងច្បាស់លាស់ថា ក្នុងករណីសហគ្រាសបោះផ្សាយជាក្រុមហ៊ុនមេ គឺត្រូវតែមានរបាយការណ៍ហិរញ្ញវត្ថុរួម និងរបាយការណ៍ហិរញ្ញវត្ថុរបស់ក្រុមហ៊ុនមេដែលបានធ្វើសវនកម្មជាស្ថាពរ; បំពេញបន្ថែមនូវតម្រូវការដែលថា សហគ្រាសត្រូវតែមានសេចក្តីសម្រេចរបស់ស្ថាប័នមានសមត្ថកិច្ចរបស់សហគ្រាស ក្នុងការអនុម័តលើសំណុំឯកសារផ្តល់ជូនលក់ដែលបានឆ្លើយតបគ្រប់គ្រាន់តាមលក្ខខណ្ឌ ព្រមទាំងមានព័ត៌មាន និងឯកសារនៅក្នុងសំណុំឯកសារប្រកបដោយភាពគ្រប់គ្រាន់ ស្របច្បាប់ ត្រឹមត្រូវ និងស្មោះត្រង់។

ចំពោះលំដាប់លំដោយ និងនីតិវិធីនៃការផ្តល់ជូនលក់ អនុក្រឹត្យបានចែងច្បាស់លាស់អំពីយន្តការចែករំលែកព័ត៌មាន ដើម្បីបម្រើឱ្យការងារតាមដាន និងគ្រប់គ្រង; បំភ្លឺឱ្យបានច្បាស់លាស់នូវការទទួលខុសត្រូវរបស់សហគ្រាសបោះផ្សាយ ក្នុងការផ្តល់សំណុំឯកសារពេញលេញជូនវិនិយោគិន; ទន្ទឹមនឹងនោះ ចែងថាមានតែគ្រឹះស្ថានឥណទានប៉ុណ្ណោះ ទើបត្រូវបានអនុញ្ញាតឱ្យបោះផ្សាយសញ្ញាបណ្ណជាលក្ខណៈបុគ្គលជាច្រើនដំណាក់កាល ដើម្បីឱ្យស្របទៅនឹងយន្តការគ្រប់គ្រង និងត្រួតពិនិត្យជាលក្ខណៈពិសេសនៃច្បាប់ស្តីពីគ្រឹះស្ថានឥណទាន។

ការបង្កើនតម្លាភាពព័ត៌មាន

អនុក្រឹត្យបានបំពេញបន្ថែមនូវបទប្បញ្ញត្តិស្តីពីការទទួលខុសត្រូវរបស់បណ្តាអង្គការ និងបុគ្គលដែលពាក់ព័ន្ធនឹងសំណុំឯកសារ ឯកសារ និងរបាយការណ៍បម្រើឱ្យសកម្មភាពបោះផ្សាយសញ្ញាបណ្ណ; បំភ្លឺឱ្យបានច្បាស់លាស់នូវការទទួលខុសត្រូវរបស់បណ្តាអង្គភាពផ្តល់សេវាកម្ម ដូចជា៖ អង្គភាពប្រឹក្សាយោបល់លើសំណុំឯកសារ, ភ្នាក់ងារបោះផ្សាយ, អង្គភាពសវនកម្ម, សវនករដែលមានលក្ខណៈសម្បត្តិគ្រប់គ្រាន់, អ្នកចុះហត្ថលេខាលើរបាយការណ៍សវនកម្ម ឬរបាយការណ៍ពិនិត្យឡើងវិញ, អង្គភាពចំណាត់ថ្នាក់ឥណទាន និងសហគ្រាសវាយតម្លៃតម្លៃ។

ទន្ទឹមនឹងនោះ អនុក្រឹត្យបានបង្កើនកាតព្វកិច្ចប្រកាសព័ត៌មានរបស់សហគ្រាសបោះផ្សាយ ដើម្បីធានាសិទ្ធិ និងផលប្រយោជន៍ស្របច្បាប់របស់វិនិយោគិន។ ផ្អែកលើមូលដ្ឋាននេះ សហគ្រាសត្រូវតែអនុវត្តការប្រកាសព័ត៌មានតាមកាលកំណត់ និងការប្រកាសព័ត៌មានមិនប្រក្រតី រហូតទាល់តែសញ្ញាបណ្ណមិនមានសល់ទំហំបំណុល; ប្រកាសអំពីស្ថានភាពនៃការប្រើប្រាស់ប្រភពទុនបានមកពីការបោះផ្សាយ រហូតទាល់តែបើកប្រាក់កម្ចីអស់ចំនួនទឹកប្រាក់ដែលបានកៀរគរ ឬមិនមានសល់បំណុលសញ្ញាបណ្ណ ទៅតាមពេលវេលាណាមួយដែលមកដល់មុន៕

ការស្នើឱ្យបង្កើន ៨% នូវប្រាក់របបឧបត្ថម្ភអាទិភាពសម្រាប់អ្នកមានគុណបំណាច់ ចាប់ពីថ្ងៃទី ០១ ខែកក្កដា ឆ្នាំ ២០២៦ យុគសម័យ - ក្រសួងមហាផ្ទៃកំពុងប្រមូលមតិលើសេចក្តីព្រាងអនុក្រឹត្យ ស្តីពីការកំណត់កម្រិតទទួលបានប្រាក់របបឧបត្ថម្ភ អាទិភាព និងរបបអាទិភាពផ្សេងៗសម្រាប់អ្នកមានគុណបំណាច់ចំពោះបដិវត្តន៍។ ក្នុងនោះ មានការស្នើឱ្យបង្កើនកម្រិតប្រាក់របបឧបត្ថម្ភអាទិភាពគោល ពី ២.៧៨៩.០០០ ដុង ឡើងដល់ ៣.០១២.០០០ ដុងក្នុងមួយខែ ដែលស្មើនឹងការកើនឡើង ៨% ដោយចាប់ផ្តើមអនុវត្តចាប់ពីថ្ងៃទី ០១ ខែកក្កដា ឆ្នាំ ២០២៦ តទៅ។

ឱកាសជួបជាមួយអ្នកនិពន្ធអឺរ៉ុបសហសម័យជាច្រើនរូប ក្នុងកម្មវិធី “ទិវាអក្សរសាស្ត្រអឺរ៉ុប ២០២៦” នៅវៀតណាម យុគសម័យ - នាថ្ងៃទី ០៦ ខែឧសភា នៅវិទ្យាស្ថាន Goethe ទីក្រុងហាណូយ បានប្រព្រឹត្តទៅសន្និសីទសារព័ត៌មានប្រកាសកម្មវិធី "ទិវាអក្សរសាស្ត្រអឺរ៉ុប ២០២៦" ក្រោមប្រធានបទ "ពីយើងម្នាក់ៗ ដល់ពួកយើងទាំងអស់គ្នា៖ ភាពឯកោ និងសាមគ្គីភាពក្នុងអក្សរសាស្ត្រអឺរ៉ុប"។ ក្នុងក្របខ័ណ្ឌនៃមហោស្រពនេះ សាធារណជនវៀតណាមនឹងមានឱកាសជួបជាមួយអ្នកនិពន្ធអឺរ៉ុបសហសម័យល្បីៗជាច្រើនរូប ដូចជា Sasha Marianna Salzmann, Miku Sophie Kühmel, ...